San Mateo 16

1Majta a'ɨ́ɨme ɨ́ fariseos, majta a'ɨ́ɨme ɨ́ saduceos, a'ɨ́ɨ mú á e'iré'ene a'u tɨ a'utéveeca'a ɨ́ Jesús, mej mi raatémua'itɨn hua'itzi jɨme'e. A'ɨ́j mú jɨ́n miyen raatáhuaviiri'i tɨ a'ɨ́ɨn hua'utaseíjrate'en ɨ́ mej jɨ́n ráamua'aree tɨ júte'e é'eme'ecan ɨ́ tɨ jetzen araújca'ane. 2Ajta a'ɨ́ɨn Jesús, ayée pu tihua'utá'ixaa tɨjɨ́n: ―Mú'een xu raayɨ́'ɨtɨ a'ij sej ye'í tiu'utaxáj a'ij tɨ ti'itɨ́j rɨni u júte'e. Tɨ́'ɨj huatechuíixare, ayée xu tí'ixaxa'a tɨ nu'u naa hua'é'ene'e a'ame a'iné huaré'epá'uvi'i pu já'araa. 3Na'ari caí, tɨ́'ɨj huatapuá'are, ayée xu seajta siyen jɨ́me'en tí'ixaxa'a yee íjii mú huatéviiyi, a'iné huaré'epá'uvi'i pu já'araa, majta nu'u ra'utanáa. ’Mú'een xu xaa raayɨ́'ɨtɨ a'ij sej ye'í tiu'utaxáj a'ij tɨ ti'itɨ́j rɨni u júte'e. Mɨ́ seajta mú'een, caxu a'atzu raayɨ́'ɨtɨ a'ij sej ye'í tiu'utaxáj a'ɨ́jna jɨme'e tɨ ari teja'uré'enejsin ɨ́ xɨcájra'a, tɨ jetzen Dios ra'antipuá'ajte'en nain. 4’Mú'een mɨ sej a'ij pua'a tí'iteteɨte, mɨ sej jeíhua jɨ́n auté'ɨtzeaara, ayée xu rahuauca ɨ́ sej jɨ́n ráamua'aree tɨ júte'e é'eme'ecan ɨ́ nej jetzen aránca'ane. Canu xaa ne'u ti'itɨ́j amuaataseíjrate'esin sino ayée nu'u, ɨ́ tɨ é'eseijre'e jɨ́me'en a'ɨ́jna ɨ́ Jonás. Aj pu i Jesús á huaja'utéhuii. Tɨ'ɨj jí iyá'uraa. 5Matɨ́'ɨj antacɨ́j utavén pújme'en a'ɨ́ɨme ɨ́ mej Jesús jamuan á'ujujhua'ane'e, a'ɨ́ɨ mú ya'uhuá'axɨ ɨ́ mej ye'era'ɨ́'ɨpɨ'ɨn ɨ́ pan mej ráacua'ani. 6Aj pu i Jesús ayén tihua'utá'ixaa tɨjɨ́n: ―Rɨ́'ɨ xu'u mú'een, se'ɨ́jna jɨme'e fariseos mej ru'uteáaratzaca ɨ́ pan tzajta'a tɨ ij ájcu'ustaa, seajta se'ɨ́jna jɨme'e saduceos mej majta ru'uteáaratzaca. ―Ayee pu tihua'utá'ixaa. 7Majta a'ɨ́ɨme ɨ́ mej Jesús jamuan á'ujujhua'ane'e, a'ɨ́ɨ mú tí'iru'ixaate'eca'a rujɨ́ɨmua'a. Ayee mú tiu'utaxájtaca'a tɨjɨ́n: ―Ayee tiu'utaxájtaca'a amɨ́jna, a'iné catu ye'erá'ɨ'ɨpɨ ɨ́ pan. 8Aj pu i Jesús ráamua'areeri'i a'ij mej ye'í tí'ixajtaca'a. Tɨ'ɨj jí ayén tihua'uta'íhua'uri'i tɨjɨ́n: ―Mú'een, mɨ sej caí a'atzu té'atzaahuate'e, ¿a'iné 'een jɨ́n siyen tí'iru'ixaate'e yee sej caí pan tícha'ɨɨ? 9¿Ni secaí xɨ yaú'itɨe? ¿Ni seri ya'uhuá'axɨ a'achú tɨ pua'an sicɨ́ri te'irájraa ɨ́ pan tɨ te'avá'aturaa netɨ́'ɨj hua'uré'e'ɨ'ɨpɨ'ite ɨ́ mej anxɨ́j vi'ira'a ará'aseca'a ɨ́ teɨte ne'ɨ́jna jɨme'e ɨ́ ta'anxɨ́vi ɨ́ pan? 10’¿Ni seajta seri ya'uhuá'axɨ a'achú sej pua'amé caj te'evé'ejɨste ɨ́ sicɨ́ri jetze netɨ́'ɨj hua'uré'e'ɨ'ɨpɨ'ite ɨ́ mej muáacua vi'ira'a ará'aseca'a ɨ́ teɨte ne'ɨ́jna jɨme'e ɨ́ ta'aráhua'apua ɨ́ pan? 11’¿A'iné auj tí'irɨ'ɨri sej caí yaú'itɨe se'ɨ́jna, ɨ́ nej caí já'amua'ixaate'e ne'ɨ́jna jɨme'e ɨ́ pan sino rɨ́'ɨ xu'u mú'een se'ɨ́jna ɨ́ mej caí jé'iyecan jɨ́n tí'ixaxa'a a'ɨ́ɨme ɨ́ fariseos, majta a'ɨ́ɨme ɨ́ saduceos? 12Aj mú xaa mi yaú'itɨée muá'araa tɨ ayén tihuá'ixaate'e a'ɨ́jna jɨme'e a'ij mej ye'í tí'imua'ataca a'ɨ́ɨme ɨ́ fariseos, majta a'ɨ́ɨme ɨ́ saduceos. Capu xaa ne'u ayén a'ɨ́jna jɨ́n tihua'utá'ixaa yee rɨ́'ɨ xu'u mú'een se'ɨ́jna jɨme'e ɨ́ mej jɨ́n ru'uteáaratzaca ɨ́ pan tzajta'a. 13Tɨ'ɨj jí Jesús a'uun a'ará'a a'ujna já'ahua'a a'uun tɨ e'ejtéme'ecan tɨ ayén téja'arájtehuaa tɨjɨ́n Cesarea de Filipo. Aj pu i ayén tihua'uta'íhua'uri'i a'ɨ́mej ɨ́ mej jamuan á'ujujhua'ane'e tɨjɨ́n: ―¿A'iquí metí'ixa ɨ́ teɨte ja'atɨ́ nej pú'een i nej neajta teáata'a jetze airáane? 14Ayee mú tiraatá'ixaa tɨjɨ́n: ―Seica mú miyen ti'ixa pej nu'u a'ɨ́ɨn pú'een a'ɨ́jna ɨ́ Juan teecan tɨ tí'itemuaɨ'ɨhuacare'e, majta seica miyen ti'ixa pej nu'u a'ɨ́ɨn pú'een a'ɨ́jna ɨ́ Elías, majta seica miyen tɨjɨ́n pej nu'u a'ɨ́ɨn pú'een a'ɨ́jna Jeremías teecan na'ari pej nu'u seɨ́j pú'een a'ɨ́ɨme ɨ́ mej Dios jetze me'ecan tí'ixaxa'a. 15Aj pu i ayén tihua'uta'íhua'uri'i tɨjɨ́n: ―Ari mú'een, ¿a'iné tejamuá'amitɨejte'e a'atani nej pú'een? 16Ajta a'ɨ́jna ɨ́ Simón, tɨ ajta i'i Pedro, a'ɨ́ɨ pu ayén tiraatá'ixaa tɨjɨ́n: ―Mu'ée pej pe'ɨ́n pú'een a'ɨ́jna ɨ́ Cɨríistu'u tɨ Dios án yá'ujra ɨ́ ɨpuari japua, mú'ee pej pe'ɨ́n pú'een a'ɨ́jna ɨ́ yaujra'an ɨ́ Dios tɨ i'i ruuri. 17Jesús pu ayén tiraatá'ixaa tɨjɨ́n: ―Patá'aj huá'atemua'ave'en mú'ee, Simón, i pej i'i yaujra'a a'ɨ́jna ɨ́ Jonás. Huá'atemua'ave'e a'ɨ́jna jɨme'e, a'iné capu ja'atɨ́ ayén timuaatá'ixaa tɨ íiyen seijre'e chaanaca japua, sino a'ɨ́jna tɨ ní'iya'upua tɨ júte'e é'eseijre'e u ta japua, a'ɨ́ɨ pu xaa ayén timuaatá'ixaa. 18’Neajta inee, ayée nu hui tí'imua'ixaate'e pej mú'ee pe'ɨ́n pú'een ɨ́ Pedro, ɨ́ pej pajta piyen ántehuaa tɨjɨ́n ɨ́ tɨ i'i tetej. Neajta inee, ne'íjna japua i tetej, nee nu rá'ajtaahua ɨ́ neteyuu. Ajta, capu rɨ'ɨríista a'ame tɨ a'ɨ́ɨn tiyaaru'u raatémua'itɨn a'ɨ́jna ɨ́ tɨ a'ɨ́jna jɨ́n antiújmua'aree mej mi huácui'ini ɨ́ teɨte. 19’Nee nu muaatá'asin pej pe'ɨ́jna jɨ́n antí'amua'aréere pej tihua'antácuune'en ɨ́ teɨte mej mi a'uteárute a'ájna Dios tɨ tejé'aijta. Patɨ́j pena'a pej te'iteanán íiyen chaanaca japua, Dios pu ayén che'atá na'a te'iteánajsin u ta japua. Ajta patɨ́j pena'a pej te'antácuuna íiyen chaanaca japua, Dios pu ajta ayén che'atá na'a te'antácuuna u ta japua. ―Ayee pu tiraatá'ixaa a'ɨ́jna ɨ́ Jesús. 20Aj pu i Jesús ayén tihuau'íjca a'ɨ́mej ɨ́ mej jamuan á'ujujhua'ane'e mej nu'u caí ja'atɨ́ ixaate'e tɨ a'ɨ́ɨn pú'een a'ɨ́jna tɨ Dios án yá'ujra ɨ́ ɨpuari japua. 21A'ájná'ɨmua, Jesús pu a'utéjche tɨ tihua'utá'ixaate'en a'ɨ́mej ɨ́ mej jamuan á'ujujhua'ane'e tɨ nu'u ayén ruxe'eve'e tɨ á'ura'ani a'ánna Jerusalén. A'uu pu nu'u jeíhua rajpuaíitzi a'ame. Majta nu'u a'ɨ́ɨme ɨ́ mej hua'avaujsi ɨ́ mej Israél jetze ajtéme'ecan, majta nu'u a'ɨ́ɨme ɨ́ mej tí'aijta hua'atéyujta'a, majta nu'u a'ɨ́ɨme ɨ́ mej tiú'ujmua'ate ɨ́ yu'uxari jetze, naími'i mú a'ij pua'a raruuren. Ruxe'eve'e nu'u mej raajé'ica. Aj pu ijta huatarújsin huaíca xɨcájra'a jetze. 22Ajta a'ɨ́ɨn ɨ́ Pedro, a'ɨ́ɨ pu ra'iráavi'itɨ 'á'ayee. Aj pu i a'utéjche tɨ ra'ajteá'axɨ'ɨn a'ɨ́jna ɨ́ Jesús. Ayee pu tiraatá'ixaa tɨjɨ́n: ―Ché'e a'ij tí'imuavaɨre'e tɨ ij caí ayén tí'imuaruure, nevástara'a. 23Aj pu i pɨ́ ancuré'ejvej a'ɨ́jna ɨ́ Jesús. Ayee pu tiraatá'ixaa a'ɨ́jna ɨ́ Pedro tɨjɨ́n: ―Aricu á'ura'a, mɨ pej i'i Satanás. Jé'ecan pej tina'antiú'uuni'i nej ni auteáturan ɨ́ Dios jemi a'iné capej piyen tí'imua'atze a'ij tɨ tí'ijxe'eve'e ɨ́ Dios, sino a'ij mej tí'ijxe'eve'e ɨ́ teɨte. 24Aj pu i Jesús ayén tihua'utá'ixaa a'ɨ́mej ɨ́ mej jamuan á'ujujhua'ane'e tɨjɨ́n: ―Tɨ́ pua'a ja'atɨ́ raxɨ́'eve'e tɨ nee jamuan á'uche'ecane'en, ruxe'eve'e tɨ a'ɨ́ɨn caí ché'e ayén rɨjca a'ij tɨ tí'ijxe'eve'e ruseɨ́j, sino ayée pu tiú'ujxe'eve'e tɨ a'ɨ́ɨn rajpuaíitzi á'ara'ani nee jamuan ruxɨ́'evi'ira'a jɨme'e. 25’Ayee pu'u, ja'atɨ́ tɨ na'a tɨ tí'itese'e tɨ caí huámɨ'ɨni, a'ɨ́ɨ pu xaa ne'u mɨ'ɨni. A'ɨ́j pu á'ujɨsin ɨ́ ruxɨ́ejniu'uca tɨ auj ruurica'a. Ajta a'ɨ́ɨn ɨ́ ja'atɨ́ tɨ ayén éeni'icɨ'e huámɨ'ɨni a'ɨ́jna jɨme'e tɨ na'ará'astijre ineetzi, a'ɨ́ɨ pu xaa ne'u rateuni ɨ́ ruxɨ́ejniu'uca tɨ auj ruurica'a. 26’Ahuii, tɨ pua'a ja'atɨ́ nain huamuá'itɨn naíjmi'i tɨ íiyen seijre'e chaanaca japua, ¿ni qui tiraatéva'ɨri a'ɨ́jna tɨ raamuá'itɨ tɨ pua'a yá'urɨeeni ɨ́ ruxɨ́ejniu'uca tɨ auj ruurica'a? Capu xaa ne'u a'atzu tiraatéva'ɨri. Ari, ¿ti'itáani jɨ́n tí'ipuata'atan a'ɨ́jna ɨ́ ja'atɨ tɨ ij Dios ajtahua'a raatátɨsten ɨ́ xɨéjniu'ucare'ara'an tɨ auj ruurica'a? Capu ti'itɨ́j jɨ́n tí'ipuata'atan xaa ne'u. 27’Neajta inee, i nej neajta teáata'a jetze airáane, nee nu neajtahua'a yé ve'ecánejsin. Ayee nu che'atá nena'a huataseíjre'esin nain jɨme'e tɨ́j ajta seijre'e ɨ́ Dios tɨ ní'iya'upua. Huá'a jamuan nu hui neajta huataseíjre'esin a'ɨ́ɨme ɨ́ mej tí'ivaɨre'e ɨ́ ta japua. Neajta nu tihua'utá'asin seɨ́j neajta seɨ́j naíjmi'ica a'ij tɨ tihua'uvíjte'e a'ij mej ti'itɨ́j huáruu, seɨ́j ajta mɨ seɨ́j. 28’Ayee nu tejá'amua'ixaate'e tzáahuati'ira'a jɨme'e, seica mej yé huaté'uuca ayajna, a'ɨ́ɨ mú caí huácui'ini ajta mena'a caí amuacaícan naaseíj ɨ́ nej neajta teáata'a jetze airáane nej ni yé tanén nej ni tiu'uta'aíjta íiyen chaanaca japua.

will be added

X\