San Mateo 15

1Matɨ́'ɨj mi seica ave'eré'ene ɨ́ Jesús jemi. A'ɨ́ɨme mú a'ɨ́ɨn pú'een ɨ́ fariseos, majta a'ɨ́ɨme ɨ́ mej tí'imua'ata ɨ́ yu'uxari jetze. A'uu mú e'eráacɨ u Jerusalén. Aj mú mi miyen tiraata'íhua'uri'i tɨjɨ́n: 2―¿A'iné 'een jɨ́n mecaí rá'aste ɨ́ tavaújsimua'a teeca tihuá'aye'ira a'ɨ́ɨme ɨ́ mé á jamuan á'ujujhua'an? Camu miyen rá'aste me'ɨ́jna jɨme'e ɨ́ mej caí anaújmuaijte'axɨ'ɨn metí'icua'aca. 3Ajta a'ɨ́ɨn ɨ́ Jesús, ayée pu tihua'utá'ixaa tɨjɨ́n: ―Seajta mú'een, ¿a'iné 'een jɨ́n siyen mé rúujɨpua ɨ́ tɨ tiu'uta'aíjtaca'a ɨ́ Dios sej si se'ɨ́jna ará'asten ɨ́ ruye'irá ɨ́ sej sena'a rájteu rujɨ́ɨmua'a? 4A'iné Dios pu ayén tiu'utaxájtaca'a a'ɨ́jna tɨ jɨ́me'en yee: “Patá'aj rá'atzaahuate'e a'atáàta, pajta a'anáàna.” Ajta ayén tɨ jɨ́me'en yee: “Setá'aj raajé'ica a'ɨ́jna ɨ́ ja'atɨ a'ij pua'a ti'ijteá'axɨ'ɨ ɨ́ rutáàta na'ari ɨ́ runáàna.” 5Mɨ́ seajta mú'een, ayée xu tí'ixaxa'a tɨ i'i xɨ́'epɨ'ɨn tɨ pua'a ja'atɨ́ ayén tihua'utá'ixaate'en ɨ́ ruvaújsimua'a tɨjɨ́n: “Nain a'achú nej caj tí'ijcha'ɨɨ, a'ɨ́j nu neri raatámuaɨ'ɨvejte ɨ́ Dios. A'ɨ́j nu jɨ́n caí ché'e tí'ijcha'ɨɨ ɨ́ nej jɨ́n amuaatévaɨre'en.” 6’Tɨ́ pua'a ja'atɨ́ ayén tihua'utá'ixaate'en ɨ́ ruvaújsimua'a, ayée che'atá tí'ixaxa'a jɨ́me'en a'ɨ́jna ɨ́ ja'atɨ yee capu ché'e ruxe'eve'e tɨ a'ɨ́ɨn hua'utévaɨre'en ɨ́ ruvaújsimua'a. Ayee xu mé tirúujɨpua se'ɨ́jna tɨ Dios jɨ́n tiu'uta'aíjtaca'a sej si ra'ará'asten se'ɨ́jna jɨme'e ɨ́ ye'irá sej siyen rujɨ́ɨmua'a sena'a tirájteu. 7’Mú'een, mɨ sej a'ij pua'a tí'iteteɨte, mɨ sej siyen rá'aste jéjre'ecɨtze'e, ayée pu tiu'utaxájtaca'a mú'ejmi jɨme'e a'ɨ́jna ɨ́ Isaías teecan, ɨ́ tɨ Dios jetze me'ecan tí'ixaxa'ata'a. Ayee pu te'uyú'uxaca'a tɨjɨ́n: 8Naa pu namuajre'e tɨ pua'a metí'ixajta neetzi jemi, mɨ majta, a'ɨ́ɨ mú meri mé núurɨe. 9Capu ti'itɨ́j vaɨre'e tɨ pua'a menaateánajche a'iné matɨ́j mena'a mej tí'imua'ata, ɨ́ mej jɨ́n tihuá'aijte'e, rujɨ́ɨmua'a mena'a rájteuve. 10Aj pu i a'ɨ́ɨn hua'utajé ɨ́ teɨte. Tɨ'ɨj jí ayén tihua'utá'ixaa tɨjɨ́n: ―Rɨ́'ɨ xu'u temua'a naa tiráanamua mú'een sej si yaú'itɨée xá'ara'ani. 11Ti'itɨ́j tɨ na'a tɨ tí'icua'iri'i, tɨ pua'a ja'atɨ́ ráacua'ani, capu a'atzu raxana'ave'e, sino a'ɨ́ɨ pu raxana'ave'e ɨ́ tɨ 'aíjninei ɨ́ téne'etze'e. 12Aj mú mi ajteáxɨɨreca'a jemin a'ɨ́ɨme ɨ́ mej jamuan á'ujujhua'ane'e. Matɨ́'ɨj mi miyen tiraata'íhua'uri'i tɨjɨ́n: ―¿Ni tzaa pe caí ramua'aree ɨ́ tɨ caí hua'aránajcheca'a a'ɨ́mej ɨ́ fariseos matɨ́'ɨj ráanamuajri'i a'ij pej tiu'utaxájtaca'a? 13Ajta a'ɨ́ɨn ɨ́ Jesús, ayée pu tihua'utá'ixaa tɨjɨ́n: ―Ayee mú 'een tɨ́j tu'upi tɨ caí ja'atɨ́ raahuáste, ruseɨ́j pu ajnéj. Ayee pu che'atá na'a huá'aruuren ɨ́ Dios tɨ́j ajta rú'uri'i ɨ́ tu'upi tɨ ruseɨ́j ajnéj a'ɨ́jna ɨ́ ja'atɨ tɨ tiu'uhuáste, a'iné a'ɨ́ɨ pu rá'ijcuuxɨjsin, ajta meteúrɨeexɨjsin ɨ́ tu'upi, Dios pu ayén che'atá na'a mé huauuhuá'axɨjsin a'ɨ́mej. 14’Miche'e miyen éene'en. Ayee mú 'een matɨ́j a'ɨ́ɨme ɨ́ mej arácucu'un ɨ́ mej huá'uvi'itɨ. Tɨ́ pua'a seɨ́j ta'arácun ayén ra'anaví'ira'a tɨ ajta arácun mej mi já'ahua'a e'ará'asti naími'i, naími'i mú atévatzɨjsin a'u tɨ e'etécun. 15Aj pu i Pedro ayén tiraatá'ixaa tɨjɨ́n: ―Taatá'ixaate'e a'ij tɨ huataújmua'a a'ɨ́jna ɨ́ niuucari ɨ́ pej pauchén raataxájtaca'a. 16Ajta Jesús ayée pu tihua'uta'íhua'uri'i tɨjɨ́n: ―¿Ni tzaa secaí seajta mú'een yaú'itɨe? 17¿Ni tzaa secaí yaú'itɨe se'ɨ́jna? Tɨ́ pua'a ja'atɨ́ ti'itɨ́j huácua'ani tɨ cuá'iri'i, a'ɨ́jna tɨ racua'ani, pua'acɨé pu me'ecan. Aj pu i ancajrupi ɨ́ téne'etze'e, a'úu pu a'aráyeijxa ɨ́ jucáara'an jetze. Ajta á'iyen í'irachu'itan ɨ́ tɨ tiú'ucuaa. 18’Mɨ́ ajta, a'ɨ́jna tɨ 'aíjninei ɨ́ téne'etze'en ɨ́ ja'atɨ, a'úu pu a'uvé'eye'i ɨ́ ru tzajta'a. A'ii pu a'ɨ́ɨn pú'een ɨ́ tɨ raxana'ave'e a'ɨ́jna ɨ́ ja'atɨ. 19Ayee pu'u xaa ne'u a'iné tzajta'an pu a'uvé'eye'i naíjmi'i ɨ́ mua'atzíira'a tɨ a'ij pua'a 'een, tɨ ca'aníjra'a ratá'aca tɨ ja'atɨ́ ayén huárɨni ɨ́ tɨ a'ij pua'a 'een, tɨ pua'a tí'itecui'ica na'ari seɨ́j jamuan ti'ihuaújxana'acɨra'aten. Ajta ɨ́ ru tzajta'a pu ajta tásiseiiri tɨ ayén ca'aníjra'a ratá'aca tɨ ayén tiú'umua'ati tɨ tiu'unáhua'an, nusu tɨ ráacuanamua na'ari tɨ a'ij pua'a tiú'ujxajtave'e huá'a jemi ɨ́ teɨte. 20’Naíjmi'i tɨ́j na'a tɨ hui ayén a'ij pua'a 'een, tɨ tásiseiiri ɨ́ ta tzajta'a, a'ɨ́ɨ pu xaa raxana'ave'e ɨ́ tevi. Ajta a'ɨ́jna tɨ caí anaujmuaíte'en tiú'ucua'ani, capu ti'itɨ́j a'ij huataújmua'a ɨ́ Dios jemi. Capu ti'itɨ́j jɨ́n auteájturaa ɨ́ Dios jemi a'ɨ́jna ɨ́ ja'atɨ tɨ caí anaujmuaíte'en tiú'ucuaa. 21Aj pu i Jesús á'uraa. A'uu pu a'ará'a a'ájna já'ahua'a chajta'a tɨ ayén téja'arájtehuaa tɨjɨ́n Tiro, ajtahua'a seɨ́j tɨ ayén tɨjɨ́n Sidón. 22Ajta, seɨ́j pu ave'eré'ene ɨ́ Jesús jemi. 'Ɨ́ita'a pu pú'een tɨ seɨj chuéjra'a japua é'eme'ecan. Ayee mú hua'atamuá'amua tɨjɨ́n Sirofenicia a'uun tɨ huacá'a pu é'echejca'a a'ɨ́jna ɨ́ 'ɨ́ita'a. A pu e'evé'eme antijíihua tɨjɨ́n: ―Nevástara'a, mú'ee pej i'i yaujra'an a'ɨ́jna ɨ́ David teecan, patá'aj ná'ancu'uvajxɨ'ɨn. Jé'ecan pu rajpuaíjtzi ɨ́ niyauj tɨ 'ɨ́ita'a a'ɨ́jna jɨme'e tɨ tiyaaru'u tzajta'an seijre'e. 23Ajta a'ɨ́jna ɨ́ Jesús, capu a'atzu huataniú. Aj mú mi ave'eré'ene a'ɨ́ɨme ɨ́ mej jamuan á'ujujhua'ane'e. Ayee mú tirájhuaviiri'i tɨjɨ́n: ―Patá'aj raata'íte tɨ á'ura'ani, a'iné ta cujta'an pu e'evé'eme antijíihua. 24Aj pu i Jesús ayén tiu'utaxájtaca'a tɨjɨ́n: ―Ayee pu Dios neja'uta'íteca'a nej á'ura'ani huá'a jemi ɨ́ mej Israél jetze ajtéme'ecan ɨ́ mej miyen seijre'e tɨ́j cáne'axɨ ɨ́ mej á'uvej. Capu neja'uta'íteca'a a'ɨ́mej jemi ɨ́ seica. 25Aj pu i a'ɨ́ɨn 'ɨ́ita'a ave'eré'ene á vejli'i jemin. Ajta títunutaca'a. Aj pu i ayén tiraatá'ixaa tɨjɨ́n: ―Nevástara'a, naatévaɨre'e. 26Aj pu i Jesús ayén tiraatá'ixaa tɨjɨ́n: ―Capu ayén tiraavíjte'e nej huá'a'ɨ'ɨpɨ'ɨri'ira'acare'en ɨ́ pan ɨ́ mej racua'aca ɨ́ tɨ'ɨríi nej ni chiicate huata'ɨ́'ɨpɨ'ite'en. 27Aj pu i a'ɨ́ɨn 'ɨ́ita'a ayén tɨjɨ́n: ―Ayej xaa ne'u ti'ayajna, nevástara'a. Aru, casi'i, a'ɨ́ɨme ɨ́ chiicate, ayée mú racua'aca me'ɨ́jna ɨ́ tɨ te'ení ɨ́ pan tɨ acajvitze meesa japua a'u mej tejé'ecua'aca a'ɨ́ɨme ɨ́ mej tihuá'aijte'e. 28Aj pu i Jesús ayén tiu'utaniú tɨjɨ́n: ―Mú'ee 'ɨ́ita'a, jé'ecan pej té'atzaahuate'e. Pu'uri muaatá'a a'ij pej tí'ijxe'eve'e. Jɨ́me'en pu'u ayén tiraataxájtaca'a a'ɨ́jna ɨ́ Jesús, aj pu i huarúj a'ɨ́jna ɨ́ yaujra'an ɨ́ 'ɨ́ita'a. 29Aj pu i Jesús á'uraa. A'uu pu ejtéenee a'u tɨ e'eve'e'ástɨme ɨ́ jaj tɨ jé'ejmuaa a'ujna já'ahua'a u Galilea. Aj pu i antíraa ɨ́ jɨrí jetze. An pu a'ujyeíjxɨ. 30Jéihua mú e'iré'ene ɨ́ teɨte. A'ɨ́mej mú e'eráavi'itɨ ɨ́ mej tzare'e ráatuaatɨme ɨ́ ruɨ́ɨca, majta seica ɨ́ mej arácucu'un, majta seica ɨ́ mej caí té'anrɨ'ɨréjmee, majta seica ɨ́ mej ti'ipuaíjti'ihuaca'a. Majta mu'iicáca mú e'eráavi'itɨ ɨ́ seica ɨ́ mej tí'icucui'i. Aa mú huá'ajtuaa a'u tɨ a'utéjvee a'ɨ́jna ɨ́ Jesús. Ajta a'ɨ́ɨn, a'ɨ́ɨ pu naíjmi'ica pu tiú'uhuaa. 31Jé'ecan mú a'ij te'utaseíj ɨ́ teɨte ɨ́ mej huaje'iré'eneijte matɨ́'ɨj hua'useíj ɨ́ tɨ ari rɨ'ɨríistaca'a mej tiu'utaxáj a'ɨ́ɨme ɨ́ mej mejmí'i caí te'anrɨ'ɨréjme'ecaa; majta a'ɨ́ɨme ɨ́ mej ti'ipuaíjti'ihuaca'a, mu'uri rɨ'éene'en nainjapua; majta a'ɨ́ɨme ɨ́ mej tzare'e ráatuaatɨme ɨ́ ruɨ́ɨca, mu'uri á'ujujhua'ane'e; majta a'ɨ́ɨme ɨ́ mej aracúcu'unijme'eca'a, mu'uri ti'iseíjraca'a. Majta me'ɨ́n ɨ́ teɨte, a'ɨ́ɨ mú autéjhuii ɨ́ mej rɨ́'ɨ tiraatá'an me'ɨ́jna ɨ́ Dios tɨ tihuá'aijte'e a'ɨ́mej ɨ́ mej Israél jetze ajtéme'ecan. 32Aj pu i Jesús hua'utajé a'ɨ́mej ɨ́ mej jamuan á'ujujhua'ane'e. Ayee pu tihua'utá'ixaa tɨjɨ́n: ―Naaténxɨemɨste amɨ́mej teɨtejra'a jemi, a'iné pu'uri huaíca xɨca teuumé mej á'ujujhua'an nee jamuan. Camu majta ti'itɨ́j tícha'ɨɨ mej ráacua'ani. Canu raxɨ́'eve'e mej caí xɨ tiu'ucuá'an nehua'aré'e'itixɨ'ɨn. Na'ari caí, temua'a mú tí'itemua'itɨche'en ɨ́ juye japua. 33Majta me'ɨ́n ɨ́ mej jamuan á'ujujhua'ane'e, ayée mú tiraata'íhua'uri'i tɨjɨ́n: ―¿A'uné jetze é'erɨ'ɨri tej ráahuauni ɨ́ pan tɨ́j na'a tɨ ruxe'eve'e tɨ ij tihuá'ucɨ'ɨti naíjmi'ica ɨ́ teɨte? Capu sein i'i rɨ'ɨrí ayajna a'u tɨ caí é'e ja'atɨ. 34Aj pu i ayén tihua'uta'íhua'uri'i tɨjɨ́n: ―¿A'achúni pua'améca séjcha'ɨɨ ɨ́ pan, mú'een? Aj mú mi miyen tiraatá'ixaa tɨjɨ́n: ―Aráhua'apua pu pua'amé i pan. Teajta cɨ́j caj i hua'ité mej cɨ́lieen. 35Aj pu i hua'uta'aíj ɨ́ teɨte mej a'ujrá'ase á chuaata'a. 36Ra'ancuré'e'ɨ'ɨpɨ'ɨ ɨ́ pan, ajta ɨ́ hua'ité, aj pu i Jesús rɨ́'ɨ tiraatá'a ɨ́ Dios. Ajta á'iyen ra'antítaaraxɨ ɨ́ pan. Aj pu i hua'uré'e'ɨ'ɨpɨ'ɨ ɨ́ mej jamuan á'ujujhua'ane'e. Majta me'ɨ́n, a'ɨ́ɨ mú mijta mi hua'uré'e'ɨ'ɨpɨ'ite ɨ́ teɨte. 37Naími'i mú tiú'ucuaa. Temua'a mú titéeju'uxai. Majta á'iyen, a'ɨ́ɨme ɨ́ mej Jesús jamuan á'ujujhua'ane'e, a'ɨ́ɨ mú raaré'eseɨj me'ɨ́jna tɨ avé'eturaa ɨ́ pan tɨ ra'antítaaraxɨ. Sicɨ́ri mú jetze te'evé'ejɨste'axɨ me'ɨ́jna jɨme'e tɨ avé'eturaa. Aráhua'apua sicɨ́ri pu te'ará'a. 38Majta me'ɨ́n ɨ́ mej tiú'ucuaa, ayée mú ará'aseca'a a'achú cumu muáacua vi'ira'a ɨ́ teteca. Majta rujɨ́ɨmua'a mú tiú'ucuaa a'ɨ́ɨme ɨ́ 'uuca, majta ɨ́ tɨ'ɨríi. 39Tɨ́'ɨj Jesús hua'aré'e'itixɨ ɨ́ teɨte, aj pu i ateájraa baarcu jetze. Tɨ'ɨj jí á'uraa. A'uu pu a'ará'a a'ujna já'ahua'a a'u tɨ e'ejtéme'ecan u Magdala.

will be added

X\