San Mateo 13

1A'ájna xɨcájra'a jetze, Jesús pu huirájraa u chi'ita. A'uu pu a'ará'a a'ájna tɨ e'eve'e'ástɨme ɨ́ jaj. Aa pu a'utayeíjxɨ. 2Aj mú mi jeíhua ajteáxɨɨreca'a ɨ́ teɨte a'u tɨ a'ij é'ene'e. Temua'a mú tí'itemu'iicaa ɨ́ teɨte. A'ɨ́j pu jɨ́n ateájraa baarcu jetze tɨ jaata'a e'ecáve'eca'a. A'uu pu i e'erácatii. Majta me'ɨ́n ɨ́ teɨte, áa mú a'ucaíjme'ecaa ja'apuaíri japua á vejli'i a'u tɨ ɨ́ jaj. 3Ajta á'iyen tihua'ajmuá'ate seɨ́j chuijtari jɨme'e. Ayen tɨjɨ́n: ―Ja'atɨ́ hui tɨ tí'ihuastehua'a, u pu á'ume tɨ tejé'ehuaste'en. 4Aa pu aumé'ecaa ratáhua'anáa imue'eri. Seica pu i imue'eri juye jetze huavatzɨ́jraa. Aj mú mi pina'ase júte'ɨmua ave'ecáane, meraaré'eje'ipɨ. 5Ajta seica pu huavatzɨ́jraa tetej tzajta'a a'u tɨ caí jeíhua chuej á'uca. Aj pu'i huaré'ehuaa, a'iné capu huatétee ɨ́ chuej tɨ a'ucárutixɨ'ɨn ɨ́ naana'ara'an. Tɨ́'ɨj huaré'epɨstaca'a ɨ́ chuej, aj pu i ca'anacan ajnéj ɨ́ imue'eri. 6Ajta tɨ́'ɨj u e'iré'ene ɨ́ xɨca, aj pu'i huaré'ehuaa ɨ́ xɨcaj jɨme'e ɨ́ tɨ huanéj. A'ɨ́j pu jɨ́n jij huaré'ehuaa a'iné capu ajtanáana'ajme'eca'a. 7’Ajta seica ɨ́ imue'eri, a'úu pu a'uvatzɨ́jraa a'u tɨ a'utzícare'eme. Tɨ́'ɨj a'ɨ́ɨn tzicare'e huavaújse, a'ɨ́ɨ pu i ra'avá'ana ɨ́ tɨ tí'ihuasti'ihuaca'a. A'ɨ́j pu jɨ́n caí huácɨɨreca'a. 8’Aru seica pu huavatzɨ́jraa a'u tɨ a'urɨ́'en ɨ́ chuej. A'ɨ́ɨ pu xaa i ajnéj. Tɨ'ɨj jí huavaújse. Temua'a pu'i tiú'ucɨɨreca'a. Seica pu imue'eri, ayén airájraa tɨ huácɨɨreca'a seɨj ajta seɨj tɨ ajnéj a'achú cumu anxɨ́te ɨ́ atzi tɨ caté'etejme'ecaa. Ajta seica, ayén tiú'ucɨɨreca'a a'achú cumu huaícate. Ajta seica, seité japuan tamuáamuata'a pu caté'etejme'ecaa seɨj ajta seɨj. 9’Mɨ́ sej huiteánajca'amua, xáanamuajri'i hui temua'a naa. 10Aj mú mi ajteáxɨɨreca'a á vejli'i jemin ɨ́ Jesús a'ɨ́ɨme ɨ́ mej jamuan á'ujujhua'ane'e. Aj mú mi miyen tiraata'íhua'uri'i tɨjɨ́n: ―¿A'iné 'een jɨ́n piyen tihuaú'ixaate'e ɨ́ teɨte chuijtari jɨme'e tɨ caí ja'atɨ́ yaú'itɨe? 11Aj pu i ayén tiu'utaniú tɨjɨ́n: ―Mú'ejmi pu Dios tejá'amua'ixaate'e e'ehuauritɨéecan jɨme'e a'ɨ́jna tɨ rú'avaa a'ɨ́jna jɨme'e tɨ Dios ari tí'aijta nainjapua íiyen chaanaca japua, ajta u ta japua. Mɨ́ majta a'ɨ́ɨme ɨ́ seica, capu a'atzu rɨ'ɨrí mej mi yaú'itɨée muá'ara'ani a'iné capu Dios ayén hua'utá'a. 12’Ayee pu tí'een: jɨ́me'en a'ɨ́jna ɨ́ ja'atɨ tɨ á'ujca'ane tɨ ayén cɨ́j caj tiyaú'itɨée á'ara'ani ɨ́ Dios jemi, Dios pu jeíhua huápɨ'ɨ raatá'asin a'ɨ́jna. Ajta a'ɨ́jna ɨ́ ja'atɨ tɨ caí á'ujca'ane tɨ jaítze'e yaú'itɨée á'ara'ani ɨ́ Dios jemi, Dios pu rá'ari'ira a'achú tɨ caj ari tirú'umua'aree. 13A'ɨ́j nu jɨ́n niyen tejá'amua'ixaate'e chuijtari jɨme'e mej mi caí yaú'itɨée muá'ara'ani. Ayee pu tí'een a'ɨ́mej jemi. A'ɨ́ɨ mú mé uunéjne'e, aru camu ti'itɨ́j seɨj. Majta mú tí'inamua, aru camu ti'itɨ́j namua. Camu majta yaú'itɨe. 14’Ayee pu ari araúraste huá'a jemi a'ij tɨ ra'uyú'uxaca'a a'ɨ́jna ɨ́ Isaías teecan, ɨ́ tɨ tí'ixaxa'ata'a ɨ́ Dios jetze me'ecan tɨjɨ́n: Mú'een xu xaa ráanamua tɨ́j na'a tɨ i yú auumé. Mɨ́ seajta mú'een, caxu yaú'itɨée xá'aju'un. Mú'een xu xaa mé uunéjne'eri xá'aju'un. Mɨ́ seajta, caxu ti'itɨ́j seijran. 15Ayee tí'een, a'iné a'ɨ́ɨ mú jemin antaújnaamua ɨ́ ru tzajta'an. Cɨ́j mu'u caj títe'iteánajca'amua. Camu á'ujca'ane mej a'atanéjne'ere mej raaseíj ti'itɨ́j tɨ pɨ́rɨcɨ. Na'ari caí, a'ɨ́ɨ mú yaú'itɨée muá'aju'un. Majta mú mé uunéjne'eri muá'aju'un mej raaseíj ti'itɨ́j tɨ pɨ́rɨcɨ. Majta mi rá'astijre'e muá'aju'un ɨ́ mej ranamua. Majta mú neetzi jemi yé ve'eré'eninéica muá'aju'un nej ni tihua'utá'uuni'i. Ayee pu jɨ́me'en ra'uyú'uxaca'a a'ɨ́jna ɨ́ Isaías teecan. 16’Mɨ́ seajta mú'een i sej á'ujujhua'an ne jamuan, setá'aj huataújtemua'ave'en se'ɨ́jna jɨme'e ɨ́ sej huiteánajca'amua sej si ra'ará'astijre'en ɨ́ sej ranamua, seajta ahuaújca'anen sej a'atanéjne'ere sej si raaseíj ti'itɨ́j tɨ pɨ́rɨcɨ. 17’Ayee nu tejá'amua'ixaate'e tzáahuati'ira'a jɨme'e, mu'iitɨ́ ɨ́ mej rɨ́'ɨ tí'iteteɨtestaca'a, majta a'ɨ́ɨme ɨ́ mej tí'ixaxa'ata'a ɨ́ Dios jetze me'ecan, jeíhua mú raxɨ́'eve'eca'a mej miyen tiu'uséij a'ij sej seri tí'iseij inee jemi. Mɨ́ majta, camu a'atzu raaseíj. Ayee mú che'atá mena'a tí'ijxe'eve'eca'a mej miyen ráanamua a'ij sej seri tí'inamua inee jemi. Mɨ́ majta, camu xaa ne'u ráanamuajri'i. 18’Casi'i, xáanamuajri'i a'ij tɨ huataújmua'a i chuijtari tɨ jɨ́me'en raxa a'ɨ́jna ɨ́ ja'atɨ tɨ raahuáste ɨ́ imue'eri. 19Tɨ́ pua'a ja'atɨ́ ráanamua ɨ́ niuucari tɨ jɨ́me'en raxa Dios tɨ tí'aijta nainjapua íiyen chaanaca japua, ajta u ta japua, tɨ pua'a a'ɨ́ɨn caí yaú'itɨee, a'ɨ́jna tɨ a'ij pua'a 'een, a'ɨ́ɨ pu tzajta'an huataseíjre'esin. Aj pu i rá'ari'ira ɨ́ niuucari tɨ rú'umua'areereca'a. A'ɨ́jna ɨ́ ja'atɨ, ayée pu 'een tɨ́j ɨ́ imue'eri tɨ huavatzɨ́jraa a'ájna juye jetze. 20’Ajta, a'ɨ́jna ɨ́ imue'eri tɨ huavatzɨ́jraa ɨ́ tete tzajta'a, ayée pu 'een tɨ́j ɨ́ ja'atɨ tɨ amuacaí ra'aránajcheca'a ɨ́ tɨ ráanamuajri'i. 21Aru capu ti'itɨ́j japuan ninei a'ɨ́jna ɨ́ ja'atɨ. Tɨ́ pua'a a'atzu rajpuaíitzi a'ɨ́jna jɨme'e mej seica rá'axɨeehuari'ira me'ɨ́jna jɨme'e tɨ na'ará'astijre'e ineetzi, na'ari tɨ pua'a seica a'ij pua'a méraruure, cɨ́j pu'u te'evíicua'ira a'ame. Ca'anacan pu mé nejaúujɨsin. 22’A'ɨ́jna tɨ hui huavatzɨ́jraa a'u tɨ a'utzícare'eme, a'ɨ́ɨ pu ayén 'een tɨ́j seɨ́j ɨ́ tevi tɨ xaa ranamua ɨ́ niuucari. Aru jeíhua pu tí'imuajca a'ɨ́jna jɨme'e a'ij tɨ té'eme íiyen chaanaca tej japuan seijre'e. Ajta, nain tɨ tí'ijcha'ɨɨ, a'ɨ́ɨ pu raamuá'itɨ a'ɨ́jna ɨ́ tevi. A'ɨ́j pu jɨ́n, caí ché'e ra'utámua'areeri'i a'ij tɨ tiráanamuajri'i. Capu ajta ché'e rɨ'ɨrí tɨ a'ɨ́ɨn tevi ayén raatévaɨre'en ɨ́ Dios. 23’Ajta a'ɨ́jna ɨ́ imue'eri tɨ huavatzɨ́jraa japuan ɨ́ chuej tɨ huarɨ́'en, ayée pu 'een tɨ́j ɨ́ ja'atɨ tɨ yaú'itɨe tɨ́'ɨj ráanamua ɨ́ niuucari. Jéihua pu tí'ijvaɨre'e ɨ́ Dios. Yee pu tiraatátuiire'esin ɨ́ Dios jemi tɨ́j a'ɨ́jna ɨ́ imue'eri tɨ huácɨɨreca'a a'achú cumu anxɨ́te tɨ caté'etejme'ecaa, na'ari huaícate ca'ɨ́n seité japuan tamuáamuata'a ɨ́ imue'eri. 24Ajtahua'a seɨ́j ayén tihua'utá'ixaa ɨ́ chuijtari jɨme'e a'ɨ́jna ɨ́ Jesús. Ayen tɨjɨ́n: ―Ayee pu tí'irɨneca íjii Dios tɨ tí'aijta íiyen chaanaca japua, ajta u ta japua. Ja'atɨ́ pu imue'eri huahuáste japuan ɨ́ ruchuej tɨ huarɨ́'en. 25Ajta á'iyen matɨ́'ɨj naíjmi'i tícu'utzuca'a, seɨ́j pu hui ave'eré'ene tɨ rájcha'ɨɨre'e a'ɨ́jna tɨ chuej tícha'ɨɨ. Ajta a'ɨ́ɨn tɨ rájcha'ɨɨre'e, a'ɨ́ɨ pu ɨxaj huahuáste tzajta'an a'ɨ́jna ɨ́ triigu. Aj pu i á'uraa. 26’Aj pu i ajnéj a'ɨ́jna ɨ́ triigu, ajta a'ɨ́jna ɨ́ ɨxaj. Tɨ́'ɨj huavaújse, aj pu i huíjmuaiyuxɨ a'ɨ́jna ɨ́ triigu. Aj mú mi ráamua'areeri'i tɨ ajta seɨ́j huáviviihuaca'a ɨ́ imue'eri a'iné capu huíjmuaiyuxɨ a'ɨ́jna ɨ́ ɨxaj. 27Majta me'ɨ́n ɨ́ mej tí'imuarɨ'e, a'úu mú hui á'uju'un mej mi tiraata'ixaate'en a'ɨ́jna tɨ chuej tícha'ɨɨ. Miyen tɨjɨ́n: “Tavastara'a, tɨ pua'a pe'ɨ́n huahuáste imue'eri tɨ rɨ́'en a'ujna á'a chuej japua, ¿a'uné e'ejnéj a'ɨ́jna ɨ́ ɨxaj?” 28’Aj pu i a'ɨ́jna tɨ chuej tícha'ɨɨ, ayén tihua'utá'ixaa tɨjɨ́n: “Seɨ́j tɨ néjcha'ɨɨre'e ayée pu náaruu.” Majta miyen tiraata'íhua'uri'i a'ɨ́ɨme ɨ́ mej tí'imuarɨ'e miyen tɨjɨ́n: “¿Ni mua'aráanajche tej u á'uju'un tej rá'ijcuuxɨn te'ɨ́jna ɨ́ ɨxaj?” 29’Aj pu i ayén tiu'utaniú tɨjɨ́n: “Capu ruxe'eve'e sej racuta se'ɨ́jna ɨ́ ɨxaj, a'iné tɨ pua'a seri rá'ijcuunan a'ɨ́jna ɨ́ ɨxaj, ajta pu áijcuuxɨjsin a'ɨ́jna ɨ́ triigu a'iné ru jetze pu huá'uu. 30Ché'e ayén éene'en tɨ naíjmi'i huavaújse'en ajta caí teja'uré'enen tɨ te'enti'á'asin. Aj nu ni hua'uta'aíjte'esin a'ɨ́mej ɨ́ mej tí'imɨjhuaca mej mi amuacaí rá'ijcuuxɨn me'ɨ́jna ɨ́ ɨxaj, matá'aj raajɨ́'ɨcɨ'en mej mi rájseɨre'en matá'aj ra'anteátaira. Majta á'iyen, me'ɨ́n meru'uteátuaasin me'ɨ́jna ɨ́ triigu u chi'ita, a'u mej téjé'eyuuhuaca.” 31Jesús pu ajtahua'a seɨ́j hua'utá'ixa ɨ́ chuijtari. Ayen tɨjɨ́n: ―Ayee pu tí'een Dios tɨ tí'aijta íiyen chaanaca japua, ajta u ta japua. Ayee pu 'een tɨ́j tu'upi ti'itɨ́j tɨ ayén ántehuaa tɨjɨ́n mostasa. Ja'atɨ́ pu raahuáste ɨ́ játze'ara'an a'ájna já'ahua'a a'u tɨ té'atachuej. 32A'ɨ́jna ɨ́ mostasa, ayée pu 'eene'en téjatze'e tɨ jaítze'e i'i cɨ́lieen caí seica ɨ́ jatzi. Mɨ́ ajta, tɨ́'ɨjtá huavaújse'en, jaítze'e pu ajtɨ́tɨ'ɨ a'ame caí seica ɨ́ tu'upi tɨ íiyen seijre'e chaanaca japua. Yee pu ajtɨ́tɨ'ɨ a'ame tɨ́j cɨyej. Aj mú mi ave'eré'enejsin ɨ́ pina'ase mej rá'ara'a mej mi án téja'uteúru'itu'ajte'en án cɨ́ye'ara'an jetze. 33Ajtahua'a seɨ́j chuijtari hua'utá'ixa. Ayen tɨjɨ́n: ―Ayee pu ajta tí'een jɨ́me'en Dios tɨ tí'aijta íiyen chaanaca japua, ajta u ta japua. Ayee pu 'een tɨ́j a'ɨ́jna ɨ́ levadura. A'ɨ́jna ɨ́ 'ɨ́ita'a, a'ɨ́ɨ pu huaíca medida ru'uteájraa ɨ́ hariina. Aj pu i rajcuaíjtzitaca'a levadura jamuan. Ajta a'ɨ́ɨn ɨ́ levadura, a'ɨ́ɨ pu tzajta'an huaneájxɨ nainjapua ɨ́ cuaíjtzi. 34Ti'itɨ́j tɨ na'a tɨ tihuá'a'ixa'atehua'a ɨ́ teɨte, Jesús pu nain tihua'utá'ixaa chuijtari jɨme'e. Capu ti'itɨ́j huá'a'ixaate'eca'a tɨ é'ehuáuritɨe sino chuijtari pu'u jɨ́me'en. 35Ayee pu tiú'uruu tɨ ij ayén araúrasten a'ij tɨ tiu'utaxájtaca'a a'ɨ́jna ɨ́ tɨ tí'ixaxa'ata'a ɨ́ Dios jetze me'ecan tɨjɨ́n: Nee nu tihua'utá'ixaate'esin ne'ɨ́jna jɨme'e ɨ́ chuijtari. Nee nu ne'ɨ́jna huataxájta, a'ɨ́jna tɨ rú'avaa nain xɨcaj tzajta'a tɨ yú e'iré'ene tɨ́'ɨj Dios raatétaahuaca'a a'íjna i chaanaca tej japuan yen seijre'e. 36Aj pu i Jesús airájraa ɨ́ teɨte jemi. Aj pu i uteájrupi u chi'ita. A'uu mú ajteáxɨɨreca'a jemin a'ɨ́ɨme ɨ́ mej jamuan á'ujujhua'ane'e. Aj mú mi miyen tiraatá'ixaa tɨjɨ́n: ―Aisí, taatá'ixaate'e a'ij tɨ huataújmua'a a'ɨ́jna ɨ́ chuijtari a'ɨ́jna tɨ jɨ́me'en raxa ɨ́ ɨxaj tɨ huavaújse a'u tɨ e'ejnéj taséehua japua. 37Aj pu i Jesús ayén tihua'utá'ixaa tɨjɨ́n: ―A'ɨ́jna ɨ́ tɨ raahuáste ɨ́ imue'eri tɨ rɨ́'en, nee nu ne'ɨ́n pú'een, inee i nej neajta teáata'a jetze airáane. 38Ajta a'ɨ́jna ɨ́ taséehua, ayée pu huataújmua'a tɨjɨ́n ɨ́ chaanaca i tej japuan yen i'i seijre'e. A'ɨ́jna ɨ́ imue'eri tɨ rɨ́'en, ayée pu 'een tɨ́j a'ɨ́ɨme ɨ́ mej ahuaújca'ane tɨ Dios tíhua'uta'aíjte'en. Ajta a'ɨ́jna ɨ́ ɨxaj, ayée pu 'een matɨ́j a'ɨ́ɨme ɨ́ mej í'iteɨtestemua'ame'en a'ɨ́jna ɨ́ tiyaaru'u. 39’Ajta hui a'ɨ́jna tɨ rájcha'ɨɨre'e, a'ɨ́jna tɨ raahuáste ɨ́ ɨxaj, a'ii pu a'ɨ́ɨn pú'een a'ɨ́jna ɨ́ tiyaaru'u. Ajta, a'ɨ́jna ɨ́ xɨcájra'a mé jetzen tí'itzaanan, ayée pu huataújmua'a tɨjɨ́n a'ájna xɨcájra'a tɨ jetzen te'entipuá'ajte i chaanaca japua. Majta me'ɨ́n ɨ́ mej tí'itzaanan, a'ii mú a'ɨ́ɨn pú'een ɨ́ mej tí'ivaɨre'e u ta japua Dios tɨ é'eseijre'e. 40’Ayee pu che'atá na'a té'eme a'ájna xɨcájra'a tɨ jetzen nain te'entipuá'ajte a'ij mej titetiújcha'ɨɨ matɨ́'ɨj rá'ijcuuxɨɨ me'ɨ́jna ɨ́ ɨxaj mej mi ra'anteátaira. 41Neajta inee, i nej neajta teáata'a jetze airáane, nee nu hua'uta'aíjte'esin a'ɨ́mej ɨ́ mej tí'ivaɨre'e u ta japua mej mi á'ucɨɨne nainjapua tɨ́j na'a ɨ́ nej jɨ́n antínmua'aree mej mi a'uun hua'irájtuaani a'ɨ́mej ɨ́ mej a'ij pua'a tiratá'aca ɨ́ Dios, a'ɨ́mej ɨ́ mej a'ij pua'a rɨcɨ. 42A'uu mú huája'ucáhua'axɨjsin a'ɨ́jna tzajta'a a'u tɨ anú'utaa. A'uu mú ruyeinixɨ'ɨn jeíhua, majta ancuré'ujcɨ'ɨmée muá'aju'un ɨ́ rutamej jɨme'e me'ɨ́jna jɨme'e mej huápɨ'ɨ rajpuaíjtzi. 43’Majta me'ɨ́n ɨ́ mej miyen rɨcɨ a'ij tɨ tí'ijxe'eve'e ɨ́ Dios, ayée mú me'uun e'eseíire'e muá'aju'un a'ujna huá'aya'upua tɨ tí'aijta. Ayee mú seíire'e muá'aju'un tɨ́j ɨ́ xɨcaj tɨ aiiráxɨ'ɨxɨre ɨ́ jaitɨri jetze. Ajta, ja'atɨ́ tɨ na'a tɨ huiteájnamua, ché'e a'ɨ́ɨn ráanamua temua'a naa. 44’A'ujna a'u tɨ Dios te'áijta, íiyen chaanaca japua, ajta u ta japua, ayée pu tí'irɨni tɨ́j ɨ́ ja'atɨ tɨ ti'itɨ́j huáteu tɨ rú'avaa, tɨ ajta huápɨ'ɨ tí'ijnajche. A'uu pu ráateu taséehua japua. Aj pu i ajtahua'a raaté'avaata a'ujna che'atá miijmu. Jé'ecan pu rutémua'ave'e a'ɨ́jna jɨme'e tɨ ráateu. A'ɨ́j pu jɨ́n, nain tuaani a'achú tɨ caj tí'ijcha'ɨɨ. Aj pu i á'iyen, a'ɨ́ɨ pu ráananan a'ɨ́jna ɨ́ chuej. 45’Ajta, ayée mú rɨcɨ a'ɨ́ɨme ɨ́ mej rahuauhuau mej mi me'uun a'uteárute Dios tɨ é'eseijre'e, ayée mú che'atá mena'a rɨcɨ tɨ́j ja'atɨ́ tɨ tí'itu'araca. A'ɨ́ɨ pu á'uche'ecan tɨ a'ɨ́ɨn rahuauni ti'itɨ́j perla tɨ naa 'een. 46Tɨ́'ɨj seɨ́j huáteu, tɨ huápɨ'ɨ tí'ijnajche, u pu á'ume tɨ ij nain tiú'utuaani a'achú tɨ caj tí'ijcha'ɨɨ. Aj pu i a'ɨ́jna nanan ɨ́ perla. 47’Ajtahua'a seɨ́j ɨ́ chuijtari: ayée pu 'een Dios tɨ tí'aijta íiyen chaanaca japua, ajta u ta japua. Dios pu ayén rɨcɨ matɨ́j a'ɨ́ɨme ɨ́ mej hua'ité vivi'iraca xɨéjmua'ari jɨme'e tɨ vivéj. Matɨ́'ɨj ra'atéhua'axɨn á jaata'a, aj pu i cha'a na'a hua'itáseɨre'esin ɨ́ hua'ité. 48Matɨ́'ɨj caí ché'e ú'uvejri ɨ́ xɨéjmua'ari tzajta'a, aj mú mi ra'itapíjsin á jaata'a me'ɨ́jna ɨ́ xɨéjmua'ari. Matɨ́'ɨj mi huáchijte'e á yaupíjsin a'ɨ́mej ɨ́ mej hua'ité vivi'iraca. A'uu mú a'uráaseɨjrá'ɨn. Aj mú mi hua'avé'e'ɨ'ɨxɨ'ɨsin ɨ́ hua'ité ɨ́ mej rɨ́'en. Majta me'ɨ́n ɨ́ hua'ité ɨ́ mej rɨ́'en, sicɨ́ri jetze mú hua'ateátuaasin. Majta ɨ́ mej caí rɨ́'en, á mú huaúuhua'axɨjsin. 49’Ayee pu che'atá na'a té'eme a'ájna xɨcájra'a tɨ jetzen nain te'entipuá'ajte íiyen chaanaca japua. A'ɨ́ɨme ɨ́ mej tí'ivaɨre'e ɨ́ ta japua Dios tɨ é'eseijre'e, a'ɨ́ɨ mú huiráaju'un mej mi hua'avé'ejajpuaxɨ'ɨn rujɨ́me'en ɨ́ teɨte ɨ́ mej a'ij pua'a rɨcɨ, majta ɨ́ mej xɨ́'epɨ'ɨn rɨcɨ. 50Matɨ́'ɨjtá mi me'uun huauucáhua'axɨjsin ɨ́ hoorno tzajta'a a'ɨ́mej ɨ́ mej a'ij pua'a rɨcɨ mej mi rajpuaíjtzi muá'ara'ani taij jɨme'e. A'uu mú ruyeinixɨ'ɨn, majta ancuré'ujcɨ'ɨmée muá'aju'un ɨ́ rutamej jɨme'e a'ɨ́jna jɨme'e mej rajpuaíjtzi. 51Aj pu i Jesús ayén tihua'uta'íhua'uri'i tɨjɨ́n: ―¿Ni secaí nain au'itɨée xa'araa mú'een? Aj mú mi miyen tiraatá'ixaa tɨjɨ́n: ―Jee. 52Aj pu i ayén tihua'utá'ixaa tɨjɨ́n: ―A'ɨ́j pu jɨ́n, tɨ pua'a seɨ́j tɨ tiú'ujmua'ate ɨ́ yu'uxari jetze, tɨ pua'a a'ɨ́ɨn ajta autéjcheni a'ɨ́jna jetzen ti'ihuaújmua'aten a'ij tɨ tí'irɨ'ɨri tɨ Dios tira'aíjte'en nain jɨme'e, ayée pu éene'e a'ame a'ɨ́jna ɨ́ ja'atɨ tɨ́j seɨ́j tɨ huatéechi'i. Jéihua pu te'urájcha'ɨɨ a'ujna ruchi'itá. Ajta, ja'anáj tɨ na'a pu te'iráatɨ'ɨcɨ a'ɨ́jna tɨ ti'ijéjcua, ajta tɨ ti'imí'ime'ecan. ―Ayee pu tihua'utá'ixaa a'ɨ́jna ɨ́ Jesús. 53Tɨ́'ɨj Jesús ra'antipuá'ajte tɨ tihuaú'ixaate'e chuijtari jɨme'e, aj pu i á'uraa. 54A'uu pu a'ará'a a'u tɨ a'uvé'ese. Aj pu i a'utéjche tɨ tihua'umuá'ate hua'atéyujta'a. Majta me'ɨ́n ɨ́ mej ráanamuajri'i, jé'ecan mú a'ij ra'utaseíj. Ayee mú tí'iruixaate'eca'a tɨjɨ́n: ―¿A'uquí ya'urɨ́'ɨre amɨ́jna tɨ ayén temua'a naa tirú'umua'aree? ¿Ti'itájni muárɨ'eri'ira'a pú'een ɨ́ tɨ jɨ́n ayén rɨcɨ a'ɨ́jna ɨ́ tej jɨ́me'en a'ij ya'useíj? 55Amɨ́jna, a'ɨ́ɨ pu hui yaujra'an a'ɨ́jna tɨ tí'isi'icheca. Ajta náànajra'an, a'ɨ́ɨ pu a'ɨ́ɨn pú'een a'ɨ́jna ɨ́ María. ¿Ni mecaí me'ɨ́n pú'een ɨ́ júutzimua'ame'en a'ɨ́jna ɨ́ Jacobo, ajta a'ɨ́jna ɨ́ José, ajtahua'a seɨ́j a'ɨ́jna tɨ ayén ántehuaa tɨjɨ́n Simón, ajta a'ɨ́jna ɨ́ Judás? 56¿Ni mecaí majta yé che ta jamuan, a'ɨ́ɨme júutzimua'ame'en ɨ́ mé 'uuca? Tɨ́ pua'a ayén ti'ayajna, ¿a'uné é'eme'ecan a'ɨ́jna ɨ́ mua'atzíire'ara'an tɨ yé raateájtuaa amɨ́jna mɨ Jesús? 57Matɨ́'ɨj mi rá'anchueere me'ɨ́jna ɨ́ Jesús. A'ɨ́j mú jɨ́n, miraatamuári. Ajta, ayée pu tihua'utá'ixaa ɨ́ Jesús tɨjɨ́n: ―Naími'i mú rɨ́'ɨ tiratá'aca a'ɨ́jna jemi ɨ́ tɨ tí'ixaxa'a ɨ́ Dios jetze me'ecan. Mɨ́ majta, a'ɨ́ɨme ɨ́ mej huacaíjme a'u mé é'eche, majta a'ɨ́ɨme ɨ́ teɨtestemua'ame'en ɨ́ mej é'eche jamuan, camu rɨ́'ɨ tiratá'aca. 58A'ɨ́j pu i jɨ́n caí jeíhua ayén tiú'uruu a'ɨ́jna jɨme'e ɨ́ muárɨ'eri'ire'ara'an a'ujna a'iné camu rá'atzaahuate'eca'a.

will be added

X\