San Mateo 11

1Tɨ́'ɨj Jesús raatapuá'ajtaca'a tɨ hua'utá'ixa ɨ́ tɨ jɨ́n tihuau'íjca, aj pu i á'uraa. A'áyee pu a'ará'a chajta'a a'ɨmuá a'u mé a'itechéjme tɨ ij tihuá'umua'aten, tɨ ij ajta tihua'utá'ixaate'en ɨ́ teɨte. 2Ajta a'ɨ́jna ɨ́ Juan, a'úu pu já'ahua'a á'anami'ihuaca'a. Aj pu i yá'umua'areeri'i a'ij tɨ Jesús rɨjcaa. Tɨ'ɨj jí hua'uta'íteca'a seica ɨ́ mej jamuan á'ujujhua'ane'e mej mi u ya'utéeseij, majta mej mi tiraata'íhua'u me'ɨ́jna ɨ́ Jesús. 3Ayee mú tiraata'íhua'uri'i tɨjɨ́n: ―¿Ni mú'ee pej pe'ɨ́n pɨ́rɨcɨ pe'ɨ́jna ɨ́ pej jee i'i Cɨríistu'u pej mú'ee íiyen ruxe'eve'e, pej nu'u yen ve'ecáanen? Na'ari caí, ¿ni ayén tiú'ujxe'eve'e tej seɨ́j huachú'eve'en? 4Jesús pu ayén tiu'utaniú tɨjɨ́n: ―Sericu, setá'aj siyen tiraata'ixaate'en se'ɨ́jna ɨ́ Juan a'ij sej ye'í tí'iseij, seajta tí'inamua. 5Setá'aj raatá'ixaate'en yee mu'uri atanéjne'e ɨ́ mej aracúcu'unijme'eca'a; ajta yee mu'uri á á'ujujhua'an a'ɨ́ɨme ɨ́ mej anacɨyáaxavi'ijme'ecaa ruɨ́ɨca jetze; majta yee mu'uri huarúj me'ɨ́jna jɨme'e cuí'ini'ira'a tɨ tineájxɨ ɨ́ huá'ahua'ira'a jetze. Majta hui a'ɨ́ɨme ɨ́ mej nácuxa'itajme'ecaa, mu'uri huiteájnamua. Majta seica, a'ɨ́ɨme ɨ́ mej huácuii, mu'uri majtáhua'a mena'a huatarúj. Neajta tihua'utá'ixaate'esin a'ɨ́mej ɨ́ mej caí a'ij tí'ijviicua'i ɨ́ niuucari tɨ jɨ́n Dios hua'irátuaasin. 6Ché'e huaújtemua'ave'en a'ɨ́jna ɨ́ ja'atɨ tɨ caí ruhuárita'a huaré'eye'ican ineetzi jemi a'ɨ́jna jɨme'e tɨ caí ché'e té'eviicua'i neetzi jemi. 7Matɨ́'ɨj a'ucɨ́j a'ɨ́ɨme ɨ́ mej Juan jamuan á'ujujhua'ane'e, Jesús pu a'utéjche tɨ tihua'utá'ixaate'en ɨ́ seica jɨ́me'en a'ɨ́jna ɨ́ Juan. Ayen tɨjɨ́n: ―¿Ti'itáani sena'a u a'utéeseij se'újna u mu'utzitá? ¿Ni qui siyen tiraaseíj ɨ́ huiini tɨ eeca raru'uxante'e? Caxu xaa ne'u. 8Tɨ́ pua'a secaí siyen huarɨ́j, ¿ti'itáani sena'a a'utéeseij? ¿Ni ja'atɨ́ se'utéeseij tɨ te'ucáaviɨj rɨ'éene'en jɨme'e? Caxu xaa ne'u, a'iné xu'uri ramua'aree tɨjɨ́n a'ɨ́ɨme ɨ́ mej miyen rɨ'éene'en jɨ́n te'ucáaviɨj, a'úu mú é'eche huá'achi'ita ɨ́ rey. 9Ari tɨ pua'a secaí siyen huarɨ́j, ¿ti'itájni ne'u? ¿Ni secaí siyen a'ɨ́ɨn a'utéeseij ja'atɨ́ tɨ Dios jetze me'ecan tí'ixaxa'a? Ayee nu tejá'amua'ixaate'e tɨ a'ɨ́ɨn pú'een tzɨ́te'e a'ɨ́jna ɨ́ Juan. Ayej xaa ne'u ti'ayajna, jeíhua pu jaítze'e ve'ecán jɨ́n ti'itéjvee a'ɨ́jna ɨ́ Juan caí seɨ́j tɨ ayée na'a a'ɨ́jna jɨ́n ti'itéjvee tɨ Dios jetze me'ecan tí'ixaxa'a. 10A'ɨ́ɨ pu a'ɨ́ɨn pú'een ɨ́ tɨ jɨ́me'en rá'axa ɨ́ yu'uxari jetze. Tɨjɨ́n: Nee nu ja'atɨ́ huata'íti tɨ amuájca mú'eetzi jemi mej mi rɨ́'ɨ huaújruuren ɨ́ teɨte. 11’Ayee nu tejá'amua'ixaate'e tzáahuati'ira'a jɨme'e, huá'a tzajta'a naíjmi'i ɨ́ teɨte ɨ́ mej huanéj íiyen chaanaca japua, capu ja'atɨ́ ja'anáj te'enteájrupi ti'itɨ́j jɨme'e tɨ jaítze'e ve'ée caí ɨ́ tɨ jɨ́n ti'itéjvee a'ɨ́jna ɨ́ Juan. Mɨ́ ajta, a'ɨ́ɨn tɨ jaítze'e cɨ́lieen jɨ́n seijre'e jɨ́n ti'itéjvee ɨ́ Dios jemi, jaítze'e pu ve'ée a'ɨ́jna ɨ́ ja'atɨ caí a'ɨ́jna ɨ́ Juan. 12’Tɨ́j na'a a'ájná'ɨmua tɨ huataseíjre a'ɨ́jna ɨ́ Juan, tɨ yú e'iré'ene, teɨte mú ca'anéeri jɨ́n rahuauca mej mi me'uun a'uteárute a'ájna Dios tɨ é'eseijre'e. Majta ca'anéeri mú jɨ́n tí'itese'e a'ɨ́ɨme ɨ́ teteca ɨ́ mej ruca'ané mej mi huataúra'an me'ɨ́jna jɨme'e. 13A'ɨ́ɨme ɨ́ mej Dios jetze me'ecan tí'ixaxa'ata'a, ajta a'ɨ́jna ɨ́ yu'uxari jetze tɨ Moisés teecan ra'uyú'uxaca'a, naími'i mú tiu'utaxájtaca'a a'ɨ́jna jɨme'e ɨ́ Dios tɨ nainjapua tí'aijta íiyen chaanaca japua. Maúche'e raaxájtaca'a ajta na'a caí yé huataseíjre a'ɨ́jna ɨ́ Juan. 14Ajta, tɨ pua'a siyen tite'ehuaújca'anen sej rá'antzaahuate'en, a'ɨ́jna ɨ́ Juan, a'ii pu a'ɨ́ɨn pú'een a'ɨ́jna tɨ nu'u ruxe'eve'e tɨ yé uvé'enen, a'ɨ́jna ɨ́ tɨ ayén ántehuaa tɨjɨ́n Elías. 15A'ɨ́ɨme ɨ́ mej huiteánajca'amua, miché'e rɨ́'ɨ tiráanamua. 16’¿A'iné nena'a tiraataxáj yee a'iné mé'een a'ɨ́ɨme ɨ́ teɨte ɨ́ mej a'íjna nine'ira'a jetze yen huachéjme íjii? Ayee mú 'é'en matɨ́j ɨ́ tɨ'ɨríi ɨ́ mej vejli'i a'ujteí a'u mej tejá'atua. A'ɨ́ɨ mú hua'atéji'ivihua'a ɨ́ seica. 17Miyen tɨjɨ́n: “Tetiu'utacɨ́'ɨsite sej si tiu'utéene'en. Mɨ́ seajta caí, caxu tiu'utéenei. Teajta tu tiu'utáchuiicaca'a ɨ́ chuiicari jɨme'e ɨ́ mej jɨ́n tí'ichuicaca tɨ pua'a seɨ́j huámɨ'ɨni, mɨ seajta, caxu se'ɨ́jna jɨ́n huataújxɨeemɨste.” 18’Ayee nu hui 'een jɨ́n niyen tejá'amua'ihua'u a'iné ayée pu tí'irɨneca. A'ɨ́jna ɨ́ Juan, ayée pu mú a'uvé'emej. A'ɨ́ɨ pu rú'itzi'ive'eca'a. Ajta, capu raye'eca'a ɨ́ nahuáj. A'ɨ́j xu jɨ́n siyen tiu'utaxájtaca'a yee tiyaaru'u pu tzajta'an seijre'e amɨ́jna mɨ tevi. 19Neajta á'iyen inee yé uvé'ene, i nej neajta teáata'a jetze airáane. Canu né'itzi'ivi. Neajta raye'eca ɨ́ nahuáj. Mú'een xu si siyen tí'inexa yee huápɨ'ɨ nu tí'icua'a, neajta nu'u netahuaive, majta miyen ne'amiigustemua'a pú'een a'ɨ́ɨme ɨ́ mej nu'u jeíhua até'ɨtzea'ara ɨ́ Dios jemi, majta a'ɨ́ɨme ɨ́ huá'ajijve'e ɨ́ mej tí'itɨ'ɨcɨca. Ayee xu ramua'aree tej rɨ́'ɨ mé titeumuámua'aree a'ɨ́mej jemi ɨ́ mej ta'ará'astijre'e itejmi. 20Aj pu i Jesús a'utéjche tɨ hua'ajteá'axɨ'ɨn a'ɨ́mej ɨ́ mej me'uun antachéejme'ecaa a'u tɨ ayén teja'urɨ́j ɨ́ muárɨ'eri'ire'ara'an jɨme'e mu'iicáca ɨ́ mej jɨ́n rɨ́'ɨ te'utaseíj. A'ɨ́ɨ pu hua'ajteá'axɨ seɨj ajta seɨj ɨ́ teɨtejra'a ɨ́ mej me'uun a'uchéjme'ecaa u chajta'a jetze a'iné camu autéjhuii mej seɨcɨé tiú'umua'ati. 21Ayen tɨjɨ́n: ―Ché'e a'ij tɨ na'a, mú'een mɨ sej Corazín é'eche. Ché'e a'ij tɨ na'a, mú'een mɨ sej Betsaída é'eche. Tɨ́ pua'a niyen che'atá nena'a huárɨniiche'e nemuárɨ'eri'ira'a jɨme'e ne'újna u Tiro, neajta ne'újna u Sidón, a'ij nej neri ye'í huarɨ́j nemuárɨ'eri'ira'a jɨme'e mú'ejmi jemi, mejmí'i mú seɨcɨé tiú'umua'atíjche'en. A'ɨ́ɨ mú majta mej mi'i raataseíiratache'e me'ɨ́jna jɨme'e mej tiu'uteújchejte'en xu'umuavi'in jɨme'e, majta mejmí'i nasij avé'ujhua'atehua'anche'e. 22Ayee nu tejá'amua'ixaate'e tɨ ayén té'eme a'ájna xɨcájra'a jetze tɨ́'ɨj Dios huá'axɨjte'en matɨ́j mena'a pua'amé teɨtejra'a. Jaítze'e xu rajpuaíitzi xá'aju'un mecaí a'ɨ́ɨme ɨ́ mej a'uun a'uchéjme'ecaa me'újna u Tiro, majta me'újna u Sidón. 23’Seajta mú'een mɨ sej Capernaúm a'uchéjme, ¿a'iné tejamuá'amitɨejte'e? ¿Ni qui ayén yee tejamuá'amitɨejte'e sej nu'u rɨ́'ɨ tiraatá'a ɨ́ Dios? Caxu xaa ne'u. Dios pu puaíjtzi amuaatá'asin. A'uu xu a'uteáturaasin mɨ'ɨchite jamuan. Tɨ́ pua'a niyen che'atá nena'a huárɨniiche'e ne'újna Sodoma a'ij nej neri tiú'uruu nemuárɨ'eri'ira'a jɨme'e mú'ejmi jemi, a'ujna u chajta'a u Sodoma, a'ɨ́ɨ pu auj e'etéeriche'en tɨ́j na'a a'ájná'ɨmua tɨ yú e'iré'ene. 24Mɨ́ ajta, ayée nu tejá'amua'ixaate'e, a'ájna xɨcájra'a tɨ jetzen Dios huá'axɨjte'en a'ɨ́mej ɨ́ mej japuan a'uchéjme íiyen chaanaca japua, mú'een xu jaítze'e rajpuaíitzi xá'aju'un se'ájna, mecaí a'ɨ́ɨme ɨ́ mej me'uun a'uchéjme'ecaa a'ujna tɨ́j na'a tɨ Sodoma e'ejtéme'ecan. 25A'ájna xɨcájra'a jetze tɨ Jesús ayén tiu'utaxájtaca'a, aj pu i ayén raatéjhuau ɨ́ ruyá'upua jemi tɨjɨ́n: ―Mú'ee ɨ́ pej ní'iya'upua, ɨ́ pej tí'aijta pe'újna u ta japua, pajta íiyen chaanaca japua, rɨ́'ɨ nu timuaatá'aca ne'ɨ́jna jɨme'e pej hua'utá'a mej mi yaú'itɨee muá'ara'ani a'ij tɨ 'een mú'eetzi jemi a'ɨ́ɨme ɨ́ mej caí jeíhua tiú'ujmua'ate. Mɨ́ pajta, capej piyen hua'utá'a mej mi yaú'itɨee muá'ara'ani a'ɨ́ɨme ɨ́ mej támua'aree, majta a'ɨ́ɨme ɨ́ mej raayɨ́'ɨtɨ. 26A'iné pijta, ayée pej tí'ijxe'eve'eca'a mú'ee, ɨ́ pej ní'iya'upua. ―Ayee pu tiraatéjhuau. 27Aj pu i ajtahua'a ayén tihua'utá'ixaa a'ɨ́mej ɨ́ mej jamuan á'ujujhua'ane'e tɨjɨ́n: ―Nain pu tinaatátui a'ɨ́jna tɨ ní'iya'upua mej mi ráamua'ati tzáahuati'ira'a jɨme'e. Capu ja'atɨ́ nemua'ate nain jɨme'e a'ij nej 'een sino a'ɨ́ɨ pu'u tɨ ní'iya'upua, a'ɨ́ɨ pu xaa nemua'ate. Ajta, capu ja'atɨ́ ramua'ate nain jɨme'e ɨ́ tɨ ní'iya'upua sino inee i nej yaujra'an pú'een, nee nu xaa ramua'ate. Majta, a'ɨ́ɨ mú ramua'ate a'ɨ́ɨme ɨ́ tɨ hua'aráanajche nej tihua'utaseíjrate'en a'ij tɨ 'een. 28’Setá'aj yé ve'eré'enen neetzi jemi, setɨ́j sena'a pua'amé mú'een, mɨ sej cua'ana se'ɨ́jna jɨme'e ɨ́ sej rahuauca sej rɨ́'ɨ tiraatá'an ɨ́ Dios, seajta se'ɨ́jna jɨ́n tí'itese'e ɨ́ sej ra'ará'astijre'en nain jɨme'e. Nee nu xaa amuaatá'asin sej huaújse'upe'en. 29Setá'aj te'enteárute se'ɨ́jna jɨme'e ɨ́ nej jɨ́n tejá'amua'íjcate'e. Seajta tiú'urɨ'ɨren neetzi jemi, a'iné nee nu ne'ɨ́n pú'een seɨ́j tɨ mua'acan, canu neajta á'antzaahuate'e. Tɨ́ pua'a siyen yé ve'eré'enen neetzi jemi, nee nu amuaatá'asin sej rɨ́'ɨ huárɨni ɨ́ ru tzajta'a. 30Capu muárɨ'eri sej raanaíjmire'en se'ɨ́jna jɨme'e ɨ́ nej jɨ́n amuaatá'asin. Ajta, ɨ́ nej jɨ́n tejá'amua'íjcate'e, capu ajta muárɨ'eri sej siyen huárɨni a'ij nej tí'ijxe'eve'e. ―Ayee pu tihua'utá'ixaa a'ɨ́jna ɨ́ Jesús.

will be added

X\