San Mateo 10

1Aj pu i Jesús hua'utajé a'ɨ́mej ɨ́ mej tamuáamuata'a japuan hua'apua ará'ase. A'ɨ́ɨ pu antiújmua'areereca'a a'ɨ́jna jɨme'e mej mi hua'utamuárite'en ɨ́ tiyaaru'u mej huá'a tzajta'a seijre'eca'a ɨ́ teɨte, ajta mej mi nain tihuá'uhuaate'en ɨ́ mej jɨ́n tí'icucui'icaa, cuí'ini'ira'a jɨme'e nusu tɨ caí huá'aca'anisti'iraca'a. 2Ayee mú ánte'arua a'ɨ́ɨme ɨ́ mej tamuáamuata'a japuan hua'apua ará'ase, a'ɨ́mej ɨ́ tɨ Jesús hua'uta'íteca'a. Amuacaícan, a'ɨ́jna ɨ́ Simón, ɨ́ mej majta miyen ratamuá'amua tɨjɨ́n Pedro. A'ɨ́ɨ pu ajta huatajé a'ɨ́jna ɨ́ juutzeájra'an ɨ́ Simón. Ayee pu ántehuaa tɨjɨ́n Andrés. Ajta a'ɨ́mej pu huatajé a'ɨ́jna ɨ́ Jacobo, ajta juutzeájra'an tɨ ayén ántehuaa tɨjɨ́n Juan. A'ii mú me'ɨ́n pú'een yaújmua'ame'en ɨ́ Zebedeo. 3Ajta seica huatajé, a'ɨ́jna ɨ́ Felipe, ajta a'ɨ́jna ɨ́ Bartolomé, ajta a'ɨ́jna ɨ́ Tomás, ajtahua'a seɨ́j, tɨ ayén ántehuaa Mateo, tɨ tí'iteji'ivihua'a a'ɨ́mej ɨ́ mej tí'itɨ'ɨcɨca. Seɨ́j pu ajta huatajé. A'ii pu a'ɨ́ɨn pú'een a'ɨ́jna ɨ́ Jacobo, Alfeo tɨ rape'eri, ajtahua'a seɨ́j, a'ɨ́jna ɨ́ Lebeo, ɨ́ mej majta miyen ratamuá'amua tɨjɨ́n Tadeo. 4A'ɨ́ɨ pu ajta huatajé a'ɨ́jna ɨ́ Simón ɨ́ tɨ ajtéme'ecan huá'a jetze ɨ́ mej miyen huataújmua'a tɨjɨ́n cananista, ajta a'ɨ́jna ɨ́ Judás tɨ ayén te'entímu'utaca tɨjɨ́n Iscariotes. A'ii pu a'ɨ́ɨn pú'een ɨ́ tɨ avíitzi jɨ́n hua'utátuii a'ɨ́jna ɨ́ Jesús. 5A'ii mú a'ɨ́ɨn pú'een ɨ́ mej tamuáamuata'a japuan hua'apua ará'ase ɨ́ tɨ Jesús hua'uta'íteca'a. Ayee pu a'ɨ́jna jɨ́n tihua'u'íjca, ayén tihuá'ixaate'e yee: ―Caxu se'uun á'ucɨ'ɨca'an se'újna á mej a'uchéjme ɨ́ mej seɨ́j chuéjra'a japua ajtéme'ecan, caxu seajta uteáru'ipiche'en chajta'a a'u mej é'eche a'ɨ́ɨme ɨ́ mej Samaria jetze ajtéme'ecan. 6Mɨ́ seajta mú'een, setá'aj se'uun á'uju'un huá'a jemi ɨ́ mej i'i yaújmua'ame'en a'ɨ́jna ɨ́ Israél teecan. Yee mú 'een a'ɨ́ɨme tɨ́j cáne'axɨ ɨ́ mej á'uvej. 7Setá'aj á'uju'un, sera'antixáata yee pu'uri tɨ́n teja'uré'enejsin tɨ Dios ayén tiu'uta'aíjta íiyen chaanaca japua. 8Setá'aj seajta tihuá'uhuaate'en ɨ́ mej tí'icucui'i. Seajta siyen huá'uruuren ɨ́ mej mauchén huácuii mej mi ruuri muá'ara'ani majtáhua'a mena'a. Setá'aj seajta hua'urújte'en a'ɨ́jna jɨme'e ɨ́ mej jɨ́n tí'icucui'i a'ɨ́jna ɨ́ mej miyen ratamuá'amua tɨjɨ́n “tɨ́ tineájxɨ ɨ́ ru jetze”. Seajta hua'utamuárite'en a'ɨ́mej ɨ́ tiyáaru'use ɨ́ mej huá'a tzajta'a seijre'e ɨ́ teɨte. Mú'een, caxu tí'inajchitan a'ɨ́jna jɨme'e sej ra'ancuré'a se'ɨ́jna ɨ́ muárɨ'eri'ira'a ɨ́ sej jɨ́n tihuá'umua'aten. A'ɨ́j pu jɨ́n, caxu huá'ajijve'e. 9’Caxu seajta ti'itɨ́j anú'an tzajta'an ɨ́ puaasi ɨ́ sej jɨ́n avé'ujjɨ́'ɨcɨ'ejme, ti'itɨ́j tumin, tɨ pua'a oro na'ari plata nusu cobre. 10Caxu ca'aní pijca ɨ́ sej jɨ́n huateújvaɨre'en ɨ́ juye jetze. Seajta se'ɨ́ɨn ajtáca'acaimé'e ɨ́ tɨ anátápi'ihuajme'e, seajta ucaújchejte'axɨ'ɨn seexu'ijmé'en seɨ́j jɨme'e ɨ́ sa'ahua ɨ́ sej ra'iteváarajme ɨ́ ruhuaré'etze'e. Caxu seajta itzɨ́j chueeca. Ayee xu huárɨni a'iné ayej tí'ixɨ'epɨ'ɨn mej tejamuaamín me'ɨ́jna jɨme'e ɨ́ sej tí'imɨjhuaca. 11’A'u tɨ na'a mej a'uchéjme, setɨ́'ɨj a'uteárute se'újna, aj xu si seɨ́j huahuauni tɨ caí ti'itɨ́j jɨ́n ateáturaaveca. A'uu xu a'uté'e xá'aju'un u chi'ira'an tzajta'a a'ɨ́jna ɨ́ ja'atɨ a'achú sej caj á'ateere se'újna chajta'a. 12Setɨ́'ɨj a'uteárute se'újna u chi'ita, aj xu hua'utateújte'en. 13Tɨ́ pua'a miyen amua'ancuré'evi'itɨn temua'a naa, ché'e ayén éene'en a'ij sej seri tihua'utateújte. Na'ari caí, setá'aj seɨ́j jemi raateájtuaani ɨ́ runiuuca ɨ́ sej jɨ́n seri tihua'utateújte a'ɨ́mej ɨ́ mej mauchén amuaatíite. 14’Ajta tɨ pua'a ja'atɨ́ caí amua'ancuré'evi'itɨn, na'ari tɨ pua'a mecaí ranamuajracu a'ij sej tihuaú'ixaate'en, setɨ́'ɨj huirácɨɨnen se'újna chi'ita, sera'atéca'atzɨjxɨ'ɨn ɨ́ ruca'acai tɨ i cávatziɨn ɨ́ chuej. Aj mú mi ramua'aréeren ɨ́ mej jɨ́n auteájturaa ɨ́ Dios jemi. 15Ayee nu tejá'amua'ixaate'e tzáahuati'ira'a jɨme'e, a'ájna xɨcájra'a tɨ jetzen huá'axɨjte'en ɨ́ Dios ɨ́ mej jɨ́n auteájturaa ɨ́ jemin, jeíhua pu puaíjtzi hua'utá'asin. Jaítze'e mú rajpuaíitzi muá'aju'un a'ujna chajta'a mecaí ɨ́ mej mejmí'i me'uun é'echejca'a a'ujna tɨ ayén teja'arájtehuaaca'a tɨjɨ́n Sodoma, ajta a'ujna u Gomorra. 16’Casi'i mú'een, ayée nu tejámuaata'aíjte'esin sej si á'ujujhua'ane'en huá'a tzajta'a ɨ́ teɨte ɨ́ mej miyen á'amuaruuren tɨ́j ɨ́ɨra'ave ɨ́ mej tí'itecɨ'ɨmeca. Setá'aj siyen mé titeumuámua'are'en matɨ́j a'ɨ́ɨme ɨ́ cu'ucu'use ɨ́ mej jeíhua raayɨ́'ɨtɨ. Setá'aj huamuá'ajcantare sej si caí tiú'ɨtzíite'e mé sé'ujujhua'ane'en matɨ́j majta rɨcɨ a'ɨ́ɨme ɨ́ cucui'ise. 17’Rɨ́'ɨ xu'u huá'a jemi ɨ́ teteca. A'ɨ́ɨ mú mú'ejmi a'uteátuaasin a'u mej te'áijta huá'a jueesi jemi. Aj mú mi amua'ajvájxɨ'ɨsin a'amua huari jetze. 18Majta mú mú'ejmi á'avi'itɨn ɨ́ tajtúhuaani jemi na'ari ɨ́ rey jemi me'ɨ́jna jɨme'e sej siyen tí'ivaɨre'e ne jetze me'ecan. Ayee mú á'amuaruuren sej si hua'utá'ixaate'en a'ɨ́jna jɨme'e a'ij sej 'een jɨ́n ná'astijre'en ineetzi. Ayee xu che'atá sena'a tihua'utá'ixaate'esin a'ɨ́mej ɨ́ mej caí Israél jetze ajtéme'ecan. 19Aru, a'ájna xɨcájra'a jetze matɨ́'ɨj á'amuavivi'iran, caxu siyen tí'imuajca yee a'ii qui ye'í tetiu'utaxájta, na'ari yee ti'itajqui niuucarijra'a taataxájta. Matɨ́'ɨj miyen amuáaruuren, aj pu i Dios amuaatá'asin a'ij sej ye'í tiu'utaxáj. 20Ayee xu'u, caxu tí'itziɨɨne'e a'iné ɨ́ sej hua'utá'ixaate'esin, caxu rujɨ́ɨmua'a rájteusin sino a'ɨ́ɨn ɨ́ xɨéjniu'ucare'ara'an a'ɨ́jna ɨ́ sej rájya'upua, a'ɨ́ɨ pu amuaata'ítɨira a'ij sej ye'í tiu'utaxáj. 21’Ja'atɨ́ pu hui hua'itzi jɨ́n tí'ijxajtzi'iran ɨ́ ru'ihuaara'a mej mi raajé'ica. Ayee pu che'atá na'a té'eme ɨ́ ya'upuáara'an hua'itzi pu huá'ataaven ɨ́ ruyaujmua'a. Majta me'ɨ́n ɨ́ yaújmua'ame'en, a'ɨ́ɨ mú che'atá mena'a ájhuiixɨ'ɨn. Ayee mú tihua'uta'aíjta mej huá'ucui'ini. 22Majta ɨ́ teɨte, naími'i mú amuá'ajcha'ɨ́ɨre'e muá'aju'un me'ɨ́jna jɨme'e sej ná'astijre'e ineetzi. Ajta a'ɨ́ɨn ɨ́ tɨ te'utáviicua'i ajta na'a caí nain te'entipuá'are, Dios pu ru'irátuaasin a'ɨ́jna. 23Matɨ́'ɨj a'ij pua'a á'amuaruure íiye chajta'a, setá'aj ca'anacan huirácɨɨne. Sej si seɨ́j chajta'a jetze a'uteárute. Ayee nu tejá'amua'ixaate'e, setɨ́'ɨj seuj á'ujujhua'ane'en seɨj seajta seɨj jetze ɨ́ chajta'a a'u mej a'uchéjme a'ɨ́ɨme ɨ́ mej Israél jetze ajtéme'ecan, i nej neajta teáata'a jetze airáane, nee nu xaa yé ve'ecánejsin. 24’A'ɨ́jna ɨ́ tɨ tihuá'amua'ate, jaítze'e pu ruxe'eve'e caí a'ɨ́mej ɨ́ mej tiú'ujmua'ate. Ajta, a'ɨ́jna tɨ tí'ira'aijte'e, jaítze'e pu ruxe'eve'e a'ɨ́jna caí a'ɨ́ɨn tɨ ravaɨre'e. 25A'ɨ́j pu jɨ́n, ayén tiú'ujxe'eve'e. A'ɨ́jna tɨ tihuá'amua'aten, ché'e a'ɨ́ɨn ayén che'atá na'a éene'en tɨ́j a'ɨ́jna tɨ tiú'ujmua'ate. Ajta a'ɨ́jna tɨ tí'ivaɨre'e, ché'e a'ɨ́ɨn ajta ayén che'atá na'a 'eene'en tɨ́j a'ɨ́jna tɨ tí'ira'aijte'e. Ayee mú che'atá mena'a á'amuaruuren mú'ejmi a'ij mej meri náaruu ineetzi. A'iné ayée mú meri naatamuá'a tɨ jɨ́me'en yee: “Mú'ee pej i'i Beelzebú a'ɨ́jna tɨ tihuá'aijte'e ɨ́ tiyáaru'use”, ayée mú che'atá mena'a á'amuaruuren mú'ejmi, mɨ sej hui ní'iteɨtestemua'a. Jee xaa ne'u, majta mú jaítze'e a'ij pua'a á'amuaruuren mú'ejmi. 26’A'ɨ́j xu jɨ́n, ca xu huá'atziɨɨne'e ɨ́ teɨte. Ti'itɨ́ tɨ a'ij avíitzi'i ɨ́ sej jɨ́n rajpuaíjtzi, Dios pu raataseíjrata mé jéjre'e, na'ari ti'itɨ́j tɨ a'ij tɨ rú'avaa ɨ́ sej jɨ́n tí'imuarɨ'e, Dios pu hua'utá'asin mej mi ráamua'aree. 27A'ɨ́jna ɨ́ nej já'amua'ixaate'e avíitzi jɨme'e, ayée xu huárɨni, setá'aj raataxáj mé jéjre'e. Ajta ɨ́ nej já'amua'ixaate'e xahuaani'i jɨme'e, ayée xu raataxáj ca'anín jɨme'e, án xu'u ɨmuá a'utiúu ɨ́ a'amuachi'i japua. 28’Caxu huá'atziɨɨne'e a'ɨ́mej ɨ́ mej ruxɨ́'ej teɨte cui'ica a'iné camu raayɨ́'ɨtɨ mej á'amuaxɨejniu'uca antipuá'ajte'en. Mɨ́ seajta mú'een, a'ɨ́j xu xaa tziɨɨne'e a'ɨ́jna ɨ́ Dios tɨ ayén raayɨ́'ɨtɨ tɨ ra'antipuá'ajte'en mɨ sej siyen che'atá ratéhua'ira'a. Ajta a'ɨ́ɨ pu raayɨ́'ɨtɨ tɨ ra'antipuá'ajte'en ɨ́ á'amuaxɨejniu'uca ɨ́ sej jɨ́n seuj ruurica'a ɨ́ taij jetze tɨ caí ja'anáj á'amɨ'ɨni. 29’Ayee pu huá'anajche a'ɨ́mej mɨ pina'ase, a'achú cumu seɨ́j tumin seɨ́j. Ayee pu i 'een a'ɨ́jna ɨ́ á'amuaya'upua, aúche'e pu huá'acha'ɨɨ mɨ pina'ase. Capu seɨ́j mɨ'ɨni ɨ́ pina'a tɨ pua'a a'ɨ́ɨ caí xɨ ayén tiu'utaxáj. 30Dios pu ajta ramua'aree a'achú tɨ pua'amé cá'uu ɨ́ á'amuacɨpua. 31A'ɨ́j pu jɨ́n, caxu tí'imuajca. Jaítze'e xu ruxe'eve'e ɨ́ Dios jemi mecaí mɨ pina'ase. 32’Ja'atɨ́ tɨ na'a tɨ ayén te'anxájta huá'a jemi ɨ́ teɨte a'ɨ́jna jɨme'e yee nej nu'u rá'astijre'e ne'ɨ́jna ɨ́ Jesús, ayée nu hui che'atá nena'a te'anxájta jemin ɨ́ tɨ ajta ní'iya'upua ta japua tɨ é'eseijre'e tɨ jɨ́me'en yee a'ɨ́ɨ pu xɨ́'epɨ'ɨn huarɨ́j. 33Ajta, ja'atɨ́ tɨ ayén huá'a jemi ayén te'anxájta ɨ́ teɨte tɨ nu'u caí nemua'ate, ayée nu che'atá nena'a te'anxájta jemin ɨ́ tɨ ajta ní'iya'upua, ta japua tɨ é'eseijre'e. Ayee nu xáahuí tiraatá'ixaate'esin tɨ jɨ́me'en yee nej caí ramua'ate ne'ɨ́jna ɨ́ ja'atɨ. 34’Caxu siyen tí'imuajca ɨ́ nej ne'ɨ́jna jɨ́n mú a'uvé'emej mej mi rɨ́'ɨ temua'a naa titeeteáturan íiyen chaanaca japua. Canu ne'ɨ́jna jɨ́n mú a'uvé'emej mej mi rɨ́'ɨ titeeteáturan temua'a naa sino mej mi já'ita'a a'utácɨɨne me'ɨ́jna jɨme'e a'ij nej rɨcɨ. 35Ayee nu ne'ɨ́jna jɨ́n a'uvé'emej tɨ ij ja'atɨ́ autéjcheni tɨ raaténe'usi'ite'en ɨ́ rutáàta. Ajta a'ɨ́ɨn tɨ temuaij ɨ́ 'ɨ́ita'a, a'ɨ́ɨ pu ajta raaténe'usi'ite'esin ɨ́ runáàna. Ayen che'atá na'a tihuá'aruuren, ɨ́ 'ɨ́ita'a tɨ ari timú'un tɨ 'ɨ́ita'a; a'ɨ́ɨ mú huateújne'usi'ite'esin a'ɨ́mej rumúunimua'aca. 36A'ɨ́j mú jɨ́n, a'ɨ́ɨ mú rájcha'ɨ́ɨre'e muá'aju'un ɨ́ seica a'ɨ́mej ɨ́ ruxɨ́'ej teɨtestemua'a. 37’Tɨ́ pua'a ja'atɨ́ jaítze'e raxɨ́'eve'e ɨ́ rutáàta, ajta ɨ́ runáàna caí ineetzi, capu ayén tiraavíjte'e tɨ a'ɨ́ɨn neetzi jemi huateáturan tɨ́j na'a rusén jɨme'e. Ajta tɨ pua'a ja'atɨ́ jaítze'e raxɨ́'eve'e ɨ́ ruyauj tɨ teáata'a, ajta tɨ 'ɨ́ita'a, tɨ pua'a jaítze'e raxɨ́'eve'e caí ineetzi, capu ajta ayén tiraavíjte'e tɨ a'ɨ́ɨn neetzi jemi seíire'e á'ara'ani tɨ́j na'a rusén jɨme'e. 38Ajta, tɨ pua'a ja'atɨ́ raxɨ́'eve'e tɨ á'uche'ecane'en neetzi jamuan, ché'e a'ɨ́ɨn huataúra'an tɨ rajpuaíjtzi á'ara'ani neniúucajtze'e, capu amɨ́n a'ij tɨ pua'a huámɨ'ɨni ɨ́ cúruu jetze. Na'ari caí, capu ayén teja'uré'enejsin tɨ a'ɨ́ɨn ayén huateáturan neetzi jemi a'utɨ́ Dios é'eseijre'e. 39Tɨ́ pua'a ja'atɨ́ tí'itese'e tɨ ij caí huámɨ'ɨni, aúche'e pu xaa ne'u mɨ'ɨni. A'ij pu á'ujɨsin ɨ́ ruxɨ́ejniu'uca tɨ auj ruurica'a. Mɨ́ ajta, a'ɨ́ɨn tɨ huataúra'an tɨ huámɨ'ɨni a'ɨ́jna jɨme'e tɨ tiu'utévaɨ neetzi jetze me'ecan, a'ɨ́ɨ pu ajtahua'a huatarújsin. Rateuní ɨ́ ruxɨ́ejniu'uca tɨ auj ruuri tɨ́j na'a rusén jɨme'e. 40’A'ɨ́jna ɨ́ ja'atɨ tɨ amua'ancuré'evi'itɨ u ruchi'itá, a'ɨ́ɨ pu ajta na'ancuré'evi'itɨ ineetzi. Ajta, a'ɨ́jna ɨ́ tɨ na'ancuré'evi'itɨ ineetzi, ayée pu che'atá na'a ra'ancuré'evi'itɨ a'ɨ́jna tɨ neja'uta'íteca'a. 41Ajta a'ɨ́jna tɨ ra'ancuré'evi'itɨ seɨ́j tɨ Dios jetze me'ecan tí'ixaxa'a, ayée pu che'atá na'a tí'iracɨ'ɨti ɨ́ Dios jemi tɨ́j ajta tí'iracɨ'ɨti a'ɨ́jna tɨ Dios jetze me'ecan tí'ixaxa'a. Na'ari, tɨ pua'a ja'atɨ́ ra'ancuré'evi'itɨn ja'atɨ́ tɨ xɨ́'epɨ'ɨn rɨcɨ, ayée pu che'atá na'a tí'iracɨ'ɨti ɨ́ Dios jemi tɨ́j ajta tí'iracɨ'ɨti a'ɨ́jna ɨ́ ja'atɨ tɨ xɨ́'epɨ'ɨn rɨcɨ. 42Ajta, tɨ pua'a ja'atɨ́ raatá'an cɨ́j caj ɨ́ jaj, vaasu tzajta'a seɨ́j ɨ́ tevi tɨ caí ti'itɨ́j jɨ́n antiújmua'aree, tɨ pua'a ayén tiraatá'an a'ɨ́jna jɨme'e tɨ a'ɨ́ɨn tevi ná'astijre'e, ayej ti'ayajna, ti'itɨ́j pu tí'iracɨ'ɨti ɨ́ Dios jemi.

will be added

X\