San Marcos 8

1Tɨ́'ɨj á'aja'a a'uun a'utéveeca'a a'ujna Galilea ɨ́ Jesús, jeíhua mú teɨte tiújseɨj. Camu ti'itɨ́j tícha'ɨɨca'a mej ráacua'ani. Tɨ́'ɨj jí a'ɨ́ɨn Jesús hua'utajé a'ɨ́ɨme ɨ́ mej jamuan á'ujujhua'ane'e. 2Ayee pu tihua'utá'ixaa tɨjɨ́n: ―Neánxɨeemɨste'e amɨ́ɨme jemi mɨ teɨte, a'iné pu'uri huaíca xɨca teuumé mej á'ujujhua'an nee jamuan. Camu majta ti'itɨ́j tícha'ɨɨ ɨ́ mej ráacua'ani. 3Seica mú ɨmuá curé'ecɨjxɨ. A'ɨ́j pu jɨ́n tɨ pua'a nehua'uré'itixɨ'ɨn ɨ́ ruche mecaí xɨ tiu'ucuá'an, camu te'utáviicua'ira ɨ́ juye japua. 4Matɨ́'ɨj mi miyen tiraata'íhua'uri'i, tɨjɨ́n: ―¿A'iné tí'irɨ'ɨri pej tihua'umín ayajna a'u tɨ caí ja'atɨ́ é'eche? ―Ayee mú tiraata'íhua'uri'i. 5Aj pu i ayén tihua'uta'íhua'uri'i tɨjɨ́n: ―¿A'achúni pua'améca xa'ɨ́'ɨpɨ'ɨsin ɨ́ pan? Matɨ́'ɨj mi miyen tiraata'ixaa tɨjɨ́n: ―Arahua'apuáca. ―Yee mú tiraata'ixaa a'ɨ́ɨme. 6Aj pu i raata'aíjtaca'a mej a'ujrá'asen ɨ́ teɨte á chuaata'a. Tɨ́'ɨj jí raatiɨ́'ɨpɨi ɨ́ pan júte'e a'ɨ́jna ɨ́ Jesús. Aj pu i rɨ́'ɨ tiraatá'a ɨ́ Dios jemi, ajta ra'antítaaraxɨ. A'ɨ́j pu i hua'uré'e'ɨ'ɨpɨ'ite ɨ́ mej jamuan á'ujujhua'ane'e. Majta me'ɨ́n, a'ɨ́ɨme mú hua'uré'e'ɨ'ɨpɨ'ite ɨ́ teɨte. 7Majta mú, seica huájcha'ɨɨca'a ɨ́ hua'ité. Ajta pu raatáhuau ɨ́ Dios jemi. Tɨ́'ɨj jí hua'uta'aíj mej hua'uré'ata'are'en. 8Naíjmi'i mú tiú'ucuaa. Majta temua'a titéeju'uxai. Ajta avá'aturaa ɨ́ pan tɨ ra'antítaaraxɨ. Sicɨ́ri mú jetze ra'avé'ejɨste'axɨ a'ɨ́jna tɨ avá'aturaa. Aráhua'apua sicɨ́ pu te'ará'a. 9Majta me'ɨ́n ɨ́ teɨte ɨ́ mej tiú'ucuaa, muaará'aseca'a cumu muáacua vi'ira'a. Aj pu i a'ɨ́ɨn Jesús hua'aré'e'itixɨ ɨ́ teɨte. 10Tɨ́'ɨj jí ateájraa baarcu jetze, majta ɨ́ mej jamuan á'ujujhua'ane'e. Matɨ́'ɨj mi a'ucɨ́j. A'uu mú a'ará'a a'ájna já'ahua'a tɨ ayén téja'arájtehuaa tɨjɨ́n Dalmanuta. 11Matɨ́'ɨj mi fariseo á e'iré'ene, majta á'iyen autéjhuii mej tí'ira'ihua'un me'ɨ́jna ɨ́ Jesús. Meraatatése mej ca'aníjra'a raatá'an tɨ ij a'ɨ́ɨn auté'ɨtzen. Meraatáhuaviiri'i tɨ hua'utaseíjrate'en ɨ́ mej jɨ́n a'ij te'utaseíj mej nu'u mi jɨ́n ráamua'aree a'ɨ́jna tɨ jetzen araújca'ane a'ɨ́jna ɨ́ Jesús, tɨ pua'a a'uun pa'uvé'emej a'ɨ́jna jemi tɨ júte'e é'eseijre'e tɨ ij ayén huárɨni. 12Aj pu i a'ɨ́ɨn caí ché'e a'ij te'anrɨ'ɨrée já'araa. Tɨ́'ɨj jí ayén tiu'utaxájtaca'a tɨjɨ́n: ―¿A'iné een jɨ́n ménehuavii a'ímej teɨtejra'a nej ti'itɨ́ hua'utaseíjrate'en ɨ́ mej jɨ́n ráamua'aree a'u tɨ é'eme'ecan ɨ́ nej jɨ́n tí'imɨjhuaca? Ajta ayén tiu'utaxájtaca'a tɨjɨ́n: ―Ayee nu xaa ne'u tejá'amua'ixaate'e mú'ejmi, canu ti'itɨ́j amuaataseíjrate'esin. 13Aj pu i huajauhuá'axɨ ɨ́ teɨte. Tɨ́'ɨj jí ajtahua'a ateájraa ɨ́ baarcu jetze. Aj mú mi a'ucɨ́j utavén pújme'en pújme'en. 14Majta me'ɨ́n ɨ́ mej á'ujujhua'ane'e jamuan ɨ́ Jesús, a'ɨ́ɨ mú ya'uhuá'axɨ mej ya'ara'ɨ́'ɨpɨ́n ɨ́ pan mej ráacua'ani. Seɨj mu'u caj tiu'ɨ́'ɨsime'e a'ɨ́jna ɨ́ baarcu jetze. 15Aj pu i ayén tíhua'uta'aíj tɨjɨ́n: ―Xaanamuajri'i mú'een. Rɨ́'ɨ xu'u se'ɨ́jna jɨme'e ɨ́ fariseo mej rajnájchi ɨ́ pan jetze tɨ́'ij huacú'usta, seajta se'íjna jɨme'e mej majta rajnájchi ɨ́ mej Heródes jamuan á'ujujhua'ane'e. 16Matɨ́'ɨj mi autéjhuii mej ti'itiúrixaate'en ɨ́ mej jamuan á'ujujhua'ane'e. Miyen tɨjɨ́n: ―Yee pu a'ɨ́jna jɨ́n tiu'utaxájtaca'a a'iné catu pan tícha'ɨɨ. 17Aj pu i ráamua'areeri'i a'ij mej ye'í tí'ixajtaca'a. Tɨ́'ɨj jí ayén tihua'utá'ixaa tɨjɨ́n: ―¿A'iné een jɨ́n siyen ti'ixa yee sejcaí pan tícha'ɨɨ? ¿Ni tzaa secaí xɨ yaú'itɨée, ca'ɨ́n secaí xɨ tihuáuritɨejte? ¿Ni caí ti'itɨ́ a'amua jetze tásiseiiri? 18¿Ni tzaa secaí tí'iseij, ca'ɨ́n secaí tí'inamua? ¿Ni secaí ramua'aree? 19¿A'achúni pua'an sicɨ́ri avá'aturaa ɨ́ pan tɨ te'avá'aturaa netɨ́'ɨj hua'uré'e'ɨ'ɨpɨ'i ɨ́ mej anxɨ́j vi'ira'a ará'axcaa ɨ́ teɨte a'ɨ́jna jɨme'e tɨ anxɨ́vi ará'axcaa ɨ́ pan? ―Yee pu tiu'utaxájtaca'a a'ɨ́jna ɨ́ Jesús. Aj mú mi miyen tiraata'ixaa tɨjɨ́n: ―Tamuáamuata'a japuan hua'apua pu avá'aturaa. 20Aj pu i a'ɨ́ɨn Jesús, ayén ajtahua'a tihua'uta'íhua'uri'i tɨjɨ́n: ―Ajta ¿a'achúni pua'an sicɨ́ri sété'eve'ejɨ́ste'axɨ se'ɨ́jna mé tí'ive'aa ta'aráhua'apua tɨ ará'axcaa netɨ́'ɨj tihua'umí ɨ́ mej muáacua vi'ira'a ará'axcaa? Aj mú mi miyen titeetaniú tɨjɨ́n: ―Arahua'apua sicɨ́ri. 21Aj pu i ayén tihua'utá'ixaa a'ɨ́jna ɨ́ Jesús tɨjɨ́n: ―¿Ni tzaa secaí xɨ yaú'itɨée, mú'een? 22Matɨ́'ɨjtá mi me'uun a'ará'a a'ájna já'ahua'a chajta'a tɨ ayén téja'arájtehuaa tɨjɨ́n Betsaída. Matɨ́'ɨj mi seɨj je'iré'eneijte tɨ arácuunica'a. Aj mú mi rájhuaviiri'i a'ɨ́jna ɨ́ Jesús tɨ ra'ajtamuárɨ'en. 23Tɨ́'ɨj jí a'ɨ́ɨn Jesús rajví'i muájca'are'ara'an jetze a'ɨ́jna ɨ́ tɨ arácun. Ya'uvi'itɨ́ á pua'acɨé ɨmuá a'ujna a'u tɨ é'echajta'a. A'ɨ́ pu ru'íjcɨ'e ra'arámeijraxɨ á jɨ'ɨseáara'an jetze. Ajta ra'avé'emuarɨej. Tɨ́'ɨj jí raata'íhua'uri'i tɨjɨ́n: ―¿Ni hui peri mé úunee? 24Aj pu i a'ɨ́ɨn ɨ́ ta'arácun, antanéerejye'icaa, ayén tɨjɨ́n: ―Ahuii, teteca nu seɨj. Cɨ xɨee cɨyej mena'a pú'een mej mú á'ujujhua'an. ―Yee pu tiu'utaxájtaca'a a'ɨ́jna ɨ́ tɨ arácun. 25Ajta a'ɨ́ɨn Jesús, ajtahua'a pu ra'aráamuarɨe á jɨ'ɨseáara'an jetze ɨ́ ta'arácun. Ajtahua'a pu rɨ́'ɨ meteúuneereca'a. Pu'uri xaa a'ájna icu huarúj. Naíjmi'i pu ti'iseíjraca'a temua'a naa. 26Aj pu i a'ɨ́ɨn Jesús raata'íteca'a a'ɨ́jna tɨ arácuunica'a tɨ nu'u á'ura'ani ɨ́ ruche. Ajta ayén tiraata'ixaa tɨjɨ́n: ―Pecaj uteáru'ipiche'en u chajta'a. Ni pecáj pajta ja'atɨ́ ixaate'e a'íjna jɨme'e a'ij nej timuáahuaa. 27Tɨ́'ɨj ayén tiuju'urɨ́j, aj pu'i Jesús, majta ɨ́ mej jamuan á'ujujhua'ane'e, a'úu mú a'ará'a a'u tɨ a'uchájta'ajmee, a'ájna já'ahua'a tɨ ayén téja'arájtehuaa tɨjɨ́n Cesarea de Filipo. Juye jetze mú aujú'ucaa. Tɨ́'ɨj i ayén tihua'uta'íhua'uri'i a'ɨ́ɨme ɨ́ mej jamuan á'ujujhua'ane'e tɨjɨ́n: ―¿A'iquí metí'ixa ɨ́ teɨte yee a'atani nej pɨ́rɨcɨ inee? 28Aj mú mi miyen tiu'utaxájtaca'a tɨjɨ́n: ―Seica mú miyen ti'ixa tɨjɨ́n mú'ee pej pe'ɨ́n pɨ́rɨcɨ a'ɨ́jna ɨ́ Juan tɨ huá'amuaɨ'ɨhuaca'a, majta seica miyen tɨjɨ́n pej a'ɨ́ɨn pɨ́rɨcɨ ɨ́ Elías. Majta seica, miyen ti'ixa tɨjɨ́n pej nu'u a'ɨ́ɨn pɨ́jí'irɨcɨ seɨj ɨ́ tɨ ti'itéjvee ɨ́ Dios jemi. ―Yee mú tiraata'ixaa. 29Tɨ́'ɨjta'i a'ɨ́ɨn ayén tihua'uta'íhua'uri'i tɨjɨ́n: ―Ari mú'een, ¿a'iné tejamuá'amitɨejte'e a'atani nej pú'een inee? Tɨ́'ɨj jí ayén tiu'utaxájtaca'a a'ɨ́jna ɨ́ Pedro, tɨjɨ́n: ―Mú'ee pej a'ɨ́ɨn pɨ́jí'irɨcɨ a'ɨ́jna ɨ́ mej miyen ratamuá'amua tɨjɨ́n ɨ́ Cɨríistu'u, ɨ́ tɨ Dios án ya'ujyeíjtza ɨ́ ɨpuari japua. ―Yee pu tiu'utaxájtaca'a a'ɨ́jna ɨ́ Pedro. 30Aj pu i a'ɨ́ɨn hua'utá'ijmɨijri'i mej caí ja'atɨ́ ixaate'e. 31Tɨ́'ɨj jí a'utéjche tɨ tihuá'umua'aten. Ayee pu tihua'utá'ixaa tɨ a'ɨ́ɨn ruseɨ́j, ɨ́ tɨ ajta teáata'a jetze airáane, a'ɨ́ɨ pu nu'u jeíhua rajpuaíjtzi a'ame. Ajta tɨ nu'u ayén ruxe'eve'e a'ame mej caí raxɨ́'eve'e muá'aju'un ɨ́ mej Israél jetze ajtéme'ecan, majta ɨ́ mej ve'ecán jɨ́n títetateí u teyujta'a, majta a'ɨ́ɨme ɨ́ mej té'eyu'uxaca. Naíjmi'i mú nu'u caí raxɨ́'eve'e muá'aju'un. Ajta ayén tihua'utá'ixaa mej nu'u raajé'icatan. Tɨ́'ɨj nu'u huamɨ́'ɨn, aj pu ijtá'i huatarújsin huaíca xɨcaj tzajta'a. 32Temua'a pu tihuaú'ixaa e'ehuauritɨéecan jɨme'e. Ajta a'ɨ́ɨn ɨ́ Pedro, a'ɨ́ɨ pu ra'iráavi'itɨ ayée. Aj pu'i tiraatixáate'ajraa tɨ nu'u caí ayén ti'itaú'a'acare'en. 33Mɨ́ ajta a'ɨ́ɨn Jesús, a'ɨ́ɨ pu ruhuárita'a ca'acheecajraa. Hua'useíirajraa a'ɨ́ɨme ɨ́ mej jamuan á'ujujhua'ane'e. Aj pu i a'ɨ́ɨn ɨ́ Pedro tité'axɨ. Ayen tɨjɨ́n: ―Aricu. Ajtára'a ineetzi jemi, mɨ pej piyen tí'ixaxa'a tɨ́j a'ɨ́jna ɨ́ tiyaaru'u. Mú'ee pej caí piyen tí'imua'atze a'ij tɨ tí'ijxe'eve'e ɨ́ Dios sino a'ij mej tí'ijxe'eve'e ɨ́ teɨte. 34Tɨ́'ɨj jí Jesús hua'utajé a'ɨ́ɨme ɨ́ mej jamuan á'ujujhua'ane'e, ajta ɨ́ teɨte. Ayee pu tihua'utá'ixaa tɨjɨ́n: ―Tɨ́ pua'a ja'atɨ́ raxɨ́'eve'e tɨ ne jamuan á'uche'ecane'en, ayée pu tiú'ujxe'eve'e tɨ caí ché'e ayén rɨjca a'ij tɨ ruseɨ́j tí'ijxe'eve'e. Mɨ́ ajta, tɨ pua'a ja'atɨ́ á'uche'ecane'en ne jamuan, ayée pu tiú'ujxe'eve'e tɨ rajpuaíjtzi á'ara'ani ruxɨ́'evi'ira'a jɨme'e. Ajta tɨ pua'a a'ɨ́ɨn huámɨ'ɨni, capu a'ij í'irɨni. 35’Ayee nu tejámuaatá'ixaate'esin. Tɨ́ pua'a ja'atɨ́ tiú'ujtesi'ire'e tɨ caí huámɨ'ɨni, aúche'e pu mɨ'ɨni a'ɨ́jna ɨ́ ja'atɨ. A'ij pu á'ujɨsin ɨ́ ruxɨ́ejniu'uca tɨ auj ruuri. Mɨ́ ajta, tɨ pua'a ja'atɨ́ huámɨ'ɨni a'ɨ́jna jɨme'e tɨ á'uche'ecane'en neetzi jamuan, na'ari a'ɨ́jna jɨme'e ɨ́ niúucare'ara'an ɨ́ Dios, a'ɨ́ɨ pu ajtahua'a huatarújsin. Ajtahua'a pu rateuni ɨ́ ruxɨ́ejniu'uca tɨ auj ruuri. 36’Ajta, tɨ pua'a ja'atɨ́ tiu'umuá'itɨn naíjmi'i tɨ́j na'a tɨ íiyen tí'iseijre'e chaanaca japua, ¿a'iquí tiraatéva'ɨre a'ɨ́jna tɨ raamuá'itɨ tɨ pua'a a'ɨ́ɨn yá'urɨeeni ɨ́ ruxɨ́ejniu'uca tɨ auj ruuri? Capu ti'itɨ́ a'ij tiraatéva'ɨre, ¿ni caí? 37¿Ni caí a'ij tí'irɨ'ɨri tɨ huaújnanai ɨ́ ruxɨ́ejniu'uca tɨ ari yá'urɨe a'ɨ́jna jɨme'e ɨ́ tɨ tí'ijcha'ɨɨca'a? Capu a'atzu a'ij tí'irɨ'ɨri, icu. 38’Ayee nu neajta tejá'amua'ixaate'e. A'íjna i teɨtejra'a, jeíhua mú auteájturaa ɨ́ Dios jemi. Ayee mú e'en ɨ́ Dios jemi matɨ́j a'ɨ́ɨme ɨ́ mej tiú'ujxana'acɨra'ate 'ɨ́ita'a jamuan. ’Tɨ́ pua'a setí'itevi'ira'a se'ɨ́jna jɨme'e mej ráamua'aree ɨ́ teɨte sej ne jamuan á'ujujhua'an, na'ari mej ráamua'aree tɨ a'amuaráanajche i neniuuca, tɨ pua'a siyen tí'itevi'ira'a huá'a jemi, aj nu neajta inee i nej neajta teáata'a jetze airáane, nee nu niyen che'atá nena'a tí'itevi'ira'a na'ame mú'ejmi jemi. Netí'itevi'ira'a nu na'ame mú'ejmi jemi a'ɨ́jna xɨcájra'a jetze netɨ́'ɨj neajtahua'a yatanéjsin íiyen chaanaca japua. Ve'ecán nu jɨ́n ti'itevée na'ame jemin ɨ́ Dios tɨ niyá'upua a'ájna netɨ́'ɨj yatanéjsin huá'a jamuan ɨ́ mej tí'ivaɨre'e ta japua ɨ́ Dios jemi.

will be added

X\