San Marcos 4

1Aj pu'i Jesús aj a'ucáane a'u tɨ e'eve'e'ástɨme ɨ́ jaj tɨ́'ij ajtahua'a tihuá'umua'aten. Aj mú mi jeíhua ajteáxɨɨreca'a ɨ́ teɨte a'u tɨ a'utéveeca'a. Temua'a mú tí'itemu'iicaa ɨ́ teɨte. A'ɨ́j pu jɨ́n ateájraa ɨ́ baarcu jetze tɨ jaata'a e'ecáve'eca'a. Majta me'ɨ́n ɨ́ teɨte, áa mú a'ucaíjme'ecaa ja'apuaíri japua. 2- 3Jéihua pu tihuá'a'ixaate'eca'a a'ɨ́jna jɨme'e ɨ́ chuijtari. Ayee pu tihuaú'ixaa seɨj jɨme'e ɨ́ niuucari. Ayen tɨjɨ́n: ―Xaanamuajri'i mú'een. Ja'atɨ́ tɨ nu'u tí'ihuastehua'a, u pu á'ume tɨ tejé'ehuaste'e. 4Aa pu aumé'ecaa ratáhua'anáa ɨ́ imue'eri. Seica pu juye jetze a'uvatzɨ́jraa. Aj mú mi pina'ase júte'e ɨmuá ave'ecáane, meraaré'eje'ipɨ. 5’Ajta nu'u seica huavatzɨ́jraa tetej tzajta'a a'u tɨ caí jeíhua chuej á'uca. Yee pu'i teja'uré'ene, a'iné capu huatétee ɨ́ chuej tɨ tzajta'an iru'ucárutixɨ'ɨn ɨ́ jíine'ara'an, ca'anacan pu huaré'epɨstaca'a ɨ́ chuej. Aj pu'i ca'anacan ajneájxɨ ɨ́ imue'eri. 6Ajta tɨ́'ɨj u e'iré'ene ɨ́ xɨcaj, tɨ́'ɨjí huaré'ehuaa xɨcaj jɨme'e ɨ́ tɨ tiu'unéj. A'iné capu ajtanáana'ajme'eca'a, a'ɨ́j pu jɨ́n huaré'ehuaa. 7’Ajta seica ɨ́ imue'eri, a'úu pu a'uvatzɨ́jraa a'u tɨ tzicare'e a'uvéjme'ecaa. Tɨ́'ɨj a'ɨ́ɨn tzicare'e huavaújse, tɨ́'ɨjí a'ɨ́ɨn tzicare'e ra'avá'ana a'ɨ́jna tɨ tiu'unéj. A'ɨ́j pu jɨ́n caí huácɨɨreca'a. 8’Aru seica pu nu'u a'uun a'uvatzɨ́jraa a'u tɨ a'urɨ́'en ɨ́ chuej. A'ɨ́ɨ pu huanéj. Tɨ́'ɨj huavaújse, aj pu'i temua'a tiú'ucɨɨreca'a. Seica ɨ́ imue'eri, ayée pu caté'etejme'ecaa ɨ́ cuuxa'a jetze seɨj tɨ ajtanéj ɨ́ 'icɨɨri a'achú cumu seité japuan tamuáamuata'a ɨ́ jatzi. Ajta seica ayén caté'etejme'ecaa a'achú cumu huaícate. Ajta seica, anxɨ́te pu caté'etejme'ecaa seɨj ajta seɨj. ―Yee pu tiu'utaxájtaca'a ɨ́ Jesús. 9Ajta ayén tihuaú'ixaa tɨjɨ́n: ―Tɨ́ pua'a ja'atɨ́ rarɨ́'ɨrejmɨ'ɨ, ché'e a'ɨ́ɨn huaruitɨejte'en temua'a naa. 10Matɨ́'ɨj mi a'ucɨ́j ɨ́ teɨte. Aru camu naíjmi'i. A pu a'uteájturaa ɨ́ Jesús, majta seica ɨ́ mej naími'i á'ujujhua'ane'e huá'a jamuan ɨ́ mej tamuáamuata'a japuan hua'apua ará'ase. Matɨ́'ɨj mi miyen tiraata'íhua'uri'i a'ij tɨ huataújmua'a a'ɨ́jna ɨ́ niuucari tɨ raaxájtaca'a. 11Ajta a'ɨ́ɨn Jesús, ayén tihua'utá'ixaa tɨjɨ́n: ―Mú'ejmi pu Dios tiú'ixaa e'ehuaruitɨéecan jɨme'e a'ɨ́jna ɨ́ tɨ huateú'avaataca'a ɨ́ Dios jemi a'iquí tí'iseijre'e a'ame a'ɨ́jna xɨcájra'a jetze tɨ́'ɨj Dios tí'ita'aíite'e a'ame íiyen chaanaca japua. Aru amɨ́mej mej mé a'uté'uu pua'acɨé pua'acɨé, nain pu tihuá'itɨiiran chuijtari jɨme'e. 12Ayee pu tihuá'aruure. Tɨ́'ɨj tihuaú'ixaate'e ɨ́ niuucari jetze, seica mú miyen tiú'umua'ati tɨjɨ́n: “Cu xɨee teyaú'itɨe iteen.” Ajta matɨ́'ɨj ranamuajran, miyen tɨjɨ́n: “Tu'iteájnamua iteen.” Aru capu xaa ne'u. Camu yaú'itɨe, camu majta tanamuaj. Dios pu tihuá'itɨii chuijtari jɨme'e mej mi caí yaú'itɨée muá'ara'ani, mej mi caí ráanamua, a'iné camu xaa ne'u raxɨ́'eve'e mej seɨcɨé tirájteuni a'ij mej ye'í huárɨni, tɨ́'ij a'ɨ́ɨn caí tihua'utá'uuni'i ɨ́ mej jɨ́n auteájturaa ɨ́ Dios jemi. 13Ajta Jesús pu ayén tihua'uta'íhua'uri'i tɨjɨ́n: ―¿Ni tzaa secaí yaú'itɨée xa'araa a'ɨ́jna ɨ́ niuucari? Tɨ́ pua'a secaí yaú'itɨée xa'araa, ¿a'iné tí'irɨ'ɨri sej si siyen yaú'itɨée xá'ara'ani ɨ́ seica ɨ́ niuucari? Nu'uri íjii amuaatá'ixaate'esin amitɨéere'ecan jɨme'e a'ij tɨ huataújmua'a ɨ́ niuucari tɨ jɨ́me'en raxa a'ɨ́jna ɨ́ ja'atɨ tɨ nu'u tí'ihuastehua'a imue'eri jɨme'e. 14’A'ɨ́jna ɨ́ imue'eri tɨ huasti'i, ayée pu seijre'e tɨ́j ɨ́ ja'atɨ tɨ á e'etéche'ecane'e huá'a'ixaate'e ɨ́ niúucare'ara'an jɨme'e tɨ Dios jemi a'uvé'emej. 15Ajta seica ɨ́ teɨte, yee mú e'en cumu ɨ́ imue'eri tɨ a'uun a'uvatzɨ́jraa juye jetze. A'ɨ́ɨ mú naa tí'ijnamua ɨ́ niúucare'ara'an tɨ raaxájtaca'a ɨ́ ja'atɨ. Aru, matɨ́'ɨj ráanamuajri'i, a'ɨ́ɨ pu tiyaaru'u hua'irá'a'ari'iracare'e ɨ́ niuucari ɨ́ mej rú'umua'areereca'a ɨ́ ru tzajta'a. 16Majta seica, yee mú e'en tɨ́j a'ɨ́jna ɨ́ imue'eri tɨ huahuásti'ihuaca'a ɨ́ tetej tzajta'a. Amuacaí pu hua'aránajcheca'a ɨ́ niuucari ɨ́ mej ráanamuajri'i. 17Aru cumu caí jeíhua ajtanáana'ajme, a'ɨ́j mú jɨ́n rajpuaíitzi muá'aye'i me'ɨ́jna jɨme'e mej seica huá'axɨeehuasti ɨ́ niuucari, na'ari tɨ pua'a seica a'ij pua'a mehuá'aruure, cɨ́j mu'u té'eviicua'i. Ca'anacan mú mé rúujɨsin. 18’Majta seica ɨ́ teɨte, ayée mú 'een tɨ́j ɨ́ imue'eri tɨ huahuásti'ihuaca'a a'u tɨ a'utzícare'eme. A'ɨ́ɨ mú ranamua ɨ́ niuucari. 19Aru jeíhua pu huá'a jetze ruxe'eve'e a'ij mej rujɨ́ɨmua'a mena'a tirájteuve íiyen chaanaca japua tej japuan seijre'e. Ayee mú huaújmua'amua mej tí'ituaave'en. Majta miyen tí'inecua'atze mej chíjteaani pú'eene'en. A'iné tɨ́'ɨj pɨ́ na'a mú miyen tí'imua'atze a'iné ayée mú tí'ixe'eve'e, capu ché'e té'uve ɨ́ huá'a tzajta'a mej japuan tiú'umua'ati ɨ́ niuucari. A'ɨ́j pu jɨ́n caí ché'e rɨ'ɨrí tɨ hua'utévaɨre'en ɨ́ niuucari ɨ́ huá'a tzajta'a. 20’Majta seica, ayée mú 'een cumu a'ɨ́jna ɨ́ imue'eri tɨ huavatzɨ́jraa japuan ɨ́ chuej tɨ a'urɨ́'en. A'ɨ́ɨ mú xaa ranamua ɨ́ niuucari, majta ɨ́ ru tzajta'a raateátuaasin ɨ́ rumua'atzíira'a jɨme'e. Ayee pu 'een tɨ́j 'een ɨ́ imue'eri tɨ huácɨɨreca'a jeíhua. Seica mú tiu'utévaɨre'esin jeíhua. Seica mú tiu'utévaɨre'esin cumu ɨ́ imue'eri tɨ huácɨɨreca'a a'achú cumu seité japuan tamuáamuata'a tɨ caté'etejme, seɨj ajta seɨj. Majta seica cumu ɨ́ tɨ huácɨɨreca'a a'achú cumu huaícate tɨ caté'etejme, majta seica miyen 'een cumu ɨ́ tɨ huácɨɨreca'a a'achú cumu anxɨ́te, seɨj ajta seɨj. 21Ajta ayén tihua'utá'ixaa tɨjɨ́n: ―¿A'iné tejamuá'amitɨejte'e mú'ejmi? Tɨ́ pua'a ja'atɨ́ yé vé'eme'en, lámpara tɨ tijájna, ¿a'uné jetze yá'aruuren a'ɨ́jna ɨ́ lámpara? ¿Ni sicu'uj jetze ru'utéeyeijtza, na'ari utaatzi jete ye'iráchajtza? Capu xaa ne'u áa ya'uté'avaata, sino án pu jéjre'e ya'ujchájtza, án ɨmuá tɨ́'ij a'ɨmuá a'atáneeri'icɨj. 22Ti'itɨ́ tɨ a'ij tí'aviitzi'i, capu ayén éene'en a'ame tɨ́j na'a rusén jɨme'e, sino huataújseijrata á jéjre'e. Na'ari ti'itɨ́ tɨ a'ij avíitzi jɨ́n tí'imuari'ihua, aj pu'i muá'areeri'ihuan. 23Mú'een, mɨ sej rarɨ́'ɨrejve, xáanamuajri'i. ―Ayee pu tihuaú'ixaa ɨ́ Jesús. 24Ajta ayén tihuaú'ixaa tɨjɨ́n: ―Rɨ́'ɨ xu'u tiráanamua i sej tí'inamua. A'achú sej caj tí'ijnamua ɨ́ niuucari, ayée pu che'atá na'a Dios tejámuaatá'asin mú'ejmi sej si jaítze'e yaú'itɨée xá'ara'ani. Ajta a'ɨ́ɨn, aúche'e pu jaítze'e tejámuaatá'asin i sej ranamua. 25Ayee pu té'eme. Tɨ́ pua'a ja'atɨ́ rɨ́'ɨ tí'ijnamuajrave'en, Dios pu raatá'asin tɨ jaítze'e yaú'itɨée á'ara'ani. Ajta, tɨ pua'a ja'atɨ́ caí rɨ́'ɨ tí'ijnamuajrave'en, Dios pu rá'ari'ira a'achú tɨ caj ari tiyaú'itɨée já'araa. 26Ajta ayén tɨjɨ́n: ―Ayee pu tí'irɨneca matɨ́'ɨj miyen rɨjca a'ij tɨ tí'ijxe'eve'e ɨ́ Dios. Yee mu'u huatámu'iireca tɨ́j huavaújse'en ɨ́ imue'eri tɨ ja'atɨ raahuáste. A'ɨ́jna ɨ́ ja'atɨ ratáhua'anáa pu aumé'ecaa ɨ́ imue'eri. 27Tɨ́'ɨj jí huatácutzi a'ɨ́jna ɨ́ ja'atɨ. Aj pu ijtá'i í'ijɨstin, tɨ́'ɨjtá'i ájchesin. A'ateeri tɨ huaté'a a'ame. Aj pu'i ajnéjsin, tɨ́'ɨj i vaujse'en. Aru a'ɨ́jna ɨ́ ja'atɨ, a'ɨ́ɨ pu caí ramua'aree a'ij tɨ ye'í te'ejnéj ɨ́ imue'eri. 28A'ɨ́jna ɨ́ chuej pu hui ruseɨ́j rɨ́'ɨ raruuren tɨ huavaújse'en ɨ́ imue'eri. Amuacaí pu ajnéjsin ɨ́ huáacɨxa'a. Aj pu'i ɨ́ huíjmuaiyu. Tɨ pua'a ari huijmuaíiyuren, tɨ́'ɨjí ajtanéjsin tɨ jetzen caté'ete a'ame ɨ́ jatzi. 29Tɨ́'ɨj a'ɨ́ɨn huáca'anáan ɨ́ jatzi, aj mú mi u yá'atzaanan. Pu'uri íjii teja'uré'ene a'ájna xɨcájra'a jetze mej jetzen tí'itza'anaca. 30Ajta ayén tiu'utaxájtaca'a ɨ́ Jesús tɨjɨ́n: ―¿A'iné ye'í tí'irɨ'ɨri tej ti tiyen raataxáj a'ij tɨ ye'í tejé'aijta ɨ́ Dios? ¿Ti'itájqui niuucarijra'a ruxe'eve'e tej raataxáj a'ij tɨ ye'í tí'irɨneca Dios tɨ é'eseijre'e? 31’Ayee pu 'een cumu ti'itɨ́ tu'upi tɨ ayén ántehuaa tɨjɨ́n mostaasa. Ayee pu 'een tɨ jaítze'e cɨ́lieen caí máàj seica jatzíjra'a tɨ yen seijre'e íiyen chaanaca japua. 32Tɨ́'ɨj huasti'ihua a'ɨ́jna ɨ́ jatzi, aj pu'i vaujse'en. Tɨ́'ɨj huavaújse'en, jaítze'e pu uratɨ́tɨ'ɨj á'aye'i caí ɨ́ pi'ista tɨ yen seijre'e íiyen chaanaca japua. Temua'a pu ti'ipuápua'amee ɨ́ cɨ́ye'ara'an. Ajta ɨ́ xamua'ira'an, temua'a pu te'antajíya'ume. A'ɨ́j pu jɨ́n rɨ'ɨrí mej pina'ase jetzen tihuaúritu'ate'en tɨ huácɨen tzajta'a. ―Ayee pu tihaú'ixa ɨ́ Jesús. 33Ayee pu tihuá'amua'atehua'a ɨ́ niúucare'ara'an jɨme'e tɨ Dios jemi é'eme'ecan. Jeíhua pu tihuá'a'ixa'atehua'a niuucari jɨme'e a'achú mej caj té'eviicua'iraca'a mej ráanamua. 34Ti'itɨ́ tɨ a'ij tɨ tihuá'a'ixa'atehua'a ɨ́ teɨte, Jesús pu ayén tihuá'a'ixa'atehua'a niuucari jɨme'e tɨ caí e'ehuáuritɨiiricɨ. Aru a'ɨ́ɨ pu tihuá'a'ixa'atehua'a a'ɨ́mej ɨ́ mej jamuan á'ujujhua'ane'e a'ij tɨ huataújmua'a naíjmi'i ɨ́ niuucari amitɨéere'ecan jɨme'e. 35A'ɨ́jna xɨcájra'a jetze, tɨ́'ɨj ari téchumua'arijme'e, Jesús pu hua'utá'ixa a'ɨ́mej ɨ́ mej jamuan á'ujujhua'ane'e. Ayen tɨjɨ́n: ―Tiché'e antácɨɨne után pújme'en. 36Matɨ́'ɨj mi á huajauhuá'axɨ ɨ́ teɨte. Aj mú mi yá'utɨɨ ɨ́ Jesús jetzen ɨ́ baarcu a'uun tɨ a'utéveeca'a. Majta seica a'ucɨ́j seɨj jetze ɨ́ baarcu. 37Aj pu'i huatá'eecareca'a temua'a ca'anín jɨme'e. Japuutzari pu temua'a té'uxɨjve'e. Ajta vivejmé'en tiújta'ahua'a ɨ́ jaj. Tɨ́'ɨj i ateáxɨɨre'axɨ ɨ́ baarcu jetze. Pu'uri tɨ́n avé'ejɨstijme'e ɨ́ jaj. 38Ajta a'ɨ́ɨn Jesús, a'úu pu é'ecujcaa cɨ́tzata'an pújme'en ɨ́ baarcu. Timu'utzi pu huamé'ecaa. Aj mú mi raajɨ́ste. Miyen tɨjɨ́n: ―Maeestru, ¿ni caí á jetze ruxe'eve'e tej teri tɨ́n cui'ini? 39Aj pu 'i ca'anacan ájchee ɨ́ Jesus. Tɨ́'ɨj jí raatépua'ajte ɨ́ eeca. Ajta ayén tiraata'ixaa ɨ́ jaj, tɨjɨ́n: ―Pecaj ché'e sihuájna. Xaatapuá'ajta. ―Yee pu tiu'utaxájtaca'a. Aj pu'i huateápua'areca'a ɨ́ eeca. Ajta a'uréujé'iyerecaj ɨ́ jaj temua'a naa. 40Aj pu ijtá'i Jesús hua'utá'ixa ɨ́ mej jamuan á'ujujhua'ane'e, ayén tɨjɨ́n: ―¿A'iné een jɨ́n huápɨ'ɨ setiu'utátziɨn? ¿A'iné een jɨ́n secaí té'atzaahuate'e? ―Yee pu tiu'utaxájtaca'a. 41Temua'a mú mi jeíhua tiu'utátziɨn. Majta miyen tiúj'ixaate'eca'a me'ɨ́jna jɨme'e mej tiu'utátziɨn. Miyen tɨjɨ́n: ―¿Ti'itájni tévira'a pú'een? Amɨ́ pu hui tihuá'aijte'e ɨ́ eeca, ajta ɨ́ jaj. Naími'i mú rá'astijre'e. ―Yee mú tiúj'ixaate'eca'a.

will be added

X\