San Marcos 2

1Teuumé'eca hua'apua xɨcaj, huaíca xɨcaj, ajtahua'a pu a'ɨ́ɨn Jesús a'uteájrupi u Capernaúm. Matɨ́'ɨj mi ráamua'areeri'i ɨ́ teɨte tɨjɨ́n: “U pu nu'u já'ahua'a e'irájca ruche.” 2Aj mú mi ca'anacan tiújseɨj jeíhua ɨ́ teɨte, matɨ́j mena'a caí ché'e tité'uve u chi'ita. Camu majta á'avejrica'a ta'iténinei. Ajta a'ɨ́ɨn ɨ́ Jesús, u pu ánu'uhuatéveeca'a u chi'ita. A'ɨ́ɨ pu tihuá'a'ixaate'eca'a a'ij tɨ tí'ijxe'eve'e ɨ́ Dios. 3A'ɨ́ɨ mú ja'atɨ́ a'uré'eneijte ɨ́ Jesús jemi seɨj tɨ tí'icui'i. Cɨyáaxara'acaa nainjapua ɨ́ ja'atɨ. Memuáacua mú mé ráachuisime'e. 4Aru capu huatárɨ'ɨristareca'a mej ru'uteárujte'en u téte'e a'utɨ́ Jesús ánu'uhuatéveeca'a, a'iné temua'a mú tí'itemu'iicaa ɨ́ teɨte. A'ɨ́j mú jɨ́n, anticɨ́j án ɨmuá ɨ́ chi'ij japua, matɨ́'ɨj mi ra'anáacu ɨ́ chi'ij. Aj mú mi ru'ucájtuaa ɨ́ tɨ tí'icui'i a'utɨ́ ánu'uhuatéveeca'a ɨ́ Jesús. 5Aj pu'i hua'useíj, ajta ayén tiu'umuá'aj tɨjɨ́n: “Meté'atzaahuate'e, micu.” A'ɨ́j pu jɨ́n ayén tiraata'ixaa ɨ́ tɨ tí'icui'i tɨjɨ́n: ―Niyauj, pu'uri hui timuaatá'uuni'iri'i ɨ́ Dios ɨ́ pej jɨ́n auteájturaa ɨ́ jemin. 6- 7Majta á vejli'i seica me'uun e'irá'uu ɨ́ mej té'eyu'uxaca ɨ́ ruye'irá jɨme'e. Matɨ́'ɨj me'ɨ́jna huánamuajri'i a'ij tɨ tiu'utaxájtaca'a ɨ́ Jesús, matɨ́'ɨj mi miyen tiu'umuá'aj ɨ́ ru tzajta'a tɨjɨ́n: “¿A'iquí een jɨ́n ayén ti'ixa amɨ́jna mɨ tevi? A'ij pu pua'a, xaa ne'u, ti'ixa. Capu hui a'ɨ́jna jɨ́n antiújmua'aree amɨ́jna tɨ seɨj tiu'utá'uuni'i ɨ́ tɨ jɨ́n auteájturaa ɨ́ Dios jemi. A'ɨ́ɨ pu'u ɨ́ Dios antiújmua'aree tɨ ayén seɨj tiu'utá'uuni'i.” Yee mú té'umua'atzejca'a a'ɨ́ɨme ɨ́ mej té'eyu'uxaca ɨ́ ruye'irá jɨme'e. 8Ajta a'ɨ́ɨn Jesús, a'ɨ́ɨ pu ru tzajta'a rú'umua'areereca'a a'ij mej ye'í tí'imua'atzejca'a ɨ́ ru tzajta'a. Tɨ́'ɨj i ayén tihua'uta'íhua'uri'i tɨjɨ́n: ―¿A'iné een jɨ́n siyen té'umua'atze ɨ́ ru tzajta'a? 9¿Ti'itájni caí muárɨ'eri? ¿Ni qui nej niyen tiraata'ixaate'en ɨ́ tɨ cɨyáaxara'a yee: “Pu'uri timuaatá'uuni'iri'i ɨ́ pej jɨ́n auteájturaa ɨ́ Dios jemi”, na'ari yee: “Ájchesi, patá'aj rá'anchueni muá'utaatzi; pajta yee á'ura'ani”? 10- 11Ayee nu xaa ne'u rɨni tɨ́j ɨ́ nevástara'a, ɨ́ tɨ jí'i Dios, setá'aj ráamua'aree, i nej neajta teáata'a jetze airáane, neajta nu ne'íjna jɨ́n antínmua'aree íiyen chaanaca japua nej ni tihua'utá'uuni'i ɨ́ mej jɨ́n ateáturaaveca ɨ́ Dios jemi. ―Yee pu tihua'utá'ixaa ɨ́ Jesús. Aj pu'i ayén tiraata'ixaa ɨ́ tɨ cɨyáaxara'a tɨjɨ́n: ―Ayee nu tí'imua'ixaate'e. Ájchesi, pajta rá'anchueeni muá'utaatzi. Aricu a'u pej é'eche. 12Ajta á'iyen a'ɨ́ɨn tɨ tí'icui'ica'a, a'ɨ́ɨ pu ájchee. Rá'ajchui ɨ́ rú'utaatzi. Tɨ́'ɨj i á'uraa, meti'iseíiraca'a ɨ́ teɨte. A'ɨ́j mú jɨ́n naími'i a'ij te'utaseíj. Rɨ́'ɨ mú tiraatá'a ɨ́ Dios. Miyen tɨjɨ́n: ―Catu ja'anáj ti'itɨ́j huaseíj tetɨ́j íjii. Yee mú tiu'utaxájtaca'a ɨ́ teɨte. 13Tɨ́'ɨj jí ajtahua'a Jesús a'uun á'ume a'u tɨ e'eve'e'ástɨme ɨ́ jaj. Aa mú a'uré'enineica'a naími'i ɨ́ teɨte jemin ɨ́ Jesús. Ajta a'ɨ́ɨn Jesús, a'ɨ́ɨ pu huá'a'ixaate'eca'a ɨ́ niuucari tɨ jɨ́n Dios hua'irájtuaani. 14Aj pu'i ayée a'uré'ene. Tɨ́'ɨj jí a'uun ɨ́ Leví huaseíj, ɨ́ tɨ i'i yaujra'an a'ɨ́jna ɨ́ Alfeo. A'uu pu anú'ujcatii chi'ita mej tzajta'an tí'iteji'ivi ɨ́ mej tí'itɨ'ɨcɨca. Aj pu'i Jesús ayén tiraata'ixaa tɨjɨ́n: ―Patá'aj nee jamuan á'uche'ecane'en. Aj pu'i a'ɨ́ɨn ájchee ɨ́ Leví. Tɨ́'ɨj jí á'ume jamuan. 15Tɨ́'ɨj jí ayén tiuju'urɨ́j matɨ́'ɨj a'ará'a ɨ́ Leví tɨ é'eche. Jesús pu a'ɨ́mej jamuan tí'icua'acaa ɨ́ mej a'ij pua'a tí'iteteɨte. A'ɨ́ɨ mú a'ɨ́ɨn pɨ́rɨcɨ ɨ́ mej huá'ajijve'e ɨ́ mej tí'itɨ'ɨcɨca, majta ɨ́ mej caí xɨ́'epɨ'ɨn rɨjca. A'ɨ́ɨ mú tí'icua'acaa meesa japua jamuan ɨ́ Jesús, majta seica ɨ́ mej jamuan á'ujujhua'ane'e. Naíjmi'i mú tí'icua'acaa a'iné memu'iicáa ɨ́ mej á'ujujhua'ane'e ɨ́ Jesús jamuan. 16Majta seica á'a vejli'i cɨɨneca'a. A'ɨ́ɨ mú a'ɨ́ɨn pú'een ɨ́ mej tiú'ujmua'ate a'ij tɨ tiu'uxájtaca'a ɨ́ Moisés teecan. Jeíhua mú nu'u raxɨ́'eve'e ɨ́ ruye'irá. Ayee mú ánte'arua a'ɨ́ɨme tɨjɨ́n fariseo. A'ɨ́ɨ mú miyen tiu'uséij ja'atén mej jamuan tí'icua'acaa ɨ́ Jesús. Aj mú mi miyen a'ɨ́mej tiu'utá'ixaa ɨ́ mej jamuan á'ujujhua'ane'e tɨjɨ́n: ―¿A'iné een jɨ́n a'ɨ́ɨn á'amuamaestru tí'icua'aca, ajta ye'eca huá'a jamuan ɨ́ mej tí'iteji'ivi, ajta huá'a jamuan ɨ́ mej caí xɨ́'epɨ'ɨn rɨcɨ? Ayee mú tiu'utaxájtaca'a a'ɨ́ɨme ɨ́ mej tiú'ujmua'ate yú'uxare'ara'an jetze ɨ́ Moisés, a'ɨ́ɨme ɨ́ mej huá'a jetze ajtéme'ecantaca'a ɨ́ fariseo. 17Tɨ́'ɨj a'ɨ́ɨn huá'unamuajri'i ɨ́ Jesús, ayée pu tiu'utaxájtaca'a tɨjɨ́n: ―Ayee nu tejá'amua'ixaate'e. Ayee pu tí'een jɨ́me'en ɨ́ teɨte ɨ́ mej me'uun a'uré'enine'i jemin ɨ́ tɨ ya'anaca. Capu ruxe'eve'e mej me'ɨ́n a'uré'enine'ica'an ɨ́ jemin a'ɨ́ɨme ɨ́ mej rɨ́'en, sino a'ɨ́ɨ mú xaa a'uré'enine'i ɨ́ tɨ ya'anaca jemi ɨ́ mej tí'icucui'i. Ayee pu che'atá na'a een ineetzi jemi. Canu ne'íjna jɨ́n yevé'eme nej ne'íjme huatá'inen ɨ́ mej miyen tiú'ujseijrata yee mej xɨ́'epɨ'ɨn rɨcɨ, sino a'ímej nu jemi yé vé'eme ɨ́ mej miyen tirú'umua'aree ɨ́ ru tzajta'a mej caí xɨ́'epɨ'ɨn rɨcɨ. 18Tɨ́'ɨj jí ayén tiuju'urɨ́j. A'ɨ́ɨ mú rú'itzi'ive'eca'a ɨ́ mej Juan jamuan á'ujujhua'ane'e, majta ɨ́ fariseo. Matɨ́'ɨj mi seica e'iré'ene ɨ́ Jesús jemi. Ayee mú tiraata'íhua'uri'i tɨjɨ́n: ―¿A'iné een jɨ́n maúrɨitzi'ivij ɨ́ mej Juan jamuan á'ujujhua'an, majta a'ɨ́ɨme ɨ́ fariseo? Mɨ majta, ɨ́ mej mú'eetzi jamuan á'ujujhua'an, camu miyen rɨcɨ. ―Yee mú tiraata'ixaa. 19Aj pu'i Jesús ayén tihua'utá'ixaa tɨjɨ́n: ―Tɨ́ pua'a ja'atɨ́ huaténeɨche, aj pu'i a'ɨ́mej huatá'ineesin ɨ́ mej rá'ajaahuate'e mej mi tiú'uyesten. Aj pu'i a'ɨ́ɨn tihuá'amin. ¿Ni qui rɨ'ɨrí mej rú'itzi'ive'eca tɨ pua'a huá'a jamuan auj tí'iyeste ɨ́ ja'atɨ? Capu xaa ne'u. 20Aru jee, aj pu teja'uré'enejsin ɨ́ xɨca ɨ́ mej jetzen rá'avi'itɨn ɨ́ ja'atɨ. Aj mú xaa me'ɨ́n ɨ́ mej rá'ajaahuate'e ru'ítzi'ive'en a'iné capu ché'e huá'a jamuan a'utéjvee ɨ́ mej rá'ajaahuate'e. A'iné inee, naúche'e nu yé huatéjvee, camu ru'ítzi'ive'en ɨ́ mej ná'ajaahuate'e. 21’Niche'e seɨj amuaatá'ixaate'en ɨ́ chuijtari. Tɨ́ pua'a ja'atɨ́ a'ɨ́jna huaújcu'une'epe'en ɨ́ cɨ́ɨxuri tɨ mí'ime'ecan, capu a'ɨ́jna jamuan rucú'une'epe'en ɨ́ cɨ́ɨxuri jɨme'e tɨ caí xɨ ja'anáj já'usini'i. Huatétzu'uta a'ɨ́jna ɨ́ cɨ́ɨxuri tɨ jéjcua tɨ́'ɨj huatéja'usini'ihua. Tɨ́'ɨj i rasiújtza'anan ɨ́ tɨ mí'ime'ecan. Aj pu'i a'ɨ́jna tɨ anásiujtza'ani, jaítze'e pu ve'etɨ́ anásiujtza'ani a'ame. 22’Ajta, capu ti'itɨ́ vaɨre'e tɨ pua'a ja'atɨ́ ru'ucájtu'ani navij limeetajra'a tzajta'a tɨ racua'iríihuajme nahuáj ɨ́ mej mauchén ráataahuaca'a. Tɨ́ pua'a miyen ráaruuren a'ɨ́jna ɨ́ nahuáj tɨ jéjcua, a'ɨ́ɨ pu huatéve'eri, ajta ra'anasiújtza'ana ɨ́ navij tɨ racua'iríihuajme. Tɨ́'ɨj jí a'uvaɨ́jtzi ɨ́ navij, ajta ɨ́ nahuáj. A'ɨ́j pu jɨ́n ayén tiú'ujxe'eve'e tɨ ru'ucájtu'ani ɨ́ navij tzajta'a tɨ jéjcua a'ɨ́jna ɨ́ nahuáj tɨ ajta jéjcua. 23Tɨ́'ɨj jí ayén tiuju'urɨ́j. A'ɨ́jna xɨcájra'a jetze mej rusé'upihua'a, a'úu pu aumé'ecaa já'ita'a ɨ́ vi'ira'a japua ɨ́ Jesús. Majta me'ɨ́n ɨ́ mej jamuan á'ujujhua'ane'e, a'ɨ́ɨme mú autéjhuii mej rú'ijtzaanaxɨ'ɨn ti'itɨ́ teuuri jatze'e a'iné jeíhua mú tɨejcuca'a. A'uu mú a'atajú'uca'a meru'ijtzá'ana. 24Majta me'ɨ́n ɨ́ fariseo, matɨ́'ɨj hua'useíj mej miyen rɨjca'a, aj mú mi miyen tiraata'ixaa ɨ́ Jesús. Miyen tɨjɨ́n: ―Casi'i, ¿a'iné een jɨ́n miyen rɨcɨ a'ɨ́ɨme ɨ́ mej mú'eetzi jamuan á'ujujhua'an? Capu hui a'ij tí'irɨ'ɨri tɨ ja'atɨ ayén rɨjca a'ɨ́jna ɨ́ xɨcájra'a jetze mej jetzen ruse'upi. 25Aj pu'i hua'utá'ixa ɨ́ Jesús. Ayen tɨjɨ́n: ―Niche'e a'atzu tejamuá'ixaate'en. ¿Ni secaí mú'een ja'anáj ra'ujíjve ɨ́ yu'uxari jetze a'ij tɨ ye'í huarɨ́j ɨ́ David teecan tɨ́'ɨj huatá'icuataca'a, majta ɨ́ mej jamuan á'ujujhua'ane'e? Tɨ́'ɨj nu'u ti'itéveeca'a ɨ́ Abiatar teecan a'ɨ́jna jɨme'e tɨ tihuá'aijte'e ɨ́ mej tí'ivaɨre'eca'a teyujta'a, a'úu pu a'uteájrupi ɨ́ David. Ajta a'ɨ́ɨn ɨ́ pan ɨ́ mej Dios huatámuaɨ'ɨvejte u teyujta'a, a'ɨ́ɨ mu'u nu'u racua'aca ɨ́ mej tí'ivaɨre'e a'ujna teyujta'a. Capu máa ja'atɨ́ racua'aca. 26’Mɨ́ ajta a'ɨ́ɨn ɨ́ David, a'ii pu caí teyujta'a tí'ivaɨre'eca'a. Capu a'ij ti'itɨ́ huarɨ́j. A'ɨ́ɨ pu nu'u ráacua a'ɨ́jna ɨ́ pan ɨ́ mej Dios huatámuaɨ'ɨvejte. Ajta tihua'umí ɨ́ mej jamuan á'ujujhua'ane'e. Capu a'atzu auteájturaa ɨ́ David teecan ɨ́ Dios jemi. ―Ayee pu tihua'utá'ixaa ɨ́ Jesús. 27- 28Ajta Jesús ayén tihua'utá'ixaa. Ayen tɨjɨ́n: ―A'ɨ́jna xɨcájra'a jetze ɨ́ mej jetzen ruse'upi, ayée pu Dios tiraaxɨ́'epɨ'ɨntare tɨ́'ij hua'utévaɨre'en ɨ́ teɨte. Capu ayée na'a ayén tiraaxɨ́'epɨ'ɨntare ɨ́ Dios mej mi araúrasten mena'a a'ɨ́jna xɨcájra'a ɨ́ mej jetzen ruse'upi. A'ɨ́j nu jɨ́n, inee i nej neajta teáata'a jetze airáane, ayée nu een jɨ́n antínmua'aree neajta ne'ɨ́jna xɨcájra'a jetze matɨ́'ɨj ruse'upi.

will be added

X\