San Marcos 16

1Tɨ́'ɨj mú á'ume a'ɨ́jna xɨcájra'a mé jetzen ruse'upi, a'ɨ́ɨme ɨ́ 'uuca, a'ɨ́jna ɨ́ María tɨ Magdala é'eme'ecan, ajta a'ɨ́ɨn María tɨ i'ináànajra'an a'ɨ́jna ɨ́ Jacobo, ajta a'ɨ́ɨn Salomé, a'ɨ́ɨ mú ti'itɨ́j huánanai tɨ naa teáarɨ́'e, tu'upi a'ará'a. Matɨ́'ɨj me'ɨ́n huánanai, aj mú mi á'uju'un mej mi ra'acáameijra a'ɨ́jna ɨ́ mɨ́'ɨchi. 2Yee ruijmua'ate'e yee, tɨ́'ɨj auchén e'iré'eneesime'eca ɨ́ xɨca, a'úu mú a'ará'a a'u tɨ e'evé'enami'ihuaca'a. A'ij pu jetze pɨ́tí'irɨcɨ i xɨca ta'amuájca ɨ́ itɨeeri. 3Ayee mú tiú'urihua'uraca'a tɨjɨ́n: ―¿A'ataqui seɨ́jta'a ya'anxɨ́ɨra ɨ́ tetej tɨ jɨ́n ujnámi'i ɨ́ tɨ úucun tej ti uteárute? 4Matɨ́'ɨj mauj ɨmuá e'evé'eju'uca'a meraaseíj tɨ pua'a a'ɨ́ɨn tetej caí ché'e aitéjmuaa. Temua'a pu ti'ive'ecaa a'ɨ́jna tɨ a'itémuaaca'a. 5Aj mú mi a a'uteájrupi a'ájna tɨ aúucun matɨ́'ɨj mi seɨj huaseíj tɨ anú'ujcatii rɨ'ɨríinta'a. Temuaij pu pɨ́rɨcɨ a'ɨ́jna. Tɨ́tɨ'ɨcan pu te'ucáviɨjcaa unú'ujcatii. Naa pu ti'icuáinavi'i te'ucáviɨjcaa a'ɨ́jna ɨ́ temuaij. Matɨ́'ɨj mi temua'a jeíhua tiu'utátziɨn. 6Aj pu i a'ɨ́ɨn ayén tihua'utá'ixaa tɨjɨ́n: ―Caxu tí'itziɨɨne'e. Mú'een xu yá'uhuaunen se'ɨ́jna ɨ́ Jesús tɨ Nazarét é'eme'ecan, ɨ́ tɨ á'utataihuaca'a ɨ́ cúruu jetze. Capu yu'u já'ahua'a. Pu'uri huatarúj. Casi'i. Xaaseíj íiyen mej ya'ujté. 7Sericu, setá'aj hua'utá'ixaate'en ɨ́ mej jamuan á'ujujhua'ane'e, seajta a'ɨ́jna ɨ́ Pedro. Mú'een xu hua'utá'ixaate'en yee: “Tɨ́ nu'u a'ɨ́ɨn amuacaí a'umé'e a'ame a'ánna Galilea tɨ́'ij hua'uchú'eve'en. Ayen che'atá na'a té'eme tɨ́j a'ɨ́ɨn ari tihua'utá'ixaa mej nu'u a'uun yé'eseijran.” ―Ayee pu tihua'utá'ixaa a'ɨ́jna ɨ́ temuaij. 8Majta me'ɨ́n ɨ́ 'uuca, temua'a mú tiú'ujviveeca'a, majta mej a'ij tité'ujmuajca. Aj mú mi huiráruáachejraa. Camu majta ja'atɨ́ huatá'ixaa, a'iné metí'itziɨɨne'eca'a. 9Ayee pu tiuju'urɨ́j a'ɨ́jna xɨcájra'a jetze ɨ́ ta'amuájca ɨ́ itɨeeri tɨ́'ɨj a'ɨ́ɨn Jesús huatarúj tɨ tapuá'arijme'eca a'ɨ́jna xɨcaj jetze tɨ amuájca. Amuacaí pu huataseíjre a'ɨ́jna jemi ɨ́ María tɨ Magdala é'eme'ecan. A'ii pu a'ɨ́ɨn pú'eene'en ɨ́ mej tzajta'an seijre'eca'a ɨ́ tiyáaru'use ɨ́ mej aráhua'apua ará'axca tɨ hua'utamuári ɨ́ Jesús. 10Ajta a'ɨ́ɨn María, a'ɨ́ɨ pu u á'ume tɨ tihua'utá'ixaate'en a'ɨ́mej ɨ́ mej jamuan á'ujujhua'ane'eca'a ɨ́ Jesús, ɨ́ mej ruxɨeemɨjte'eca'a a'ɨ́jna jɨme'e tɨ Jesús huamɨ́'ɨ. Majta ruyeineca'a. 11Majta a'ɨ́ɨme, matɨ́'ɨj ráamua'areeri'i tɨ ari nu'u a'ɨ́ɨn María raaseíj a'ɨ́jna ɨ́ Jesús, camu rá'atzaahuate'eca'a. 12Tɨ́'ɨj jí Jesús ajtahua'a huataseíjre hua'apuaca jemi matɨ́'ɨj me'uun aujú'ucaa a'ájna já'ahua'a a'u tɨ caí á'uchajta'a. Capu ché'e a'ɨ́ɨ pú'eene'en ɨ́ mej amuacaí ramua'ajcaa. Mɨ́ ajta, a'ii pu pú'eene'en. 13Matɨ́'ɨj mi a'ucɨ́j mej mi hua'utá'ixaate'en ɨ́ seica. Camu majta huá'antzaahuate a'ɨ́mej ɨ́ mej hua'apua. 14Tɨ́'ɨj ari jaítze'e huachúmua'ancaa, matɨ́'ɨj huatéte'eca'a ɨ́ meesa jetze ɨ́ mej tamuáamuata'a japuan seɨj ará'ase, ajtahua'a pu huataseíjre a'ɨ́jna ɨ́ Jesús. Tɨ́'ɨj jí hua'ajté'axɨ a'ɨ́jna jɨme'e mej ra'antánaamua ɨ́ ruxɨ́ejniu'uca, ajta a'ɨ́jna jɨme'e mej caí té'atzaahuate'eca'a. Ajta hua'ajté'axɨ a'ɨ́jna jɨme'e mej caí huá'atzaahuate'eca'a ɨ́ mej raaseíj tɨ́'ɨj ari huatarúj. 15Aj pu i ayén tihua'utá'ixaa tɨjɨ́n: ―Sericu mú'een. Se'ucɨ́jxɨ'ɨn nain japua ɨ́ chaanaca. Setihua'utá'ixaate'e naíjmi'ica ɨ́ teɨte a'íjna i niuucari tɨ jɨ́n hua'irátuaasin. 16A'atɨ́ tɨ rá'atzaahuate'e a'íjna i niuucari, ajta huámuaɨ'ɨvijhua, Dios pu ru'irátuaasin. Mɨ́ ajta, tɨ pua'a ja'atɨ́ caí rá'atzaahuate'e ɨ́ niuucari, a'ɨ́ɨ pu rajpuaíjtzi a'ame. ―Ayee pu tihua'utá'ixaa a'ɨ́jna ɨ́ Jesús. 17Ajta ayén tihua'utá'ixaa tɨjɨ́n: ―Ayee mú tiu'uyɨ́'ɨtɨhua'a muá'aju'u ɨ́ mej té'atzaahuate'e. Neniúucajtze'e mú hua'utamuárite'esin ɨ́ tiyáaru'use ɨ́ mej huá'a tzajta'a seijre'e ɨ́ teɨte. Majta tí'ixaxa'ata'a muá'aju'u seica jɨme'e ɨ́ niuucari ɨ́ mej caí xɨ raayɨ́'ɨtɨ. 18Cu'ucu'use mú muarɨ'en ɨ́ mej tiú'uche'eveca ɨ́ rumuájca'a jɨme'e; me'ɨ́n cu'ucu'use camu a'ij huá'aruuren. Na'ari tɨ pua'a huá'ave'eri mua'antiyé'en, capu ajta a'ij huá'aruuren. Ajta tɨ pua'a me'ɨ́n hua'ajtamuárɨ'en a'ɨ́mej mej tí'icucui'i, majta mú rujni. ―Ayee pu tihua'utá'ixaa a'ɨ́jna ɨ́ Jesús. 19Jɨ́me'en pu'u ayén tihua'utá'ixaa ɨ́ tavástara'a, a'ɨ́jna ɨ́ Jesús, aj pu i Dios ya'uví'itɨ u ta japua. An pu a'ujyeíjxɨ rɨ'ɨríinta'a a'ɨ́jna ɨ́ Dios. 20Majta me'ɨ́n ɨ́ mej Jesús jamuan á'ujujhua'ane'eca'a, matɨ́'ɨj mi a'ucɨ́jxɨ nain japua ɨ́ chaanaca. Metihuá'a'ixaa nain jɨme'e ɨ́ niuucari tɨ jɨ́n Dios hua'irátuaasin. Ajta a'ɨ́ɨn ɨ́ tavástara'a, a'ɨ́ɨ pu hua'atéva'ɨrihua'a. Ayee pu'u a'ɨ́ɨn hua'atá'acare'e mej jaítze'e raayɨ́'ɨtɨhua'an caí méèj ja'atɨ́. A'ɨ́j mú jɨ́n ráamua'areeri'i ɨ́ teɨte tɨ ayén ti'ayájnaca'a a'ij mej ye'í tí'ixajtaca'a me'ɨ́jna ɨ́ mej Jesús jamuan á'ujujhua'ane'eca'a. Ayee pu upuá'araca'a ɨ́ yu'uxari tɨ ayén ántehuaa tɨjɨ́n Marcos.

will be added

X\