San Marcos 15

1Yee ruijmua'ate'e yee, tɨ́'ɨj huatapuá'are, naíjmi'i mú tiújseɨj ɨ́ mej tíhua'u'aíjte'e u teyujta'a, majta huá'avaujsimua'a, majta ɨ́ mej té'eyu'uxaca, majta ɨ́ seica ɨ́ mej majta i'ijuéesi. Naíjmi'i mú tí'iruixaate'eca'a a'ij mej ye'í huárɨni. Aj mú mi ra'amuáajɨ'ɨcɨe me'ɨ́jna ɨ́ Jesús. Meye'ujáj. Matɨ́'ɨj mi raatátui a'ɨ́jna ɨ́ ja'atɨ tɨ ayén ántehuaa tɨjɨ́n Pilato. 2Aj pu i Pilato ayén tiraata'íhua'uri'i tɨjɨ́n: ―¿Ni mú'ee pe'ɨ́n pú'een ɨ́ hua'atajtuhuan ɨ́ mej Israél jetze ajtéme'ecan? Aj pu i Jesús ayén tiraata'ixaa tɨjɨ́n: ―Nee nu ne'ɨ́n pú'een a'ij pej ye'í ti'ixa mú'ee. ―Yee pu'u tiraata'ixaa a'ɨ́jna ɨ́ Jesús. 3Majta me'ɨ́n ɨ́ mej tíhua'u'aíjte'e u teyujta'a, jeíhua mú tiraaxájtzi'iri'i. 4Ajta a'ɨ́ɨn Pilato, ajtahua'a pu ayén tiraata'íhua'uri'i tɨjɨ́n: ―¿Ni pecáj naatá'ixaate'e pe'ɨ́jna jɨme'e? Pepu'uri huá'unamuajri'i mej jeíhua ti'imuaxájtzi'i. ―Ayee pu tiraata'ixaa a'ɨ́jna ɨ́ Pilato. 5Mɨ́ ajta a'ɨ́ɨn Jesús, capu ti'itɨ́j xajtaca'a. A'ɨ́j pu jɨ́n, caí a'ij rá'amitɨejte'eca'a a'ɨ́jna ɨ́ Pilato. 6Ayee pu tí'ijrɨ'ɨrejca'a a'ɨ́jna ɨ́ Pilato matɨ́'ɨj me'ɨ́n tí'iyestehua'a. Tɨ́ pua'a meraatáhuavii ɨ́ teɨte tɨ a'ɨ́ɨn raatátuaani seɨj tɨ aiteánami'i, ja'atɨ́ tɨ na'a ɨ́ mej raatáhuavii, aj pu i raateátuaasin. 7A'ájna já'ahua'a seica mú aiteánami'ihuaca'a ɨ́ mej né'use'eca'a ɨ́ u'uviernu jemi. A'ii mú huá'ucuii ɨ́ teɨte. Ajta seɨj a'ujna aiteánami'ihuaca'a tɨ ayén ántehuaa tɨjɨ́n Barrabás. 8Aj mú mi e'iré'ene ɨ́ teɨte ɨ́ Pilato jemi. A'ɨ́ mú autéjhuii mej raatáhuavii tɨ a'ɨ́ɨn ayén huárɨni a'ɨ́mej jemi a'ij tɨ ye'í tí'ijrɨ'ɨre. 9Aj pu i ayén tihua'uta'íhua'uri'i tɨjɨ́n: ―¿A'iné setí'ijxe'eve'e mú'een? ¿Ni qui neraatátuaani ne'íjna tɨ á'amuatajtuhuan pú'een, mú'een mɨ sej Israél jetze ajtéme'ecan? 10Ayee pu tihua'uta'íhua'uri'i a'iné a'ɨ́ɨ pu ráamua'areeri'i mej rá'achueere'ecaa ɨ́ Jesús a'ɨ́ɨme ɨ́ mej tíhua'u'aíjte'e u teyujta'a. A'ɨ́j mú jɨ́n raatátui me'ɨ́jna ɨ́ Pilato. 11Mɨ́ majta me'ɨ́n ɨ́ mej tíhua'u'aíjte'e u teyujta'a, a'ɨ́ɨ mú raatá'a ɨ́ ca'aníjra'a jeíhua ɨ́ teɨte mej mi raatáhuavii a'ɨ́jna ɨ́ Pilato tɨ a'ɨ́ɨn huatátuaani a'ɨ́jna ɨ́ Barrabás jetzen me'ecan ɨ́ Jesús. 12Ajtahua'a ayén tihua'uta'íhua'uri'i tɨjɨ́n: ―¿A'iné náarɨni nemɨ́jna jemi, mɨ tɨ á'amuatajtuhuan pú'een, mɨ sej Israél jetze ajtéme'ecan? 13Aj mú mi ca'anín jɨ́n huajíjhuaca'a. Miyen tɨjɨ́n: ―Patá'aj rá'utatan cúruu jetze. 14Aj pu i Pilato ayén tɨjɨ́n: ―¿A'iné een jɨme'e? ¿Ti'itájni a'ij pua'a huáruu? Matɨ́'ɨj ráanamuajri'i, jaítze'e mú ca'anín jɨ́n huajíjhuaca'a. Miyen tɨjɨ́n: ―Aútataichi cúruu jetze. ―Yee mu'u titeejíjhuaca'a. 15Ajta a'ɨ́ɨn Pilato, a'ɨ́ɨ pu raxɨ́'eve'eca'a tɨ rɨ́'ɨ tihua'utá'an ɨ́ teɨte. A'ɨ́j pu jɨ́n raatátuaa a'ɨ́jna ɨ́ Barrabás. Ajta raata'aíjtaca'a mej ra'iré'avajxɨ'ɨn a'ɨ́jna ɨ́ Jesús. Aj pu ijtá'i hua'utátuii mej mi rá'utatan ɨ́ cúruu jetze. 16Matɨ́'ɨj mi me'ɨ́n xantaaru'u ya'ujáj a'ájna tɨ te'áijta tɨ é'eche. A'uu mú ya'uteárujte já'ita'a tɨ u e'eráyaujta'a. Aj mú mi naíjmi'ica tiseɨ́j ɨ́ seica, xantaaru'u. 17Síicu'uri mú ru'ucáachejte tɨ pá'uvi'in jɨ́n, raxú'umuavi'ime'ecaa. Majta curuun raateátaave tɨ tzicare'e jɨme'e cɨstíjhuaca'a. A'ɨ́j mú ra'avé'erujti'iri'i. 18Matɨ́'ɨj mi autéjhuii mej raatejíivajra, yee cumu rɨ́'ɨ mú tiraatá'a. Miyen tɨjɨ́n: ―Ayajna ne'u. Temua'a pu í'ixɨ'epɨ'ɨn. Ché'e a'ateevi'i tɨ ruuri amɨ́jna tɨ hua'atajtuhuan pú'een ɨ́ mej Israél jetze ajtéme'ecan. ―Ayee mú tirá'uxɨeehuari'iri'i. 19Majta ra'avé'evajxɨ án mu'úutze'en itzɨ́j jɨme'e. Majta ra'atétzijmua'axɨ. Majta mú títunutaxɨ. Ayee cumu rɨ́'ɨ mú tiratá'acare'e. 20Matɨ́'ɨj rá'uxɨeehuari'ira'a, aj mú mi rú'ijchuiiri'i a'ɨ́jna ɨ́ síicu'uri tɨ pá'uvi'in jɨ́n, raxú'umuavi'ime'ecaa. Matɨ́'ɨjtá mi ru'ucáachejte ɨ́ síicu'ure'ara'an. Aj mú mi ya'ujáj mej mi rá'utatan ɨ́ cúruu jetze. 21A'ájna, seɨj pu hua'antinájcheca'a a'ujna a'u mej ye'evé'ejajsime'e a'ɨ́jna ɨ́ Jesús. Ayee pu ántehuaa a'ɨ́jna ɨ́ ja'atɨ tɨjɨ́n Simón. A'uu pu é'eme'ecan tɨ ayén téja'arájtehuaa tɨjɨ́n Cirene. A'ii pu ya'upuáara'an a'ɨ́jna ɨ́ Alejandro, ajtahua'a seɨj ɨ́ Rufo. A'uu pu e'erájraa a'ájna já'ahua'a a'u tɨ caí ja'atɨ́ á'a é'eche. Tɨ́'ɨj a'ɨ́ɨn Simón hua'antinájcheca'a, a'ɨ́ɨ mú huata'áij tɨ a'ɨ́ɨn rá'anchueni cúrujra'an ɨ́ Jesús. 22A'uu mú ya'ujáj a'ɨ́jna ɨ́ Jesús, a'ájna já'ahua'a, jɨrí jetze tɨ ayén téja'arájtehuaa hua'aniuuca jɨme'e tɨjɨ́n Gólgota. Gólgota, ayée pu huataújmua'a tɨjɨ́n Mɨ́'ɨchí na'a jemi. 23Matɨ́'ɨj mi raatanéste ti'itɨ́ nahuáj, cuaane'e tɨ ranaxca. Ayee mú ratamuá'amua a'ɨ́jna ɨ́ cuaane'e tɨjɨ́n mirra. Ajta a'ɨ́ɨn Jesús, capu ra'anti'í a'ɨ́jna ɨ́ nahuáj. 24Matɨ́'ɨj mi rú'ijchuiiri'i ɨ́ síicu'ure'ara'an. Majta tiraacá'ari'iri'i ɨ́ tí'icɨɨxure'ara'an. Matɨ́'ɨjtá mi rá'utatai ɨ́ cúruu jetze. Aj mú mi ti'ihuaújmua'itɨ́ tetej jɨme'e mej mi ráamua'aree ja'atɨ́ tɨ racɨ'ɨti ɨ́ cɨ́ɨxure'ara'an ɨ́ Jesús seɨj ajta seɨj. Ayee mú titeeré'ujpijte a'ɨ́jna ɨ́ tí'icɨɨxure'ara'an. 25Pu'uri já'ita'a ujmé'eca ɨ́ xɨca matɨ́'ɨj rá'utatai ɨ́ cúruu jetze. 26Majta ti'itɨ́ taabla aúutatai cúruu japua. Ayee pu té'eyu'usi'ihuaca'a a'ɨ́jna jetze ɨ́ taabla ɨ́ mej ti'itɨ́j jɨ́n jetzen te'ujpuá'ajte tɨjɨ́n: “Hua'atajtuhuan ɨ́ mej Israél jetze ajtéme'ecan.” 27Majta jamuan ɨ́ Jesús, mehuá'utátaixɨ cúruu jetze hua'apuaca ɨ́ nahua'ari mej pú'een. Seɨj mú a'utéjche ɨ́ cúruu rɨ'ɨríinta'a pújme'en, majta seɨj á'utata'a pújme'en. 28Ayee pu'u éene'ecan jɨ́n araúraste a'íjna ɨ́ niuucari tɨ té'eyu'usi'i ɨ́ yu'uxari jetze. Ayen tɨjɨ́n: “Yee mú yá'umua'arejca'a tɨ́j a'ij pua'a tí'itevijca'a.” 29Majta me'ɨ́n ɨ́ mej á a'atánineica'a, matɨ́'ɨj raaseíj, a'ɨ́ɨ mú aicámu'uvajra mej caí rá'acu'uvejca'a. Ayee mú a'ij pua'a tí'ixajtaca'a tɨjɨ́n: ―¿Ni caí icu, mú'ee pe a'ɨ́ɨn pú'een ɨ́ pej nu'u raaté'uuna ɨ́ teyuu, pajta nu'u huaíca xɨca jetze rá'ajtaahua? 30Ijii mú'ee aseɨ́j á japua huániuuchi pej pi caí huámɨ'ɨni. Acájra'a yeehui amɨ́jna jetze mɨ cúruu. ―Ayee mú tirá'axɨeehuasti'iraca'a. 31A'ɨ́ majta ɨ́ mej tíhua'u'aíjte'e u teyujta'a, majta ɨ́ mej té'eyu'uxaca, a'ɨ́ɨ mú naíjmi'i rá'axɨeehuasti'iraca'a. Miyen tí'iruixaate'eca'a rujɨ́ɨmua'a tɨjɨ́n: ―Amɨ́ pu ari huá'a japua huaniú ɨ́ seica. Mɨ́ ajta, capu raayɨ́'ɨtɨ tɨ ruseɨ́j rujapua huániuuni. 32Amɨ́jna tɨ nu'u i'i Cɨríistu'u tɨ nu'u tatajtuhuan i tej Israél jetze ajtéme'ecan, ché'e amɨ́n acájra'ani amɨ́jna jetze mɨ cúruu tej ti raaseíj, tetá'aj té'antzaahuate'en. ―Ayee mú tí'iruixaate'eca'a. Majta me'ɨ́n ɨ́ mej jamuan huá'utatai ɨ́ cúruu jetze, a'ɨ́ɨ mú majta rá'uxɨeehuasti'iraca'a. 33Tɨ́'ɨj a'ájna teja'uré'ene a'atzaj tacuarixpua, aj pu i huateátɨca'areca'a nainjapua ɨ́ chuej a'uun tɨ huatacá'a u Israél. Ajta á'atee tɨ ayén huatɨ́ca'a já'ita'a tacuarixpua. 34Jɨ́me'en pu'u teja'uré'ene a'ájna já'ita'a tacuarixpua, aj pu i Jesús ca'anín jɨ́n huajíjhuaca'a runiúucajtze'en. Ayen tɨjɨ́n: ―¿Eloi, eloi, lama sabactani? ―Ayee pu tiu'ujíjhuaca'a. A'íjna i niuucari, ayée pu huataújmua'a tɨjɨ́n: “Niya'upua, ¿a'iné een jɨ́n peneja'uhuá'axɨ mú'ee, pej ní'iya'upua?” Ayee pu huataújmua'a a'íjna i niuucari. 35Seica ɨ́ mej me'uun a'uté'uuca'a meráanamuajri'i. Matɨ́'ɨj mi miyen tiu'utaxájtaca'a tɨjɨ́n: ―Xaanamuajri'i, a'ɨ́j pu huatajé a'ɨ́jna ɨ́ Elías tɨ ajmí'i ti'itéveeca'a ɨ́ Dios jemi. 36Aj pu i seɨj e'iré'ene rutɨéchijmé'en. Ti'itɨ́j pu autɨ́ɨ tɨ u'urájta'ati. A'ɨ́j pu huateáru'une nahuáj jɨme'e tɨ antzíjvi'i. Tɨ́'ɨj jí ra'antijɨ́'ɨcɨ'e cɨyej jetze. Aj pu i a'ɨ́ɨn rá'ajchui tɨ́'ij Jesús ra'antiyé'en a'ɨ́jna jetze ɨ́ ti'itɨ́. Tɨ́'ɨj ayén huarɨ́j, aj pu'i ayén tihua'utá'ixaa a'ɨ́jna ɨ́ ja'atɨ tɨjɨ́n: ―Xaachú'eve'e. Tɨ́ pua'a yatanéjsin a'ɨ́jna ɨ́ Elías tɨ ij ra'acájtuaani. ―Ayee pu tihua'utá'ixaa. 37Aj pu i Jesús ca'anín jɨ́n huajíjhuaca'a. Tɨ́'ɨj jí huamɨ́'ɨ. 38A'ájna teyujta'a, ti'itɨ́ pu huatáviviɨjme'eca cɨ́ɨxuri tɨ itzíjhua. Jɨ́me'en pu'u huamɨ́'ɨ ɨ́ Jesús, aj pu i já'ita'a acásiujtza'an a'ɨ́jna ɨ́ cɨ́ɨxuri. 39Ajta a'ɨ́ɨn ɨ́ hua'acapítan ɨ́ xantaaru'u ɨ́ mej anxɨ́te ará'ase, áa pu a'utéveeca'a a'ájna vejli'i ta'avé'enee a'ɨ́jna ɨ́ Jesús. A'ɨ́ pu ráanamuajri'i a'ij tɨ ye'í tiu'ujíjhuaca'a ɨ́ Jesús. Ajta raaseíj a'ij tɨ ye'í tiu'umɨ́'ɨ. Aj pu i ayén tiu'utaxájtaca'a a'ɨ́jna ɨ́ capitán tɨjɨ́n: ―Ayej xaa ne'u ti'ayajna. A'ii pu a'ɨ́ɨn pú'eene'en ɨ́ yaujra'an ɨ́ Dios. 40Majta seica, á mu'u ɨmuá a'uté'uu mejseíiraca'a a'ɨ́ɨme mej 'uuca. Seɨj pu ayén ántehuaaca'a tɨjɨ́n María, tɨ Magdala é'eme'ecan. Ajta, seɨj tɨ ajta ayén ántehuaaca'a tɨjɨ́n María. Hua'anaana a'ɨ́jna ɨ́ Jacobo tɨ cɨ́lieen, ajta a'ɨ́jna ɨ́ José. Ajtahua'a seɨj 'ɨ́ita'a huá'a jamuan pu a'utéveeca'a tɨ ayén ántehuaaca'a tɨjɨ́n Salomé. 41A'ii mú á'ujujhua'ane'eca'a ɨ́ Jesús jamuan. Majta raatévaɨre'eca'a tɨ́'ɨj a'ɨ́ɨn a'utéveeca'a a'ujna já'ahua'a Galilea. Mé mu'iitɨ́ mú majta a'uté'uuca'a ɨ́ mej jamuan a'ujnéj a'ánna Jerusalén. 42Tɨ́'ɨj huateáchumua'areca'a, pu'uri teja'uré'ene a'ɨ́jna xɨcájra'a jetze matɨ́'ɨj rɨ́'ɨ huaújruuren. Yee ruijmua'a yee pu teja'uré'enejsin a'ɨ́jna xɨcájra'a mej jetzen ruse'upi. 43Aj pu i ja'atɨ́ a'uré'ene jemin a'ɨ́jna ɨ́ Pilato. Ayee pu ántehuaaca'a a'ɨ́jna ɨ́ ja'atɨ tɨjɨ́n José. A'uu pu já'ahua'a é'eme'ecantaca'a tɨ ayén téja'arájtehuaa tɨjɨ́n Arimatea. A'ɨ́ pu ajta huá'a jetze ajtéme'ecan a'ɨ́ɨme ɨ́ mej i'ijuéesi. Jé'ecan pu ve'ecán jɨ́n ti'itéveeca'a a'ɨ́jna ɨ́ José. A'ɨ́ pu ajta rachú'eve'eca'a a'ɨ́jna xɨcájra'a jetze tɨ́'ɨj Dios autéjcheni tɨ tiu'uta'aíjta nainjapua íiyen chaanaca japua. A'ɨ́ pu uhuateújca'ane ɨ́ ru tzajta'a. A'uu pu a a'uteájrupi a'u tɨ a'utéveeca'a a'ɨ́jna ɨ́ Pilato. Aj pu i rájhuaviiri'i tɨ a'ɨ́ɨn raatá'an tɨ ra'acájtɨni ɨ́ Jesús, tɨ ari mɨ́'ɨchi. 44Ajta a'ɨ́ɨn ɨ́ Pilato, jé'ecan pu a'ij te'utaseíj tɨ Jesús ari huamɨ́'ɨ. Aj pu i raatajé ɨ́ hua'acapítan ɨ́ mej rá'utatai ɨ́ cúruu jetze. Raata'íhua'uri'i tɨ pua'a ayén ti'ayájnaca'a tɨ ari huamɨ́'ɨ. 45Aj pu'i a'ɨ́ɨn hua'acapítan ayén tiraata'ixaa tɨ ayén ti'ayájnaca'a. Tɨ́'ɨj jí Pilato raatá'a a'ɨ́jna ɨ́ José tɨ a'ɨ́ɨn ra'acájtɨni. 46Tɨ́'ɨj jí á'uraa a'ɨ́jna ɨ́ José tɨ cɨ́ɨxuri á'unanan tɨ rɨ́'en, tɨ naa tí'icuaina. Aj pu i ra'acájchuii a'ɨ́jna ɨ́ mɨ́'ɨchi. Tɨ́'ɨj jí ra'iré'e'ijcataca'a a'ɨ́jna jɨme'e ɨ́ cɨ́ɨxuri. Ajta á'iyen a'uun ya'utéete a'ujna a'u mej ru'uré'ijche u téte'e ɨ́ tetej tzajta'a. Ayee pu huarɨ́j, tɨ́'ɨj jí tetej aitéjmuaa tɨ sicɨ́ɨrara'a. 47Majta me'ɨ́n ɨ́ 'uuca, ɨ́ María tɨ Magdala é'eme'ecan, ajta a'ɨ́jna María tɨ i'ináànajra'an a'ɨ́jna ɨ́ José, a'ɨ́ɨ mú raaseíj a'u tɨ ye'etéete.

will be added

X\