San Marcos 13

1Matɨ́'ɨj mi huiráacɨ a'ujna teyujta'a. Pu'uri huiiramé'eca a'ɨ́jna ɨ́ Jesús, tɨ́'ɨj jí seɨ́j tɨ jamuan á'uche'ecane'e ayén tiraata'ixaa tɨjɨ́n: ―Maeestru, casi'i. Huaseíj. Temua'a pu ti'ivivéjme mɨ tetej tɨ ticaíjme íiyej jaxu'u jetze. Ajta mɨ chi'ij, naa pu een. 2Aj pu i ayén tiu'utaniú a'ɨ́jna ɨ́ Jesús tɨjɨ́n: ―Casi'i, mú'een. Xaaseíj. Naíjmi'i tɨ vivejmé'e huavéjme ɨ́ chi'ij, nain pu huaté'uuni'ihua'a tɨ aré'evee ɨ́ chi'ij. Capu ché'e seíire'e a'ame ɨ́ jaxu'u jetze ɨ́ tetej tɨ rujapua ticaíjme. 3Matɨ́'ɨj mi a'ucɨ́j. A'uun mú a'ará'a a'ájna teyuu tɨ jé'ejnee jɨrí jetze tɨ ayén téja'arájtehuaa tɨjɨ́n Aceituunajemi. Tɨ́'ɨj jí á a'ujyeíjxɨ a'ɨ́jna ɨ́ Jesús, majta seica, a'ɨ́jna ɨ́ Pedro, ajta ɨ́ Jacobo, ajta ɨ́ Juan, ajta ɨ́ Andrés. A'ii mú avíitzi jɨ́n miyen tirájhuaviiri'i tɨjɨ́n: 4―Patá'aj titaatá'ixaate'en ja'anáj tɨ ayén tí'irɨni. ¿Ti'itájni a'ij tí'iseijre'en tɨ́'ɨj a'ájna pɨ́ teja'uré'enen tɨ te'ará'asten nain patɨ́j peri tiu'utaxájtaca'a? 5Aj pu i Jesús ayén tihua'utá'ixaa tɨjɨ́n: ―Rɨ́'ɨ xu'u mú'een, tɨ́'ij caí ja'atɨ́ amuaacuanamuan. 6Ayee nu tejá'amua'ixaate'e. Mu'iitɨ́ mú huataseíjre'esin mej nu'u neniuuca jɨme'e ti'ixáata muá'aju'un. Miyen tɨjɨ́n: “Nee nu Cɨríistu'u pɨ́rɨcɨ.” Jeíhua mú huá'acuanamuan ɨ́ teɨte. 7’Tɨ́ pua'a seri siyen tínamuajra mej nu'u ne'use'en á já'ahua'a, na'ari mej nu'u meri tɨ́mua'a autéhuijsin mej ne'use'en, caxu tí'itziɨɨne'e. Capu amɨ́n a'ij. Ayee pu tiú'ujxe'eve'e tɨ ayén teja'uré'enen. Caxɨ́ɨ pu a'ájna teja'uré'enejsin a'ɨ́jna xɨcájra'a jetze tɨ jetzen te'ará'asti nain jɨme'e. 8’Ayee pu té'eme. Seica mú teɨtejra'a, majta seica teɨtejra'a, a'ɨ́ɨ mú naíjmi'i huateújne'usi'ite'esin. Majta ɨ́ mej seica chuéjra'a japua a'uchéjme, majta mej seɨj chuéjra'a japua a'uchéjme, a'ɨ́ɨ mú naíjmi'i huateújne'usi'ite'esin. Ajta huateújca'atzɨjxɨ'ɨsin ɨ́ chuej pua'amecɨé íiyen chaanaca japua. Mu'iitɨ́ mú majta huatatɨéjcu. A'ii pu a'ɨ́ɨn pú'een ɨ́ ta'amuájca ɨ́ mej jɨ́n rajpuaíjtzi muá'aju'u. 9’Sehuaújcha'ɨn mú'een, a'iné mejamuá'anvi'itɨ́n huá'a jemi ɨ́ mej te'áijta. Majta teyujta'a mú amua'atévajxɨ'ɨsin. Mejamuaatájeevi sej si tiu'uxáj jamuan ɨ́ tajtuhuan, seajta jamuan ɨ́ rey. Mejamuaatájeevi me'ɨ́jna jɨme'e ɨ́ neniúucajtze'e ineetzi. Ayee mú me'ɨ́jna jɨ́n rɨni, mú'een xu neetzi jetze me'ecan tihua'utá'ixaate'esin. 10Amuacaí, a'ii pu ruxe'eve'e sej tihua'utá'ixaate'en nainjapua ɨ́ chuéjra'a a'ij tɨ een jɨ́n Dios tíhua'utá'uuni'ira. Ayee xu se'ɨ́jna jɨ́n huarɨ́n, aj pu xaa te'entipuá'ari nain. 11’Tɨ́ pua'a seica mejamuá'anvi'itɨ́n a'ɨ́mej jemi ɨ́ mej tí'ita'aijte'e, caxu siyen tí'imua'ajca a'ij sej ye'í tihua'utá'ixaate'esin. Ayee xu'u huárɨni a'ɨ́jna xɨcájra'a jetze. A'ɨ́jna ɨ́ xɨéjniu'ucare'ara'an ɨ́ Dios, a'ɨ́ɨ pu amuaatá'asin a'ij sej ye'í tiu'utaxáj. A'ɨ́j pu jɨ́n, a'ij tɨ tejamuaatámitɨejte'esin, a'ɨ́j xu'u hua'utá'ixaate'en. A'ii pu a'ɨ́ɨn pú'een tɨ ti'ixa a'ɨ́jna ɨ́ xɨéjniu'ucare'ara'an ɨ́ Dios. 12’Ayee pu ajta té'eme a'ɨ́jna xɨcájra'a jetze. Seica mú rujúutzimua'a á'avi'itɨn a'ɨ́jme jemi ɨ́ mej te'áijta mej mi huá'ucui'ini. Ayee mú che'atá mena'a huá'aruuren ɨ́ ruja'atzimuá. Majta seica ayén che'atá mena'a huá'aruuren ɨ́ ruyaujmua'a. Majta me'ɨ́n yaújmua'ame'en, a'ɨ́ɨ mú hua'uténe'usi'ite'esin ɨ́ ruvaújsimua'a. A'ɨ́ mú majta tiu'utá'asin mej seica huá'ucui'ini. 13Naíjmi'i ɨ́ teɨte, mú'ejmi jemi camu já'amuaxe'eve'e muá'aju'u a'ɨ́jna jɨme'e sej ineetzi jetze ajtéme'ecan; a'ɨ́ɨ mú naími'i amuajcha'ɨ́ɨre'e muá'aju'u. Ajta a'ɨ́ɨn ɨ́ ja'atɨ tɨ ayén te'utáviicua'ira a'ajtá caí huámɨ'ɨni, Dios pu ra'ancuré'evi'itɨ a'ájna tɨ tejé'aijta. 14’A'ɨ́jna xɨcájra'a jetze ti'itɨ́j xu seijran tɨ a'ij pua'a een, tɨ xána'avi'ire'e, tɨ tziɨ́ɨni'ire'e. A'uu mú raatéchajtza a'u tɨ caí ayén tiraavíjte'e. (A'ɨ́ pu yaú'itɨée a'ame tɨ ra'ajíjve'en a'íjna jetze i yu'uxari.) ’Setɨ́'ɨj raseijran, ayée xu huárɨni. A'ɨ́ɨ ɨ́ mej Judea huachéjme, miché'e me'ɨ́n a'ucɨ́jxɨ'ɨn ca'anacan a'u tɨ á'ujɨ́rime. 15Tɨ́ pua'a a'ɨ́jna xɨcájra'a jetze, ja'atɨ́ án á'ujcatii ɨ́ ruchi'i japua ta'avé'enami'i, ché'e a'ɨ́ɨn ca'anacan acájra'ani. Ajta caí ayén rɨjca, tɨ ti'itɨ́j huirá'avecare'en ɨ́ ruchi'itá. 16Na'ari tɨ pua'a seɨ́j tejé'emuarɨ'e ɨ́ ruví'ira'ata'a, ché'e caí a'uré'enine'ica'an ɨ́ ruche tɨ́'ij rucɨɨxu huiráapin. 17’Cui'i xaa a'ɨ́ɨme, ɨ́ mej rajpuaíjtzi muá'aju'u a'ɨ́jna xɨcájra'a jetze a'ɨ́ɨme ɨ́ 'uuca ɨ́ mej a'utájucájme, majta a'ɨ́ɨme ɨ́ mej huá'atzi'ite ɨ́ ruyaujmua'a. 18Mú'een xu siyen tí'ijhuaviira ɨ́ Dios tɨ́'ij caí ayén a'ájna teja'uré'enen tɨ́'ɨj huáseevi'in. 19’Ayee nu tejá'amua'ixaate'e tɨ ayén té'eme a'ɨ́jna xɨcájra'a jetze. Jaítze'e mú rajpuaíjtzi muá'aju'u mecaí ɨ́ mej meri rajpuaíjtzi muá'araa tɨ yú e'iré'ene. Capu ajta ché'e ayén teja'uré'enejsin seɨj xɨcájra'a jetze tɨ́j a'ájna. 20Ajta tɨ pua'a a'ɨ́ɨn tavástara'a caí a'ɨ́ɨn ayén raruuren tɨ́'ij caí ché'e ayén á'ateevi'in tɨ teuumé'en a'achú pua'an xɨca, capu ja'atɨ́ ruuri á'ame'enche'e. Mɨ́ ajta, huá'a jɨme'e ɨ́ teɨte tɨ Dios ari hua'antíhuau ɨ́ jéjcua ɨmuá, a'ɨ́ɨ pu ari ayén raruure tɨ́'ij caí ché'e ayén á'ateevi'in. 21’Ayee nu tejá'amua'ixaate'e, a'ɨ́jna xɨcájra'a jetze, ayée pu té'eme. A'atɨ́ pu ayén tejámuaatá'ixaate'esin yee: “Casi'i, íiye pu já'ita'a een a'ɨ́jna ɨ́ Cɨríistu'u”, na'ari seɨ́j ayén yee: “A'acuí, áa pu já'ita'a een.” Tɨ́ pua'a miyen tejámuaatá'ixaate'en a'ɨ́jna xɨcájra'a jetze, caxu rá'atzaahuate'e. 22Seica mú yé uvé'enejsin ɨ́ mej tí'ihua'itaca. Miyen tɨjɨ́n: “Nee nu ne'ɨ́n pú'een ɨ́ Cɨríistu'u.” Majta seica miyen tɨjɨ́n: “Neti'itéjvee ne'ɨ́jna jɨme'e niuucajtze'en ɨ́ Dios.” A'ii mú hua'utaseíjrate'esin ɨ́ teɨte a'ij mej ye'í ti'itɨ́j tiu'uyɨ́'ɨtɨ mej mi huá'ucuanamuan, tɨ pua'a huatárɨ'ɨristare mej huá'ucuanamuan ɨ́ teɨte tɨ Dios ari hua'antíhuau ruseɨ́j. 23’Aru, xáanamuajri'i temua'a naa. Caxu xaa ne'u yá'uhua'anan nej amuacaí neri amuá'ixaa nain jɨme'e ɨ́ niuucari. 24’Ajta hui a'ɨ́jna xɨcájra'a jetze, a'ájna mej rajpuaíjtzi muá'aju'un, capu ché'e airáxɨri ɨ́ xɨcaj. Ajta ɨ́ máxcɨra'i jɨme'e, capu ché'e ajta huanéeri'icɨ́ a'ame. 25Majta ɨ́ mej tátatzavi'i ɨ́ ta japua, a'ɨ́ɨ mú huateújca'atzɨjsin. Aj mú mi cávatzɨ́jxɨ'ɨsin ɨ́ xu'ura'ave a'ujna ɨ́ ta japua. 26Aj xu xaa si neseijran ineetzi, i nej neajta jetzen airáane ɨ́ teáata'a. Yé nu ve'ecánejsin jaitɨri tzajta'a. Naa pu temua'a tiu'unéeri'icɨ́j a'ame. Nain nu jɨ́n antínmua'areere na'ame a'ɨ́jna xɨcájra'a jetze. 27’Matɨ́'ɨj mi hua'aré'e'itixɨ'ɨsin ɨ́ mej nevaɨre'e mej mi huá'ajseɨre'en naíjmi'ica ɨ́ teɨte tɨ Dios ari hua'antíhuau ɨ́ jéjcua ɨmuá. A'u tɨ na'a mú hua'uré'eseɨre'esin íiyen chaanaca japua a'u mej a'ucaíjmee ɨ́ teɨte. 28’Sej si jaítze'e yaú'itɨée xá'ara'ani a'ij nej tejá'amua'ixaate'e, a'ij xu jetze huaruitɨejte'en ɨ́ pi'ista a'ɨ́jna ɨ́ huaréj. Tɨ́'ɨj antícua'atíjme'eni ánɨmua tɨ antipí'istáre'ejmee, ajta tɨ́'ɨj ajtaxámua'itaxɨ'ɨn, ayée xu éeni'icɨ'e ramua'aréeren tɨ ari vejli'i ɨ́ víita'ari. 29Ayee pu che'atá na'a tí'iseijre'en tɨ ari tí'irɨcɨ a'ij nej neuchén tejamuá'ixaa. Ayee xu éeni'icɨ'e ramua'aréeren tɨ ari vejli'i a'ɨ́jna xɨcájra'a jetze tɨ jetzen te'entipuá'ari naíjmi'i. Pu'uri xaa ne'u vejli'i tɨ́mua'a. 30’Ayej xaa ne'u ti'ayajna, ayée nu tejá'amua'ixaate'e ɨ́ mej mauj ruuri ɨ́ teɨte mej íiyen seijre'e chaanaca japua, a'ɨ́ɨ mú caí cui'ini asta caí naíjmi'i ayén tiú'urɨni. 31Naíjmi'i pu te'entipuá'ari a'íjna i chaanaca japua, ajta ɨ́ ta japua. Mɨ́ ajta, aúche'e te'araúrastejsin a'íjna i nej neri tejamuá'ixaa. 32’Jɨ́me'en a'ɨ́jna xɨcájra'a tɨ jetzen te'entipuá'ari naíjmi'i, capu ja'atɨ́ ramua'aree ja'anáj tɨ ayén té'eme. Capu ajta ja'atɨ́ ramua'aree a'atzaj tɨ pua'a ayén té'eme. A'ɨ́ɨ ɨ́ mej tí'ivaɨre'e u ta japua, camu majta ramua'aree. Neajta inee, i nej í'iyaujra'an ɨ́ Dios, canu neajta ramua'aree. A'ɨ́ pu'u ramua'aree ɨ́ niyá'upua ɨ́ Dios. 33’Mú'een, caxu seajta ramua'aree ja'anáj tɨ a'ájna teja'uré'enejsin. A'ɨ́j nu jɨ́n niyen tejá'amua'ixaate'e. Rɨ́'ɨ xu'u huaújruuren mú'een. Seuche'e xu atanéjne'ere. Seajta nejchú'eve'e. 34’A'atɨ́ tɨ huápuaseaaruve'en á já'ahua'a ɨmuá. Amuacaí pu ruchi'i hua'íjcate'en ɨ́ mej tí'imɨjhuaca a'ujna chi'ita. A'ɨ́ pu hua'íjcate'e seɨj ajta seɨj mej tiu'umuárɨ'en ti'itɨ́j tɨ seɨ́j huayɨ́'ɨtɨ. Ajta seɨ́j pu tí'ijcate'en a'ɨ́jna jɨme'e tɨ tí'icha'ɨca'a á ta'iténinei. 35Ayee nu che'atá nena'a tejá'amua'íjcate'e mú'ejmi, setá'aj atanéjne'ere a'iné caxu ramua'aree ja'anáj nej uvé'enejsin, inee yé nej i'ichej. Capu a'ij ámuaatámitɨejte'esin ja'anáj nej uvé'enejsin, tɨ pua'a huatechuíixaren, na'ari tɨ já'ita'a tɨ́ca'a nusu matɨ́'ɨj huajíjhuan ɨ́ tecuaara'ise, na'ari a'atzaj tapuá'arijme'eca. 36’Tɨ́ pua'a ca'anacan nu'uvé'enen, caxu taúra'acare'en nej amuáateuni secu'utzúca'a. 37A'íjna i nej já'amua'ixaate'e, a'ij nu neajta huá'a'ixaate'e naíjmi'ica ɨ́ seica niyen tɨjɨ́n: Seuche'e xu atanéjne'eri. ―Ayee pu tihua'utá'ixaa a'ɨ́jna ɨ́ Jesús.

will be added

X\