1 Matɨ́'ɨj meri vejli'i me'ánna autenéesime'ecaa u Jerusalén, a'úu mú a'atanéj a'u tɨ chájta'ajme tɨ ayén téja'arájtehuaa tɨjɨ́n Betfagé, ajta Betania. A'uu pu é'echajta'a jɨrí jetze tɨ ayén téja'arájtehuaa tɨjɨ́n Aceituunajemi. Tɨ́'ɨj jí Jesús hua'apuaca huata'áiteca'a. 2 Ayen tɨjɨ́n: ―Sericu, setá'aj se'uun a'atanén a'ájna vejli'i chajta'a tɨ é'eseijre'e. Tɨ́ pua'a seri e'ará'asti, a'úu xu puuru'u é'eteuni tɨ caí xɨ ja'anáj ja'atɨ́ japuan avé'eca. A'uu pu a'ijtápi'ihuá a'ame. Setá'aj rá'ijxɨjta, seajta mú ye'eráajan. 3 Tɨ́ pua'a ja'atɨ́ ayén tejámuaata'íhua'u yee: “¿A'iné een jɨ́n será'ijxɨjta mɨ puuru'u?”, ayée xu tiraata'ixaate'en yee: “A'ɨ́ pu ra'ucupadu ɨ́ tavástara'a”, seajta siyen tiraata'ixaate'en yee: “Seajtahua'a xu ca'anacan seraatátuiire'esin ɨ́ tɨ racɨi.” 4 Matɨ́'ɨj mi u á'uju'u. A mú pua'acɨé caaye jetze yá'uteu me'ɨ́jna ɨ́ puuru'u. A'uu pu a'ijtápi'ihuaca'a puéerta jetze. Matɨ́'ɨj mi ra'ijxɨ́jtaca'a. 5 Seica mú me'uun a'uté'uuca'a a'ujna. A'ɨ́ mú tihua'uta'íhua'uri'i tɨjɨ́n: ―¿Ti'itájni a'ij seruure? ¿A'iné een jɨ́n será'ijxɨjta mɨ puuru'u? 6 Ayee mú tihua'utá'ixaa a'ij tɨ ye'í Jesús tihua'utá'ixaa. Majta me'ɨ́n ɨ́ seica, a'ɨ́ɨ mú hua'utá'a mej ra'anján. 7 Matɨ́'ɨj mi ya'ujáj ɨ́ Jesús jemi a'ɨ́jna ɨ́ puuru'u. Metira'ité'itajte rucɨɨxu jɨme'e. Tɨ́'ɨj jí avé'eyeijxɨ ɨ́ Jesús ɨ́ puuru'u japua. 8 Majta me'ɨ́n ɨ́ teɨte, jeíhua mú cɨ́ɨxuri te'epíijraa juye jetze. Majta seica pi'ista te'entiveíchixɨ'ɨ, a'ɨ́j mú majta a'upíijraa a'ájna juye jetze. 9 Majta me'ɨ́n mej amuaaté'ee muaajú'ucaa, a'ɨ́ɨ mú autéjhuii mej huajíjhua, majta me'ɨ́n ɨ́ mej huajú'ucaa cujta'an a'ɨ́jna ɨ́ Jesús. Yee mú tí'ijijhuaca'a tɨjɨ́n: ―Pu'uri i'i xɨ́'epɨ'ɨn. Ché'e Dios ráave'esi a'íjna tɨ yevé'eme niuucajtze'en ɨ́ tavástara'a. 10 Pu'uri i'i xɨ́'epɨ'ɨn. Ché'e Dios ráave'esi temua'a naa, a'íjna tɨ á yevé'eme tɨ́'ij tiu'uta'aíjta tɨ́j ajmí'i tiu'uta'aíjtaca'a ɨ́ tahuáacɨxa'a, a'ɨ́jna ɨ́ David teecan. Ajta hui me'ɨ́n ɨ́ mej tí'ivaɨre'e u ta japua, miché'e miyen tiraataxáj yee temua'a pu í'ixɨ'epɨ'ɨn. ―Yee mú mi tiu'utaxájtaca'a, a'ujna caaye jetze. 11 Tɨ́'ɨj i Jesús a'uteájrupi a'ánna Jerusalén. Ajta á'iyen a'a'uteájrupi a'ujna teyujta'a. Tɨ́'ɨj tiu'uséij nainjapua, tɨ́'ɨjí á'uraa, majta ɨ́ mej tamuáamuata'a japuan hua'apua ará'ase. Pu'uri téchuijxarijme'eca, matɨ́'ɨj mi me'uun a'ará'a a'ájna Betania. 12 Yee ruijmua'a yee majta u e'eráacɨ a'ujna Betania. Pu'uri í'icuataca'a a'ɨ́jna ɨ́ Jesús. 13 Tɨ́'ɨj i a'ɨ́ɨn huaréj pi'ista huaseíj tɨ a'ɨmuá a'atáveeca'a. Jeíhua pu téxamua'i. Tɨ́'ɨj jí u á'ume tɨ́'ij raaseíj tɨ pua'a taca'a. Mɨ́ ajtá'i caí, capu taca'acaa. A'ɨ́ pu'u, xamua'ira'an seijre'eca'a a'iné capu a'ájna pɨ́tí'irijcaa tɨ́j pua'a taaca. 14 Aj pu i Jesús ayén tiraata'ixaa a'ɨ́jna ɨ́ huaréj, tɨjɨ́n: ―Capu ché'e ja'atɨ́ mú a'uvé'emé'e a'ame tɨ ráacua'ani mɨ á'ataca'i. ―Yee pu tiraata'ixaa. Majta me'ɨ́n ɨ́ mej á'ujujhua'ane'e ɨ́ Jesús jamuan, a'ɨ́j mú ráanajmuajri'i a'ij tɨ tiu'utaxájtaca'a. Matɨ́'ɨjtá mi a'ucɨ́j. 15 A'uun mú a'ará'a a'ánna Jerusalén. Tɨ́'ɨjta'i a'ɨ́ɨn Jesús a'a'uteájrupi a'ujna teyujta'a. Ajta a'utéjche tɨ hua'irámuarite'en ɨ́ mej me'uun te'utu'aca, ajta ɨ́ mej me'uun tite'unanáave. Temua'a pu te'ijhuá'axɨjxɨ ɨ́ tihuá'ameesa ɨ́ mej tumin jetzen tihuá'apuata'ati'iraca, ajta a'u mej cucui'ise e'etu'aracare'e. 16 Ajta caí hua'utá'a tɨ ja'atɨ ti'itɨ́ aútɨsime'en á já'ita'a teyujta'a. 17 Ajta á'iyen tihuá'amua'ateajraa, ayén tɨjɨ́n: ―¿Ni caí ayén té'eyu'usi'i ɨ́ yu'uxari jetze tɨ ayén tiraataxájtaca'a ɨ́ Dios tɨjɨ́n: “Ayee pu nu'u teja'arajtehuaá a'ame ɨ́ chi'ira'an tɨjɨ́n chi'ij mej tzajta'an rɨ́'ɨ tiratá'aca ɨ́ Dios ɨ́ mej curé'ecɨ'ɨca nain japua ɨ́ chuej tɨ seijre'e”? Mɨ́ ajta, capu a'ɨ́jna jɨ́n tí'ivaɨre'e. Ayee xu ráaruu ɨ́ chi'ij tɨ́j teásta'a a'u mej a'iráatei ɨ́ nahua'ari. ―Yee pu tiu'utaxájtaca'a a'ɨ́jna ɨ́ Jesús. 18 Majta me'ɨ́n ɨ́ teɨte, naíjmi'i mú a'ij tira'utaseíj a'ɨ́jna jɨme'e a'ij tɨ ye'í tihuá'amua'ate. Majta me'ɨ́n ɨ́ mej te'áijta teyujta'a, majta a'ɨ́ɨme ɨ́ mej té'eyu'uxaca, a'ɨ́ɨ mú rátziɨɨne'eca'a matɨ́'ɨj ráanamuajri'i a'ij tɨ ye'í tihua'umuá'ate. Aj mú mi ráahuau a'ij mej ye'í huárɨni mej mi raajé'ica me'ɨ́jna ɨ́ Jesús. 19 Ajta a'ɨ́ɨn ɨ́ Jesús, tɨ́'ɨj huatétɨca'are'eca'a, aj pu'i huirájraa a'ujna chajta'a, majta ɨ́ mej jamuan á'ujujhua'ane'en. 20 Yee ruijmua'ate'e yee, tɨ́'ɨj huateapuá'areca'a, a'úu mú a'uré'ene a'utɨ́ a'atáveeca'a a'ɨ́jna ɨ́ huaréj. Pu'uri temua'a tí'ihuachica'a nainjapua, ajta téte'ɨmua ɨ́ runáana'a jetze huateáhuaa. 21 Tɨ́'ɨj jí a'ɨ́ɨn ɨ́ Pedro ra'utámua'areeri'i a'ij tɨ een jɨ́n huateáhuaa. Aj pu i ayén tiraata'ixaa a'ɨ́jna ɨ́ Jesús tɨjɨ́n: ―Maeestru, casi'i. Pu'uri temua'a ti'ihuáchi mɨ huaréj pej a'ij pua'a tiraateájtuaa. 22 Aj pu i Jesús ayén tihua'utá'ixaa tɨjɨ́n: ―Ayee pu tiú'ujxe'eve'e sej rá'atzaahuate'en ɨ́ Dios. 23 Ajta ayén tihua'utá'ixaa tɨjɨ́n: ―Ayee nu xaa ne'u tejá'amua'ixaate'e. Ayej ti'ayajna tɨ pua'a ja'atɨ́ té'atzaahuate'e ɨ́ ru tzajta'a tɨ ayén te'ará'asti a'ij tɨ a'ɨ́ɨn tirá'amitɨejte'e, ayée pu té'eme. Na'ari, tɨ pua'a a'ɨ́jna ɨ́ ja'atɨ ayén tiraata'aíjte'en a'ɨ́jna ɨ́ jɨrí tɨjɨ́n: “Tíchesi, ateáruti mé jaata'a a'ájna já'ahua'a el mar”, ayée pu'i rɨni, rɨ'ɨrí. Na'ari caí, tɨ pua'a utévatziɨn ɨ́ tzajta'an a'íjna i muá'ariira'a tɨjɨ́n: “Ayej ne'ase capu a'ij tí'irɨ'ɨri”, capu ayén té'eme tɨ ayén huárɨni. 24 ’A'ɨ́j nu jɨ́n, niyen tejá'amua'ixaate'e. A'ij sej ye'í tiraatáhuaucu ɨ́ Dios jemi, tɨ pua'a siyen té'atzaahuate'e sej si ra'ancuré'asin, ayée pu té'eme, ti'itɨ́ sej a'ij tiu'utáhuausin. 25 Ajta, patɨ́'ɨj raatéjhuauni ɨ́ Dios jemi, tɨ pua'a ja'atɨ́ auteáturan mú'eetzi jemi, ayée pu tiú'ujxe'eve'e pej tiraatá'uuni'i. Tɨ́ pua'a piyen huárɨni, a'ɨ́ɨn ɨ́ ayá'upua tɨ a'uun é'eseijre'e u ta japua, a'ɨ́ɨ pu timuaatá'uuni'ira mú'eetzi nain jɨme'e ɨ́ pej jɨ́n auteájturaa ɨ́ jemin. 26 Na'ari tɨ pua'a pej caí tiraatá'uuni'i ɨ́ tɨ á jemin auteájturaa, capu ajta timuaatá'uuni'ira ɨ́ Dios ɨ́ pej jɨ́n auteájturaa ɨ́ jemin. ―Yee pu tiu'utaxájtaca'a a'ɨ́jna ɨ́ Jesús. Matɨ́'ɨj mi a'ucɨ́j. 27 Aj mú mi majtáhua'a u Jerusalén á'uju'un. Aj pu i Jesús a'uun vejli'i á'uche'ecane'eca'a teyujta'a matɨ́'ɨj seica á e'iré'ene. A'ɨ́ mú pú'een ɨ́ mej te'áijta teyujta'a, majta ɨ́ mej té'eyu'uxaca, majta seica vaujsi. 28 Aj mú mi miyen tiraata'íhua'uri'i tɨjɨ́n: ―¿Ti'itájni jɨ́n peti'itéjvee pej pi piyen rɨcɨ? ¿A'ataani ayén tímuaata'aíj pej pi piyen rɨjca? 29 Aj pu i Jesús ayén tihua'utá'ixaa tɨjɨ́n: ―Neajta nu inee seɨj tejámuaata'íhua'ura. Tɨ́ pua'a senaatá'ixaate'en se'íjna, aj nu ni amuaatá'ixaate'esin ti'itɨ́ ɨ́ nej jɨ́n ti'itéjvee nej ni niyen rɨcɨ. 30 ¿A'ataani raatá'a a'ɨ́jna ɨ́ Juan tɨ́'ij huá'umuaɨ'ɨhua ɨ́ teɨte? ¿Ni Dios, ca'ɨ́n mɨ teteca? Xaatániuuchi. 31 Matɨ́'ɨj mi a'uteájhui mej rujɨ́ɨmua'a ti'ihuaúrihua'u. Miyen tɨjɨ́n: ―Tɨ́ pua'a tiyen tiraata'ixaate'en yee: “Dios pu ya'uta'íteca'a”, ayée pu titaatá'ixaate'esin yee: “¿A'iné een jɨ́n tecaí rá'atzaahuate'e a'ij tɨ tiu'utaxájtaca'a a'ɨ́jna?” 32 Mɨ́ ajta, capu hui rɨ'ɨrí tej tiyen tiraata'ixaate'en yee: “Teteca mú ya'uta'íteca'a.” Yee mú tiu'utaxájtaca'a a'ɨ́ɨme, a'iné mu'uri ramua'areereca'a mej naíjmi'i miyen rá'atzaahuate'eca'a tɨ a'ɨ́ɨn ɨ́ Juan tí'ixaxa'ata'a ɨ́ Dios jetze me'ecan. A'ɨ́j mú jɨ́n huá'atziɨɨne'eca'a ɨ́ teɨte. 33 A'ɨ́j mú mi jɨ́n miyen tiraata'ixaa me'ɨ́jna ɨ́ Jesús tɨjɨ́n: ―Catu hui ramua'aree. Aj pu i Jesús ayén tihua'utá'ixaa tɨjɨ́n: ―Canu neajta nee tejámuaatá'ixaate'esin ɨ́ nej jɨ́n ti'itéjvee nej ni niyen rɨcɨ. ―Ayee pu tihua'utá'ixaa.
