San Marcos 1

1Yee pu éeni'icɨ'e a'utéjche ɨ́ niuucari tɨ jɨ́me'en rá'axa a'ɨ́jna ɨ́ Jesús ɨ́ Cɨríistu'u tɨ ajta yaujra'an pɨ́rɨcɨ ɨ́ Dios. 2Ayee pu te'uyú'uxaca'a ɨ́ ja'atɨ tɨ ajmí'i tí'ixaxa'ata'a ɨ́ Dios jetze me'ecan. Ayee pu ántehuaaca'a tɨjɨ́n Isaías. Ayee pu tira'uyú'uxaca'a ayén tɨjɨ́n: Yee pu Dios ti'ixa a'ɨ́jna jɨme'e tɨ án yá'ujra ɨ́ ɨpuari japua ayén tɨjɨ́n: “Me'ecui xaa ne'u, nu'uri ja'atɨ́ huata'íti tɨ́'ij amuacaí huataseíjre'en pecaí mú'ee. A'ɨ́ pu a'ɨ́ɨn pú'een tɨ amuacaí tihua'utá'ixaate'esin ɨ́ teɨte mej nu'u mua'ijchú'eve'e.” 3Ajta nu'u ɨ́ Dios ayén tɨjɨ́n: “A'ɨ́jna ɨ́ tɨ amuacaí tihua'utá'ixaate'esin, a'ɨ́ɨ pu nu'u u e'ejíihuá a'ame já'ahua'a ɨtzitá.” Ayen tɨjɨ́n: “Naa xu rɨ́'ɨ huaújruuren mú'een, a'iné a'ɨ́ɨ pu yé uvé'enejsin ɨ́ tavástara'a. Caxu ra'antánaamuan ɨ́ juyáara'an jetze.” 4A'ɨ́jna ɨ́ tɨ nu'u amuacaí huataseíjre'esin, a'ii pu a'ɨ́ɨn pú'een a'ɨ́jna ɨ́ Juan ɨ́ tɨ huá'amuaɨ'ɨhuacare'e. Aa pu a'utéveeca'a a'u tɨ caí ti'itɨ́ é'e já'ahua'aca'a. Ayee pu tihuá'a'ixaate'eca'a tɨ ayén tiú'ujxe'eve'e mej seɨcɨé tiú'umua'ati mej mi miyen huárɨni a'ij tɨ ye'í tí'ijxe'eve'e ɨ́ Dios. Tɨ́'ɨj jí a'ɨ́ɨn huá'amuaɨ'ɨhuan ɨ́ Juan tɨ ij Dios tihua'utá'uuni'i ɨ́ mej jɨ́n auteájturaa ɨ́ jemin. 5Matɨ́'ɨj mi naíjmi'i e'iré'ene a'u tɨ a'utéveeca'a ɨ́ Juan. A'uu mú e'erácɨ'ɨca'a tɨ́j na'a a'u tɨ huatacá'a a'ujna chuéjra'a japua tɨ ayén téja'arájtehuaa tɨjɨ́n Judea, majta a'ɨ́ɨme ɨ́ mej a'uun a'uchéjme a'ujna chajta'a tɨ ayén téja'arájtehuaa tɨjɨ́n Jerusalén. A'uu pu e'ejtéme'ecan u Judea. Jɨ́me'en mu'u raataxájtaca'a ɨ́ mej jɨ́n auteájturaa ɨ́ Dios jemi, aj pu i a'ɨ́jna ɨ́ Juan huá'umuaɨ'ɨhuaca'a ɨ́ játe'ana jetze tɨ ayén téja'arájtehuaa tɨjɨ́n Jordán. 6Ajta Juan, ayée pu é'ene'e ti'itéchejca'a cɨ́ɨxuri jɨme'e tɨ itzíjhua ti'itɨ́j cameeyu'u ju'uxa'a tɨ pú'een. Ajta navij típuaasica'a. A'ɨ́ɨ pu jɨ́n avá'ujɨ'ɨcɨe'eca'a. Ajta huátuna'ise pu cua'acare'e, ajta searate 'ɨtzitá mej huáxuaavi. 7Ayee pu tihuá'ihua'ixáate'e tɨjɨ́n: ―Seɨ́j pu yé é'e vé'eme aúche'e. Jaítze'e pu hui ve'ecán jɨ́n ti'itéjvee a'ɨ́jna necaí inee. A'ɨ́j pu jɨ́n caí naavíjte'e ineetzi nej ti'itɨ́ jɨ́n ti'itevée ná'ara'ani tɨ cɨ́lieen jɨ́n seijre'e jemin a'ɨ́jna tɨ yé é'e vé'eme, capu xaa ne'u naavíjte'e ineetzi nej ni yejta'ɨ́'ɨpɨ'ɨn ɨ́ ca'acaira'an. 8Ayee nu xaa ne'u neri amuáamuaɨ'ɨhuaca'a jaj jɨme'e. Mɨ́ ajtá'i a'ɨ́ɨn, seɨj pu huata'íti tɨ huateáturan mú'ejmi jemi. Xɨéjniu'ucare'ara'an ɨ́ Dios pu uteá'asin mɨ a'amua tzajta'a. 9Yee pu tiuju'urɨ́j a'ájna tɨ́'ɨj huá'amuaɨ'ɨhuaca'a ɨ́ Juan. Tɨ́'ɨj jí i á e'iré'ene ɨ́ Jesús. A'uu pu e'erájraa u Nazarét, chajta'a tɨ e'ejtéme'ecan a'ujna já'ahua'a Galilea. Aj pu i a'ɨ́ɨ Juan ráamuaɨ'ɨhuaca'a ɨ́ Jesús u játe'ana jetze tɨ ayén téja'arájtehuaa tɨjɨ́n Jordán. 10Jɨ́me'en pu'u Jesús a'itáraa á jaata'a, aj pu i raaseíj tɨ antaújcu ɨ́ ta japua tɨ a'utéjmuaa. Ajta á'iyen Xɨéjniu'ucare'ara'an huaseíj ɨ́ Dios tɨ e'icáme'eca'a. Yee pu seijre'eca'a tɨ́j cucui'i. Aj pu'i mu'úutze'en japua a'ujyeíjxɨ. 11Ajta á'iyen niuucari huánamuajri'i tɨ uj e'icánamuajre u ta japua. Ayee pu tiu'utaxájtaca'a tɨjɨ́n: ―Niyauj pej pɨ́rɨcɨ ɨ́ nej muaxe'eve'e. Jé'ecan pej rɨ́'ɨ tinaatá'aca. 12Tɨ́'ɨj jí a'ɨ́ɨn Xɨéjniu'ucare'ara'an ɨ́ Dios ca'anéeri jɨ́n ya'uví'itɨ ɨ́ Jesús áa já'ahua'a ɨtzitá a'u tɨ caí ti'itɨ́ e'eré'evee. 13A'ujna ɨtzitá, ayée pu u é'etee sei máxcɨra'i japuan tamuáamuata'a xɨca. A'uu pu a'utéveeca'a a'u mej ti'itén a'ucɨ́'ɨca mej simuáruuni. Tɨ́'ɨj jí a'ɨ́ɨn ɨ́ tiyaaru'u ti'ihuaújtesi'ijre tɨ 'ij ca'aníjra'a raatá'an a'ɨ́jna ɨ́ Jesús tɨ́'ij ti'itɨ́j jɨ́n auté'ɨtzen ɨ́ Dios jemi. Aru capu ayén teja'uré'ene. A'ɨ́ɨ mú raatévaɨ ɨ́ Jesús ɨ́ mej títetateí u ta japua ɨ́ Dios jemi. 14Tɨ́'ɨj aiteánami'ihuaca'a ɨ́ Juan, aj pu'i Jesús u a'utanéj u Galilea. A'ɨ́ɨ pu hua'utá'ixa jɨ́me'en a'ɨ́jna tɨ jɨ́n Dios tiraa'íjca ɨ́ Juan, a'ɨ́jna ɨ́ Dios tɨ te'áijta nain japua ɨ́ chaanaca. 15Ayen tɨjɨ́n: ―Pu'uri araúraste tɨ a'ájna teja'uré'enejsin tɨ tiu'uta'aíjta ɨ́ Dios naíjmi'icɨ'e chaanaca japua. Setá'aj hui seɨcɨé huárɨni, setá'aj siyen seɨcɨé tiú'umua'ati se'ɨ́jna jɨme'e a'ij tɨ tí'ijxe'eve'e ɨ́ Dios. Setá'aj seajta rá'antzaahuate'en ɨ́ niuucari tɨ jɨ́n Dios amua'irájtuaani. 16Tɨ́'ɨjtá'i ɨ́ Jesus a'ujna e'ejtéme'ecaa a'ujna vejli'i a'u tɨ e'eve'e'ástɨme ɨ́ jaj tɨ ayén téja'arájtehuaa tɨjɨ́n Galilea. Aj pu'i a'ɨ́mej huaseíj ɨ́ Simón, ajta ɨ́ Andrés tɨ juutzeájra'an pú'een ɨ́ Simón. A'ɨ́ɨ mú xɨéjmua'ari áuuhua'anaa á jaata'a. Ayee mú tí'ijrɨ'ɨrejca'a a'ɨ́ɨme ɨ́ mej hua'ité huavívi'i. 17Aj pu'i ayén tihua'utá'ixaa ɨ́ Jesús tɨjɨ́n: ―Mú se'utáuruyi'i ineetzi jemi setá'aj nej jamuan á'ujujhua'ane'en. Nee nu tejá'amuamua'aten sej si caí ché'e siyen hua'ité tí'ivivi'ira'a, sino a'ɨ́mej xu'u si ca'aníjra'a hua'utá'asin ɨ́ teɨte mej mi neetzi ná'antzaahuate'en. 18Aj mú mi raatapuá'ajtaca'a. Matɨ́'ɨj mi á téjaupíi ɨ́ xɨéjmua'ari me'ájna. Matɨ́'ɨj mi a'ucɨ́j jamuan ɨ́ Jesús. 19Aj pu ijtá'i á'ayee a'uré'ene. Tɨ'ɨquí seɨj huaseíj ɨ́ ja'atɨ tɨ ayén ántehuaa tɨjɨ́n Jacobo. Yaujra'an ɨ́ Zebedeo. A'ɨ́ɨ pu ajta raaseíj a'ɨ́jna ɨ́ Juan, ɨ́ tɨ juutzeájra'an pú'een ɨ́ Jacobo. A'uu mú baarcu jetze e'eráate'eca. Majta rɨ́'ɨ tí'iruurejca'a ɨ́ xɨéjmua'ari tɨ tí'isiujtza'ani. 20Ajta á'iyen Jesús hua'utajé. Aj mú mi raatapuá'ajtaca'a ɨ́ mej xɨéjmua'ari rɨ́'ɨ tí'iruurejca'a. Aa mu'u yaúurɨe ɨ́ rutáàta ɨ́ baarcu jetze, ajta tɨ jemin tí'imuarɨ'eca'a. Matɨ́'ɨj mi Jesús jamuan a'ucɨ́j. 21Aj mú mi me'uun chajta'a a'uteájrupi, tɨ ayén téja'arájtehuaa tɨjɨ́n Capernaúm. Tɨ́'ɨj te'ará'a a'atzaj tɨ pua'a e'ire'enén a'ɨ́jna xɨcájra'a jetze ɨ́ mej jetzen rusé'upihua'a, aj pu'i Jesús teyujta'a a'uteájrupi. A'uu pu tihua'uhuamuá'ate. 22A'ɨ́jna ɨ́ Jesús, capu chá'ana'a na'a tihuá'amua'atehua'a matɨ́j ɨ́ seica ɨ́ mej majta a'uun tihuá'amua'atehua'a ɨ́ mej té'eyu'uxaca, sino ayée pu tɨ́j seɨj tɨ ti'itéjvee ti'itɨ́j jɨme'e tɨ ve'ée. A'ɨ́j mú jɨ́n a'ij te'utaseíj matɨ́'ɨj ráanamuajri'i. 23Ajta pu seɨj a'utéveeca'a u teyujta'a, tiyaaru'u tɨ tzajta'an seijre'eca'a. A'ij pu pua'a teja'uxáataye'icaa a'ɨ́jna ɨ́ tiyaaru'u. 24Ayen tɨjɨ́n: ―Aa qui carai jé'ecan, ¿a'iné hui ti'itɨ́j peté'umua'aree itejmi jemi, Jesús pej piyen ántehuaa tɨjɨ́n ɨ́ pej Nazarét é'eme'ecan? ¿Ni piyen mú a'uvé'emej pej ta'antipuá'ajte'en? Némuamua'ate ja'atɨ́ pej hui pɨ́rɨcɨ. A'uu pej a'uvé'emej Dios jemi, ɨ́ pej yaujra'an pú'een. 25Aj pu'i Jesús ra'ajté'axɨ ɨ́ tiyaaru'u. Ayen tɨjɨ́n: ―Pecáj yee ti'itɨ́j xajta. Huirájra'a mɨ tevi jetze. ―Ayee pu tiraata'ixaa a'ɨ́jna ɨ́ Jesús. 26Aj a'ɨ́ɨn ɨ́ tiyaaru'u raatéca'atzɨjxɨ ɨ́ tevi ca'anín jɨme'e. Tɨ́'ɨj jí huajíjhuaca'a a'ɨ́jna ɨ́ tiyaaru'u tɨ tzajta'an seijre'eca'a a'ɨ́jna ɨ́ tevi. Aj pu'i huirájraa ɨ́ tevi jetze. 27Aj a'ij te'utaseíj a'ɨ́ɨme ɨ́ mej e'etiújseɨre'eca'a. Jé'ecan mú tiúj'ixaate'eca'a seɨj ajta seɨj. Miyen tɨjɨ́n: ―¿Ti'itájni pú'een tɨ jéjcuacan jɨ́n ti'itéjvee? ¿A'uquí é'eme'ecan? Xɨee tɨ cuj ti'itéjvee ti'itɨ́j jɨme'e tɨ ve'ée. Amɨ́ pu tihuá'aijte'e ɨ́ tiyáaru'use. Majta me'ɨ́n rá'atzaahuate'e a'ij tɨ ye'í tihua'utá'ixaate'esin. ―Yee mú tiúj'ixaate'eca'a ɨ́ teɨte. 28Majta mú á'iyen nain japua ráamua'areeri'i tɨ́j na'a u Galilea a'ij tɨ ti'itɨ́ jɨ́n huarɨ́j ɨ́ Jesús. 29Aj mú mi huiráacɨ u teyujta'a. Matɨ́'ɨj mi me'uun a'ará'a Simón tɨ é'eche, ajta ɨ́ Andrés. Majta a'ɨ́ɨme ɨ́ Jacobo, ajta ɨ́ Juan, a'ɨ́ɨ mú huá'a jamuan á'ujujhua'ane'e. 30A'ɨ́ɨ pu án já'ujca'atii ɨ́ mu'uneára'an ɨ́ Simón. A'ɨ́ɨ pu tí'icui'icaa. Pɨ́staca'a. Matɨ́'ɨj mi miyen tiraata'ixaa ɨ́ Jesús tɨjɨ́n: ―Ti'icui'i. 31Aj pu'i ajteáxɨɨreca'a ɨ́ jemin a'ɨ́jna ɨ́ Jesús. Tɨ́'ɨj i rajví'i muájca'are'ara'an jetze. Tɨ́'ɨj jí ra'ajjáj. Aj pu'i ca'anacan huarúj. Ajta á'iyen a'ɨ́ɨn tɨ tí'icui'ica'a tihua'umí. 32Chumua'an, tɨ́'ɨj ari u e'eteárutij ɨ́ xɨca, naíjmi'ica mú curé'evi'itɨxɨ ɨ́ mej tí'icucui'i, majta ɨ́ mej tiyaaru'u huá'a tzajta'a seijre'e. 33Naíimi'i mú e'etiújseɨre'eca'a á pua'acɨé ta'iténinei, matɨ́j mena'a mej me'uun e'echéjme'e, majta u á'ahua'ayee. 34A'ɨ́ɨ tihuá'uhuaa mu'iicáca ɨ́ mej tí'icucui'ica'a. Capu seica na'a ɨ́ cuí'ini'ira'a. Tɨ́'ɨj i Jesús hua'utamuári ɨ́ tiyaaru'u ɨ́ mej seijre'eca'a seica ɨ́ teɨte tzajta'a. Jesús pu ajta caí hua'atá'acare'e a'ɨ́mej ɨ́ tiyaaru'u mej tiu'utaxáj, a'iné méjmua'atejca'a ja'atɨ́ tɨ pú'eene'e. 35Tapuá'arijme'eca, tɨ́'ɨj auj huachuíjxa, Jesús pu ájchee. Aj pu'i mú a'ij huárupi. Aa pu a'ará'a já'ahua'a ɨtzitá, a'utɨ́ caí ti'itɨ́ e'eré'evee. A'uu pu huatéeniu ɨ́ Dios jemi. 36Ajta ɨ́ Simón, ajta ɨ́ mej jamuan á'ujujhua'ane'e, a'ɨ́ɨ mú ra'avé'ehuau ɨ́ Jesús. 37Matɨ́'ɨj ráateu, aj mú mi miyen tiraata'ixaa tɨjɨ́n: ―Naíjmi'i mú muahuauhuau. 38Aj pu'i ayén tihua'utá'ixaa ɨ́ Jesús tɨjɨ́n: ―Che'eré, tiché'e á'ucɨɨne a'uun tɨ huatacá'a ɨ́ seica chajta'ara'a jetze. A'uu nu neajta hua'utá'ixaate'esin ɨ́ niuucari tɨ jɨ́n Dios hua'irátuaasin. Ayee nu een jɨ́n u e'erájraa u Capernaúm. ―Ayee pu tihua'utá'ixaa ɨ́ Jesús. 39Tɨ́'ɨjí hua'atéyujta'a tíhua'ihuá'ixaa nainjapua tɨ́j na'a u Galilea. Ajta a'ɨ́mej ɨ́ tiyáaru'use, Jesús pu hua'utamuári ɨ́ mej huá'a tzajta'a ú'useijre'eca'a ɨ́ teɨte. 40Tɨ́'ɨj jí seɨ́j ajteáxɨɨreca'a ɨ́ Jesús jemi. Tí'icui'ica'a a'ɨ́jna ɨ́ ja'atɨ. Xána'avi'ire'eca'a a'ɨ́jna jɨme'e ɨ́ cuí'ini'ira'a jɨme'e tɨ tineájxɨ ɨ́ huá'ire'ara'an jetze tɨ́'ij huatépete ɨ́ huá'ire'ara'an. Ayee mú ratamuá'amua tɨjɨ́n lepra. Tɨ́'ɨj i a'ɨ́ɨn títunutaca'a. Rájhuaviiri'i ɨ́ Jesús tɨ tiráahuaate'en. Ayee pu tiraata'ixaa tɨjɨ́n: ―Tɨ́ pua'a mua'aráanajche, pej tináahuaate'en. ―Yee pu tiu'utaxájtaca'a ɨ́ ja'atɨ tɨ títunutaca'a. 41Aj pu'i Jesús huataújxɨeemɨste a'ɨ́jna jemi tɨ́'ɨj raaseíj. Tɨ́'ɨj jí ra'ajtamuárɨej. Ayen tɨjɨ́n: ―Na'aráanajche pej huarún. 42Ayee pu teja'uré'ene. Jɨ́me'en pu'u raataxájtaca'a ɨ́ Jesús, tiraacá'ari'iri'i ɨ́ tɨ jɨ́n tí'icui'ica'a. Aj pu'i huarúj. 43Tɨ́'ɨj i a'ɨ́ɨn Jesús jeíhua ra'íjca tɨ nu'u caí raxájta a'ij tɨ ti'itɨ́ huarɨ́j. Aj pu'i á'uraa ɨ́ Jesús. 44Aru amuacaí pu ayén tiraata'ixaa tɨjɨ́n: ―Casi'i, pecáj ja'atɨ́ í'ixaate'e ni cɨ́j caj, sino aricu, u pá'ume'en jamuan ɨ́ tɨ tí'ivaɨre'e teyujta'a, tá'aj muaaseíj, pajta tiu'utámuaɨ'ɨvejta a'ij tɨ tiu'uxájtaca'a ɨ́ Moisés teecan. A'ɨ́ɨ mú jɨ́n ramua'aréeren mej tí'ivaɨre'e teyujta'a tɨjɨ́n pepu'uri huarúj. 45Mɨ́ ajta a'ɨ́jna ɨ́ tevi, tɨ́'ɨj á'uraa, a'ɨ́ɨ pu a'utéjche tɨ raataxáj jeíhua a'ij tɨ ti'itɨ́ huarɨ́j. Nainjapua pu hua'uré'ixaa seɨj ajta seɨj. A'ɨ́j pu jɨ́n caí ché'e huatárɨ'ɨristareca'a tɨ Jesús a'uteárute ɨ́ chajta'a, sino ɨtzitá pu'u jí huáye'icaa a'utɨ́ caí ti'itɨ́ e'eré'evee. Aru ja'anáj tɨ na'a, a'ɨ́ɨ mú teɨte é'ecɨ'ɨca'a a'utɨ́ a'ij é'ene'e ɨ́ Jesús. A'uu mú e'erácɨ'ɨca'a a'u tɨ na'a mej huachéjme.

will be added

X\