San Lucas 9

1Ja'anáj pu nú'u ayén huarɨ́j a'ɨ́jna ɨ́ Jesús. A'ɨ́ɨ pu hua'utajé a'ɨ́mej ɨ́ mej tamuáamuata'a japuan hua'apua ará'ase. Aj pu tihua'u'íjca a'ɨ́jna jɨme'e mej mi hua'utamuárite'en a'ɨ́mej ɨ́ tiyáaru'use ɨ́ mej teɨte tzajta'a seijre'e, majta mej nu'u tihuá'uhuaate'en tɨ́j na'a ti'ipua'amé ɨ́ cuí'ini'ira'a ɨ́ mej jɨ́n tí'icucui'i ɨ́ teɨte. Jesús pu ajta hua'utá'a ɨ́ muárɨ'eri'ire'ara'an ɨ́ mej jɨ́n miyen tiú'uruuren. 2Tɨ'ɨj jí hua'uta'íteca'a mej mi a'ucɨ́jxɨ'ɨn mej mi tihua'utá'ixaate'en ɨ́ teɨte a'ɨ́jna jɨme'e ɨ́ niuucari tɨ jɨ́me'en raxa ɨ́ Dios tɨ nainjapua tí'aijta. Ajta pu hua'uta'íteca'a mej mi tihuá'uhuaate'en ɨ́ mej tí'icucui'i. 3Ayee pu tihua'utá'ixaa tɨjɨ́n: ―Caxu ti'itɨ́j anú'an ɨ́ sej jɨ́n huateújvaɨre'en ɨ́ juye jetze, ni ti'itɨ́j itzɨ́j, ca'ɨ́n ti'itɨ́j ca'aní na'ari ti'itɨ́j pan o tumin. Seajta hui, seɨ́j xu'u anpiín ɨ́ síicu'uri. Caxu hua'apuaca té'epiin. 4’A'uu tɨ na'a sej ará'aiixa a'ájna a'u tɨ chi'ij a'utéjvee, a'úu xu u á'ateere ajta sena'a caí á'ucɨɨne a'ujna u chajta'a. 5Ajta, ayée xu hui huárɨni tɨ pua'a mecaí amua'ancuré'evi'itɨn. Setɨ́'ɨj á'ucɨɨne se'újna u chajta'a, xajtaújrɨ́'ɨpɨ'ɨn ɨ́ sej ajtáca'acaimé'e, seajta raatéca'atzɨjxɨ'ɨn tɨ ij cáaxɨn ɨ́ chuej. Ayee xu a'ɨ́jna jɨ́n huarɨ́n, aj mú mi ramua'aréeren mej auteájturaa ɨ́ Dios jemi. ―Ayee pu tihua'utá'ixaa a'ɨ́jna ɨ́ Jesús. 6Matɨ́'ɨj mi a'ucɨ́jxɨ nainjapua tɨ́j na'a a'uun tɨ huatacá'a. Nainjapua mú hua'utá'ixa ɨ́ niuucari tɨ jɨ́n Dios hua'irátuaasin. Majta tihuá'uhuaa ɨ́ teɨte. 7Ajta a'ɨ́ɨn ɨ́ Heródes, a'ɨ́jna tɨ tajtuhuan jɨ́n ti'itéveeca'a, a'ɨ́ɨ pu ráamua'areeri'i a'ij mej ti'itɨ́j ruurejca'a. Capu a'ij tirá'amitɨejte'eca'a a'iné seica mú miyen tí'ixajtaca'a tɨjɨ́n: ―Pu'uri ajtahua'a a'itáraa a'ɨ́jna ɨ́ Juan a'ujna mej ye'avá'ana. 8Majta seica miyen tɨjɨ́n: ―Pu'uri ajtahua'a huataseíjre a'ɨ́jna ɨ́ Elías. Majta seica miyen tí'ixajtaca'a tɨ nu'u seɨ́j pu a'itáraa huá'a tzajta'a ɨ́ mɨ'ɨchite tɨ Dios jetze me'ecan tí'ixaxa'ata'a. 9Ajta a'ɨ́ɨn Heródes, ayée pu tiu'utaxájtaca'a tɨjɨ́n: ―Teajta hui ra'antiveíjcheca'a ɨ́ mu'úura'an ne'ɨ́jna ɨ́ Juan. A'ɨ́j pu jɨ́n caí a'ɨ́ɨn pú'een. ¿A'atajqui na'a pú'een a'ɨ́jna ɨ́ nej jɨ́me'en niyen tí'inamua? ―Ayee pu tiu'utaxájtaca'a. Ajta huataújtese tɨ raaseíj. 10Majta me'ɨ́n ɨ́ mej tamuáamuata'a japuan hua'apua ará'ase, matɨ́'ɨj mu'u pɨ́ja'uré'avatzɨ, matɨ́'ɨj mi miyen tiraata'ixaa me'ɨ́jna ɨ́ Jesús a'ij mej ti'itɨ́j huáruu. Tɨ'ɨj jí a'ɨ́ɨn huá'uvi'itɨ a'ɨ́mej. Matɨ́'ɨj mi a'ucɨ́j rujɨ́ɨmua'a a'ujna já'ahua'a chajta'a tɨ ayén téja'arájtehuaa tɨjɨ́n Betsaída. 11Majta me'ɨ́n ɨ́ teɨte, matɨ́'ɨj ráamua'areeri'i, a'úu mú e'iré'ene a'u tɨ a'utéveeca'a ɨ́ Jesús. A'ɨ́ɨ pu hua'ancuré'evi'itɨ. Ajta tihua'utá'ixaa a'ij tɨ 'een a'ɨ́jna jɨme'e tɨ Dios tí'aijta nainjapua. Ajta tihuá'uhuaa ɨ́ mej ti'icúcui'ime'ecaa. 12Tɨ́'ɨj huaré'echuijxareca'a, a'ɨ́ɨme ɨ́ mej tamuáamuata'a japuan hua'apua ará'ase, a'ɨ́ɨ mú e'iré'ene ɨ́ Jesús jemi. Ayee mú tiraata'ixaa tɨjɨ́n: ―Patá'aj hua'aré'e'itixɨ'ɨn ɨ́ teɨte mej mi a'ucɨ́jxɨ'ɨn tɨ́j na'a a'uun mej huachéjme u chajta'a, ajtahua'a ayée ɨmuá mej a'uchéjme, mej mi me'uun tiú'unanan ti'itɨ́j mej ráacua'ani, mej mi majta me'uun a'ucu'utzu a'iné capu hui ye'e ti'itɨ́j ayajna a'u tej a'uté'uu. 13Ajta a'ɨ́ɨn Jesús, ayée pu tihua'utá'ixaa tɨjɨ́n: ―Setá'aj mú'een tihua'umín. Matɨ́'ɨj mi miyen tiraata'ixaa tɨjɨ́n: ―Aii tu'u tícha'ɨɨ a'achú cumu anxɨ́vica ɨ́ pan, teajta hua'apuaca ɨ́ hua'ité, ca'ɨ́n tej teja'uvé'enanan ɨ́ mej jɨ́n tiú'ucua'ani naíjmi'i. ―Ayee mú tiraata'ixaa. 14Majta a'ɨ́ɨme ɨ́ teteca, ayée mú ará'ase a'achú cumu anxɨ́j vi'ira'a. Aj pu i Jesús ayén tihua'utá'ixaa a'ɨ́mej ɨ́ mej jamuan á'ujujhua'ane'e tɨjɨ́n: ―Miche'e a'ujrá'ase ɨ́ teɨte, muáacua jetze mua'arástɨmé'e, méyee majta méyee. 15Matɨ́'ɨj mi miyen huarɨ́j. Majta ɨ́ teɨte, naími'i mú a'ujrá'aseca'a. 16Aj pu i Jesús, ra'ancuré'e'ɨ'ɨpɨ ɨ́ pan, ajta ɨ́ hua'ité. Aj pu i júte'e á'ujneereca'a. Rɨ́'ɨ pu tiraatá'a ɨ́ Dios. Ajta, a'utéjche tɨ ra'antítaaraxɨ'ɨn ɨ́ pan, ajta ɨ́ hua'ité. Aj pu i hua'utá'ɨ́'ɨpɨ'i a'ɨ́mej ɨ́ mej jamuan á'ujujhua'ane'e. Matɨ́'ɨj mi autéjhuii mej ha'uré'e'ɨ'ɨpɨite'en ɨ́ teɨte. A'atzu mú á'atee mej hua'uré'e'ɨ'ɨpɨite'esin ɨ́ pan, majta ɨ́ hua'ité. 17Naími'i mú tiú'ucuaa. Temua'a mú titéeju'uxai. Majta a'ɨ́ɨme ɨ́ mej Jesús jamuan á'ujujhua'ane'e, maúche'e majta te'evé'ejɨste'axɨ sicɨ́ri jetze me'ɨ́jna tɨ te'avá'aturaa. Ajta a'ɨ́ɨn ɨ́ sicɨ́ri, ayée pu te'ará'aseca'a a'achú cumu tamuáamuata'a japuan hua'apua. 18Ja'anáj pu ayén tiuju'urɨ́j. A'uu pu já'ahua'a Jesús téniuusime'e ruseɨ́j. A'ɨ́ɨ mú raseíjraca'a ɨ́ mej jamuan á'ujujhua'ane'e. Ayee pu tihua'uta'íhua'uri'i tɨjɨ́n: ―¿A'iné metí'ixa ɨ́ teɨte ja'atá nú'u ne pú'een inee? 19Ayee mú tiraata'ixaa tɨjɨ́n: ―Seica mú miyen ti'ixa tɨjɨ́n mú'ee pe nu'u pe'ɨ́n pú'een a'ɨ́jna ɨ́ Juan tɨ huá'amuaɨ'ɨhuacare'e. Majta seica miyen tɨjɨ́n mú'ee pe nu'u pe'ɨ́n pú'een a'ɨ́jna ɨ́ Elías tɨ ajmí'i seijre'eca'a. Majta seica miyen tɨjɨ́n seɨ́j pej nu'u a'itáraa huá'a jemi ɨ́ mɨ'ɨchite tɨ Dios jetze me'ecan tí'ixaxa'ata'a. 20Aj pu i ayén tihua'uta'íhua'uri'i tɨjɨ́n: ―Ari mú'een, ¿a'iné setí'imua'atze ja'atá ne pú'een? Ajta a'ɨ́ɨn ɨ́ Pedro, ayée pu tiraata'ixaa tɨjɨ́n: ―Mú'ee pe hui pe'ɨ́n pú'een ɨ́ Cɨríistu'u tɨ Dios án mú já'ujra ɨ́ ɨpuari japua. 21Ajta a'ɨ́ɨn ɨ́ Jesús, jeíhua pu huau'íjca mej nu'u caí ja'atɨ ixaate'e ja'atɨ tɨ pú'een. 22Ajta Jesús ayén tihua'utá'ixaa tɨjɨ́n: ―Ayee pu tiú'ujxe'eve'e ineetzi jemi, i nej neajta huá'a jetze airáane ɨ́ teɨte nej ni inee jeíhua rajpuaíitzi ná'ara'ani. Majta a'ɨ́ɨme ɨ́ hua'avaujsi, majta a'ɨ́ɨme ɨ́ mej tí'aijta u teyujta'a, majta a'ɨ́ɨme ɨ́ mej tí'imua'ata ɨ́ yu'uxari jetze tɨ Moisés ra'uyú'uxaca'a, naími'i mú hui netíti. Majta neejé'icatan. Ajta, tɨ́'ɨj teuumé'eca huaíca xɨcaj, na'itaméj huá'a tzajta'a ɨ́ mɨ'ɨchite nej ni ruuri ná'ara'ani. ―Ayee pu tihua'utá'ixaa. 23Tɨ'ɨj jí ayén tihua'utá'ixaa tɨjɨ́n: ―Tɨ́ pua'a ja'atɨ raxɨ́'eve'e tɨ á'uche'ecane'en nee jamuan, ayée pu ruxe'eve'e tɨ a'ɨ́ɨn amuacaícan mé rúurɨeni a'ij tɨ tí'ijxe'eve'e ɨ́ ru tzajta'a. Ajta á'iyen cha'a a'ɨ́ɨn huataúra'an tɨ́j na'a tɨ yú auca'itɨ́ a'ame tɨ ayén che'atá na'a tirajpuaíitzi á'ara'ani netɨ́j hui inee tirajpuaíitzi na'ame. Ché'e a'ɨ́ɨn ajta ayén huárɨni a'ij nej tí'iraxe'eve'e inee, tɨ́j na'a tɨ yú auca'itɨ́ a'ame. 24’Ayee pu'u, tɨ pua'a ja'atɨ a'ɨ́jna jɨ́n tí'itese'e tɨ nain tí'ijseɨre'en tɨ́j na'a pua'amé yen tí'iseijre'e tɨ́'ij ruxɨéehua chée á'ara'ani, aru tɨ pua'a ari huámɨ'ɨni, capu cha'a a'ij tiraatévaɨre'esin a'ɨ́jna tɨ tí'ijcha'ɨɨ. Ajta tɨ pua'a ja'atɨ huámɨ'ɨni a'ɨ́jna jɨme'e tɨ na'ará'astijre ineetzi, a'ɨ́ɨ pu xaa hui aúche'e rateuni ɨ́ ruxɨ́ejniu'uca tɨ auj ruurica'a. 25’Ahuii, ¿a'iné tejamuá'amitɨejte'e mú'ejmi? ¿A'iné ti'itɨ́j tiraatéva'ɨri ɨ́ ja'atɨ tɨ nain huamuá'itɨn tɨ ayén seijre'e íiyen chaanaca japua tɨ pua'a á'iyen yá'urɨeeni a'ɨ́jna ɨ́ ja'atɨ ɨ́ ruxɨ́ejniu'uca tɨ aúche'e ruurica'a? Capu hui a'atzu ti'itɨ́j a'ij tiraatéva'ɨri, tzɨ́te'e. 26’Tɨ́ pua'a ja'atɨ tí'itevi'ira'a ineetzi jemi na'ari tí'itevi'ira'a a'ij nej ti'ixa, inee i nej neajta huá'a jetze airáane ɨ́ teɨte, ayée nu hui che'atá nena'a tiu'utatévi'ira'ata ɨ́ jemin a'ájna xɨcájra'a nej jetzen yé ve'ecánejsin. ’Ayee nu tejá'amua'ixaate'e. A'ájna nu xaa yé ve'ecánejsin, neti'itevée nu na'ame ti'itɨ́j Rey jɨme'e. Ayee nu che'atá nain jɨ́n te'entínmua'aréere na'ame tɨ́j ɨ́ niyá'upua. Neajta nu huataseíjre'esin huá'a jamuan ɨ́ mej tí'ivaɨre'e ɨ́ ta japua. Huápɨ'ɨ pu hui naa seíire'e a'ame mej mi naa rɨ́'ɨ tína'utaseíj ɨ́ teɨte. 27’Ayee nu hui tejá'amua'ixaate'e tzáahuati'ira'a jɨme'e, seica mej yé huaté'uu ayajna, camúu xɨ cui'ini sino matɨ́'ɨj amuacaícan raseijran tɨ Dios tiu'uta'aíjta íiyen chaanaca japua. ―Ayee pu tihua'utá'ixaa a'ɨ́jna ɨ́ Jesús. 28Teuumé'eca a'achú cumu aráhuaica xɨcaj tɨ Jesús ayén tiu'utaxájtaca'a, aj pu i a'ɨ́mej a'uví'itɨ, a'ɨ́jna ɨ́ Pedro, ajta a'ɨ́jna ɨ́ Juan, ajta a'ɨ́jna ɨ́ Jacobo. Matɨ́'ɨj mi anticɨ́j ɨ́ jɨrí japua. Tɨ'ɨj jí Jesús a'utéjche tɨ huatéjniuuni. 29Tɨ́'ɨj auj téniuusime'e, aj pu i seɨcɨé huaújruu a'ɨ́jna ɨ́ Jesús ɨ́ runéerime jetze. Temua'a pu naa tiu'utécuainareca'a ɨ́ cɨ́ɨxure'ara'an. Ayee pu ti'itétaave'e cumu metémaxcava'ara. 30Matɨ́'ɨj mi hua'apua huataseíjre jamuan ɨ́ Jesús. A'ii mú me'ɨ́n pú'een, a'ɨ́jna ɨ́ Moisés teecan, ajta a'ɨ́jna ɨ́ Elías. 31Huápɨ'ɨ mú naa seijre'eca'a. Majta jamuan tí'ixajtaca'a a'ɨ́jna ɨ́ Jesús. A'ɨ́j mú jɨ́n tiú'urixaate'ecaa a'ɨ́jna ɨ́ tɨ jɨ́n araúrastejsin a'ájna Jerusalén, tɨ a'ɨ́ɨn huámɨ'ɨni a'ájna. 32Ajta a'ɨ́ɨn ɨ́ Pedro, majta ɨ́ mej hua'apua ɨ́ mej a'uté'uuca'a jamuan, jeíhua mú cu'utzícuca'a. Matɨ́'ɨj huájɨ, matɨ́'ɨj mi hua'useíj a'ɨ́mej ɨ́ teteca ɨ́ mej áa huaté'uuca'a jamuan ɨ́ Jesús. Majta raaseíj a'ij tɨ éene'e ɨ́ Jesús tɨ jeíhua huápɨ'ɨ naa seijre'eca'a. 33Matɨ́'ɨj meri á'ucɨɨnicu a'ujna tɨ a'utéjvee ɨ́ Jesús a'ɨ́ɨme mej hua'apua ɨ́ teteca, aj pu i ayén Pedro tiraata'ixaa tɨjɨ́n: ―Maestro, naa pu xɨ́'epɨ'ɨn tej yé huaté'uu. Tiché'e hui huaícaca huátaahuaa, ɨ́ ɨnaamua, seɨ́j tɨ mú'eetzi a'áa a'ame, ajta seɨ́j, Moisés tɨ ra'áa á'ara'ani, ajta seɨ́j, Elías tɨ ra'áa á'ara'ani. ―Ayee pu tiu'utaxájtaca'a a'ɨ́jna ɨ́ Pedro a'iné capu a'ij rá'amitɨejte'eca'a. 34Tɨ́'ɨj auj ti'ixáataca'a, aj pu i jaitɨri huataseíjre. Aj pu i huá'a jetze rájrupi. Tɨ́'ɨj huá'a jetze rájrupi, matɨ́'ɨj mi tiu'utátziɨn a'ɨ́ɨme ɨ́ mej Jesús jamuan á'ujujhua'ane'e. 35Tɨ'ɨj jí niuucari e'icánamuajre ɨ́ jaitɨri tzajta'a, ayén tɨjɨ́n: ―A'ii pu hui a'ɨ́ɨn pú'een ɨ́ niyauj, ɨ́ nej ra'antíhua'u. Setá'aj ráanamua. ―Ayee pu tiu'utaxájtaca'a. 36Tɨ́'ɨj ayén tiu'utaxájtaca'a, án pu a'utevée já'araa ruseɨ́j a'ɨ́jna ɨ́ Jesús. Majta a'ɨ́ɨme ɨ́ mej jamuan á'ujujhua'ane'e, a'ɨ́ɨ mú ru'uté'aa ɨ́ ru tzajta'a. Camu ja'atɨ huatá'ixaa a'ij mej tiu'uséij. 37Yee ruijmua'a yee, matɨ́'ɨj meri acáacɨ ɨ́ jɨrí japua, jeíhua mú teɨte ra'antinájcheca'a. 38Ajta seɨ́j pu a'utéveeca'a huá'a tzajta'a ɨ́ teɨte. A'ɨ́ɨ pu raatajé tɨjɨ́n: ―Maeestru, jeíhua nu hui muahuavii pej ya'utéeseij ɨ́ niyauj, a'iné a'ɨ́ɨ nu'u caj ti'ijyaúj. 39Xɨ́ejniu'ucari tɨ a'ij pua'a 'een, a'ɨ́ɨ pu hui rájviivi'i. A'ɨ́j pu jɨ́n, jeíhua rujíjhuave'e ɨ́ pa'arɨ'ɨ. Ajta jeíhua pu huá'aruri ratá'aca ɨ́ jetzen. A'ɨ́j pu jɨ́n, áijjaamɨxcue'ire'e ɨ́ rutene'e jetze. Cɨ́j pu'u tiratá'aca tɨ ruxɨéehua rɨ́'ɨ mé tejá'uche'ecane'en. Pu'uri rá'apua'ajte'esin. 40Nehuá'uhuaviiri'i hui ne'ɨ́mej ɨ́ mej á jamuan á'ujujhua'an mej raatamuárite'en tɨ tzajta'an seijre'e. Majta caí raayɨ́'ɨtɨhua'a. ―Ayee pu tiraata'ixaa a'ɨ́jna ɨ́ ja'atɨ. 41Ajta a'ɨ́ɨn Jesús, ayée pu tiu'utaniú: ―Mú'een mɨ sej iiji huáteemua, caxu hui té'atzaahuate'e, mɨ sej a'ij pua'a tí'iteteɨte. ¿A'achúni ruxe'eve'e nej a'ateevi'i mú'ejmi jemi nej ni rɨ́'ɨ amuáaruuren? Mé je'evé'evi'itɨchi mɨ pa'arɨ'ɨ. 42Tɨ́'ɨj auj e'evé'eme'ecaa, a'ɨ́ɨ pu tiyaaru'u ra'itárɨe á chuaata'a, ajta huá'aruri raatá'a. Aru a'ɨ́ɨn Jesús, a'ɨ́ɨ pu ra'ajté'axɨ ɨ́ tiyaaru'u. Aj pu i tiráahuaa ɨ́ pa'arɨ'ɨ. Ajta raatátui ɨ́ táàtajra'an. 43Majta naími'i mú naa rɨ́'ɨ tira'utaseíj a'ɨ́jna jɨme'e tɨ Dios ayén ráaruu a'ɨ́jna tɨ huápɨ'ɨ ruxe'eve'e. Matɨ́'ɨj mauj a'ij tejá'useijraca'a ɨ́ teɨte me'ɨ́jna jɨme'e a'ij tɨ Jesús huarɨ́j, ayée pu tihua'utá'ixaa a'ɨ́mej ɨ́ mej jamuan á'ujujhua'ane'e. 44Ayen tɨjɨ́n: ―Rɨ́'ɨ xu'u mú'een tiráanamua. Ayee pu hui tí'ineruuren ineetzi, i nej neajta huá'a jetze airáane ɨ́ teɨte. Avíitzi mú jɨ́n neetzi tiu'utátuiire'esin huá'a jemi ɨ́ teɨte. ―Ayee pu tihua'utá'ixaa. 45Majta me'ɨ́n ɨ́ mej jamuan á'ujujhua'ane'e, camu yaú'itɨée muá'araa a'ij tɨ huataújmua'a ɨ́ niuucari tɨ raataxájtaca'a a'ɨ́jna ɨ́ Jesús, sino huateúravaataca'a mej mi caí yaú'itɨée muá'ara'ani. Majta mú tí'itziɨɨne'eca'a. A'ɨ́j mú jɨ́n caí raata'íhua'uri'i me'ɨ́jna jɨme'e a'ij tɨ huataújmua'a. 46Ja'anáj pu ayén tiuju'urɨ́j. A'ɨ́ɨme ɨ́ mej Jesús jamuan á'ujujhua'ane'e, a'ɨ́ɨ mú autéjhuii mej tiú'ujeeve a'ɨ́jna jɨme'e yee a'atani jaítze'e ve'ecán jɨ́n ti'itéjvee iteen tej tamuáamuata'a japuan hua'apua ará'ase. 47Ajta a'ɨ́ɨn Jesús, a'ɨ́ɨ pu ramua'areereca'a a'ij mej tí'imua'ajca ɨ́ ru tzajta'a. Aj pu i pa'arɨ'ɨ avé'evi'itɨ. Tɨ́'ɨj i á vejli'i raatéjche a'u tɨ a'utéjvee. 48Aj pu i ayén tihua'utá'ixaa tɨjɨ́n: ―Ja'atɨ tɨ na'a tɨ ra'ancuré'evi'itɨn a'íjna i pa'arɨ'ɨ neniúucajtze'e, a'ɨ́ɨ pu hui ajta na'ancuré'evi'itɨn ineetzi. Ajta a'ɨ́ɨn tɨ na'ancuré'evi'itɨn ineetzi, a'ɨ́ɨ pu ajta ra'ancuré'evi'itɨn a'ɨ́jna tɨ tinaata'aíj. Ayee pu'u tí'een a'iné a'ɨ́jna tɨ jaítze'e cɨ́lieene'en jɨ́n ti'itéjvee mú'ejmi mɨ sej nee jamuan á'ujujhua'an, ɨ́ Dios jemi, a'ɨ́ɨ pu hui jaítze'e ve'ecán jɨ́n ti'itéjvee caí máàj ja'atɨ. ―Ayee pu tihua'utá'ixaa a'ɨ́jna ɨ́ Jesús. 49Ajta a'ɨ́ɨn ɨ́ Juan, ayée pu tiraata'ixaa tɨjɨ́n: ―Maeestru, ja'atɨ tu a'uséij tɨ huá'amuarite'eca'a ɨ́ tiyáaru'use mej huá'a tzajta'a seijre'e ɨ́ teɨte. Aniúucajtze'e pu jɨ́n huá'amuarite'eca'a. Teajta iteen, teen tu hui raatá'ijmɨijri'i tɨ caí ayén rɨjcaa, a'iné capu téjmi jetze ajtéme'ecan. 50Tɨ'ɨj jí ayén tiraata'ixaa a'ɨ́jna ɨ́ Jesús tɨjɨ́n: ―Caxu rá'ijmɨijra, a'iné ja'atɨ tɨ na'a tɨ caí a'ij á'amuaruure, a'ɨ́ɨ pu xaa á'amuavaɨre'e. ―Ayee pu tihua'utá'ixaa. 51Tɨ́'ɨj ari vejli'itaca'a tɨ teja'uré'enejsin a'ájna xɨcájra'a tɨ jetzen Dios rá'avi'itɨn ɨ́ ta japua, Jesús pu raaxɨ́'epɨ'ɨntare nain jɨme'e tɨ a'uun a'ujnén ánti Jerusalén. 52Seica pu huata'íteca'a mej mi amuacaí a'ujnén. Aa mú a'ará'a chajta'a a'u mej a'uchéjme a'ɨ́ɨme ɨ́ Samaria tɨ é'eme'ecan. A'uu mú a'atanéj mej mi rɨ́'ɨ tiú'uruuren a'u mej ará'aiixa. 53Majta a'ɨ́ɨme ɨ́ mej a'uun é'echejca'a, camu ra'ancuré'evi'itɨ me'ɨ́jna ɨ́ Jesús, a'iné mu'uri ramua'areereca'a tɨjɨ́n Jerusalén pu a'ujnéjsin. 54Majta a'ɨ́ɨme ɨ́ mej hua'apua, a'ɨ́jna ɨ́ Jacobo, ajta a'ɨ́jna ɨ́ Juan, matɨ́'ɨj ráamua'areeri'i, ayée mú tiraata'íhua'uri'i me'ɨ́jna ɨ́ Jesús tɨjɨ́n: ―Tavastara'a, ¿a'iné hui petí'ijxe'eve'e tej ti tiyen huárɨni? ¿Ni teraata'áijte'en ɨ́ Dios tɨ júte'e ye'icáxɨre'en ɨ́ taij tɨ jɨ́n huá'ucui'ini naíjmi'ica, matɨ́j mena'a ayén mej huachéjme? ―Ayee mú tiraata'íhua'uri'i. 55Aj pu i Jesús pɨ́ a'uré'eve. Aj pu i hua'ajté'axɨ. Aj pu i ayén tihua'utá'ixaa tɨjɨ́n: ―Ca xu hui ramua'aree ti'itɨ́j tɨ xɨéjniu'ucare'ara'an ayén ca'aníjra'a tejamuaatá'aca sej si siyen tiu'utaxáj. 56A'iné inee, i nej neajta huá'a jetze airáane ɨ́ teɨte, canu hui ne'ɨ́jna jɨ́n mú a'uvé'emej nej ni hua'antipuá'ajte'en ɨ́ teɨte, sino a'ɨ́j nu jɨ́n mú a'uvé'emej nej ni hua'irájtuaani. ―Ayee pu tihua'utá'ixaa. Majta a'ucɨ́j. Majta seɨ́j chajta'a jetze a'atanéj. 57Matɨ́'ɨj mauj huajú'ucaa ɨ́ juye jetze, seɨ́j pu ayén tiraata'ixaa tɨjɨ́n: ―Nee nu hui á jamuan a'umé'e na'ame a'u tɨ na'a pe á'ume. 58Jesús pu ayén tiu'utaniú tɨjɨ́n: ―A'ɨ́ɨme ɨ́ arachuíjse, a'úu mú hui u'uche a'u tɨ aucúcu'unijmee. Majta a'ɨ́ɨme ɨ́ pina'ase, pi'ista jetze mú tiú'uritu'aate. Mɨ́ neajta inee, i nej neajta huá'a jetze airáane ɨ́ teɨte, canu huatéechi'i a'u nej a'utácuti. 59Jesús pu seɨ́j huata'áij ɨ́ tevi tɨjɨ́n: ―Patá'aj á'uche'ecane'en nee jamuan. Ajta a'ɨ́ɨn teáata'a, ayée pu tiraata'ixaa tɨjɨ́n: ―Niche'e ne'u yé huatácati ajta caí huámɨ'ɨni ɨ́ nitáàta nej ni ra'avá'anan a'ij tej tí'ijrɨ'ɨre iteen. Aj nu xaa á jamuan á'uche'ecane'e na'ame. 60Jesús pu ayén tiraata'ixaa tɨjɨ́n: ―Miche'e me'ɨ́n ra'avá'anan ɨ́ mɨ'ɨchi a'ɨ́ɨme ɨ́ hua'axɨ́'ej mɨ'ɨchite me'ɨ́jna jɨme'e ɨ́ mej caí ramua'ate ɨ́ Dios. Pajta mú'ee, aricu á'ura'a pej pi ɨ́ niuucari hua'utá'ixaate'en tɨ jɨ́me'en raxa ɨ́ Dios tɨ nainjapua tí'aijta. ―Ayee pu tiraata'ixaa a'ɨ́jna ɨ́ Jesús. 61Ajtahua'a seɨ́j pu ayén tiraata'ixaa tɨjɨ́n: ―Nevástara'a, nee nu hui á jamuan á'uche'ecane'e na'ame, aru nauj mi'i u a'atanén ne é'eche nej ni hua'utateújte'en ɨ́ ne'ihuaamua'a, neajta ɨ́ nevaújsimua'a. 62Ayee pu tiu'utaniú a'ɨ́jna ɨ́ Jesús tɨjɨ́n: ―A'ɨ́jna ɨ́ ja'atɨ tɨ a'utéjche tɨ tí'imuarɨ'e, tɨ pua'a ari já'ita'a umé'eca ajta raatéxɨeehua, a'ɨ́ɨ pu hui caí ti'itɨ́j vaɨre'e jemin ɨ́ Dios tɨ nainjapua tí'aijta.

will be added

X\