San Lucas 8

1Tɨ́'ɨj ayén tiuju'urɨ́j, a'úu pu á'uche'ecane'e tɨ́j na'a a'uun mej a'uchéjme ɨ́ chajta'a jetze, ajta a'ɨmuá mej a'uchéjme. Jesús pu tihuá'u'itɨiiri'i a'ɨ́jna ɨ́ niuucari ɨ́ mej jɨ́n huataújtemua'ave'esin, tɨ jɨ́me'en raxa ɨ́ Dios tɨ nainjapua tí'aijta. Majta mú á'ujujhua'ane'e a'ɨ́ɨme ɨ́ mej tamuáamuata'a japuan hua'apua ará'ase. 2Majta seica jamuan á'ujujhua'ane'e mé 'uuca, ɨ́ tɨ Jesús tihuá'uhuaa, ajta a'ɨ́ɨme ɨ́ tɨ huá'a jetze tiyáaru'use huatamuári. A'ii mú a'ɨ́ɨn pú'een a'ɨ́jna ɨ́ María, mej miyen ratamuá'amua tɨjɨ́n Magdala tɨ é'eme'ecan. A'ɨ́jna jetze ɨ́ 'ɨ́ita'a, a'ɨ́j mú jetze huiráacɨ ɨ́ tiyáaru'use ɨ́ mej aráhua'apua ará'ase. 3Seɨ́j pu ajta á'uche'ecane'e tɨ ayén ántehuaa tɨjɨ́n Juana, ɨ́ra'ara'an pu pú'een a'ɨ́jna ɨ́ Chuza, ɨ́ tɨ ti'itéjvee ɨ́ Heródes jemi. Ajtahua'a seɨ́j, a'ɨ́jna ɨ́ Susana, majta jeíhua, mé mu'iitɨ́ mej jamuan á'ujujhua'ane'e. A'ɨ́ɨ mú majta ravaɨre'eca'a me'ɨ́jna ɨ́ Jesús, majta a'ɨ́mej ɨ́ seica ɨ́ mej tamuáamuata'a japuan hua'apua ará'ase me'ɨ́jna jɨme'e ɨ́ mej tí'ijcha'ɨɨca'a a'ɨ́mej ɨ́ 'uuca. 4Majta ɨ́ teɨte mej a'ɨmuá a'uchéjme, maúche'e mú ajteáxɨɨrijme'ecaa. A'uu mú a'arácɨ'ɨca'a seɨ́j chajta'a jetze, ajtahua'a seɨ́j, ajtahua'a seɨ́j. Matɨ́'ɨj mauj e'evé'ecɨ́'ɨca'a, Jesús pu ayén tiu'utámuaritaca'a tɨjɨ́n: 5―Ja'atɨ tɨ nu'u hui tí'ihuastehua'a, u pu nu'u á'ume tɨ tejé'ehuaste'en. Aa pu aumé'ecaa ratáhua'anáa ɨ́ imue'eri. Seica pu nu'u juye jetze huavatzɨ́jraa. Matɨ́'ɨj mi japuan huachéecajraa a'ɨ́ɨme ɨ́ teɨte. Majta pina'ase, júte'ɨmua mú a'icára'arave'e. Aa ma'uráaseajrá'a meráacuaa. 6’Ajta seica ɨ́ imue'eri, a'úu pu nu'u hui huavatzɨ́jraa tetej tzajta'a. Tɨ́'ɨj ajneájxɨ, aj pu i huaré'ataa ɨ́ xɨcaj jɨme'e a'iné capu huarɨéenajye'icaa. 7’Ajta seica ɨ́ imue'eri, a'úu pu nu'u huavatzɨ́jraa a'u tɨ a'utzícare'eme. Ajta a'ɨ́ɨn ɨ́ tzicare'e, a'ɨ́ɨ pu nu'u huavaújse jamuan ɨ́ imue'eri. Capu tiu'utá'a ɨ́ imue'eri tɨ te'ejneájxɨ'ɨn. 8’Ajta seica ɨ́ imue'eri, áa pu nu'u huavatzɨ́jraa a'u tɨ a'urɨ́'en ɨ́ chuej. Naími'i pu hui huanéj. Jéihua pu nu'u tiú'ucɨɨreca'a. Jéihua pu jaítze'e airájraa caí ɨ́ seica tɨ raahuáste. ―Ayee pu tihua'utá'ixaa a'ɨ́jna ɨ́ Jesús. Tɨ́'ɨj raatapuá'ajtaca'a tɨ tiu'utaxájtaca'a, aj pu i ayén tihua'utá'ixaa ca'anín jɨme'e, tɨjɨ́n: ―Mɨ́ sej huiteánajca'amua, xáanamuajri'i hui temua'a naa. Yee pu'u. 9Majta a'ɨ́ɨme ɨ́ mej jamuan á'ujujhua'ane'e, a'ɨ́ɨ mú raata'íhua'uri'i a'ij tɨ huataújmua'a a'ɨ́jna ɨ́ niuucari tɨ raatamuáritaca'a. 10Ayee pu tihua'utá'ixaa tɨjɨ́n: ―Dios pu amuaatá'a sej yaú'itɨée xa'araa ɨ́ tɨ rú'avaa ɨ́ Dios jemi a'ɨ́jna jɨme'e a'ij tɨ a'ɨ́ɨn tí'aijta. Mɨ́ ajta ɨ́ seica, canu hui e'ehuauritɨéecan jɨ́n tihua'utá'ixaate'esin, sino chuijtari nu'u jɨ́me'en tihua'utá'ixaate'esin tɨ ij ayén tihuá'uruuren a'ij tɨ té'eyu'usi'i tɨjɨ́n: Mú'een xu nu'u xaa mé uunéjne'eri xá'aju'un. Aru, caxu ti'itɨ́j seijran. Mú'een xu xaa ranamua. Aru caxu hui yaú'itɨée xá'aju'un. 11’A'ɨ́jna ɨ́ niuucari nej raataxájtaca'a, ayée pu hui huataújmua'a. Ɨ́ imue'eri, ayée pu 'een tɨ́j ɨ́ niuucari tɨ Dios jemi é'eme'ecan. 12’Ajta ɨ́ imue'eri tɨ huavatzɨ́jraa juye jetze, ayée pu 'een matɨ́j a'ɨ́ɨme ɨ́ mej ranamua ɨ́ niuucari tɨ Dios jemi é'eme'ecan. Ajta a'ɨ́ɨn tiyaaru'u, a'ɨ́ɨ pu hui a'ure'enén, tihuá'ari'ira ɨ́ niuucari tɨ huá'a tzajta'a huateájturaa. Ayee pu rɨcɨ mej mi caí rá'antzaahuate'en, tɨ ij caí Dios hua'irájtuaani. 13’Ajta a'ɨ́jna ɨ́ tɨ tetej tzajta'a huavatzɨ́jraa, ayée pu hui 'een matɨ́j a'ɨ́ɨme ɨ́ mej huataújtemua'ave matɨ́'ɨj amuacaí ráanamuajri'i. Mɨ́ majta a'ɨ́ɨme, camu a'atzu té'eviicua'i. A'atzu mú á'atee mej té'atzaahuate'e. Aru tɨ́'ɨjtá teja'ure'enén a'ájna xɨcájra'a mej jetzen tirajpuaíitzi, camu cha'a te'utáviicua'i. Ca'anacan mú mé rúujɨsin. 14’Ajta a'ɨ́jna ɨ́ imue'eri tɨ a'uun huavatzɨ́jraa tzicare'e tzajta'a, ayée pu hui 'een matɨ́j a'ɨ́ɨme ɨ́ mej ranamua ɨ́ niuucari. Aru a'ɨ́ɨme, ɨ́ mej mauj yen huaté'uu íiyen chaanaca japua, jé'ecan mú a'ij té'ujmua'ate me'ɨ́jna jɨme'e ɨ́ tɨ huá'amuarɨ'eriste'e na'ari a'ɨ́jna jɨme'e ɨ́ mej jeíhua tí'ijcha'ɨɨ ca'ɨ́n a'ɨ́jna jɨme'e ɨ́ tɨ hua'aráanajche tɨ naa seijre'e. A'ɨ́j pu jɨ́n camu araúraste mej jeíhua rɨ́'ɨ tiu'utátuiire'en ɨ́ Dios jemi. 15’Ajta a'ɨ́jna ɨ́ imue'eri tɨ a'uun nu'u huavatzɨ́jraa ɨ́ chuej japua a'utɨ́ a'urɨ́'en, ayée pu 'een tɨ́j a'ɨ́ɨme ɨ́ mej urarɨ́'ene'ejme ɨ́ ru tzajta'a, majta á'ujca'ane ruxɨ́'evi'ira'a jɨme'e tɨ Dios hua'uta'aíj nain jɨme'e. A'ɨ́ɨ mú hui ranamua ɨ́ niuucari, majta ru'uté'an ɨ́ ru tzajta'a. Majta te'utáviicua'i. Ayee mú 'een jɨ́n huarɨ́n, jeíhua mú rɨ́'ɨ tiu'utátuiire'esin ɨ́ Dios jemi. 16’¿A'iné tejamuá'amitɨejte'e mú'ejmi a'ɨ́jna jɨ́me'en ɨ́ ja'atɨ tɨ hui aparaatu ti'itɨ́j tícha'ɨɨ? Tɨ́'ɨj rá'ajtaira, ¿a'uné jetze iyé'eruuren? ¿Ni qui xa'ari tzajta'a ruutéchajtza na'ari caama jete ye'iráchajtza? Capu xaa ne'u. Ja'atɨ tɨ na'a án pu ɨmuá ya'ujchájtza mej mi atáneere ɨ́ taij jɨme'e ɨ́ mej a'uteáru'ipi. 17Ajta, naíjmi'i tɨ́j na'a mej avíitzi'i jɨ́n miyen rɨcɨ ɨ́ teɨte, capu hui ayén éene'e a'ame. A'ɨ́ɨ mú xaa hui ramua'aréeren tɨ́'ɨj Dios mé jéjre'e raataseíjrata. 18’Rɨ́'ɨ xu'u mú'een sej si temua'a naa tiráanamua, a'iné tɨ pua'a ja'atɨ ti'itɨ́j tícha'ɨɨ ɨ́ Dios jemi, Dios pu jaítze'e tiraatá'asin. Ajta a'ɨ́ɨn tɨ caí ti'itɨ́j tícha'ɨɨ ɨ́ Dios jemi, Dios pu hui rá'ari'ira a'ɨ́jna ɨ́ tɨ ayén tirá'amitɨejte'e tɨ nu'u tí'ijcha'ɨɨ. ―Ayee pu tihua'utá'ixaa a'ɨ́jna ɨ́ Jesús. 19Ajta a'ɨ́ɨn náànajra'an ɨ́ Jesús, majta ihuáamua'ame'en, a'ɨ́ɨ mú e'iré'ene mej mi raaseíj. Aru, capu huatárɨ'ɨristareca'a mej ajteáxɨɨre á vejli'i jemin a'iné jeíhua mú teɨte aité'uuca'a tá'apueerta. 20Ja'atɨ pu ayén tiraata'ixaa a'ɨ́jna ɨ́ Jesús tɨjɨ́n: ―Mé pua'acɨé mú a'uté'uu a'anáàna, majta a'ihuáamua'a. Méjxe'eve'e mej muaaseíj. 21Ajta a'ɨ́ɨn Jesús, ayée pu tiu'utaniú tɨjɨ́n: ―A'ii mú hui a'ɨ́ɨn pú'een ɨ́ nináàna, majta ɨ́ ne'ihuaamua'a, a'ɨ́ɨme ɨ́ mej ranamua ɨ́ niuucari tɨ Dios jemi é'eme'ecan, majta miyen rɨ́'ɨ tirá'astijre'e a'ij tɨ tiú'ujxe'eve'e. ―Ayee pu tihua'utá'ixaa a'ɨ́jna ɨ́ Jesús. 22Ja'anáj tɨ ayén tiuju'urɨ́j. Jesús pu ayén tihua'utá'ixaa a'ɨ́mej ɨ́ mej jamuan á'ujujhua'ane'e tɨjɨ́n: ―Tiché'e antácɨɨne u jetze pújme'en a'u tɨ a'alaguun. Matɨ́'ɨj mi atéecɨ ɨ́ baarcu jetze. Matɨ́'ɨj mi a'ucɨ́j. 23Maúche'e mú jaj japua huajú'ucaa, tɨ'ɨquí huatácu a'ɨ́jna ɨ́ Jesús. Tɨ'ɨj jí huatá'eecareca'a, ajta jeíhua pu ateáxɨjrihua'a ɨ́ jaj ɨ́ baarcu jetze. Mu'uri tɨ́n a'ucárutijme'e. 24Majta a'ɨ́ɨme ɨ́ mej jamuan á'ujujhua'ane'e, a'ɨ́ɨ mú ya'ujɨ́ste a'ɨ́jna ɨ́ Jesús. Ayee mú tiraata'ixaa tɨjɨ́n: ―Maeestru, Tu'uri hui tɨ́n á'ajamɨn. Ajta a'ɨ́ɨn Jesús, a'ɨ́ɨ pu ájchee. Tɨ'ɨj jí raatá'ijmɨijri'i ɨ́ eeca, ajta japuutzari tɨ tiújta'ahua'a. Jɨ́me'en pu'u raatá'ijmɨijri'i, aj pu i huateápua'areca'a. Tɨ'ɨj jí naa hua'é'ene'e já'araa. 25Tɨ'ɨj jí ayén tihua'uta'íhua'uri'i a'ɨ́mej ɨ́ mej jamuan á'ujujhua'ane'e tɨjɨ́n: ―¿A'iné 'een jɨ́n secaí té'atzaahuate'e? Ajta a'ɨ́mej jemi, jé'ecan utéevatzɨ ɨ́ huá'a tzajta'a. Jé'ecan mú majta a'ij pua'a tira'utaseíj. Ayee mú tí'iru'ihua'uraca'a tɨjɨ́n: ―¿Ti'itáani tévira'a pú'een amɨ́jna? A'ɨ́ɨ pu hui tihuá'aijte'e ɨ́ eeca, ajta ɨ́ jaj, majta hui rá'antzaahua. 26Matɨ́'ɨj antacɨ́j, a'úu mú a'ará'a a'úu tɨ huatacá'a u Gadara. U jetze pújme'en tɨ é'eseijre'e u Galilea. 27Tɨ'ɨj jí Jesús a'itáraa ɨ́ baarcu jetze. Aj pu i seɨ́j ra'antinájcheca'a. A'uu pu é'eme'ecan ɨ́ chajta'a jetze a'ɨ́jna ɨ́ ja'atɨ. Tiyáaru'use pu tzajta'an seijre'e. Pu'uri á'atee tɨ caí ti'itéchejca'a a'ɨ́jna ɨ́ ja'atɨ. Capu ajta chi'ij jetze chejca'a. A'uu pu'u e'echéjme'e a'u mej mɨ'ɨchite e'evé'enaamuaca. 28Tɨ́'ɨj raaseíj a'ɨ́jna ɨ́ Jesús, án pu e'erájve ɨɨcájra'an jetze ɨ́ Jesús. Jé'ecan pu huajíjhuaca'a a'ɨ́jna ɨ́ ja'atɨ. Aj pu i ayén tiraatajé ca'anín jɨme'e tɨjɨ́n: ―¿A'iné ti'itɨ́j peteáruuren ineetzi jemi, Jesús, ɨ́ pej yaujra'an pɨ́rɨcɨ ɨ́ Dios tɨ ta japua é'eseijre'e? Ayee nu hui tí'imuahuavii. Capej hui puaíjtzi neetá'acare'en. 29Ayee pu a'ɨ́ɨn ja'atɨ tiraatáhuaviiri'i a'ɨ́jna ɨ́ Jesús a'ɨ́jna jɨme'e tɨ a'ɨ́ɨn Jesús ari tiraata'aíj a'ɨ́jna ɨ́ tiyaaru'u tɨ nu'u huiirájra'ani ɨ́ tevi jetze. Mu'íi pu tiyaaru'u raatéevi'i a'ɨ́jna ɨ́ ja'atɨ. Majta a'ɨ́ɨme ɨ́ teɨte ɨ́ mej a'uun e'echéjme'e, a'ɨ́ɨ mú ra'amuájɨ'ɨquihua'a muájca'are'ara'an jetze, majta ru'ɨ́ɨca jetze alaambre jɨme'e. Matɨ́'ɨj mi raaté'avaata. Ajta a'ɨ́ɨn ɨ́ tevi, tɨ́'ɨj pɨ́ na'a pu rajtzá'ana'a ɨ́'alaambre, ajta mé iyaúuruti a'u tɨ caí é'e ti'itɨ́j a'iné tiyaaru'u pu tzajta'an seijre'eca'a. 30Tɨ'ɨj jí Jesús ayén tiraata'íhua'uri'i tɨjɨ́n: ―¿A'iné pua'antehuaa mú'ee? Ayee pu tiu'utaniú a'ɨ́jna ɨ́ ja'atɨ tɨjɨ́n: ―I tej sei vi'ira'a ará'ase. Ayee pu tiraata'ixaa a'ɨ́jna jɨme'e ɨ́ mej mu'iitɨ́ tzajta'an seijre'e ɨ́ tiyáaru'use. 31Majta a'ɨ́ɨme ɨ́ tiyáaru'use, jeíhua mú rájhuaviiri'i a'ɨ́jna ɨ́ Jesús tɨ 'ij a'ɨ́ɨn caí hua'uta'íte mej á'ucɨɨne tɨ e'etécun a'u mej á'anami'i ɨ́ tiyáaru'use. 32Majta á vejli'i, ɨ́ tuiixu é'ecɨɨne, áa mú tejá'ucua'anen jɨrí jetze. Majta a'ɨ́ɨme tiyáaru'use, ayée mú tiraatáhuaviiri'i me'ɨ́jna ɨ́ Jesús tɨ hua'utá'an mej mi ɨ́ tuiixu tzajta'a a'uteárute. Aj pu i hua'utá'a. 33Matɨ́'ɨj huiráacɨ ɨ́ tevi jetze, matɨ́'ɨj mi a'uruáachejraa ca'anín jɨme'e. Matɨ́'ɨj mi a'uteájrupi ɨ́ ɨ́ tuiixu tzajta'a. Majta me'ɨ́n ɨ́ tuiixu a'uruáachejraa. Matɨ́'ɨj mi ancáavatzɨ a'u tɨ e'encátee. Matɨ́'ɨj mi áata'a atéevatzɨ. Matɨ́'ɨj mi a'ujámɨ. 34Majta a'ɨ́ɨme ɨ́ mej huá'acha'ɨɨca'a ɨ́ tuiixu, matɨ́'ɨj raaseíj a'ij tɨ ti'itɨ́j huarɨ́j, a'ɨ́ɨ mú a'uruáachejraa. Matɨ́'ɨj mi hua'utá'ixa ɨ́ teɨte chajta'a mé é'eche, majta a'ɨmuá mej a'uchéjme a'ij tɨ ti'itɨ́j huarɨ́j. 35Matɨ́'ɨj mi a'ɨ́ɨme ɨ́ teɨte, a'úu mú e'iré'ene mej mi raaseíj. Matɨ́'ɨj a'uun e'iré'ene a'u tɨ Jesús a'utéveeca'a, a'úu mú yá'uteu a'ɨ́jna ɨ́ ja'atɨ ɨ́ mej jetzen huiráacɨ a'ɨ́ɨme ɨ́ tiyáaru'use. A'uu pu a'utácatii ɨ́ Jesús jemi. Pu'uri ti'itéchejca'a. Capu ché'e rutɨ́mua'iraca'a. Matɨ́'ɨj mi tiu'utátziɨn temua'a jeíhua. 36Majta a'ɨ́ɨme ɨ́ mej raaseíj, a'ɨ́ɨ mú tihua'utá'ixaa ɨ́ teɨte a'ij tɨ Jesús tiráahuaa a'ɨ́jna ɨ́ ja'atɨ tiyáaru'use mej tzajta'an seijre'eca'a. 37Matɨ́'ɨj mi naími'i ɨ́ mej a'uun a'uchéjme tɨ́j na'a tɨ a'uun huatacá'a u Gadara, a'ɨ́ɨ mú rájhuaviiri'i a'ɨ́jna ɨ́ Jesús, tɨ nu'u á'ura'ani a'iné jeíhua mú tiu'utátziɨn. A'ɨ́j pu jɨ́n Jesús ateájraa ɨ́ baarcu jetze. Tɨ'ɨj jí á'uraa. 38Ajta a'ɨ́ɨn ɨ́ ja'atɨ tiyáaru'use mej jetzen huiráacɨ, jeíhua pu rájhuaviiri'i a'ɨ́jna ɨ́ Jesús tɨ raatá'an tɨ jamuan á'ura'ani. Mɨ́ ajta i caí, capu raatá'a tɨ jamuan á'ura'ani. 39Ayee pu tiraata'ixaa tɨjɨ́n: ―Patá'aj hui huaré'ara'ani a'u pej é'eche patá'aj hua'utá'ixaate'en a'ij tɨ muáaruu ɨ́ Dios, a'ɨ́jna jɨme'e tɨ huápɨ'ɨ ruxe'eve'e. Aj pu i á'uraa a'ɨ́jna ɨ́ ja'atɨ. Tɨ'ɨj jí nainjapua tɨ́j na'a a'uun tɨ huatacá'a ɨ́ chajta'a jetze, a'ɨ́ɨ pu hua'utá'ixa a'ij tɨ ti'itɨ́ ráaruu tɨ huápɨ'ɨ ruxe'eve'e a'ɨ́jna ɨ́ Jesús. 40Tɨ́'ɨj Jesús a'uré'araa yú jetze pújme'en, jeíhua mú teɨte ra'ancuré'evi'itɨ. Muaateújtemua'ave a'iné a'ɨ́ɨ mú rachú'eve'eca'a. 41- 42Jɨ́me'en pu'u Jesús a'uun a'ará'a, aj pu i seɨ́j ɨ́ ja'atɨ é'ejtunutaca'a á vejli'i jemin ɨ́ Jesús. Ayee pu ántehuaa tɨjɨ́n Jairo. A'ɨ́ɨ pu tí'aijta u teyujta'a. Tɨ'ɨj jí a'ɨ́ɨn raatáhuaviiri'i tɨ Jesús a'uré'enen jemin chajnan a'iné pu'uri nu'u á'ame'ere ɨ́ yaujra'an. Ajta, a'ɨ́ɨ pu'u caj pɨ́tí'ijyauj, ɨ́iitacan. Ajta a'ɨ́jna ɨ́ yaujra'an, ayée pu rájcha'ɨɨ a'achú cumu tamuáamuata'a japuan hua'apua nine'ira'a. Tɨ'ɨj jí Jesús á'uraa jamuan. Majta ɨ́ teɨte, jeíhua mú ajteáxɨɨreca'a jemin. Temua'a mú tité'ecataca'a. 43Ajta a'ɨ́ɨn 'ɨ́ita'a, áa pu ajta a'utéveeca'a. Pu'uri á'atee a'achú cumu tamuáamuata'a japuan hua'apua nine'ira'a tɨ ayén a'ɨ́jna jɨ́n tí'icui'i a'ɨ́jna jɨme'e tɨ tí'ira'asecare'e ɨ́ xúure'e. Capu mé'e a'atɨ́jca'a tɨ raayɨ́'ɨtɨhua'a tɨ tiráahuaate'en. 44Tɨ'ɨj jí a'ɨ́ɨn 'ɨ́ita'a, huarita'an a'uré'ene. Aj pu i ra'ajtamuárɨej ɨ́ cɨ́ɨxure'ara'an jetze. Jɨ́me'en pu'u ra'ajtamuárɨej, aj pu i huateápua'areca'a tɨ uvé'emɨ'ɨye ɨ́ xúure'e. 45Tɨ'ɨj jí Jesús ayén tihua'uta'íhua'uri'i tɨjɨ́n: ―¿A'ataani hui na'ajtamuárɨej? Naími'i mú miyen tiu'utaniú tɨjɨ́n: ―Canu nee. Matɨ́'ɨj miyen tiu'utaxájtaca'a, a'ɨ́jna ɨ́ Pedro, a'ɨ́ɨ pu ayén tiraata'ixaa tɨjɨ́n: ―Maeestru, jeíhua mú ajteáxɨɨri ɨ́ teɨte mú'eetzi jemi. Majta á'ujtajche. 46Mɨ́ ajta a'ɨ́ɨn Jesús, ayée pu tiu'utaxájtaca'a tɨjɨ́n: ―Ja'atɨ pu xaa na'ajtamuárɨej. Nee nu hui ráamua'areeri'i tɨ́'ɨj nemuárɨ'eri'ira'a huirájraa. ―Ayee pu tiu'utaxájtaca'a a'ɨ́jna ɨ́ Jesús. 47Ajta a'ɨ́ɨn ɨ́ 'ɨ́ita'a, a'ɨ́ɨ pu ráamua'areeri'i tɨ caí rɨ'ɨrí tɨ huateúravaa. Tɨ'ɨj jí e'iré'ene. Ruvivée. Aj pu i é'ejtunutaca'a jemin ɨ́ Jesús. Tɨ'ɨj jí ayén tiu'utaxájtaca'a a'iné 'een jɨ́n ra'ajtamuárɨej mé jéjre'e mejseíiraca'a ɨ́ teɨte. Ajta ayée pu tiu'utaxájtaca'a a'ɨ́jna jɨme'e tɨ huarúj. 48Aj pu i Jesús ayén tiraata'ixaa tɨjɨ́n: ―Niyauj, pepu'uri hui huarúj pe'ɨ́jna jɨme'e pej té'atzaahuate'e. Aricu, á'ura'a axɨéehua. 49Aúche'e pu ti'ixáataca'a tɨ́'ɨj seɨ́j e'iré'ene tɨ huá'a jetze ajtéme'ecan ɨ́ mej a'uun é'eche ɨ́ Jairo jemi, a'ɨ́jna tɨ tí'aijta u teyujta'a. Ayee pu tiraata'ixaa tɨjɨ́n: ―Pu'uri huamɨ́'ɨ ayauj. A'ɨ́j pej hui jɨ́n caí cha'a tira'antiú'uuni'ira'an mɨ maestro. 50Tɨ́'ɨj Jesús ayén tiráanamuajri'i, ayée pu tiraata'ixaa a'ɨ́jna ɨ́ Jairo tɨjɨ́n: ―Capej tí'itziɨɨne'e. Patá'aj té'antzaahuate'en pena'a. Aúche'e pu hui rujni. ―Ayee pu tiraata'ixaa. 51Matɨ́'ɨj mi a'ucɨ́j. Matɨ́'ɨj me'uun a'ará'a Jairo tɨ é'eche. Matɨ́'ɨj me'uun a'uré'ene, capu hua'utá'a ɨ́ teɨte mej a'uun a'uteárute u chi'ita. A'ɨ́mej pu'u huatá'a a'ɨ́jna ɨ́ Pedro, ajta a'ɨ́jna ɨ́ Juan, ajta a'ɨ́jna ɨ́ Jacobo. Ajta a'ɨ́ɨme ɨ́ vaújsimua'ame'en ɨ́ tɨ huamɨ́'ɨ, a'ɨ́mej pu ajta huatá'a. 52Majta me'ɨ́n ɨ́ teɨte á pua'acɨé mej a'uté'uuca'a, naími'i mú ca'anín jɨ́n ruyeineca'a. Máujxɨeemɨste'ecaa micu. Ajta a'ɨ́ɨn Jesús, ayée pu tihua'utá'ixaa tɨjɨ́n: ―Caxu ruyeine. Capu hui mɨ'ɨchi. Cutzú pu'u. 53Matɨ́'ɨj mi raate'atzeájraa a'iné méjmua'areereca'a tɨjɨ́n huamɨ́'ɨ. 54Tɨ'ɨj jí Jesús ra'ajtamuárɨej ɨ́ pa'arɨ'ɨ ɨ́ muájca'are'ara'an jetze. Ayee pu tiraata'ixaa tɨjɨ́n: ―Niyauj, ájchesi. 55Tɨ'ɨj jí xɨéjniu'ucare'ara'an huaré'araa ɨ́ jemin. Jɨ́me'en pu'u huaré'araa ɨ́ jemin, aj pu i ájchee. Tɨ'ɨj jí Jesús ayén tíhua'uta'aíj ɨ́ vaújsimua'ame'en mej nu'u tiraamín. 56Jé'ecan mú naa rɨ́'ɨ tira'utaseíj ɨ́ vaújsimua'ame'en. Ajta a'ɨ́ɨn Jesús, a'ɨ́ɨ pu hua'utá'ijmɨijri'i mej caí ja'atɨ ixaate'e a'ij tɨ ti'itɨ́j huarɨ́j.

will be added

X\