San Lucas 7

1Tɨ́'ɨj Jesús raatapuá'ajtaca'a tɨ tihuá'a'ixaate'eca'a ɨ́ teɨte, aj pu i a'uun á'uraa u Capernaúm. 2A'uu pu seɨ́j a'utéveeca'a xantaaru'u tɨ anxɨ́te tí'aijta. A'ɨ́jna jemi, seɨ́j pu tí'icui'i tɨ jemin tí'ivaɨre'e. Pu'uri á'ame'erejca'a. Ajta ɨ́ xantaaru'u, jeíhua pu raxɨ́'eve'eca'a a'ɨ́jna tɨ jemin tí'ivaɨre'e. 3Tɨ'ɨj jí a'ɨ́ɨn anxɨ́te tɨ tí'aijta, a'ɨ́ɨ pu ráamua'areeri'i a'ij tɨ ti'itɨ́ ruurejca'a ɨ́ Jesús. Aj pu i teɨte huata'áij mej mi ya'utájeeve. A'ɨ́ɨme ɨ́ teɨte, a'ii mú a'ɨ́ɨn pu'éene'e ɨ́ mej Israél jetze ajtéme'ecantaca'a, majta ɨ́ mej tí'aijtaca'a u teyujta'a. 4Matɨ́'ɨj mi a'uun e'iré'ene a'u tɨ Jesús a'utéveeca'a. Jéihua mú raatéeje. Ayee mú tiraata'ixaa tɨjɨ́n: ―Jé'ecan pu raavíjte'e pej á'ume'en jemin a'u tɨ é'eche pej pi piyen huárɨni a'ij tɨ timuaatáhuaviira. 5’Jé'ecan pu hui rɨ́'ɨ titájcha'ɨɨ a'ɨ́jna. Ajta a'ɨ́ɨ pu rá'ajtaahuaca'a ɨ́ teyuu. ―Ayee mú tiraata'ixaa. 6Tɨ'ɨj jí Jesús u á'ume huá'a jamuan. Aa pu vejli'i aumé'ecaa, tɨ́'ɨj a'ɨ́ɨn tɨ anxɨ́te tí'aijta, ajta pu ru'amiigustemua'a huata'áij mej mi miyen tiraata'ixaa tɨ nu'u caí a'uun e'ará'asti a'ujna tɨ é'eche. Ayee mú tiraata'ixaa tɨjɨ́n: ―Nevástara'a, capu hui rɨ́'ɨ tiraavíjte'e pej anú'asti. 7A'ɨ́j pu jɨ́n, capu ayén tiná'amitɨejte'eca'a tɨ raavíjte'e nej ne'uun a'atanén a'u pej a'utéveeca'a. Tɨ́ ij caí muamuárɨ'eriste'e, ayée pepu'u hui huárɨni pej raataxáj yee pu'uri huarúj ɨ́ tɨ ajemi tí'ivaɨre'e. Tɨ́ pua'a piyen tiu'utaxáj, aj pu a'ɨ́ɨn rujni ɨ́ tɨ ne jemi tí'ivaɨre'e. 8’A'ɨ́j nu hui jɨ́n niyen tí'imua'ixaate'e a'iné seɨ́j pu tí'ine'aijte'e ineetzi. Nee nu neajta ti'itɨ́j jɨ́n antínmua'aree; neajta tihuá'aijte'e ɨ́ xantaaru'u. Tɨ́ pua'a seɨ́j netiu'uta'áijte'en yee aricu, a'ɨ́ɨ pu ayén rɨni tɨ á'ume'en. Na'ari tɨ pua'a seɨ́j niyen tiu'utá'ixaate'en yee mú a'utá'iyi'i, ayée pu rɨni tɨ mú a'uvé'eme'en. Ayee nu hui tiraata'ixaate'en a'ɨ́jna tɨ nej jemi tí'ivaɨre'e yee ayée pej huárɨni. Ajta a'ɨ́ɨn, ayée pu rɨni. ―Ayee pu tiraata'ixaa a'ɨ́jna ɨ́ xantaaru'u a'ɨ́jna ɨ́ Jesús. 9Ajta a'ɨ́ɨn Jesús, tɨ́'ɨj ayén tiráanamuajri'i, jé'ecan pu naa rɨ́'ɨ tira'utaseíj a'ɨ́jna jemi. Tɨ'ɨj jí pɨ́ɨ a'uré'eve tɨ ij hua'useíirajra'ani ɨ́ teɨte ɨ́ mej jamuan á'ujujhua'ane'e. Ayee pu tihua'utá'ixaa tɨjɨ́n: ―Ayee nu tejá'amua'ixaate'e, a'u tɨ huatacá'a íiye Israél, canu hui ja'anáj ja'atɨ huáteu tɨ ayén che'atá na'a té'atzaahuate'e tɨ́j a'ɨ́jna ɨ́ xantaaru'u. ―Ayee pu tihua'utá'ixaa. 10Majta me'ɨ́n ɨ́ mej tiu'uta'aíjti'ire, a'ɨ́ɨ mú a'uré'acɨ a'u tɨ é'eche a'ɨ́jna ɨ́ xantaaru'u. Matɨ́'ɨj a'uré'ene, pu'uri huarújcaa a'ɨ́jna tɨ jemin tí'ivaɨre'e. 11A'atzu a'ateevi'i, Jesús pu a'uun a'ará'a chajta'a tɨ ayén téja'arájtehuaa tɨjɨ́n Naín. Majta mú a'ucɨ́j jamuan a'ɨ́ɨme ɨ́ mej jamuan á'ujujhua'ane'e. Majta seica ɨ́ teɨte, mu'iitɨ́ mú a'ucɨ́j jamuan. 12Mu'uri vejli'i aujú'ucaa ta'anténine'i chajta'a jetze matɨ́'ɨj seica antinájcheca'a mej mɨ́'ɨchi huáchuisime'e. A'ɨ́jna ɨ́ mɨ́'ɨchi, a'ɨ́ɨ pu pú'eene'e yaujra'an ɨ́ 'ɨ́ita'a tɨ ruseɨ́j. A'ɨ́ɨ pu'u caj pɨ́tí'iyaujra'antaca'a tɨ teáatacan. Jéihua mú teɨte jamuan huajú'ucaa. 13Tɨ́'ɨj Jesús raaseíj, jeíhua pu huataújxɨeemɨste jemin ɨ́ 'ɨ́ita'a. Aj pu i ayén tiraata'ixaa tɨjɨ́n: ―Capej ayeine. 14Tɨ'ɨj jí ajteáxɨɨreca'a. Aj pu i ra'ajtamuárɨej ɨ́ cɨyej tɨ japuan 'ujcá'a a'ɨ́jna tɨ huamɨ́'ɨ. Majta me'ɨ́n ɨ́ mej ráachuisime'e, a'ɨ́ɨ mú huatéhuiixɨ. Aj pu i Jesús ayén tiraata'ixaa tɨjɨ́n: ―Mú'ee, temuaij, ayée nu tí'imua'ixaate'e yee: Ájchesi. ―Ayee pu tiraata'ixaa. 15Ajta a'ɨ́ɨn tɨ huamɨ́'ɨ, a'ɨ́ɨ pu a'ujyeíjxɨ. Aj pu i a'utéjche tɨ tiu'utaxáj. Tɨ'ɨj jí Jesús raatátui ɨ́ náànajra'an. 16Matɨ́'ɨj mi naími'i naa rɨ́'ɨ tira'utaseíj a'ij tɨ ti'itɨ́j huáruu ɨ́ Jesús. Jé'ecan pu utéevatzɨ ɨ́ huá'a tzajta'a. Matɨ́'ɨj mi rɨ́'ɨ tiu'utá'a ɨ́ Dios jemi. Ayee mú tiu'utaxájtaca'a tɨjɨ́n: ―Ja'atɨ pu hui huataseíjre itejmi jemi tɨ ve'ecán jɨ́n ti'itéjvee, ajta tɨ Dios jetze me'ecan tí'ixaxa'a. Pu'uri mú a'uvé'emej ɨ́ Dios tɨ ij hua'utévaɨre'en ɨ́ ruteɨ́testemua'a. 17Nainjapua mú ráamua'areeri'i a'ij tɨ ti'itɨ́ huarɨ́j a'ɨ́jna ɨ́ Jesús. Nainjapua tɨ́j na'a a'uun tɨ huatacá'a u Judea, ajta 'á'ayee tɨ huacá'a, naími'i mú ráamua'areeri'i. 18Majta me'ɨ́n ɨ́ mej jamuan á'ujujhua'ane'e a'ɨ́jna ɨ́ Juan tɨ huá'amuaɨ'ɨhuaca, a'ɨ́ɨ mú raatá'ixaa a'ij tɨ Jesús rɨjcaa. Tɨ'ɨj jí hua'apuaca huatajé a'ɨ́jna ɨ́ Juan. 19Aj pu i hua'uta'íteca'a mej mi raata'íhua'u a'ɨ́jna ɨ́ Jesús yee ni qui mú'ee pe'ɨ́n pú'een a'ɨ́jna tɨ nu'u mé'e vé'eme, na'ari ayén tiú'ujxe'eve'e tej seɨ́j huachú'eve'en. Matɨ́'ɨj mi a'ucɨ́j. 20Matɨ́'ɨj mi me'uun e'iré'ene a'u tɨ a'utéveeca'a a'ɨ́jna ɨ́ Jesús. Matɨ́'ɨj mi miyen tiraata'ixaa tɨjɨ́n: ―A'ɨ́jna ɨ́ Juan tɨ huá'amuaɨ'ɨhuaca, a'ɨ́ɨ pu hui taja'uta'íteca'a tej ti tiyen timuaata'íhua'u yee: “¿Ni qui mú'ee pe'ɨ́n pú'een a'ɨ́jna tɨ mé'e vé'eme na'ari teuj seɨ́j chu'eve'e?” ―Ayee mú tiraata'ixaa. 21Ajta a'ɨ́ɨn ɨ́ Jesús, auchén pu mu'iicáca tiú'uhuaa ɨ́ mej tí'icucui'ica'a, ajta seica ɨ́ mej caí rɨ'éene'e ɨ́ ru jetze, ajta ɨ́ mej tiyaaru'u huá'a tzajta'a seijre'eca'a. Ajta a'ɨ́ɨme ɨ́ mej aracúcu'unijmee, a'ɨ́ɨ pu tihuá'uhuaa mej mi majtáhua'a atanéjne'ere. 22Tɨ'ɨj jí Jesús ayén tiha'utá'ixaa a'ɨ́mej ɨ́ tɨ Juan hua'uta'íteca'a tɨjɨ́n: ―Sericu mú'een. Setá'aj á'uju'un ɨ́ Juan jemi, setá'aj tiraata'ixaate'en a'ij sej seri tiu'uséij, a'ij sej seri tiú'unamuajri'i yee a'ɨ́ɨme ɨ́ mej aracúcu'unijmee, a'ɨ́ɨ mú hui meri majtáhua'a mé uunéjne'e. Majta a'ɨ́ɨme ɨ́ mej anacɨyáaxavi'ijmee, a'ɨ́ɨ mú meri'ijtáhua'a á'ujujhua'an. Majta a'ɨ́ɨme ɨ́ mej tijcúcui'ineca'a me'ɨ́jna jɨme'e tɨ tineájxɨ huá'ahua'ira'a jetze, tɨ ayén ántehuaa tɨjɨ́n lepra, mu'uri huarúj. Majta a'ɨ́ɨme, ɨ́ mej nácuxa'itaca'a, mu'uri'itáhua'a huiteánajca'amua. Majta a'ɨ́ɨme ɨ́ mej meri huácuii, mu'uri majtáhua'a mena'a huatarúj. Neajta hui tihua'utá'ixaate'esin a'ɨ́ɨme ɨ́ mej caí a'ij té'eviicua'i a'ɨ́jna jɨme'e ɨ́ niuucari ɨ́ mej jɨ́n huataújtemua'ave'en. 23’Rɨ́'ɨ pu hui tiraatá'asin a'ɨ́jna ɨ́ ja'atɨ tɨ caí a'ij pua'a tiraatá'an mé núurɨeeni, a'ɨ́jna jɨme'e tɨ caí ché'e té'eviicua'i neetzi jemi. ―Ayee pu tihua'utá'ixaa a'ɨ́jna ɨ́ Jesús. 24Matɨ́'ɨj mi a'ucɨ́j a'ɨ́ɨme ɨ́ mej Juan jamuan á'ujujhua'ane'e. Tɨ'ɨj jí Jesús a'utéjche tɨ tihuá'itɨii ɨ́ teɨte a'ɨ́jna jɨme'e ɨ́ Juan. Ayee pu tihua'utá'ixaa tɨjɨ́n: ―¿Ti'itájni sej a'utéeseij se'újna ɨ́ 'ɨtzitá? ¿Ni qui huiini xámua'ij u se'useíj tɨ eeca raru'uxante'e? Caxu xaa ne'u. 25Ca'ɨ́n, ¿ti'itájni sena'a hui a'utéeseij? ¿Ca'ɨ́n ja'atɨ sena'a u a'utéeseij tɨ rɨ'éene'en te'ucáaviɨj? Caxu xaa ne'u, a'iné xu'uri ramua'aree tɨjɨ́n a'ɨ́ɨme ɨ́ mej miyen rɨ'éene'en te'ucaviɨ́jmee, majta a'ɨ́ɨme tɨ hua'aráanajche naíjmi'i tɨ́j na'a tɨ tí'ijnajche, a'úu mú é'eche a'u mej rey é'eche. 26’Ari tɨ pua'a secaí se'ɨ́jna a'utéeseij, ¿ti'itájni sena'a a'utéeseij? ¿Ni qui hui seɨ́j tɨ Dios jetze me'ecan tí'ixaxa'a? Jee tzɨ́te'e, ayée nu tejá'amua'ixaate'e yee a'ɨ́ɨ pu pɨ́rɨcɨ. Ajta a'ɨ́ɨn, jaítze'e pu ve'ecán jɨ́n ti'itéjvee. 27A'ii pu hui a'ɨ́ɨn pú'een ɨ́ tɨ jɨ́me'en rá'axa ɨ́ yu'uxari jetze tɨjɨ́n: Nee nu hui seɨ́j amuacaí huata'íti tɨ huataseíjre'esin pecaí mú'ee. A'ɨ́ɨ pu rɨ́'ɨ huá'aruuren ɨ́ teɨte mej mi mua'ancuré'evi'itɨn mú'eetzi. 28’Ayee nu tejá'amua'ixaate'e yee a'ɨ́ɨme tzajta'a naíjmi'i ɨ́ teɨte ɨ́ mej huataseíjre íiyen chaanaca japua, capu ja'atɨ ja'anáj te'enteájrupi ti'itɨ́j jɨme'e ɨ́ tɨ jaítze'e ve'ée caí ɨ́ tɨ jɨ́n ti'itéjvee a'ɨ́jna ɨ́ Juan. Mɨ́ ajta, a'ɨ́ɨn tɨ jaítze'e cɨliéene'e jɨ́n ti'itéjvee ɨ́ Dios jemi, jaítze'e pu hui ve'ecán jɨ́n ti'itevée a'ame a'ɨ́jna ɨ́ ja'atɨ caí a'ɨ́jna ɨ́ Juan a'ájna xɨcájra'a jetze tɨ Dios ayén autéchesin tɨ tiu'uta'aíjta nainjapua. 29’Majta naími'i ɨ́ mej ráanamuajri'i a'ij tɨ tiu'utaxájtaca'a a'ɨ́jna ɨ́ Juan, a'ɨ́ɨ mú hui ra'ancuré'a a'ij tɨ tí'ijxe'eve'e ɨ́ Dios me'ɨ́jna jɨme'e tɨ Juan huá'umuaɨ'ɨhua. Ayee mú che'atá mena'a ra'ancuré'a a'ɨ́ɨme mej tí'iteji'ivi. 30’Majta hui a'ɨ́ɨme ɨ́ fariseos, majta a'ɨ́ɨme ɨ́ mej tiú'ujmua'ate ɨ́ yu'uxari jetze tɨ Moisés ra'uyú'uxaca'a, a'ɨ́ɨ mú hui ratíteca'a a'ij tɨ tí'ijxe'eve'e ɨ́ Dios a'iné camu huaújmuaɨ'ɨhuaca'a ɨ́ Juan jemi. ―Ayee pu tiu'utaxájtaca'a a'ɨ́jna ɨ́ Jesús. 31Ajtahua'a seɨcɨé pu ayén tihua'uta'íhua'uri'i ɨ́ Jesús tɨjɨ́n: ―¿A'iné nena'a tiraataxáj yee ayée mú 'een a'ɨ́ɨme ɨ́ teɨte íjii mej huáteemua? ¿Ni caí mé'e ti'itɨ́j tɨ ayén 'een cumu a'íime? 32’Ayee mú hui e'en matɨ́j ɨ́ tɨ'ɨríi mej á vejli'i a'ujteí a'u mej tejá'atua. A'ɨ́ɨ mú miyen tihua'atají'ivi ɨ́ seica tɨjɨ́n: “Tetiu'utacɨ́'ɨsite sej si tiu'utéene'en, mɨ seajta caí, caxu tiu'utéenei. Teajta tu tiu'utáchuiicaca'a tɨ tiú'uxɨeemɨste'e jɨme'e, mɨ seajta caí, caxu huaújyeineca'a.” 33’Ayee nu tejá'amua'ixaate'e a'iné a'ɨ́jna ɨ́ Juan, tɨ́'ɨj a'ɨ́ɨn yé uvé'ene, capu hui pan cua'aca, capu ajta viinu ye'eca. Seajta mú'een, ayée xu e'en matɨ́j a'ɨ́ɨme ɨ́ tɨ'ɨríi se'ɨ́jna jɨme'e sej siyen ti'ixa se'ɨ́jna jɨ́me'en ɨ́ Juan tɨjɨ́n: “Tiyaaru'u pu tzajta'an seijre'e.” 34’Neajta inee, i nej neajta huá'a jetze airáane ɨ́ teɨte, nee nu tí'icua'a, neajta ye'eca. Seajta mú'een, ayée xu ti'ixa neetzi jɨ́me'en yee huápɨ'ɨ nu tí'icua'a, neajta netahuaive. Ayee xu seajta ti'ixa tɨjɨ́n yee ye'ecui huatéjvee hua'amiigu a'ɨ́ɨme mej tí'iteji'ivi, ajta a'ɨ́ɨme ɨ́ mej a'ij pua'a titetiújcha'ɨɨ. 35A'ɨ́jna tɨ Dios jemi rɨ́'ɨ meteúumua'aree, a'ɨ́ɨ mú hui ramua'aréeren ɨ́ yaújmua'ame'en ɨ́ mej rɨ́'ɨ metíteumuámua'aree ɨ́ Dios jemi. ―Ayee pu tihua'utá'ixaa a'ɨ́jna ɨ́ Jesús. 36Ayee pu ja'anáj tiuju'urɨ́j. Seɨ́j pu raatá'inee a'ɨ́jna ɨ́ Jesús tɨ jamuan tiú'ucua'ani. A'ɨ́jna ɨ́ ja'atɨ, fariseo pu pú'een. Ayee pu ántehuaa tɨjɨ́n Simón. Aj pu i Jesús á a'uré'ehui'ixɨ a'u tɨ meesa vejli'i a'utéjvee a'ij mej tiraaxɨ́'epɨ'ɨntari'iri'i a'ɨ́jna tɨ raatá'inee. 37Ajta a'ɨ́ɨn 'ɨ́ita'a, a'úu pu a'utéveeca'a. Jéihua pu a'ij pua'a ti'itiújcha'ɨɨca'a a'ɨ́jna ɨ́ Dios jemi. Tɨ'ɨj jí a'ɨ́ɨ ráamua'areeri'i tɨjɨ́n a'úu pu tejé'ecua'a fariseo tɨ é'eche a'ɨ́jna ɨ́ Jesús. Aj pu i tetej limeetajra'a pu e'evé'ejaj. Ti'itɨ́ pu urajmuaa tɨ naa teáarɨ́'e. 38Tɨ'ɨj jí á vejli'i a'utéechaxɨ a'u tɨ Jesús anu'uhuaré'eca'a ɨ́ meesa a'utéjvee. Ruyeineca'a a'ɨ́jna ɨ́ 'ɨ́ita'a. Tɨ'ɨj jí Jesús ɨ́ɨca jetze títzutixɨ ɨ́ tɨ a'itajá'ara'atajye'icaa a'ɨ́jna ɨ́ 'ɨ́ita'a. Tɨ'ɨj jí rucɨpuá jɨ́n racáhuatzi'iri'i, ajta ra'anáapɨ'ɨtze. Tɨ'ɨj jí ɨɨcájra'an jetze racáaxɨre a'ɨ́jna tɨ naa teáarɨ́'e. 39Ajta a'ɨ́ɨn fariseo tɨ Jesús huatá'inee, tɨ́'ɨj raaseíj a'ij tɨ rɨjcaa a'ɨ́jna ɨ́ 'ɨ́ita'a, ayée pu tí'imua'ajca ɨ́ ru tzajta'a tɨjɨ́n: “Tɨ́ pua'a amɨ́n pú'eene'en tevi seɨ́j tɨ Dios jetze me'ecan tí'ixaxa'a, a'ɨ́ɨ pu hui ramua'aréeren ti'itɨ́j tɨ tévira'an pɨ́rɨcɨ a'ɨ́jna ɨ́ 'ɨ́ita'a tɨ a'ij pua'a ti'itiújcha'ɨɨ ɨ́ Dios jemi.” 40Ajta a'ɨ́ɨn Jesús, ayée pu tiu'utaxájtaca'a tɨjɨ́n: ―Simón, ti'itɨ́j nu muaatá'ixaate'esin. Ayee pu tiu'utaniú a'ɨ́jna ɨ́ Simón tɨjɨ́n: ―Maeestru, patá'aj naatá'ixaate'en. 41Aj pu i Jesús ayén tiraata'ixaa tɨjɨ́n: ―Seica mú nu'u hui tirá'acha'ɨɨre'eca'a me'ɨ́jna ɨ́ ja'atɨ tɨ tumin hua'utániɨ́jte, a'ɨ́mej mej hua'apua. Seɨ́j pu nu'u ayén tirá'acha'ɨɨre'eca'a a'achú cumu anxɨ́j ciento ɨ́ tumin. Ajta ɨ́ seɨ́j, ayée pu nu'u tirá'acha'ɨɨre'eca'a a'achú cumu muáacua jetze ɨ́ tumin. 42’Ja'iné camu a'atzu tí'ituaave'e ɨ́ mej jɨ́n tiraanájchite'en, a'ɨ́ɨ pu nu'u hui tihua'utá'uuni'iri'i a'ɨ́mej ɨ́ mej hua'apua a'achú mej caj tirá'acha'ɨɨre'eca'a. Me'ecui xaa, ¿a'iné timuá'amitɨejte'e? ¿A'ataani hui jaítze'e raxɨ́'eve'e a'ame a'ɨ́jna ɨ́ tɨ hua'utá'uni'iri'i? ―Ayee pu Jesús tiraata'íhua'uri'i. 43Ajta a'ɨ́ɨn ɨ́ Simón, ayée pu tiu'utaniú tɨjɨ́n: ―Ayee pu tiná'amitɨejte'e ineetzi a'ɨ́jna jɨme'e tɨ tihua'utá'uuni'iri'i, a'ɨ́ɨ pu hui jaítze'e raxɨ́'eve'e a'ame a'ɨ́jna tɨ jaítze'e tirá'acha'ɨɨre'eca'a a'iné jaítze'e pu tiraatá'uuni'iri'i. Jesús pu ayén tiraata'ixaa tɨjɨ́n: ―Xɨ́'epɨ'ɨn pej hui tiu'utaxájtaca'a. 44Aj pu i pɨ́ɨ a'uré'eve tɨ ij raaseíj a'ɨ́jna ɨ́ 'ɨ́ita'a. Aj pu i ayén tiraata'ixaa a'ɨ́jna ɨ́ Simón tɨjɨ́n: ―¿Ni pecaí raseíj pe'íjna i 'ɨ́ita'a? Nee nu uteájrupi íiyu pe é'eche. Capej racáaxɨre ɨ́ jaj ɨ́ ne'ɨ́ɨca jetze. Mɨ́ ajtá'i amɨ́n ɨ́ 'ɨ́ita'a, a'ɨ́ɨ pu hui na'anaɨ́ɨri'i ne'ɨ́ɨca jetze a'ɨ́jna jɨme'e tɨ a'itajá'ara'atajye'icaa. Ajta na'anáhuatzi'iri'i ɨ́ rucɨpuá jɨme'e. 45’Mú'ee pej hui caí nu'itépɨ'ɨtze. Mɨ́ ajtá'i amɨ́n mɨ 'ɨ́ita'a, tɨ́j na'a tɨ huiiteájrupi yú chi'ita, a'ɨ́ɨ pu na'anáapɨ'ɨtze ɨ́ ne'ɨ́ɨca jetze. 46Mú'ee pej caí na'avé'exɨri'iri'i ti'itɨ́j aceite yen nemu'uutze'e. Mɨ́ ajtá'i amɨ́n, a'ɨ́ɨ pu hui na'anáxɨri'iri'i ɨ́ ne'ɨ́ɨca jetze ti'itɨ́j tɨ naa teáarɨ́'e. 47’A'ɨ́j nu jɨ́n niyen tí'imua'ixaate'e. A'ɨ́ɨ pu jeíhua auteájturaa ɨ́ Dios jemi. Neajta nu nain tiraatá'uuni'iri'i a'iné jeíhua pu nexɨ́'eve'e já'araa. Mɨ́ pajta mú'ee, mɨ nej cɨ́j caj timuaatá'uuni'iri'i, mú'ee pej hui cɨ́j caj tí'inexe'eve'e. ― Ayee pu tiraata'ixaa. 48Ajta Jesús pu ayén tiraata'ixaa a'ɨ́jna ɨ́ 'ɨ́ita'a tɨjɨ́n: ―Nu'uri hui timuaatá'uuni'iri'i ɨ́ pej jɨ́n auteájturaa ɨ́ Dios jemi. 49Majta me'ɨ́n ɨ́ seica ɨ́ tɨ hua'utá'inee, matɨ́'ɨj miyen tiráanamuajri'i, matɨ́'ɨj mi autéjhuii mej ti'ihuaúrihua'u, tɨjɨ́n: ―¿A'ataani pú'een amɨ́jna mɨ tɨ tíhua'utá'uuni'ira a'ɨ́jna jɨme'e ɨ́ mej jɨ́n auteájturaa ɨ́ Dios jemi? ―Ayee mú tiu'uteáurihua'uraca'a. 50Ajta Jesús ayén tiraata'ixaa a'ɨ́jna ɨ́ 'ɨ́ita'a tɨjɨ́n: ―Pu'uri Dios mua'irájtuaa a'iné peté'atzaahuate'e mú'ee. Aricu hui á'ura'a axɨéehua. ―Ayee pu tiraata'ixaa.

will be added

X\