San Lucas 6

1Ayee pu ajta tiuju'urɨ́j a'ájna ɨ́ xɨcájra'a mej jetzen ruse'upi. Aa pu aumé'ecaa já'ita'a u ví'ira'ata'a ɨ́ Jesús. Majta me'ɨ́n ɨ́ mej jamuan á'ujujhua'ane'e, a'ɨ́ɨ mú autéjhuii mej rú'ijtzaanaxɨ'ɨn ti'itɨ́j atzi tɨ triigu jetze huijneájxɨ. Matɨ́'ɨj mi raatémuatɨ'ɨsixɨ ɨ́ rumuájca'a jetze. Majta autéjhuii mej ráacua'ani. 2Majta a'ɨ́ɨme ɨ́ fariseos, seica mú á vejli'i a'uté'uuca'a. Matɨ́'ɨj mi miyen tiraata'íhua'uri'i a'ɨ́jna ɨ́ Jesús. Miyen tɨjɨ́n: ―¿A'iné hui 'een jɨ́n piyen tí'imuarɨ'e ti'itɨ́j tɨ nu'u caí rɨ'ɨrí tɨ ayén ti'itɨ́j ú'uruuren a'ájna xɨcájra'a mej jetzen pua'a ruse'upi? 3Jesús pu ayén tihua'utá'ixaa tɨjɨ́n: ―¿Ni secaí mú'een ja'anáj ra'ujíjve ɨ́ yu'uxari jetze a'ij tɨ huarɨ́j a'ɨ́jna ɨ́ David teecan tɨ́'ɨj huata'í'icuataca'a, majta ɨ́ mej jamuan á'ujujhua'ane'e? 4A'uu pu hui a'uteájrupi u teyujta'a, ɨ́ tɨ jee chi'ira'an pú'een ɨ́ Dios. Ajta á'iyen, a'ɨ́ɨ pu ru'irájɨ'ɨpɨ ɨ́ pan mej Dios huatámuaɨ'ɨvejte. Tɨ'ɨj jí ráacua. Ajta a'ɨ́mej tiu'umí ɨ́ mej jamuan á'ujujhua'ane'e. A'ɨ́jna ɨ́ pan, a'ɨ́ɨ mu'u racua'aca a'ɨ́ɨme ɨ́ mej tí'ivaɨre'e a'ujna teyujta'a. Capu hui ti'itɨ́j a'ij huarɨ́j a'ɨ́jna jemi ɨ́ David teecan. 5Ajta ayén tɨjɨ́n: ―Ayee nu tejá'amua'ixaate'e inee, i nej neajta huá'a jetze airáane ɨ́ teɨte, ayée nu hui 'een jɨ́n antínmua'aree neajta ne'ɨ́jna xɨcájra'an mej jetzen ruse'upi. ―Ayee pu tihua'utá'ixaa ɨ́ Jesús. 6Ajtahua'a, seɨ́j jetze ɨ́ xɨcáara'an mej jetzen ruse'upi, a'úu pu a'uteájrupi u teyujta'a. A'uu pu tihuá'amua'atejca'a. Ajta seɨ́j a'úu pu unú'ujveeca'a tɨ cɨyáaxara'a ɨ́ rumuájca'a jetze, rurɨ'ɨríinta'an pújme'en. 7Majta me'ɨ́n ɨ́ fariseos, majta me'ɨ́n ɨ́ mej tí'imua'ata ɨ́ yu'uxari jetze tɨ ra'uyú'uxaca'a a'ɨ́jna ɨ́ Moisés teecan, a'ɨ́ɨ mú rajeeveca'a ti'itɨ́j mej jɨ́me'en jetzen te'ujpuá'ajte'en. Ayee mú tí'imua'ajca yee aisí tɨ pua'a caí seɨ́j tiú'uhuaate'en, a'íjna xɨcájra'a tej jetzen tase'upi. 8Mɨ́ ajta Jesús, a'ɨ́ɨ pu rú'umua'areereca'a a'ij mej tí'imua'ajca. Aj pu i ayén tiraata'ixaa a'ɨ́jna tɨ rumuájca'a jetze cɨyáaxara'a tɨjɨ́n: ―Ájchesi. Mé huatéchaxɨ mé já'ita'a. Aj pu i ájchee. Aa pu a'utéechaxɨ. 9Tɨ'ɨj jí Jesús ayén tihua'utá'ixaa tɨjɨ́n: ―Ayee nu tejámuaata'íhua'ura ti'itɨ́j tɨ í'irɨ'ɨri a'íjna xɨcájra'a tej jetzen tase'upi. ¿Ni qui í'irɨ'ɨri tɨ ja'atɨ ayén ráaruuren ɨ́ tɨ í'ixɨ'epɨ'ɨn na'ari ɨ́ tɨ a'ij pua'a 'een? ¿Ni qui ajta í'irɨ'ɨri tɨ seɨ́j huiirájtuaa tɨ ij a'ɨ́ɨn caí huámɨ'ɨni na'ari hui tɨ raajé'ica? 10Tɨ'ɨj jí Jesús hua'useíirajraa a'ɨ́mej ɨ́ mej áa e'envéjme'ecaa. Aj pu i ayén tiraata'ixaa a'ɨ́jna tɨ cɨyáaxara'a ɨ́ rumuájca'a jetze tɨjɨ́n: ―Huatátzeaara hui mua'a muájca'a. Aj pu i raatátzeaaraca'a. Jɨ́me'en pu'u ayén huarɨ́j, aj pu i huarúj. 11Majta me'ɨ́n ɨ́ fariseos, jé'ecan mú huataníniu'ucacuca'a me'ɨ́jna jɨme'e mej caí a'ij tirájteu a'ij mej ye'í jɨ́me'en jetzen te'ujpuá'ajte'en. Matɨ́'ɨj mi autéjhuii mej ti'itiúrixaate'en yee a'ij mej ye'í ráaruuren me'ɨ́jna ɨ́ Jesús. 12A'ájná'ɨmua, Jesús pu á'ume jɨrí tzajta'a tɨ́'ij huatéjniuuni ɨ́ Dios jemi. Huatáxa'ii tɨ huatéeniu. 13Tɨ́'ɨj tapuá'arijme'eca, a'ɨ́ɨ pu hua'utajé a'ɨ́mej ɨ́ mej jamuan á'ujujhua'ane'e. Tɨ'ɨj jí hua'avé'ejajpuaxɨ a'achú cumu tamuáamuata'a japuan hua'apua mej ará'ase. Ayee pu hua'utamuá'a tɨjɨ́n apóstoles, tɨ ayén huataújmua'a tɨjɨ́n seɨ́j tɨ tiu'uta'aíjti'ire. Ayee mú huataújmua'a a'ɨ́ɨme ɨ́ mej tiu'uta'aíjti'ire. 14- 15A'ii mú a'ɨ́ɨn pú'een ɨ́ tɨ hua'avé'ejajpuaxɨ. Amuacaícan, a'ɨ́j pu huatajé a'ɨ́jna ɨ́ Simón, ɨ́ mej majta miyen raatamuá'a tɨjɨ́n Pedro. Aj pu ijtá'i a'ɨ́jna huatajé ɨ́ Andrés. Juutzeájra'an pu pú'een a'ɨ́jna ɨ́ Simón. Seica pu ajta huatajé. A'ɨ́ɨme mú a'ɨ́ɨn pú'een a'ɨ́jna ɨ́ Jacobo, ajta a'ɨ́jna ɨ́ Juan, ajta a'ɨ́jna ɨ́ Felipe. A'ɨ́j pu ajta huatajé a'ɨ́jna ɨ́ Bartolomé, ajta a'ɨ́jna ɨ́ Mateo, ajta a'ɨ́jna ɨ́ Tomás, ajta a'ɨ́jna ɨ́ Jacobo. A'ɨ́ɨ pu yaujra'an pú'een ɨ́ Alfeo. Jesús pu ajta a'ɨ́jna huatajé ɨ́ Simón. A'ɨ́mej pu jetze ajtéme'ecan a'ɨ́ɨme ɨ́ mej miyen hua'atamuá'amua tɨjɨ́n ɨ́ mej raayɨ́'ɨtɨ mej huané'use'en. 16A'ɨ́mej pu ajta huatajé a'ɨ́jna ɨ́ Judás tɨ yaujra'an pú'een ɨ́ Jacobo, ajta a'ɨ́jna ɨ́ Judás tɨ ayén te'entímu'utaca tɨjɨ́n Iscariotes. A'ii pu a'ɨ́ɨn pú'een tɨ tiu'utátui ɨ́ Jesús. A'ɨ́mej pu'u avé'ejajpuaxɨ. 17Tɨ'ɨj jí Jesús acájraa ɨ́ jɨrí japua, majta ɨ́ mej jamuan á'ujujhua'ane'e. A'uu pu a'ará'a a'u tɨ a'upá'atza. A'uu mú jeíhua ajteáxɨɨreca'a ɨ́ teɨte, ɨ́ mej jamuan á'ujujhua'ane'e, majta seica. Jéihua mú majta ajteáxɨɨreca'a ɨ́ mej a'uchéjme a'úu tɨ huatacá'a u Judea, majta me'ɨ́n ɨ́ mej a'uun a'uchéjme u Jerusalén. A'ɨ́ɨ mú majta ajteáxɨɨreca'a ɨ́ mej a'uun a'uchéjme a'ujna la coosta, a'ájna já'ahua'a u Tiro, ajta a'ájna já'ahua'a u Sidón. 18Ayee mú 'een jɨ́n mú e'iré'ene mej mi ráanamua, tɨ ij a'ɨ́ɨn tihuá'uhuaate'en ɨ́ mej jɨ́n ti'icúcui'ijme. Majta me'ɨ́n ɨ́ mej rajpuaíjtzica'a a'ɨ́jna jɨme'e ɨ́ tiyáaru'use tɨ huá'a tzajta'a seijre'e, Jesús pu ajta tihuá'uhuaa. 19Naíjmi'i matɨ́j mena'a me'uun a'uté'uuca'a, ayée mú tí'itese'eca'a mej ra'ajtamuárɨ'en a'ɨ́jna jɨme'e tɨ a'ɨ́ɨn jetze e'iraaye'i ɨ́ muárɨ'eri'ire'ara'an tɨ jɨ́n tihuá'uhuaate'en naíjmi'ica. 20Tɨ'ɨj jí hua'antaseíirajraa a'ɨ́mej ɨ́ mej jamuan á'ujujhua'ane'e. Tɨ'ɨj jí Jesús ayén tihua'utá'ixaa tɨjɨ́n: ―Setá'aj hui huataújtemua'ave'en, mú'een mɨ sej caí a'ij tí'ijviicua'i, a'iné mú'ejmi pu ari tiu'ucɨ́'ɨ tɨ Dios tejá'amua'aijte'e sej si jamuan tiu'uta'aíjta tɨ́j na'a rusén jɨme'e. 21’Setá'aj hui huataújtemua'ave'en, mú'een mɨ sej tɨejcu. Dios pu tejámuaatá'asin ɨ́ sej jɨ́n huateújvaɨre'en. ’Setá'aj huataújtemua'ave'en mɨ sej ruyein se'ɨ́jna jɨme'e tɨ a'ij pua'a tí'iseijre'e íiyen chaanaca japua. Mú'een xu na'anaa xá'aju'un se'ɨ́jna jɨme'e tɨ Dios ari amuá'ancu'uvajxɨ. 22’Setá'aj hui huataújtemua'ave'en tɨ pua'a seica teɨte mejamuájcha'ɨɨre'e, na'ari tɨ pua'a mejamuaatamuárite'en, na'ari tɨ pua'a mej a'ij pua'a á'amuaruuren nusu tɨ pua'a metejá'amuaxajtzi'ira me'ɨ́jna jɨme'e sej ná'astijre'e ineetzi, i nej neajta huá'a jetze airáane ɨ́ teɨte. 23Tɨ́'ɨj teja'uré'enen a'ájna mej miyen a'ij pua'a á'amuaruuren ɨ́ teɨte, setá'aj hui huataújtemua'ave'en a'iné jeíhua pu huápɨ'ɨ tejá'amuacɨ'ɨti a'ɨ́jna jɨme'e tɨ a'uun tejé'eme'ecan a'u tɨ Dios é'eseijre'e. Setá'aj tiu'utéene'en se'ɨ́jna jɨme'e sej rutémua'ave'e, a'iné huá'avaujsimua'acɨ'ɨ, ayée mú hui che'atá mena'a a'ij pua'a huá'uruu a'ɨ́mej ɨ́ mej tí'ixaxa'ata'a ɨ́ Dios jetze me'ecan. 24’Seajta mú'een, mɨ sej chíjteaani, setá'aj hui huataújxɨeemɨste'en a'iné xu'uri ra'ancuré'a íiyen chaanaca japua ɨ́ tɨ rɨ́'ɨ tejámuaatá'asin. 25’Setá'aj huataújxɨeemɨste'en, mú'een mɨ sej nain tí'ijcha'ɨɨ, a'iné capu hui ti'itɨ́j huateáturaasin mú'ejmi jemi tɨ́j na'a rusén jɨme'e. ’Setá'aj huataújxɨeemɨste'en, mú'een mɨ sej na'ana, cha'a sena'a, a'iné mú'een xu ruyeinixɨ'ɨn, seajta huataújxɨeemɨste'esin. 26’Setá'aj hui huataújxɨeemɨste'en tɨ pua'a naími'i miyen tejá'amua'ixaate'e yee xɨ́'epɨ'ɨn xu huarɨ́j, a'iné huá'avaujsimua'acɨ'ɨ, ayée mú che'atá mena'a tihua'utá'ixaa a'ɨ́mej ɨ́ mej caí tzáahuati'ira'a jɨme'e tí'ixaxa'ata'a ɨ́ Dios jetze me'ecan. 27’Mɨ neajta inee, ayée nu tejá'amua'ixaate'e mɨ sej ní'inamua: Setá'aj hui huá'uxe'eve'en se'ɨ́mej ɨ́ mej amuájcha'ɨɨre'e, setá'aj seajta rɨ́'ɨ huá'uruuren se'ɨ́mej ɨ́ mej a'ij pua'a á'amuaruure. 28’Setá'aj rɨ́'ɨ tihua'utá'an a'ɨ́mej ɨ́ mej a'ij pua'a tejá'amuaxa. Setá'aj hui seajta ɨ́ Dios jemi huá'a jɨ́me'en huatéjniuuni a'ɨ́mej ɨ́ mej a'ij pua'a á'amuaruure. 29’Tɨ́ pua'a ja'atɨ mu'itéjveeni a'ɨpée jetze, patá'aj hui pajta u jetze pújme'en raatániɨjte'en tɨ́'ij ajtahua'a mu'itéjveeni a'uun jetze. Tɨ́ pua'a ja'atɨ muá'achuira mɨ a'achamaara, patá'aj pajta mɨ asiicu'u raatapíjte'en. 30’Patá'aj pajta tihua'utá'an naíjmi'ica a'achú mej hui pua'amé ti'itɨ́j muahuavii. Ajta tɨ pua'a ja'atɨ ti'itɨ́j ántɨni ɨ́ tɨ mú'eetzi a'aa, capej hui rahuaviira ca'anéeri jɨme'e tɨ muaatátuiire'en. 31’Patá'aj pajta hui piyen huá'uruuren ɨ́ seica a'ij pej tí'ijxe'eve'e mej miyen muáaruuren mú'eetzi. 32’Niche'e seɨ́j tejámuaata'íhua'u. Tɨ́ pua'a siyen huá'ixe'eve'e sena'a a'ɨ́mej ɨ́ mej amuá'ixe'eve'e mú'ejmi, ¿a'iné hui tejamuá'amitɨejte'e a'ɨ́jna jɨme'e ɨ́ niuucari? ¿Ni qui ti'itɨ́j semuá'itɨn ɨ́ Dios jemi? Caxu xaa ne'u ti'itɨ́j huamuá'itɨn a'iné a'ɨ́ɨme ɨ́ mej a'ij pua'a rɨcɨ, a'ɨ́ɨ mú majta hui huá'ixe'eve'e a'ɨ́mej ɨ́ seica ɨ́ mej majta huá'ixe'eve'e. 33’Ajta, tɨ pua'a siyen rɨ́'ɨ tihua'atá'acare'en sena'a a'ɨ́mej ɨ́ mej rɨ́'ɨ tejaamuaatá'aca, ¿ni tzaa ayén tejamuá'amitɨejte'e sej se'ɨ́jna jɨ́n ti'itɨ́j huamuá'itɨn ɨ́ Dios jemi? Ayee nu tejá'amua'ixaate'e yee caxu hui a'atzu ti'itɨ́j huamuá'itɨn a'iné ayée mú che'atá mena'a rɨcɨ a'ɨ́ɨme ɨ́ mej a'ij pua'a rɨcɨ. 34’Ajta, tɨ pua'a hui siyen tihua'utániɨ́jte'en ti'itɨ́j tɨ na'a se'ɨ́jna jɨme'e mej mi á'iyen amuaatátuiire'en, ¿ni ayén tejamuá'amitɨejte'e sej se'ɨ́jna jɨ́n ti'itɨ́j huamuá'itɨn ɨ́ Dios jemi? Capu ayén té'eme. Caxu hui a'atzu ti'itɨ́j huamuá'itɨn a'iné a'ɨ́ɨme ɨ́ mej a'ij pua'a rɨcɨ, a'ɨ́ɨ mú hua'utániɨ́jte ɨ́ seica, majta miyen rachú'eve'en mej mi á'iyen tíhua'utátuiire'en nain ɨ́ mej caj tihua'utániɨjte. 35’Ayee xu'u huárɨni. Setá'aj hui huá'axe'eve'e a'ɨ́mej ɨ́ mej amuá'ajcha'ɨɨre'e. Setá'aj rɨ́'ɨ tihuá'ajcha'ɨɨ. Setá'aj seajta ti'itɨ́j tɨ na'a hua'utániɨ́jte'en. Caxu huá'ahuaviira ca'anéeri jɨme'e mej mi amuaatátuiire'en. Ayee nu tejá'amua'ixaate'e tɨ pua'a siyen huárɨni, jeíhua pu hui tejá'amuacɨ'ɨti. Seajta xu yaújmua'ame'en pú'eene'e xá'aju'un a'ɨ́jna ɨ́ Dios ɨ́ ta japua tɨ é'eseijre'e, a'iné a'ɨ́ɨ pu rɨ́'ɨ tihuá'ajcha'ɨɨ a'ɨ́mej ɨ́ mej caí rɨ́'ɨ tihua'atá'aca, ajta a'ɨ́mej ɨ́ mej a'ij pua'a rɨcɨ. 36’Setá'aj siyen huá'ancu'uvajxɨ'ɨn, a'iné a'ɨ́ɨn ɨ́ tɨ á'amua'iya'upua, a'ɨ́ɨ pu hui ajta huá'ancu'uvajxɨ'ɨsin. 37’Caxu a'ij tihuá'ajeeve ɨ́ seica; tɨ ij caí Dios a'ij tejá'amuajeeve mú'ejmi. Caxu seajta huá'axɨjte'e ɨ́ seica, tɨ ij caí Dios ama'uxɨ́jte'en mú'ejmi. Setá'aj hui tihua'utá'uuni'i ɨ́ seica. Tɨ́ pua'a siyen huárɨni, Dios pu ajta tejámuaatá'uuni'ira. 38’Setá'aj tíhua'utapuaíjve'en ɨ́ seica. Tɨ́ pua'a siyen huárɨni, jeíhua pu ajta mú'ejmi tejámuaatapuaíjve'esin. Ayee pu té'eme tɨ́j ja'atɨ ra'avé'ejɨste'en ɨ́ medida jetze. A'ɨ́jna ɨ́ ja'atɨ, mi'i pu rɨ́'ɨ ra'ure'eruurén, ajta raatéruureajxɨ'ɨn tɨ́'ij rɨ́'ɨ huaújra'atza. Temua'a pu naa tira'avé'ejɨste'esin tɨ ij caí avé'evitzen. Aj pu i, amua'ancára'atzi'ira ɨ́ á'amuasiicu'u jetze. Ayee pu á'amuaruuren a'iné a'achú sej hui caj tiu'utapuaíjve'e, ayée pu che'atá na'a Dios pu amuaatapuaíjve'esin mú'ejmi. ―Ayee pu tihua'utá'ixaa a'ɨ́jna ɨ́ Jesús. 39Ajtahua'a seɨ́j niuucari pu jɨ́n tihuá'u'itɨiiri'i. Ayen tɨjɨ́n: ―A'iné tejamuá'amitɨejte'e mú'ejmi a'ɨ́jna jɨ́me'en ɨ́ tɨ arácun. ¿Ni rɨ'ɨrí tɨ a'ɨ́ɨn tɨ arácun rá'anvi'itɨn ɨ́ juye jetze seɨ́j tɨ ajta arácun? Ayee nu tejá'amua'ixaate'e. Capu a'atzu rɨ'ɨrí, tɨ a'ɨ́ɨn rá'anvi'itɨn, a'iné tɨ pua'a a'ɨ́ɨn rá'anvi'itɨn, naími'i mú hui atévatzɨjsin a'u tɨ e'etécun. 40’Ajta ayée pu hui 'een a'ɨ́jna jɨme'e ɨ́ mej nee jamuan á'ujujhua'an. A'ɨ́n ɨ́ ja'atɨ tɨ ayén tiú'ujmua'ate capu ayén che'atá na'a ruxe'eve'e tɨ́j a'ɨ́ɨn tɨ tí'ijmua'ate, sino tɨ́'ɨj ari ra'antipuá'arite'en ɨ́ tɨ tiú'ujmua'ate, aj pu hui xaa ayén éene'e a'ame tɨ́j a'ɨ́jna ɨ́ tɨ tiraamuá'ate. 41’Pajta mú'ee, a'iné hui 'een jɨ́n piyen raseíj ɨ́ a'ihuáara'a a'ɨ́jna tɨ cɨ́j caj te'uteájturaa ɨ́ Dios jemi. Mɨ́ pajta mú'ee, capej aseɨ́j ɨ́ pej hui jɨ́n jeíhua á'atura ɨ́ Dios jemi. 42Tɨ́ pua'a peri jeíhua jɨ́n auteájturaa ɨ́ Dios jemi, ¿a'iné hui tí'irɨ'ɨri pej piyen tiraata'ixaate'en pe'ɨ́jna ɨ́ a'ihuáara'a tɨ cɨ́j caj te'uteájturaa a'ij tɨ ti'itɨ́j jɨ́n te'uteájturaa ɨ́ Dios jemi? Capu a'atzu a'ij tí'irɨ'ɨri, a'iné capej hui aseɨ́j mú'ee aseɨ́j a'ij pej ti'itɨ́j jɨ́n te'uteájturaa ɨ́ Dios jemi. ’Mú'ee mɨ pej a'ij pua'a tí'ijrɨ'ɨre mé jéjre'e, pauj mi'i seɨcɨé tiú'umua'ati, pajta nain jɨ́n tihua'utá'ixaate'en ɨ́ teɨte ɨ́ pej hui jɨ́n auteájturaa ɨ́ Dios jemi. Aj pu hui xaa ayén tiraavíjte'e ɨ́ pej piyen tiraata'ixaate'en ɨ́ seɨ́j a'ij tɨ ti'itɨ́j jɨ́n te'uteájturaa ɨ́ Dios jemi. 43’Ayee pu'u ajta 'een, tɨ́j ɨ́ cɨyej, nain tɨ ti'irɨ́'een, rɨ'éene'en pu tí'itaaca. Ajta nain ɨ́ cɨyej tɨ caí ti'irɨ́'een, capu ajta rɨ'éene'en tí'itaaca. 44Ajta naíjmi'i ɨ́ cɨyej tɨ tí'itaaca, ayée mú hui tí'imua'amua me'ɨ́jna ɨ́ tɨ tí'itaaca, a'iné a'ɨ́jna ɨ́ huaréj taca'i, capu a'ɨ́ɨn rataca'i ɨ́ cɨyej tɨ tétzicare'e sino a'ij pu jetze me'ecan ɨ́ rucɨye'e. Ajta a'ɨ́jna ɨ́ uuva taca'i, capu ajta a'ɨ́ɨn rataca'i ɨ́ jɨ́'ɨtzijca'ixa'a jetze sino a'ij pu ajta jetze me'ecan ɨ́ rucɨye'e. Ayee xu che'atá sena'a seajta tí'ijmua'areeren ja'atɨ tɨ tévira'a pú'een tij rɨ́'ɨ tí'itevij nusu caí se'ɨ́jna jɨme'e a'ij tɨ rɨcɨ. 45’A'ɨ́jna ɨ́ ja'atɨ tɨ rɨ́'ɨ tí'itevij, a'ɨ́ɨ pu hui rɨ́'ɨ tí'ixaxa'a, ajta a'ɨ́jna tɨ rɨ́'ɨ tí'ixaxa'a, a'úu pu me'ecan tzajta'an a'u tɨ jeíhua yá'avaa tɨ xɨ́'epɨ'ɨn 'een. Ajta a'ɨ́ɨn tɨ a'ij pua'a tí'itevij, a'ɨ́ɨ pu a'ij pua'a tí'ixaxa'a, ajta a'ɨ́jna tɨ a'ij pua'a tí'ixaxa'a, a'úu pu hui me'ecan tzajta'an a'u tɨ jeíhua yá'avaa tɨ a'ij pua'a 'een. Ayee nu tejá'amua'ixaate'e. Ja'atɨ tɨ na'a, a'ɨ́ɨ pu hui tí'ixaxa'a a'ɨ́jna jɨme'e ɨ́ tɨ rá'avaa ɨ́ ru tzajta'a. 46’Seajta mú'een, mɨ sej hui caí siyen tí'iruure a'ij nej tejá'amua'ixaate'e, a'iné 'een jɨ́n siyen tí'inejee tɨjɨ́n: “Nevástara'a, nevástara'a.” 47’Ayee nu hui tejámuaatá'ixaate'esin a'iné 'een a'ɨ́jna ɨ́ ja'atɨ tɨ neetzi jemi mú a'uvé'emej tɨ ij neetzi huanamua, ajta ayén tiú'uruuren a'ij nej ti'ixa. 48Ayee pu hui 'een tɨ́j a'ɨ́jna ɨ́ ja'atɨ tɨ chi'i ájtaahuaca'a. A'ɨ́jna ɨ́ ja'atɨ, jé'ecan pu ru'ucá'ijche téte'ɨmua. Tɨ'ɨj jí rá'ajtaahuaca'a ɨ́ jaxu'u ɨ́ tete japua. Matɨ́'ɨj mi huatéviiyeca'a. Ajta huatámɨ'ɨyeca'a ɨ́ játe'ana. Aj pu i jetzen ajté'a ɨ́ játe'ana ɨ́ chi'ij. Ajta a'ɨ́ɨn ɨ́ chi'ij, capu hui á'ave a'iné temua'a pu naa rɨ́'ɨ tirá'ajtaahuaca'a ɨ́ ja'atɨ. 49’Mɨ ajta, a'ɨ́jna ɨ́ ja'atɨ tɨ ayén tí'inenamua, tɨ pua'a caí ayén tiú'uruuren a'ij nej ti'ixa, ayée pu hui 'een tɨ́j ɨ́ seɨ́j tɨ ajta chi'ij ájtaahuaca'a. Capu ru'ucá'ijche téte'ɨmua a'ɨ́jna ɨ́ ja'atɨ. Matɨ́'ɨjtá mi huatéviiyeca'a. Ajta huatámɨ'ɨyeca'a ɨ́ játe'ana. Tɨ́'ɨj jetzen ajté'a, aj pu i rá'arɨe. Nain pu hui tejá'urɨe a'ɨ́jna ɨ́ ja'atɨ.

will be added

X\