San Lucas 5

1Ja'anáj tɨ ayén tiuju'urɨ́j tɨ a'ɨ́ɨn Jesús a'uun a'utéveeca'a a'u tɨ jaj e'eve'e'ástɨme tɨ ayén téja'arájtehuaa tɨjɨ́n: Genesaret. Jéihua mú teɨte ajteáxɨɨreca'a a'ɨ́jna jemi. A'ɨ́ɨ mú ranamuájraca'a ɨ́ niuucari tɨ jɨ́me'en raxa ɨ́ Dios. 2Tɨ'ɨj jí Jesús hua'apuaca huaseíj ɨ́ baarcu mé e'ecáviviɨ́jme'eca'a ɨ́ mej hua'ité jetze vivi'i. Majta a'ɨ́ɨme, mu'uri tí'ija'usica'a ɨ́ tiú'ujxɨejmua'a. 3Tɨ'ɨj jí Jesús ateájraa ɨ́ seɨ́j jetze ɨ́ baarcu, a'ɨ́jna Simón tɨ racɨi. Tɨ'ɨj jí ayén tiraatáhuaviiri'i a'ɨ́jna ɨ́ Simón tɨ a'atzu ɨmuá huatéchaxɨn á jaata'a. Tɨ'ɨj jí a'ujyeíjxɨ. A pu aracaíi tihuá'amua'ate ɨ́ teɨte. 4Tɨ́'ɨj raatapuá'ajtaca'a tɨ tihuá'ixaate'e, aj pu i ayén tiraata'ixaa a'ɨ́jna ɨ́ Simón tɨjɨ́n: ―Patá'aj jaítze'e a'ɨmuá huatéchaxɨn a'u tɨ jaítze'e auutɨ́'ɨ ɨ́ jaj. Pajta ra'atéhua'axɨn mɨ á'axɨejmua'a patá'aj hua'ité huavívi'i. 5Simón pu ayén tiu'utaniú tɨjɨ́n: ―Maestro, tu'uri huatáxa'ai tej tí'imuarɨ'e. Catu ti'itɨ́j huatéevi'i. Capu amɨ́n a'ij, a'iné mú'ee pe hui piyen tinaatá'ixaa, ayée nu rɨni. 6Matɨ́'ɨj mi ra'atéehua'axɨ ɨ́ ruxɨejmua'a. Ayee mú jɨ́n huarɨ́j, jeíhua mú huápɨ'ɨ hua'itátɨɨ. Tɨ́n pu huatésiujtza'anixɨ ɨ́ huá'axɨejmua'a ɨ́ hua'ité jɨme'e. 7Matɨ́'ɨj mi hua'utajé ɨ́ ru'amiigustemua'a ɨ́ mej aráatei ɨ́ seɨ́j jetze ɨ́ baarcu, mej mi mú a'uré'enen matá'aj hua'utévaɨre'en. Matɨ́'ɨj mi a'uré'ene. Matɨ́'ɨj mi hua'avé'ejɨ́ste'axɨ ɨ́ hua'ité ɨ́ baarcu jetze. Tɨ́n mú ateárutixɨ a'ɨ́jna jɨme'e mej avé'ejɨsteca'a. 8Ajta a'ɨ́ɨn Simón, jɨ́me'en pu'u raaseíj, aj pu i títunutaca'a ɨ́ Jesús jemi. Ayee pu tiraata'ixaa tɨjɨ́n: ―Á'ura'a ineetzi jemi, nevástara'a, a'iné jeíhua nu auteájturaa mú'eetzi jemi. 9Ayee pu tiu'utaxájtaca'a a'iné jeíhua pu naa rɨ́'ɨ tira'utaseíj a'ɨ́jna jɨme'e mej huápɨ'ɨ jeíhua hua'uvívi'i ɨ́ hua'ité. 10Ayee mú che'atá mena'a naa rɨ́'ɨ tira'utaseíj a'ɨ́jna ɨ́ Jacobo, ajta a'ɨ́jna ɨ́ Juan. A'ɨ́ɨ pu hua'atáàta a'ɨ́jna ɨ́ Zebedeo. Majta a'ɨ́ɨme, a'ɨ́ɨ mú jemin tí'imuarɨ'e jamuan ɨ́ Simón. Tɨ'ɨj jí a'ɨ́ɨn Jesús, ayén tiraata'ixaa a'ɨ́jna ɨ́ Simón tɨjɨ́n: ―Capej tí'itziɨɨne'e. Ijii tɨ yú auca'itɨ́ a'ame, neetzi jemi pepu'u hui teɨte tíseɨre'esin. ―Ayee pu tiraata'ixaa. 11Matɨ́'ɨj mi hua'itajájpuaxɨ ɨ́ baarcu a'u tɨ a'uhuáchi. Matɨ́'ɨj mi nain teje'etiá'a. Matɨ́'ɨj mi a'ucɨ́j jamuan ɨ́ Jesús. 12A'ájná'ɨmua, tɨ́'ɨj Jesús a'uun a'utéveeca'a a'ájna já'ahua'a chajta'a, seɨ́j pu e'iré'ene jemin. Temua'a pu jeíhua ti'icá'atza a'ɨ́jna jɨme'e tɨ tineájxɨ ɨ́ huá'ire'ara'an jetze. Tɨ́'ɨj raaseíj, aj pu i títunutaca'a jemin ɨ́ Jesús. Aa pu chuáata'ɨmua é'etia runéerime jɨme'e. Ayee pu tí'ijree tɨjɨ́n: ―Nevástara'a, tɨ pua'a hui mua'aráanajche pej tináahuaate'en. 13Tɨ'ɨj jí Jesús huatamuájca'ataca'a. Ayee pu tiraata'ixaa tɨjɨ́n: ―A ni'ijtá ne'u, na'aráanajche nej timuáahuaate'en. Pepu'uri hui huarúj. Jɨ́me'en pu'u ayén tiraata'ixaa, aj pu i xaa huarúj icu. 14Tɨ'ɨj jí Jesús ayén tiraata'aíj tɨjɨ́n: ―Capej ja'atɨ ixaate'e sino a'uun pej á'ume'en jemin ɨ́ tɨ tí'ivaɨre'e u teyujta'a. Patá'aj ja'utá'aseijrata jemin a'ɨ́jna. Pajta piyen tiu'utámuaɨ'ɨvejta a'ij tɨ tiu'uta'aíjtaca'a a'ɨ́jna ɨ́ Moisés teecan mej mi ráamua'aree tɨjɨ́n pepu'uri huarúj. ―Ayee pu tiraata'ixaa. 15Majta me'ɨ́n ɨ́ teɨte, nainjapua mú ráamua'areeri'i a'ij tɨ Jesús huarɨ́j. Tɨ́j na'a ti'itápuaapua'are, jaítze'e mú ranamuájraca'a. A'ɨ́j mú jɨ́n, jeíhua mú ajteáxɨɨreca'a ɨ́ teɨte ɨ́ Jesús jemi tɨ a'ɨ́ɨn tihuá'uhuaate'en a'ɨ́jna jɨme'e ɨ́ mej tí'icucui'i. 16Ajta a'ɨ́ɨn Jesús, ja'anáj tɨ na'a pu a'uun e'etánineica'a a'u tɨ caí é'e ti'itɨjca'a tɨ́'ij ruseɨ́j huatéjniuuni. 17Ayee pu tiuju'urɨ́j a'ajná'ɨmua. Mu'iitɨ́ mú á e'iré'ene ɨ́ teɨte tɨ́j na'a a'uun mej a'uchéjme a'ujna u Galilea, ajta a'ujna u Judea, ajta a'ujna u Jerusalén. A'ii mú a'ɨ́ɨn pú'een ɨ́ fariseos, majta a'ɨ́ɨme ɨ́ mej tí'imua'ata a'ij tɨ té'eyu'usi'i jetzen ɨ́ yu'uxari jetze ɨ́ Moisés teecan tɨ ra'uyú'uxaca'a. A'ɨ́ɨ mú huiiráte'eca'a ɨ́ Jesús jamuan. Ajta ɨ́ muárɨ'eri'ire'ara'an ɨ́ tavástara'a, a'ɨ́ɨ pu jemin huateájturaa tɨ́'ij tihuá'uhuaate'en ɨ́ teɨte. 18Majta seica a'uun e'iré'ene. Tevij mú huáchuisime'e, itari japua mera'ujtéca. Nainjapua pu cɨyáaxara'aca'a ɨ́ ru jetze a'ɨ́jna ɨ́ ja'atɨ. A'ɨ́ɨ mú huataújtese mej ru'uteájtuaani u chi'ita mej mi yenu'uhuaré'eten ɨ́ Jesús jemi. 19Mɨ́ ajta caí capu huatárɨ'ɨristareca'a a'iné jeíhua mú teɨte aitéujseɨre'eca'a tá'apueerta. Matɨ́'ɨj mi anticɨ́j japuan ɨ́ chi'ij. Matɨ́'ɨj mi ra'anáacu. A'ɨ́ɨ mú jɨ́n ayén huarɨ́j, matɨ́'ɨj ru'ucájtuaa japuan meru'ujtéca ɨ́ itari. A'uu mú ru'ucájtuaa huá'a tzajta'a ɨ́ teɨte a'u tɨ Jesús a'utéjvee. 20Tɨ́'ɨj Jesús hua'useíj a'ɨ́mej, aj pu i xaa ráamua'areeri'i tɨjɨ́n meté'atzaahuate'e, tzɨ́te'e. Tɨ'ɨj jí ayén tiraata'ixaa a'ɨ́jna tɨ cɨyáaxara'a tɨjɨ́n: ―Ne'amiigu, nu'uri timuaatá'uuni'iri'i ɨ́ pej hui jɨ́n auteájturaa ɨ́ Dios jemi. 21Majta me'ɨ́n ɨ́ fariseos, majta me'ɨ́n ɨ́ mej tí'imua'ata ɨ́ yu'uxari jetze, a'ɨ́ɨ mú autéjhuii mej miyen tí'imua'atze ɨ́ ru tzajta'a tɨjɨ́n: ―¿A'ataqui hui pɨ́rɨcɨ amɨ́jna mɨ ja'atɨ tɨ ayén a'ij pua'a ti'ixa ɨ́ Dios jemi? Seɨ́j pu'u na'a a'ɨ́ɨn pú'een tɨ tihua'utá'uuni'i ɨ́ teɨte ɨ́ mej jɨ́n auteájturaa ɨ́ Dios jemi. Dios pu a'ɨ́ɨn pú'een tɨ ayén tihua'utá'uuni'i. Ajta amɨ́n, capu hui a'ɨ́jna jɨ́n antiújmua'aree. 22Ajta a'ɨ́ɨn ɨ́ Jesús, a'ɨ́ɨ pu ruseɨ́j rú'umua'areereca'a a'ij mej tí'imua'ajca. Aj pu i ayén tihua'uta'íhua'uri'i tɨjɨ́n: ―¿A'iné hui 'een jɨ́n siyen tí'imua'atze ɨ́ ru tzajta'a? 23¿Ti'itáani jaítze'e muárɨ'eri? ¿Ni jaítze'e muárɨ'eri nej niyen tiraata'ixaate'en ne'ɨ́jna tɨ cɨyáaxara'a yee: “Nu'uri timuaatá'uuni'iri'i ɨ́ pej jɨ́n auteájturaa ɨ́ Dios jemi”, na'ari yee: “Ájchesi, mé pej tamé'en”? Jee xaa ne'u, ayée nu tejá'amua'ixaate'e ne'íjna jɨme'e tɨ jaítze'e muárɨ'eri nej niyen tiraata'ixaate'en yee: “Ájchesi, mé pej tamé'en.” 24’Aru sej si ráamua'aree ɨ́ nej hui xaa ne'ɨ́jna jɨ́n antínmua'aree íiyen chaanaca japua nej ni tihua'utá'auuni'i ɨ́ mej jɨ́n auteájturaa ɨ́ Dios jemi, ayée nu huárɨni inee i nej neajta huá'a jetze airáane ɨ́ teɨte. Aj pu i ayén tiraata'ixaa a'ɨ́jna tɨ cɨyáaxara'a tɨjɨ́n: ―Ne'amiigu, ayée nu tí'imua'ixaate'e tɨjɨ́n, ajchesi hui, pajta ra'anchuén mɨ á'utaatzi. Aricu á'uraa u á'ache. 25Jɨ́me'en pu'u ayén tiraata'ixaa, aj pu i a'ɨ́ɨn tɨ cɨyáaxara'a, ájchee, yá'uchuii ɨ́ rú'utaatzi. Tɨ'ɨj jí rɨ́'ɨ tiraatajé ɨ́ tavástara'a. Tɨ́'ɨj i á'uraa ɨ́ ruche. 26Naími'i mú naa rɨ́'ɨ tira'utaseíj. Jé'ecan mú rɨ́'ɨ tiraatá'a ɨ́ Dios jemi. Majta caí cha'a a'ij tirájteuve'e. Ayee mu'u tɨjɨ́n: ―Ijii tu xaa ti'itɨ́j huaseíj tɨ huápɨ'ɨ ruxe'eve'e. 27A'atzu a'ateevi'i, aj pu i Jesús áa a'uré'ene. Seɨ́j pu ja'atɨ huaseíj tɨ tí'iteji'ivi. Ayee pu ántehuaa tɨjɨ́n Leví. A'uu pu e'irájca u chi'ita a'u mej titejé'eji'ivi. Ayee pu tiraata'ixaa a'ɨ́jna ɨ́ Jesús tɨjɨ́n: ―Patá'aj hui nee jamuan á'uche'ecane'en. 28Tɨ'ɨj jí a'ɨ́ɨn Leví ájchee. Naími'i pu teje'etiá'a. Tɨ'ɨquí jamuan á'uraa. 29Tɨ'ɨquí a'ɨ́ɨn Leví tiu'uyé'este ɨ́ ruche a'ɨ́jna jɨme'e tɨ ari Jesús jamuan á'uche'ecan. Majta me'ɨ́n ɨ́ mej tí'iteji'ivi, majta seica, a'ɨ́ɨ mú huá'a jamuan tí'icua'acaa. 30Majta a'ɨ́ɨme ɨ́ fariseos, majta a'ɨ́ɨme ɨ́ mej tí'imua'ataca ɨ́ yu'uxari jetze tɨ Moisés ra'uyú'uxaca'a, a'ɨ́ɨ mú autéjhuii mej tihua'uxájtzi'i a'ɨ́mej jemi ɨ́ mej Jesús jamuan á'ujujhua'ane'e. Ayee mú tihua'utá'ixaa tɨjɨ́n: ―¿A'iné 'een jɨ́n siyen huá'a jamuan tí'icua'aca, seajta hui ye'eca jamuan ɨ́ mej tí'iteji'ivi, seajta huá'a jamuan ɨ́ mej a'ij pua'a rɨjcaa? 31Ajta a'ɨ́ɨn Jesús, ayée pu tiu'utaniú tɨjɨ́n: ―Ayee nu tejá'amua'ixaate'e. Ayee pu hui 'een jɨ́me'en ɨ́ teɨte ɨ́ mej á'ucɨ'ɨca'an jemin ɨ́ tɨ ya'anaca. Capu ruxe'eve'e mej á'ucɨ'ɨca'an jemin ɨ́ mej rɨ́'en sino a'ɨ́ɨme mu'u hui ɨ́ mej tí'icucui'i. 32Mɨ́ neajta inee, canu hui ne'ɨ́jna jɨ́n mú a'uvé'emej nej ni ne'ɨ́mej huatájeeve a'ɨ́mej ɨ́ tɨ ayén tihuá'amitɨejte'e yee xɨ́'epɨ'ɨn mú rɨcɨ sino a'ɨ́mej nu'u ɨ́ mej rú'umua'aree ɨ́ ru tzajta'a ɨ́ mej caí xɨ́'epɨ'ɨn rɨcɨ. 33Matɨ́'ɨj mi miyen tiraata'íhua'uri'i ɨ́ Jesús tɨjɨ́n: ―A'ɨ́ɨme ɨ́ mej hui Juan jamuan á'ujujhua'an, jeíhua mú rú'itzi'ivi, majta huatéjniuuve ɨ́ Dios jemi. Ayee mú che'atá mena'a rɨcɨ a'ɨ́ɨme ɨ́ fariseos. Mɨ́ majta, a'ɨ́ɨme hui ɨ́ mej á jamuan á'ujujhua'an, metijí'icua'aca, majta ye'eca, micu. 34Ajta a'ɨ́ɨn Jesús, ayée pu tihua'utá'ixaa tɨjɨ́n: ―Tɨ́ pua'a ja'atɨ huaténe'ɨche, a'ɨ́ɨ pu ajta ru'amiigustemua'a huatá'inen mej mi tiú'uyesten. Aj pu i tihuá'amicuan. ¿Ni qui miyen tiú'uritzi'ive'e tɨ́'ɨj auj huá'a jamuan a'utéveeca? Camu xaa ne'u. 35’Mɨ ajta, aúche'e pu hui teja'uré'enejsin a'ájna xɨcájra'a tɨ jetzen ra'ajján a'ɨ́jna tɨ huaténe'ɨche. Aj mú xaa amiigustemua'ame'en ru'ítzi'ive'en a'iné capu ché'e mé'e já'ahua'a ɨ́ hua'amiigu. A'iné naúche'e nu yé huatéjvee, camu hui ru'ítzi'ive'en ɨ́ ne'amiigustemua'a. 36Seɨ́j pu tihua'utá'ixaa ɨ́ niuucari tɨjɨ́n: ―Tɨ́ pua'a ja'atɨ rá'acu'une'epua ɨ́ cɨ́ɨxuri tɨ mí'ime'ecan, capu a'ɨ́jna jɨ́n rá'acu'une'epua cɨ́ɨxuri jɨme'e tɨ caí xɨ ja'anáj já'usini'i. Tɨ́ pua'a ayén a'ɨ́jna jɨ́n rá'acu'une'epua, a'ɨ́ɨ pu huatétzu'uta a'ɨ́jna ɨ́ cɨ́ɨxuri tɨ jéjcua tɨ́'ɨj huatéja'usini'ihua. Tɨ'ɨj jí ra'atésiujtza'anaxɨ'ɨsin ɨ́ tɨ mí'ime'ecan. Aj pu i, ɨ́ tɨ anásiujtza'ani, jaítze'e pu hui ve'etɨ́ a'ame. 37’Ajta camu miyen rɨjcaa mej ru'ucájtu'ani navij limeetajra'a tzajta'a tɨ cára'ajchira'a viinu ti'itɨ́j mej mauchén ráataahuaca'a. Tɨ́ pua'a miyen ráaruuren, a'ɨ́jna ɨ́ viinu tɨ jéjcua, a'ɨ́j pu jetze huiitaxɨ́jsin ɨ́ eeca, ajta autasiújtza'ani ɨ́ navij tɨ cára'ajchira'a. Aj pu i a'uvaɨ́jtzi ɨ́ navij, ajta hui ɨ́ viinu. 38A'ɨ́j pu hui jɨ́n ayén tiú'ujxe'eve'e tɨ iru'ucájtu'ani navij tzajta'a tɨ jéjcua a'ɨ́jna ɨ́ viinu tɨ ajta jéjcua, icu. 39’Ajta, matɨ́'ɨj ra'anti'í ɨ́ viinu tɨ mí'ime'ecan, capu ja'atɨ ayén raxɨ́'eve'e tɨ ra'antiyé'en ɨ́ tɨ jéjcua a'iné ayée pu tirá'amitɨejte'e tɨ jɨ́me'en yee jaítze'e pu hui ajme'ira'a ɨ́ tɨ mí'ime'ecan caí ɨ́ tɨ jéjcua. ―Ayee pu tihua'utá'ixaa a'ɨ́jna ɨ́ Jesús.

will be added

X\