San Lucas 4

1Tɨ́'ɨjí Jesús jemi huateájturaa ɨ́ xɨéjniu'ucare'ara'an ɨ́ Dios. Tɨ́'ɨj ji a'uun u e'erájraa u Jordán. Tɨ'ɨj jí xɨéjniu'ucare'ara'an pu ya'uví'itɨ a'u tɨ caí é'e ti'itɨ́j. 2A'uu pu é'etee a'achú cumu hua'apuate xɨcaj. Ajta a'ɨ́ɨn tiyaaru'u, a'ɨ́ɨ pu i tiú'ujtesi'ire'eca'a tɨ raamuá'itɨn tɨ́'ij auté'ɨtzen ɨ́ Dios jemi. Ajta a'ɨ́ɨn Jesús, capu tí'icua'acáa tɨ́j na'a tɨ a'uun é'etee. Tɨ́'ɨj jí te'era'astéesime'eca ɨ́ hua'apuate xɨcaj, temua'a pu jeíhua tiu'utá'icuataca'a. 3Tɨ'ɨj jí ayén tiraata'ixaa ɨ́ tiyaaru'u tɨjɨ́n: ―Tɨ́ pua'a hui yaujra'an pej pú'eene'en ɨ́ Dios, patá'aj raata'aíjte'en mɨ tetej tɨ pan huateújtaahua. 4Jesús pu ayén tiu'utaniú tɨjɨ́n: ―Ayee pu té'eyu'usi'i ɨ́ yu'uxari jetze tɨjɨ́n: “Ɨ́ teáata'a, capu pan na'a jɨ́n ruuri a'ame.” 5Tɨ'ɨj jí tiyaaru'u pu ya'uví'itɨ ɨ́ jɨrí japua. Tɨ́'ɨj i tiraataseíjra nainjapua tɨ́j na'a ve'etɨ́ yen huatacá'a ɨ́ chaanaca japua, matɨ́j mena'a pua'amecɨé yen huachéjme i chaanaca japua. 6- 7Aj pu i ayén tiraata'ixaa tɨjɨ́n: ―Tɨ́ pua'a piyen huárɨni pej títunuta ineetzi jemi, pajta naateánajche, nain nu muaatapuaíjve'esin pej mú'ee tíhua'uta'aíjte'en, tɨ ij timuáacɨ'ɨti naíjmi'i tɨ́j na'a tɨ naa seijre'e tɨ huá'a jetze seijre'e. Ayee nu hui rɨni a'iné a'ɨ́j nu jɨ́n antínmua'aree, nej niyen raatapuaíjve'en ɨ́ ja'atɨ nej á'apuaijve'e. 8Aj pu i Jesús ayén tiraata'ixaa tɨjɨ́n: ―Ayee pu té'eyu'usi'i tɨjɨ́n yee: “Setá'aj siyen sena'a rateáanajche ɨ́ tavástara'a ɨ́ Dios. A'ɨ́j xu'u huatévaɨre'en.” 9- 10Tɨ'ɨj jí ajtahua'a a'ɨ́ɨn ɨ́ tiyaaru'u ya'uví'itɨ já'ahua'a yee, a'ájna Jerusalén. An pu ra'antiví'itɨ japuan u teyujta'a, japuan ɨ́ tɨ jaítze'e antípiti. Ayee pu tiraata'ixaa tɨjɨ́n: ―Tɨ́ pua'a hui pe yaujra'an pepú'eene'en ɨ́ Dios, ancájvetzi múucɨ, a'iné ayée pu té'eyu'usi'i ɨ́ yu'uxari jetze tɨjɨ́n: Dios pu á huaja'uta'íti ɨ́ mej jemin tí'ivaɨre'e mej mi muáacha'ɨn. 11Memua'ancuré'evi'ira mú'eetzi pej pi caí á e'ejvá'ɨtzɨ'ɨn. Aj mú mi muatétatza tɨ ij caí ti'itɨ́j a'ij muáaruure. 12Tɨ'ɨj jí Jesús ayén tiu'utaniú tɨjɨ́n: ―Ayee pu té'eyu'usi'i tɨjɨ́n: “Capej ti'itɨ́j jɨ́n a'ij tí'ira'ihua'ura ɨ́ á'a Dios aisí tɨ pua'a ayén huárɨni a'ij pej tí'ijxe'eve'e mú'ee.” ―Ayee pu tiraata'ixaa a'ɨ́jna ɨ́ Jesús. 13Tɨ́'ɨj nain antipuá'ari ɨ́ tiyaaru'u, tɨ ti'ihuaújtesi'ijre, aj pu i á'uraa. Capu cha'a a'uré'enineica'a jemin ajta caí teja'ure'enén ja'anáj tɨ pua'a raaxɨ́'epɨ'ɨntare tɨ ajtahua'a huataújtese'en. 14Tɨ'ɨj jí Jesús á'uraa a'ujna Galilea. Ajta ɨ́ xɨéjniu'ucare'ara'an ɨ́ Dios jemin pu huateájturaa. Ajta nainjapua tɨ a'uun huatacá'a, jeíhua mú teɨte ráamua'areeri'i a'ij tɨ huarɨ́j. 15A'ɨ́ɨ pu tihua'umuá'ate a'ujna hua'atéyujta'a. Majta me'ɨ́n ɨ́ teɨte, a'ɨ́ɨ mú rɨ́'ɨ tiraatá'a me'ɨ́jna. 16Tɨ'ɨj jí a'uun a'ará'a u Nazarét, a'u tɨ a'uvé'ese. Tɨ́'ɨj teja'uré'ene a'ájna xɨcájra'an jetze mej pua'a ruse'upi, a'úu pu teyujta'a a'uteájrupi tɨ́j tí'ijrɨ'ɨrejca'a. Tɨ'ɨj jí a'utéechaxɨ tɨ ij hua'utánamuajriste'en. 17Matɨ́'ɨj mi raatapíj ɨ́ yu'uxari tɨ jíri'i tɨ Isaías teecan ra'uyú'uxaca'a, a'ɨ́jna tɨ tí'ixaxa'ata'a ɨ́ Dios jetze me'ecan. Tɨ'ɨj jí raatáxɨjtaca'a, aj pu rá'uteu a'ij tɨ té'eyu'usi'i tɨ ayén tɨ jɨ́me'en yee: 18Ɨ́ xɨéjniu'ucare'ara'an ɨ́ Dios, a'úu pu hui huateáturaasin neetzi jemi, a'iné a'ɨ́ɨ pu na'antíhuau, nej ni tihua'utá'ixaate'en a'ɨ́mej ɨ́ mej caí a'ij tí'ijviicua'i ɨ́ niuucari jɨme'e ɨ́ mej jɨ́n huataújtemua'ave'esin. A'uu pu hui neja'uta'íteca'a nej nu'u tihua'utá'ixaate'en a'ɨ́mej ɨ́ mej námi'i tɨjɨ́n yee nu'uri amua'irátuaasin. Ajta nej nu'u tihuá'uhuaate'en ɨ́ mej aracúcu'unijmee mej mi majtáhua'a mé uunéjne'eri, ajta nej nu'u huá'a japua huániuuni a'ɨ́mej ɨ́ mej rajpuaíjtzi. 19Ajta nej nu'u hua'utá'ixaate'en tɨjɨ́n: “Ijii pu'uri xaa teja'uré'ene a'ɨ́jna ɨ́ nine'ira'a jetze ɨ́ tɨ hui tavástara'a rɨ́'ɨ tihua'utá'asin.” Ayee pu tira'ujíjve ɨ́ yu'uxari jetze. 20Tɨ'ɨj jí ratéejire ɨ́ yu'uxari, tɨ́'ɨj i raatapíj ɨ́ tɨ tí'ivaɨre'e u teyujta'a. Ajta a'ujyeíjxɨ. Naími'i matɨ́j mena'a a'úu mej huiiráte'eca'a, a'ɨ́ɨ mú raseíjraca'a. 21Aj pu i a'utéjche tɨ ayén tihua'utá'ixaate'en tɨjɨ́n: ―Ijii pu hui ayén te'araúraste mú'ejmi jemi a'ij tɨ té'eyu'usi'i a'íjna jetze ɨ́ sej seri ráanamuajri'i. ―Ayee pu tiu'utaxájtaca'a a'ɨ́jna ɨ́ Jesús. 22Naíjmi'ica pu hua'aránajcheca'a. A'ɨ́ɨj mú jɨ́n naa rɨ́'ɨ tira'utaseíj a'ɨ́jna jɨme'e tɨ naa namuajre'e ɨ́ niuucari tɨ raataxájtaca'a. Ayee mú tiú'urihua'uraca'a tɨjɨ́n: ―¿Ni caí a'ɨ́ɨn pú'een ɨ́ yaujra'an ɨ́ José? ¿A'iné hui auj tí'irɨ'ɨri? 23Tɨ'ɨj jí Jesús ayén tihua'utá'ixaa tɨjɨ́n: ―Jee tzɨ́te'e, ayée pu hui tiná'amitɨejte'e ineetzi sej siyen tinaatá'ixaate'esin a'íjna i niuucari tɨ ayén namuajre'e tɨjɨ́n: “Mɨ́ pej tí'ihua'ataca, patá'aj tihuá'ahuaate'en aseɨ́j. Patá'aj piyen che'atá pena'a huárɨni ayajna pej é'eme'ecan a'ij pej nu'u peri tiú'uruu a'ujna já'ahua'a Capernaúm ɨ́ tej teri ráamua'areeri'i.” 24’Ayee nu hui tejá'amua'ixaate'e tzáahuati'ira'a jɨme'e, camu ja'anáj ra'ancuré'evi'itɨ ja'atɨ tɨ Dios jetze me'ecan tí'ixaxa'a a'ɨ́ɨme ɨ́ mej me'uun huachéjme a'ujna tɨ é'eme'ecan a'ɨ́jna ɨ́ ja'atɨ. 25’Jee tzɨ́te'e, ayén ti'ayajna, ajmí'i tɨ auj seijre'eca'a a'ɨ́jna ɨ́ Elías, mu'iitɨ́ mú hui seijre'eca'a íiye Israél a'ɨ́ɨme ɨ́ 'uuca mej ruséɨjta muá'araa. A'ájná'ɨmua, pu'uri mú auumé'e a'achú cumu huaíca nine'ira'a japuan já'ita'a mej caí ché'e viiye. Ajta, jeíhua pu huatújri'ihuaca'a nainjapua tɨ́j na'a a'uun tɨ huatacá'a u Israél. 26’Mɨ́ ajta, a'ɨ́ɨn Dios capu hui raata'íteca'a a'ɨ́jna ɨ́ Elías tɨ huá'a jemi á'ume'en a'ɨ́mej jemi ɨ́ 'uuca ɨ́ mej Israél jetze é'eme'ecan sino ayée pu tiraata'aíj tɨ a'uun á'ume'en a'ɨ́jna jemi ɨ́ 'ɨ́ita'a tɨ ruséɨjta já'araa, a'ɨ́jna tɨ a'uun é'echejca'a u Sarepta, chajta'a tɨ a'uun seɨ́j chuéjra'a japua e'ejtéme'ecantaca'a tɨ ayén téja'arájtehuaa tɨjɨ́n Sidón. 27’Ajta tɨ́'ɨj auj ti'itéveeca'a a'ɨ́jna ɨ́ Eliseo tɨ Dios jetze me'ecan tí'ixaxa'ata'a, mu'iitɨ́ mú hui tí'icucui'ica'a ɨ́ teɨte a'ɨ́jna jɨme'e ɨ́ tɨ tineájxɨ huá'ahua'ira'a jetze. Mu'iitɨ́ mú seijre'eca'a íiyen Israél. Mɨ́ ajta, capu ja'atɨ tihuá'uhuaa sino a'ɨ́ɨ pu'u, a'ɨ́jna ɨ́ Naamán, Siria tɨ é'eme'ecan. ―Ayee pu tihua'utá'ixaa a'ɨ́jna ɨ́ Jesús. 28Jɨ́me'en mu'u ráanamuajri'i ɨ́ teɨte mej teyujta'a huiráatei, matɨ́'ɨj mi naími'i huataníniu'ucacuca'a. 29Ca'anacan mú ájhuiixɨ. Matɨ́'ɨj mi ya'uví'itɨ ca'anéeri jɨme'e, mej á pua'acɨé ru'irájtuaani u chajta'a jetze. An mú ya'uré'eneijte a'u tɨ e'encátee ɨ́ jɨrí jetze ɨ́ tɨ japuan huachájta'a. An mú ra'ancarɨéniche'e a'u tɨ e'encátee. 30Mɨ́ ajta a'ɨ́ɨn Jesús, já'ita'a pu huá'a jetze tanéj. Tɨ'ɨj jí á'uraa. 31Tɨ'ɨquí a'uun a'ucáane u Capernaúm, chajta'a tɨ a'uun jetze ajtéme'ecan u Galilea. Tɨ́'ɨj teja'uré'ene a'ájna xɨcájra'a mé jetzen ruse'upi, a'ɨ́ɨ pu tihua'umuá'ate. 32Jéihua pu huá'a jetze ráavatzɨ ɨ́ niuucari a'iné tɨ́j ayén tihua'utá'ixaa, yee pu tihua'utámitɨejte'e tɨjɨ́n: ―Xɨee tɨ cu ve'ecán jɨ́n ti'itéjvee. 33Meenti seɨ́j ɨ́ teáata'a, a'úu pu a'utéveeca'a u teyujta'a. Tiyaaru'u pu tzajta'an seijre'eca'a, tɨ a'ij pua'a 'een. Ca'anín pu jɨ́n raatajé a'ɨ́jna ɨ́ ja'atɨ a'ɨ́jna ɨ́ Jesús. 34Ayen tɨjɨ́n: ―Mú'ee, ¿a'iné ti'itɨ́j pej té'umua'aree itejmi jemi, mú'ee Jesús, mɨ pej hui Nazarét é'eme'ecan? ¿Ni piyen een jɨ́n yé taméj pej pi téjmi antipuá'ajte'en? Némuamua'ate inee, ja'atɨ pej pɨ́rɨcɨ, mɨ pej Dios jemi rɨ́'ɨ tí'iseijre'e. 35Aj pu i Jesús jeíhua ra'ajté'axɨ ɨ́ tiyaaru'u tɨjɨ́n: ―Capej ti'itɨ́j xajta. Huirájraa hui mɨ tevi jetze. Ajta a'ɨ́ɨn tiyaaru'u, a'ɨ́ɨ pu rá'arɨe á chuaata'a mejseíiraca'a ɨ́ teɨte. Tɨ'ɨj jí, caí a'ij ráaruu ɨ́ tevi, aj pu i huirájraa. 36Naími'i mú rɨ́'ɨ tira'utaseíj ɨ́ teɨte. Matɨ́'ɨj mi miyen tiu'utaú'ixaa tɨjɨ́n: ―¿Ti'itáani niuucarijra'a jɨ́n ti'ixa? A'ɨ́ɨ pu hui tihuá'aijte'e ɨ́ tiyáaru'use. Xɨee tɨ cu a'ɨ́jna jɨ́n antiújmua'areere, a'iné rumuárɨ'eri'ire'ara'an pu jɨ́n tí'imuarɨ'e mej mi huirácɨɨne ɨ́ tiyáaru'use ɨ́ teɨte tzajta'a. ―Ayee mú tiu'utaxájtaca'a. 37Ajta nainjapua tɨ a'uun huatacá'a, naími'i mú ráamua'areeri'i a'ij tɨ Jesús ti'itɨ́j huáruu. 38Tɨ́'ɨj jí huirájraa a'ɨ́jna ɨ́ Jesús a'ujna u teyujta'a. Tɨ'ɨj jí a'uun a'ará'a ɨ́ Simón tɨ é'eche. Ajta a'ɨ́ɨn ɨ́ mu'uneára'an ɨ́ Simón, a'ɨ́ɨ pu tí'icui'ica'a. Pɨ́stacare'e a'ɨ́jna ɨ́ 'ɨ́ita'a. Matɨ́'ɨj mi raatáhuaviiri'i me'ɨ́jna ɨ́ Jesús tɨ nu'u tiráahuaate'en. 39Tɨ́'ɨj ji Jesús aicaújtutzi a'ɨ́jna jemi. Tɨ'ɨj jí ra'ajté'axɨ ɨ́ tɨ jɨ́n tí'icui'i. Aj pu i huateápua'areca'a ɨ́ cuí'ini'ira'a. Jɨ́me'en pu'u huateápua'areca'a ɨ́ cuí'ini'ira'a, aj pu i ájchee a'ɨ́jna tɨ tí'icui'ica'a. Tɨ'ɨj jí a'ɨ́ɨn tihua'umí. 40Tɨ́'ɨj huaré'ecɨeenareca'a ɨ́ xɨcaj, a'ɨ́ɨme ɨ́ teɨte hua'uré'enejte'axɨ ɨ́ Jesús jemi naíjmi'ica ɨ́ mej ti'icúcui'ijme. Capu tí'iseicaj na'a ɨ́ cuí'ini'ira'a. A'ɨ́ɨ pu hua'ajtamuárɨ'exɨ seɨj ajta seɨj. Tɨ'ɨj jí naíjmi'ica tiú'uhuaa. 41Majta me'ɨ́n ɨ́ tiyáaru'use ɨ́ mej teɨte tzajta'a seijre'eca'a, naíjmi'i mú huiráacɨ. Matɨ́'ɨj mi miyen ca'anín jɨ́n tiraatajé tɨjɨ́n: ―Mú'ee pe yaujra'an pú'een ɨ́ Dios. Mɨ́ ajta a'ɨ́ɨn ɨ́ Jesús, a'ɨ́ɨ pu hua'ajté'axɨ. Capu hua'utá'a mej tiu'utaxáj a'iné méjmua'areereca'a tɨjɨ́n a'ɨ́ɨ pu a'ɨ́ɨn pɨ́rɨcɨ Dios tɨ án yá'ujra ɨ́ ɨpuari japua. 42Tɨ́'ɨj tapuá'arijme'eca, aj pu i huirájraa u chi'ita ɨ́ Jesús. A'uu pu a'ará'a a'u tɨ caí é'e ti'itɨ. Majta me'ɨ́n ɨ́ teɨte, a'ɨ́ɨ mú ráahuausime'e. Matɨ́'ɨj mi me'uun a'ará'a a'u tɨ a'ij éene'e. Méjxe'eve'eca'a tɨ caí á'ura'ani, tɨ a'uun a'uteáturan a'ɨ́mej jemi. 43Mɨ́ ajta a'ɨ́ɨn Jesús, ayée pu tihua'utá'ixaa tɨjɨ́n: ―Ayee pu ajta tiú'ujxe'eve'e nej tihua'utá'ixaate'en ɨ́ seica ɨ́ teɨte mej méyee huachéjme ne'ɨ́jna jɨme'e ɨ́ niuucari tɨ rɨ́'ɨ tihua'utá'asin, ɨ́ tɨ ajta jɨ́me'en raxájta tɨ a'ɨ́ɨn Dios yen huataseíjre'esin íiyen chaanaca japua tɨ i yen tiu'uta'aíjta tɨ́j na'a ve'etɨ́ yen seijre'e. Ayee nu hui 'een jɨ́n mú a'uvé'emej. ―Ayee pu tihua'utá'ixaa. 44Ajta a'ɨ́ɨn Jesús, aúche'e pu tihuá'a'ixaate'eca'a u tihua'atéyujta'a jetze tɨ́j na'a a'uun tɨ huatacá'a u Judea.

will be added

X\