San Lucas 24

1Tɨ́'ɨjta a'ájna teja'uré'ene ɨ́ tújca'ari ta'amuájca i itɨeeri jetze. Iíye'e mu'u u á'uju'un me'ɨ́jna ɨ́ 'uuca mej tejá'utɨɨ ɨ́ mej rɨ́'ɨ tiú'uruu ɨ́ tu'upi tɨ naa teáarɨ́'e. Matɨ́'ɨj mi u á'uju'un a'u tɨ aúucun. 2Matɨ́'ɨj mi me'uun a'ará'a. Aj mú mi raaseíj a'ujna tɨ aúucun tɨ pua'a ari te'entácuuni'i. Ajta a'ɨ́ɨn ɨ́ tetej ɨ́ mej ra'itéjmua, pu'uri ja'atɨ u yé'enxɨɨraca'a. 3Matɨ́'ɨj mi a'uun a'uteájrupi a'u tɨ aúucun. Aru camu ráateu ɨ́ tévira'an ɨ́ Jesús. 4Majta mauj me'ɨ́jna jɨ́n tí'imua'ajca a'ij tɨ ti'itɨ́ huarɨ́j a'ɨ́jna jɨme'e ɨ́ mɨ'ɨchi, jíye'itzi jɨ́n mú hua'apua huataseíjre ɨ́ teteca a'ɨ́mej jemi ɨ́ 'uuca. Ayee mú cuaiínavi'in ti'itéchejca'a. Ayee pu ti'itemastájye'icaa cumu mej témaxcava'ara'an. 5Jé'ecan mú tiu'utátziɨn ɨ́ 'uuca. A'ɨ́j mú jɨ́n títunutaxɨ, majta aicaújtuuxɨ. Majta a'ɨ́ɨme ɨ́ teteca, ayée mú tihua'utá'ixaa tɨjɨ́n: ―¿A'iné sej si 'een jɨ́n siyen rahuauhuau huá'a tzajta'a ɨ́ mɨ'ɨchite seɨ́j tɨ ari ruuri? 6- 7Capu hui ye'e já'ahua'a, a'iné pu'uri ajtahua'a huatarúj. ¿Ni hui secaí ramua'aree a'ij tɨ tejámuaatá'ixaa tɨ́'ɨj auj a'utéveeca'a mú'ejmi jemi a'ujna u Galilea yee tɨ ayén tiú'ujxe'eve'e mej tiu'utátuiire'en a'ɨ́jna tɨ huá'a jetze airáane ɨ́ teɨte huá'a jemi ɨ́ mej a'ij pua'a titetiújcha'ɨɨ mej mi rá'utatan? Ajta yee huaíca xɨcaj tzajta'a pu ajtahua'a nu'u huatarújsin. ―A'ɨ́ɨ mú teteca miyen tihua'utá'ixaa. 8Majta a'ɨ́ɨme ɨ́ 'uuca, aj mú mi ra'utámua'areeri'i a'ij tɨ tihua'utá'ixaa. 9Matɨ́'ɨj mi huiráacɨ a'u tɨ aúucun. Matɨ́'ɨj mi a'ucɨ́j ruche. Aj mú hua'utá'ixa a'ɨ́mej ɨ́ mej tamuáamuata'a japuan seɨ́j ará'ase, ajta ɨ́ seica. Nain mú hua'utá'ixa a'ij mej ti'itɨ́j tiu'uséij. 10A'ɨ́ɨme ɨ́ 'uuca, a'ɨ́ɨ mú a'ɨ́ɨn pú'een, ɨ́ María, Magdala tɨ é'eme'ecan, ajta a'ɨ́ɨn ɨ́ Juana, ajtahua'a seɨ́j ɨ́ María tɨ náànajra'an pú'een a'ɨ́jna ɨ́ Jacobo, majta seica ɨ́ 'uuca. A'ɨ́ɨ mú miyen tihua'utá'ixaa a'ɨ́mej ɨ́ mej Jesús hua'antíhuau. 11Mɨ́ ajta caí a'ɨ́ɨme, camu huá'antzaahua ɨ́ 'uuca a'iné capu a'ij tihuá'amitɨejte'eca'a a'ij mej tiu'utaxájtaca'a. 12Ajta a'ɨ́ɨn Pedro, a'ɨ́ɨ pu ájchee Tɨ'ɨj jí a'utɨéechejraa a'ájna a'u tɨ aúucun. Tɨ́'ɨj i a'uteájrupi. Tɨ'ɨj jí aicaújtutzi, tɨ́'ij cɨ́ɨxuri tiu'uséij. Aa pu rujɨ́ɨmua'a tí'ijpiica'a á chuaata'a. Tɨ'ɨj jí á'uraa. Jéihua pu tí'imua'ajca ɨ́ ru tzajta'a a'ij tɨ ti'itɨ́ huarɨ́j. 13A'ájna xɨcájra'a jetze, mé hua'apua ɨ́ mej huá'a jetze ajtéme'ecan a'ɨ́ɨme ɨ́ mej Jesús jamuan á'ujujhua'ane'e, a'úu mú aujú'ucaa chajta'a tɨ ayén téja'arájtehuaa tɨjɨ́n Emaús. A'atzu pu a'ɨmuá pɨ́tejá'arɨcɨ a'ujna u Jerusalén, a'achú cumu tamuáamuata'a kilómetros. 14Ayee mú tiu'uxájtajme'e nain a'ij tɨ ti'itɨ́j huarɨ́j. 15Maúche'e mú tiu'uxáatajme'eca, majta ti'ihuaúrihuaurájme'e rujɨ́ɨmua'a, tɨ́'ɨj a'ɨ́ɨn Jesús ajteáxɨɨreca'a tɨ 'ij huá'a jamuan huamé'en. 16Aru capu hua'utá'a mej ráamua'ati. 17Tɨ́'ɨj i Jesús ayén tihua'uta'íhua'uri'i tɨjɨ́n: ―¿Ti'itájni a'ij setiú'urixaate'e siyen huajú'un? Matɨ́'ɨj mi huatéhuiixɨ, mua'icaujtutájme'e. 18Ajta seɨ́j tɨ ayén ántehuaa tɨjɨ́n Cleofas, a'ɨ́ɨ pu ayén tiu'utaniú tɨjɨ́n: ―¿Ni pecaí ramua'aree a'ij tɨ ti'itɨ́ huarɨ́j íjii itejmi jemi? ¿Ni pecaí mú'ee pe'ɨ́n pú'een ɨ́ pej huayé'i pena'a pej caí ti'itɨ́j mua'aree a'ij tɨ ti'itɨ́ taruure itejmi? 19Aj pu i ayén tihua'uta'íhua'uri'i tɨjɨ́n: ―¿Ti'itáani a'ij huarɨ́j? Matɨ́'ɨj mi miyen tiraata'ixaa tɨjɨ́n: ―A'ɨ́jna jɨme'e ɨ́ Jesús, Nazarét tɨ é'eme'ecan. A'ɨ́ɨ pu hui tí'ixaxa'ata'a ɨ́ rumuárɨ'eri'ire'ara'an jɨme'e ɨ́ Dios jetze me'ecan. Ajta jeíhua pu ayén tiú'uruu tɨ huápɨ'ɨ ruxe'eve'e, mejseíiraca'a ɨ́ teɨte. 20Majta a'ɨ́ɨme ɨ́ mej tí'aijta u teyujta'a, majta a'ɨ́ɨme ɨ́ mej tí'ita'aijte'e, a'ɨ́ɨ mú hui Jesús tiu'utátui mej mi tiu'utá'an mej raajé'ica. Matɨ́'ɨj mi rá'utatai. 21’Mɨ teajta iteen, ayée tu hui tí'ijxe'eve'eca'a tɨ a'ɨ́ɨn pu'éene'e á'ame'enche'e tɨ tu'irájtuaani itejmi i tej Israél jetze ajtéme'ecan. Pu'uri huaíca xɨcaj tejauume ɨ́ mej rá'utatai. 22’Majta seica juuca ɨ́ mej téjmi jetze ajtéme'ecan, jeíhua mú a'ij pua'a te'utaseíjra. Iíye'e mú u a'atanéj a'u mej ye'avá'ana me'ɨ́jna ɨ́ Jesús. 23Aru camu ráateu ɨ́ mɨ'ɨchi. Matɨ́'ɨj mi huaré'acɨ. Aj mú mi taata'ixaa tɨjɨ́n seica mú huataseíjre a'ɨ́mej jemi. A'ɨ́ɨ mú nu'u me'ɨ́n pú'een ɨ́ mej ta japua tí'ivaɨre'e. Ayee mú eeri'i tihua'utá'ixaa tɨ nu'u ari ajtahua'a huatarúj a'ɨ́jna ɨ́ Jesús. 24Majta seica ɨ́ mej ta jamuan á'ujujhua'an, a'ɨ́ɨ mú majta u a'atanéj a'u mej ye'avá'ana. Ayee pu éene'e a'ij mej tiu'utaxájtaca'a a'ɨ́ɨme ɨ́ 'uuca. Aru camu hui á'a ya'useíj me'ɨ́jna ɨ́ Jesús. ―Ayee mú tiraata'ixaa a'ɨ́ɨme ɨ́ mej hua'apua. 25Ajta a'ɨ́ɨn, ayée pu tihua'utá'ixaa tɨjɨ́n: ―A'ij xu pua'a tité'ujmuajte mú'een. Caxu a'ij tirájteuve mɨ ru tzajta'a sej si ca'anacan tirá'antzaahuate'en nain tɨ́j na'a a'ij mej tiu'utaxájtaca'a a'ɨ́ɨme ɨ́ mej Dios jetze me'ecan tí'ixaxa'ata'a. 26’¿Ni caí ayén tiú'ujxe'eve'eca'a tɨ ij amuacaí ayén tirajpuaíitzi á'ara'ani a'ɨ́jna ɨ́ tɨ ajta Dios a'án ya'ujyeíjtza ɨ́ ɨpuari japua, tɨ ij á'iyen te'enteárute a'ɨ́jna jɨme'e tɨ tiu'uta'aíjta íiyen chaanaca japua, ajta u ta japua, ajta nainjapua? 27Aj pu i ayén tihua'utá'ixaa a'ɨ́jna ɨ́ Jesús temua'a naa nain tɨ́j na'a tɨ té'eyu'usi'ihuaca'a ɨ́ yu'uxari jetze a'ɨ́jna jɨme'e, tɨ́j na'a tɨ a'ɨ́ɨn ra'uyú'uxaca'a a'ɨ́jna ɨ́ Moisés teecan, ajta matɨ́j mena'a ɨ́ mej tiu'utaxájtaca'a a'ɨ́ɨme ɨ́ mej Dios jetze me'ecan tí'ixaxa'ata'a. 28Matɨ́'ɨj meri á vejli'i aujú'ucaa a'ájna chajta'a a'u mej ará'aiixa, aúche'e pu huamé'ecaa a'ɨ́jna ɨ́ Jesús, ayée pu cumu mú pu á'ayee a'umé'e a'ame. 29Ajta a'ɨ́ɨme, jeíhua mú ca'aníjra'a raatá'a tɨ a'uun huateáturan. Ayee mú tiraata'ixaa tɨjɨ́n: ―Patá'aj yé huateáturan téjmi jemi, a'iné pu'uri téchuijxari, ajta ari tɨ́n tétɨca'ari. Tɨ́'ɨj i a'uun a'uteájrupi tɨ ij huá'a jamuan a'uun a'uteáturan. 30Tɨ́'ɨj i Jesús ayén huarɨ́j tɨ́'ɨj a'ɨ́ɨn aúuca'atii huá'a jamuan á vejli'i meesa jetze. Tɨ́'ɨj i raatiɨ́'ɨpɨi ɨ́ pan, ajta rɨ́'ɨ tiraatá'a ɨ́ Dios. Aj pu i ra'antítaaraxɨ ɨ́ pan. Tɨ́'ɨj i a'utéjche tɨ hua'uta'ɨ́'ɨpɨ'ite'en. 31Jɨ́me'en pu'u hua'utá'ɨ́'ɨpɨ'i, aj mú mi raamuá'a. Aj pu i e'ehuaújpua'arixɨ mejseíiraca'a. 32Matɨ́'ɨj mi miyen ti'itiúrihua'uri'i tɨjɨ́n: ―¿Ni caí ú'utzunajca'a ɨ́ taxɨejniu'uca ɨ́ ta tzajta'a, ajta ca'aníjra'a yú huataseíjre u ta tzajta'a tɨ́'ɨj a'ɨ́ɨn tiu'uxájtajme'e ta jamuan ɨ́ juye jetze, tɨ ayén tí'ita'ixaate'ecaa a'ij tɨ huataújmua'a ɨ́ tɨ té'eyu'usi'i ɨ́ yu'uxari jetze? 33Matɨ́'ɨj mi ájhuiixɨ. Ca'anacan mú huaré'acɨ u Jerusalén. A'uu mú huá'uteu a'ɨ́mej ɨ́ mej tamuáamuata'a japuan seɨ́j mej ará'ase, majta ɨ́ seica ɨ́ mej huá'a jamuan á'ujujhua'ane'e. Naími'i mú tiújseɨj me'újna. 34Majta me'ɨ́jna ɨ́ mej me'uun a'uté'uuca'a u Jerusalén, ayée mú tihua'utá'ixaa ɨ́ mej hua'apua tɨjɨ́n: ―Ayej xaa ne'u ti'ayajna. Tavástara'a pu ajtahua'a a'itáraa huá'a tzajta'a ɨ́ mɨ'ɨchite. Ajta huataseíjre jemin a'ɨ́jna ɨ́ Simón. 35Majta a'ɨ́ɨme ɨ́ mej hua'apua, a'ɨ́ɨ mú tihua'utá'ixaa a'ij tɨ ti'itɨ́ huarɨ́j matɨ́'ɨj me'uun aujú'ucaa ɨ́ juye jetze, ajta a'ij mej ye'í tiraamuá'a tɨ́'ɨj a'ɨ́ɨn ra'antítaaraxɨ ɨ́ pan. 36Maúche'e mú ti'ixáataca'a me'ɨ́jna jɨme'e tɨ́'ɨj a'ɨ́ɨn Jesús huataseíjre huá'a jemi. A'uu pu já'ita'a huatéechaxɨ. Aj pu i ayén tihua'utateújte tɨjɨ́n: ―Ché'e huatéepua'are ɨ́ a'amua tzajta'a. 37Jé'ecan mú huajɨ́jxɨca'a. Majta tiu'utátziɨn a'iné ayée pu huá'aseijrate'ecaa. Cu xɨee mej cu mɨ́'ɨchi seijra. 38Ayee pu tihua'utá'ixaa tɨjɨ́n: ―¿A'iné 'een jɨ́n a'ij pua'a amuaatá'a? ¿A'iné sej si caí xɨ té'atzaahuate'e? 39Casi'i, i nemuajca'a jetze, ajta i ne'ɨ́ɨca jetze. Nee nu ne'ɨ́n pú'een. Setá'aj na'ajtamuárɨ'en sej si siyen raaseíj. Seɨ́j tɨ mɨ'ɨchi, capu ayén nexɨ́'ej ti'itéhua'ira'a, capu ajta ayén nexɨ́'ej ti'itéjcari. Xu'uri neseij nej xaa téhua'ira'a, neajta téjcari. ―Ayee pu tihua'utá'ixaa a'ɨ́jna ɨ́ Jesús. 40Tɨ́'ɨj ayén tihua'utá'ixaa, aj pu i ayén tihua'utaseíjra ɨ́ rumuájca'a jetze, ajta ru'ɨ́ɨca jetze. 41Majta a'ɨ́ɨme, camu xɨ rá'antzaahuate a'iné jeíhua mú a'ij pua'a yá'useijraca'a, majta rútemua'ave'eca'a. Aj pu i ayén tihua'uta'íhua'uri'i tɨjɨ́n: ―¿Ni secaí ti'itɨ́j tícha'ɨɨ ɨ́ nej ráacua'ani? 42Matɨ́'ɨj mi seɨ́j raatá'a ɨ́ hua'í tɨ huá'ijchi'i. 43Tɨ́'ɨj i ra'ancuré'echui. Aj pu i ráacua mejseíiraca'a a'ɨ́ɨme. 44Ayee pu tihua'utá'ixaa tɨjɨ́n: ―Ayee nu tejámuaatá'ixaa netɨ́'ɨj a'amua jemi huácatii tɨ ayén ruxe'eve'eca'a tɨ nain jɨ́n te'araúrasten a'ij tɨ te'uyú'uxaca'a neetzi jɨme'e a'ɨ́jna ɨ́ Moisés, majta a'ɨ́ɨme ɨ́ mej Dios jetze me'ecan tí'ixaxa'ata'a, ajta jetzen ɨ́ tihuá'achuiica. 45Aj pu i hua'utá'a mej mi yaú'itɨée muá'ara'ani a'ij tɨ té'eyu'usi'i ɨ́ yu'uxari jetze. 46Ayee pu tihua'utá'ixaa tɨjɨ́n: ―Ayee pu té'eyu'usi'i ɨ́ yu'uxari jetze nej nu'u niyen tirajpuaíitzi ná'ara'ani inee, i nej ne'ɨ́n pú'een ɨ́ Cɨríistu'u tɨ Dios án neja'ujyeíjtza ɨ́ ɨpuari japua. Ajta nu'u huaíca xɨcaj tzajta'a nu neajtahua'a aitára'ani huá'a tzajta'a ɨ́ mɨ'ɨchite. 47’Majta nu'u, nainjapua tihua'utá'ixaate'esin neniúucajtze'e mej mi seɨcɨé tiú'umua'ati ɨ́ Dios jemi tɨ ij a'ɨ́ɨn tihua'utá'uuni'i. Ma'utéjhuijsin nu'u mej miyen tihua'utá'ixaate'en íiye mej Jerusalén a'uchéjme, majta méyee ɨ́ mej a'ɨmuá antachéejmee, majta méyee ɨ́ mej seɨj chuéjra'a japua huachéjme, tɨ́j na'a ɨ́ tɨ yen seijre'e íiyen chaanaca japua nainjapua. 48’Mú'een xu tihua'utá'ixaate'esin a'ij sej seri se'ɨ́jna jɨ́n tiu'uséij. 49Nee nu u ya'uta'íti mú'ejmi jemi a'ɨ́jna tɨ niyá'upua jɨ́n te'ataújratziiri'i. Seajta mú'een, setá'aj siyen yen huaté'en íiyen chajta'a ajta na'a caí huateáturan mú'ejmi jemi a'ɨ́jna tɨ júte'e e'icánejsin. A'ɨ́j xu jetzen araújca'anejsin. ―Ayee pu tihua'utá'ixaa a'ɨ́jna ɨ́ Jesús. 50Tɨ́'ɨj i a'ɨ́jna ɨ́ Jesús huaja'uví'itɨ u já'ahua'a u Betania. Tɨ́'ɨj i ajméijca'ataxɨ. Aj pu i rɨ́'ɨ tihua'utá'a ɨ́ huá'a tzajta'a. 51Tɨ́'ɨj auj rɨ́'ɨ tíhua'utá'asime'eca, a'úu pu huaja'uhuá'axɨ. Aj pu i júte'e tíraa. 52Majta a'ɨ́ɨme, a'úu mú raateánajcheca'a. Jéihua mú huataújtemua'ave. Matɨ́'ɨj mi a'ucɨ́j u Jerusalén. 53Tɨ́'ɨj pɨ́ na'a, mú me'uun a'uté'uuca'a u teyujta'a mej mi rɨ́'ɨ tiraatá'an ɨ́ Dios.

will be added

X\