San Lucas 23

1Matɨ́'ɨj mi naími'i ájhuiixɨ ɨ́ mej me'uun e'etiújseɨre'eca'a. Matɨ́'ɨj mi ya'uví'itɨ me'ɨ́jna ɨ́ Jesús a'ɨ́jna jemi ɨ́ Pilato. 2Matɨ́'ɨj mi autéjhuii mej ti'itɨ́j jɨ́n jetzen te'ujpuá'ajte'en. Ayee mú tiu'utaxájtaca'a tɨjɨ́n: ―Ayee tu hui ráamua'areeri'i tɨ amɨ́n ca'aníjra'a hua'atá'aca ɨ́ teɨte mej mi huaténe'use'en ɨ́ gobierno jemi. Capu hua'utá'asin a'ɨ́jna ɨ́ Jesús mej tiraanájchite'en ɨ́ César ɨ́ tɨ huá'ajijve'e. A'ɨ́ɨ pu hui ajta ayén tihuá'ixaate'e tɨjɨ́n amɨ́ɨ pu a'ɨ́ɨn pú'een ɨ́ tɨ Dios án ye'ujyeíjtza ɨ́ ɨpuari japua, tɨ ajta rey jɨme'e ti'itéjvee. ―Ayee mú tiu'utaxájtaca'a ɨ́ teɨte. 3Tɨ́'ɨj i Pilato ayén tiraata'íhua'uri'i tɨjɨ́n: ―¿Ni pe'ɨ́n pú'een ɨ́ pej Rey jɨme'e ti'itéjvee a'ɨ́mej jemi ɨ́ mej Israél jetze ajtéme'ecan? Ajta a'ɨ́ɨn ɨ́ Jesús, ayée pu tiu'utaniú tɨjɨ́n: ―Jee, nee nu ne'ɨ́n pú'een ɨ́ pej raxa. 4Tɨ́'ɨj i Pilato ayén tihua'utá'ixaa a'ɨ́mej ɨ́ mej tí'aijta u teyujta'a, ajta a'ɨ́mej ɨ́ mej me'uun ajteáxɨɨreca'a tɨjɨ́n: ―Capu a'ij ná'amitɨejte'e ti'itɨ́j tɨ jɨ́n auteájturaa ɨ́ nej jɨ́n ra'uxɨ́jte'en. 5Majta a'ɨ́ɨme, ca'anín mú jɨ́n miyen tiu'utaxájtaca'a tɨjɨ́n: ―Jeíhua pu hui ca'aníjra'a hua'atá'aca ɨ́ teɨte mej mi já'ita'a a'utácɨɨne. A'uu pu hui a'utéjche tɨ ayén rɨjca ájtepua Galilea. Ajta á'iyen, a'u tɨ hui ve'eráane ayujna. 6Ajta a'ɨ́ɨn Pilato, tɨ́'ɨj ayén tiráanamuajri'i, ayée pu tihua'uta'íhua'uri'i tɨjɨ́n: ―¿Ni qui a'ɨ́ɨn Jesús a'únna é'eme'ecan u Galilea? 7Tɨ́'ɨj Pilato ayén ráamua'areeri'i tɨjɨ́n a'ɨ́ɨ pu Heródes a'uun tejé'aijta a'u tɨ Jesús é'eme'ecan, aj pu i hua'uta'aíj mej rá'anvi'itɨn jemin a'ɨ́jna ɨ́ Heródes, ɨ́ tɨ rey jɨ́n ti'itéjvee. A'ɨ́ɨ pu ajta a'ajná'ɨmua a'uun a'utéveeca'a u Jerusalén. 8Ajta a'ɨ́ɨn Heródes, jeíhua pu huataújtemua'ave tɨ́'ɨj raaseíj a'ɨ́jna ɨ́ Jesús, a'iné pu'uri a'ateevi'i tɨ raseijramɨ'ɨca'a. Ayee pu tí'ijxe'eve'eca'a tɨ a'ɨ́ɨn Jesús ti'itɨ́j jɨ́n ayén huárɨni tɨ huápɨ'ɨ ruxe'eve'e a'iné pu'uri jeíhua ramua'areereca'a a'ij tɨ a'ɨ́ɨn ti'itɨ́j huáruu a'ɨ́jna ɨ́ Jesús. 9Jéihua pu tí'ira'ihua'uraca'a. Ajta a'ɨ́ɨn Jesús, capu a'atzu huataniú. 10Majta a'ɨ́ɨme ɨ́ mej tí'aijta teyujta'a, majta a'ɨ́ɨme ɨ́ mej tí'imua'ata ɨ́ yu'uxari jetze, Moisés tɨ ra'uyú'uxaca'a, a'úu mú vejli'i jemin huaté'uuca'a. Ca'anín mú jɨ́n tí'ijxajtzi'iraca'a. 11Ajta a'ɨ́ɨn ɨ́ Heródes, majta a'ɨ́ɨme ɨ́ xantaaru'u ɨ́ tɨ tihuá'aijte'e, matɨ́'ɨj miyen tíhuá'unamuajri'i, matɨ́'ɨj mi autéjhuii mej miyen tiraatzeɨ́jrajmua'an. Majta ra'utéxɨeehuari'iri'i me'ɨ́jna ɨ́ Jesús. Matɨ́'ɨj mi cɨ́ɨxuri ru'ucáachejte, huá'a cɨɨxu ɨ́ mej jamuan tí'aijta ɨ́ Heródes. Matɨ́'ɨj mi hua'uta'aíj mej mi majtáhua'a rá'anvi'itɨn ɨ́ Pilato jemi. 12A'ájna xɨcájra'a jetze, a'ɨ́ɨ mú ru'amiigustemua'a muá'araa a'ɨ́jna ɨ́ Pilato, ajta a'ɨ́jna ɨ́ Heródes. Tɨ́'ɨj caí xɨ ayén tiuju'urɨ́j, maúche'e mú tiújcha'ɨɨre'eca'a. 13Ajta a'ɨ́ɨn Pilato hua'utajé a'ɨ́mej ɨ́ mej tí'aijta u teyujta'a, ajta a'ɨ́mej ɨ́ mej tihuá'aijte'e ɨ́ teɨte, ajta a'ɨ́mej ɨ́ teɨte. 14Aj pu i ayén tihua'utá'ixaa tɨjɨ́n: ―Setɨ́'ɨj siyen yee ru'uvé'eneijte semɨ́jna ineetzi jemi, ayée xu se'ɨ́jna jɨ́n jetzen tí'ijpua'ajte'e yee a'ɨ́ɨ pu ca'aníjra'a hua'atá'aca ɨ́ teɨte mej mi já'ita'a a'utácɨɨne. Nu'uri tiraata'íhua'uri'i, mú'een xu neseíiraca'a. Mɨ ajta, capu a'ij ná'amitɨejte'e ti'itɨ́j tɨ jɨ́n auteájturaa ɨ́ sej jɨ́n jetzen tí'ijpua'ajte'e. 15Capu ajta a'ij tirá'amitɨejte'e a'ɨ́jna ɨ́ Heródes a'iné a'ɨ́ɨ pu ajtahua'a mú ye'uta'íteca'a itejmi jemi. ’A'ɨ́j xu hui jɨ́n seri ramua'aree tɨ caí ayén tiraavíjte'e tɨ amɨ́n huámɨ'ɨni, a'iné capu ti'itɨ́j jɨ́n auteájturaa. 16A'ɨ́j nu hui jɨ́n inee puaíjtzi raatá'asin nemɨ́jna. Neajta rá'axɨjte'en. Netɨ́'ɨj ni raateátuaasin nicu. ―Ayee pu tihua'utá'ixaa a'ɨ́jna ɨ́ Pilato. 17Ayee mú tí'ijrɨ'ɨrejca'a mej seɨ́j huatátuaani ɨ́ mej aiteánami'i a'ájna matɨ́'ɨj tí'iyestehua'a. 18Majta a'ɨ́ɨme ɨ́ teɨte, naími'i mú miyen titeetejíihuajraa tɨjɨ́n: ―Miche'e hui rá'anvi'itɨn amɨ́jna mɨ teáata'a, pej pi Barrabás huatátuaani itejmi jemi. 19(A'ɨ́jna ɨ́ Barrabás, ayée mú 'éen jɨ́n ra'iteáana a'iné ca'aníjra'a pu hua'utá'a ɨ́ teɨte Jerusalén mej é'echejca'a mej mi huateújne'usi'ite'en. A'ɨ́ɨ pu ajta a'ɨ́ɨn pú'een seɨ́j ɨ́ tɨ tí'itecui'ica.) 20Ajta a'ɨ́ɨn Pilato, aúche'e pu raxɨ́'eve'eca'a tɨ raatátuaani a'ɨ́jna ɨ́ Jesús. A'ɨ́j pu jɨ́n, ajtahua'a pu ayén tihuá'ajee tɨ ij ráamua'aree a'ij mej tí'ijxe'eve'eca'a ɨ́ teɨte. 21Majta a'ɨ́ɨme ɨ́ teɨte, majtáhua'a mú miyen titeetejíihuajraa tɨjɨ́n: ―Patá'aj hui rá'utatan, patá'aj rá'utatan. 22Huaíca pu ayén tihua'utá'ixaa tɨjɨ́n: ―¿A'iné 'een jɨme'e? ¿Ti'itájni a'ij huáruu tɨ a'ij pua'a 'een? Capu hui a'ij ná'amitɨejte'e ti'itɨ́j tɨ jɨ́n auteájturaa tɨ ij ayén raavíjte'e tɨ huámɨ'ɨni amɨ́jna. A'ɨ́j nu hui jɨ́n niyen nena'a rɨni. Puaíjtzi nu'u raatá'asin. Neajta raateátuaasin. 23Majta a'ɨ́ɨme ɨ́ teɨte máàj mú jaítze'e ca'anín jɨ́n huajíjhuaca'a. Majtahua'a miyen tiraata'aíj tɨ rá'utatan. Matɨ́'ɨj mi tiu'umuá'itɨ me'ɨ́jna jɨme'e ɨ́ mej jeíhua tejíjhuajme'eca'a. 24Aj pu i Pilato raaxɨ́'epɨ'ɨntare tɨ ayén huarɨ́j a'ij mej tí'ijxe'eve'eca'a ɨ́ teɨte. 25Tɨ́'ɨj i raatátuaa a'ɨ́jna ɨ́ mej ra'iteáana a'ɨ́jna jɨme'e tɨ ca'aníjra'a hua'utá'a mej mi huateújne'usi'ite'en, tɨ ajta tí'itecui'ica. A'ii pu a'ɨ́ɨn pú'een ɨ́ mej rájhuaviiri'i ɨ́ teɨte. Ajta a'ɨ́ɨn ɨ́ Pilato, a'ɨ́ɨ pu tiu'utátui ɨ́ Jesús mej mi miyen ráaruuren a'ij mej tí'ijxe'eve'eca'a ɨ́ teɨte. 26Matɨ́'ɨj mi ya'ujáj. Aa mú ya'ujáasime'eca, matɨ́'ɨj seɨ́j huatéevi'i tɨ ayén ántehuaa tɨjɨ́n Simón tɨ Cirene é'eme'ecan. A'uu pu 'ɨtzitá e'eráará'a tɨ i a'uun Jerusalén a'uteárute. Matɨ́'ɨj mi ru'uhuatéechuite ɨ́ cúruu tɨ ij rá'anchueni. Meraata'aíj tɨ ráachuisime'en cujta'an ɨ́ Jesús. 27Jéihua mú teɨte huajú'ucaa huá'a cujta'a. Mu'iitɨ́ ɨ́ 'uuca, jeíhua mú ruxɨeemɨjte'eca'a, mua'antiujyeíne'e mú muaajú'ucaa a'ɨ́jna jemi. 28- 29Aj pu i Jesús pɨ́ a'uré'eve. Ayee pu tihuá'ixaa tɨjɨ́n: ―Mú'een 'uuca, mɨ sej huá'ayaujmua'a pú'een a'ɨ́ɨme ɨ́ mej Jerusalén a'uchéjme, caxu neetzi jɨ́n ruyeine, sino rujɨ́ɨmua'a sehuaújyeinixɨ'ɨ mú'ejmi jɨme'e, seajta se'ɨ́mej jɨme'e ɨ́ ruyaujmua'a a'iné aj pu hui teja'uré'enejsin a'ɨ́jna ɨ́ xɨcájra'a sej jetzen siyen tiu'utaxájta yee: “Dios pu rɨ́'ɨ tihua'utá'a a'ɨ́mej ɨ́ mej caí ja'anáj tiyaúumua'a muá'araa, majta a'ɨ́mej ɨ́ mej caí ja'anáj tɨ'ɨríi huá'a jetze huataseíjre, majta a'ɨ́mej ɨ́ mej caí ja'anáj huá'utzii ɨ́ huá'ayaujmua'a.” 30’A'ájna xɨcájra'an jetze, ayée mú hui rɨni ɨ́ teɨte. A'ɨ́ɨ mú tiraatá'ixaate'esin ɨ́ jɨrí tɨjɨ́n: “Patá'aj téjmi japua rájveti.” Majta miyen che'atá mena'a tiraatá'ixaate'esin a'ɨ́jna ɨ́ jɨrí áa tɨ huacaíjme tɨjɨ́n: “Patá'aj taaté'avaa.” 31’Tɨ́ pua'a niyen tirajpuaíjtzi ne'ɨ́jna jɨme'e nej caí ti'itɨ́j jɨ́n auteájturaa, ¿a'iné tejamuá'amitɨejte'e mej miyen tirajpuaíitzi muá'aju'un a'ɨ́ɨme ɨ́ mej xaa ti'itɨ́j jɨ́n auteájturaa? Huápɨ'ɨ mú hui rajpuaíitzi muá'aju'un xaa ne'u. ―Ayee pu tihua'utá'ixaa. 32Majta seica mú huajájpuajme'e mej mi me'uun huá'utatan jamuan ɨ́ Jesús. A'ɨ́ɨme ɨ́ mej hua'apua, a'ɨ́ɨ mú a'ɨ́ɨn pú'een ɨ́ mej xaa a'ij pua'a tí'irujca. 33Matɨ́'ɨj mi me'uun a'ará'a a'u tɨ ayén téja'arájtehuaa tɨjɨ́n Mɨ'ɨchímu'uta. A'ɨ́ɨ mú rá'utatai jamuan ɨ́ mej a'ij pua'a tí'irujca. Seɨ́j mú aúutatai rɨ'ɨríinta'an pújme'en ɨ́ Jesús. Majta ɨ́ seɨj, a'ɨ́ɨ mú rá'utatai úutata'an pújme'en. 34Tɨ́'ɨj i Jesús ayén tiu'utaxájtaca'a tɨjɨ́n: ―Niyá'upua, patá'aj hui tihua'utá'uuni'i a'iné camu ramua'aree a'ij mej rɨcɨ. Majta a'ɨ́ɨme ɨ́ xantaaru'u, a'ɨ́ɨ mú huáhuajcaca'a mej tetej a'ucáahua'axɨn mej mi ráamua'aree ja'atɨ tɨ racɨ'ɨti ɨ́ cɨ́ɨxure'ara'an ɨ́ Jesús. 35Majta a'ɨ́ɨme ɨ́ teɨte, a'úu mú a'uté'uu mejseíiraca'a. Majta a'ɨ́ɨme ɨ́ mej tihuá'aijte'e, a'ɨ́ɨ mú majta ra'utéxɨeehuari'iri'i. Ayee mú tiu'utaxájtaca'a tɨjɨ́n: ―Amɨ́ pu seica japua huaniú. Ché'e hui amɨ́n rujapua huániuuni, tɨ pua'a hui ayén ti'ayajna tɨ amɨ́n a'ɨ́ɨn pú'een Dios tɨ ra'antíhua'u, a'ɨ́jna Dios tɨ án ya'ujyeíjtza ɨ́ ɨpuari japua. 36Majta a'ɨ́ɨme ɨ́ xantaaru'u mua'ajteáxɨɨreca'a, majta ra'utéxɨeehuari'iri'i. A'ɨ́ɨ mú majta raatanéste ɨ́ viinu tɨ antzináj tɨ ra'antiyé'en. 37Ayee mú tiraata'ixaa tɨjɨ́n: ―Tɨ́ pua'a Rey jɨme'e pej ti'itéveeca'a a'ɨ́mej jemi ɨ́ mej Israél jetze ajtéme'ecan, patá'aj á japua huániuuni. 38Majta taabla ti'itɨ́j mú aúutatai a'u tɨ á'ujmu'u ɨ́ Jesús. Ayee pu té'eyu'usi'ihuaca'a a'ɨ́jna jetze ɨ́ taabla tɨjɨ́n: “A'ii pu a'ɨ́ɨn pú'een ɨ́ hua'aRey a'ɨ́ɨme ɨ́ mej Israél jetze ajtéme'ecan”. 39Ajta seɨ́j ɨ́ mej hua'apua ɨ́ tɨ a'ij pua'a tí'ijrɨ'ɨrejca'a, aj pu á'atataihuaca'a. A'ɨ́ɨ pu ayén a'ij pua'a tiraataxájtaca'a. Ayen tɨjɨ́n: ―¿Ni pecaí pe'ɨ́n pú'een a'ɨ́jna tɨ Dios án mua'ujyeíjtza ɨ́ ɨpuari japua? Patá'aj á japua huániuuni, pajta téjmi japua. 40Ajta ɨ́ seɨj tɨ a'ij pua'a tí'ijrɨ'ɨrejca'a, tɨ ajta á'atataihuaca'a, a'ɨ́ɨ pu ra'ajté'axɨ tɨjɨ́n: ―¿Ni hui pecaí rá'atese'e ɨ́ Dios? Casi'i, ayée pej che'atá pena'a tirajpuaíitzi tɨ́j amɨ́jna. 41Ayee pu hui tiraavíjte'e tej tiyen tirajpuaíjtzi a'iné pu'uri taacɨ́'ɨ a'ij tɨ tiraavíjte'e a'ɨ́jna jɨme'e a'ij tej ti'itɨ́j huáruu. Ajta amɨ́n, capu ti'itɨ́j jɨ́n auteájturaa. 42Aj pu i ayén tiraata'ixaa a'ɨ́jna ɨ́ Jesús tɨjɨ́n: ―Jesús, patá'aj na'utámua'aree a'ájna xɨcáara'an pej jetzen autéchesin pej tiu'uta'aíjta. 43Ajta a'ɨ́ɨn ɨ́ Jesús, ayée pu tiu'utaniú tɨjɨ́n: ―Ayee nu hui tí'imua'ixaate'e tzáahuati'ira'a jɨme'e, íjii, mú'ee pe pe'uun a'utevée pua'amé neetzi jamuan a'u tɨ Dios rɨ́'ɨ timuaatá'asin. ―Ayee pu tiraata'ixaa a'ɨ́jna ɨ́ Jesús. 44- 45Tɨ́'ɨj ari teuumé'eca a'atzaj tacuarixpua, aj pu i nainjapua huateátɨca'areca'a ɨ́ chuej japua. Ayee pu á'atee a'achú cumu huaíca hora tɨ ayén 'eene'e, a'iné a'ɨ́jna xɨcaj a'umɨ́'ɨ. Capu i ché'e huáneeri'icɨcaa. Ajta a'ɨ́ɨn ɨ́ cɨ́ɨxuri tɨ itzíjhua, tɨ ajta a'uun a'utaviviɨ́jme'ecaa u teyujta'a, a'ɨ́ɨ pu já'ita'a acasiújtza'anixɨ. 46Ca'anín pu jɨ́n huajíjhuaca'a a'ɨ́jna ɨ́ Jesús. Ayee pu tiu'utaxájtaca'a tɨjɨ́n: ―Mɨ́ pej niyá'upua, mú'eetzi nu huatátuiire'esin ɨ́ nexɨejniu'uca. Jɨ́me'en pu'u ayén tiu'utaxájtaca'a, aj pu i raatapuá'ajtaca'a tɨ tíyeeye'e. 47Ajta a'ɨ́ɨn ɨ́ xantaaru'u, tɨ anxɨ́te tí'aijta, tɨ́'ɨj raaseíj a'ij tɨ huarɨ́j, aj pu i rɨ́'ɨ tiraatá'a ɨ́ Dios. Ajta ayén tiu'utaxájtaca'a tɨjɨ́n: ―Ayej xaa ne'u ti'ayajna. A'ɨ́ɨ pu rɨ́'ɨ tí'itevistaca'a. 48Majta a'ɨ́ɨme ɨ́ teɨte ɨ́ mej ajteáxɨɨreca'a me'újna mej mi tiú'umua'ariive'en, matɨ́'ɨj raaseíj a'ij tɨ ti'itɨ́ huarɨ́j, a'ɨ́ɨ mú anteújtu'asixɨ án rútaviitze'e me'ɨ́jna jɨme'e mej huataújxɨeemɨste. Majta a'ucɨ́j. 49Majta a'ɨ́ɨme ɨ́ mej ramua'ajcaa, majta a'ɨ́ɨme ɨ́ 'uuca ɨ́ mej e'eráacɨ jamuan a'ujna u Galilea, a'ɨ́ɨ mú a'ɨmuá a'uté'uu mej seijraca'a a'ij tɨ ti'itɨ́ rɨcɨ. 50Meenti seɨ́j a'uun jé'eseijre'eca'a tɨ ayén ántehuaa tɨjɨ́n José. A'ii pu a'ɨ́ɨn pú'een seɨ́j tɨ huá'a jetze ajtéme'ecan ɨ́ huá'a jueesi ɨ́ mej huaícate japuan tamuáamuata'a mej ará'ase. Rɨ́'ɨ pu tí'itevistaca'a a'ɨ́jna. Capu ti'itɨ́j jɨ́n auteájturaa. 51Ajta a'ɨ́ɨn, capu ra'aránajcheca'a a'ij mej tiraaxɨ́'epɨ'ɨntare, capu ajta rɨ́'ɨ raatá'a a'ij mej huarɨ́j ɨ́ seica ɨ́ jueesi. A'uu pu é'eme'ecan a'ɨ́jna ɨ́ José, chajta'a tɨ ayén téja'arájtehuaa tɨjɨ́n Arimatea, tɨ ajta a'uun huatacá'a u Judea. Ajta a'ɨ́ɨn José, a'ɨ́ɨ pu rachú'eve'eca'a ja'anáj xɨcáara'an jetze Dios tɨ tiu'uta'aíjta íiyen chaanaca japua. 52Tɨ́'ɨj i a'uun á'ume ɨ́ Pilato jemi. Ayee pu tiraatáhuaviiri'i tɨ a'ɨ́ɨn Pilato raatátuiire'en ɨ́ Jesús tɨ mɨ'ɨchi. 53Tɨ'ɨj jí ra'acájtɨ ɨ́ cúruu jetze ɨ́ tévira'a. Aj pu i saavana jɨ́n racá'ijcataca'a. Tɨ'ɨj jí a'uun a'uteájrupi a'u tɨ aúucun. Tɨ'ɨj jí yenu'uhuaré'etee a'u mej mauchén yauucú ɨ́ jaij. Caxɨ́ɨ mú ja'anáj ja'atɨ me'uun utétuara'a. 54Pu'uri a'ájna pɨ́tí'irɨjcaa a'ájna xɨcájra'a mej jetzen rɨ́'ɨ ruruuren. Ajta pu'uri tɨ́n teja'uré'enejsime'e a'ájna xɨcájra'an mej jetzen ruse'upi. 55Majta a'ɨ́ɨme ɨ́ 'uuca, ɨ́ mej me'uun e'eráacɨ u Galilea jamuan ɨ́ Jesús, a'ɨ́ɨ mú cujta'an huajú'ucaa a'ɨ́jna ɨ́ José. Matɨ́'ɨj mi raaseíj a'u tɨ aúucun, majta a'u tɨ yá'uruu ɨ́ mɨ'ɨchi. 56Matɨ́'ɨj mi a'ucɨ́ ɨ́ ruche. Aj mú mi rɨ́'ɨ ráaruu ɨ́ tu'upi tɨ naa teáarɨ́'e, majta ɨ́ mej jɨ́n racápɨtijra. Majta á'iyen huaújse'upe a'ájna xɨcájra'an jetze a'ij tɨ tiú'ujxe'eve'e.

will be added

X\