San Lucas 22

1Pu'uri a'ájna vejli'i pɨ́tí'irɨjcaa matɨ́'ɨj pua'a me'ɨ́jna jɨ́n tí'iyeste ɨ́ mej pan cua'aca ɨ́ mej caí levadura ranájchite'e. Ayee mú majta miyen ratamuá'amua tɨjɨ́n Tɨ́'ɨj Dios tihua'utá'uuni'iri'i ɨ́ huá'ayaujmua'a ɨ́ mej anáaté'ee muanúnu'ihuaca'a, a'ujna já'ahua'a u Egipto. 2Majta a'ɨ́ɨme ɨ́ mej tí'aijta teyujta'a, majta a'ɨ́ɨme ɨ́ mej tí'imua'ata ɨ́ yu'uxari jetze, Moisés tɨ ra'uyú'uxaca'a, jeíhua mú tí'imua'ajca a'ij mej ye'í tiraajé'ica ɨ́ Jesús. Caxɨ́ɨ mú a'ij tirájteuve'e a'iné huá'atziɨɨne'eca'a ɨ́ teɨte. 3Tɨ'ɨj jí, a'ɨ́ɨn tiyaaru'u, ɨ́ tɨ ayén ántehuaa Satanás, a'ɨ́ɨ pu tzajta'an uteájrupi a'ɨ́jna jetze ɨ́ Judás, ɨ́ mej miyen ratamuá'amua tɨjɨ́n Iscariotes. A'ɨ́ɨ pu ajta huá'a jetze ajtéme'ecan ɨ́ mej tamuáamuata'a japuan hua'apua ará'ase. 4Tɨ'ɨj jí a'ɨ́ɨn Judás a'ɨ́mej jemi a'uré'ene a'ɨ́ɨme ɨ́ mej tí'aijta teyujta'a, ajta ɨ́ mej tihuá'aijte'e a'ɨ́mej ɨ́ mej tí'icha'ɨɨ a'ujna teyujta'a. Ayee mú tiúj'ixaate'eca'a me'ɨ́jna jɨme'e a'ij tɨ ye'í huárɨni a'ɨ́jna ɨ́ Judás tɨ́'ij avíitzi jɨ́n tiu'utátuiire'en a'ɨ́jna ɨ́ Jesús. 5Majta a'ɨ́ɨme, jé'ecan mú huataújtemua'ave. Majta te'ataújratziiri'i mej tumin raatá'an. 6A'ɨ́ɨ pu ra'ancuré'a ɨ́ hua'aniuuca. Aj pu i a'utéjche tɨ tiu'uchú'eve'en ja'anáj tɨ rɨ'ɨrí tɨ hua'utátuiire'en ɨ́ Jesús mej caí raseíireca'a ɨ́ teɨte. 7Tɨ́'ɨj i a'ájna teja'uré'ene ɨ́ xɨcájra'a mé jetzen racua'aca ɨ́ pan mej caí levadura ranájchite'e. A'ájna xɨcájra'an jetze, a'ɨ́ɨ mú majta ramuaɨ'ɨvajta a'ɨ́jna ɨ́ cáne'a ɨ́ mej jɨ́n ra'utámua'aree a'ájna xɨcájra'an tɨ Dios jetzen tihua'utá'uuni'iri'i ɨ́ huá'ayaujmua'a ɨ́ mej anáaté'ee muanúnu'ihuaca'a. 8Aj pu i Jesús hua'uta'íteca'a a'ɨ́jna ɨ́ Pedro, ajta a'ɨ́jna ɨ́ Juan mej u á'uju'un. Ayee pu tihua'utá'ixaa tɨjɨ́n: ―Setá'aj á'uju'un sej si rɨ́'ɨ tejá'uruuren tej ti ráacua'ani te'ɨ́jna ɨ́ tej jɨ́n ra'utámua'aree tɨ Dios tihua'utá'uuni'iri'i ɨ́ huá'ayaujmua'a ɨ́ mej anáaté'ee muanúnu'ihuaca'a. 9Ajta a'ɨ́ɨme, ayée mú tiraata'íhua'uri'i tɨjɨ́n: ―¿A'uné jetze piyen tí'ijxe'eve'e tej rɨ́'ɨ tejá'uruuren? 10Ayee pu tihua'utá'ixaa tɨjɨ́n: ―Setɨ́'ɨj se'uun a'uteárute u chajta'ana, teáata'a pu amua'antinájchi tɨ xa'ari huátɨsin, jaj tɨ urajmuaa. Setá'aj cujta'an u á'uju'un. Seajta jamuan a'uteáruti u chi'ita a'u tɨ a'ɨ́ɨn ará'aiixa. 11’Setá'aj siyen tiraata'ixaate'en a'ɨ́jna tɨ a'ánna é'eche yee: “Ayee pu ti'ixa ɨ́ maestro, yee: ¿A'uné jetze é'erɨ'ɨri tɨ tzajta'an tiú'ucua'ani ɨ́ tɨ jɨ́n ra'utámua'aree tɨ Dios tihua'utá'uuni'iri'i ɨ́ huá'ayaujmua'a ɨ́ mej anáaté'ee muanúnu'ihuaca'a? A'ɨ́j pu yee tiú'ucua'ani a'ɨ́mej jamuan ɨ́ tɨ hua'antíhuau.” 12’A'ɨ́ɨ pu hui amuaataseíjrate'esin ɨ́ cuaartu, tɨ ve'ée, tɨ án ɨmuá á'ujvee. Pu'uri ra'avé'ejaj. Setá'aj se'újna rɨ́'ɨ te'uhuáruuren. ―Ayee pu tihua'utá'ixaa a'ɨ́jna ɨ́ Jesús. 13Aj mú mi a'ucɨ́j. Matɨ́'ɨj me'uun a'ará'a, ayée pu te'irájraa a'ij tɨ tihua'utá'ixaa ɨ́ Jesús. A'ɨ́j mú jɨ́n rɨ́'ɨ tiú'uruu ɨ́ mej jɨ́n ra'utámua'aree a'ij tɨ Dios tihua'utá'uuni'iri'i. 14Tɨ́'ɨj teja'uré'ene a'atzaj mej pua'a racua'ani, naími'i mú ja'utéeji á vejli'i meesa jetze, a'ɨ́jna ɨ́ Jesús, majta a'ɨ́ɨme ɨ́ mej jamuan á'ujujhua'ane'e. 15Tɨ́'ɨj i ayén tihua'utá'ixaa tɨjɨ́n: ―Jeíhua nu huápɨ'ɨ raxɨ́'eve'eca'a nej mú'ejmi jamuan amuacaícan tiú'ucua'ani, nej caí xɨ rajpuaíjtzi, tej ti naími'i ra'utámua'aree te'ɨ́jna jɨme'e ɨ́ tɨ Dios tihua'utá'uuni'iri'i ɨ́ huá'ayaujmua'a ɨ́ mej anáaté'ee muanúnu'ihuaca'a. 16’Ayee nu tejá'amua'ixaate'e, canu hui ché'e ja'anáj ráacua'ani ɨ́ pan ajta caí nain araúrasten a'ájna xɨcájra'a Dios tɨ jetzen nain jɨ́n huateúra'ate'esin íiyen chaanaca japua. 17- 18Aj pu i rájtɨ ɨ́ taasa. Tɨ́'ɨj i rɨ́'ɨ tiraatá'a ɨ́ Dios jemi, aj pu i hua'utajájni. Ayee pu tihua'utá'ixaa tɨjɨ́n: ―Ye'ecui, setá'aj huará'ujaanten, a'iné ayée nu tejá'amua'ixaate'e nej caí ché'e ja'anáj ra'antí'isin ɨ́ já'ara'a tɨ uuva jetze airámɨ'ɨyeca'a, ajta caí yen huataseíjre'en ja'anáj tɨ Dios tiu'uta'aíjta íiyen chaanaca japua. 19Tɨ́'ɨj i raatiɨ́'ɨ ɨ́ pan. Tɨ́'ɨj i ajtahua'a pu rɨ́'ɨ tiraatá'a ɨ́ Dios. Aj pu i ra'antítaaraxɨ ɨ́ pan. Aj pu i hua'utá'ɨ́'ɨpɨ'i. Ayee pu tihua'utá'ixaa tɨjɨ́n: ―Ayee pu huataújmua'a ɨ́ pan. A'ii pu a'ɨ́ɨn pú'een ɨ́ netévira'a ɨ́ nej jɨ́n á'amuajapua huaniú. Ayee xu huárɨni sej si ra'utámua'aree a'ij nej huárɨni. 20Matɨ́'ɨj meri tiu'ucuá'a, ayée pu che'atá na'a huarɨ́j. A'ɨ́ɨ pu ra'ajjáj ɨ́ taasa. Ayee pu tihua'utá'ixaa tɨjɨ́n: ―A'ijna i taasa tzajta'a tu'urájmuaa, ayée pu huataújmua'a ɨ́ niuucari tɨ jɨ́me'en Dios jéjcua jɨ́n te'ataújratziiri'i tɨ amua'irájtuaani. Neajta inee, nu'uri raataseíjrataca'a tɨ ayén ti'ayajna a'ɨ́jna jɨme'e ɨ́ nexuure'e nej ra'iráxɨre'esin mú'ejmi jetze me'ecan. 21’Ajta a'ɨ́ɨn ɨ́ ja'atɨ tɨ avíitzi jɨ́n tiu'utátuiire'esin ineetzi, a'ɨ́ɨ pu hui ajta yé seijre'e neetzi jamuan iiyencuí meesa japua. 22Ayee pu tí'ineruuren ineetzi, i nej neajta huá'a jetze airáane ɨ́ teɨte, a'ij tɨ tiú'uxɨ'epɨ'ɨntari'ihuaca'a. Aru ché'e huataújxɨeemɨste'en a'ɨ́jna tɨ neetzi jɨ́me'en tiu'utátuiire'esin avíitzi jɨme'e. 23Majta a'ɨ́ɨme ɨ́ mej jamuan á'ujujhua'ane'e, ayée mú te'utéjhuii mej huataúrihua'u me'ɨ́jna jɨme'e ja'atɨ tɨ a'ɨ́ɨn pú'een tɨ ayén rɨni. 24Matɨ́'ɨj mi majta miyen autéjhuii mej huataúrihua'u maújjaaxɨéevi'ira me'ɨ́jna jɨme'e ja'atɨ tɨ nu'u jaítze'e ruxe'eve'e. 25Ajta a'ɨ́ɨn ɨ́ Jesús, ayée pu tihua'utá'ixaa tɨjɨ́n: ―A'ɨ́ɨme ɨ́ mej rey jɨ́n títeté'u'upu'u huá'a tzajta'a ɨ́ mej caí Israél é'eme'ecan, a'ɨ́ɨ mú ca'anéjri jɨ́n tihuá'aijte'e. Ajta a'ɨ́ɨme ɨ́ mej miyen tihuá'aijte'e, ayée mú tiú'ujxaa yee rɨ́'ɨ mú ti'itexá'apuai. 26’Aru mú'een, caxu siyen éene'e xá'aju'un matɨ́j a'ɨ́ɨme, sino ayée xu'u éene'e xá'ara'ani. A'ɨ́n ɨ́ ja'atɨ tɨ jaítze'e ruxe'eve'e mú'ejmi jemi, ché'e a'ɨ́ɨn ayén éene'e á'ara'ani tɨ́j tɨ jaítze'e pa'arɨ'ɨ. Ajta a'ɨ́ɨn hui tɨ tí'aijta, ché'e ayén éene'e tɨ́j a'ɨ́jna tɨ tí'ivaɨre'e. 27’Casi'i, ¿a'ataani jaítze'e ve'ecán jɨ́n ti'itéjvee? ¿Ni a'ɨ́jna tɨ á vejli'i a'uré'ehuiixɨ a'utɨ́ meesa a'utéjvee, na'ari a'ɨ́jna ɨ́ tɨ tí'ijmin? ¿Ni necaí ne'ɨ́n pú'een inee i nej jaítze'e ve'ecán jɨ́n, i nej yé vejli'i huaré'eca'a íiye ɨ́ meesa a'utéjvee? Mɨ́ neajta inee, yé nu seijre'e a'amua jamuan nej ni tejamuaamín mú'ejmi. 28’Seajta mú'een, mú'een xu se'ɨ́ɨn pú'een ɨ́ sej tɨ́'ɨj pɨ́ na'a yé huaté'uu neetzi jemi ɨ́ nej rajpuaíjtzi. 29Neajta nu tejá'amua'íjcate'e mú'ejmi, sej si tiu'uta'aíjta a'iné a'ɨ́jna ɨ́ niyá'upua pu'uri ayén tinaa'íjca ineetzi nej ni tiu'uta'aíjta. 30’Ayee nu hui tejá'amua'íjcate'e sej si siyen tiú'ucua'ani, seajta huayé'en ɨ́ meesa a'utéjvee neetzi jamuan a'ájna xɨcájra'an ne jetzen yé ve'ecánejsin nej ni tiu'uta'aíjta íiyen chaanaca japua. Mú'een xu a'ujrá'ase japuan ɨ́ ɨpuari sej si huá'axɨjte'en a'ɨ́mej ɨ́ teɨtejra'a ɨ́ mej majta Israél jetze huanéj, ɨ́ mej tamuáamuata'a japuan hua'apua ará'ase. ―Ayee pu tihua'utá'ixaa a'ɨ́jna ɨ́ Jesús. 31Aj pu i a'ɨ́jna ɨ́ Jesús ayén tiraata'ixaa ɨ́ Pedro tɨjɨ́n: ―Simón, Simón, a'ɨ́jna ɨ́ tiyaaru'u tɨ i'i Satanás, a'ɨ́ɨ pu raatáhua'u tɨ Dios raatá'an tɨ i tiu'utése'en tɨ muaatémua'itɨn pej pi mé núurɨeeni. 32’Aru inee, ayée nu hui raatáhua'u mú'eetzi jɨme'e ɨ́ Dios jemi pej pi caí auté'ɨtzen pe'ɨ́jna jɨme'e pej ná'astijre'e ineetzi. Neajta niyen tí'imua'aijte'e. Patɨ́'ɨj rɨ́'ɨ huarɨ́n mua'a tzajta'a, patá'aj pajtáhua'a na'ará'astijre'en. Ayee pej huárɨni. Patá'aj ca'aníjra'a hua'utá'an a'ihuáamua'a. 33Ajta a'ɨ́ɨn ɨ́ Pedro, ayée pu tiraata'ixaa tɨjɨ́n: ―Nevástara'a, nu'uri niyen ahuánca'ane nej mú'eetzi jamuan aiteánami'ihua na'ari nej huámɨ'ɨni mú'eetzi jamuan. 34Ajta Jesús ayén tiu'utaniú tɨjɨ́n: ―Pedro, ayée nu hui tí'imua'ixaate'e, tɨ́'ɨj caí xɨ huajíjhua ɨ́ tecuaara'i, huaíca pej piyen tina'avé'avaata tɨjɨ́n capej nemua'ate. 35Aj pu i Jesús ayén tihua'uta'íhua'uri'i tɨjɨ́n: ―¿Ni caí ti'itɨ́j tejamuá'aturaate'eca'a netɨ́'ɨj amuaata'íteca'a sej siyen a'ucɨ́jxɨ'ɨn, sej caí ca'aní anpiín, seajta caí ti'itɨ́j anú'a'ɨn, sej tumin tzajta'an ucá'an, sej seajta caí ajtáca'acaimé'e? Ayee mú tiu'utaniú tɨjɨ́n: ―Capu ti'itɨ́j auteájturaa. 36Aj pu i ayén tihua'utá'ixaa tɨjɨ́n: ―Ari íjii, tɨ pua'a piyen rájcha'ɨɨ a'ɨ́jna ɨ́ ca'aní, patá'aj ra'anpíin, na'ari pajta pe'ɨ́jna ɨ́ pej tzajta'an tumin ucá'an. Tɨ́ pua'a pecaí seɨ́j tícha'ɨɨ ɨ́ chun, xantaaru'u mej rájcha'ɨɨ, ayée pej huárɨni. Patá'aj ráatuaani ɨ́ á'acɨɨxu pej pi seɨ́j chun huánanan ɨ́ tumin jɨme'e. 37’Ayee pu té'eyu'usi'i tɨjɨ́n: “Ayee pu hui tihuá'amitɨejte'eca'a tɨjɨ́n a'ii pu a'ɨ́ɨn pú'een seɨ́j tɨ a'ij pua'a tí'itevij.” Ayee nu tejá'amua'ixaate'e tɨ ruxe'eve'e tɨ ayén che'atá na'a te'araúrasten ineetzi jemi. Jee xaa ne'u, a'íjna tɨ ayén té'eyu'usi'i ineetzi jɨme'e, pu'uri tɨ́mua'a araúrastejsin. ―Ayee pu tihua'utá'ixaa a'ɨ́jna ɨ́ Jesús. 38Majta a'ɨ́ɨme ɨ́ mej jamuan á'ujujhua'ane'e, ayée mú tiraata'ixaa tɨjɨ́n: ―Casi'i, tavástara'a, hua'apua pu yee tí'iseijre'e ɨ́ chun. Ayee pu i ayén tiu'utaniú tɨjɨ́n: ―Amɨ́ pu'u tí'icɨ'ɨpe. 39Aj pu i huirájraa ɨ́ Jesús. Tɨ́'ɨj i a'uun a'ará'a a'ájna a'u tɨ é'e'aseca ɨ́ jɨrí jetze tɨ ayén téja'arájtehuaa tɨjɨ́n Aceituunajemi. Majta a'ɨ́ɨme ɨ́ mej jamuan á'ujujhua'ane'e, a'ɨ́ɨ mú majta a'ucɨ́j jamuan. 40Tɨ́'ɨj a'uun a'ará'a, ayée pu tihua'utá'ixaa tɨjɨ́n: ―Setá'aj siyen huatéjniuuni sej si caí auté'ɨtzen ti'itɨ́j jɨme'e. 41Tɨ́'ɨj i a'uun huaja'uteájtuaa, a'atzu pu ɨmuá á a'ure'enée a'achú cumu a'atzu ɨmuá pu e'eráava'ɨtzɨ ɨ́ tetej tɨ pua'a ja'atɨ raatárɨeni. A'uu pu títunutaca'a. Tɨ́'ɨj i raatáhuauu ɨ́ Dios jemi. 42Ayen tɨjɨ́n: ―Niyá'upua, ayée nu tí'imuahuavii, tɨ pua'a mua'aráanajche pej naatá'an nej ni caí niyen tirajpuaíitzi ná'ara'ani. Aru ché'e ayén tiú'urɨni a'ij pej mú'ee tí'ijxe'eve'e. Ché'e hui caí ayén teja'uré'enineica'a a'ij nej nee tí'ijxe'eve'e. ―Ayee pu tiraatáhuaviiri'i. 43Aj pu i seɨ́j jemin huataseíjre tɨ ta japua tí'ivaɨre'e. A'ɨ́ɨ pu ca'aníjra'a raatá'a. 44Ajta a'ɨ́ɨn ɨ́ Jesús, jeíhua pu tí'itese'eca'a. A'ɨ́j pu jɨ́n, jaítze'e huatéeniu. Jé'ecan pu taíxɨ'eca'a. Ayee pu seijre'eca'a xɨee tɨ́j xúure'e á e'erájtzune á chuaata'a. 45Tɨ́'ɨj i ájchee a'u tɨ e'eténiuusime'e, tɨ́'ɨj i a'uré'ene a'u mej a'ij é'ene'e a'ɨ́ɨme ɨ́ mej jamuan á'ujujhua'ane'e. Mu'uri cu'utzuca'a a'iné jeíhua mú cua'anaca'a me'ɨ́jna jɨme'e mej ruxɨeemɨ́jte'e. 46Ayee pu tihua'utá'ixaa tɨjɨ́n: ―¿A'iné sej si cu'utzu? Xá'ajhuiixɨ'ɨ, seajta huatéjniuuni tɨ ij caí ti'itɨ́j a'amua japua rájveti, sej si caí auteáturan ɨ́ Dios jemi. 47Aúche'e pu tixájtaca'a ɨ́ Jesús, matɨ́'ɨj jeíhua teɨte e'iré'ene. Ajta a'ɨ́ɨn tɨ ayén ántehuaa tɨjɨ́n Judás, tɨ ajta huá'a jetze ajtéme'ecantaca'a ɨ́ mej tamuáamuata'a japuan hua'apua ará'ase, a'ɨ́ɨ pu amuacaí huamé'ecaa. Aj pu i ajteáxɨɨreca'a tɨ ij ru'itépɨ'ɨtzen a'ɨ́jna ɨ́ Jesús. 48Ajta a'ɨ́ɨn ɨ́ Jesús, ayée pu tiraata'íhua'uri'i tɨjɨ́n: ―Judás, ni piyen tinu'itépɨ'ɨtze'esin pej pi neetzi jɨme'e tiu'utátuiire'en ineetzi, i nej neajta huá'a jetze airáane ɨ́ teɨte. 49Majta a'ɨ́ɨme ɨ́ mej Jesús jamuan á'ujujhua'ane'e, matɨ́'ɨj raaseíj a'ij tɨ ti'itɨ́ rɨjcaa, matɨ́'ɨj mi miyen tiraata'ixaa tɨjɨ́n: ―Tavastara'a, ¿ni tiyen huárɨni tej hua'utévajxɨ'ɨn te'ɨ́jna jɨme'e ɨ́ tí'itachun? 50Ajta seɨ́j tɨ Jesús jamuan á'uche'ecane'e, a'ɨ́ɨ pu ra'ajtéevajxɨ a'ɨ́jna tɨ ravaɨre'e a'ɨ́jna tɨ tí'aijta u teyujta'a. Ra'ajtasíjcheca'a ɨ́ naxaira'an, rurɨ'ɨríinta'an tɨ ra'ajtánaxaiica'a. 51Aj pu i Jesús ayén tiu'utaxájtaca'a tɨjɨ́n: ―Caxu ché'e siyen raruure. Aj pu i Jesús ra'ajtamuárɨej a'ɨ́jna ɨ́ naxaira'an jetze. Ajta tiráahuaa. 52Aj pu i Jesús ayén tihua'utá'ixaa a'ɨ́mej ɨ́ mej tí'aijta u teyujta'a, ajta ɨ́ mej tihuá'aijte'e ɨ́ mej tí'icha'ɨɨ u teyujta'a, ajta a'ɨ́mej ɨ́ huá'a vaujsi, naíjmi'i matɨ́j mena'a mej jemin e'iré'ene. Ayee pu tihua'utá'ixaa tɨjɨ́n: ―¿Ni qui nahua'ari ne'ɨ́n pú'een sej si siyen mú'een mú a'uvé'eju'un sej chun tiu'ɨ́'ɨsime'en, seajta cɨyej? 53Tɨ́'ɨj pɨ́ na'a nain xɨcaj tzajta'a, a'úu nu hui a'utevée ná'aye'i a'u tɨ e'eráyaujta'a u teyujta'a mú'ejmi jemi. Seajta mú'een, caxu ja'anáj naateevi'i. Ari íjii xu xaa siyen neruure a'iné ayée pu tejamuaacɨ́'ɨ tɨ a'amua jetze huáraa a'ɨ́jna tɨ tí'aijta tɨ́ca'amiste'e. ―Ayee pu tihua'utá'ixaa a'ɨ́jna ɨ́ Jesús. 54Matɨ́'ɨj mi raatéevi'i. Aj mú mi ya'uví'itɨ. A'uu mú ya'uré'eneijte a'u tɨ é'eche a'ɨ́jna tɨ nain jɨ́n antiújmua'aree u teyujta'a. Ajta a'ɨ́ɨn Pedro, a'atzu pu ɨmuá rá'asijme'e. 55Matɨ́'ɨj mi aúunai a'ájna já'ita'a tɨ e'eráyaujta'a u teyujta'a. Aj mú mi atéráaseajraa. Ajta a'ɨ́jna ɨ́ Pedro, a'ɨ́ɨ pu huá'a jamuan a'ujyeíjxɨ. 56Tɨ́'ɨj a'ɨ́ɨn 'ɨ́ita'a tɨ tí'ivaɨre'e, a'ɨ́ɨ pu raaseíj tɨ a'uun á'ajcatii a'u tɨ á'ataa. Tɨ́'ɨj temua'a raaseíj, aj pu i ayén tiu'utaxájtaca'a tɨjɨ́n: ―Amɨ́jna mɨ teáata'a, amɨ́ɨ pu ajta jamuan á'uche'ecane'e. 57Ajta a'ɨ́ɨn Pedro, ayée pu tiu'utéhua'itaca'a tɨjɨ́n: ―'Ɨ́ita'a, canu ramua'ate. 58A'atzu a'ateevi'i, ajtahua'a seɨ́j raaseíj. Ayee pu tiu'utaxájtaca'a a'ɨ́jna tɨjɨ́n: ―Mú'ee pe pajta huá'a jetze ajtéme'ecan. Ajta a'ɨ́ɨn ɨ́ Pedro, ayée pu tiu'utaniú tɨjɨ́n: ―Hoombi xaa, canu xaa ne'u. 59Tɨ́'ɨj seɨ́j hora teuumé'eca, ajtahua'a seɨ́j ayén tiu'utaxájtaca'a tɨjɨ́n: ―Ayej xaa ne'u ti'ayajna tɨ amɨ́n a'ɨ́ɨn pú'een seɨ́j tɨ Jesús jamuan á'uche'ecane'e, a'iné Galilea pu é'eme'ecan. 60Ajta a'ɨ́ɨn ɨ́ Pedro, ayée pu tiu'utaniú tɨjɨ́n: ―Hoombi xaa, capu a'ij tiná'amitɨejte'e a'ij pej ti'ixa. Tɨ́'ɨj auj ayén tí'ixajtaca'a, tɨ́'ɨj i huajíjhuaca'a ɨ́ tecuaara'i. 61Ajta a'ɨ́ɨn ɨ́ tavástara'a, a'ɨ́ɨ pu pɨ́ a'uré'eve. Aj pu i ra'aráaseij a'ɨ́jna ɨ́ Pedro. Ajta a'ɨ́ɨ pu ra'utámua'areeri'i a'ij tɨ tavástara'a tiraata'ixaa yee tɨ́'ɨj caí xɨ huajíjhuan ɨ́ tecuaara'i, huaíca pej piyen tina'avé'avaata tɨjɨ́n capej nemua'ate. 62Tɨ́'ɨj i Pedro huirájraa á pua'acɨé. Aj pu i tiujyeínejraa huápɨ'ɨ. A'ij pu pua'a té'ujmua'ajcaa. 63Majta a'ɨ́ɨme ɨ́ mej racha'ɨɨca'a, a'ɨ́ɨ mú autéjhuii mej ra'utéxɨeehuari'i, majta raatéevajxɨ me'ɨ́jna ɨ́ Jesús. 64Matɨ́'ɨj mi ra'utajɨ́'ɨcɨe á jɨ'ɨseáara'an jetze. Aj mú mi ca'anéeri jɨ́n raata'íhua'uri'i tɨjɨ́n: ―Huataxáj yee a'atani muaatéevajxɨ. 65Majta jeíhua mú ra'utéxɨeehuari'iri'i me'ɨ́jna jɨme'e tɨ a'ij pua'a 'een. 66Tɨ́'ɨj huateapuá'areca'a, naími'i mú tiújseɨj, ɨ́ huá'avaujsimua'a, majta ɨ́ mej tí'aijta u teyujta'a, majta a'ɨ́ɨme ɨ́ mej tí'imua'ataca ɨ́ yu'uxari jetze, Moisés tɨ ra'uyú'uxaca'a. Majta á ya'uví'itɨ huá'a jemi ɨ́ rujuéesi. 67Ayee mú tiraata'ixaa tɨjɨ́n: ―Patá'aj taatá'ixaate'en tɨ pua'a mú'ee pe pe'ɨ́n pú'een ɨ́ tɨ Dios án muaja'ujyéijtza ɨ́ ɨpuari japua nusu pecaí. Tɨ́'ɨj i Jesús ayén tiu'utaniú tɨjɨ́n: ―Tɨ́ pua'a niyen tejámuaatá'ixaate'en yee: “Nee nu ne'ɨ́n pú'een”, caxu mú'een ná'antzaahuate'esin. 68Ajta tɨ pua'a niyen tejámuaata'íhua'u yee: “¿A'ataani nej pɨ́rɨcɨ inee?, caxu mú'een, a'atzu huatániuusin.” 69’Silu íjii tɨ yú auca'itɨ́ a'ame, inee nej neajta huá'a jetze airáane ɨ́ teɨte, a'úu nu hui a'ujcaí na'ame a'ujna rɨ'ɨríinta'an ɨ́ Dios tɨ nain jɨ́n antiújmua'aree. 70Naími'i mú miyen tiraata'íhua'uri'i tɨjɨ́n: ―¿Ni pe'ɨ́n pú'een yaujra'an ɨ́ Dios? Ajta a'ɨ́ɨn ɨ́ Jesús, ayée pu tiu'utaniú tɨjɨ́n: ―Ayee pu ti'ayajna, nee nu ne'ɨ́n pú'een a'ij sej tiu'utaxájtaca'a. 71Matɨ́'ɨj mi miyen tiu'utaú'ixaa tɨjɨ́n: ―¿Ti'itáani máàj a'ij tetí'ixe'eve'e ɨ́ tej jɨ́n jetzen te'ujpuá'ajte'en ti'itɨ́j jɨme'e? Tu'uri ne'u hui ráanamuajri'i a'ij tɨ amɨ́n tiu'utaxájtaca'a.

will be added

X\