San Lucas 20

1A'ájná'ɨmua pu ayén tiuju'urɨ́j. A'uu pu tihuá'amua'atejca'a u teyujta'a a'u tɨ e'eráyaujta'a. Ajta pu huá'a'ixaate'eca'a ɨ́ teɨte ɨ́ niuucari tɨ jɨ́n Dios hua'irátuaasin. Matɨ́'ɨj mi seica á e'iré'ene, a'ɨ́ɨme ɨ́ mej teyujta'a tí'aijta, majta a'ɨ́ɨme ɨ́ mej tí'imua'ata ɨ́ yu'uxari jetze, Moisés tɨ ra'uyú'uxaca'a, majta ɨ́ huá'avaujsimua'a. 2Ayee mú tiraata'ixaa tɨjɨ́n: ―¿Ti'itáni jɨ́n peti'itéjvee pej pi piyen rɨcɨ? ¿A'ataani hui a'ɨ́jna jɨ́n timua'íjca? 3Aj pu i Jesús ayén tiu'utaniú tɨjɨ́n: ―Nee nu neajta tejámuaata'íhua'ura sej si seajta mú'een siyen tinaatá'ixaate'en. 4A'ɨ́jna tɨ jɨ́n huá'umuaɨ'ɨhuaca'a ɨ́ Juan teecan, ¿a'ataani hui tira'íjca a'ɨ́jna? ¿Ni ɨ́ Dios ca'ɨ́n ɨ́ teɨte? 5Matɨ́'ɨj mi miyen ti'itiúrihua'uri'i tɨjɨ́n: ―Tɨ́ pua'a tiyen tiraata'ixaate'en yee Dios tɨ júte'e é'eseijre'e, a'ɨ́ɨ pu tira'íjca, aj pu xaa ayén titaatá'ixaate'esin yee a'iné tej tij caí rá'atzaahuate'e. 6Na'ari, tɨ pua'a hui tiyen raataxáj yee teteca mú tira'íjca, aj mú mi teɨte taateátu'asixɨ'ɨsin tetej jɨme'e, a'iné ayée pu tihuá'amitɨejte'e tɨ Juan a'ɨ́ɨn pú'eene'e seɨ́j tɨ tí'ixaxa'ata'a ɨ́ Dios jetze me'ecan. 7A'ɨ́j mú jɨ́n miyen tiraata'ixaa tɨjɨ́n: ―Catu ramua'aree ja'atɨ tɨ jemin ti'itéveeca'a a'ɨ́jna ɨ́ Juan. 8Ajta a'ɨ́ɨn Jesús, ayée pu tihua'utá'ixaa tɨjɨ́n: ―Canu neajta nee amuaatá'ixaate'esin ja'atɨ nej jemin ti'itéjvee nej ni niyen rɨcɨ. 9Ajta á'iyen, Jesús pu seɨ́j niuucari jɨ́n hua'utá'ixa ɨ́ teɨte ayén tɨjɨ́n: ―Ja'atɨ pu nu'u hui jeíhua uuva huáhuii. Tɨ'ɨj jí, seica huatá'a ɨ́ teɨte mej me'uun tiu'umuárɨ'en ɨ́ huastari tzajta'a. Aj pu nu'u i á'uraa a'ɨ́jna ɨ́ ja'atɨ. Jéihua pu mu'u é'etee. 10’Tɨ́'ɨj a'ájna teja'uré'ene matɨ́'ɨj pua'a raju'uraca, seɨ́j pu nu'u u a'uta'íteca'a huá'a jemi ɨ́ tɨ hua'utániɨ́jte mej mi raatátuiire'en je'icáca tɨ tiú'ucɨɨreca'a. Majta a'ɨ́ɨme ɨ́ teɨte, a'ɨ́ɨ mú nu'u raatéevajxɨ me'ɨ́jna tɨ tí'ivaɨre'e. Majta nu'u caí ti'itɨ́j raatá'a, ayée mu'u tiraata'íteca'a. 11’Ajtahua'a nu'u seɨ́j huata'íteca'a tɨ jemin tí'ivaɨre'e. Majta a'ɨ́ɨme tɨ hua'utániɨ́jte, majta mú nu'u raatéevajxɨ. A'ij mú pua'a ráaruu. Majta caí ti'itɨ́j raatá'a, ayée mu'u nu'u tiraata'íteca'a. 12Huaícaca jetze, a'ɨ́ɨ pu nu'u hui seɨ́j ajtahua'a huata'íteca'a. Majta nu'u me'ɨ́n tɨ tihua'utániɨjte, a'ɨ́ɨ mú tiraapuaíj. Majta raaré'iteca'a. 13’Tɨ́'ɨqui nu'u ayén tiu'umuá'aj a'ɨ́jna ɨ́ ja'atɨ tɨ á'are'ara'an pú'een ɨ́ chuej, tɨjɨ́n: “¿A'iquí yeehui náarɨni inee? Niyauj nu hui huata'íti ɨ́ nej huápɨ'ɨ raxɨ́'eve'e. Ayej ne'ase, a'ɨ́ɨ mú xaa arátese'esin me'ɨ́jna.” 14’Mɨ majta a'ɨ́ɨme, matɨ́'ɨj nu'u raaseíj, aj mú mi tiu'utaú'ixaa. Ayee mú tiraaxɨ́'epɨ'ɨntare tɨjɨ́n: “A'ii pu yeehui a'ɨ́ɨn pú'een ɨ́ tɨ tí'ijcɨ'ɨti. Tiché'e raajé'ica tɨ ij téjmi huácɨ'ɨti.” 15’A'ɨ́j mú nu'u jɨ́n raaré'iteca'a. Matɨ́'ɨj nu'u mi raajé'ica. ’¿A'iné hui tejamuá'amitɨejte'e mú'ejmi? ¿A'iquí huá'aruuren a'ɨ́jna tɨ á'are'ara'an pú'een a'u tɨ uuva é'ehuiiti'i? 16Ayee nu tejá'amua'ixaate'e. A'ɨ́ɨ pu a'uun a'uré'enejsin. Ajta á'iyen, a'ɨ́ɨn huá'acui'ini a'ɨ́mej ɨ́ tɨ hua'utániɨ́jte. Aj pu i xaa seica huatapuaíjve'esin mej mi me'uun hui teja'umuárɨ'en. Matɨ́'ɨj miyen tiráanamuajri'i ɨ́ teɨte, ayée mú tiu'utaxájtaca'a tɨjɨ́n: ―Ché'e caí ja'anáj ayén tí'irɨjca. 17Aj pu i Jesús hua'useíirajraa. Tɨ'ɨj jí ayén tiu'utaxájtaca'a tɨjɨ́n: ―Na'ari caí ayén ti'ayajna a'ij nej tejámuaatá'ixaa, ¿a'iné 'een jɨ́n ayén té'esiɨɨmua'i ɨ́ yu'uxari jetze? Ayee pu, tɨjɨ́n: A'ɨ́jna ɨ́ tetej ɨ́ mej méjca'i rúurɨe a'ɨ́ɨme ɨ́ mej chi'ij ta'ahuaca, ayée pu te'irájraa tɨ a'íin a'ɨ́ɨn pú'een ɨ́ mej ra'atéchajtza u esquiina a'u mej yé'ejtaahua ɨ́ chi'ij. 18Ja'atɨ tɨ na'a tɨ pua'a seɨ́j ɨ́ ja'atɨ a'ɨ́jna japua rájveti ɨ́ tetej ɨ́ mej meri ra'atéjche u isquiina, a'ɨ́ɨ pu huaténa'axɨjsin nainjapua u ru jetze. Na'ari, ja'atɨ tɨ na'a ɨ́ mej tí'imuarɨ'e, tɨ pua'a seɨ́j japua rájveti a'ɨ́jna ɨ́ tetej, a'ɨ́ɨ pu tira'iráxayeepe'esin. ―Ayee pu tihua'utá'ixaa a'ɨ́jna ɨ́ Jesús. 19Majta a'ɨ́ɨme ɨ́ mej tí'imua'ataca'a ɨ́ yu'uxari jetze, Moisés tɨ ra'uyú'uxaca'a, majta a'ɨ́ɨme ɨ́ mej tí'aijtaca'a u teyujta'a, jeíhua mú tiu'umuá'aj a'ij mej ye'í huárɨni mej mi ca'anacan raatéevi'i, a'iné ayée mú tirú'umua'areereca'a tɨ huá'a jemi huatéeniu a'ɨ́jna jɨme'e ɨ́ niuucari tɨ raataxájtaca'a. Aru a'ɨ́ɨme, a'ɨ́ɨ mú huá'atziɨɨne'eca'a ɨ́ teɨte. 20Jéihua mú rá'eeve'eca'a. A'ɨ́j mú jɨ́n seica huata'íteca'a ɨ́ mej miyen ruseíjrataca'a mej miyen tí'ixaxa'a tzáahuati'ira'a jɨme'e. Ayee mú tí'ijxe'eve'eca'a mej tiraata'íhua'u ti'itɨ́j jɨme'e tɨ i a'ɨ́ɨn a'ɨ́jna jɨ́n auté'ɨtzen mej mi tiu'utátuiire'en ɨ́ tajtuhuan jemi. 21Majta a'ɨ́ɨme ɨ́ mej rá'eeve'eca'a, ayée mú tiraata'íhua'uri'i tɨjɨ́n: ―Maeestru, teen tu ramua'aree tɨjɨ́n pej piyen tí'ixaxa'a tzáahuati'ira'a jɨme'e, pajta tihuá'amua'ate a'ij tɨ tiraavíjte'e. Ayee pepu'u che'atá huá'aruuren ɨ́ teɨte. Mú'ee pej tzáahuati'ira'a jɨme'e tihuá'amua'ate a'ij tɨ tí'ijxe'eve'e ɨ́ Dios. 22¿Ni qui xɨ́'epɨ'ɨn tej tiyen tiu'unájchita a'ɨ́jna jemi tɨ tí'ita'aijte'e, a'ɨ́jna tɨ ayén ántehuaa tɨjɨ́n César? 23Ajta a'ɨ́ɨn Jesús, a'ɨ́ɨ pu rú'umua'areereca'a mej caí miyen tí'ira'ihua'uraca'a tzáahuati'ira'a jɨme'e. Aj pu i ayén tihua'utá'ixaa tɨjɨ́n: 24―Seɨj senaataseíjrate'e ɨ́ tumin. ¿A'ataani néerime'ara'an pɨ́rɨcɨ tɨ jetzen acájvee? ¿A'iné té'axa tɨ jetzen é'eseijre'e? ¿A'iné hui ántehuaa? 25Matɨ́'ɨj mi miyen tiu'utaniú tɨjɨ́n: ―A'ɨ́ɨ pu pɨ́rɨcɨ ɨ́ César. Aj pu i ayén tihua'utá'ixaa tɨjɨ́n: ―Setá'aj siyen raatá'an se'ɨ́jna ɨ́ César, ti'itɨ́j tɨ á'are'ara'an pú'een. Setá'aj seajta raatá'an ɨ́ Dios ti'itɨ́j tɨ á'are'ara'an pú'een. 26Majta a'ɨ́ɨme, camu a'ij tirájteuve'eca'a a'ij mej ye'í huárɨni mej raatémua'itɨn me'ɨ́jna jɨme'e a'ij tɨ a'ɨ́ɨn tihua'utá'ixaa á jéjre'e huá'a tzajta'a ɨ́ teɨte. Majta a'ɨ́ɨme ɨ́ teɨte, naa mú rɨ́'ɨ tira'utaseíj a'ij tɨ a'ɨ́ɨn tiu'utaxájtaca'a. Aj mú mi raatapuá'ajtaca'a mej tí'ixajtaca'a a'ɨ́ɨme ɨ́ seica. 27A'atzu á'ateevi'ica, seica mú e'iré'ene. A'ɨ́ɨme mú pɨ́rɨcɨ ɨ́ saduceos. Ayee mú tí'ixaxa'a a'ɨ́ɨme yee camu cha'a huatarújsin ɨ́ mej meri huácuii. Matɨ́'ɨj mi miyen tiraata'íhua'uri'i tɨjɨ́n: 28―Maeestru, ayée pu ra'uyú'uxaca'a a'ɨ́jna ɨ́ Moisés teecan tɨ ayén té'eme itejmi jemi. Tɨ́ pua'a nu'u ja'atɨ tɨ neɨche, tɨ pua'a a'ɨ́ɨn caí títɨ'ɨríjmua'a huámɨ'ɨni, ruxe'eve'e nu'u tɨ a'ɨ́ɨn ihuáare'ara'an ra'ancuré'evi'itɨn a'ɨ́jna tɨ ratévi'itɨne'e ɨ́ tɨ huamɨ́'ɨ tɨ ij a'ɨ́jna jetze me'ecan tiyaúj á'ara'ani. 29’Ayee pu hui ja'anáj tiuju'urɨ́j itejmi jemi. Ayee mú ará'axcaa a'achú cumu aráhua'apua ɨ́ teɨte ɨ́ mej ru'ihuaamua'ataca'a. Tɨ'ɨj jí a'ɨ́ɨn tɨ vásta'a, a'ɨ́ɨ pu huaténe'ɨcheca'a. Ajta á'iyen huamɨ́'ɨ. Capu xɨ tiyaúuca. Ayee pu hui che'atá na'a tiráaruu ɨ́ seɨ́j tɨ ra'ité'asi. Mu'uri i'i hua'apua. 30’Ajta a'ɨ́ɨn ɨ́ seɨ́j tɨ ra'ité'asi, a'ɨ́ɨ pu ra'ancuré'evi'itɨ a'ɨ́jna ɨ́ 'ɨ́ita'a tɨ raatévi'itɨne'e a'ɨ́jna ihuáare'ara'an teecan. Mu'uri i'i huaíca. 31Ajtahua'a seɨ́j tɨ ra'ité'asi, a'ɨ́ɨ pu ajta ra'ancuré'evi'itɨ. Ayee pu che'atá na'a tihuá'uruu naíjmi'ica ɨ́ mej aráhua'apua, mej caí jetzen tiyaúj muá'araa, naími'i mú huácuii. 32Ajta á'iyen, a'ɨ́ɨn ɨ́ 'ɨ́ita'a pu huamɨ́'ɨ. 33’Me'ecui xaa, matɨ́'ɨj a'itácɨɨne huá'a tzajta'a ɨ́ mɨ'ɨchite, ¿a'ataani ɨ́ra'ara'an pu'éene'e a'ame?, a'iné naíjmi'i mú ra'ancuré'evi'itɨ. 34Aj pu i Jesús ayén tihua'utá'ixaa tɨjɨ́n: ―A'ɨ́ɨme ɨ́ teɨte ɨ́ mej íjii huáteemua, a'ɨ́ɨ mú néjne'ɨche, majta víviɨche. 35Majta a'ɨ́ɨme tɨ ayén tihua'uvíjte'e mej a'ájna e'ará'asti mej a'itácɨɨne huá'a tzajta'a ɨ́ mɨ'ɨchite, majta me'ájna e'ará'asti a'ájna xɨcájra'an jetze tɨ Dios nainjapua tiu'uta'aíjta, a'ɨ́ɨ mú caí cha'a néjne'ɨchen, camu majta víviɨchen. 36Camu majta ché'e cui'ini, a'iné ayée mú 'een matɨ́j a'ɨ́ɨme ɨ́ mej ta japua tí'ivaɨre'e. A'ɨ́ɨ mú yaújmua'ame'en pú'een ɨ́ Dios a'iné mu'uri huanéj huá'a tzajta'a ɨ́ mɨ'ɨchite. 37’Ajta a'ɨ́ɨn ɨ́ Moisés, a'ɨ́ɨ pu hui titaatá'ixaa a'ɨ́jna jɨme'e tɨ́'ɨj ra'uyú'uxaca'a a'ij tɨ ja'anáj seɨ́j a'uteájtaa tu'upi tɨ ajtɨ́tɨ'ɨ. A'ɨ́j pu jɨ́n, Moisés ayén raatamuá'a ɨ́ tavástara'a tɨjɨ́n: “Ɨ́ tɨ Diojra'an pú'een a'ɨ́jna ɨ́ Abraham, ajta ayén che'atá na'a Diojra'an pú'een a'ɨ́jna ɨ́ Isaac, ajta Diojra'an pú'een ɨ́ Jacobo.” 38’Moisés pu hui tihua'utá'ixaa cumu mej maúche'e ruuricaa. A'ɨ́j pu jɨ́n, a'ii pu a'ɨ́ɨn pú'een ɨ́ huá'a Dios a'ɨ́ɨme ɨ́ mej ruuri. Capu huá'a Dios pú'een a'ɨ́ɨme ɨ́ mej mɨ'ɨchíjta muaateájturaa tɨ́j na'a rusén jɨme'e. ―Ayee pu tihua'utá'ixaa a'ɨ́jna ɨ́ Jesús. 39Majta seica ɨ́ mej tí'imua'ata ɨ́ yu'uxari jetze, Moisés tɨ ra'uyú'uxaca'a, ayée mú tiu'utaniú tɨjɨ́n: ―Maeestru, xɨ́'epɨ'ɨn pej tiu'utaxájtaca'a. 40Tɨ́j na'a a'ajná'ɨmua, capu ché'e ja'atɨ ahuaújca'ane tɨ ti'itɨ́j raata'íhua'u. 41Ajta Jesús ayén tihua'utá'ixaa tɨjɨ́n: ―¿A'iné 'een jɨme'e miyen tí'ixaxa'a me'ɨ́jna jɨme'e ɨ́ Cɨríistu'u Dios tɨ ra'antíhua'u yee yaujra'an pú'een ɨ́ David teecan? 42Ajta a'ɨ́ɨn ɨ́ David, ayée pu tiu'utaxájtaca'a a'ɨ́jna jɨ́me'en tɨ té'eyu'usi'i ɨ́ yu'uxari jetze tɨ ayén ántehuaa tɨjɨ́n Chuiicari. Ayen tɨjɨ́n: Dios pu ayén tiraata'ixaa ɨ́ nevástara'a ɨ́ tɨ ra'antíhua'u tɨ jɨ́me'en yee: “Acáayeijxɨ'ɨ ɨpuari japua, íiye nerɨ'ɨríinta'a. 43Paúche'e pej hui mej cájcatii ajta necaí hua'utémua'itɨn ɨ́ mej muájcha'ɨɨre'e.” 44’Ajta a'ɨ́ɨn ɨ́ David, a'ɨ́ɨ pu hui ayén raatamuá'a a'ɨ́jna tɨ Dios ra'antíhua'u tɨjɨ́n nevástara'a. Tɨ́ pua'a ayén ti'ayajna, ¿a'iné tí'irɨ'ɨri tɨ a'ɨ́ɨn Cɨríistu'u ayén a'ɨ́ɨn pú'eene'e a'ɨ́jna tɨ David jetze airaújneijte? Capu a'ij tí'irɨ'ɨri tzɨ́te'e. ―Ayee pu tihua'utá'ixaa a'ɨ́jna ɨ́ Jesús. 45Aj pu i Jesús ayén tihua'utá'ixaa a'ɨ́mej ɨ́ mej jamuan á'ujujhua'ane'e. Majta teɨte tí'inamuajraca'a. 46Ayen tɨjɨ́n: ―Rɨ́'ɨ xu'u mú'een, a'ɨ́mej jemi ɨ́ mej tí'imua'ata ɨ́ yu'uxari jetze, Moisés tɨ ra'uyú'uxaca'a. Jé'ecan pu hua'aráanajche mej tɨ́tɨ'ɨjmé'en ti'itechéjmé'e mé mé'ujujhua'ane'en a'ájna mej tejé'etu'araca, majta a'ɨ́ɨme ɨ́ teɨte, a'ɨ́ɨ mú majta tihua'aseíira'a muá'aye'i. ’Ayee mú me'ɨ́jna jɨ́n tite'ujtzáahuate'e muá'aju'un a'ɨ́ɨme ɨ́ puaarijse me'ɨ́jna jɨme'e mej ve'ecán jɨ́n títeetaté'ete ɨ́ Dios jemi. Majta, ayée mú tí'ijxe'eve'e mej me'uun a'ujrá'asen ɨ́ ɨpuari japua tɨ jaítze'e ruxe'eve'e a'ujna teyujta'a, ajta hua'aráanajche mej mi á vejli'i a'ujrá'ase jemin tɨ tihuá'amin matɨ́'ɨj tí'iyeste. 47’A'ɨ́ɨ mú hui majta huá'ari'iraca ɨ́ huá'achi'i a'ɨ́mej ɨ́ 'uuca mej huataújseɨ́stareca'a. Ayee mú jɨ́n huarɨ́n, aj mú mi a'uun a'uteáruti u teyujta'a. Matɨ́'ɨjtá mi a'ateevi'i mú muá'aju'un mej téniuusime'e muá'aju'un mej mi seica teɨte hua'useíj. Majta me'ɨ́n ɨ́ mej miyen 'een, jeíhua mú huápɨ'ɨ rajpuaíitzi muá'aju'un. ―Ayee pu tihua'utá'ixaa a'ɨ́jna ɨ́ Jesús.

will be added

X\