San Lucas 2

1A'ájná'ɨmua, tɨ́'ɨj a'ɨ́ɨn ti'itéveeca'a ɨ́ rey jɨme'e a'ɨ́jna ɨ́ Augusto tɨ ajta ayée ántehuaaca'a tɨjɨ́n César, a'ɨ́ɨ pu tíraata'aíjtaca'a mej mi ahuaujyu'uxan mej mi hua'uté'itɨen naíjmi'ica mej a'uun a'uchéjme tɨ́j na'a a'u tɨ tejé'aijta. 2Ayee pu tiu'urɨ́j tɨ́'ɨj auj Cirenio ti'itéveeca'a tajtuhuan jɨme'e a'ájna u Siria. A'ɨ́ɨ pu a'ɨ́ɨn pú'eene'e tɨ hua'uta'íteca'a ɨ́ mej amuacaí hua'uté'itɨee. 3Majta me'ɨ́n ɨ́ teɨte, naími'i mú a'ucɨ́jxɨ a'u mej é'eme'ecan mej mi a'ahuaújyu'uxa. 4A'ɨ́j pu jɨ́n, a'ɨ́ɨn José pu huirájraa a'ujna Nazarét, Galilea jetze tɨ ajtéme'ecan. A'uu pu a'ará'a u Judea, chajta'a tɨ ayén téja'arájtehuaa tɨjɨ́n Belén. A'uu pu ja'unú'ihuaca'a a'ɨ́jna ɨ́ David teecan, a'ɨ́jna tɨ ajmí'i ti'itéveeca'a ɨ́ rey jɨme'e. A'iné a'ɨ́j pu jetze huanéj a'ɨ́jna ɨ́ José, a'ɨ́j pu jɨ́n a'uun á'uraa. 5Ajta pu a'ɨ́ɨn á'uraa ɨ́ María a'ɨ́jna jamuan ɨ́ José tɨ ra'ancuré'evi'itɨ. Ajta a'ɨ́jna ɨ́ María, pu'uri autájucaca'a. 6A'uu mú a'uté'uuca'a tɨ́'ɨj teja'uré'ene ɨ́ xɨca tɨ jetzen huanú'ihuaca'a ɨ́ pa'arɨ'ɨ. 7A'ɨ́j pu jɨ́n tiyaúj já'araa amuacaícan jɨme'e. Teáataca'a ɨ́ pa'arɨ'ɨ. Cɨ́ɨxuri pu jɨ́n racá'ijcataca'a tɨ́'ɨj huanú'ihuaca'a. A'ɨ́j pu jetze ra'atéete ti'itɨ́j jetze cɨyej tɨ atécun a'u mej ye'emuaate tejé'ecua'aca a'iné camuché'e ú'uvejricɨca'a cuaartu tzajta'a mej me'uun a'uteárute. 8A'ujna vejli'i u Belén, seica mú a'uté'uuca'a cáne'axɨ mej tiseíjraca'a. A'uu mú e'etáxa'iirihua'a huá'a jamuan. 9Tɨ'ɨj jí seɨ́j pu huataseíjre tɨ ta japua tí'ivaɨre'e tavástara'a jemi. Jɨ́me'en pu'u huataseíjre, aj pu i a'ɨ́ɨn tavástara'a á e'etatátzavajraa huá'a jemi ɨ́ mej e'ejteí. Majta me'ɨ́n cáne'axɨ mej seɨre'e, temua'a mú jeíhua tiu'utátziɨn. 10Ajta ayén tihua'utá'ixaa a'ɨ́jna tɨ ta japua tí'ivaɨre'e tɨjɨ́n: ―Caxu tí'itziɨɨne'e. Ayee nu 'een jɨ́n mú a'uvé'emej neatá'aj niuucari amuaatá'ixaate'en ɨ́ sej jɨ́n huataújtemua'ave'esin jeíhua, tɨ ti'ivaɨ́re'e a'ame para naíjmi'ica jemi. 11’Ijii, a'ájna chajta'a David teecan tɨ jetzen é'eme'ecan, mú'ejmi jɨme'e pu hui ja'unú'ihuaca'a a'ɨ́jna tɨ amua'irátuaasin. A'ii pu a'ɨ́ɨn pú'een ɨ́ Cɨríistu'u, ɨ́ tavástara'a, a'ɨ́jna tɨ Dios ra'antíhua'u. 12’Ayee xu éeni'icɨ'e ramua'aréeren a'ij tɨ éene'e a'ɨ́ɨn pú'een. A'uun xu yé'eteuni ɨ́ pa'arɨ'ɨ, cɨ́ɨxuri jɨ́n caícatzi'ihua. A'uu pu araca'itɨ́ a'ame cɨyej jetze ta'atécun, ye'emuaate mej jetzen té'ecua'aca. 13Jíye'itzi mú jɨ́n jeíhua huataseíjre a'ɨ́ɨme ɨ́ mej ta japua tí'ivaɨre'e me'ɨ́jna jemi ɨ́ seɨ́j. Matɨ́'ɨj mi naíjmi'i rɨ́'ɨ tiraateájtuaa ɨ́ tavástara'a. Ayee mú tiu'uxájtaca'a. 14Miyen tɨjɨ́n: Tiché'e rɨ́'ɨ tiraatá'an ɨ́ Dios tɨ huápɨ'ɨ naa seijre'e ɨ́ ta japua. Ajta íiyen chaanaca japua, miché'e rɨ́'ɨ tí'itechéjme'eni ɨ́ teɨte ɨ́ tɨ Dios rɨ́'ɨ tihua'utá'asin. Ayee mu'u tiu'utaxájtaca'a. 15Matɨ́'ɨj mi a'ucɨ́j a'ɨ́ɨme ɨ́ mej ta japua tí'ivaɨre'e. Majta me'ɨ́n ɨ́ mej cáne'axɨ tiseíjraca'a, ayée mú tiu'utaú'ixaa tɨjɨ́n: ―Tiché'e u á'uju'un a'ujna Belén tetá'aj ya'useíj a'ɨ́jna a'ij tɨ huarɨ́j ɨ́ tɨ taata'ixaa ɨ́ tavástara'a. 16Matɨ́'ɨj mi ca'anacan u á'uju'un. A'uu mú yá'uteu me'ɨ́jna ɨ́ José, majta María, majta ɨ́ uneeca'i. A'uu pu cɨyej jetze aráca'atii, ye'emuaate mej jetzen té'ecua'aca. 17Matɨ́'ɨj raaseíj ɨ́ pa'arɨ'ɨ, aj mú mi hua'utá'ixa ɨ́ teɨte a'ij tɨ a'ɨ́ɨn tihua'utá'ixaa tɨ huá'a jemi huataseíjre, a'ij tɨ tihua'utá'ixaa a'ɨ́jna jɨme'e ɨ́ pa'arɨ'ɨ tɨ huanú'ihuaca'a. 18Majta me'ɨ́n ɨ́ mej huá'unamuajri'i a'ij mej tí'ixajtaca'a a'ɨ́ɨme cáne'axɨ mej tiseíjraca'a, naími'i mú rɨ́'ɨ naa tihua'utaseíj. 19Ajta a'ɨ́ɨn ɨ́ María, a'ɨ́ɨ pu rú'avaataca'a ɨ́ ru tzajta'a. Jéihua pu tí'imua'ajca a'ij tɨ ti'itɨ́ huarɨ́j huá'a jemi. 20Matɨ́'ɨj mi a'ucɨ́j a'ɨ́ɨme cáne'axɨ mej tiseíjraca'a. Jé'ecan maújtemua'ave'e ɨ́ Dios jemi, majta rɨ́'ɨ tiraatá'a niuucari jɨme'e a'ɨ́jna jɨme'e ɨ́ mej ráanamuajri'i, majta ɨ́ mej raaseíj. Naími'i pu ayén teja'uré'ene a'ij tɨ tihua'utá'ixaa ɨ́ tavástara'a. 21Tɨ́'ɨjta tejauumé'eca aráhuaica xɨca jetze, tɨ́'ɨj i teja'uré'ene ɨ́ xɨca mej jetzen ra'antisíjchi ɨ́ naviira'an ɨ́ tɨ jetzen te'evi'i ɨ́ pa'arɨ'ɨ. Matɨ́'ɨj mi miyen raatamuá'a tɨjɨ́n Jesús, tɨ́j ayén amuacaícan tiraata'ixaa a'ɨ́jna ɨ́ seɨ́j tɨ ta japua tí'ivaɨre'e. 22Tɨ́'ɨjta ari teja'uré'ene ja'anáj matɨ́j pua'a ɨ́'ɨhuaca a'ij tɨ ye'í té'eyu'usi'i ɨ́ yu'uxari jetze Moisés tɨ ra'uyú'uxaca'a, matɨ́'ɨj mi me'ájna ya'uví'itɨ me'ájna Jerusalén mej mi u ya'utaseíjrata ɨ́ pa'arɨ'ɨ u teyujta'a ɨ́ tavástara'a jemi. 23Ayee mú huarɨ́j, a'iné ayée pu té'eyu'usi'i ɨ́ yu'uxari jetze tɨjɨ́n: “Ayee pu tiú'ujxe'eve'e mej ya'utaseíjrata ɨ́ tavástara'a jemi naíjmi'ica a'achú mej pua'améca ɨ́ mej amuaaté'ee muaanúnu'ihuaca'a ɨ́ tɨ'ɨríi ɨ́ mej teteca.” 24Majta tiu'utámuaɨ'ɨvejtan a'ij tɨ ajta té'eyu'usi'i a'ɨ́jna jetze tɨ jɨ́n tihuá'u'itɨiiri'i ɨ́ tavástara'a. Ayen tɨjɨ́n: “Miche'e hua'apuaca huatámuaɨ'ɨvejta ɨ́ cucui'ise na'ari hua'apuaca ɨ́ jáamua'ise.” 25A'ájná'ɨmua, seɨ́j pu a'uun e'echéjme'e a'ájna Jerusalén. Ayee pu ántehuaaca'a tɨjɨ́n Simeón. Rɨ́'ɨ pu ti'itiújcha'ɨɨca'a ɨ́ Dios jemi. Ajta jeíhua pu rá'astejca'a ɨ́ ruye'irá. A'ɨ́j pu tí'ijchu'eve'eca'a a'ájna xɨcájra'an jetze tɨ jetzen Dios huá'ancu'uvajxɨ'ɨsin a'ɨ́mej ɨ́ mej Israél jetze ajtéme'ecan. Ajta a'ɨ́ɨn xɨéjniu'ucare'ara'an ɨ́ Dios, a'ɨ́ɨ pu jemin huateájturaa. 26A'ɨ́n xɨéjniu'ucare'ara'an ayén tiraata'ixaa tɨ nu'u caí mɨ'ɨni caí xɨ huataseíjre'en ɨ́ Cɨríistu'u, tɨ tavástara'a ye'uta'íti'i. A'ɨ́ɨ pu nu'u Simeón raseijran. 27Tɨ'ɨj jí ɨ́ xɨéjniu'ucare'ara'an ɨ́ Dios ca'aníjra'a raatá'a a'ɨ́jna ɨ́ Simeón tɨ a'uun a'atanén u teyujta'a a'u tɨ e'eráyaujta'a. Majta me'ɨ́n ɨ́ vaújsimua'ame'en ɨ́ pa'arɨ'ɨ, a'úu mú majta a'ará'a u teyujta'a mej mi miyen ráaruuren ɨ́ pa'arɨ'ɨ a'ij tɨ tiú'ujxe'eve'e mej mi ra'ará'asten ɨ́ ruye'irá. 28Aj pu i a'ɨ́ɨn Simeón ra'ancuré'echui a'ɨ́jna ɨ́ pa'arɨ'ɨ. Tɨ'ɨj jí rɨ́'ɨ tiraatá'a ɨ́ Dios tɨjɨ́n: 29Nevástara'a, pu'uri rɨ'ɨrí pej naatá'an nej nexɨéehua huámɨ'ɨni, a'iné pepu'uri ra'ará'aste a'ɨ́jna ɨ́ pej jɨ́n te'atá'aratziiri'i ineetzi jemi i nej muavaɨre'e. 30- 31A'iné nejɨ́'ɨ nu jɨ́n raaseíj a'íjna ɨ́ pej jɨ́n tu'irátuaasin, a'íjna ɨ́ pej yen raateájtuaa meti'iseíiraca'a naíjmi'i ɨ́ teɨte a'achú mej pua'amé yen huachéjme íiyen chaanaca japua. 32A'ɨ́ɨ pu hua'atátzavi'ira a'ame temua'a naa a'ɨ́mej ɨ́ mej caí Israél jetze ajtéme'ecan mej mi caí ché'e miyen 'eene'en matɨ́j a'ɨ́ɨme ɨ́ mej huachéjme tɨ́ca'amiste'e. Ajta a'ɨ́ɨ pu hui ve'ecán jɨ́n tíhua'uta'aíjte'esin ɨ́ á'ateɨtestemua'a, a'ɨ́ɨme ɨ́ mej Israél jetze ajtéme'ecan. Ayee pu tiu'utaxájtaca'a a'ɨ́jna ɨ́ Simeón. 33Jé'ecan mú naa rɨ́'ɨ tira'utaseíj ɨ́ vaújsimua'ame'en ɨ́ pa'arɨ'ɨ a'ɨ́jna jɨme'e a'ij tɨ tiu'utaxájtaca'a ɨ́ pa'arɨ'ɨ jɨme'e. 34Tɨ'ɨj jí Simeón rɨ́'ɨ tihua'uteájtuaa. Tɨ'ɨj jí ayén tiraata'ixaa ɨ́ María, ɨ́ náànajra'an ɨ́ pa'arɨ'ɨ tɨjɨ́n: ―Casi'i, ayée pu tiú'uxɨ'epɨ'ɨntari'ihuaca'a tɨ a'ɨ́jna pa'arɨ'ɨ jɨme'e. Mu'iitɨ́ mú ve'ecán jɨ́n tite'enteárutixɨ'ɨsin a'ɨ́ɨme ɨ́ mej Israél jetze ajtéme'ecan, ajta mu'iicáca pu té'ari'ira ɨ́ mej jɨ́n títetateí. A'ɨ́j xu jɨ́n siyen tiráamua'aree tɨ ayén té'eme a'iné jeíhua mú ratíti. 35’Ayee pu té'eme tɨ́'ij mé jéjre'e seijre'e a'ij mej tí'imua'atze ɨ́ teɨte mému'iitɨ́. Ajta mú'eetzi, ayée pu che'atá na'a tímu'uhuatacuí'ini ɨ́ á'a tzajta'a cumu tɨ ja'atɨ mua'antéjtzeti nahuaa jɨme'e. ―Ayee pu tiraata'ixaa. 36Seɨ́j pu ajta vejli'i huatéveeca'a tɨ tí'ixaxa'ata'a ɨ́ Dios jetze me'ecan. 'Ɨ́ita'a pu pú'een tɨ ayén ántehuaa tɨjɨ́n Ana. Pu'uri ucarij. A'ɨ́ɨ pu yaujra'an pú'een a'ɨ́jna ɨ́ Fanuel, ɨ́ tɨ Aser jetze ajtéme'ecan. A'ɨ́jna ɨ́ 'ɨ́ita'a, ayée pu á'atee tɨ viɨ́che'e a'achú cumu aráhua'apua nine'ira'a. Tɨ'ɨj jí huamɨ́'ɨ ɨ́ cɨ́na'ara'an. 37Tɨ'ɨj jí ruséɨjta já'araa. Jéihua pu ari á'atee tɨ ayén ruseɨ́j. Ajta pu'uri ayén ucarij na'a cumu muáacuate japuan muáacua nine'ira'a. Capu ajta ja'anáj huiráaye'icaa u teyujta'a sino a'úu pu rɨ́'ɨ tiratá'acare'e ɨ́ Dios jemi nain xɨcaj tzajta'a, ajta nain tɨ́ca'ari tzajta'a. Ajta pu rú'itzi'ive'eca'a, ajta téniúuve'e ɨ́ Dios jemi. 38Jɨ́me'en pu'u raatapuá'ajtaca'a ɨ́ Simeón tɨ tiu'utaxájtaca'a, aj pu i a'ɨ́ɨn a'uré'ene a'ɨ́mej jemi. Tɨ'ɨj jí rɨ́'ɨ tiraatá'a ɨ́ Dios. Tɨ'ɨj jí a'utéjche tɨ hua'utá'ixaate'en ɨ́ teɨte a'ɨ́jna jɨme'e ɨ́ pa'arɨ'ɨ. A'ɨ́ɨme ɨ́ teɨte, a'ii mú a'ɨ́ɨn pú'een ɨ́ mej rachú'eve'eca'a tɨ Dios hua'irájtuaani naími'i a'uun mej Jerusalén huachéjme. 39Majta me'ɨ́n ɨ́ vaújsimua'ame'en ɨ́ pa'arɨ'ɨ, matɨ́'ɨj nain jɨ́n te'ará'aste a'ij tɨ té'eyu'usi'i a'ɨ́jna jetze tɨ jetzen tihuá'u'itɨiiri'i ɨ́ tavástara'a, matɨ́'ɨj mi a'ucɨ́j a'ájna já'ahua'a Galilea. A'uu mú a'utanéj u Nazarét, a'u mej é'eme'ecan. 40Ajta a'ɨ́ɨn ɨ́ pa'arɨ'ɨ, a'ɨ́ɨ pu huavé'ese, ajta huateújca'ane. Jé'ecan pu rɨ́'ɨ mé teúumua'arejca'a. Ajta pu Dios rɨ́'ɨ tiratá'acare'e. 41Majta a'ɨ́ɨme ɨ́ vaújsimua'ame'en ɨ́ pa'arɨ'ɨ, tɨ́'ɨj pɨ́ na'a nine'ira'a jetze, a'úu mú a'atánineica'a a'ánna Jerusalén mej mi ra'utámua'aree a'ájna xɨcájra'a tɨ jetzen Dios tihua'utá'uuni'iri'i ɨ́ huá'a yaujmua'a mej anáaté'ee muaanúnu'ihuaca'a. 42Tɨ́'ɨj ari rájcha'ɨɨca'a a'achú cumu tamuáamuata'a japuan hua'apua nine'ira'a a'ɨ́jna ɨ́ pa'arɨ'ɨ, a'ɨ́ɨme vaújsimua'ame'en, a'úu mú á'uju'un mej mi tiú'uyesten ɨ́ ruye'irá jɨme'e. 43Tɨ́'ɨj te'upuá'areca'a ɨ́ mej tiu'uyé'este, matɨ́'ɨj mi huaré'acɨ para a'ujna mé é'eche. Ajta a'ɨ́ɨn ɨ́ pa'arɨ'ɨ, a'úu pu a'uteájturaa a'ájna Jerusalén. Majta me'ɨ́n ɨ́ vaújsimua'ame'en, camu ramua'areereca'a. 44Ayee mú tí'imua'ajca tɨjɨ́n: Huá'a jamuan pu huaméj ɨ́ seica ɨ́ mej ta jamuan huajú'ucaa. Mu'uri seɨ́j xɨcaj á'atee mej miyen titeejú'ucaa. Matɨ́'ɨj mi autéjhuii mej ráahuauni huá'a tzajta'a ɨ́ teɨte, ajta a'ɨ́mej jemi ɨ́ mej huá'a jamuan huajú'ucaa. 45Matɨ́'ɨj caí ráateu, matɨ́'ɨj a'uun huaré'acɨ a'ájna Jerusalén mej mi ráahuauni. 46Mirá'atee a'achú cumu huaíca xɨcaj mej rahuauhuau. Matɨ́'ɨj mi xaa ráateu. A'uu pu unú'ujcatii u teyujta'a a'u tɨ e'eráyaujta'a. A'uu pu a'utácatii huá'a jamuan ɨ́ mej tí'imua'ata. A'ɨ́mej pu namuajraca'a, ajta tihua'íhua'ura. 47Majta me'ɨ́n ɨ́ mej ráanamuajri'i, naími'i mú naa rɨ́'ɨ tira'utaseíj me'ɨ́jna jɨme'e tɨ temua'a naa tiyaú'itɨée já'araa a'ij mej tiraata'ixaa, majta me'ɨ́jna jɨme'e a'ij tɨ a'ɨ́ɨn tiu'utaxájtaca'a. 48Majta me'ɨ́n ɨ́ vaújsimua'ame'en matɨ́'ɨj raaseíj tɨ huá'a tzajta'a jé'ejvee, jeíhua mú a'ij ra'utaseíj. Tɨ'ɨj jí ayén tiraata'ixaa ɨ́ náànajra'an tɨjɨ́n: ―Niyauj, ¿a'iné 'een jɨ́n piyen taruure? Tu'uri á'atee tej muahuauhuau inee, ajta a'atáàta. Jé'ecan tu a'ij pua'a te'etamua'ate mú'eetzi jɨme'e. 49Tɨ'ɨj jí ayén tihua'utá'ixaa tɨjɨ́n: ―¿A'iné 'een jɨ́n siyen tí'inehuauhuau? ¿Ni qui secaí ramua'aree tɨ ayén tiú'ujxe'eve'e nej niyen te'evé'enmua'areere íiyu niTáàta chi'ij jetze? 50Majta me'ɨ́n, camu a'atzu me'ɨ́n yaú'itɨée muá'araa a'ij tɨ tihua'utá'ixaa. 51Tɨ'ɨj jí á'uraa huá'a jamuan ɨ́ ruvaújsimua'a. Matɨ́'ɨj mi me'uun a'ucáane u Nazarét. Ajta a'ɨ́ɨn, a'ɨ́ɨ pu huá'antzaahua ɨ́ ruvaújsimua'a. Ajta a'ɨ́ɨn náànajra'an, a'ɨ́ɨ pu nain teú'avaataca'a ɨ́ ru tzajta'a. 52Ajta a'ɨ́ɨn ɨ́ Jesús, a'ɨ́ɨ pu huavé'ese, ajta jaítze'e ari tiú'umua'areereca'a. Dios pu rɨ́'ɨ tiraatá'a, majta ɨ́ teɨte.

will be added

X\