San Lucas 18

1Aj pu i Jesús seɨ́j niuucari jɨ́n tihua'utá'ixaa mej mi ráamua'aree tɨ ayén nu'u tiú'ujxe'eve'e mej téniuuca'an ja'anáj tɨ na'a. Ajta ayén tiú'ujxe'eve'e mej nu'u caí ruxɨeemɨ́jte'e. 2Ayee pu tihua'utá'ixaa tɨjɨ́n: ―Aa pu nu'u já'ahua'a seɨ́j chajta'a jetze ja'atɨ pu é'echejca'a tɨ juees jɨ́n ti'itéveeca'a. Capu nu'u hui rá'atese'eca'a ɨ́ Dios a'ɨ́jna ɨ́ juees, capu ajta jetzen ruxe'eve'eca'a a'ij tɨ ti'itɨ́ huá'aruure ɨ́ teɨte. 3’Ajta nu'u seɨ́j a'uun a'utéveeca'a 'ɨ́ita'a tɨ huaújseɨstareca'a. Ajta a'ɨ́ɨn ɨ́ 'ɨ́ita'a, ja'anáj tɨ na'a pu a'uré'enineica'a ɨ́ juees jemi. Ayee pu nu'u hui tí'ijhuaviiraca'a tɨjɨ́n: “Patá'aj yeehui piyen náaruuren pej ne'uxɨ́jte'en pe'ɨ́jna jɨme'e tɨ ja'atɨ néjcha'ɨɨre'e.” 4Ajta a'ɨ́ɨn ɨ́ juees, a'ɨ́ɨ pu nu'u rá'ijmɨijraca'a. Pu'uri a'ateevi'i tɨ ayén raruurejca'a. Aj pu i ayén tiu'umuá'aj tɨjɨ́n: “Jee xaa ne'u, canu yeehui rá'atese'e ɨ́ Dios, capu ajta neetzi jetze ruxe'eve'e a'ij tɨ ti'itɨ́j huá'aruure ɨ́ teɨte. 5Aru amɨ́jna mɨ 'ɨ́ita'a, tɨ́'ɨj pɨ́ na'a pu yeehui yé táninei. Jé'ecan pu nejaaxɨejte'e. Tij caí nee nu yeehui rá'axɨjte'en ne'ɨ́jna jɨme'e tɨ ja'atɨ rájcha'ɨɨre'e. Na'ari caí, ajtahua'a pu yeehui yé táninéica'a a'ame ajta nena'a caí tácua'anaxɨ'ɨn ne'ɨ́jna jɨme'e.” Ayee pu nu'u tiu'umuá'aj. 6Ajta tavástara'a pu ayén tihua'utá'ixaa tɨjɨ́n: ―Xaanamuajri'i mú'een a'ij tɨ ti'ixa a'ɨ́jna ɨ́ juees tɨ a'ij pua'a ti'itiújcha'ɨɨ. 7Ajta a'ɨ́ɨn ɨ́ Dios ɨ́ sej rájya'upua, ¿a'iné tejamuá'amitɨejte'e a'ij tɨ huárɨni mú'ejmi jɨme'e ɨ́ tɨ amua'antíhua'u? ¿Ni caí amuá'axɨjte'en a'ɨ́jna jɨme'e ɨ́ mej amuájcha'ɨɨre'e ɨ́ á'amuaxɨ'ej teɨte, ɨ́ tɨ Dios amua'antíhua'u? A'ii ne'u caí. Nain xɨcaj tzajta'a, ajta nain tɨ́ca'ari tzajta'a, mú'een xu rahuauhuau tɨ ayén huárɨni. ¿Ni qui á'ateere tɨ á'amua'ijmɨíira a'ame? Capu xaa ne'u a'atzu. 8’Ayee nu hui tejá'amua'ixaate'e. Dios pu ayén té'ujca'ane tɨ ama'uxɨ́jten a'ɨ́jna jɨme'e ɨ́ mej amuájcha'ɨɨre'e. Ajta ca'anacan pu ayén rɨni. Mɨ́ ajta, netɨ́'ɨj uvé'enen inee, i nej neajta huá'a jetze airáane ɨ́ teɨte, ¿ni qui mecaí cha'a té'atzaahuate'e a'ɨ́ɨme ɨ́ mej yen chaanaca japua a'uchéjme? Camu a'atzu, tzɨ́te'e. 9Jesús pu ajtahua'a seɨ́j niuucari jɨ́n tihua'utá'ixaa a'ɨ́mej jɨ́me'en ɨ́ mej miyen tiu'umuá'aj ɨ́ ru tzajta'a tɨjɨ́n rɨ́'ɨ mú nu'u tí'iteteɨte, ɨ́ mej majta huá'axɨeehuata ɨ́ seica ɨ́ ruxɨ́'ej teɨte. Tɨjɨ́n: 10―A'ɨ́ɨme ɨ́ teɨte, ɨ́ mej hua'apua, a'úu mú nu'u a'uteájrupi teyujta'a mej mi me'uun huatéjniuuni. Seɨ́j pu fariseo pú'eene'e. Ajta ɨ́ seɨ́j, a'ɨ́ɨ pu hui pɨ́rɨcɨ tɨ huá'ajijve'eca'a ɨ́ mej tí'itɨcɨ. 11’Ajta a'ɨ́ɨn ɨ́ fariseo, a'ɨ́ɨ pu nu'u huatéechaxɨ. A'ɨ́ɨ pu i a'utéjche tɨ ayén tiu'utéjniuuni ɨ́ ru tzajta'a tɨjɨ́n: “Dios, jé'ecan nu huatántemua'ave'e mú'eetzi jemi, a'iné canu yeehui niyen 'een matɨ́j 'een ɨ́ seica ɨ́ teɨte. A'ɨ́ɨ mú yeehui tí'inahua'aj na'ari a'ij mú pua'a titetiújcha'ɨɨ, majta metíu'uxana'acɨra'ate 'úucate jamuan. Canu yeehui neajta niyen 'een tɨ́j amɨ́jna tɨ huá'ajijve'e a'ɨ́mej ɨ́ mej tí'itɨcɨ. 12Hua'apuaca jetze nu yeehui né'itzi'ivi seɨj itɨeeri jɨme'e. Neajta niyen tiraatá'aca seɨ́j tamuáamuata'a tɨ anxɨ́te me'ecan ɨ́ tɨ tinaacɨ́'ɨ.” 13’Ajta a'ɨ́ɨn tɨ huá'ajijve'e ɨ́ mej tí'itɨcɨ, áa pu nu'u hui a'atzu ɨmuá a'utevée. Capu nu'u ajta á'ujca'anejca'a tɨ júte'e á'ujneere, sino anteújtu'asixɨ ɨ́ rútaviitze'e ɨ́ rumuájca'a jɨme'e. Ayee pu nu'u tiu'utéjniuu tɨjɨ́n: “Dios, patá'aj yeehui ná'ancu'uvajxɨ'ɨn ineetzi, a'iné a'ij nu pua'a ti'itíncha'ɨɨ.” Ayee pu'u hui tiu'utaxájtaca'a. 14’Ayee nu tejá'amua'ixaate'e a'ɨ́jna ɨ́ ja'atɨ tɨ huá'ajijve'e ɨ́ mej tí'itɨcɨ, a'ɨ́ɨ pu xaa rɨ'éene'ecán jɨ́n huateájturaa ɨ́ ru tzajta'a ɨ́ Dios jemi tɨ́'ɨj a'ará'a ɨ́ ruche. Ajta ɨ́ seɨ́j ɨ́ fariseo, capu hui a'atzu xɨ́'epɨ'ɨn tiu'uteájturaa ɨ́ Dios jemi. Ayee pu'u tieene'e já'araa, a'iné tɨ pua'a ja'atɨ tɨ na'a á'ujtzaahuate'e, a'ɨ́ɨ pu tiu'utatévi'ira'ata. Ajta tɨ pua'a ja'atɨ tɨ́j na'a caí ayén té'ujtzaahuate'e, Dios pu ve'ecán jɨ́n tí'ira'íjcate'en. ―Ayee pu tihua'utá'ixaa a'ɨ́jna ɨ́ Jesús. 15Majta seica ɨ́ teɨte, tɨ'ɨríi mú á je'evé'evi'itɨxɨ ɨ́ Jesús jemi tɨ ij a'ɨ́ɨn hue'iré'echuiixɨ'ɨn tɨ ij Dios ayén a'ɨ́jna jɨ́n rɨ́'ɨ tihua'utá'an. Matɨ́'ɨj me'ɨ́n hua'useíj a'ɨ́ɨme ɨ́ mej Jesús jamuan á'ujujhua'ane'e, matɨ́'ɨj mi hua'ajtéa'axɨ ɨ́ teɨte. 16Mɨ́ ajta a'ɨ́jna ɨ́ Jesús, a'ɨ́ɨ pu hua'utajé ɨ́ tɨ'ɨríi mej mi a'ire'enen ɨ́ jemin. Ayee pu tiu'utaxájtaca'a tɨjɨ́n: ―Miche'e memɨ́n mé huaje'evé'evi'itɨ́n ineetzi jemi mɨ tɨ'ɨríi. Caxu huá'ijmɨijra, a'iné amɨ́mej pu hui tí'icɨ'ɨti mej mi me'uun a'uteárute a'ujna Dios tɨ é'eseijre'e. 17’Ayee nu tejá'amua'ixaate'e tzáahuati'ira'a jɨme'e, ja'atɨ tɨ na'a tɨ hui caí ayén che'atá na'a á'ujca'ane tɨ Dios tiraata'aíjte'en a'ij mej tité'ujca'ane mɨ tɨ'ɨríi, capu xaa ne'u a'ájna a'uteáruti a'u tɨ Dios é'eseijre'e. ―Ayee pu tiu'utaxájtaca'a a'ɨ́jna ɨ́ Jesús. 18Ajta a'ɨ́ɨn ɨ́ ja'atɨ, a'úu pu a'utéveeca'a. A'ii pu a'ɨ́ɨn pú'een seɨ́j tɨ tí'aijta. Ayee pu tiraata'íhua'uri'i a'ɨ́jna ɨ́ Jesús tɨjɨ́n: ―Maeestru, mɨ pej urarɨ́'en ɨ́ á'a tzajta'a, a'iné tiú'ujxe'eve'e nej niyen huárɨni tɨ ij tináacɨ'ɨti nej ruuri ná'ara'ani tɨ́j na'a rusén jɨme'e. 19Jesús pu ayén tiu'utaniú tɨjɨ́n: ―¿A'iné 'een jɨ́n piyen tí'inexa yee nej urarɨ́'en yú ne tzajta'a? ¿Ni pecaí ramua'aree tɨ seɨ́j na'a a'ɨ́ɨn pú'een tɨ urarɨ́'en ɨ́ ru tzajta'a? A'ii pu a'ɨ́ɨn pú'een ɨ́ Dios. 20’Pepu'uri hui tirú'umua'aree a'ij tɨ Dios tiu'uta'aíjtaca'a yé capej tí'axana'acɨra'ate, capej yee tí'itecui'ica, capej ajta yee tí'inahua'aj, capej ajta yee tí'ihua'itacare'en. Pajta yee rɨ́'ɨ tihuá'ucha'ɨn a'atáàta, pajta a'anáàna. 21Ajta a'ɨ́ɨn tɨ tí'aijta, ayée pu tiraata'ixaa tɨjɨ́n: ―Nain nu jɨ́n tira'ará'astijre tɨ́j na'a nej naúche'e pá'arɨ'ɨsta. 22Tɨ́'ɨj Jesús ráanamuajri'i a'ij tɨ tiu'utaxájtaca'a, aj pu i ayén tiraata'ixaa tɨjɨ́n: ―Seɨ́j pu'u hui muá'aturaate'e. Patá'aj nain tiú'utuaani a'achú pej caj tí'ijcha'ɨɨ. Aj pej pi hua'uré'an ɨ́ tumin a'ɨ́mej ɨ́ mej caí a'ij tí'ijviicua'i. Tɨ́ pua'a piyen huárɨni, aj pej xaa ra'ancuré'asin ɨ́ tɨ ta japua é'eseijre'e a'ɨ́jna tɨ huápɨ'ɨ tí'ijnajche. Aj pej hui pijtá'i mú a'arájra'ani neetzi jamuan. ―Ayee pu tiraata'ixaa. 23Ajta a'ɨ́ɨn tɨ tí'aijta, tɨ́'ɨj ráanamuajri'i a'ij tɨ Jesús tiu'utaxájtaca'a, jé'ecan pu huataújxɨeemɨste, a'iné jeíhua pu tí'ijcha'ɨɨca'a. 24Aj pu i Jesús ra'aráaseij. Tɨ́'ɨj i ayén tiu'utaxájtaca'a tɨjɨ́n: ―Jé'ecan pu huápɨ'ɨ huá'amuarɨ'eriste'e a'ɨ́mej chíjteaani mej mi me'uun a'uteárute u ta japua Dios tɨ é'eseijre'e. 25’Ee xaa ne'u, ayée nu hui tejá'amua'ixaate'e tɨ ayén ti'ayajna, jaítze'e pu muárɨ'eri tɨ chíjteaani a'uun a'uteárute u ta japua Dios tɨ é'eseijre'e caí tɨ cameeyu'u ti'itɨ́j anaarute ɨ́ pɨ́'ɨse'e jetze. ―Ayee pu tiu'utaxájtaca'a a'ɨ́jna ɨ́ Jesús. 26Majta me'ɨ́n ɨ́ mej ráanamuajri'i, ayée mú tiraata'íhua'uri'i tɨjɨ́n: ―¿A'iné ye'í tí'irɨ'ɨri tɨ ja'atɨ a'uun huateáturan Dios tɨ é'eseijre'e? 27Jesús pu ayén tihua'utá'ixaa tɨjɨ́n: ―A'ɨ́mej jemi ɨ́ teteca, capu xaa a'ij tí'irɨ'ɨri. Mɨ́ ajta Dios, a'ɨ́ɨ pu xaa raayɨ́'ɨtɨ. 28Ajta a'ɨ́ɨn ɨ́ Pedro, ayée pu tiraata'ixaa tɨjɨ́n: ―Maeestru, nain tu hui teri teja'uhuá'axɨ ɨ́ tej tí'ijcha'ɨɨca'a tej ti á'ujujhua'ane'en á jamuan. 29- 30Jesús pu ayén tihua'utá'ixaa tɨjɨ́n: ―Ayee nu tejá'amua'ixaate'e tzáahuati'ira'a jɨme'e, ayée pu hui tihuá'acɨ'ɨti ja'atɨ tɨ na'a tɨ ari jaítze'e rɨ́'ɨ tinájcha'ɨɨ ineetzi caí máàj ja'atɨ a'ɨ́jna jɨme'e tɨ nee jamuan á'uche'ecan. Tɨ́ pua'a hui ja'atɨ ayén jaítze'e tí'ijxe'eve'e tɨ nee jamuan á'uche'ecane'en caí ayén tí'ijxe'eve'e tɨ a'uun huateáturan ɨ́ ruchi'itá, nusu tɨ pua'a jaítze'e rɨ́'ɨ tinájcha'ɨɨ ineetzi caí ɨ́ ru'ɨ́j nusu ɨ́ ruja'atzimuá nusu ɨ́ rucu'utzimuá nusu ɨ́ rujúutzimua'a nusu ɨ́ ruvaújsimua'a, jeíhua pu jaítze'e ra'ancuré'asin íjii tɨ yú auumé a'íjna jetze i chaanaca, ajta, a'ɨ́ɨ pu hui ruuri a'ame tɨ́j na'a rusén jɨme'e tɨ́'ɨj méjca'i huáyee tɨ yé e'evé'eme. ―Ayee pu tihua'utá'ixaa a'ɨ́jna ɨ́ Jesús. 31Tɨ́'ɨj i rujɨ́ɨmua'a hua'utajé a'ɨ́mej ɨ́ mej tamuáamuata'a japuan hua'apua ará'ase. Ayee pu tihua'utá'ixaa tɨjɨ́n: ―Tu'uri hui tɨ́mua'a á a'ujnéjsin ántivi Jerusalén. Ajta naíjmi'i pu te'araúrastejsin a'ij mej ye'í tira'uyú'uxaca'a a'ɨ́ɨme ɨ́ mej tí'ixaxa'ata'a ɨ́ Dios jetze me'ecan ineetzi jɨme'e, i nej neajta huá'a jetze airáane ɨ́ teɨte. 32- 33’A'ɨ́ɨ mú tiu'utátuiire'esin ineetzi a'ɨ́mej jemi ɨ́ mej seɨj chuéjra'a japua é'eme'ecan. Majta a'ɨ́ɨme, a'ɨ́ɨ mú na'axɨéehuari'ira muá'aju'un, majta a'ij pua'a tí'inexajtan. A'ɨ́ɨ mú hui majta naatetzí'ijmua'axɨ'ɨsin, majta naatévajxɨ'ɨsin. Matɨ́'ɨj mi nejé'icatan. Tɨ́'ɨj hui ari huaíca xɨcaj jetze teuumé'en, aj nu ni aitamé huá'a tzajta'a ɨ́ mɨ'ɨchite. ―Ayee pu tihua'utá'ixaa. 34Majta me'ɨ́n ɨ́ mej jamuan á'ujujhua'ane'e, camu a'atzu yaú'itɨée muá'araa. A'ɨ́ɨ pu rá'avaataca'a a'ij tɨ huataújmua'a. A'ɨ́j pu jɨ́n caí a'ij tihuá'amitɨejte'eca'a a'ij tɨ huataújmua'a ɨ́ tɨ raataxájtaca'a. 35Aa mú vejli'i a'ucajú'uca a'ájna já'ahua'a u Jericó. Ajta seɨ́j, áa pu a'utácatii juye tɨ a'atánine'i, tɨ vaɨ́ri'ira huauca'a. Arácun a'ɨ́jna ɨ́ ja'atɨ. 36Tɨ́'ɨj a'ɨ́ɨn huá'unamuajri'i ɨ́ mej jeíhua teɨte u á'ucɨ'ɨca'an, tɨ́'ɨj i a'ɨ́ɨ tiu'uta'íhua'u ti'itɨ́j tɨ a'ij rɨjcaa. 37Matɨ́'ɨj mi miyen tiraata'ixaa tɨjɨ́n: ―Yé pu e'icáame a'ɨ́jna ɨ́ Jesús, Nazarét tɨ é'eme'ecan. 38Tɨ́'ɨj i ayén tiraatajé tɨjɨ́n: ―Jesús, mɨ pej i'i huáacɨxa'ara'an a'ɨ́jna ɨ́ David teecan, patá'aj hui ná'ancu'uvajxɨ'ɨn. 39Majta me'ɨ́n ɨ́ mej amuaaté'ee muaajú'ucaa, a'ɨ́ɨ mú ra'ajté'axɨ, majta raatá'ijmɨijri'i tɨ nu'u caí tí'ixajta. Mɨ́ ajta a'ɨ́ɨn caí, capu raatapuá'ajtaca'a. Jaítze'e pu ca'anín jɨ́n tiu'utaxájtaca'a tɨjɨ́n: ―Mɨ́ pej huáacɨxa'ara'an a'ɨ́jna ɨ́ David teecan, patá'aj ná'ancu'uvajxɨ'ɨn ineetzi. 40- 41Ajta a'ɨ́ɨn ɨ́ Jesús, áa pu a'utéechaxɨ. Ajta hua'uta'aíj mej ye'evé'evi'itɨn jemin. Tɨ́'ɨj á vejli'i e'evé'eme'ecaa, Jesús pu ayén tiraata'íhua'uri'i tɨjɨ́n: ―¿A'iné ti'itɨ́j petí'ijxe'eve'e nej niyen muáruuren mú'eetzi? Aj pu i a'ɨ́ɨn ta'arácun, ayén tiu'utaniú tɨjɨ́n: ―Nevástara'a, ayée nu hui tí'ijxe'eve'e nej neajta atáneere. 42Aj pu i Jesús ayén tiraata'ixaa tɨjɨ́n: ―Nee nu muaatá'asin pej pajtáhua'a atáneere. Pepu'uri huarúj a'iné peté'atzaahuate'e mú'ee. 43Jɨ́me'en pu'u ayén tiraata'ixaa, aj pu i a'ɨ́ɨn ta'arácuunica'a, atáneereca'a. Ajta á'uraa jamuan ɨ́ Jesús. Ajta rɨ́'ɨ pu tiraatá'acare'e ɨ́ Dios. Majta a'ɨ́ɨme ɨ́ teɨte, matɨ́'ɨj raaseíj, a'ɨ́ɨ mú majta rɨ́'ɨ tiraatá'a ɨ́ Dios.

will be added

X\