San Lucas 17

1Jesús pu ayén tihua'utá'ixaa a'ɨ́mej ɨ́ mej jamuan á'ujujhua'ane'e tɨjɨ́n: ―Ayee pu té'eme tɨ ti'itɨ́j huataseíjre'en ɨ́ mej jɨ́n auteáturan ɨ́ Dios jemi. Ché'e a'ij tɨ na'a jé'ecan jemin a'ɨ́jna ɨ́ ja'atɨ tɨ ayén ca'aníjra'a hua'utá'an mej mi ti'itɨ́j jɨ́n auté'ɨtzen ɨ́ Dios jemi. 2’Na'ajtzɨ́ a'ɨ́jna ɨ́ ja'atɨ mej amuacaícan ra'acátapi'iran cɨjpáara'an jetze ɨ́ tetej se'uníjra'a tɨ ve'ée mej mi ra'ateájrɨeeni á jaata'a tɨ ij án aujámɨn a'u tɨ autɨ́'ɨj. Jaítze'e pu hui tiraatéva'ɨrihua'an caí ayén tiraatéva'ɨrihua'an tɨ pua'a a'ɨ́ɨn ca'aníjra'a tihua'utá'an a'ɨ́mej ɨ́ mej cɨ́lieen mej mi me'ɨ́n auteáturan ɨ́ Dios jemi. 3’A'ɨ́j pu jɨ́n, rɨ́'ɨ xu'u mú'een. Tɨ́ pua'a a'ɨ́ɨn a'ihuáara'a auteáturan mú'eetzi jemi, patá'aj ra'ajteá'axɨ'ɨn. Tɨ́ pua'a seɨcɨé tiú'umua'ati mú'eetzi jemi, aj pej xaa tiraatá'uuni'ira. 4’Tɨ́ pua'a seɨ́j xɨcaj, ja'atɨ auteáturan mú'eetzi jemi arahua'apuáca jetze, ajta tɨ pua'a a'ɨ́ɨn á a'uré'enen mú'eetzi jemi ayén pua'amé arahua'apuáca jetze tɨ́'ij ajtahua'a ayén timuaatáhuavii yee tinaatá'uuni'iri'i ɨ́ nej jɨ́n auteájturaa mú'eetzi jemi, ayée pej hui huárɨni pej tiraatá'uuni'i. ―Ayee pu tihua'utá'ixaa a'ɨ́jna ɨ́ Jesús. 5Majta a'ɨ́ɨme ɨ́ mej tamuáamuata'a japuan hua'apua ará'ase, ayée mú tiraata'ixaa me'ɨ́jna ɨ́ tavástara'a tɨjɨ́n: ―Taatévaɨre'e tetá'aj té'antzaahuate'en jaítze'e. 6Aj pu i Jesús ayén tihua'utá'ixaa tɨjɨ́n: ―A'ɨ́ɨ pu tiú'ujxe'eve'e sej cɨ́j caj té'antzaahuate'en. Tɨ́ pua'a siyen cɨ́j caj sena'a té'antzaahuate'en, ayée pu tiu'utárɨ'ɨriistari sej siyen tiraata'aíjte'en se'ɨ́jna ɨ́ huaréj tɨ a'itiújcuta, tɨ á já'ita'a jaata'a e'eteújhuiite'en ruseɨ́j. Ajta a'ɨ́ɨn huaréj, ayée pu rɨni a'ij sej tiraata'aíjte'esin. 7- 8’Tiché'e tiyen tiraataxáj. Tɨ́ pua'a ja'atɨ tí'imuarɨ'e mú'ejmi jemi a'ɨ́jna jɨme'e tɨ taséehua na'ari cáne'axɨ cha'ɨɨ, ¿a'iné ye'í setiraatájeevi tɨ́'ɨj a'ɨ́ɨn uvé'enen a'u tɨ tejé'emuarɨ'e? ¿Ni qui hui siyen tiraatájeevi yee: “Mu a'utá'iyi'i, a'ujyeíjxɨ'ɨ patá'aj tiú'ucua'ani?” Caxu xaa ne'u siyen tiraatájeevi, sino ayée xu'u tiraatájeevi tɨjɨ́n: “Patá'aj yee rɨ́'ɨ tiú'uruuren ɨ́ tej tiú'ucua'ani. Pajta, patá'aj rɨ́'ɨ huá'aruuren pej pi titaamín, aj pu yee xaa huatárɨ'ɨristari pej tiú'ucua'ani, pajta pej huayé'en.” 9’Ajta a'ɨ́ɨn, tɨ́'ɨjtá ari ayén tiú'uruurén a'ij sej tiraata'aíj, ¿ni secaí cha'a a'ij tiraatá'ixaate'esin yee cha'a Dios timuaatanájchite'en? Caxu xaa ne'u a'atzu, a'iné ayée pu tiú'uruu a'ij sej tiraata'aíj. 10’Ayee xu che'atá sena'a huárɨni. Setɨ́'ɨj seri raacɨ́'ɨ nain jɨme'e ɨ́ tɨ jɨ́n Dios tejámua'íjca, ayée xu'u tiu'utaxájta yee catu hui ti'itɨ́j vaɨre'e iteen. Ayee tu'u huarɨ́j a'ii tɨ tiú'ujxe'eve'eca'a itejmi jemi. ―Ayee pu tihua'utá'ixaa a'ɨ́jna ɨ́ Jesús. 11Aúche'e pu huamé'ecaa ɨ́ juye jetze Jerusalén tɨ a'uré'enine'i. A'uu pu a'ume'eca a'u tɨ e'eve'e'ástɨme a'uun tɨ huatacá'a u ɨ́ Samaria, ajta u Galilea. 12Tɨ́'ɨj a'uun a'uterutíjme'ecaa, a'úu mú ra'antinájcheca'a ɨ́ teteca ɨ́ mej tamuáamuata'a ará'ase. A'ɨ́ɨme metí'icucui'i me'ɨ́jna jɨme'e ɨ́ tɨ tineájxɨ huá'ahua'ira'a jetze, ɨ́ mej miyen ratamuá'amua tɨjɨ́n: lepra. A'atzu mú ɨmuá a'utéhuiixɨ. 13Matɨ́'ɨj mi ca'anín jɨ́n raatajé tɨjɨ́n: ―Jesús, mɨ pej maestro pú'een. Patá'aj tá'ancu'uvajxɨ'ɨn. 14Tɨ́'ɨj Jesús hua'useíj, ayée pu tihua'utá'ixaa tɨjɨ́n: ―Setá'aj u á'uju'un huá'a jemi ɨ́ mej tí'ivaɨre'e u teyujta'a sej si huataújseijrata mej me'ɨ́n ráamua'aree tɨjɨ́n xu'uri huarúj. Matɨ́'ɨj mi u á'uju'un. Mu'uri á aujú'ucaa, aj mú mi huarúj. 15Tɨ́'ɨj i seɨ́j huaré'araa tɨ́'ɨj ráamua'areeri'i tɨjɨ́n pu'uri huarúj. Aj pu i a'atzu ca'anín jɨ́n tiu'utaxájtaca'a ɨ́ Dios jemi tɨjɨ́n: ―Rɨ́'ɨ nu timuaatá'asin nevástara'a. 16Aj pu i e'erájve á chuaata'a á vejli'i jemin ɨ́ Jesús. Aj pu i ayén tiraata'ixaa tɨjɨ́n: ―Ché'e Dios timuaatanájchite'en. A'ɨ́jna ɨ́ ja'atɨ, ɨ́ Samaria pu é'eme'ecan. 17Jesús pu ayén tihua'utá'ixaa tɨjɨ́n: ―¿Ni mecaí ará'ase a'achú cumu tamuáamuata'a a'ɨ́ɨme ɨ́ mej huarúj? ¿A'uné a'ij mé'een ɨ́ seica ɨ́ mej aramuáacua? 18¿Ni amɨ́ na'a ruseɨ́j huaré'araa tɨ ij rɨ́'ɨ tiraatá'an ɨ́ Dios jemi, amɨ́jna tɨ seɨj chuéjra'a japua é'eme'ecan? 19Aj pu i ayén tiraata'ixaa a'ɨ́jna tɨ tí'icui'ica'a tɨjɨ́n: ―Ájchesi. Pepu'uri huarúj, a'iné peté'antzaahua. ―Ayee pu tiraata'ixaa a'ɨ́jna ɨ́ Jesús. 20Ja'anáj pu ayén tiuju'urɨ́j. A'ɨ́ɨ mú fariseos miyen tiraata'íhua'uri'i me'ɨ́jna ɨ́ Jesús tɨjɨ́n: ―¿A'anajni rɨ́'ɨ teja'uré'enejsin tɨ Dios tiu'uta'aíjta íiyen chaanaca japua? Aj pu i Jesús ayén tiu'utaniú tɨjɨ́n: ―Ja'anáj tɨ teja'uré'enejsin tɨ Dios tiu'uta'aíjta íiyen chaanaca japua, capu ayén huataseíjre'esin a'ɨ́jna jɨme'e ɨ́ sej jɨ́n ráamua'aree, ajta ɨ́ sej jɨ́n raaseíj yee pu'uri yen huataseíjre. 21’Camu hui miyen tiraataxájta ɨ́ teɨte yee: “Ye'ecui seijre'e”, na'ari yee “A'acuí seijre'e.” Camu a'atzu, a'iné pu'uri yé seijre'e a'ɨ́jna jɨme'e nej nee yé huatéjvee mú'ejmi tzajta'a. ―Ayee pu tihua'utá'ixaa. 22Aj pu i ayén tihua'utá'ixaa a'ɨ́mej ɨ́ mej jamuan á'ujujhua'ane'e tɨjɨ́n: ―Pu'uri a'ájna teja'uré'enejsin ɨ́ xɨcájra'a sej jetzen siyen raxɨ́'eve'e xá'aju'un huápɨ'ɨ sej raaseíj netɨ́'ɨj amuacaí te'enteárute ne'ɨ́jna jɨme'e nej nain jɨ́n antínmua'areere. Aru, caxu hui raseijran. 23’Teteca mú miyen tejámuaatá'ixaate'esin tɨ jɨ́me'en yee pu'uri a'ájna teja'uré'ene tɨ Dios tiu'uta'aíjta íiyen chaanaca japua a'iné yé pu nu'u huatéjvee na'ari yee mé pu nu'u huatéjvee na'ari yee áa pu nu'u é'eseijre'e. Caxu hui u á'ucɨ'ɨca'an huá'a jamuan. 24A'iné, ayée nu hui seíire'e na'ame ne'ájna xɨcájra'an nej jetzen amuacaícan te'enteárute ne'ɨ́jna jɨme'e nej nain jɨ́n antínmua'areere na'ame. Ayee nu che'atá nena'a seíire'e na'ame matɨ́j ɨ́ mej témaxcava'ara'a u júte'e. Tɨ́'ɨj huatátaaxɨ'ɨn, ca'anacan pu huanéeri'icɨrej ye'icáa a'ame. 25’Aru mi'i pu hui ayén tiú'ujxe'eve'e nej jeíhua rajpuaíitzi ná'ara'ani inee. Ayee pu ajta tiú'ujxe'eve'e mej netíte a'ɨ́ɨme iiji mej huáteemua. 26’Ayajna tɨ́j tiu'urɨ́j ajca'ihuá'ɨmua tɨ́'ɨj auj ruurica'a a'ɨ́jna ɨ́ Noé teecan, ayée pu che'atá na'a té'eme a'ájna xɨcájra'an jetze nej jetzen yé uvé'enejsin inee, i nej neajta huá'a jetze airáane ɨ́ teɨte. 27’Metí'icua'acare'e ɨ́ teɨte, majta yé'ecare'e. Seica mú néjne'ɨjche'ecare'e, majta seica víjviɨ'ɨche'ecare'e. Camu a'ij mena'a. Ayee mú rɨjcaa ajta na'a caí Noé a'uun pu a'uteájrupi ɨ́ baarcu jetze. Ajta pu i jeíhua tíjɨsteca'a ɨ́ jaj. A'ɨ́ɨ pu hui naíjmi'ica antipuá'ari. 28’Ayee pu che'atá tiráaruu ajca'ihuá'ɨmua tɨ́'ɨj auj ruurica'a a'ɨ́jna ɨ́ Lot teecan. A'ɨ́ɨ mú tí'icua'acare'e ɨ́ teɨte. Majta yé'ecare'e. Majta tí'inanaavecare'e. Majta tí'ituaacare'e. Majta tí'ihuiitehua'a mú mi, majta chi'ij tá'ahuacare'e. 29’Aru a'ájna xɨcájra'an jetze tɨ́'ɨj Lot huirájraa a'ujna u Sodoma, taij pu hui u je'icáaxɨre, tɨ azufre jɨ́n á'ataaca'a. Naíjmi'ica pu antipuá'ajte. 30Ayee pu che'atá na'a tihuá'aruuren a'ájna xɨcájra'an jetze nej huataseíjre'esin inee, i nej neajta huá'a jetze airáane ɨ́ teɨte. 31’Ayee xu hui huárɨni a'ájna xɨcájra'an jetze. Tɨ́ pua'a ja'atɨ án á'ujveeca ɨ́ ruchi'i japua tɨ avé'ejaxu'umua'i, tɨ pua'a a'uun te'urá'aca ɨ́ ti'á'ara'an u chi'ita, cha'a caí a'uun uteáru'ipiche'en tɨ ij te'irá'ɨn. Ajta a'ɨ́ɨn tɨ tejé'emuarɨ'e ɨ́ ruví'ira'ata'a, cha'a ajta a'ɨ́ɨn caí u á'uye'ican u ruche tɨ ij ti'itɨ́j a'uvé'a'an. 32’Setá'aj hui ra'utámua'aree a'ij tɨ tiráaruu ɨ́ ɨ́ra'ara'an ɨ́ Lot teecan. 33Ja'atɨ tɨ na'a, tɨ pua'a a'ɨ́ɨn ayén huárɨni a'ij tɨ tirájteu ruseɨ́j tɨ́j na'a nain xɨcaj tzajta'a, a'ɨ́ɨ pu xaa a'uvaɨ́jtzi. Ajta a'ɨ́ɨn tɨ taúra'aca tɨ huámɨ'ɨni ineetzi jetze me'ecan, a'ɨ́ɨ pu xaa huateáturaasin tɨ́j na'a rusén jɨme'e. 34’Ayee nu tejá'amua'ixaate'e, a'ájna tɨ́ca'ari tzajta'a, mé hua'apua mú huatéje'itɨ́ muá'aju'un ɨ́ utaatzi japua. Dios pu hui seɨ́j á'avi'itɨn. Ajta ɨ́ seɨj, áa pu a'uteáturaasin. 35’Majta hua'apua 'uuca, mé naími'i mú te'á'atɨ'ɨxɨ́n mú muá'aju'un. Dios pu seɨ́j á'avi'itɨn. Ajta ɨ́ seɨj, áa pu a'uteáturaasin. 36’Majta hua'apua teteca, mé naími'i mú tejé'emuarɨ'e muá'aju'un u ví'ira'ata'a. Dios pu hui ajta seɨ́j á'avi'itɨn. Ajta ɨ́ seɨj, áa pu a'uteáturaasin. ―Ayee pu tihua'utá'ixaa a'ɨ́jna ɨ́ Jesús. 37Majta me'ɨ́n ɨ́ mej Jesús jamuan á'ujujhua'ane'e, ayée mú tiraata'íhua'uri'i tɨjɨ́n: ―Tavastara'a, ¿a'uné jetze rá'avi'itɨn ɨ́ Dios? Ayee pu tiu'utaniú tɨjɨ́n: ―A'uu mej e'etiújseɨre'esin ɨ́ muá'ara'ica a'u tɨ ti'itɨ́j auucá'a tɨ mɨ́'ɨchi.

will be added

X\