San Lucas 16

1Jesús pu ajta ayén tihua'utá'ixaa a'ɨ́mej ɨ́ mej jamuan á'ujujhua'ane'e tɨjɨ́n: ―Aa pu nu'u hui já'ahua'a chíjteaani é'echejca'a. Seɨ́j pu ravaɨre'eca'a a'ɨ́jna jɨme'e tɨ antiújmua'areereca'a nain a'achú tɨ tí'ijcha'ɨɨca'a ɨ́ chíjteaani. Matɨ́'ɨj nu'u mi seica jetzen te'ujpuá'ajte a'ɨ́jna tɨ antiújmua'aree a'ɨ́jna jɨme'e tɨ ca'anacan raaxɨ́jte'e cha'a na'a tɨ tí'iseijre'eca'a. 2’Tɨ́'ɨj i chíjteaani raatajé. Ayee pu nu'u tiraata'íhua'uri'i tɨjɨ́n: “¿A'iné na'a qui nej neri tiú'unamuajri'i a'ij pej rɨcɨ mú'ee? Patá'aj yeehui ra'uyú'uxan nain a'achú pej jɨ́n antí'amua'aréere nej ni ráamua'aree a'achú tɨ caj te'ará'ase, ɨ́ pej caí yeehui ché'e piyen antí'amua'aréere pua'amé.” 3’Ajta a'ɨ́ɨn tɨ ravaɨre'eca'a, ayée pu tiu'umuá'aj tɨjɨ́n: “¿A'iquí nerɨni? A'ɨ́jna tɨ tí'ine'aijte'e, a'ɨ́ɨ pu nu'u tiná'ari'ira ɨ́ nej jɨ́n antínmua'aree. Mɨ́ neajta inee, canu neca'ane nej te'até'ijche'en. Ajta netí'itevi'ira'a nej yeehui vaɨ́ri'ira huatáhuauni. 4Nu'uri yeehui ramua'aree a'ij nej rɨni, mej mi teɨte na'ancuré'evi'itɨn temua'a naa a'ujna huá'ache netɨ́'ɨj caí cha'a tí'imuarɨ'e neyajna.” 5’Tɨ́'ɨj nu'u i hua'utajé seɨj ajta seɨj ɨ́ mej tirá'acha'ɨɨre'eca'a a'ɨ́jna ɨ́ chíjteaani. Ayee pu nu'u tiraata'íhua'uri'i ɨ́ seɨj tɨ amuacaí ve'eré'ene tɨjɨ́n: “¿A'achúni yeehui petirá'acha'ɨɨre'e ɨ́ tɨ tí'ine'aijte'e?” 6’Aj pu i ayén tiu'utaniú a'ɨ́jna ɨ́ ja'atɨ tɨjɨ́n: “Anxɨ́te pua'améca ɨ́ taampu a'ɨ́jna ɨ́ aceite tɨ aceituuna jetze me'ecan.” ’Ajta a'ɨ́ɨn tɨ antiújmua'aree, ayée pu nu'u hui tiraata'ixaa tɨjɨ́n: “Ye'ecui i cuapée tɨ jetzen té'eyu'usi'i a'achú pej caj tirá'acha'ɨɨre'e. A'ujyeíjxɨ mú'ee, ca'anacan. Patá'aj seɨ́j auyú'uxa tɨ jetzen á'ayu'usi'i a'achú cumu anxɨ́j tamuáamuata'a taampu tɨ ará'ase.” 7’Tɨ́'ɨj nu'u i ajta seɨ́j ayén tiu'uta'íhua'uri'i tɨjɨ́n: “Carij mú'ee, ¿a'achúni yeehui petirá'acha'ɨɨre'e?” ’Ajta a'ɨ́ɨn, ayée pu hui tiraata'ixaa tɨjɨ́n: “Anxɨ́te pua'améca medida ɨ́ triigu.” ’Ayee pu tiraata'ixaa tɨjɨ́n: “Ye'ecui, i cuapée. Patá'aj seɨ́j auyú'uxa tɨ jetzen á'ayu'usi'i tɨjɨ́n: muáacuate pej nu'u rá'acha'ɨre'e.” 8’Ajta nu'u a'ɨ́ɨn tɨ tí'ira'aijte'e, a'ɨ́ɨ pu hui rɨ́'ɨ tiraatá'a a'iné rɨ́'ɨ pu tiu'umuá'aj a'ɨ́jna jɨme'e a'ij tɨ ye'í huárɨni. Majta a'ɨ́ɨme ɨ́ mej a'uchéjme seɨ́j chuéjra'a japua íiyen chaanaca japua, jaítze'e mú raayɨ́'ɨtɨ a'ij mej ye'í huárɨni ɨ́ seica ɨ́ ruxɨ́'ej teɨte mecaí a'ɨ́ɨme ɨ́ mej me'ɨ́jna jetze ajtéme'ecan ɨ́ tɨ hua'atátzavi'ijte'e ɨ́ tavástara'a. 9’Ayee nu tejá'amua'ixaate'e. Caxu ché'e sena'a raaxɨ́jte'e ɨ́ tumin íiyen tɨ me'ecan chaanaca japua. Ché'e ayén tejámuaatévaɨre'en méjca'i huáyee sej si ru'amiigustemua'a jɨ́n antimuá'itɨn mej mi me'ɨ́n amua'ancuré'evi'itɨn temua'a naa a'ájna xɨcájra'an jetze tɨ́'ɨj caí cha'a mé'e á'a túmintan. A'uu mú hui amua'ancuré'evi'itɨn a'u tɨ caí ja'anáj é'evatzɨjsin ɨ́ huá'achi'i. 10’A'ɨ́jna tɨ xɨ́'epɨ'ɨn rɨcɨ a'ɨ́jna jɨme'e tɨ cɨliéene'e jɨ́n ti'itéjvee, a'ɨ́ɨ pu ajta xɨ́'epɨ'ɨn rɨni tɨ pua'a ti'itevée á'ara'ani ve'ecán jɨme'e. Ajta a'ɨ́ɨn tɨ hui caí xɨ́'epɨ'ɨn rɨcɨ a'ɨ́jna jɨme'e tɨ cɨliéene'e jɨ́n ti'itéjvee, a'ɨ́ɨn capu ajta xɨ́'epɨ'ɨn rɨni tɨ pua'a ti'itevée á'ara'ani ve'ecán jɨme'e. 11’A'ɨ́j pu jɨ́n, tɨ pua'a secaí té'aste ɨ́ sej jɨ́n antiújmua'aree sej rajmuárɨ'e ɨ́ tumin tɨ yen seijre'e íiyen chaanaca japua, ¿ni qui siyen tí'imua'atze tɨ ja'atɨ ayén tejamua'íjcate'esin sej raamuárɨ'en tɨ huápɨ'ɨ tí'ijnajche tɨ́j na'a rusén jɨme'e? Capu xaa ne'u ayén té'eme. 12’Tɨ́ pua'a secaí té'aste sej rajmuárɨ'en se'ɨ́jna jɨme'e tɨ Dios amuaatapuaíjve, capu ja'anáj amuaatá'asin tɨ mú'ejmi áa'amua'áa pu'éene'e á'ara'ani. 13’Capu hui rɨ'ɨrí tɨ ja'atɨ hua'apuaca huávaɨre'en a'ɨ́mej jemi ɨ́ mej tí'aijta. Tɨ́ pua'a ayén huárɨni, ayée pu té'eme. Jéihua pu rájcha'ɨɨre'e a'ame ɨ́ seɨ́j, ajta jeíhua pu rɨ́'ɨ tirájcha'ɨ́ɨ a'ame ɨ́ seɨ́j. Na'ari, a'ɨ́ɨ pu rɨ́'ɨ tirá'atzaahuate'e a'ame ɨ́ seɨ́j. Ajta ɨ́ seɨj, a'ɨ́ɨ pu rá'axɨeehuari'ira a'ame. Capu a'atzu rɨ'ɨrí sej huataúra'an tɨ Dios tejámuaata'aíjte'en, tɨ pua'a hui se'ɨ́jna jɨ́n huataúra'an sej tumin tíseɨre'en. ―Ayee pu tihua'utá'ixaa a'ɨ́jna ɨ́ Jesús. 14Majta a'ɨ́ɨme ɨ́ fariseos, jeíhua mú ranecua'atzeca'a ɨ́ tumin. Matɨ́'ɨj miyen tiráanamuajri'i, jeíhua mú ra'utéxɨeehuari'iri'i me'ɨ́jna ɨ́ Jesús. 15Ayee pu tihua'utá'ixaa tɨjɨ́n: ―Mú'een xu a'ɨ́ɨn pɨ́rɨcɨ ɨ́ sej siyen tiú'ujseijrata sej si rɨ́'ɨ títetéturaave ɨ́ teɨte jemi. Mɨ́ ajta Dios, a'ɨ́ɨ pu tirú'umua'aree a'ij sej 'een mú ru tzajta'a. A'ɨ́jna tɨ nu'u ayén naa seijre'e ɨ́ teɨte jemi, a'ɨ́ɨ pu hui a'ij pua'a seijre'e ɨ́ Dios jemi. 16’Tɨ́j na'a hui a'ajná'ɨmua ajta caí huataseíjre ɨ́ Juan, a'ɨ́ɨ pu'u tihuá'a'ixaate'eca'a a'ij tɨ tira'uyú'uxaca'a a'ɨ́jna ɨ́ Moisés teecan, ajta a'ij mej tira'uyú'uxaca'a a'ɨ́ɨme ɨ́ mej tí'ixaxa'ata'a ɨ́ Dios jetze me'ecan. Tɨ́j na'a tiu'utaseíjre ɨ́ Juan, a'ɨ́j mú tihuá'a'ixaate'e ɨ́ niuucari jɨme'e ɨ́ mej jɨ́n huaújtemua'ave'en a'ij tɨ 'een ɨ́ Dios jemi a'u tɨ tejé'aijta. Majta naími'i tí'itese'e mej me'uun a'uteárute ca'anéeri jɨme'e. 17’Ajta a'ɨ́ɨn yu'uxari, Moisés teecan tɨ ra'uyú'uxaca'a, aúche'e pu hui nain jɨ́n te'ará'astejsin. Jaítze'e pu á'ateere mej ra'ará'asten caí nain tɨ́j na'a tɨ tí'iseijre'e íiyen chaanaca japua, ajta ɨ́ ta japua tɨ tejé'eseijre'e. 18Ajtahua'a seɨ́j niuucari hua'utá'ixa tɨjɨ́n: ―Ja'atɨ tɨ mé rúurɨeni ɨ́ ru'ɨ́j, tɨ pua'a á'iyen seɨ́j ancuré'evi'itɨn, a'ɨ́ɨ pu raxána'acɨra'aten a'ɨ́jna jemi ɨ́ 'ɨ́ita'a. Ajta, tɨ pua'a ja'atɨ ra'ancuré'evi'itɨn seɨ́j ɨ́ 'ɨ́ita'a tɨ amuacaí mé rúurɨe ɨ́ rucɨ́n, a'ɨ́jna ɨ́ ja'atɨ, a'ɨ́ɨ pu hui ajta raxána'acɨra'aten. 19Ajtahua'a pu ayén tihua'utá'ixaa tɨjɨ́n: ―Aa pu nu'u já'ahua'a chíjteaani e'echéjme'e, tɨ naa éene'en ti'iteújche'etehua'a, cɨ́ɨxuri jɨme'e tɨ tí'inacamua, ajta tɨ ti'irɨ́'een. Tɨ́'ɨj pɨ́ na'a pu tí'iyestehua'a. Jéihua pu hui tí'ina'achita'a a'ɨ́jna jɨme'e tɨ ruxɨéehua é'echejca'a. 20’Ajta nu'u a'ɨ́ɨn tɨ caí a'ij tí'ijviicua'i, áa pu a'itéjca tá'apueerta a'u tɨ é'eche ɨ́ chíjteaani. Ayee pu nu'u ántehuaaca'a a'ɨ́jna ɨ́ ja'atɨ tɨ caí a'ij tí'ijviicua'i tɨjɨ́n Lázaro. A'ɨ́ɨ pu tí'icui'i. Nainjapua nu'u hui cá'atza ɨ́ ru jetze. 21’Jé'ecan pu raxɨ́'eve'eca'a tɨ ráacua'ani ɨ́ cua'ira tɨ tí'ite'ení tɨ te'ecájvitze meesa japua a'u tɨ tejé'ecua'a ɨ́ chíjteaani. Majta a'ɨ́ɨme ɨ́ tzɨ'ɨcɨ, a'ɨ́ɨ mú a'uré'enineica'a, majta raacánaɨjxɨ ɨ́ tɨ hui cá'atza japua. 22’Tɨ́'ɨqui a'ájna xɨcájra'an tɨ jetzen huamɨ́'ɨ a'ɨ́jna ɨ́ Lázaro, matɨ́'ɨj nu'u mi a'ɨ́ɨme ɨ́ mej tí'ivaɨre'e ɨ́ ta japua, a'ɨ́ɨ mú ya'uví'itɨ ɨ́ Abraham jemi a'u tɨ Dios é'eseijre'e. Ajta a'ɨ́ɨn ɨ́ chíjteaani, tɨ́'ɨj nu'u i a'ɨ́ɨn huamɨ́'ɨ. Majta hui ra'avá'ana. 23’A'uu pu a'uteájturaa a'u tɨ á'ataa ɨ́ taij. Jéihua pu rajpuaíjtzica'a a'ɨ́jna ɨ́ chíjteaani teecan. Tɨ́'ɨj i ájneereca'a. Aj pu i raaseíj a'ɨ́jna ɨ́ Abraham, ajta a'ɨ́jna ɨ́ Lázaro tɨ a'utéveeca'a ɨ́ Abraham jamuan. 24’Aj pu i raatajé tɨjɨ́n: “Abraham, mɨ pej ní'iya'upua, ná'ancu'uvajxɨ'ɨ. Patá'aj mú ye'uta'íte pemɨ́jna mɨ Lázaro tɨ ij amɨ́n ra'antíru'unen ɨ́ ruxɨté tɨ ij naatécɨmuajte'en ɨ́ neneanú jetze, a'iné jeíhua nu rajpuaíjtzi íiye taij tzajta'a.” 25’Ajta a'ɨ́ɨn Abraham, ayée pu nu'u hui tiu'utaniú tɨjɨ́n: “Niyauj, ni pecaí ramua'aree a'ij tɨ timuáavaɨj patɨ́'ɨj pauj ruurica ɨ́ chaanaca japua. Jéihua pu yeehui rɨ́'ɨ timuáavaɨj. Ajta amɨ́jna mɨ Lázaro, jeíhua pu a'ij pua'a tirajpuaíjtzica'a. Mɨ́ ajta íjii, a'ɨ́ɨ mú yeehui rá'ancu'uvajxɨ'ɨsin meyajna. Pajta mú'ee, íjii parajpuaíitzi pej pua'amé. 26Ajta íjii, ayée pu yeehui 'een, pu'uri ayén huaújruu tɨ ayén te'atácuuni'in. A'ɨ́j pu jɨ́n caí rɨ'ɨrí mej antácɨɨne amun pújme'en mú'ejmi jemi a'ɨ́ɨme ɨ́ mej miyen raxɨ́'eve'e. Ajta caí rɨ'ɨrí mej a'u tɨ pújme'en a'itácɨɨne téjmi jemi a'ɨ́ɨme ɨ́ mej majta miyen raxɨ́'eve'e.” Ayee pu nu'u tiraata'ixaa a'ɨ́jna ɨ́ Abraham. 27- 28’Tɨ́'ɨj i ayén tiu'utaniú tɨjɨ́n: “Tɨ́ pua'a ayén tí'eene'en, niyá'upua, ayée nu yeehui muahuavii, pej amɨ́jna Lázaro huata'íte tɨ a'uun a'atanén nitáàta tɨ é'eche, a'iné anxɨ́vica nu ti'ihuaamua'a. Ché'e yeehui amɨ́n rɨ́'ɨ tihuaja'utá'ixaate'en mej mi caí miyun pújme'en a'uvé'ecɨ'ɨca'an mej mi caí rajpuaíjtzi muá'ara'ani meyajna.” 29’Abraham pu nu'u ayén tiraata'ixaa tɨjɨ́n: “A'ɨ́ɨ pu a'uteájturaa a'ɨ́ɨme jemi a'ɨ́jna Moisés teecan tɨ ra'uyú'uxaca'a, ajta ɨ́ mej ra'uyú'uxaca'a a'ɨ́ɨme ɨ́ mej Dios jetze me'ecan tí'ixaxa'ata'a. Miché'e yeehui a'ɨ́jna huanamua.” 30’Ajta a'ɨ́ɨn chíjteaani teecan, ayée pu tiraata'ixaa tɨjɨ́n: “Niyá'upua, mɨ pej Abraham pú'een. Capu ti'itɨ́j vaɨre'e. Aru tɨ pua'a yeehui ja'atɨ tɨ ari huamɨ́'ɨ aj pu huataseíjre'esin a'ɨ́mej jemi, aj mú mi seɨcɨé tí'imua'ati ɨ́ Dios jemi.” 31’Aj pu nu'u i ayén tiraata'ixaa tɨjɨ́n: “Tɨ́ pua'a mecaí ráanamua a'ij tɨ tiu'utaxájtaca'a a'ɨ́jna ɨ́ Moisés teecan, ajta a'ɨ́mej ɨ́ mej Dios jetze me'ecan tí'ixaxa'ata'a, camu yeehui majta rá'antzaahuate'esin tɨ pua'a huataseíjre'en huá'a jemi ɨ́ ja'atɨ tɨ a'itáraa ɨ́ mɨ'ɨchite tzajta'a.” ―Ayee pu tiraata'ixaa a'ɨ́jna ɨ́ Jesús.

will be added

X\