San Lucas 14

1Ayee pu ja'anáj tiuju'urɨ́j tɨ a'ájna pɨ́tí'irɨjcaa a'ɨ́jna xɨcájra'an mej jetzen ruse'upi. A'uu pu a'ará'a a'u tɨ é'eche ɨ́ seɨ́j ɨ́ fariseo tɨ ve'ecán jɨ́n ti'itéjvee, tɨ ij tiú'ucua'ani jemin. Majta a'ɨ́ɨme ɨ́ teɨte, jeíhua mú rá'eeve'eca'a me'ɨ́jna ɨ́ Jesús. 2Ajta seɨ́j á vejli'i úuveeca'a jemin ɨ́ Jesús. Ti'icui'i a'ɨ́jna ɨ́ ja'atɨ. Nainjapua pu cajaa ɨ́ ru jetze. 3Ajta a'ɨ́ɨn ɨ́ Jesús, ayée pu tihua'uta'íhua'uri'i a'ɨ́mej ɨ́ fariseos, ajta a'ɨ́mej ɨ́ mej tí'imua'ata ɨ́ yu'uxari jetze Moisés tɨ ra'utéyu'uxaca'a. Ayen tɨjɨ́n: ―¿Ni caí a'ij tí'irɨ'ɨri nej tiráahuaate'en a'íjna xɨcájra'an tej jetzen tase'upi nusu caí? 4Majta a'ɨ́ɨme, camu ti'itɨ́j a'ij tiu'utaxájtaca'a. Ajta a'ɨ́ɨn Jesús, a'ɨ́ɨ pu ra'ajtamuárɨej a'ɨ́jna tɨ tí'icui'i. Ajta tiráahuaa. Aj pu i raata'íteca'a tɨ á'ura'ani ruxɨéehua. 5Tɨ́'ɨj i Jesús ayén tihua'uta'íhua'uri'i tɨjɨ́n: ―¿Ni caí rɨ'ɨrí tɨ ja'atɨ ayén huárɨni a'ájna xɨcájra'an jetze mej jetzen ruse'upi? Tɨ́ pua'a puuru'u atéjveti a'u tɨ e'etécun, na'ari puuya atéjveti, ¿ni pecaí hui piyen ca'anacan rɨni pej ra'itátuaani a'u tɨ e'etéjve? 6Majta a'ɨ́mej jemi, capu ú'u anú'u'a'ahua'aca'a huá'a tzajta'a a'ij tɨ tiu'utaxáj. 7Tɨ́'ɨj i Jesús raaseíj a'ij mej rɨjcaa a'ɨ́ɨme ɨ́ tɨ huá'a'inee mej tiú'ucua'ani. A'ɨ́ɨ mú rahuauca'a vejli'i mej a'ujrá'ase jemin ɨ́ tɨ tihuá'amicua. Aj pu i ayén tihua'utá'ixaa tɨjɨ́n: 8- 9―Tɨ́ pua'a hui ja'atɨ muá'ineen pej tiú'ucua'ani huá'a jamuan ɨ́ mej tí'iyeste a'ɨ́jna jɨme'e tɨ seɨ́j huaténe'ɨcheca'a, capej pe'ánna a'ujyé'ixa'an a'ájna vejli'i jemin ɨ́ tɨ muaatá'inee pej tiú'ucua'ani, sino a'atzu pe a'ɨmuá a'utayeíjxɨ'ɨn. Na'ari caí, tɨ pua'a seɨ́j uvé'enen tɨ jaítze'e ruxe'eve'e pecaí mú'ee tɨ ajta raatá'inee, aj pu i a'ɨ́ɨn muaatá'ixaate'esin yee ájchesi, tá'aj amanna a'ujyeíjxɨ'ɨn a'íjna i ja'atɨ. Aj pej pi tiu'utatévi'ira'ata, a'ánna pej a'ujyeíjxɨ'ɨn pe'ɨ́jna japua ɨ́ tɨ jaítze'e caí ruxe'eve'e. 10’Mɨ pajta mú'ee, ayée pepu'u hui huárɨni tɨ pua'a ja'atɨ muaatá'ineen, án pej a'ujyeíjxɨ'ɨn japuan ɨ́ tɨ jaítze'e caí ruxe'eve'e tɨ i ayén a'ɨ́ɨn tɨ muaatá'inee timuaatá'ixaate'en tɨ́'ɨj uvé'enen a'u pej a'ujyeíjxɨ'ɨn. Ayee pu timuaatá'ixaate'esin tɨjɨ́n: “Ne'amiigu, patá'aj ájcheni peyajna patá'aj a'ujyeíjxɨ'ɨn yé vejli'i a'u tɨ jaítze'e á'ujxe'eve'e.” Ayee pej pe'ɨ́jna jɨ́n huarɨ́n, ayée pej hui rɨ́'ɨ tira'ancuré'asin huá'a jemi ɨ́ teɨte mej á jamuan a'ujteí. 11’Ja'iné ja'atɨ tɨ na'a tɨ á'ujtzaahuate'e, aj pu i a'ij pua'a raatá'ixaa tɨ caí jeíhua ruxe'eve'e. Ajta a'ɨ́ɨn tɨ caí á'ujca'ane tɨ ti'itɨ́j jɨ́n te'enteárute tɨ ve'ée, aj pu i tiraatá'asin tɨ ayén te'enteárute ti'itɨ́j jɨme'e tɨ jaítze'e ve'ée. ―Ayee pu tihua'utá'ixaa a'ɨ́jna ɨ́ Jesús. 12Aj pu i ayén tiraata'ixaa a'ɨ́jna tɨ raatá'inee tɨ tiú'ucua'ani tɨjɨ́n: ―Ayee pej hui huárɨni patɨ́'ɨj hua'utá'inen mej tiú'ucua'ani a'atzaj chumua'an nusu tɨ́ca'a. Capej huá'inen a'ɨ́mej ɨ́ á'a amiigustemua'a, ca'ɨ́n a'ihuáamua'a nusu á'ajuutzimua'a, o a'ɨ́mej ɨ́ chíjteaani mej á é'eche vejli'i á jemi. Tɨ́ pua'a piyen hua'utá'inen a'ɨ́mej, matɨ́'ɨj mi majta me'ɨ́n muaatá'ineesin mú'eetzi. Ayee mú huarɨ́n, a'ɨ́ɨ mú hui tí'imuanajchite'en. 13’Mɨ pajta mú'ee, patɨ́'ɨj hua'utá'inen mej tiú'ucua'ani, a'ɨ́mej pepu'u huatá'inen ɨ́ mej caí a'ij tí'ijviicua'i, pajta a'ɨ́mej ɨ́ mej jeíhua rajpuaíjtzi cuí'ini'ira'a jɨme'e, pajta a'ɨ́ɨme ɨ́ mej a'ij pua'a titéecɨ'ɨca, pajta a'ɨ́ɨme ɨ́ mej aracúcu'unijmee. 14Ayee pej huarɨ́n, rɨ́'ɨ mú timuaatá'asin, a'iné camu tí'ituaave ɨ́ mej jɨ́n timuaanájchite'en. Mɨ́ ajta, a'ɨ́ɨ pu Dios hui timuaatanájchite'esin a'ájna xɨcájra'an jetze mé jetzen a'itajú'un huá'a tzajta'a ɨ́ mɨ'ɨchite. ―Ayee pu tiraata'ixaa a'ɨ́jna ɨ́ Jesús. 15Ajta seɨ́j tɨ ajta a'uun huatéjca huá'a jamuan, tɨ́'ɨj ráanamuajri'i a'ij tɨ tiu'utaxájtaca'a a'ɨ́jna ɨ́ Jesús, ayée pu tiraata'ixaa tɨjɨ́n: ―Rɨ́'ɨ pu tiraatá'asin a'ɨ́jna tɨ tiú'ucua'ani a'ájna xɨcájra'an jetze tɨ jetzen Dios huataseíjre'esin tɨ ij tiu'uta'aíjta íiyen chaanaca japua. 16Jesús pu ayén tiu'utaniú tɨjɨ́n: ―Ja'atɨ pu nu'u hui rɨ́'ɨ huaújruurejca'a tɨ ij tihua'umín. Mu'iicáca pu nu'u huatá'inee. 17Tɨ́'ɨj a'ájna teja'uré'ene tɨ tihua'umín, tɨ'ɨquí a'ɨ́ɨn raata'íteca'a ɨ́ tɨ jemin tí'ivaɨre'e tɨ ij hua'utájeeve a'ɨ́mej ɨ́ mej huatá'iniihuaca'a. Ayen tɨjɨ́n: “Setá'aj yeehui a'uré'enen a'iné pu'uri huaxɨ́'epɨ'ɨn.” 18’Majta a'ɨ́ɨme, naími'i mú nu'u miyen autéjhuii mej tiu'utaúruuni'i. Ajta a'ɨ́ɨn ɨ́ tɨ amuacaí raatá'inee, ayée pu tiu'utaxájtaca'a tɨjɨ́n: “Neuchén nu chuej huánanai nej japuan tiu'umuárɨ'en. Ruxe'eve'e nej ye'utéeseij. Ayee nu tí'imuahuavii mú'eetzi pej tinaatá'uuni'i.” 19’Ajta seɨ́j, ayée pu nu'u tiu'utaxájtaca'a tɨjɨ́n: “Neuchén nu puuyesi huánanai. Anxɨ́j paari mú ará'ase. Nu'uri á'uraa nej ni huá'ucalaadu. Patá'aj tinaatá'uuni'i pajta ineetzi.” 20’Ajtahua'a ɨ́ seɨj, ayée pu nu'u tiraata'ixaa tɨjɨ́n: “Neuchén nu huaténe'ɨcheca'a. A'ɨ́j pu jɨ́n caí rɨ'ɨrí nej ne'uun á'ume'en.” 21’Ajta a'ɨ́ɨn tɨ tí'ivaɨre'e tɨ huaja'utajé, tɨ'ɨquí a'uré'araa. Ajta nu'u ayén tiraata'ixaa a'ɨ́jna tɨ tí'ira'aijte'e a'ij mej tiu'utaxájtaca'a. Ajta, a'ɨ́ɨn tɨ huatéechi'i, jeíhua pu nu'u hui huataniú'ucaca'a. Tɨ́'ɨj i raata'íteca'a a'ɨ́jna tɨ tí'ivaɨre'e tɨjɨ́n: “Patá'aj yeehui ca'anacan pe'uun á'ume'en caaye jetze, ajta juye jetze tɨ cɨ́j antayaúj, tɨ́j na'a ta'uténinei u chajta'a. Patá'aj hua'erávi'itɨn a'ɨ́mej ɨ́ mej caí a'ij tí'ijviicua'i, pajta a'ɨ́mej ɨ́ mej rajpuaíjtzi cuí'ini'ira'a jɨme'e, pajta a'ɨ́mej ɨ́ mej aracúcu'unijmee, pajta a'ɨ́mej ɨ́ mej ná'achijmee ɨ́ ru'ɨ́ɨca jetze.” 22’Ajta a'ɨ́ɨn tɨ tí'ivaɨre'e, ayée pu nu'u tiraata'ixaa tɨjɨ́n: “Nevástara'a, nu'uri niyen huarɨ́j a'ij pej tinaata'aíj. Aru maúche'e mú ú'uve mej seica mú a'uvé'eju'un.” 23’Ajta a'ɨ́ɨn tɨ huatéechi'i, a'ɨ́ɨ pu nú'u hui ayén tiraata'ixaa a'ɨ́jna tɨ jemin tí'ivaɨre'e tɨjɨ́n: “Patá'aj yeehui pe'uun á'ume'en ɨ́ juye jetze a'ɨmuá tɨ a'ataneáatɨmee, pajta méyee a'ɨmuá mej huachéjme. Patá'aj ca'anéeri jɨ́n hua'utájeeve mej mú a'uvé'eju'un, mej mi u huájɨste yú nechi'ita. 24Ayee nu tí'imua'ixaate'e. A'ɨ́ɨme ɨ́ nej amuacaí hua'utá'inee, a'ɨ́ɨme, capu seɨ́j yé tí'icua'ani íiyu i nej tihuá'amin.” Ayee pu hui tiu'utaxájtaca'a a'ɨ́jna tɨ huatéechi'i. 25Jéihua mú teɨte á'ujujhua'ane'e me'ɨ́jna jamuan ɨ́ Jesús. Tɨ'ɨj jí a'ɨ́ɨn hua'useíirajraa a'ɨ́mej ɨ́ teɨte. Ayee pu tihua'utá'ixaa tɨjɨ́n: 26―Ja'atɨ tɨ na'a tɨ mú a'uvé'eme'en ineetzi jemi, ayée pu hui tiú'ujxe'eve'e tɨ a'ɨ́ɨn jaítze'e rɨ́'ɨ tinájcha'ɨɨca ineetzi caí rɨ́'ɨ tirájcha'ɨɨca ɨ́ rutáàta, ajta ɨ́ runáàna nusu ɨ́ ru'ɨ́j, ajta ɨ́ ruyaujmua'a nusu ɨ́ ru'ihuaamua'a, ajta ɨ́ rucu'utzimuá nusu ɨ́ rujúutzimua'a. Na'ari caí, canu raatá'asin tɨ nee jamuan á'uche'ecane'en. ’Ee xaa ne'u, canu ja'atɨ huatá'asin tɨ neetzi jamuan á'uche'ecane'en tɨ pua'a caí ja'atɨ á'ujca'ane tɨ na'ará'astijre'en, tɨ a'ɨ́ɨn ja'atɨ huámɨ'ɨni neetzi jetze me'ecan, tɨ ayén te'ehuaújca'anen ruxɨ́'evi'ira'a jɨme'e. 27’Ayee nu hui tejá'amua'ixaate'e tɨ ayén ti'ayajna nej caí ja'atɨ huatá'an tɨ neetzi jamuan á'uche'ecane'en tɨ pua'a a'ɨ́jna ɨ́ ja'atɨ caí ruxɨ́'evi'ira'a jɨ́n na'ará'asten, tɨ pua'a caí ayén che'atá na'a tirajpuaíjtzi á'ara'ani netɨ́j inee tirajpuaíitzi na'ame. 28’Tɨ́ pua'a seɨ́j mú'een ayén tirá'ajtaahuamɨ'ɨ chi'ij tɨ ájtee, ni caí ja'atɨ ayén rɨni tɨ autéjcheni tɨ rá'ajtaahuan. Amuacaícan a'ɨ́ɨ pu a'ujyeíjxa tɨ́'ij raaté'itɨen a'achú tɨ ti'itɨ́j huataújxe'eve'esin tɨ ij ráamua'aree tɨ pua'a cɨ'ɨpée ɨ́ tumin tɨ ij rá'ajcɨ'ɨti, nusu caí. 29’Ee xaa, ayée pu rɨni. Na'ari caí, tɨ pua'a auchén autéechen, ajta huaxɨ́n ɨ́ tumin, capu ché'e ra'antícɨ'ɨtzi. Majta me'ɨ́n ɨ́ teɨte, matɨ́'ɨj raseijra, a'ɨ́ɨ mú autéhuijsin mej ra'utéxɨeehuari'ira. 30’Ayee mú tiu'utaxájta tɨjɨ́n: “Amɨ́jna mɨ teáata'a, a'ɨ́ɨ pu yeehui a'utéjche tɨ rá'ajtaahua mɨ chi'ij, aru capu cha'a tí'ituaave'e ɨ́ tɨ jɨ́n ra'antícɨ'ɨti.” 31’Na'ari seɨ́j tɨ ti'itéjvee rey jɨme'e, tɨ pua'a meri á'uju'un mej huateújne'usi'ite'en, ¿a'iné rɨni a'ɨ́jna? ¿Ni caí amuacaí a'ujyeíjxa tɨ ij tiú'umua'ati aisí tɨ pua'a caí rɨ'ɨrí tɨ hua'utémua'itɨn a'ɨ́mej jɨme'e ɨ́ mej tamuáamuata'a vi'ira'a ará'ase? Ajta a'ɨ́ɨn ɨ́ seɨ́j tɨ ti'itéjvee rey jɨme'e, ayée pu hua'itévi'itɨcɨ a'achú cumu seité vi'ira'a ɨ́ xantaaru'u. Aa ni'ijtá xaa ne'u, ayée pu hui rɨni. 32’Ajta tɨ pua'a ayén tira'atámitɨejte'en tɨ caí huatárɨ'ɨristare tɨ hua'utémua'itɨn, ayée pu rɨni. Tɨ́'ɨj auj a'ɨmuá e'evé'evee ɨ́ seɨj, a'ɨ́ɨ pu seica huata'íti mej mi á'uju'un ɨ́ seɨ́j jemi ɨ́ rey mej mi raatáhuavii mej raaxɨ́'epɨ'ɨntare'en mej mi caí runé'usi'ite'e. 33’Ayee pu hui che'atá na'a 'een mú'ejmi jemi. Ja'atɨ tɨ na'a tɨ ayén tí'ijxe'eve'e tɨ nee jamuan á'uche'ecane'en, ayée pu tiú'ujxe'eve'e tɨ nain mé teuúhua'axɨn a'achú tɨ tí'ijcha'ɨɨ. Na'ari caí, canu raatá'asin tɨ nee jamuan á'uche'ecane'en. 34’Seajta mú'een, ayée xu hui tí'ivaɨre'e sej rɨ́'ɨ huá'uruuren ɨ́ seica ɨ́ teɨte ɨ́ niuucari jɨme'e mej mi rɨ́'ɨ rɨ'éene'e muá'ara'ani ɨ́ ru tzajta'a. Seajta, ayée xu che'atá sena'a tí'ivaɨre'e tɨ́j unaj mej ra'uré'eviváara'a muá'aye'i ɨ́ teɨte ɨ́ hua'ira'a japua a'iné naa pu ta'ancacá ɨ́ unaj. Aru tɨ pua'a huateáru'una, tɨ'ɨquí ráxɨ'ɨsin ɨ́ ta'ancacá, ¿a'iné tejamuá'amitɨejte'e? ¿Niqui ajtahua'a rɨ'ɨrí tɨ ancacá á'ara'ani? Capu hui xaa ne'u a'atzu. 35Capu ché'e ti'itɨ́j vaɨre'e, ni ɨ́ chuej japua, capu ajta tí'ivaɨre'e tɨ rajnájchite'en ɨ́ ye'emuaate chuita japua. Ayee mu'u raru'ujca mé mú rúurɨeexɨjsin. ’Ayee pu'u hui, jɨ́me'en ɨ́ ja'atɨ tɨ huiteájnamua, ché'e a'ɨ́ɨn ráanamua temua'a naa.

will be added

X\