San Lucas 13

1A'ajná'ɨmua, seica mú e'iré'ene ɨ́ Jesús jemi. Matɨ́'ɨj mi miyen tiraata'ixaa me'ɨ́jna jɨme'e ɨ́ mej Galilea e'echéjme'e, Pilato tɨ nu'u huá'ucuii matɨ́'ɨj mauj cáne'axɨ muaɨ́'ɨvejtaca'a. 2Jesús pu ayén tihua'uta'íhua'uri'i tɨjɨ́n: ―¿A'iné tejamuá'amitɨejte'e mú'ejmi? ¿Ni qui mecaí jaítze'e a'ij pua'a tí'iteteɨtestaca'a sej caí mú'een a'ɨ́jna jɨme'e mej miyen tirajpuaíjtzica'a? 3’Ayee nu tejá'amua'ixaate'e. Capu ayén ti'ayajna. Mɨ́ ajta, tɨ pua'a secaí seɨcɨé tiú'umua'ati ɨ́ Dios jemi, mú'een xu hui seajta antipuá'ari. 4’Ari a'ɨ́ɨme ɨ́ mej tamuáamuata'a japuan aráhuaica ará'ase, ɨ́ tɨ huá'a japua rájve ti'itɨ́j tɨ ájtee tɨ a'uun a'utéveeca'a a'ájna já'ahua'a Siloé, ¿a'iné tejamuá'amitɨejte'e? ¿Ni qui jaítze'e a'ij pua'a metí'iteteij mecaí a'ɨ́ɨme ɨ́ seica ɨ́ mej Jerusalén a'uchéjme? 5’Ayee nu tejá'amua'ixaate'e tɨjɨ́n: capu hui ayén ti'ayajna. Mɨ́ ajta, tɨ pua'a secaí seɨcɨé tiú'umua'ati ɨ́ Dios jemi, mú'een xu seajta antipuá'ari. ―Ayee pu tihua'utá'ixaa a'ɨ́jna ɨ́ Jesús. 6Tɨ́'ɨj i seɨ́j niuucari pu jɨ́n tihuá'u'itɨiiri'i tɨjɨ́n: ―Ja'atɨ pu nu'u hui huaréj ta'ítea'ɨca'a. Aa pu nu'u ye'ateáhuii a'u tɨ uuva a'uvéjme. Tɨ'ɨj jí u ya'utéeseij avée si ari taca'a. Capu nu'u a'atzu taca'aca'a. 7Tɨ'ɨj jí ayén tiraata'ixaa a'ɨ́jna tɨ a'uun tí'icha'ɨca'a tɨjɨ́n: “Pu'uri yeehui á'atee a'achú cumu huaíca nine'ira'a ne yee raatésise'ij á vee si ari taca'a. Aru, capu a'atzu taca'a. Patá'aj ra'ijveíjche, a'iné amɨ́n mé ti'itávee, capu ti'itɨ́j vaɨre'e.” 8’Ajta a'ɨ́ɨn tɨ tí'icha'ɨca'a, ayée pu nu'u tiraata'ixaa tɨjɨ́n: “Nevástara'a, ché'e auj mé táveeca seɨ́j nine'ira'a. Nee nu yeehui raaté'ijche'esin, neajta ti'itɨ́j atarɨéjra'asin chuej jamuan. 9Tɨ́ pua'a huatáca'an ru'usí, cha'a ayén mé ti'itávee. Na'ari tɨ pua'a caí huatáca'an, aj pej xaa yeehui pi ra'ijveíjche.” 10Ayee pu ja'anáj tiuju'urɨ́j tɨ a'ájna pɨ́tí'irɨjcaa ja'anáj xɨcájra'an mej jetzen ruse'upi. Jesús pu tihuá'amua'atejca'a u teyujta'a. 11Ajta seɨ́j 'ɨ́ita'a, a'úu pu ánu'uhuatéveeca'a. Pu'uri teuumé'eca tamuáamuata'a japuan aráhuaica nine'ira'a tɨ tí'icui'ica'a a'ɨ́jna jɨme'e tiyaaru'u tɨ tzajta'an seijre'e. A'ɨ́jna ɨ́ 'ɨ́ita'a, jé'ecan pu á'ajtɨpu. Capu a'atzu rɨ'ɨríistaca'a tɨ huataújsiuuraren. 12Tɨ́'ɨj Jesús raaseíj, aj pu i raatajé tɨ jemin á ve'eré'enen. Ayee pu tiraata'ixaa tɨjɨ́n: ―'Ɨ́ita'a, nu'uri timuá'ari'iri'i ɨ́ pej jɨ́n tí'icui'i. 13Tɨ́'ɨj i ra'ajtamuárɨej. Jɨ́me'en pu'u ra'ajtamuárɨej, aj pu i a'ɨ́ɨn 'ɨ́ita'a huataújsiuurare. Aj pu i rɨ́'ɨ tiraatá'a ɨ́ Dios. 14Ajta a'ɨ́ɨn tɨ tí'aijta u teyujta'a, jé'ecan huataniú'ucaca'a a'iné Jesús pu tiráahuaa a'ájna xɨcájra'an jetze matɨ́'ɨj pua'a ruse'upi. Ayee pu tihua'utá'ixaa a'ɨ́mej ɨ́ teɨte tɨjɨ́n: ―Ayee pu hui te'ará'ase ɨ́ mej jetzen tí'imɨjhuaca arájsevi xɨcaj. Setá'aj mú a'uvé'eju'un setá'aj se'ájna tihuaújhuaate'en. Caxu mú a'uvé'ecɨ'ɨca'an se'ájna xɨcájra'a mej jetzen ruse'upi. 15Jesús pu ayén tiu'utaniú tɨjɨ́n: ―Mɨ́ sej caí jé'iyecan jɨ́n tí'ivaɨre'e ɨ́ Dios jemi, jɨ́me'en a'ájna xɨcájra'a mé jetzen ruse'upi, ¿ni secaí siyen tí'imɨjhuaca naíjmi'i mú'een? ¿Ni secaí huá'ixɨɨxɨ ɨ́ ruye'emua, tɨ pua'a ti'itɨ́j pu'éene'en puuya na'ari puuru'u sej si huaja'uvé'ite'en a'ájna xɨcájra'a mej jetzen ruse'upi? Ni'ijtá xaa ne'u. Ayee xu tí'imɨjhuaca. 16’Ari amɨ́jna mɨ 'ɨ́ita'a, a'ɨ́ɨ pu hui jetzen huanéj a'ɨ́jna ɨ́ Abraham teecan. Ajta pu'uri tejauume a'achú cumu tamuáamuata'a japuan aráhuaica nine'ira'a tɨ Satanás ra'atéejɨ'ɨcɨe cuí'ini'ira'a jɨme'e. ¿Ni caí ayén tiraavíjte'e nej tiráahuaate'en nej ni ru'irájtuaani a'ɨ́jna jɨme'e tɨ tí'icui'i? ―Ayee pu tihua'utá'ixaa a'ɨ́jna ɨ́ Jesús. 17Tɨ́'ɨj ayén tiu'utaxájtaca'a, a'ɨ́ɨme ɨ́ mej rájcha'ɨɨre'eca'a me'ɨ́jna ɨ́ Jesús, jé'ecan mú tiu'utatévi'iri'i ɨ́ jemin. Majta a'ɨ́ɨme ɨ́ seica ɨ́ teɨte, jé'ecan pu rɨ́'ɨ hua'utá'a nain jɨme'e a'ij tɨ ti'itɨ́ huarɨ́j tɨ huápɨ'ɨ ruxe'eve'e. 18Aj pu i Jesús ayén tihua'uta'íhua'uri'i tɨjɨ́n: ―¿A'iné tí'irɨneca íiyen chaanaca japua tɨ Dios tí'aijta? ¿A'iné tí'iseijre'e tɨ jɨ́me'en Dios tí'aijta? 19’Ayee pu seijre'e tɨ́j mustaaza ti'itɨ, tɨ ayén ti'itéjatze'e tɨ́j jɨ́ɨcan. Ja'atɨ pu nu'u hui yá'utɨɨ a'ɨ́jna ɨ́ jatzi. Tɨ́'ɨj nu'u i raahuáste a'u tɨ teje'eré'ana. Tɨ'ɨj jí huanéj a'ɨ́jna ɨ́ jatzi. Aj pu nu'u i huavaújse. Tɨ'ɨj jí ayén á'ajtɨtɨ'ɨj já'araa tɨ́j cɨyej. Majta me'ɨ́n pina'ase ɨ́ mej rá'ara'a, a'ɨ́ɨ mú nu'u e'ire'enée, án mú nu'u a'ujrá'aseca'a ɨ́ pi'istáare'ara'an jetze. 20Ajtahua'a seɨ́j hua'uta'íhua'uri'i tɨjɨ́n: ―¿A'iné seijre'e tɨ jɨ́me'en Dios tí'aijta? 21’Ayee pu hui 'een tɨ́j a'ɨ́jna ɨ́ levadura tɨ́'ɨj a'ɨ́ɨn 'ɨ́ita'a ru'iteájtɨcɨ, ajta nu'u rajnájchi cuaíjtzi jetze tɨ huaíca medida ará'ase. Jéihua pu nu'u rajcuaíjtzitaca'a. Ajta a'ɨ́ɨn ɨ́ levadura, a'ɨ́ɨ pu nu'u tzajta'a huaneájxɨ nainjapua ɨ́ cuaíjtzi. ―Ayee pu tihua'utá'ixaa a'ɨ́jna ɨ́ Jesús. 22Tɨ'ɨj jí Jesús a'uun a'ume'eca ɨ́ juye jetze tɨ Jerusalén á'uye'iri. A'u tɨ na'a tɨ a'uré'enineica'a, tɨ huachájta'ajme, na'ari a'ɨmuá mé antachéejmee, a'úu pu tihuá'amua'atehua'a ɨ́ teɨte. 23Ja'atɨ pu ayén tiraata'íhua'uri'i tɨjɨ́n: ―Tavastara'a, ¿ni cɨ́j mena'a tite'erá'ase ɨ́ tɨ Dios hua'irátuaasin? Ajta a'ɨ́ɨn Jesús, ayée pu tiraata'ixaa tɨjɨ́n: 24―Setá'aj huateújca'anen sej si se'ɨ́jna jetze a'uteáruti tá'apueerta tɨ cɨ́j antéeyauj. Ayee nu tejá'amua'ixaate'e tɨjɨ́n mu'iitɨ́ mú miyen huataújca'anejsin mej mi me'uun a'uteárute. Mɨ́ ajta caí, capu hua'utá'asin. 25’Tɨ́'ɨqui a'ɨ́jna tɨ á é'eche, tɨ́'ɨj i ájchesin, ajta te'iteánajsin tá'apueerta. Seajta mú'een, amée xu pua'acɨé huaté'uu xá'aju'un. Seajta te'ejteátu'asixɨ'ɨsin ɨ́ puéerta jetze. Ayee xu ca'anín jɨ́n tiraatájeeve a'ɨ́jna tɨ huatéechi'i. Ayee xu tɨjɨ́n: “Tavastara'a, tita'antácuune'e.” Ajta a'ɨ́ɨn ayée pu tejámuaatá'ixaate'esin tɨjɨ́n: “Canu hui á'amuamuajte a'ateén sej pɨ́rɨcɨ. Canu neajta ramua'aree a'u sej e'eráacɨ.” 26’Seajta mú'een, ayée xu tiu'utaxájta tɨjɨ́n: “Teen tu tiú'ucuaa á jamuan, teajta á jamuan hua'í. Pajta mú'ee ti'itamuá'atehua'a a'u tɨ juye a'uré'enine'i.” 27Ajta a'ɨ́ɨn, ayée pu tejámuaatá'ixaate'esin tɨjɨ́n: “Canu hui ramua'aree inee a'u sej é'eme'ecan. Sericu mú'een, mɨ sej a'ij pua'a tí'iteteɨte.” 28- 29’Ayee pu té'eme a'ájna xɨcájra'an jetze. Mú'een xu huá'aseijran a'ɨ́mej ɨ́ mej me'uun a'uráaté'a muá'aju'un a'ujna Dios tɨ é'eseijre'e. A'ɨ́mej xu hui seijran se'ɨ́mej ɨ́ mej mejmí'i e'echéjme'e, se'ɨ́jna ɨ́ Abraham, seajta se'ɨ́jna ɨ́ Isaac, seajta se'ɨ́jna ɨ́ Jacobo. Majta seica mú á a'ire'enejsin mej mi a'ujrá'ase a'utɨ́ meesa a'utéjvee mej mi tiú'ucua'ani a'ujna Dios tɨ é'eseijre'e. Seajta mú'een, áa xu pua'acɨé a'uté'uu xá'aju'un. Jéihua xu ruyeine xá'aju'un, seajta ancurá'ujcɨ'ɨme ye'icáa xá'aju'un mɨ rutamej jɨme'e se'ɨ́jna jɨme'e sej seri rajpuaíitzi xá'aju'un. 30’Ee xaa ne'u, ayée pu hui ti'ayajna. Seica ɨ́ mej nu'u vivejmé'en jɨ́n títetateí íjii, a'ɨ́ɨ mú cɨliéene'e jɨ́n titetaté'a muá'aju'un a'ájna xɨcájra'a jetze. Majta seica ɨ́ mej nu'u cɨliéene'e jɨ́n títetateí íjii, a'ɨ́ɨ mú vivejmé'en jɨ́n titetaté'a muá'aju'un a'ájna xɨcájra'a jetze. ―Ayee pu tihua'utá'ixaa a'ɨ́jna ɨ́ Jesús. 31Tɨ́'ɨj Jesús auchén raatapuá'ajtaca'a tɨ tihuá'a'ixaate'eca'a ɨ́ teɨte, matɨ́'ɨj mi seica jemin á e'iré'ene. A'ɨ́ɨ mú pú'eene'e ɨ́ fariseos. Ayee mú tiraata'ixaa tɨjɨ́n: ―Patá'aj tícheni peyajna a'iné amɨ́ pu nu'u Heródes muajé'icatamɨ'ɨ mú'eetzi. 32Aj pu i Jesús ayén tiu'utaniú tɨjɨ́n: ―Setá'aj hui se'uun á'uju'un se'ɨ́jna jemi ɨ́ Heródes tɨ avíitzi jɨ́n netzeɨ́jra'ajmua'a ineetzi. Setá'aj seajta siyen tiraata'ixaate'en se'ɨ́jna yee pu'uri íjii nehua'utamuárite'esin ne'ɨ́mej ɨ́ tiyáaru'use ɨ́ mej huá'a tzajta'a seijre'e ɨ́ teɨte, neajta yee tihuá'ahuaate'en ɨ́ teɨte íjii, neajta ruijmua'a. Neajta yee, aaruijmua'a nu aráneastejre'esin ne'ɨ́jna jɨme'e ɨ́ nej jɨ́n antínmua'aree. 33’Capu amɨ́n a'ij. Ayee pu hui tiú'ujxe'eve'e nej nauj huamé'en íjii, neajta ruijmua'a, neajta aaruijmua'a, a'iné capu ayén tiraavíjte'e tɨ huámɨ'ɨni ayajna pua'acɨé u Jerusalén seɨ́j tɨ Dios jetze me'ecan tí'ixaxa'a. 34’Mú'een mɨ sej Jerusalén é'eche, mɨ sej Jerusalén é'eme'ecan, mú'een xu huá'acui'ica a'ɨ́mej ɨ́ mej Dios jetze me'ecan tí'ixaxa'a. Seajta huá'atu'axaca tetej jɨme'e a'ɨ́mej tɨ Dios huaja'uta'íteca'a mú'ejmi jemi. Mu'íi nu hui niyen raxɨ́'eve'eca'a nej huá'aseɨre'en ɨ́ a'amuayaujmua'a nej ni huá'ucha'ɨɨn cumu ɨ́ tecuaara'i tɨ huá'acha'ɨɨ ɨ́ ruyaujmua'a, tɨ hua'icánaamua ɨ́ ru'ana jɨme'e. Seajta mú'een, caxu siyen ra'utéeca'ane. 35’Casi'i, xaaseíj. Nu'uri hui mé amuuhuá'axɨ mú'ejmi mɨ sej Jerusalén é'eche. Ayee nu tejá'amua'ixaate'e. Caxu cha'a neseijran ajta na'a caí teja'ure'enén a'ájna xɨcájra'an jetze sej pua'a siyen tiu'utaxájta yee cha'a rɨ́'ɨ tiraateájtuaani a'ɨ́jna ɨ́ tɨ mé e'evé'eme niúucare'ara'an ɨ́ tavástara'a. ―Ayee pu tiu'utaxájtaca'a a'ɨ́jna ɨ́ Jesús.

will be added

X\