San Lucas 12

1Majta me'ɨ́n ɨ́ teɨte, jeíhua mú ajteáxɨɨreca'a. Ayee mú ará'axcaa a'achú hua'apua vi'ira'a, huaíca vi'ira'a, a'achú mej mena'a pua'amé. A'ɨ́j mú jɨ́n á'acataca'a jeíhua. Ajta a'ɨ́ɨn ɨ́ Jesús, a'ɨ́ɨ pu amuacaí tihuá'atixáate'ajraa a'ɨ́mej ɨ́ mej jamuan á'ujujhua'ane'e. Ayen tɨjɨ́n: ―Rɨ́'ɨ xu'u hui mú'een a'ɨ́jna jɨme'e fariseos mej ranájchite'e ɨ́ pan jetze. Ayee pu huataújmua'a a'ɨ́jna ɨ́ niuucari tɨjɨ́n ɨ́ tɨ huá'a tzajta'a uraninei, ɨ́ tɨ caí jé'iyecan jɨ́n seijre'e. 2’Ayee pu'u, ti'itɨ́j tɨ na'a tɨ rú'avaa avíitzi'i jɨme'e, a'ɨ́ɨ pu hui huataseíjre'esin mé jéjre'e mej mi raaseíj ɨ́ teɨte. Ajta ti'itɨ́j mej rá'avaataca'a, a'ɨ́ɨ pu antícuuni'ihua mej mi ráamua'aree a'ij tɨ 'een. 3’A'ɨ́jna ɨ́ pej raataxájtaca'a tɨ́ca'amiste'e, Dios pu raataxájta tújca'ari tzajta'a. Ajta a'ɨ́ɨn ɨ́ pej raataxájtaca'a xahuaanin jɨme'e u chi'ita u téte'e, Dios pu hui raataxájta ca'anín jɨme'e a'ánna ɨ́ chi'ij japua ta'avé'epa'atza. 4’Ayee nu tejá'amua'ixaate'e mɨ sej ne'amiigustemua'a pú'een, caxu huá'atziɨɨne'e a'ɨ́mej ɨ́ mej mena'a raayɨ́'ɨtɨ mej raajé'ica ɨ́ sej ratéhua'ira'a, sino camu raayɨ́'ɨtɨ mej ra'upuá'ajte'en ɨ́ a'amua tzajta'a tɨ seijre'e. 5’Mɨ neajta inee, ayée nu tejámuaatá'ixaate'esin ja'atɨ sej xaa tziɨɨne'e. Setá'aj rátziɨɨne'e a'ɨ́jna tɨ ayén raayɨ́'ɨtɨ tɨ raajé'ica ɨ́ sej ratéhua'ira'a, tɨ ajta raayɨ́'ɨtɨ tɨ yá'urɨeeni ɨ́ a'amua tzajta'a tɨ seijre'e a'ujna taij jetze tɨ caí ja'anáj á'amɨ'ɨni. Jee tzɨ́te'e, ayée nu hui tejá'amua'ixaate'e tɨjɨ́n: Setá'aj rátziɨɨne'e se'ɨ́jna. 6’Aru, caxu a'ij tité'ujmuajca. ¿Ni secaí siyen tiu'utanájchita a'achú cumu hua'apua centaavo anxɨ́vica jɨme'e ɨ́ pina'ase ɨ́ mej cɨ́lieen? Camu jeíhua tí'ijnajche. Mɨ́ ajta a'ɨ́ɨn Dios, a'ɨ́ɨ pu naíjmi'ica autámua'areeri'i. 7Jee xaa ne'u, ayée pu ti'ayajna. Dios pu hui ari raaté'itɨeexɨ mɨ á'amuacɨpua a'achú tɨ pua'améjme. Caxu tí'itziɨɨne'e a'iné mú'een xu jeíhua jaítze'e jetzen ruxe'eve'e ɨ́ Dios mecaí ɨ́ pina'ase, a'iné a'ɨ́ɨ pu xaa amuá'ancu'uvajxɨ'ɨsin. 8’Ayee nu tejá'amua'ixaate'e, ja'atɨ tɨ na'a tɨ ayén tiu'utaxájta a'ɨ́mej jemi ɨ́ teɨte yee na'ará'astijre'en ineetzi, inee i nej neajta huá'a jetze airáane ɨ́ teɨte, ayée nu neajta raataxájta a'ɨ́mej jemi ɨ́ mej ta japua tí'ivaɨre'e ɨ́ Dios jemi yee naatévaɨ ineetzi. 9Ajta a'ɨ́ɨn tɨ ti'ixa a'ɨ́mej jemi ɨ́ teɨte yee capu nemua'ate, ayée nu hui che'atá raataxájta a'ɨ́mej jemi mej ta japua tí'ivaɨre'e ɨ́ Dios jemi yee canu ramua'ate. 10’Neajta nu tíhua'utá'uuni'ira a'ɨ́mej, a'achú mej mena'a pua'amé a'ij pua'a tí'inexa ineetzi i nej neajta huá'a jetze airáane ɨ́ teɨte. Aru a'ɨ́ɨme, a'achú mej mena'a pua'amé a'ij pua'a tí'ijxa a'ɨ́jna ɨ́ xɨéjniu'ucare'ara'an ɨ́ Dios, canu ja'anáj tíhua'utá'uuni'ira a'ɨ́mej. 11- 12’Seajta mú'een, matɨ́'ɨj u amua'arávi'itɨn a'ɨ́mej jemi ɨ́ mej teyujta'a tí'aijta, nusu a'ɨ́mej jemi ɨ́ mej ti'itɨ́j jɨ́n antiújmua'aree, ayée xu huárɨni. Caxu hui a'ij tité'ujmuajca a'ij sej ye'í titeeteújnan na'ari a'ij sej ye'í tiu'utaxáj, a'iné a'ájna xɨcájra'an jetze, a'ɨ́ɨn xɨéjniu'ucare'ara'an ɨ́ Dios, a'ɨ́ɨ pu tejá'amuamua'aten a'ij sej ye'í tiu'utaxá. ―Ayee pu tihua'utá'ixaa a'ɨ́jna ɨ́ Jesús. 13Ajta seɨ́j huá'a tzajta'a a'utéveeca'a. Ayee pu tiraata'ixaa tɨjɨ́n: ―Maeestru, patá'aj piyen tiraata'ixaate'en ɨ́ nejá'a yee tɨ já'ita'a tinaatá'an a'ɨ́jna tɨ titaacɨ́'ɨ a'ɨ́jna jɨme'e tɨ seɨ́j huamɨ́'ɨ, a'iné capu tinaatá'asin ɨ́ neetzi tɨ ne'áa. 14Jesús pu ayén tiu'utaniú tɨjɨ́n: ―Hoombi xaa, ¿a'ataani tinaa'íjca juees jɨme'e? ¿A'ataani naatá'a nej niyen tiu'uxɨ́'epɨ'ɨntare'en mú'ejmi jemi? ―Ayee pu'u tiraata'ixaa. 15Ajta ayén tihua'utá'ixaa tɨjɨ́n: ―Rɨ́'ɨ xu'u mú'een, setá'aj á'ujcu'uvée sena'a temua'a naa. Ché'e secaí huápɨ'ɨ sena'a tí'inecua'atze sej jeíhua tiu'ucha'ɨ́ɨme'eni, ti'itɨ́j tɨ na'a, a'iné tɨ pua'a ja'atɨ jeíhua ti'itɨ́j tícha'ɨɨ, capu hui ti'itɨ́j a'ij tiraatévaɨre'esin tɨ ij caí ché'e ti'itɨ́j a'ij ráaruuren. 16Tɨ́'ɨj i seɨ́j niuucari jɨ́n tihuá'u'itɨiiri'i tɨjɨ́n: ―Aa pu nu'u já'ahua'a chíjteaani é'eche. Chuej pu nu'u tícha'ɨɨ tɨ japuan tiu'uhuáste. Temua'a pu nu'u hui jeíhua tiú'ucɨɨreca'a. 17’Tɨ́'ɨj i ayén tiu'umuá'aj a'ɨ́jna ɨ́ chíjteaani tɨjɨ́n: “¿A'iné yeehui náarɨni? Capu ché'e mé'e é'erɨ'ɨri a'u nee yeehui yá'aruuren ɨ́ tɨ huácɨɨreca'a.” 18Tɨ́'ɨj nu'u i ayén tiu'umuá'aj tɨjɨ́n: “Ayee nu rɨni. Neraaté'uuna ɨ́ nechi'i mé tɨ huavéjme. Neajta seica nu ájtaahuaxɨ'ɨsin tɨ jaítze'e vivejmé'e á'ara'ani. Netɨ́'ɨj ni ne'uun ru'uté'aasin ɨ́ tɨ tiú'ucɨɨreca'a, ajta nain i nej tí'ijcha'ɨɨ. 19Neajta nu yeehui niyen tiu'utaxájta ɨ́ ne tzajta'a yee nu'uri ne'uun rɨ́'ɨ tiú'uruu u chi'ita. Jé'ecan pu á'ateeri tɨ rɨ́'ɨ tinaatévaɨre'esin. Nu'uri yeehui nesé'upe'en. Niché'e tí'icua'aca, neajta ye'eca, neajta netémua'ave'e.” ―Ayee pu nu'u tiu'umuá'aj a'ɨ́jna ɨ́ ja'atɨ. 20’Ajta a'ɨ́ɨn ɨ́ Dios, ayée pu hui tiraata'ixaa tɨjɨ́n: “Mú'ee, mɨ pej caí ti'itɨ́j mua'aree. Ijii, tɨ́ca'a pej mɨ'ɨni. Patɨ́'ɨj huamɨ́'ɨn, ¿a'ataani tí'ijcɨ'ɨti a'ɨ́jna ɨ́ pej mú'ee rɨ́'ɨ ráaruu pej pi aseɨ́j huatá'atemua'ave'enche'e?” ―Ayee pu Dios tiraata'ixaa. 21Neajta niyen tejá'amua'ixaate'e. Ayee pu hui té'eme a'ɨ́mej jemi matɨ́j mena'a pua'amé ɨ́ mej rujɨ́ɨmua'a rajsé'ɨri ti'itɨ́j tɨ na'a mej mi jeíhua tí'ijcha'ɨɨ, majta, camu ti'itɨ́j tícha'ɨɨ ɨ́ Dios jemi. 22Tɨ́'ɨj i Jesús ayén tihua'utá'ixaa a'ɨ́mej ɨ́ mej jamuan á'ujujhua'ane'e tɨjɨ́n: ―A'ɨ́j nu jɨ́n niyen tejá'amua'ixaate'e. Caxu se'ɨ́jna jɨ́n tí'imua'ajca yee a'iquí ye'í tetí'icua'ani nusu yee a'iquí ye'í tetí'iye'en na'ari yee a'iquí ye'í tetiu'utétachejte'esin. 23’¿Ni caí jaítze'e ruxe'eve'e ɨ́ Dios jemi sej ruuri xá'ara'ani caí ɨ́ tɨ sej ráacua'ani? ¿Ni caí ayén che'atá na'a jaítze'e ruxe'eve'e ɨ́ Dios jemi tɨ ruuri a'ame ɨ́ sej ratéhua'ira'a caí tɨ naa seíire'e a'ame ɨ́ sej jɨ́n tiu'uteújchejte'en? Aa ni'ijtá xaa ne'u. 24’Casi'i, xaaseíj amɨ́mej cua'atza ɨ́ mej júte'e rá'ara'a. Camu hui a'atzu tí'ihuaste'e, camu majta tí'itza'anaca. Camu majta huatéechi'i ɨ́ mej tzajta'an rɨ́'ɨ yé'uruuren ɨ́ mej meri rájseɨj. Capu amɨ́n a'ij, aúche'e pu Dios tihuá'amicua. Mɨ́ seajta mú'een, jaítze'e xu jemin ruxe'eve'e ɨ́ Dios mecaí a'ɨ́ɨme ɨ́ cua'atza. 25’¿A'ataani raayɨ́'ɨtɨ tɨ á'ateeren tɨ jaítze'e ruuri a'ame a'ɨ́jna jɨme'e ɨ́ tɨ tí'iramua'atziite'e? Capu ja'atɨ xaa ne'u. 26Tɨ́ pua'a secaí raayɨ́'ɨtɨhua'an sej si siyen huárɨni se'ɨ́jna jɨme'e ɨ́ tɨ caí muárɨ'eri, ¿a'iné hui 'een jɨ́n siyen tí'imua'ajca se'ɨ́jna jɨme'e ɨ́ tɨ tí'ijturaa? 27’Casi'i, xaaseíj amɨ́jna mɨ caiipi'i, a'ij tɨ ye'í tí'ivaujse'e. Capu tí'imɨjhuaca amɨ́jna mɨ caiipi'i, capu ajta tí'itzaca. Capu amɨ́n a'ij. Dios pu hui ayén ráaruu tɨ jaítze'e naa seijre'e caí Salomón tɨ naa seijre'eca'a tɨ́'ɨj auj ti'itéveeca'a rey jɨme'e. Capu ja'anáj ayén tiu'uteújchejte ti'itɨ́j jɨme'e tɨ ayén naa seijre'e tɨ́j mɨ caiipi'i. 28’Casi'i, mú'een, Dios pu ayén rɨ́'ɨ tirájcha'ɨɨ mɨ tu'upi tɨ a'uun é'evaujse'e a'u mej á'atase'ehuaca. Ajta a'ɨ́ɨn tu'upi, capu á'ateeri sino yee ruijmua'a yee, a'ɨ́ɨ mú raaré'eveijchi, matɨ́'ɨj mi ratairan. Tɨ́ pua'a hui Dios ayén rɨ́'ɨ tirájcha'ɨɨ mɨ tu'upi, ¿ni caí jaítze'e amuaatá'asin ɨ́ sej jɨ́n tiu'uteújchejte'en, mú'ejmi mɨ sej caí a'atzu té'atzaahuate'e? 29- 30’Caxu a'ij tí'ixajta yee a'iquí ye'í tetí'icua'ani nusu a'iquí ye'í tetí'iteye'en. Ayee xu'u, caxu tí'imuajca se'ɨ́jna jɨme'e, a'iné naími'i matɨ́j mena'a pua'amé yen mej a'uchéjme íiyen chaanaca japua, ayée mú me'ɨ́jna jɨ́n rahuauhuau. Mɨ́ ajta a'ɨ́ɨn á'amuaya'upua, ta japua tɨ é'eseijre'e, a'ɨ́ɨ pu hui ari rú'umua'aree ti'itɨ́j tɨ amuá'aturaate'e. 31’Setá'aj mi'i rájhuauuni tɨ Dios tejá'amua'aijte'en, seajta ra'ará'astijre'en a'ij tɨ a'ɨ́ɨn tí'ijxe'eve'e. Tɨ́ pua'a siyen huárɨni, Dios pu hui tejámuaatá'asin tɨ́j na'a tɨ tejamuá'aturaate'e. 32’Caxu tí'itziɨɨne'e mú'een, mɨ sej siyen mé á'ujujhua'an. Cu xɨee cáne'axɨ sena'a ɨ́ mej rujɨ́ɨmua'a mena'a mé á'ujujhua'an. Ayee pu tira'aránajcheca'a ɨ́ sej rájya'upua tɨ ij a'ɨ́ɨn amuaatá'an sej se'uun a'uteárute a'u tɨ a'ɨ́ɨn tejé'aijta. 33’Setá'aj tiú'utuaani nain a'achú sej caj tí'ijcha'ɨɨ, seajta tihua'uré'an a'ɨ́mej ɨ́ mej caí a'ij tí'ijviicua'i. Ayee xu a'ɨ́jna jɨ́n huárɨni, tɨ 'ij a'ɨ́jna téjé'eseɨre'en ɨ́ Dios jemi ɨ́ tɨ tejá'amuacɨ'ɨti. Ayee pu éene'e a'ame tɨ́j ti'itɨ́j ca'aní tɨ caí ja'anáj huataújtuaasin. A'uu pu e'etiá'a a'ame mú'ejmi jemi ti'itɨ́j tɨ huápɨ'ɨ tí'ijnajche. Ajta capu hui ja'anáj huatéxɨjsin, a'iné camu a'uun a'uteáru'ipi ɨ́ nahua'ari. Camu majta racɨ́'ɨn a'ɨ́ɨme ɨ́ tejpuási. 34’Ayee xu éene'e xá'aju'un a'iné a'ɨ́j xu jetzen tí'imua'astɨ́ xá'aju'un se'ɨ́jna jetze tɨ jaítze'e amua'aráanajche, tɨ jaítze'e a'amua jetze ruxe'eve'e. 35’Rɨ́'ɨ xu'u titehuaújcaten sej si tiu'utévaɨre'en. Seuche'e xu hui atanéjne'eri tɨ́j ja'atɨ tɨ taij huitéchueeca'a tá'ataa. 36’Ayee xu éene'e xá'aju'un matɨ́j a'ɨ́ɨme ɨ́ mej tí'ivaɨre'e ja'atɨ jemi tɨ a'uun á'ume a'u mej tejé'eye'este a'ɨ́jna jɨme'e tɨ seɨ́j huaténe'ɨche. Majta a'ɨ́ɨme ɨ́ mej tí'ivaɨre'e, maúche'e mú tí'ijchu'eve'en a'atzaj tɨ pua'a uvé'enejsin a'ɨ́jna tɨ tihuá'aijte'e mej mi ca'anacan tira'antácuune'en tɨ́'ɨj a'ɨ́ɨn te'ejteátu'asixɨ'ɨn ɨ́ puéerta jetze. 37’Rɨ́'ɨ pu tihua'utévaɨre'esin a'ɨ́mej ɨ́ mej tí'ivaɨre'e tɨ́'ɨj a'ɨ́ɨn hua'useíj mej rachú'eve'e a'atzaj tɨ pua'a uvé'ene a'ɨ́jna tɨ tihuá'aijte'e. Ayee nu hui tejá'amua'ixaate'e tzáahuati'ira'a jɨme'e, ayée pu rɨni a'ɨ́jna tɨ tihuá'aijte'e. A'ɨ́ɨ pu rucaten tɨ ij hua'utévaɨre'en. Ajta tíhua'uta'aíjte'esin mej aúuhuiixɨ'ɨn ɨ́ meesa jetze. Ajta tihuá'amin. 38’Capu amɨ́n a'ij a'atzaj tɨ pua'a uvé'enejsin a'ɨ́jna tɨ tihuá'aijte'e, tɨ pua'a já'ita'a tɨ́ca'a uvé'ene nusu tapuá'arijme'eca. Rɨ́'ɨ pu hui tihua'utévaɨre'esin a'ɨ́mej ɨ́ mej ravaɨre'e tɨ pua'a mauj rachú'eve'e. 39’Ayee nu tejá'amua'ixaate'e tzáahuati'ira'a jɨme'e. A'ɨ́jna ɨ́ ja'atɨ tɨ huatéechi'i, tɨ pua'a a'ɨ́ɨ ramua'areere a'atzaj tɨ pua'a ánú'aiixa ɨ́ nahua'ari, capu raatá'asin tɨ anú'asti tɨ tiu'unáhua'an. 40Seajta hui mú'een, rɨ́'ɨ xu'u sej si rɨ́'ɨ huaújcaten a'iné inee, i nej neajta huá'a jetze airáane ɨ́ teɨte, nee nu uvé'enejsin a'atzaj sej pua'a caí nechu'eve'e. ―Ayee pu tihua'utá'ixaa a'ɨ́jna ɨ́ Jesús. 41Pedro pu ayén tiraata'íhua'uri'i tɨjɨ́n: ―Tavastara'a, ¿ni téjmi pena'a huatá'ixaa i niuucari ca'ɨ́n naíjmi'ica puaatá'ixaa? 42Ajta a'ɨ́ɨn tavástara'a, a'ɨ́ɨ pu ayén tiu'utaniú tɨjɨ́n: ―¿A'ataani pú'een, a'ɨ́jna tɨ tí'ivaɨre'e, tɨ ajta rɨ́'ɨ mé teuúmua'aree, tɨ ajta caí ja'anáj ti'itɨ́j jɨ́n auté'ɨtze? Ajta a'ɨ́ɨn tɨ tí'ira'aijte'e, a'ɨ́ɨ pu hui tiraa'íjcate'en tɨ ij a'ɨ́ɨn a'ɨ́jna jɨ́n antiújmua'areere a'ɨ́mej ɨ́ seica ɨ́ mej majta tí'ivaɨre'e. A'ɨ́ɨ pu tihuá'amin a'atzaj mej pua'a raaxɨ́'epɨ'ɨntare'en mej tiú'ucua'ani. 43- 44’Tɨ́ pua'a ayén rɨjcaa tɨ́'ɨj uvé'enen a'ɨ́jna tɨ tí'ira'aijte'e, rɨ́'ɨ pu tiraatévaɨre'esin a'ɨ́jna tɨ tí'ivaɨre'e a'iné nain pu tiraata'íjcate'esin a'achú tɨ́j ti'itɨ́j tícha'ɨɨ a'ɨ́jna tɨ tí'ira'aijte'e. Ayee pu té'eme. Ayee nu tejá'amua'ixaate'e tzáahuati'ira'a jɨme'e. 45’Mɨ ajta, a'ɨ́ɨn tɨ hui tí'ivaɨre'e, tɨ pua'a ayén tí'imua'ajca yee jé'ecan pu u á'ateere a'ɨ́jna tɨ tinaa'íjca, ayée pu ajta tirá'amitɨejte'e a'ame tɨ caí íiya'ata uvé'enejsin. Tɨ́'ɨj i autéjcheni tɨ hua'utévajxɨ'ɨn a'ɨ́mej ɨ́ mej tí'ivaɨre'e, ɨ́ mej teteca, ajta ɨ́ mé 'uuca. Ajta pu hui autéchesin tɨ tiú'ucua'ani, ajta tɨ nahuáj antiyé'en. Tɨ́'ɨj i huatétahuaisin. 46’Ajta a'ɨ́ɨn tɨ tí'ira'aijte'e, a'ɨ́ɨ pu uvé'enejsin ja'anáj tɨ pua'a caí rachú'eve'e. A'ɨ́ɨ pu xaa uvé'enejsin a'atzaj tɨ pua'a caí pɨ́téjmua'aree. A'ɨ́ɨ pu hui ajta puaíjtzi'ira'a raatá'asin, jeíhua huápɨ'ɨ. Ayee pu che'atá tí'ijcɨ'ɨti a'ij tɨ tihuá'acɨ'ɨti ɨ́ seica ɨ́ mej majta auté'ɨtzeaara ɨ́ Dios jemi. 47’A'ɨ́jna tɨ tí'ivaɨre'e, tɨ ajta tirú'umua'aree a'ij tɨ tí'ijxe'eve'e a'ɨ́jna tɨ tí'ira'aijte'e, jeíhua pu ra'iré'evejsin navij cuaartara'a jɨme'e tɨ pua'a caí rɨ́'ɨ huaújruuren na'ari caí ayén huárɨni a'ij tɨ tí'ijxe'eve'e a'ɨ́jna tɨ tí'ira'aijte'e. 48Ajta a'ɨ́ɨn tɨ tí'ivaɨre'e tɨ ajta caí rú'umua'areereca'a a'ij tɨ tí'ijxe'eve'eca'a a'ɨ́jna tɨ tí'ira'aijte'e, cɨ́j pu'u ra'iré'evejsin navij cuaartara'a jɨme'e tɨ pua'a ayén huárɨni tɨ a'ij pua'a 'een jɨme'e a'iné capu rú'umua'areereca'a a'ij tɨ ye'í huárɨni. Capu ayén tí'ijcɨ'ɨti a'ij tɨ tiraavíjte'e. ’Ayee pu'u xaa ne'u, ja'atɨ tɨ na'a mej miyen tiraatá'a tɨ ve'ecán jɨ́n antiújmua'areere á'ara'ani, tɨ pua'a ayén ve'ecán jɨ́n ti'ité'ijcati'ihua, ayée pu hui tiú'ujxe'eve'e tɨ jaítze'e tiu'utátuiire'en me'ɨ́jna jemi ɨ́ mej tíraa'íjcate. Ajta, ja'atɨ tɨ na'a mej miyen tiraatá'a tɨ cɨliéene'e jɨ́n antiújmua'areere á'ara'ani, tɨ pua'a ayén cɨliéene'e jɨ́n ti'ité'ijcati'ihua, ayée pu che'atá na'a tiú'ujxe'eve'e tɨ cɨ́j tiu'utátuiire'en me'ɨ́jna jemi ɨ́ mej tíraa'íjcate. 49’Ayee nu 'een jɨ́n mú a'uvé'emej nej ni puaíjtzi hua'utá'an ne'ɨ́mej ɨ́ mej a'ij pua'a 'een ɨ́ ru tzajta'a matɨ́j mena'a pua'amé yen mé seijre'e íiyen chaanaca japua. Ajta ayée pu tina'aráanajche ineetzi tɨ ari autéjcheni. 50Ayee pu ajta tí'inecɨ'ɨti ineetzi, ɨ́ nej jɨ́n rajpuaíjtzi na'ame. Jéihua pu hui a'ij pua'a ne'ase, ajta jeíhua pu a'ij pua'a ne'astɨ́ a'ame ajta na'a caí nain te'entipuá'are. 51’¿A'iné tejamuá'amitɨejte'e mú'ejmi? ¿Ni qui ne'ɨ́jna jɨ́n mú a'uvé'emej mej mi rɨ́'ɨ tí'itechejca ɨ́ mej yen huachéjme íiyen chaanaca japua? Canu a'atzu. Ayee nu tejá'amua'ixaate'e yee canu ne'ɨ́jna jɨ́n mú a'uvé'emej sino mej mi já'ita'a a'utácɨɨne. 52Ajta íjii tɨ yú auca'itɨ́ a'ame, ayée pu hui té'eme. A'ɨ́mej jɨme'e ɨ́ mej anxɨ́vi ɨ́ teɨte, ɨ́ mej seɨcɨé mena'a che, ayée pu té'eme a'ɨ́ɨ mú já'ita'a a'utajú'un. Majta á'iyen ɨ́ mej huaíca, a'ɨ́ɨ mú huá'ajaaxɨéevi'ira muá'aju'un a'ɨ́mej ɨ́ mej hua'apua. Majta a'ɨ́ɨme ɨ́ mej hua'apua, ayée mú che'atá mena'a tihúa'ajaaxɨejvi'ira muá'aju'un ɨ́ mej huaíca. 53’Ayee mú já'ita'a a'utajú'un. A'ɨ́ɨ pu ya'upuáara'an rájaaxɨéevi'ira a'ame a'ɨ́jna ɨ́ ruyauj, ajta a'ɨ́ɨn yaujra'an ayée pu che'atá na'a tí'ijjaaxɨéevi'ira a'ame ɨ́ rutáàta. Ajta a'ɨ́ɨn ɨ́ náànajra'an, ayée pu che'atá na'a tí'ijjaaxɨéevi'ira a'ame a'ɨ́jna ɨ́ ruyauj tɨ 'ɨ́ita'a. Ajta a'ɨ́ɨn yaujra'an tɨ 'ɨ́ita'a, ayée pu che'atá na'a tí'ijjaaxɨéevi'ira a'ame a'ɨ́jna ɨ́ runáàna. Ajta a'ɨ́jna ɨ́ mu'uneára'an ɨ́ tɨ 'ɨ́ita'a ɨ́ tɨ ucarij, a'ɨ́ɨ pu ajta rájaaxɨéevi'ira a'ame ɨ́ rumu'un ɨ́ tɨ 'ɨ́ita'a tɨ temuaij. Ajta a'ɨ́jna ɨ́ mu'uneára'an tɨ temuaij, a'ɨ́ɨ pu hui ajta rájaaxɨéevi'ira a'ame ɨ́ rumu'un tɨ ucarij. 54Tɨ́'ɨj i ayén tihua'utá'ixaa a'ɨ́mej ɨ́ teɨte ɨ́ mej a'uun ajteáxɨɨreca'a tɨjɨ́n: ―Jɨ́me'en xu'u jaitɨri huaseíj tɨ a'ijnéj, yéncɨ pújme'en, setɨ́'ɨj si siyen tí'ixaxa'a yee mu'uri huatéviiyi. Ajta, ayée pu tí'irɨneca. 55Na'ari tɨ pua'a huatá'eecare tɨ yeete pújme'en e'itáninei, ayée xu hui tí'ixaxa'a tɨjɨ́n teájxɨcaj pu a'ame. Ajta, ayée pu tí'irɨneca. 56’Mú'een, mɨ sej caí mé uumuámua'aree, mú'een xu siyen raayɨ́'ɨtɨ a'ij sej ye'í tiu'utaxáj a'ij tɨ ti'itɨ́ rɨni ɨ́ júte'e nusu íiyen chaanaca japua. Mɨ́ seajta mú'een, caxu hui a'atzu raayɨ́'ɨtɨ a'ij sej ye'í tiu'utaxáj a'ɨ́jna jɨme'e a'ij tɨ ti'itɨ́ rɨni itejmi jemi a'íjna xɨcájra'a jetze nej yé huatéjvee inee mú'ejmi jemi. 57’Niche'e seɨj tejámuaata'íhua'u. ¿A'iné 'een jɨ́n secaí raaxɨ́'epɨ'ɨntare'en rujɨ́ɨmua'a a'ij tɨ tiraavíjte'e? 58- 59Patɨ́'ɨj pauj huamé'en juye jetze jamuan a'ɨ́jna tɨ muájcha'ɨɨre'e sej raaxɨ́'epɨ'ɨntare'en a'ɨ́jna jemi ɨ́ juees, patá'aj raatáhuavii temua'a naa sej seuj juye jetze raaxɨ́'epɨ'ɨntare'en. Na'ari tɨ pua'a pecaí piyen huárɨni, a'ɨ́ɨ pu hui muá'avi'itɨn ɨ́ jueesi jemi. Tɨ'ɨquí a'ɨ́ɨn juees, a'ɨ́ɨ pu tiu'utátuiire'esin mú'eetzi a'ɨ́jna jemi ɨ́ polisiiya. Ajta a'ɨ́ɨn polisiiya, a'ɨ́ɨ pu mua'iteánajsin. Ayee nu tí'imua'ixaate'e tzáahuati'ira'a jɨme'e, camu hui íiya'ata mua'irátuaasin ajta pena'a caí tiu'unájchita nain jɨme'e a'achú mej muajíjve'en. ―Ayee pu tihua'utá'ixaa.

will be added

X\