San Lucas 10

1A'atzu a'ateevi'i, Jesús pu ajtahua'a seica avé'ejajpuaxɨ ɨ́ mej ayén pua'améca a'achú cumu huaícate japuan tamuáamuata'a ará'ase. A'ɨ́ɨ pu hua'uta'íteca'a hua'apuacajmé'en mej mi anáaté'ee u e'ará'asti nainjapua a'u tɨ na'a mej a'uchéjme, a'u tɨ Jesús huáje'emuáarenche'e. 2Ayee pu tihua'utá'ixaa tɨjɨ́n: ―Mu'iitɨ́ mu'uri tɨ́n á'ujca'ane tɨ Dios tíhua'uta'aíjte'en, aru camu mu'íi a'ɨ́ɨme ɨ́ mej a'ɨ́jna jɨ́n tí'ivaɨre'e mej tihua'utá'ixaate'en ɨ́ niuucari tɨ jɨ́n Dios hua'irájtuaani. A'ɨ́j xu hui jɨ́n siyen tiraatáhuavii ɨ́ tavástara'a ɨ́ tɨ jemin tiu'utátuiire'esin naíjmi'ica jɨme'e ɨ́ mej té'atzaahuate'e, tɨ a'ɨ́ɨn tejámuaata'aíjte'en sej a'ucɨ́jxɨ'ɨn nainjapua a'u mej é'eseijre'e. 3’Sericu mú'een. Ayee nu hui tejámuaata'aíjte'esin sej si huá'a tzajta'a á'ujujhua'ane'en ɨ́ teɨte. Ayee xu seíire'e xá'aju'un matɨ́j cáne'axɨ mej huá'a tzajta'a á'ujujhua'an ɨ́ jɨ́ɨra'ave. 4Caxu hui ca'aní té'epiin sej tumin tzajta'a ucá'an, caxu seajta ca'aní té'epiin sej tiú'ujcɨɨxu te'ucá'an, caxu seajta tiú'uca'acái té'ɨ'ɨpɨ'ɨn. Caxu ja'atɨ teujte'e ɨ́ juye jetze. 5Setɨ́'ɨj chi'ita uteárute, mi'i sej siyen tiraatateújte'en yee: “Rɨ́'ɨ xu yee tí'itechejca.” 6’Seajta tɨ pua'a a'uun é'eseijre'e seɨ́j ɨ́ tevi tɨ xaa rɨ́'ɨ tí'iche, a'ɨ́ɨ xu hui huateáturaasin jemin ɨ́ sej jɨ́n raatateújte. Na'ari caí, ajtahua'a huateáturaasin mú'ejmi jemi ɨ́ sej jɨ́n raatateújte. 7’A'uu xu á'ateere a'ájna chi'ij jetze a'u sej ará'aiixa. Ti'itɨ́j tɨ na'a mej tejá'amuamin, a'ɨ́j xu hui huácua'ani, seajta raayé'en. Ayee xu huárɨni a'iné ayée pu tiraavíjte'e mej tiraanájchite'en a'ɨ́jna ɨ́ tɨ tí'imɨjhuaca. Caxu á'ujujhua'ane'en méyee seajta méyee huá'ache. 8’Setɨ́'ɨj se'uun a'uteárute seɨ́j jetze ɨ́ chajta'a, tɨ pua'a a'ɨ́ɨme amua'ancuré'evi'itɨn, ayée xu huárɨni. Ti'itɨ́ mej án amuaajá'ujmuaniira, a'ɨ́j xu huácua'ani. 9Setá'aj seajta tihuá'uhuaate'en a'ɨ́mej ɨ́ mej ti'icúcui'ijme. Seajta hui siyen hua'utá'ixaate'en yee pu'uri tɨ́mua'a teja'uré'enejsin tɨ Dios nainjapua tiu'uta'aíjta íiyen chaanaca japua. 10- 11’Na'ari, tɨ pua'a mecaí amua'ancuré'evi'itɨn setɨ́'ɨj e'ará'asti seɨ́j jetze ɨ́ chajta'a, ayée xu caaye jetze á'ujujhua'ane'en. Ayee xu hui tihua'utá'ixaate'en yee: “A'ɨ́jna ɨ́ chuej, tɨ muiini tɨ ajtávi'itaxɨ ɨ́ taca'acai jetze, íiye tɨ chajta'a me'ecan, a'ɨ́j tu huatéca'atzɨjxɨ'ɨsin sej si ráamua'aree sej ve'ecán jɨ́n auteájturaa ɨ́ Dios jemi. Capu amɨ́n a'ij sej seri tiú'uruu. Aúche'e pu yerá'aiixa ja'anáj tɨ teja'uré'enejsin tɨ Dios tiu'uta'aíjta nainjapua íiyen chaanaca japua.” Ayee xu hui tihua'utá'ixaate'en. 12’Ayee nu hui tejá'amua'ixaate'e tzáahuati'ira'a jɨme'e. A'ájna xɨcájra'a jetze tɨ́'ɨj yerá'aiixa ɨ́ Dios tɨ ij a'ɨ́ɨn huá'axɨjte'en, jaítze'e mú hui rajpuaíitzi muá'aju'un a'ɨ́ɨme ɨ́ mej caí amua'ancuré'evi'itɨ a'ujna chajta'a mej caí a'ɨ́ɨme ɨ́ mej Sodoma e'echéjme'e. 13’Mɨ sej hui Corazín é'eme'ecan, setá'aj huataújxɨeemɨste'en. Seajta mú'een, mɨ sej Betsaída é'eme'ecan, setá'aj seajta huataújxɨeemɨste'en, a'iné mú'ejmi tzajta'a, jeíhua nu niyen huarɨ́j tɨ huápɨ'ɨ ruxe'eve'e. Mɨ́ seajta mú'een, caxu na'ancuré'evi'itɨ. ’Aru tɨ pua'a niyen huárɨniiche'e huá'a tzajta'a a'ɨ́ɨme ɨ́ mej mejmí'i Tiro a'uchéjme'ecaa o huá'a tzajta'a a'ɨ́ɨme ɨ́ mej mejmí'i Sidón é'echejca'a a'ij nej neri huarɨ́j mú'ejmi jemi, a'ɨ́ɨ mú hui mejmí'i seɨcɨé tiu'umuá'aj á'ame'enche'e. A'ɨ́ɨ mú miyen ucaújchejte'axɨ'ɨnche'e me'ɨ́jna jɨme'e ɨ́ mej jɨ́n custaa tí'ita'ahuaca. A'ɨ́ɨ mú hui majta nasij cáujhuaate'enche'e, majta miyen éene'e mej a'ujrá'aseche'e mej mi ráamua'aree ɨ́ seica ɨ́ teɨte mej meri seɨcɨé tiu'umuá'aj. 14’Silu mú'een, jaítze'e xu hui rajpuaíitzi xá'aju'un mecaí a'ɨ́mej a'ájna xɨcájra'a jetze tɨ Dios ayén tihuá'axɨjte'en. 15’Ari mú'een, mɨ sej Capernaúm é'eme'ecan. ¿A'iné tejamuá'amitɨejte'e mú'ejmi? ¿Ni qui Dios pu amuá'avi'itɨn u júte'e? Capu hui tzɨ́te'e, sino Dios pu amuaja'ucáhua'axɨjsin téte'ɨmua ɨ́ chaanaca jete a'ɨ́jna jɨme'e sej caí na'ancuré'evi'itɨ. ―Ayee pu tiu'utaxájtaca'a a'ɨ́jna ɨ́ Jesús. 16Ajtahua'a pu ayén tihua'utá'ixaa a'ɨ́mej ɨ́ tɨ hua'uta'íteca'a tɨjɨ́n: ―A'ɨ́jna ɨ́ ja'atɨ tɨ ayén á'amuanamua, a'ɨ́ɨ pu hui ajta nenamua ineetzi. Ajta a'ɨ́jna ɨ́ ja'atɨ tɨ amuaata'íti, a'ɨ́ɨ pu ajta neta'íti ineetzi, ajta, a'ɨ́ɨ pu hui raata'íti a'ɨ́jna tɨ tinaata'aíj ineetzi. 17Matɨ́'ɨj mi a'ucɨ́jxɨ a'ɨ́ɨme ɨ́ mé huaícate japuan tamuáamuata'a ará'ase. Matɨ́'ɨj uvé'eneajxɨ, jeíhua mú rútemua'ave'eca'a. Ayee mú tiraata'ixaa tɨjɨ́n: ―Tavastara'a, majta a'ɨ́ɨme ɨ́ tiyaaru'u, a'ɨ́ɨ mú majta te'ará'astijre tetɨ́'ɨj iteen tíhua'uta'aíj aniúucajtze'e. 18Ayee pu tiu'utaniú a'ɨ́jna ɨ́ Jesús tɨjɨ́n: ―Nee nu raaseíj ne'ɨ́jna ɨ́ Satanás tɨ́'ɨj a'ɨ́ɨn u e'icájve u júte'e. Ayee pu hui teje'icájve cumu mej témaxcava'ara'an. 19’Neajta inee, nu'uri tejámua'íjca ne'ɨ́jna jɨme'e sej hua'avé'etziinaxɨ'ɨn se'ɨ́mej ɨ́ cu'ucu'use, ajta se'ɨ́mej ɨ́ teaxcáte sej si tiu'utémua'itɨn. Neajta nu hui tejámua'íjca sej si tiu'utémua'itɨn nain jɨme'e ɨ́ huá'amuarɨ'eri'ira'a a'ɨ́mej ɨ́ mej amuájcha'ɨɨre'e. Capu ti'itɨ́j a'ij á'amuaruuren. 20’Mɨ seajta mú'een, caxu hui se'ɨ́jna jɨ́n huataújtemua'ave'en ɨ́ mej amua'ará'astijre'esin ɨ́ tiyáaru'use sino ayée xu se'ɨ́jna jɨ́n titeetáujtemua'ave'en, jee xaa ne'u, tɨ ari á'ayu'usi'i ɨ́ ta japua a'ij sej hui ante'aruá sej si se'uun auteáturan tɨ́j na'a rusén jɨme'e. ―Ayee pu tihua'utá'ixaa a'ɨ́jna ɨ́ Jesús. 21A'ájná'ɨmua, jeíhua pu huataújtemua'ave a'ɨ́jna ɨ́ Jesús a'íjna jɨme'e tɨ huateájturaa jemin ɨ́ xɨéjniu'ucare'ara'an ɨ́ Dios. Ayee pu tiu'utéjniuu tɨjɨ́n: ―Jeíhua nu rɨ́'ɨ timuaatá'asin, mɨ pej niyá'upua, mɨ pej tí'aijta u ta japua, pajta íiyen chaanaca japua. Ayee nu hui 'een jɨ́n rɨ́'ɨ timuaatá'asin a'iné mú'ee pe raaté'avaata a'íjna ɨ́ niuucari mej mi caí yaú'itɨée muá'araa a'ɨ́ɨme ɨ́ mej jeíhua raayɨ́'ɨtɨ, majta a'ɨ́ɨme ɨ́ mej jeíhua tiú'ujmua'ate. Pajta mú'ee tíhua'utaseíjrate'e a'ɨ́mej ɨ́ mej caí a'ij tí'ijviicua'i. Jee xaa ne'u, mɨ pej niyá'upua, ayée pu hui mua'aránajcheca'a. 22’Nain pu jɨ́n tinaa'íjca ɨ́ niyá'upua. Capu ja'atɨ ramua'aree ja'atɨ nej yaujra'an pú'een. A'ɨ́ɨ pu'u ramua'aree ɨ́ niyá'upua. Capu ja'atɨ ajta ramua'aree ja'atɨ tɨ pú'een ɨ́ niyá'upua. Nee nu'u hui ramua'aree i nej yaujra'an pú'een. Majta a'ɨ́ɨme ramua'aréeren ɨ́ nej hua'utaseíjrate'esin nexɨ́'evi'ira'a jɨme'e. ―Ayee pu tiu'utéjniuu. 23Tɨ'ɨj jí hua'antaseíirajraa ɨ́ mej jamuan á'ujujhua'ane'e. Rujɨ́me'e pu hua'utá'ixa tɨjɨ́n: ―Jé'ecan pu hui rɨ́'ɨ tejamuaatá'a a'ɨ́jna jɨme'e ɨ́ sej seri tí'iseij. 24Ayee nu tejá'amua'ixaate'e. A'ɨ́ɨme ɨ́ mej tí'ixaxa'ata'a ɨ́ Dios jetze me'ecan, majta a'ɨ́ɨme ɨ́ mej títetaté'eca'a rey jɨme'e, mu'iitɨ́ mú raxɨ́'eve'eca'a mej raaseíj a'ij sej tí'iseij mú'een. Majta jeíhua mú raxɨ́'eve'eca'a mej ráanamua a'ij sej seri tí'inamua. Aru capu hui ayén tihua'ucɨ́'ɨ. ―Ayee pu tihua'utá'ixaa a'ɨ́jna ɨ́ Jesús. 25Ja'anáj pu ayén huarɨ́j. Seɨ́j pu ájchee, tɨ tí'imua'ata ɨ́ yu'uxari jetze tɨ Moisés ra'uyú'uxaca'a. Ayee pu tí'itese'eca'a a'ɨ́jna ɨ́ ja'atɨ tɨ ayén tiráacuanamuan tɨ ij a'ɨ́ɨn Jesús ti'itɨ́j jɨ́n auté'ɨtzen. Ayen tɨjɨ́n: ―Maeestru, ¿ti'itáni ruxe'eve'e nej niyen huárɨni tɨ ij náacɨ'ɨti ineetzi nej ruuri ná'ara'ani rusén jɨme'e a'ujna a'u tɨ Dios é'eseijre'e? 26Ayee pu tiu'utaniú a'ɨ́jna ɨ́ Jesús tɨjɨ́n: ―¿A'iné té'eyu'usi'i ɨ́ yu'uxari jetze? ¿Ti'itáani pa'ujíjve'e pe'ɨ́jna jetze ɨ́ yu'uxari? 27Aj pu i ayén tiraata'ixaa tɨjɨ́n: ―Patá'aj nu'u piyen rɨ́'ɨ tirájcha'ɨɨ a'ɨ́jna ɨ́ tavástara'a ɨ́ taDioj nain jɨme'e ɨ́ á'a tzajta'a, pajta nain jɨme'e a'achú pej caj té'aca'ane ɨ́ á'axɨejniu'uca jetze, pajta nain á'axe'evi'ira'a jɨme'e, ajta á'amuarɨ'eri'ira'a jɨme'e. Ajtahua'a pu seɨ́j seijre'e tɨ jɨ́n ayén yee patá'aj nu'u hui piyen che'atá pena'a rɨ́'ɨ tirájcha'ɨɨ ɨ́ axɨ́'ej tevi patɨ́j mú'ee aseɨ́j ti'iti'á'acha'ɨɨ. 28Jesús pu ayén tiraata'ixaa tɨjɨ́n: ―Xɨ́'epɨ'ɨn pej tiraataxájtaca'a. Tɨ́ pua'a piyen huárɨni, a'ij pej hui tiraataxájtaca'a, peruuri pej pua'amé rusén jɨme'e a'u tɨ Dios é'eseijre'e. 29Ajta a'ɨ́ɨn tɨ tí'imua'ataca, a'ɨ́ɨ pu raxɨ́'eve'eca'a mej mi ráamua'aree ɨ́ teɨte tɨ caí ja'anáj auteájturaa ɨ́ Dios jemi. A'ɨ́j pu jɨ́n, ayén tiraata'íhua'uri'i a'ɨ́jna ɨ́ Jesús tɨjɨ́n: ―¿A'ataani pú'een ɨ́ nexɨ́'ej tevi? 30Ajta a'ɨ́ɨn Jesús, ayée pu tiu'utaniú tɨjɨ́n: ―Ja'atɨ pu nu'u Jerusalén e'erájraa. A'uu pu nu'u hui a'ucamé'eca u Jericó. Matɨ́'ɨj nu'u mi nahua'ari ra'antinájcheca'a. Metirá'ari'iri'i ɨ́ cɨ́ɨxure'ara'an. Majta raatéevajxɨ. Matɨ́'ɨj nu'u mi yauutéj ɨ́ juye jetze. Pu'uri á'ame'erejca'a. Majta nu'u me'ɨ́n nahua'ari a'ucɨ́j. 31’A'atzu a'ateevi'i, tɨ́'ɨj nu'u i seɨ́j a'ucamé'eca juye jetze. Puaarij pu hui pú'een a'ɨ́jna. Tɨ'ɨj jí raaseíj tɨ á'ame'erejca'a. Aa pu nu'u ɨmuá a'atanéj ɨ́ juye. Ajta nu'u mú á'ume. 32’Ajtahua'a pu nu'u seɨ́j a'ájna a'ucamé'eca. A'ɨ́ɨ pu nu'u a'ɨ́ɨn pú'een seɨ́j tɨ Leví teecan jetze ajtéme'ecan. A'ɨ́ɨ pu ajta tí'ivaɨre'eca'a hua'atéyujta'a. Tɨ́'ɨj a'uun a'ucáane a'u tɨ auucá'a ɨ́ tɨ á'ame'erejca'a, a'ɨ́ɨ pu ajta nu'u hui raaseíj. Ayee pu che'atá na'a huarɨ́j. Aa pu nu'u ɨmuá a'atanéj. Ajta nu'u mú á'ume. 33’Ajtahua'a pu nu'u seɨ́j a'ucamé'eca. A'ii pu nu'u a'ɨ́ɨn pú'een seɨ́j tɨ seɨj chuéjra'a japua é'eme'ecan tɨ ayén téja'arájtehuaa tɨjɨ́n ɨ́ Samaria. Tɨ́'ɨj aj a'ucamé'eca, a'ɨ́ɨ pu nu'u a'ucáane a'u tɨ auucá'a a'ɨ́jna tɨ á'ame'ere. Tɨ́'ɨj raaseíj, a'ɨ́ɨ pu nu'u rá'ancu'uvajxɨ. 34’Tɨ́'ɨj nu'u i jemin á e'iré'ene. Aj pu i racája'usi á jetzen a'u tɨ tejé'epuaijti'ihuaca'a a'ɨ́jna jɨme'e ɨ́ aceite, ajta u viinu. Ajta nu'u raacá'ijcataxɨ a'u tɨ tejé'epuaijti'ihuaca'a. Aj pu nu'u i ra'avá'ara rucɨ́i japua ɨ́ puuru'u. Tɨ́'ɨj nu'u i ya'uví'itɨ, a'ájna já'ahua'a a'u mej é'e'aseca ɨ́ mej puaseaaruve'e. A'uu pu nu'u yaúutuaa. Temua'a pu nu'u hui rɨ́'ɨ tiraaxá'apuairi'i. 35’Yee ruijmua'a yee, a'ɨ́ɨ pu nu'u hui ru'ita'ɨ́'ɨpɨ hua'apuaca ɨ́ tumin. Ajta raata'ɨ́'ɨpɨi a'ɨ́jna tɨ antiújmua'aree a'ɨ́jna jɨme'e ɨ́ chi'ij. Ayee pu nu'u tiraata'ixaa tɨjɨ́n: “Patá'aj rɨ́'ɨ tiraaxá'apuai. Neajta inee, netɨ́'ɨj uvé'enen, aj nu yeehui muaatá'asin nain a'achú pej caj tiraaxɨ́jte huaatari jɨme'e, ajta ti'itɨ́j tɨ huácuaa.” Ayee pu nu'u hui tiraata'ixaa, a'ɨ́jna ɨ́ Samaria tɨ é'eme'ecan. 36Ajta a'ɨ́ɨn Jesús, ayée pu tiraata'íhua'uri'i tɨjɨ́n: ―¿A'iné timuá'amitɨejte'e, a'íime ɨ́ mej huaíca, a'atani éene'e a'ɨ́ɨn pɨ́rɨcɨ tɨ rɨ́'ɨ tí'itevistáa já'araa amɨ́jna jemi ɨ́ ruxɨ́'ej tevi ɨ́ mej tiraanáhua'iri'i ɨ́ nahua'ari? 37Ajta a'ɨ́ɨn tɨ tí'imua'ataca ɨ́ yu'uxari jetze tɨ Moisés ra'uyú'uxaca'a, ayée pu tiraata'ixaa tɨjɨ́n: ―Ayej ne'ase tɨ a'ɨ́ɨn tɨ rá'ancu'uvajxɨ, a'ii pu a'ɨ́ɨn pú'een ɨ́ tɨ xɨ́'epɨ'ɨn tí'itevij a'ɨ́jna jemi ɨ́ ruxɨ́'ej tevi. Jesús pu ayén tiraata'ixaa tɨjɨ́n: ―Aricu hui, patá'aj piyen huárɨni a'ij tɨ a'ɨ́ɨn huarɨ́j. 38Ajta a'ɨ́ɨn Jesús, majta a'ɨ́ɨme ɨ́ mej jamuan á'ujujhua'ane'e, matɨ́'ɨj mauj huajú'ucaa, a'úu pu a'ará'a a'u tɨ ja'atɨ e'echéjme'e. Ayee pu ántehuaa a'ɨ́jna ɨ́ 'ɨ́ita'a tɨjɨ́n Marta. Tɨ́'ɨj i a'ɨ́ɨn ra'ancuré'evi'itɨ ɨ́ ruche. 39Seɨ́j pu ti'ihuaara'a, ɨ́iitacan. Ayee pu ántehuaa tɨjɨ́n María. Ajta a'ɨ́ɨn María, án pu vejli'i a'ujyeíjxɨ jamuan ɨ́ Jesús. Ranamuájraca'a a'ij tɨ tí'ixajtaca'a. 40Ajta a'ɨ́ɨn ɨ́ Marta, capu a'ij tirá'ateuve'e a'ij tɨ huárɨni a'iné jeíhua pu tí'imuarɨ'eca'a tɨ ij tihua'umín. Tɨ́'ɨj i e'iré'ene jemin ɨ́ Jesús. Ayee pu tiraata'íhua'uri'i tɨjɨ́n: ―Nevástara'a, ¿ni caí á jetze ruxe'eve'e tɨ ne'ihuaara'a ruséɨjtacan yé naatéjtuaa nej ni neseɨ́j tí'imuarɨ'e? Patá'aj hui raatá'ixaate'en tɨ naatévaɨre'en. 41Tavástara'a pu ayén tiu'utaniú tɨjɨ́n: ―Marta, Marta, jeíhua pej tí'imua'atze, pajta jeíhua a'ij té'amua'ate. 42Seɨ́j pu'u hui ruxe'eve'e pej piyen huárɨni. A'ɨ́jna ɨ́ María, a'ɨ́ɨ pu ra'avé'ehuau ɨ́ tɨ jaítze'e rɨ́'en. Neajta inee, canu hui rá'a'ari'ira nemɨ́jna. ―Ayee pu tiraata'ixaa a'ɨ́jna ɨ́ Jesús.

will be added

X\