San Lucas 1

1- 2Mu'iitɨ́ mú meri me'ɨ́jna jɨ́n autéjhuii mej rá'usiɨɨmua'an temua'a naa ti'itɨ́j tɨ a'ij huarɨ́j itejmi jemi, mej mi miyen titaatá'ixaate'en a'ij tɨ éene'e já'araa. A'ii mú a'ɨ́ɨn pú'een ɨ́ mej rujɨ́'ɨ jɨ́n raaseíj, a'ii mú majta me'ɨ́n pú'een ɨ́ mej tiu'utévaɨ mej hua'utá'ixaate'en ɨ́ teɨte ɨ́ niuucari tɨ Dios jemi é'eme'ecan. A'ɨ́ɨ mú majta me'uun a'uté'uuca'a tɨ́'ɨj huataseíjre a'ɨ́jna ɨ́ Jesús tɨ́j na'a yú tɨ e'iré'ene. 3- 4A'ɨ́ɨ mú majta raateájtuaa itejmi jemi me'ɨ́jna ɨ́ niuucari. Mɨ́ neajta inee, a'iné nu'uri á'atee nej niyen tí'inemua'ate temua'a naa ne'ɨ́jna jɨme'e, ayée pu tiná'amitɨejte'eca'a ineetzi tɨ í'ixɨ'epɨ'ɨn nej timuaata'íti'i yu'uxari jetze naíjmi'i tɨ́j na'a ti'itɨ́j tɨ a'ij huarɨ́j pej pi ráamua'aree, mú'ee Teófilo, mɨ pej ve'ecán jɨ́n ti'itéjvee, pej pi piyen tiráamua'aree tɨ ayén ti'ayajna a'ij mej meri timuaatá'ixaa. 5Tɨ́'ɨj a'ɨ́ɨn Heródes auj ti'itéveeca'a rey jɨme'e tɨ́j na'a a'uun tɨ huatacá'a u Judea, áa pu já'ahua'a e'echéjme'e seɨ́j tɨ tí'ivaɨre'e teyujta'a. Ayee pu ántehuaaca'a tɨjɨ́n Zacarías. A'ɨ́mej jetze pu ajtéme'ecan Abiatar mej jetzen huanéj. Ajta a'ɨ́ɨn ɨ́ra'ara'an, ayée pu ántehuaaca'a tɨjɨ́n Elizabét. Ajta, a'ɨ́ɨn, a'ɨ́mej jetze pu ajtéme'ecan Aaron mej jetzen huanéj. 6Rɨ́'ɨ mú tí'iteteɨtestaca'a ɨ́ Dios jemi a'ɨ́ɨme ɨ́ mej hua'apua. Nain mú jɨ́n te'araúraste ɨ́ tɨ tiu'uta'aíjtaca'a ɨ́ tavástara'a, ajta ɨ́ tɨ jɨ́n tihua'íjca. Capu ti'itɨ́j a'ij huá'aturaate'eca'a. 7Mɨ́ majta, camu seɨ́j tiyáujca'a a'iné capu ché'e rɨ'ɨríistaca'a tɨ Elizabét tiyaúj á'ara'ani, a'iné mu'uri jeíhua váujsicɨra'icaa a'ɨ́ɨme ɨ́ mej hua'apua. 8Ayee pu'u ja'anáj tiráaruu a'ɨ́jna tɨ́'ɨj auj ve'ecán jɨ́n tí'ivaɨre'eca'a ɨ́ Dios jemi a'ɨ́jna ɨ́ Zacarías, tɨ́'ɨj raacɨ́'ɨ tɨ tiu'utévaɨre'en u teyujta'a seica jamuan mej tiraatámuaɨ'ɨvejte'en ɨ́ Dios. 9Matɨ́'ɨj mi ra'antíhua'u me'ɨ́jna ɨ́ Zacarías tɨ ij a'ɨ́ɨn uteárute u teyujta'a tɨ́'ij a'uun cuaane'e huátaira ɨ́ tavástara'a jemi a'ij mej tí'ijrɨ'ɨrejca'a. 10Tɨ́'ɨj ari teja'uré'ene a'atzaj mej pua'a ratá'iraca ɨ́ cuaane'e, áa mú e'etiú'uuca'a ɨ́ teɨte á pua'acɨé, meténiuusime'e ɨ́ Dios jemi. 11Aj pu i seɨ́j huataseíjre ɨ́ Zacarías jemi tɨ́'ɨj a'uun teyujta'a unú'ujveeca'a. A'uu pu rɨ'ɨríinta'a pújme'en a'utéveeca'a a'ɨ́jna jetze mej japuan ratá'iraca ɨ́ cuaane'e a'ɨ́jna ɨ́ tevi tɨ huataseíjre ɨ́ Zacarías jemi. 12Tɨ́'ɨj raaseíj, temua'a pu tiu'utátziɨn a'ɨ́jna ɨ́ Zacarías. Jé'ecan pu rátziɨɨne'eca'a. 13Ajta a'ɨ́ɨn tɨ huataseíjre, a'úu pu ta japua tí'ivaɨre'eca'a ɨ́ tavástara'a jemi. Aj pu'i ayén tiraata'ixaa tɨjɨ́n: ―Zacarías, capej tí'itziɨɨne'e. Dios pu ráanamuajri'i a'ij pej tiu'utéjniuu ɨ́ jemin. Ayee pu hui té'eme íjii, mɨ sej naíjmi'i, a'ɨ́jna ɨ́ Elizabét, a'ɨ́ɨ pu tiyaúj a'ame mú'eetzi jemi. Ayee pu nu'u ruxe'eve'e pej nu'u piyen tiraatámua'ati tɨjɨ́n Juan. 14- 15’Jé'ecan rɨ́'ɨ timuaatá'asin, pajta huatá'atemua'ave'esin pe'ɨ́jna jɨme'e ɨ́ pa'arɨ'ɨ. Majta ɨ́ teɨte, jeíhua mú huataújtemua'ave'esin me'ɨ́jna jɨme'e tɨ́'ɨj huanú'ihuan ɨ́ pa'arɨ'ɨ, a'iné ve'ecán pu jɨ́n ti'itevée a'ame ɨ́ tavástara'a jemi. Ché'e nu'u caí nahuáj ye'e nusu tejuin. Tɨ́'ɨj hui huanú'ihuan tɨ yú auca'itɨ́ a'ame, a'ɨ́ɨn xɨéjniu'ucare'ara'an ɨ́ Dios, a'ɨ́ɨ pu jetzen ru'uté'aa. 16Ayee pu ca'aníjra'a hua'utá'asin mu'iicáca a'ɨ́mej ɨ́ mej Israél jetze ajtéme'ecan mej mi majtáhua'a raataxɨ́'eve'en ɨ́ ruvástara'a ɨ́ Dios ɨ́ mej mejmí'i mé rúurɨe. 17’A'ɨ́ɨ pu hui amuacaí huamé'e a'ame caí ɨ́ tavástara'a. Ayee pu che'atá na'a a'ɨ́jna jetze pu araujca'anée a'ame ɨ́ xɨéjniu'ucare'ara'an ɨ́ Dios tɨ́j a'ɨ́ɨn te'araújca'anejca'a ɨ́ Elías a'ɨ́jna tɨ ajmí'i tí'ixaxa'ata'a ɨ́ Dios jetze me'ecan. Ajta ayée pu che'atá na'a te'entiújmua'aréere a'ame tɨ́j te'entiújmua'areereca'a ɨ́ Elías. A'ɨ́ɨ pu rɨ́'ɨ huá'aruuren a'ɨ́mej ɨ́ mej huá'avaujsimua'a pú'een ɨ́ tɨ'ɨríi mej mi majtáhua'a hua'utaxɨ́'eve'en ɨ́ ruyaujmua'a. Majta a'ɨ́ɨme ɨ́ mej caí huá'atzaahuate'e ɨ́ ruvaújsimua'a, a'ɨ́ɨ pu rɨ́'ɨ huá'aruuren mej mi miyen rɨ́'ɨ mé titeumuámua'aree muá'ara'ani matɨ́j a'ɨ́ɨme ɨ́ mej rɨ́'ɨ tí'iteteɨte. Ayee pu huárɨni tɨ́'ij rɨ́'ɨ huá'uruuren ɨ́ teɨte mej mi ra'ancuré'evi'itɨn ɨ́ tavástara'a. ―Ayee pu'u tiraata'ixaa. 18Aj pu i Zacarías ayén tiraata'íhua'uri'i a'ɨ́jna tɨ jemin huataseíjre tɨjɨ́n: ―A'iné ye'í tí'irɨ'ɨri nej ráamua'aree tɨ pua'a ayén ti'ayajna nusu caí, a'iné nu'uri vástacɨra'i inee. Ajta, a'ɨ́ɨn tɨ nee jamuan, pu'uri ajta ucarij. 19Aj pu i a'ɨ́ɨn tɨ tí'ivaɨre'e ɨ́ tavástara'a jemi, ayée pu tiraata'ixaa tɨjɨ́n: ―Ayee nu ántehuaa inee tɨjɨ́n Gabriel. A'uu nu a'utéjvee Dios tɨ é'eseijre'e. A'ɨ́ɨ pu neja'uta'íteca'a nej yetanén, nej ni timuá'ixaate'en ne'íjna jɨme'e ɨ́ niuucari ɨ́ pej jɨ́n huatá'atemua'ave'esin. 20’Tɨ́j íjii, ɨ́ pej caí té'antzaahua a'ij nej timuaatá'ixaa, capej ché'e ataniúuve'e pua'amé. Ni capu ché'e rɨ'ɨríista a'ame pej tiu'utaxáj tɨ yú auca'itɨ́ a'ame ajta na'a caí huanú'ihuan ɨ́ pa'arɨ'ɨ. Aj pu araúrastejsin a'ij nej timuaatá'ixaa. ―Ayee pu tiraata'ixaa a'ɨ́jna ɨ́ Gabriel. 21Majta me'ɨ́n ɨ́ teɨte, méjchu'eve'eca'a me'ɨ́jna ɨ́ Zacarías a'atzaj tɨ huiráame u teyujta'a. Ayee mú tí'iru'ihua'uraca'a a'iquí 'een jɨ́n ari á'atee tɨ mú anú'ujvee. 22Tɨ'ɨj jí xaa huirájraa. Tɨ́'ɨj huirájraa, capu ché'e rɨ'ɨríistaca'a tɨ tiu'utaxáj. Ayee pu'u rumuájca'a jɨ́n tihuá'a'ixaate'eca'a a'iné capu ché'e rɨ'ɨríistaca'a tɨ huatániuni. A'ɨ́j mú jɨ́n ráamua'areeri'i tɨ ti'itɨ́j huataseíjre ɨ́ jemin u teyujta'a. 23Tɨ́'ɨj ra'antipuá'ajte tɨ raacɨ́'ɨ tɨ tiu'utévaɨre'en u teyujta'a, tɨ'ɨquí á'uraa ɨ́ ruche. 24Tɨ'ɨj jí autájucataca'a a'ɨ́jna ɨ́ ɨ́ra'ara'an ɨ́ Elizabét. Aj pu i huateúravaataca'a a'ujna u ruche. Ayee pu á'atee tɨ caí huiráaye'icaa ɨ́ ruchi'itá a'achú cumu anxɨ́j máxcɨra'i jɨme'e. 25Ayee pu tí'imua'ajca tɨjɨ́n: ―Tavastara'a pu hui ayén náaruu ineetzi. Pu'uri ayén tira'aránajcheca'a ayén náaruuren nej ni caí ché'e tí'itevi'ira'a ɨ́ teɨte jemi ne'ɨ́jna jɨme'e nej caí tiyaúj ná'ara'ani. 26Tɨ́'ɨjta tejauumé'eca arájsevi máxcɨra'i, Dios pu raata'íteca'a a'ɨ́jna ɨ́ Gabriel tɨ u a'atanén a'ujna Nazarét, chajta'a tɨ jetzen ajtéme'ecan a'úu tɨ huatacá'a Galilea. 27Raata'íteca'a tɨ u a'atanén áa tɨ é'eche a'ɨ́jna ɨ́ María ɨ́ tɨ ari tɨ́mua'a huatéviche'esin a'ɨ́jna jamuan ɨ́ José, a'ɨ́j tɨ jetzen huanéj ɨ́ David teecan. Capu xɨ ja'atɨ jamuan huáhuii a'ɨ́jna ɨ́ María. 28Tɨ'ɨj jí a'uun a'uteájrupi a'u tɨ é'eche. Aj pu i a'ɨ́ɨn tɨ tí'ivaɨre'e ɨ́ tavástara'a jemi, ayée pu tiraatateújte tɨjɨ́n: ―Aja'ɨmɨ́, María, mɨ pej Dios jemi te'ancuré'asin. Tavástara'a pu á jemi huatéjvee. 29Jé'ecan pu utéevatzɨ ɨ́ tzajta'an tɨ́'ɨj ayén tiraata'ixaa. Jéihua pu tí'imua'ajca a'iquí huataújmua'a ɨ́ niuucari tɨ raataxájtaca'a. 30Tɨ'ɨj jí ayén tiraata'ixaa a'ɨ́jna ɨ́ ja'atɨ tɨjɨ́n: ―Capej tí'itziɨɨne'e, María. Mú'ee pe rɨ́'ɨ raatá'a ɨ́ Dios. 31Mú'ee pe a'utájucata. Mú'ee pe tiyaúj pua'amé, teáatacan. Ayee pej raatámua'ati tɨjɨ́n Jesús. 32Ajta, a'ɨ́ɨ pu ve'ecán jɨ́n ti'itevée a'ame. Ayee mú hui majta raatamuá'amuate'e muá'aju'un tɨjɨ́n Yaujra'an ɨ́ Dios tɨ nain jɨ́n antiújmua'aree. Ajta, Dios tɨ ta'ivástara'a, a'ɨ́ɨ pu raatá'asin tɨ te'enteárute a'ɨ́jna jɨme'e tɨ David teecan jɨ́n ti'itéveeca'a. 33Ajta a'ɨ́ɨn pu tíhua'uta'aíjte'esin tɨ́j na'a rusén jɨme'e a'ɨ́mej jemi ɨ́ mej Jacobo jetze huanéj. Ajta capu ja'anáj íra'antipuá'ari tɨ a'ɨ́ɨn tihuaíte'e a'ame. ―Ayee pu'u tiraata'ixaa. 34Tɨ'ɨj jí ayén tiraata'íhua'uri'i a'ɨ́jna ɨ́ María tɨjɨ́n: ―A'iné tí'irɨ'ɨri tɨ ayén teja'uré'enen a'iné canu ja'anáj teáata'a jamuan huáhuii. 35Ajta a'ɨ́ɨn tɨ tí'ivaɨre'e ɨ́ ta japua, ayée pu tiraata'ixaa tɨjɨ́n: ―A'ɨ́n xɨéjniu'ucare'ara'an ɨ́ Dios, a'ɨ́ɨ pu á jetze rávaɨjtzi. Ajta a'ɨ́jna jɨme'e tɨ muaacánajsin, a'ɨ́j pu jɨ́n, a'ɨ́jna ɨ́ pa'arɨ'ɨ tɨ nu'ihuan, tavástara'a pu huateúra'ate'esin. Ayee mú majta raatamuá'amuate'e muá'aju'un tɨjɨ́n Yaujra'an ɨ́ Dios. 36’Ajta a'ɨ́ɨn a'ihuáara'a, a'ɨ́jna ɨ́ Elizabét, a'ɨ́ɨ pu hui tiyaúj a'ame tɨ́j ajta ari ucarij. Ayee pu tiu'utaxájtaca'a tɨjɨ́n yee tɨ caí ché'e rɨ'ɨrí tiyaúj á'ara'ani. Mɨ́ ajta, pu'uri á'atee arájsevi máxcɨra'i tɨ autájuca. 37’Ayee pu'u, a'iné nain pu tí'irɨ'ɨri ɨ́ Dios jemi. Capu mé'e é'e ti'itɨ́j tɨ muárɨ'eri ɨ́ jemin. 38Tɨ'ɨj jí María ayée tiu'utaniú tɨjɨ́n: ―Nain nu jɨ́n tiraatévaɨre'esin ɨ́ nevástara'a. Ché'e ayén teja'uré'ene a'ij pej peri tinaatá'ixaa. ―Ayee pu tiu'utaxájtaca'a a'ɨ́jna ɨ́ María. Tɨ'ɨj jí á'uraa a'ɨ́jna ɨ́ tɨ tí'ivaɨre'e ɨ́ ta japua. 39A'ájná'ɨmua, ca'anacan pu á'ume ɨ́ María já'ahua'a chajta'a jetze jɨrí tɨ e'evé'eca a'úu tɨ huatacá'a u Judea. 40Tɨ'ɨj jí a'uun a'ará'a a'u tɨ é'eche a'ɨ́jna ɨ́ Zacarías. Tɨ́'ɨj jí a'uteájrupi u chi'ita, aj pu i raatateújte a'ɨ́jna ɨ́ Elizabét. 41Ajta a'ɨ́ɨn ɨ́ Elizabét, tɨ́'ɨj ráanamuajri'i tɨ raatateújte ɨ́ María, tɨ'ɨquí huataújruureajxɨ ɨ́ pa'arɨ'ɨ ɨ́ jucaatze'en. Tɨ'ɨj jí a'ɨ́ɨn xɨéjniu'ucare'ara'an ɨ́ Dios, jemin pu huateájturaa ɨ́ Elizabét jemi. 42Tɨ́'ɨj ayén huarɨ́j, Elizabét pu a'ujca'anéecan jɨ́n raatá'ixaa a'ɨ́jna ɨ́ María. Ayen tɨjɨ́n: ―Dios pu rɨ́'ɨ timuaatá'a mú'eetzi mecaí ɨ́ seica ɨ́ 'uuca. Ajta pu rɨ́'ɨ tiraatá'a ɨ́ pa'arɨ'ɨ tɨ arájca ɨ́ muá'ajucaatze'e. 43’¿A'iné tɨ i Dios ayén rɨ́'ɨ tinaatá'a tɨ ayén mú a'uvé'emej neetzi jemi ɨ́ náànajra'an ɨ́ nevástara'a? 44Jɨ́me'en nu'u ráanamuajri'i pej naatateújte, aj pu i huataújruureajxɨ ɨ́ pa'arɨ'ɨ tɨ arájca ɨ́ nejucáatze'e. A'ɨ́ɨ pu huataújtemua'ave. 45’Rɨ́'ɨ pu timuaatá'a a'iné mú'ee pe rá'atzaahuate'e tɨ ayén araúrasten a'ij tɨ tavástara'a timuaatá'ixaa. ―Ayee pu tiraata'ixaa a'ɨ́jna ɨ́ Elizabét. 46Ajta a'ɨ́ɨn ɨ́ María, ayée pu tiu'utaniú tɨjɨ́n: Jé'ecan pu rɨ́'ɨ tinaateájtuaa ɨ́ ne tzajta'a ɨ́ nevástara'a. 47- 48Ajta nexɨ́ejniu'uca pu rutémua'ave'e ɨ́ Dios jemi tɨ nu'irájtuaa a'iné a'ɨ́ɨ pu ramua'areereca'a ɨ́ nej caí a'ij tí'ijviicua'i, inee i nej ravaɨre'e. Ijii tɨ yú auca'itɨ́ a'ame, naíjmi'i ɨ́ mej teemua, ayée mú tiu'utaxájta neetzi jɨme'e yee Dios pu rɨ́'ɨ tinaatá'a. 49Ayee mú ti'ixáata muá'aju'u me'ɨ́jna jɨme'e tɨjɨ́n pu'uri Dios jeíhua ayén ti'itɨ́j jɨ́n náaruu tɨ i'irɨ́'en a'ɨ́jna jɨme'e ɨ́ tɨ raayɨ́'ɨtɨ ɨ́ rumuárɨ'eri'ire'ara'an jɨme'e. Ché'e rɨ́'ɨ mé'e tejjuá'a á'ara'ani ɨ́ tɨ jɨ́n ántehuaa. 50A'ɨ́ɨ pu huá'acu'uve naíjmi'ica ɨ́ teɨte a'achú mej caj pua'amé ɨ́ mej rá'aste. Tɨ́j mena'a mej amuacaí huataseíjre, tɨ yú auca'itɨ́ a'ame, a'ɨ́ɨ pu huá'ancu'uvajxɨ'ɨsin. 51Ve'ecán pu jɨ́n tiu'umuárɨej ɨ́ rumuárɨ'eri'ire'ara'an jɨme'e. A'ɨ́ɨ pu hua'antimuá'itɨ a'ɨ́mej ɨ́ mej á'ujtzaahuate'e ɨ́ rutevij jɨme'e. 52Ajta a'ɨ́ɨme ɨ́ mej tí'aijta, a'ɨ́ɨ pu huá'ari'iri'i ɨ́ mej jɨ́n títetaté'eca'a. Mɨ́ majta a'ɨ́ɨme ɨ́ mej caí a'ij tí'ijviicua'i, a'ɨ́ɨ pu tihua'anteárujte ve'ecán jɨme'e. 53Ajta a'ɨ́ɨme ɨ́ mej tɨejcuca'a, a'ɨ́ɨ pu rɨ́'ɨ tihua'utá'a ti'itɨ́j jɨme'e tɨ rɨ́'en. Majta a'ɨ́ɨme ɨ́ mej chíjteaani pú'een, a'ɨ́ɨ pu hua'uta'íteca'a mej á'ucɨɨne mecaí ti'itɨ́j anú'a'ɨn. 54A'ɨ́ɨ pu hua'utévaɨ a'ɨ́mej ɨ́ mej Israél jetze é'eme'ecan, a'ɨ́ɨme ɨ́ mej ravaɨre'e. A'ɨ́ɨ pu ra'utámua'areeri'i ɨ́ tɨ jɨ́n te'ataújratziiri'i nu'u huá'ancu'uvajxɨ'ɨn tɨ́j na'a rusén jɨme'e a'ɨ́mej ɨ́ mej Abraham jetze airáane. 55Ayee pu tiuju'urɨ́j a'ij tɨ ajmí'i tihua'utá'ixaa a'ɨ́mej ɨ́ tavaújsimua'a teecan. Ayee pu tiu'utaxájtaca'a a'ɨ́jna ɨ́ María. 56Ajta, a'ɨ́ɨn ɨ́ María, a'úu pu á a'uteájturaa a'achú cumu huaíca máxcɨra'i jamuan ɨ́ Elizabét. Tɨ'ɨj jí á'uraa ɨ́ ruche. 57Tɨ́'ɨjta teja'uré'ene tɨ tiyaúj á'ara'ani ɨ́ Elizabét, teáatacan pu tiyaúj já'araa. 58Majta ɨ́ teɨte ɨ́ mej vejli'i antachéejme'ecaa, majta ihuáamua'ame'en ɨ́ pa'arɨ'ɨ vaújsimua'a, a'ɨ́ɨ mú curé'ecɨjxɨ matɨ́'ɨj ráamua'areeri'i tɨ rá'ancu'uvajxɨ ɨ́ tavástara'a. Aj mú mi huataújtemua'ave ɨ́ jemin. 59Tɨ́'ɨj tejauumé'eca aráhuaica xɨca jetze tɨ huanú'ihuaca'a, a'ɨ́ɨ mú á'uju'un mej mi ra'antisíjche ɨ́ naviira'an ɨ́ pa'arɨ'ɨ. Majta, ayée mú raatamuá'amuacujca'a tɨ́j ántehuaaca'a ɨ́ táàtajra'an ɨ́ pa'arɨ'ɨ. 60Ajta a'ɨ́ɨn náànajra'an, ayée pu tihua'utá'ixaa tɨjɨ́n: ―Capu ayén ántehuaa a'ame tɨjɨ́n Zacarías, ayée pu'u ántehuaa a'ame tɨjɨ́n Juan. 61Matɨ́'ɨj mi miyen tiraata'ixaa tɨjɨ́n: ―A'iné tɨ i. Capu mé'e ja'atɨ tɨ ayén ántehuaa tɨ ajtéme'ecan mú'ejmi jemi. 62Matɨ́'ɨj mi rumuájca'a jɨ́n raata'íhua'uri'i ɨ́ táàtajra'an mej mi ráamua'aree a'ij tɨ ye'í tí'ijxe'eve'e tɨ ayén ántehuaa á'ara'ani. 63Ajta a'ɨ́ɨn táàtajra'an, a'ɨ́ɨ pu ti'itɨ́j taabla hua'utáhuaviiri'i tɨ jetzen ra'uyú'uxan a'ij tɨ ántehuaa a'ame. Aj pu i ayén tira'utéyu'uxaca'a tɨjɨ́n: “Ayee pu ántehuaa tɨjɨ́n Juan.” Jé'ecan mú naa rɨ́'ɨ tira'utaseíj ɨ́ teɨte. 64Jɨ́me'en pu'u ayén tira'utéyu'uxaca'a, aj pu i huatárɨ'ɨristareca'a tɨ tiu'utaxáj. Tɨ́'ɨj i a'utéjche tɨ huatéjniuuni ɨ́ Dios jemi; rɨ́'ɨ pu tiraatá'aca. 65Tɨ́'ɨj ayén tiuju'urɨ́j, jé'ecan pu utéevatzɨ ɨ́ huá'a tzajta'a a'ɨ́mej ɨ́ mej á vejli'i antachéejmee. Ajta nainjapua a'uun tɨ jɨrí a'ucaíjmee, Judea tɨ jetzen ajtéme'ecan, jeíhua mú tí'iru'ixaate'eca'a a'ij tɨ ti'itɨ́ huarɨ́j. 66Ja'atɨ tɨ na'a tɨ ráamua'areeri'i, ayée pu tí'ihua'uca'a tɨjɨ́n: ―¿Ti'itaqui pu'éene'e a'ame a'ɨ́jna ɨ́ pa'arɨ'ɨ? Ayee mú tí'ihua'uca'a, a'iné tavástara'a pu ravaɨre'eca'a ɨ́ pa'arɨ'ɨ. 67Ajta a'ɨ́ɨn xɨéjniu'ucare'ara'an ɨ́ Dios, Zacarías pu jemin huateájturaa, ɨ́ tɨ táàtajra'an pú'een ɨ́ pa'arɨ'ɨ. Tɨ'ɨj jí ayén tiu'utaxájtaca'a ɨ́ Dios jetze me'ecan. 68Ayen tɨjɨ́n: Miche'e rɨ́'ɨ tiraatá'an ɨ́ tavástara'a, ɨ́ huá'a Dios a'ɨ́ɨme ɨ́ mej Israél jetze ajtéme'ecan, a'ɨ́jna jɨme'e tɨ ari huataseíjre, ajta ari hua'irájtuaa ɨ́ ruteɨ́testemua'a. 69A'ɨ́ɨ pu hui seɨ́j te'enteárute, seɨ́j tɨ huá'a jetze ajtéme'ecan ɨ́ teɨtestemua'ame'en ɨ́ David teecan. A'ɨ́ɨ pu tu'irátuaasin itejmi ɨ́ rumuárɨ'eri'ire'ara'an jɨme'e. 70Ayee pu Dios ajmí'i te'ataújratziiri'i. Ayee mú tiu'utaxájtaca'a a'ɨ́ɨme ɨ́ mej Dios jetze me'ecan tí'ixaxa'ata'a, a'ɨ́ɨme ɨ́ tɨ Dios huateúra'ate. 71Ayee pu hui huarɨ́j tɨ ij tu'irájtuaani, mej mi caí taamuá'itɨn a'ɨ́mej ɨ́ mej tájcha'ɨɨre'e, naíjmi'i a'achú mej pua'amé ɨ́ mej caí taseíjracu. 72Ayee pu ajta huarɨ́j tɨ ij hua'acu'uvée ɨ́ tavaújsimua'a teecan, ajta tɨ ij ra'utámua'aree ɨ́ niuucari tɨ hua'utá'a tzáahuati'ira'a jɨme'e, tɨ mé'e jauu'á'a ɨ́ tɨ jɨ́n ti'ihuaúrijca. 73- 75Ayee pu te'ataújratziiri'i tzáahuati'ira'a jɨme'e a'ɨ́jna jemi ɨ́ tayá'upuacɨ'ɨ, a'ɨ́jna ɨ́ Abraham teecan, tɨ ij tu'irájtuaani a'ɨ́mej jemi ɨ́ mej tájcha'ɨɨre'e, mej mi caí ta'antipuá'ajte'en, tej tij raatévaɨre'en tej caí tí'itziɨɨne'e, tej ti tiyen urarɨ́'ene'e tá'ara'ani ɨ́ tatzajta'a, tetá'aj tiyen xɨ́'epɨ'ɨn rɨjcaa ɨ́ Dios jemi nain xɨcaj tzajta'a, a'achú tej pua'a á'ateeri. 76Pajta mú'ee niyauj, ayée mú muaatámua'atzi tɨjɨ́n Tɨ́ tí'ixaxa'a a'ɨ́jna jetze me'ecan ɨ́ tɨ nain jɨ́n antiújmua'aree. A'iné mú'ee pe amuacaí huamé'e pua'amé caí ɨ́ tavástara'a patá'aj rɨ́'ɨ huá'uruuren ɨ́ teɨte. 77Mú'ee pe tihua'utá'ixaate'esin a'ɨ́mej ɨ́ teɨtestemua'ame'en ɨ́ tavástara'a a'ij tɨ a'ɨ́ɨn tihua'irátuaasin, a'ɨ́jna jɨme'e tɨ tíhua'utá'uuni'ira ɨ́ mej jɨ́n auteájturaa ɨ́ Dios jemi. 78- 79Ayee pej rɨni a'iné jé'ecan pu tá'acu'uve ɨ́ taDioj. Amɨ́ pu yé ve'ecánejsin íiyen chaanaca japua tɨ́'ij táamuaare itejmi. A'uu pu hui nain xɨcaj tzajta'a tátzave'e a'ame tɨ ij huanéeri'icɨ́ á'ara'ani temua'a naa a'ɨ́mej jemi ɨ́ mej huachéjme tɨ́ca'amiste'e, a'ɨ́mej jemi ɨ́ mej tí'itziɨɨne'e a'ájna xɨcájra'a mej jetzen cui'ini, mej yee cumu tɨ́ca'amiste'e mú seijre'e. A'ɨ́ɨ pu ajta taatá'itɨira tej ti rɨ́'ɨ tí'itechejca. Ayee pu tiu'utaxájtaca'a a'ɨ́jna ɨ́ Zacarías. 80Ajta a'ɨ́ɨn ɨ́ pa'arɨ'ɨ, a'ɨ́ɨ pu huavé'ese. Ajta ru tzajta'a huateújca'ane. A'uu pu é'echejca'a a'u tɨ caí mé'e é'e ti'itɨ́j ajta na'a caí huataseíjre'en jéjre'e a'ɨ́mej jemi ɨ́ mej Israél jetze ajtéme'ecan.

will be added

X\