Santiago 4

1Ayee pu tí'irɨneca mú'ejmi tzajta'a. Xu'uri já'ita'a a'utacɨ́'ɨca, seajta runé'usi'ite'e. ¿A'uné jetze e'iraaye'i a'ɨ́jna tɨ ca'aníjra'a amuatá'aca sej si siyen rɨcɨ? ¿Ni caí a'uun e'iraaye'i ɨ́ a'amua tzajta'a? Jee xaa ne'u, a'ɨ́ɨ pu pɨ́rɨcɨ ɨ́ á'amuamua'atziira'a tɨ ayén ca'aníjra'a amuatá'aca sej runé'usi'ite'e. 2Ayee xu raxɨ́'eve'e sej jeíhua tí'ijcha'ɨɨca. Mɨ seajta caí, caxu siyen tí'ijcha'ɨɨ. A'ɨ́j xu jɨ́n siyen tí'itecui'ica. Seajta jeíhua huápɨ'ɨ tí'inecua'atze. Mɨ seajta mú'een, caxu siyen rá'acu'uvijre'e. A'ɨ́j xu jɨ́n siyen autéjhuiica sej runé'usi'ite'en, seajta rújaaxɨejvi'i. Ayee xu 'een jɨ́n secaí tí'ijcha'ɨɨ se'ɨ́jna jɨme'e sej caí siyen rahuauhuau ɨ́ Dios jemi. 3Na'ari caí, tɨ pua'a siyen raatáhuavii, capu ayén tejamuaatá'aca a'ɨ́jna jɨme'e sej caí siyen jé'iyecan jɨ́n raatáhuaviiri'i, a'iné ayée xu éeni'icɨ'e raxɨ́'eve'eca'a sej si ché'e sena'a raaxɨ́jte'en a'ij tɨ tejamuá'amitɨejte'eca'a, sej si se'ɨ́jna jɨ́n huataújtemua'ave'en. 4Mɨ sej siyen ruxána'acɨre'e, ¿ni tzaa secaí siyen ramua'aree a'ij tɨ seijre'e ɨ́ Dios jemi? Tɨ pua'a ja'atɨ ayén hua'ajtéjaahuate'en a'ɨ́mej ɨ́ mej íiyen chaanaca japua huachéjme, tɨ pua'a ayén che'atá na'a huárɨni a'ij mej tí'ijrɨ'ɨre, a'ɨ́ɨ pu ajta ayén éeni'icɨ'e huateáturan ɨ́ Dios jemi tɨ seɨj tɨ rájcha'ɨɨre'e. A'ɨ́j pu jɨ́n, tɨ pua'a ja'atɨ ayén raxɨ́'eve'e tɨ hua'ajtéjaahuate'en temua'a naa a'ɨ́mej ɨ́ mej íiyen seijre'e ɨ́ chaanaca japua, a'ɨ́ɨ pu ajta ayén éene'e a'ame tɨ́j seɨj tɨ rájcha'ɨɨre'e ɨ́ Dios. 5Jee xaa ne'u, ayée pu ti'ayajna. Na'ari caí, capu ti'itɨ jɨ́n a'ij huataújmua'a a'ɨ́jna ɨ́ niuucari tɨ ari á'ayu'usi'i, ayén tɨjɨ́n: “Jé'ecan pu chueere'e a'ɨ́jna jemi ɨ́ xɨéjniu'ucare'ara'an tɨ ayén raateájtuaa itejmi tzajta'a.” 6Mɨ ajta a'ɨ́ɨn Dios, ayée pu jaítze'e rɨ́'ɨ titatá'aca tej ti tiyen ra'ará'astijre'en. A'ɨ́j pu jɨ́n, ayén té'eyu'usi'i tɨjɨ́n: “Dios pu ayén huá'ajcha'ɨre'e a'ɨ́mej ɨ́ mej á'ujtzaahuate'e. Mɨ ajta, a'ɨ́ɨ pu rɨ́'ɨ tihua'atá'aca a'ɨ́mej ɨ́ mej ruxɨeemɨ́jte'e ɨ́ jemin.” 7A'ɨ́j pu jɨ́n, setá'aj siyen ra'ará'astijre'en ɨ́ Dios. Setá'aj seajta rájcha'ɨɨre'e se'ɨ́jna ɨ́ tiyaaru'u. Tɨ pua'a siyen huárɨni, aj pu xaa tíchesin mú'ejmi jemi. 8Setá'aj ajteáxɨɨre vejli'i ɨ́ Dios jemi. Tɨ pua'a siyen huárɨni, aj pu 'i Dios ajta huateáturaasin vejli'i mú'ejmi jemi. Setá'aj caí ché'e ti'itɨ jɨ́n a'ij rɨjca tɨ a'ij pua'a seijre'e, mɨ sej até'ɨtzea'ara ɨ́ Dios jemi. Seajta, setá'aj raatátuiire'en ɨ́ á'amuaxɨejniu'uca ɨ́ Dios jemi tɨ ij a'ɨ́ɨn ayén huateúra'ate'en mú'ejmi, mɨ sej siyen ruseijrata sej nu'u caí ti'itɨj jɨ́n até'ɨtzea'ara ɨ́ Dios jemi. 9Setá'aj a'ij pua'a te'utaújmua'ati se'ɨ́jna jɨme'e ɨ́ sej jɨ́n auteájturaa ɨ́ Dios jemi, setá'aj seajta huataújxɨeemɨste'en, seajta huaújyeinixɨ'ɨn. Setá'aj caí ché'e siyen ti'itɨj jɨ́n na'anaa sino setá'aj siyen huataújxɨeemɨste'en se'ɨ́jna jɨme'e a'ij sej sejmí'i rɨjcaa. Setá'aj seajta caí ché'e huá'a jemi rutémua'ave'e sino ché'e ayén a'ij pua'a amuaatá'asti. 10Setá'aj siyen ruyeine setira'ará'astijre'en ɨ́ tavástara'a jemi. Tɨ pua'a siyen huárɨni, aj pu 'i rɨ́'ɨ tejámuaatétuaasin. 11Caxu a'ij pua'a tiú'ujxajta seɨj seajta seɨj, ne'ihuaamua'a, a'iné tɨ pua'a ja'atɨ ayén a'ij pua'a tí'ijxajta ɨ́ ru'ihuaara'a, na'ari ayén rá'axɨjte'e, a'ɨ́ɨ pu ajta a'ij pua'a tí'ijxa a'ɨ́jna ɨ́ yu'uxari ɨ́ mej jɨ́n tí'aijta. A'ɨ́ɨ pu ajta ayén ruseɨ́j raaxɨ́'epɨ'ɨntare tɨ caí ché'e ti'itɨ vaɨre'e a'ɨ́jna ɨ́ niuucari. Seajta mú'een, tɨ pua'a siyen rujɨ́ɨmua'a sena'a raaxɨ́'epɨ'ɨntare'en tɨ caí ché'e ti'itɨ vaɨre'e ɨ́ niuucari ɨ́ mej jɨ́n tí'aijta, caxu ché'e siyen rá'astijre'e a'ij tɨ tiraavíjte'e sino xu'uri siyen huaújruu tɨ́j a'ɨ́ɨme ɨ́ mej tí'ixɨ'epɨ'ɨntare'e. 12Mɨ ajta, seɨj pu'u a'ɨ́ɨn pú'een tɨ ayén raateájtuaa a'ɨ́jna ɨ́ niuucari ɨ́ mej jɨ́n tí'aijta. Ajta, a'ii pu a'ɨ́ɨn pú'een tɨ ajta seɨj na'a ayén tí'ixɨ'epɨ'ɨntare'e. A'ɨ́ɨ pu'u na'a raayɨ́'ɨtɨ tɨ amua'irájtuaani, ajta ayén che'atá na'a, a'ɨ́ɨ pu'u na'a raayɨ́'ɨtɨ tɨ amua'antipuá'ajte'en. Tɨ pua'a ayén, ¿a'iné 'een jɨ́n piyen tí'imua'atze pej pe'ɨ́jna jɨ́n antí'amua'aree pe'ɨ́jna jɨme'e pej piyen rá'axɨjte'e ɨ́ a'ihuáara'a? 13Rɨ́'ɨ xu'u mú'een, mɨ sej siyen tí'ixaxa'a tɨjɨ́n sej nu'u se'uun á'uju'u xá'aju'un íjii nusu ruijmua'a já'ahua'a chajta'a jetze, sej nu'u se'uun siyen á'ateeri a'achú cumu seɨ́j nine'ira'a sej ti'itɨj jɨ́n teja'umuárɨ'en sej si se'ɨ́jna jɨ́n tumin huamuá'itɨn. 14Ayee xu tí'ixaxa'a a'ij sej huárɨni. Mɨ seajta mú'een, caxu ramua'aree a'ij tɨ té'eme ruijmua'a, tɨ pua'a seuj ruuri xá'aju'un nusu secaí. Ayee xu 'een tɨ́j a'ɨ́jna pɨxcaari tɨ a'atzu a'ateevi'i huataseíjre'esin, ajta á'iyen a'upuá'arixɨ'ɨsin. 15A'ɨ́j pu jɨ́n ayén tiraavíjte'e sej siyen tiu'utaxáj yee tɨ pua'a nu'u a'ɨ́ɨn tavástara'a ayén amuatá'acare'en, sej siyen ruuri huateáturaasin, aj xu si seajta siyen huárɨni ti'itɨ jɨme'e nusu ɨ́ seɨj jɨme'e. 16Mɨ seajta mú'een, caxu siyen tí'ixaxa'a sino ayée xu á'ujtzaahuate'e se'ɨ́jna jɨme'e a'ij sej rujɨ́ɨmua'a sena'a a'ij tirájteu. A'ɨjna ɨ́ sej jɨ́n á'ujtzaahuate'e, tɨ́j na'a pua'amé tɨ ayén 'een, ayée pu a'ij pua'a seijre'e ɨ́ Dios jemi. 17Ajta, ja'atɨ tɨ na'a tɨ ayén rú'umua'aree a'ij tɨ tiraavíjte'e tɨ ayén huárɨni ti'itɨ jɨme'e, a'ɨ́ɨ pu auteáturaasin ɨ́ Dios jemi tɨ pua'a caí ayén huárɨni.

will be added

X\