Santiago 1

1Inee Santiago, i nej tí'ivaɨre'e ɨ́ Dios jemi, neajta ne'ɨ́jna ɨ́ tavástara'a jemi, a'ɨ́jna ɨ́ Jesús tɨ ajta Cɨríistu'u pú'een, ayée nu ne'íjna jetze tejá'amuateujte'e, mɨ sej huá'a jetze ajtéme'ecan a'ɨ́mej ɨ́ teɨtejra'a ɨ́ mej huá'a jetze airaújneijte a'ɨ́mej ɨ́ huá'avaujsimua'acɨ'ɨ ɨ́ mej tamuáamuata'a japuan hua'apua ará'ase, seajta mɨ tɨ Dios amuaaré'e'itixɨ a'u tɨ na'a seɨ́j chuéjra'a japua. 2Tɨ pua'a ayén tejamuáacɨ'ɨti tɨ́j na'a a'ɨ́jna ɨ́ sej jɨ́n á'aviicua'ire'e, setá'aj siyen tiú'umua'ati tɨ xɨ́'epɨ'ɨn 'een, setá'aj seajta se'ɨ́jna jɨ́n huataújtemua'ave'en. 3Ayee xu huárɨni, a'iné xu'uri ramua'aree tɨ pua'a ayén a'ɨ́jna jɨ́n amuáaruuren tɨ ij Dios ayén amuaatéeseij tɨ pua'a siyen rá'astijre'e nusu secaí, a'ɨ́ɨ pu ajta ayén á'amuaruuren sej si te'utáviicua'i. 4Setá'aj seajta siyen rɨ́'ɨ ráaruuren sej si nain jɨ́n te'utáviicua'i, a'iné setɨ́'ɨj siyen se'ɨ́jna jɨ́n huarɨ́n, ayée xu nain jɨ́n araúrastejsin ɨ́ Dios jemi, seajta siyen runaíjmire'en. Capu ti'itɨ tejamua'utéturaate'esin. 5Tɨ pua'a rá'aturaate'e seɨ́j tɨ ij naa tirú'umua'areere a'ij tɨ ye'í huárɨni, ché'e a'ɨ́ɨn ayén raatáhuavii ɨ́ Dios. Ajta a'ɨ́ɨn Dios, ayée pu a'ɨ́jna jɨ́n raatá'asin, a'iné a'ɨ́ɨ pu ruxɨ́'evi'ira'a jɨ́n jeíhua huápɨ'ɨ tihua'atá'aca ɨ́ ruteɨ́testemua'a. Ajta, a'ɨ́ɨ pu caí hua'ajteá'axɨ'ɨsin. 6Mɨ ajta, ché'e a'ɨ́ɨn ɨ́ ja'atɨ ayén a'ɨ́jna tiraatáhuavii a'ɨ́jna jɨme'e tɨ ayén ti'ayajna tɨ xaa té'atzaahuate'e, icu. Ché'e a'ɨ́ɨn caí a'ij mé'e tejé'eti'itɨɨtan, a'iné a'ɨ́jna ɨ́ ja'atɨ tɨ xaa a'ij pu pua'a na'a tirá'amitɨejte'e, ayée pu che'atá na'a 'een tɨ́j ajta 'een ɨ́ jaj tɨ aujruuréjvee ɨ́ eeca jɨme'e. 7- 8Capu a'atzu xɨ́'epɨ'ɨn mé teuúmua'aree a'ɨ́jna ɨ́ ja'atɨ a'ɨ́jna jɨme'e tɨ hua'apuaca jɨ́n á'ujca'ane tɨ ij ayén huárɨni. Capu a'atzu ayén tirá'amitɨejte'e a'ij tɨ huárɨni ti'itɨj jɨme'e. Ajta ja'atɨ tɨ ayén 'een, capu a'atzu ra'ancuré'asin ɨ́ tavástara'a jemi. 9Ajta a'ɨ́ɨn ɨ́ ta'ihuaara'a tɨ caí a'ij tí'ijviicua'i, ché'e a'ɨ́ɨn a'ɨ́jna jɨ́n huataújtemua'ave'en a'ɨ́jna jɨme'e tɨ Dios ayén jeíhua huápɨ'ɨ rɨ́'ɨ tiraatá'asin. 10Ajta a'ɨ́ɨn ɨ́ ta'ihuaara'a tɨ ajta chíjteaani pú'een, ché'e a'ɨ́ɨn ayén rɨ́'ɨ tiratá'acare'en ɨ́ Dios a'ɨ́jna jɨme'e tɨ ayén tiráacɨ'ɨti a'ɨ́jna tɨ raatatévi'iraste'esin. A'ɨ́ɨ pu xaa ayén che'atá na'a tiu'utépua'ari tɨ́j ajta a'ɨ́jna ɨ́ xuuxu'u tɨ tu'upi jetze xuta'a. 11Jee xaa, tɨ́'ɨj u e'ijnén ɨ́ xɨcaj, a'ɨ́ɨ pu 'i a'ɨ́ɨn tu'upi ayén huatéhuasin ɨ́ xɨcaj jɨme'e. Ajta a'ɨ́ɨn xuuxu'ura'an, a'ɨ́ɨ pu cávatzɨjsin. Ayee pu 'i tiu'utépua'ari ɨ́ tɨ jɨ́n naa seijre'eca'a. Ayee pu che'atá na'a tí'ijruuren a'ɨ́jna ɨ́ chíjteaani. A'ɨ́ɨ pu á'apua'aren nain jɨme'e tɨ jeíhua huápɨ'ɨ tí'ijcha'ɨɨca'a. 12Rɨ́'ɨ pu tiraatá'aca a'ɨ́jna ɨ́ ja'atɨ tɨ pua'a ayén rá'aviicua'i a'ɨ́jna tɨ ca'aníjra'a ratá'aca tɨ ayén huárɨni tɨ a'ij pua'a een ɨ́ Dios jemi, a'iné tɨ́'ɨj ari ayén te'utáviicua'i a'ɨ́jna tɨ jɨ́n raatamuárɨ'eriste, Dios pu ayén tiraatá'asin a'ɨ́jna tɨ ayén raamuá'itɨ, tɨ ayén ruurican huateáturan a'u tɨ Dios é'eseijre'e tɨ́j na'a rusén jɨme'e. Ayee pu a'ɨ́jna jɨ́n te'ataújratziiri'i ɨ́ Dios tɨ ayén hua'utá'asin naíjmi'ica a'ɨ́mej ɨ́ mej miyen raxɨ́'eve'e me'ɨ́jna ɨ́ Dios. 13Tɨ pua'a ayén ca'aníjra'a tiraatá'aca seɨ́j ɨ́ ja'atɨ tɨ ayén ráaruuren a'ɨ́jna tɨ a'ij pua'a een ɨ́ Dios jemi, ché'e caí a'ɨ́ɨn ayén tiu'utaxáj yee Dios pu ayén ca'aníjra'a raatá'aca tɨ́'ij ayén huárɨni a'iné capu rɨ'ɨrí tɨ Dios ayén ca'aníjra'a raatá'an tɨ i a'ɨ́ɨn ja'atɨ ayén a'ij pua'a huárɨni. Jee xaa ne'u, capu ajta a'atzu rɨ'ɨrí tɨ ja'atɨ ayén ca'aníjra'a raatá'an ɨ́ Dios tɨ́'ij a'ɨ́ɨn Dios ayén huárɨni a'ɨ́jna tɨ a'ij pua'a een. Ajta a'ɨ́ɨn ɨ́ Dios, capu ja'anáj ayén ca'aníjra'a tiraatá'aca ɨ́ ja'atɨ tɨ́'ij a'ɨ́ɨn ja'atɨ ayén huárɨni a'ɨ́jna tɨ a'ij pua'a een. 14Mɨ ajta, tɨ pua'a ayén ca'aníjra'a raatá'an ɨ́ ja'atɨ tɨ ayén huárɨni a'ɨ́jna tɨ a'ij pua'a een ɨ́ Dios jemi, ayée pu xaa a'ɨ́jna jetze á'ujca'ane a'ɨ́jna jetze ɨ́ ruxɨ́'evi'ira'a tɨ jetzen airáninei ɨ́ tzajta'an. A'ɨ́ɨ pu a'ɨ́jna jɨ́n á'ujca'ane tɨ ayén tirá'amitɨejte'e tɨ naa seijre'e a'ɨ́jna ɨ́ ti'itɨ tɨ a'ij pua'a een. 15Jɨ́me'en pu'u ayén raaxɨ́'epɨ'ɨntare tɨ ayén huárɨni, aj pu 'i ayén auteáturaasin ɨ́ Dios jemi. Ajta, tɨ pua'a ari huataújnaijmire'en a'ɨ́jna tɨ a'ij pua'a een ɨ́ Dios jemi, aj pu 'i mɨ'ɨni a'ɨ́jna ɨ́ ja'atɨ tɨ a'uté'ɨtzee ɨ́ Dios jemi. 16Ne'ihuaamua'a, mɨ nej jeíhua huápɨ'ɨ já'amuaxe'eve'e, caxu huataúra'an tɨ ja'atɨ ti'itɨ jɨ́n amuaacuanamuan. 17Tɨ́j na'a tɨ xɨ́'epɨ'ɨn 'een, tɨ ajta caí ti'itɨ jɨ́n á'atura tɨ ayén rɨ́'ɨ tejamuáacɨ'ɨti ja'anáj tɨ na'a, a'úu pu é'eme'ecan u ta japua, a'ɨ́jna jemi ɨ́ tej rájya'upua, a'ɨ́jna tɨ nain tiú'utaahuaca'a a'ɨ́jna tɨ ayén tí'itatzave'e tɨ júte'e é'eseijre'e. Mɨ ajta, a'ɨ́jna jemi, ja'anáj tɨ na'a pu ayén che'atá na'a tí'iseijre'e itejmi jemi. Capu a'atzu seɨcɨé ruruurejca, capu ajta ayén ráaruurejsin tɨ́'ij ayén huatétɨca'are itejmi jemi. 18Ruxɨ́'evi'ira'a pu jɨ́n, ayén taatá'a tej tiyen huataseíjre'en ɨ́ chaanaca japua a'ɨ́jna jɨme'e tɨ téjmi jemi raateájtuaa ɨ́ runiuuca tɨ tzáahuati'ira'a jɨ́n seijre'e. Ayee pu 'een jɨ́n huarɨ́j tej ti tiyen che'atá tena'a éeni'icɨ'e seijre'e tá'ara'ani tɨ́j ajta a'ɨ́jna tɨ amuacaícan jɨ́n huataseíjre ɨ́ eloote ɨ́ mej majta ratatú'irihua'a mú á'aye'i ɨ́ Dios jemi. 19- 20A'ɨ́j pu jɨ́n, setá'aj siyen ráamua'aree a'ij sej ye'í huárɨni, ne'ihuaamua'a, mɨ nej já'amuaxe'eve'e. Rɨ́'ɨ xu'u, sej si ráanamua temua'a naa. Mɨ seajta, caxu ca'anacan tihua'utá'ixaate'esin ɨ́ teɨte. Caxu seajta ca'anacan huataníniu'ucacu, a'iné capu rɨ'ɨrí tɨ ja'atɨ ayén ráaruuren a'ɨ́jna tɨ xɨ́'epɨ'ɨn 'een ɨ́ Dios jemi tɨ pua'a ayén niu'ucara'a jɨ́n ti'itiújcha'ɨɨ. 21A'ɨ́j pu jɨ́n, setá'aj siyen raatapuá'ajta nain jɨme'e tɨ a'ij pua'a een, tɨ ajta xána'avisi'i seijre'e. Mɨ seajta mú'een, setá'aj siyen ruxɨeemɨ́jte'e ra'ancuré'an se'ɨ́jna ɨ́ niuucari tɨ mú'ejmi jemi huatétuiihuaca'a, tɨ ajta jɨ́n Dios ayén raayɨ́'ɨtɨ tɨ amua'irájtuaani. 22Seajta mú'een, caxu siyen sena'a ranamuajra a'ij tɨ ti'ixa ɨ́ niuucari sino seajta siyen huárɨni a'ij tɨ tejá'amua'itɨii. Na'ari caí, ayée xu rucuanamuáa xá'aju'un rujɨ́ɨmua'a sena'a. 23Ayee pu 'een a'ɨ́jna ɨ́ ja'atɨ tɨ caí ayén rɨcɨ a'ij tɨ ti'ixa ɨ́ niuucari sino ayée na'a ruseɨ́j ranamuajra. Ayee pu 'een tɨ́j a'ɨ́jna ɨ́ ja'atɨ tɨ rucɨéenime'e seɨ́j ɨ́ 'ájte'ehua jetze. 24Jɨ́me'en pu'u ruseɨ́j, aj pu i tíchesin, ajta á'iyen yá'uhua'axɨjsin a'ij tɨ seijre'eca'a ɨ́ cɨéenime'ara'an. 25Ajta a'ɨ́ɨn tɨ temua'a naa tirá'aseij a'ɨ́jna ɨ́ niuucari tɨ jɨ́n Dios tí'aijta, tɨ ajta caí ti'itɨ jɨ́n á'atura, tɨ ajta Dios jɨ́n ru'irájtuaani, ayée pu Dios rɨ́'ɨ tiraatá'asin tɨ pua'a a'ɨ́ɨn pu'éene'e a'ame seɨj tɨ ayén rɨ́'ɨ ti'itiújcha'ɨɨ a'ij tɨ a'ɨ́ɨn niuucari ti'ixa. Na'ari caí tɨ pua'a a'ɨ́ɨ na'a pu'éene'e a'ame seɨj tɨ ayée na'a ranamuajra, ajta ca'anacan yá'uhua'axɨn, capu rɨ'éene'en huateáturaasin ɨ́ Dios jemi. 26Tɨ pua'a ja'atɨ ayén tiú'ujxajta ɨ́ ru tzajta'a yee tɨ temua'a naa tirá'astijre'e ɨ́ ruye'irá, ajta tɨ pua'a a'ɨ́ɨn ja'atɨ caí raatapuá'ajta tɨ a'ij pua'a tihuá'axajta ɨ́ ruxɨ́'ej teɨte, a'ɨ́ɨ pu ayén rucuanamua ɨ́ ru tzajta'a. Capu ti'itɨ vaɨre'e a'ɨ́jna ɨ́ ye'irájra'an a'ɨ́jna ɨ́ ja'atɨ. 27Ayee mú rɨcɨ a'ɨ́ɨme ɨ́ mej miyen ra'ará'astijre'e ɨ́ ye'irá tɨ rɨ'éene'en jɨ́n seijre'e ɨ́ Dios jemi, tɨ ajta caí ti'itɨj jɨ́n á'atura jemin ɨ́ tej rájya'upua. Miché'e ayée mena'a rɨjca: mej mi miyen huá'umuaare a'ɨ́mej ɨ́ mej ti'itɨ jɨ́n rajpuaíjtzi me'ɨ́jna jɨme'e ɨ́ mej xɨ́'ejcanta muá'araa nusu mej antiújseɨjtareca'a; mej mi majta ahuaújcu'uven, mej mi caí huaújxana'acɨra'aten a'ɨ́mej jamuan ɨ́ mej chaanaca japua huachéjme.

will be added

X\