Hebreos 9

1Ajta jɨ́me'en ɨ́ niuucari tɨ amuacaí a'ɨ́mej jemi raateájtuaa, ayée pu jetzen té'eyu'usi'ihuaca'a a'ij mej ye'í huárɨni mej mi raná'amiche'en ɨ́ Dios, ajta a'ij tɨ éene'e seíire'e a'ame a'ɨ́jna ɨ́ ɨnaamua. 2Ajta a'ɨ́ɨn ɨ́ ɨnaamua, hua'apua pu jɨ́n ájtaavijhuaca'a ɨ́ mej tzajta'an te'irá'a ɨ́ mej jɨ́n tí'ina'amiche'e. Ajta tzajta'an ɨ́ tɨ á jéjre'e ájtaavijhuaca'a, a'úu pu a'utéveeca'a a'ɨ́jna tɨ antitátzajmee, ajta a'ɨ́jna ɨ́ meesa tɨ ajta japuan e'etiá'a a'ɨ́jna ɨ́ pan tɨ Dios jemi huatétuiihuaca'a. Ayee pu téja'arájtehuaa tɨ nu'u “a'ájna a'u tɨ Dios huateúra'ate.” 3Ajta, huarita'an a'ɨ́jna cɨ́ɨxuri tɨ já'ita'a e'ecáaviɨj tɨ hua'apua, a'úu pu seɨ́j a'utéveeca'a ɨ́ ɨnaamua. Ayee mú te'etamuá'amua tɨjɨ́n “A'ɨ́jna tɨ Dios huápɨ'ɨ huateúra'ate”. 4A'uu pu tzajta'an seijre'eca'a a'ɨ́jna tɨ oro jɨ́n taavíjhuaca'a, mej majta japuan tí'imuaɨ'ɨvejtacare'e cɨ́tzive'eri jɨme'e. A'uu mú majta ru'uteájtuaa a'ɨ́jna ɨ́ chi'ira'an tɨ oro jɨ́n nain japua cámeijri'ihuaca'a, tɨ ajta urámuaaca'a a'ɨ́jna tetej tɨ jetzen té'eyu'usi'ihuaca'a a'ɨ́jna ɨ́ niuucari tɨ jɨ́n Dios amuacaí te'ataújratziiri'i. A'uu pu ajta huiirájcati a'ɨ́jna ɨ́ xa'ari tɨ oro jɨ́n taavíjhuaca'a, tɨ ajta tzajta'an urámuaanica'a a'ɨ́jna ɨ́ cua'ira, a'ɨ́jna ɨ́ mej miyen ratamuá'amua tɨjɨ́n maná. A'uu pu ajta huiiráca'atii a'ɨ́jna ɨ́ Aarón itzɨ́j tɨ jetzen te'ejtaneájxɨ. 5Majta a'ɨ́ɨme ɨ́ mej ta japua tí'ivaɨre'e, ɨ́ mej majta huápɨ'ɨ naa seijre'e, a'úu mú japuan utiú'uuca'a a'ɨ́ɨme ɨ́ mej hua'apua. A'ɨ́ɨ mú ru'ana jɨ́n ra'avá'anajca'a a'ujna a'u tɨ Dios tihua'utá'uuni'iracare'e. A'iné ti'imu'íi ɨ́ mej me'uun te'irá'a, capu cɨ'ɨpe tej íjii tiu'utaxáj seexu'ijmé'en nain tɨ́j na'a. 6Matɨ́'ɨj meri nain rɨ́'ɨ tiú'uruu, ja'anáj tɨ na'a mú me'uun a'uteáru'ipiche'e tzajta'an ɨ́ tɨ amuájca ɨ́ ɨnaamua a'ɨ́ɨme ɨ́ mej ve'ecán jɨ́n tí'ivaɨre'eca'a ɨ́ Dios jemi mej mi miyen huárɨni a'ij mej me'ɨ́jna jɨ́n tite'entiújmua'aree a'ij tɨ tiú'ujxe'eve'e. 7Ajta ɨ́ seɨ́j jetze ɨ́ ɨnaamua, seɨ́j pu'u a'uun a'uteáru'ipi tɨ́j na'a sei nine'ira'a jɨme'e. A'ɨ́ɨ pu a'ɨ́ɨn pu'éene'e a'ɨ́jna tɨ jaítze'e ve'ecán jɨ́n tí'ivaɨre'eca'a ɨ́ Dios jemi. Ajta a'ɨ́jna huajáasime'e a'ɨ́jna ɨ́ xúure'e tɨ jɨ́n tiu'utámuaɨ'ɨvejta ɨ́ rujɨ́ɨmua'a ɨ́ tɨ jɨ́n auteájturaa ɨ́ Dios jemi, ajta a'ɨ́mej jɨme'e ɨ́ teɨte, ɨ́ mej jɨ́n Dios jemi auteájturaa. 8Ajta a'ɨ́ɨn ɨ́ xɨéjniu'ucare'ara'an ɨ́ Dios, ayée pu jɨ́me'en tí'ita'ixaate'e tɨ ayén huataújmua'a tɨ caí xɨ te'entácuuni'i tej ti te'uun a'uteárute a'ájna tɨ jeíhua huápɨ'ɨ huateúra'ate ɨ́ Dios tɨ pua'a auj a'uun a'utéveeca a'ɨ́jna ɨ́ ɨnaamua tɨ á jéjre'e é'eseijre'e. 9Ajta a'ɨ́ɨn tɨ á jéjre'e é'eseijre'e, ayée pu huataújmua'a ɨ́ hua'aye'ira ɨ́ mej íjii huáteɨte. Ayee mú tí'ijrɨ'ɨre a'ɨ́ɨme ɨ́ mej miyen araúrasten me'ɨ́jna ɨ́ ye'irá. A'ɨ́ɨ mú tí'itatú'iri ɨ́ Dios jemi ti'itɨ́j tɨ na'a mej tí'ipuaijve'e, majta ɨ́ mej raatámuaɨ'ɨvajta. Mɨ́ ajta, tɨ́j na'a tɨ ayén 'een ɨ́ mej raatámuaɨ'ɨvajta, capu a'ɨ́ɨn pú'een ɨ́ tɨ xaa raanaíjmire'en ɨ́ mua'atzíire'ara'an a'ɨ́jna tɨ rana'amiche ɨ́ Dios. 10Capu xaa ne'u, a'iné ayée pu'u a'ɨ́jna jɨ́n tí'ivaɨre'e ɨ́ mej racua'aca nusu mej raye'eca na'ari ɨ́ mej jɨ́n huaté'ɨɨhuaxɨ'ɨn, naíjmi'i tɨ́j na'a pu a'ɨ́ɨn pú'een ɨ́ mej mena'a jɨ́n tí'aijta a'ij tɨ huárɨni ɨ́ rujɨ́ɨmua'a. Ayee pu ti'ihuaújxɨ'epɨ'ɨntare mej miyen rɨcɨ asta na'a caí Dios ayén raanaíjmire'en tɨ́j na'a tɨ tí'iseijre'e. 11Ajta íjii, Cɨríistu'u pu ayén huataseíjre itejmi jemi a'iné a'ɨ́ɨ pu ve'ecán jɨ́n ti'itéjvee ɨ́ Dios jemi tɨ ij ayén a'ɨ́jna jɨ́n rɨ́'ɨ titaatá'an tɨ́j na'a tɨ í'ixɨ'epɨ'ɨn 'een tɨ auj ayén teja'uré'enejsin. A'uu pu já'ita'a a'uteájrupi ɨ́ ɨnaamua jete tɨ jaítze'e tí'ivaɨre'e, tɨ ajta jeíhua jaítze'e huateújnaijmire, a'iné capu ayén ájtaavijhuaca'a muájca'a jɨme'e. 12Seɨ́j pu'u a'uun a'uteájrupi a'ujna tɨ Dios ayén huateúra'ate. Ajta, capu a'ɨ́ɨn huajáasime'e a'uun a'uteájrupi ɨ́ hua'axuure'e a'ɨ́mej ɨ́ caurasi nusu a'ɨ́mej ɨ́ viseáaru'use, sino ruxuure'e pu jɨ́n a'uun a'uteájrupi tɨ ij raatáhuauni tɨ tiu'utanájchita huá'a jetze me'ecan ɨ́ teɨte tɨ́j na'a rusén jɨme'e ɨ́ mej jɨ́n auteájturaa ɨ́ Dios jemi. 13Jee xaa ne'u, cɨ́j pu caj tí'ivaɨre'eca'a mej miyen huá'aruuren a'ɨ́ɨme ɨ́ mej ti'itɨ́j jɨ́n auteájturaa ɨ́ Dios jemi, mej miyen hua'uté'ɨɨraxɨ'ɨn me'ɨ́jna jɨme'e ɨ́ hua'axuure'e ɨ́ caurasi, ajta ɨ́ hua'axuure'e ɨ́ tuuru'use. Majta mú jɨ́n hua'acáviviiraca ɨ́ nasíjra'an ɨ́ viseáaru'u tɨ huáàcaj ɨ́ mej raateátai. 14A'ɨ́j pu jɨ́n jeíhua pu huápɨ'ɨ jaítze'e jamuaaté'ɨɨraxɨ'ɨn ɨ́ a'amua mua'atzíira'a jetze a'ɨ́jna jɨme'e ɨ́ xúure'e tɨ Cɨríistu'u ra'iráaxɨre. Ajta, a'ɨ́jna jetze ɨ́ xɨéjniu'ucare'ara'an ɨ́ Dios tɨ rusén jɨ́n seijre'e, a'ɨ́j pu jetze huateújca'anejca'a tɨ ij ayén caí ti'itɨ́j jɨ́n a'aturáa tɨ́'ɨj huataújmuaɨ'ɨvejtaca'a ɨ́ Dios jemi. Ayee pu 'een jɨ́n huarɨ́j sej si siyen raatapuá'ajta sej rá'astijre'e se'ɨ́jna ɨ́ ye'irá tɨ caí ché'e ti'itɨ́j vaɨre'e, sej si tiu'utévaɨre'en se'ɨ́jna jemi ɨ́ Dios tɨ i'irúuri. 15A'ɨ́j pu jɨ́n, a'ɨ́ɨ pu a'ɨ́ɨn pú'een tɨ ayén tiraaxɨ́'epɨ'ɨntare tɨ Dios jéjcuacan jɨ́n te'ateújratziira huá'a jemi tɨ hua'utajé mej mi miyen ra'ancuré'an a'ɨ́jna tɨ tihuá'acɨ'ɨti tɨ́j na'a rusén jɨme'e a'ij tɨ Dios te'ataújratziiri'i. Ayee pu té'eme, a'iné Cɨríistu'u pu huamɨ́'ɨ a'ɨ́jna jɨme'e tɨ ij huá'ari'i ɨ́ mej jɨ́n auteájturaa ɨ́ Dios jemi matɨ́'ɨj mauj rá'astijre'eca'a me'ɨ́jna ɨ́ niuucari ɨ́ tɨ amuacaí jɨ́n te'ataújratziiri'i ɨ́ Dios. 16Ayee pu tí'een, tɨ pua'a ayén seijre'e ɨ́ cuapée tɨ jetzen té'eyu'usi'i tɨ nu'u ayén tí'iracɨ'ɨti seɨ́j ɨ́ ja'atɨ, amuacaícan pu ayén ruxe'eve'e tɨ a'ɨ́jna ɨ́ ja'atɨ́ huámɨ'ɨni tɨ ayén cuapée jɨ́n te'ataújratziiri'i. 17Jee xaa ne'u, aj pu xaa ayén tí'ivaɨre'e a'ɨ́jna ɨ́ cuapée tɨ pua'a ayén huámɨ'ɨni a'ɨ́jna ɨ́ ja'atɨ́ tɨ a'ɨ́jna jɨ́n te'ataújratziiri'i. Ajta, tɨ pua'a auj ruuri a'ɨ́jna ɨ́ ja'atɨ, capu a'atzu tiratéva'ɨri ɨ́ seɨ́j a'ɨ́jna ɨ́ cuapée ɨ́ ja'atɨ́ tɨ ayén tí'iracɨ'ɨti. 18A'ɨ́j pu jɨ́n, ayée pu ajta ayén ruxe'eve'eca'a tɨ a'ɨ́ɨn niuucari tɨ amuacaícan jɨ́n te'ataújratziiri'i ɨ́ Dios, a'ɨ́ɨ pu ajta a'ɨ́jna jɨ́n ti'ihuaújxɨ'epɨ'ɨntari'iri'i a'ɨ́jna jɨme'e tɨ ti'itɨ́j ruxuure'e airáaxɨre. 19Tɨ́'ɨj a'ɨ́ɨn Moisés teecan ayén tihua'utánamuajriste naíjmi'ica ɨ́ teɨte tɨ́j na'a ayén té'eyu'usi'ihuaca'a jetzen ɨ́ niuucari ɨ́ mej jɨ́n tí'aijta, a'ɨ́ɨ pu tírajnájchi a'ɨ́jna ɨ́ hua'axuure'e ɨ́ viseáaru'u, ajta jamuan ɨ́ hua'axuure'e ɨ́ caurasi a'ɨ́jna ɨ́ jaj jamuan, ajta jamuan a'ɨ́jna ɨ́ muxaj tɨ pa'u, ajta jamuan a'ɨ́jna ɨ́ hisopo pi'ista. Aj pu ij, a'ɨ́jna jɨ́n, ayén raatétzutijraxɨ ɨ́ yu'uxari tɨ jíri'i, ajta hua'utétzutijraxɨ naíjmi'ica ɨ́ teɨte. 20Ayee pu a'ɨ́jna jɨ́n huarɨ́j, aj pu'i ayén tihua'utá'ixaa tɨjɨ́n: “A'ii pu a'ɨ́ɨn pú'een ɨ́ xúure'e tɨ jɨ́n ayén tiú'uxɨ'epɨ'ɨntari'ihuaca'a a'ɨ́jna ɨ́ niuucari tɨ jɨ́n Dios ayén te'ataújratziiri'i mú'ejmi jemi. Ayee nu ne'ɨ́jna jɨ́n huarɨ́j a'ij tɨ a'ɨ́ɨn titaata'aíj.” 21Ajta a'ɨ́ɨn Moisés teecan, ayén che'atá na'a xúure'e jɨ́n raatétzutijraxɨ a'ɨ́jna ɨ́ ɨnaamua, ajta tɨ́j na'a ti'ipua'amé ɨ́ xa'ari, ajta ɨ́ tuxa'a ɨ́ mej jɨ́n tí'ivaɨre'e a'ujna ɨnaamua jete. 22Jee xaa ne'u, ayén ti'ayajna. Jɨ́me'en a'ɨ́jna ɨ́ niuucari ɨ́ mej jɨ́n tí'aijta, tɨ́mua'a mú tɨ́n nain huateú'ɨ'iraxɨ xúure'e jɨme'e. Ajta, tɨ pua'a caí ti'itɨ́j ra'iráxɨre'en ɨ́ ruxuure'e, capu a'ij tí'irɨ'ɨri tɨ ayén tihua'utá'uuni'i ɨ́ teɨte ɨ́ mej jɨ́n auteájturaa ɨ́ Dios jemi. 23A'ɨ́j pu jɨ́n ayén ruxe'eve'eca'a mej miyen raaté'ɨiraxɨ'ɨn tɨ́j na'a tɨ ayén seijre'eca'a tɨ́j cɨéenime'ara'an pú'een a'ɨ́jna tɨ júte'e é'eseijre'e. Ajta ayén ruxe'eve'eca'a tɨ ja'atɨ́ ayén raaté'ɨiraxɨ'ɨn a'ɨ́jna tɨ júte'e é'eseijre'e a'ɨ́jna jɨme'e ɨ́ muaɨ'ɨvéjri tɨ jaítze'e rɨ́'en caí ɨ́ mej jɨ́n miyen tí'ijrɨ'ɨre íiyen chaanaca japua. 24Ajta a'ɨ́ɨn Cɨríistu'u, capu a'uun a'uteájrupi ɨnaamua jete tɨ muájca'a jɨ́n ájtaavijhuaca'a, tɨ ajta ayén 'een tɨ́j cɨéenime'ara'an a'ɨ́jna tɨ júte'e é'eseijre'e, sino a'úu pu u ta japua a'uteájrupi ɨ́ Dios jemi ta jetze me'ecan. 25Ajta, capu a'uun a'uteájrupi tɨ ij mu'iitɨ́ huataújmuaɨ'ɨvejta tɨ́j ajta a'ɨ́ɨn tɨ ve'ecán jɨ́n tí'ivaɨre'e íiyen chaanaca japua. Ayee pu tɨ́j na'a seɨ́j nine'ira'a jetze a'ɨ́ɨ pu a'uteáru'ipi a'ájna tɨ Dios huateúra'ate tɨ ij raatétzutijraxɨ'ɨn xúure'e jɨme'e tɨ a'ɨ́ɨn ruseɨ́j caí ra'iráaxɨre, sino seɨ́j pu'u a'uun a'uteájrupi a'ɨ́jna ɨ́ Cɨríistu'u. 26Na'ari caí, ayée pu ruxe'eve'e á'ame'enche'e tɨ a'ɨ́ɨn mu'iitɨ́ rajpuaíitzi á'ame'enche'e tɨ́j na'a tɨ huataseíjre ɨ́ chaanaca tej japuan yen seijre'e. Mɨ́ ajta, ayée pu xaa ne'u ti'ayajna tɨ a'ɨ́ɨn seɨ́j na'a ayén huataseíjre íjii tɨ ari nain te'entipuá'ajte tɨ ij ra'antipuá'ajte'en ɨ́ mej jɨ́n até'ɨtzeaara ɨ́ Dios jemi. Ayee pu 'een jɨ́n ra'antipuá'ajte a'ɨ́jna tɨ ruseɨ́j huataújmuaɨ'ɨvejtaca'a. 27- 28Ajta, ayée pu ti'ihuaújxɨ'epɨ'ɨntari'iri'i a'ɨ́mej jemi ɨ́ teɨte tɨ seɨ́j na'a ayén tiráacɨ'ɨti ɨ́ teáata'a tɨ huámɨ'ɨni, ajta á'iyen Dios rá'axɨjte'en. Ayee pu che'atá na'a 'een tɨ a'ɨ́ɨn Cɨríistu'u seɨ́j na'a huataújmuaɨ'ɨvejtaca'a huá'a jetze me'ecan ɨ́ teɨte tɨ ij huá'ari'i ɨ́ mej jɨ́n mu'iitɨ́ auteájturaa ɨ́ Dios jemi. Ajta, a'ɨ́ɨ pu ajtahua'a huataseíjre'esin huá'a jemi ɨ́ mej a'ujca'anéecan jɨ́n rachú'eve'e. Capu ché'e puaíjtzi hua'utá'asin a'ɨ́jna jɨme'e ɨ́ mej jɨ́n á'atura ɨ́ teɨte sino a'ɨ́ɨ pu icu hua'irátuaasin.

will be added

X\