Hebreos 8

1Ajta a'ɨ́jna ɨ́ tej jɨ́me'en ti'ixa, ayée pu huataújmua'a. Pu'uri seɨ́j ayén ve'ecán jɨ́n ti'itéjvee ɨ́ Dios jemi tɨ ayén ta japua niuuca. A'ɨ́ɨ pu ari a'uun a'ujyeíjxɨ rurɨ'ɨríinta'a a'u tɨ e'ecájca a'ɨ́jna tɨ huápɨ'ɨ naa seijre'e a'ujna júte'e. 2A'uu pu tí'ivaɨre'e u teyujta'a, a'ɨ́jna jetze ɨ́ ɨnaamua tɨ tzáahuati'ira'a jɨ́n a'utéjvee a'u tɨ Dios é'eseijre'e. Capu tevi rá'ajtaahuaca'a sino tavástara'a pu'u. 3Ayee pu tí'ijcɨ'ɨcɨpua ja'atɨ́ tɨ na'a tɨ ve'ecán jɨ́n ti'itéjvee ɨ́ Dios jemi tɨ a'ɨ́ɨn raateájtuaani ɨ́ meesa japua a'ɨ́jna tɨ tiu'utapuaíjve'en, ajta ɨ́ ti'itén mej hua'utámuaɨ'ɨvejtaca'a. A'ɨ́j pu jɨ́n ayén ruxe'eve'e tɨ a'ɨ́ɨn Jesús ajta ti'itɨ́j huatámuaɨ'ɨvejta. 4Tɨ́ pua'a a'ɨ́ɨn ayén huatéveecache'en íiyen chaanaca japua, capu a'atzu rɨ'ɨríistanche'e tɨ a'ɨ́ɨn ayén ve'ecán jɨ́n tiu'utévaɨre'en ɨ́ Dios jemi, a'iné maúche'e mú seica miyen seijre'e ɨ́ mej miyen me'ɨ́jna jɨ́n tí'imuaɨ'ɨvejtaca ɨ́ mej jɨ́n tiu'utapuaíjve ɨ́ Dios jemi, a'ij tɨ té'eyu'usi'i a'ɨ́jna jetze ɨ́ niuucari ɨ́ mej jɨ́n tí'aijta. 5Majta a'ɨ́ɨme, ayée mú tí'ivaɨre'e a'ɨ́jna tɨ ayén seijre'e tɨ́j cɨéenime'ara'an a'ɨ́jna tɨ júte'e é'eseijre'e. Majta, matɨ́'ɨj miyen araúrasten ɨ́ hua'aye'ira, ayée mú tí'ira'ɨjchue a'ij tɨ tzáahuati'ira'a jɨ́n seijre'e ɨ́ júte'e ɨ́ Dios jemi. A'ɨ́j pu jɨ́n, tɨ́'ɨj Moisés teecan ayén a'utecheníiche'en tɨ rá'ajtaahua a'ɨ́jna ɨ́ ɨnaamua tɨ Dios ayén tiraatá'itɨiiri'i, ayée pu tiraata'ixaa tɨjɨ́n: “Patá'aj hui piyen nain jɨ́n huárɨni a'ij nej timuaataseíjrate patɨ́'ɨj pe'uun a'utéveeca'a ɨ́ jɨrí japua.” 6Mɨ́ ajta íjii, Cɨríistu'u pu'uri ayén ra'ancuré'a tɨ ayén a'ɨ́jna jɨ́n tiu'utévaɨre'en a'ɨ́jna jɨme'e tɨ jaítze'e rɨ́'en ɨ́ Dios jemi caí a'ɨ́jna ɨ́ mej jɨ́n tí'ivaɨre'e íiyen chaanaca japua. Ayee pu che'atá na'a jaítze'e rɨ́'en a'ɨ́jna ɨ́ niuucari ɨ́ tɨ jɨ́n ta japua huaniú. Ayee pu 'een jɨ́n jaítze'e rɨ́'en a'iné jaítze'e pu rɨ́'en a'ɨ́jna ɨ́ niuucari ɨ́ tɨ Dios ayén raatá'a, tɨ ajta jaítze'e rɨ́'en a'ɨ́jna ɨ́ tɨ jɨ́n te'ataújratziiri'i tɨ tí'itacɨ'ɨti. 7Ajta a'ɨ́ɨn niuucarijra'a ɨ́ tɨ jɨ́n amuacaí Dios te'ataújratziiri'i, tɨ pua'a ayén caí ti'itɨ́j jɨ́n te'utéturaanche'e, capu a'atzu huataujcɨ'ɨpuáache'e tɨ seɨ́j ayén huáteuni ɨ́ tɨ jɨ́n Dios ayén te'ateújratziira. 8Mɨ́ ajta Dios, ayée pu huá'a jetze te'ujpuá'ajte mej caí a'atzu araúraste me'ɨ́jna jɨme'e ɨ́ niuucari tɨ amuacaí raateájtuaa huá'a jemi. A'ɨ́j pu jɨ́n ayén tiu'utaxájtaca'a tɨjɨ́n: Ayee pu ti'ixa ɨ́ tavástara'a yee me'ecui xaa, ne'u. Pu'uri a'ájna xɨcáara'an jetze teja'uré'enejsin nej jetzen jéjcuacan jɨ́n niuucari tihua'utá'asin ɨ́ nej jɨ́n te'atánratziira ne'ɨ́mej jemi ɨ́ mej Israél jetze ajtéme'ecan, neajta huá'a jemi ɨ́ teɨtestemua'ame'en a'ɨ́jna ɨ́ Judá. 9Canu niyen che'atá nena'a éeni'icɨ'en ɨ́ niuucari hua'utá'asin netɨ́j tihua'utá'a a'ɨ́mej ɨ́ huá'avaujsimua'acɨ'ɨ, a'ájna xɨcáara'an nej jetzen hua'utévaɨ, neajta hua'iráavi'itɨ a'ujna u Egipto, a'iné camu á'atee mej miyen huárɨni a'ij nej ne'ɨ́jna jɨ́n tihuau'íjca ne'ɨ́jna jetze ɨ́ niuucari nej raateájtuaa a'ɨ́mej jemi. Mɨ́ ajta, capu ché'e nej jetze ruxe'eve'eca'a nej rɨ́'ɨ tihuá'ucha'ɨn. 10A'ii pu a'ɨ́ɨn pú'een ɨ́ niuucari tɨ jéjcua ɨ́ nej jɨ́n te'atánratziira a'ɨ́mej jemi ɨ́ mej Israél jetze ajtéme'ecan. Ayee pu ajta ti'ixa ɨ́ tavástara'a tɨjɨ́n: Tɨ́'ɨj te'entipuá'are a'ájna xɨcáara'an jetze, ayée nu ca'aníjra'a hua'utá'asin mej mi ra'utámua'aree ɨ́ ru tzajta'a ɨ́ niuucari ɨ́ nej jɨ́n tí'aijta. Ayee nu raateátuaasin ɨ́ neniuuca huá'axɨejniu'uca jetze, seɨ́j neajta seɨ́j, temua'a naa. Neajta nu inee huá'a Dios pu'éene'e na'ame. Majta a'ɨ́ɨme, a'ɨ́ɨ mú neteɨ́testemua'a muá'aju'u. 11Majta a'ɨ́ɨme, camu ché'e miyen tíhua'utá'itɨiira ɨ́ ruxɨ́'ej teɨte yee setá'aj ráamua'ati ɨ́ tavástara'a. Camu xaa ne'u, a'iné naími'i mú miyen nemua'atée muá'aju'u, matɨ́j mena'a pua'amé ɨ́ teɨte, a'ɨ́ɨme ɨ́ mej cɨliéene'e jɨ́n títetateí, majta a'ɨ́mej ɨ́ mej ve'ecán jɨ́n títetateí. 12Neajta inee, nee nu niyen tíhua'utá'uuni'ira ɨ́ mej jɨ́n a'ij pua'a ti'itiújcha'ɨɨca'a ineetzi jemi. Neajta, canu ché'e ja'anáj niyen ra'utámua'areeri'i ɨ́ mej jɨ́n neetzi jemi auteájturaa. 13Ayee pu'u na'a, a'iné tavástara'a pu ayén jɨ́me'en ti'ixa yee “jéjcuacan nu jɨ́n niuucari huateátuaasin”, ayée pu 'een jɨ́n ajta ayén tiraaxɨ́'epɨ'ɨntare tɨ ari mí'ime'ecan a'ɨ́jna ɨ́ niuucari tɨ amuacaí huá'a jemi raateájtuaa. Ajta a'ɨ́ɨn tɨ ari mí'ime'ecánta já'araa, ajta caí ché'e ti'itɨ́j vaɨre'e, pu'uri tɨ́n antipuá'ari nain jɨme'e.

will be added

X\