Hebreos 6

1A'ɨ́j pu jɨ́n, tiché'e tiyen mé rúuhua'axɨn te'ɨ́jna ɨ́ mej jɨ́n amuacaí titá'itɨiiri'i jɨ́me'en ɨ́ Cɨríistu'u tej ti tiyen jaítze'e huavaújse'en ɨ́ Dios jemi. Tiché'e caí ché'e te'ɨ́jna jetze ucáaju'un, a'ɨ́jna ɨ́ niuucari tɨ jɨ́me'en raxa tej seɨcɨé tiú'umua'ati te'ɨ́jna jɨme'e ɨ́ ye'irá tɨ caí ché'e ti'itɨ́j vaɨre'e ɨ́ Dios jemi, nusu tɨ jɨ́me'en raxa tej rá'atzaahuate'en ɨ́ Dios. 2Ajta seica tɨ ayén tí'ita'aijte'e tej nu'u huatámuaɨ'ɨvijhua na'ari tej nu'u hua'avé'emuarɨ'en ca'ɨ́n tɨ jɨ́me'en raxa a'ájna xɨcáara'an ɨ́ mej jetzen a'itajú'un a'ɨ́ɨme ɨ́ mej meri huácuii. Ajta, a'ɨ́jna ɨ́ niuucari tɨ jɨ́me'en raxa tɨ Dios ayén huá'axɨjte'en seɨj ajta seɨj a'ij tɨ tí'iracɨ'ɨti tɨ́j na'a rusén jɨme'e. Naíjmi'i tɨ́j na'a ɨ́ tej teuchén tiraataxájtaca'a, ayée pu'u 'een ɨ́ mej jɨ́n amuacaí titá'itɨiiri'i. Pu'uri ruxe'eve'e tej jaítze'e huavaújse'en ɨ́ Dios jemi. 3Ayee tu te'ɨ́jna jɨ́n rɨni tɨ pua'a Dios ayén titaatá'acare'en. 4Mɨ́ majta seica, ayée mú meri huarɨ́j. Seɨj pu ja'anáj ayén tihuá'amitɨejte'eca'a tɨ ayén ti'ayajna a'ɨ́jna ɨ́ niuucari. Mu'uri ja'anáj raamuá'a a'ɨ́jna tɨ Dios hua'utapuaíjve tɨ ajta júte'e a'uvé'emej. Ajta a'ɨ́ɨn xɨéjniu'ucare'ara'an ɨ́ Dios ayén huá'a tzajta'a huateájturaa. 5A'ɨ́ɨ mú majta raataxɨ́'eve a'ɨ́jna ɨ́ niuucari tɨ i'irɨ́'en, tɨ ajta Dios jemi u a'uvé'emej. Majta mú ra'ancuré'a me'ɨ́jna ɨ́ muárɨ'eri'ira'a tɨ jɨ́n Dios ayén tiu'uta'aíjta tɨ́j na'a rusén jɨme'e. 6Matɨ́'ɨj mi mé rúurɨe. A'ɨ́j pu jɨ́n capu a'atzu a'ij tí'irɨ'ɨri tɨ ayén hua'ujéjcuare'en mej mi majtáhua'a seɨcɨé tiú'umua'ati. Capu xaa ne'u, a'iné a'ɨ́ɨ mú majtáhua'a rujɨ́ɨmua'a rá'utatan ɨ́ cúruu jetze me'ɨ́jna tɨ yaujra'an pú'een ɨ́ Dios. Majtahua'a mú á jéjre'e huá'a tzajta'a ɨ́ teɨte, a'ɨ́ɨ mú majta rá'axɨeehuari'i. 7Ayee pu che'atá na'a tí'irɨneca huá'a tzajta'a ɨ́ teɨte tɨ́j ajta ayén tí'irɨneca ɨ́ chuej japua matɨ́'ɨj huatéviiye. Dios pu ayén rɨ́'ɨ tiratá'aca a'ɨ́jna ɨ́ chuej tɨ pua'a matɨ́'ɨjtá huatéviiye, ayén japuan tiu'unén a'ɨ́jna tɨ tihua'atéva'ɨri a'ɨ́mej ɨ́ mej japuan tí'ihua'aste. 8Mɨ́ ajta, tɨ pua'a japuan tiu'unén a'ɨ́jna tɨ tétzicare'e, ajta a'ɨ́jna tɨ tiú'uxu'uhua'ate'e matɨ́'ɨj huatéviiye, capu ti'itɨ́j vaɨre'e a'ɨ́jna ɨ́ chuej. Jee xaa ne'u, ayée pu tí'irɨ'ɨri tɨ ayén té'eme tɨ Dios a'ij pua'a ráaruuren, ajta ayén tiraateátaiira. 9Capu amɨ́n a'ij tej tiyen tejá'amua'ixaate'e, mɨ tej já'amuaxe'eve'e, a'iné ayée pu titá'amitɨejte'e mú'ejmi jɨme'e tɨ caí ayén tejamuáacɨ'ɨti a'ɨ́jna tɨ a'ij pua'a 'een, sino sej siyen ra'ancuré'asin tɨ́j na'a tɨ ayén ti'iseíire'e a'ame a'ájna xɨcáara'an tɨ jetzen Dios amua'irájtuaani. 10Dios pu xaa ra'utámua'areeri'i a'ij tɨ tiraavíjte'e ɨ́ sej jɨ́n tiu'umuárɨej, sej seajta hua'utaxɨ́'eve ɨ́ Dios jetze me'ecan a'ɨ́mej ɨ́ tɨ hua'irávi'itɨcɨ ɨ́ Dios. Capu a'atzu yá'uhua'ana ɨ́ Dios sej seri jɨ́n tihua'utévaɨ, sej seajta seúche'e ti'itɨ́j jɨ́n tihua'atéva'ɨri. 11Ayee tu tí'ijxe'eve'e mú'ejmi jɨme'e sej si siyen che'atá sena'a a'araujca'anéecan jɨ́n siyen rɨjca seica jɨme'e tɨ ij Dios ayén amuaanaíjmire'en a'ɨ́jna jɨme'e ɨ́ sej jɨ́n rachú'eve'e ajta na'a caí nain te'entipuá'are. 12Setá'aj caí siyen huá'ɨna'ase'e sino siyen che'atá sena'a huárɨni matɨ́j a'ɨ́mej ɨ́ mej ra'ancuré'asin me'ɨ́jna tɨ jɨ́n Dios te'ataújratziiri'i tɨ ayén tihuá'ucɨ'ɨti a'ɨ́jna jɨme'e mej té'atzaahuate'e, majta mej te'utáviicua'iri'i. 13Tɨ́'ɨj Dios ayén te'ataújratziiri'i a'ɨ́jna ɨ́ Abraham jemi, a'ɨ́ɨ pu ayén ruseɨ́j tiraata'ixaa ɨ́ runiuuca jɨme'e, a'iné capu mé'e já'a hua'aca'a ja'atɨ́ tɨ jaítze'e ve'ecán jɨ́n ti'itéveeca'a tɨ ij ayén niúucare'ara'an jɨ́n tiraatá'an. 14Ayee pu tiraata'ixaa tɨjɨ́n: “Huápɨ'ɨ nu rɨ́'ɨ timuaateátuaasin. Jéihua nu huápɨ'ɨ hua'utámu'iirejsin ɨ́ á'ayaujmua'a.” 15Ajta a'ɨ́ɨn Abraham, tɨ́'ɨj a'ateevi'i tɨ ayén rachú'eve'e ruxɨ́'evi'ira'a jɨme'e, aj pu'i ayén ra'ancuré'a a'ɨ́jna tɨ jɨ́n Dios te'ataújratziiri'i. 16Jee xaa ne'u, a'iné ayée mú tí'ijrɨ'ɨre ɨ́ teteca mej runiuuca ti'itá'aca a'ɨ́jna jɨme'e ɨ́ niuucajtze'en a'ɨ́jna tɨ jaítze'e ve'ecán jɨ́n ti'itéjvee mecaí a'ɨ́ɨme. Ajta ja'anáj tɨ na'a mej ti'itɨ́j jɨ́n tiújtea'axɨ'ɨn, ayée mú ramua'aree tɨ ari rɨ́'ɨ ti'ihuaújxɨ'epɨ'ɨntare tɨ́'ɨj seɨ́j runiuuca jɨ́n ayén ti'itá'aca. 17A'ɨ́j pu jɨ́n, tɨ́'ɨj Dios ayén tiraaxɨ́'epɨ'ɨntare tɨ ayén tihua'utaseíjrate'en temua'a naa a'ɨ́mej ɨ́ tɨ tihuá'acɨ'ɨti mej mi ráamua'aree tɨ caí a'atzu rɨ'ɨrí tɨ seɨcɨé huárɨni a'ɨ́jna jɨme'e a'ij tɨ a'ɨ́ɨn ari tiraaxɨ́'epɨ'ɨntare, a'ɨ́ɨ pu ajta ayén runiuuca jɨ́n tiraataxájtaca'a. 18A'ɨ́j pu jɨ́n, tí'ihua'apua pu tí'iseijre'e tɨ caí ja'atɨ́ raayɨ́'ɨtɨ tɨ seɨcɨé tiú'uruuren ɨ́ tatzajta'a, tɨ jɨ́me'en caí rɨ'ɨrí tɨ Dios ayén tiu'utéehua'ita: a'ii pu a'ɨ́ɨn pú'een, a'ɨ́jna ɨ́ tɨ jɨ́n te'ataújratziiri'i, ajta runiuuca tɨ jɨ́n tiu'utaxájtaca'a. A'ɨ́j tu jɨ́n huatétaca'anen temua'a naa, iteen i tej jemin ajteáxɨɨreca'a tɨ ij a'ɨ́ɨn tacha'ɨ á'ara'ani, tej ti tiyen ra'ancuré'an ɨ́ tej rachú'eve'e, a'ɨ́jna tɨ ajta ayén raateájtuaa itejmi jemi. 19Ajta a'ɨ́ɨn ɨ́ tej rachú'eve'e, ayée pu ca'aníjra'a tatá'aca tɨ ij caí ti'itɨ́j tá'ɨtziite'e ɨ́ tatzajta'a, tɨ ij caí ti'itɨ́j ta'antimuá'itɨn. Cu xɨee a'ɨ́ɨ pu a'uteájrupi u ta japua, huarita'an a'ɨ́jna ɨ́ cɨ́ɨxuri tɨ já'ita'a e'ecáaviɨj. 20Ajta a'ɨ́ɨn ɨ́ Jesús, a'ɨ́ɨ pu amuacaí a'uteájrupi tɨ ij a'ɨ́ɨn ta japua huániuuni, a'ɨ́jna jɨme'e tɨ Dios ayén a'ɨ́jna jɨ́n tira'íjca tɨ i a'ɨ́ɨn ayén che'atá na'a ve'ecán jɨ́n tiu'utévaɨre'en ɨ́ Dios jemi tɨ́j na'a rusén jɨme'e tɨ́j ajta a'ɨ́jna ɨ́ Melquisedec.

will be added

X\