Hebreos 5

1Ayee pu 'een a'ɨ́jna jɨme'e ja'atɨ́ tɨ na'a tɨ ayén ve'ecán jɨ́n tí'ivaɨre'e ɨ́ Dios jemi. Amuacaí mú miyen ra'avé'ehuausin huá'a tzajta'a ɨ́ teɨte. Matɨ́'ɨj mi miyen tí'ira'íjcate'en tɨ ij a'ɨ́ɨn huá'a japua huániuuni ɨ́ Dios jemi. A'ɨ́ɨ pu ajta tiu'utámuaɨ'ɨvajta a'ɨ́jna ɨ́ mej raatapuaíjve'esin ɨ́ Dios, ajta a'ɨ́jna ɨ́ ye'emuaate ɨ́ mej hua'utámuaɨ'ɨvajta me'ɨ́jna jɨme'e ɨ́ mej jɨ́n auteájturaa ɨ́ Dios jemi. 2A'iné a'ɨ́jna ɨ́ ja'atɨ ajta ramua'aree tɨ caí ruseɨ́j té'eviicua'i, a'ɨ́ɨ pu ajta raayɨ́'ɨtɨ tɨ huá'ancu'uvajxɨ'ɨn a'ɨ́mej ɨ́ mej caí a'ij tirú'umua'aree, ajta a'ɨ́mej ɨ́ mej ti'itɨ́j jɨ́n até'ɨtzeaara ɨ́ Dios jemi. 3A'ɨ́j pu jɨ́n ruxe'eve'e tɨ a'ɨ́ɨn amuacaícan ayén tiu'utámuaɨ'ɨvajta a'ɨ́jna jɨme'e tɨ a'ɨ́ɨn ruseɨ́j ti'itɨ́j jɨ́n auteájturaa ɨ́ Dios jemi. Ajta á'iyen, ayée pu ruxe'eve'e tɨ ayén che'atá na'a huárɨni huá'a jɨme'e ɨ́ teɨte ɨ́ mej miyen che'atá mena'a ti'itɨ́j jɨ́n tite'uteájturaa ɨ́ Dios jemi. 4Ajta, capu ja'atɨ́ ayén ruseɨ́j te'enteárute a'ɨ́jna jɨme'e tɨ ayén tiu'utévaɨre'en ɨ́ Dios jemi, sino tɨ pua'a Dios ayén a'ɨ́jna jɨ́n tira'íjcate'e a'ij tɨ ayén tira'íjca a'ɨ́jna ɨ́ Aarón teecan. 5A'ɨ́j pu jɨ́n, capu ayén ruseɨ́j huataújtuaa a'ɨ́jna ɨ́ Jesús tɨ ayén ve'ecán jɨ́n te'enteárute tɨ ij ayén tiu'utévaɨre'en ɨ́ Dios jemi. Capu xaa ne'u, sino Dios pu ayén tiraata'ixaa tɨjɨ́n: Mú'ee pej niyauj pɨ́rɨcɨ. Ijii nu niyen muaatéya'upuataca'a. 6Ajta pua'amecɨé pu ayén ti'ixa tɨjɨ́n: Mú'ee pej piyen pe'ɨ́jna jɨ́n tí'ivaɨre'e ɨ́ Dios jemi tɨ́j ajta ve'ecán jɨ́n tí'ivaɨre'e a'ɨ́jna ɨ́ Melquisedec tɨ́j na'a rusén jɨme'e. 7Tɨ́'ɨj auj yen seijre'eca'a íiyen chaanaca japua, Jesús pu ayén huatéeniu, ajta raatéjhuau a'ɨ́jna jemi tɨ raayɨ́'ɨtɨhua'a tɨ ru'irájtuaani. Jéihua pu ayén huaújyeineca'a a'ɨ́jna jemi tɨ́'ij a'ɨ́ɨn caí raatá'acare'en tɨ huámɨ'ɨni. Ajta a'ɨ́ɨn Dios ayén ráanamuajri'i a'ɨ́jna jɨme'e tɨ ayén huataúra'a tɨ ayén araúrasten a'ij tɨ tí'ijxe'eve'eca'a ɨ́ Dios. 8Ayee pu i yaujra'an pu pú'eene'e, aúche'e pu ayén rɨ́'ɨ ráaruu tɨ ayén ra'ará'astijre'en a'ɨ́jna jɨme'e ɨ́ tɨ jɨ́n rajpuaíjtzica'a. 9Ajta, tɨ́'ɨj Dios ayén raanaíjmire, Jesús pu a'ɨ́jna jɨ́n te'enteájrupi a'ɨ́jna jɨme'e tɨ a'ɨ́ɨn ayén hua'irájtuaani tɨ́j na'a rusén jɨme'e naíjmi'ica a'ɨ́mej ɨ́ mej rá'astijre'e. 10Ajta Dios ayén a'ɨ́jna jɨ́n tira'íjca tɨ ij ayén che'atá na'a ve'ecán jɨ́n tiu'utévaɨre'en ɨ́ Dios jemi tɨ́j ajta tiu'utévaɨ a'ɨ́jna ɨ́ Melquisedec. 11Jéihua tu tejá'amua'ixaate'ecu te'ɨ́jna jɨme'e. Mɨ́ ajta, jé'ecan pu muárɨ'eri tej tiyen temua'a naa tejámuaatá'ixaate'en a'iné caxu ca'anacan yaú'itɨée xá'aju'un. 12Jee xaa ne'u, íjii tej tiyen tejá'amua'ixaate'e, ayée pu tiraavíjte'ecache'en sej siyen rujɨ́ɨmua'a sena'a tihuá'umua'aten ɨ́ seica. Mɨ́ ajta caí caxu, sino ayée pu ruxe'eve'e tɨ ja'atɨ́ ayén ajtahua'a tejamuáamua'aten ɨ́ mej jɨ́n autéjhuiica mej tihuá'umua'aten me'ɨ́jna jɨme'e ɨ́ niuucari tɨ Dios jetze a'uvé'eye'i. Ayee xu 'een matɨ́j a'ɨ́ɨme ɨ́ tɨ'ɨríi ɨ́ mej rumua'atɨ́ léechi ye'eca, mej caí xɨ yá'ujepɨ'ɨra'a ɨ́ cua'ira. 13Ja'atɨ́ tɨ na'a tɨ ayén 'een tɨ́j pa'arɨ'ɨ tɨ léechi jɨ́n ruuri, capu xɨ yaú'itɨe a'ɨ́jna ɨ́ niuucari ɨ́ mej jɨ́n tihuá'umua'aten a'ij tɨ ye'í seɨ́j rɨ́'ɨ ti'itiújcha'ɨɨ ɨ́ Dios jemi. 14Mɨ́ ajta, a'ɨ́jna ɨ́ niuucari tɨ ayén tí'ivaɨre'e tɨ́j ɨ́ cua'ira ɨ́ mej racua'aca ɨ́ mej vaujsi, ayée pu tihuá'acɨ'ɨti mej mi me'ɨ́jna jɨ́n tihuá'umua'aten a'ɨ́mej ɨ́ mej meri vaujsi, ɨ́ mej majta meri raayɨ́'ɨtɨ tɨ ayén tihuá'amitɨejte'e tɨ pua'a ti'itɨ́j ayén tí'ixɨ'epɨ'ɨn nusu caí. Ayee pu 'een jɨ́n miyen raayɨ́'ɨtɨ me'ɨ́jna jɨme'e mej miyen rɨ́'ɨ ti'itiújcha'ɨɨ ɨ́ Dios jemi.

will be added

X\