Hebreos 4

1Aúche'e pu ayén tí'ivaɨre'e ɨ́ niuucari tɨ jɨ́n Dios ayén te'ataújratziiri'i tɨ í'irɨ'ɨri tej te'uun a'uteárute a'u tɨ a'ɨ́ɨn taatá'asin tej te'uun e'ehuátase'upe'en. A'ɨ́j pu jɨ́n, tiché'e rɨ́'ɨ tena'a tɨ ij caí ayén te'irájra'ani tɨ seɨ́j mú'een ti'itɨ́j jɨ́n auté'ɨtzen tɨ ij caí ráacɨ'ɨti tɨ a'uun a'uteárute. 2Ayee pu'u, ayée pu che'atá na'a taacɨ́'ɨ ɨ́ niuucari tɨ jɨ́n Dios tu'irájtuaani, tɨ́j ajta tihua'ucɨ́'ɨ a'ɨ́mej. Mɨ́ ajta, capu a'atzu a'ij tihua'utévaɨ ɨ́ mej ráanamuajri'i a'ɨ́jna jɨme'e mej caí té'antzaahua matɨ́'ɨj ráanamuajri'i. 3Ajta íjii, iteen i tej té'antzaahua, teen tu te'uun a'uteáruti a'u tej e'ehuátase'upe'en. Ayee pu huataújmua'a tɨ ayén tí'itacɨ'ɨti a'iné ayée pu Dios tiu'utaxájtaca'a huá'a jɨme'e tɨjɨ́n: Neniú'ucara'a nu jɨ́n te'atánratziiri'i mej caí ja'anáj me'uun a'uteáruti a'u mej e'ehuaújse'upe'en ineetzi jamuan. Mɨ́ ajta, tɨ́j na'a a'ájná'ɨmua tɨ raatétaahuaca'a ɨ́ chaanaca tɨ yú e'iré'ene, pu'uri cɨ'ɨpiihuaca'a ɨ́ tɨ jɨ́n Dios tiu'umuárɨej. 4Jee xaa ne'u, a'iné mé já'ahua'a pu ayén tiu'utaxájtaca'a a'ɨ́jna jɨme'e ɨ́ xɨcáara'an ta'aráhua'apua. Ayen tɨjɨ́n: Ajta a'ájna xɨcáara'an jetze ɨ́ ta'aráhua'apua, Dios ayén raatapuá'ajtaca'a ɨ́ tɨ jɨ́n tiu'umuárɨej. Tɨ'ɨquí huaújse'upe. 5Ajta, teuche'e tu te'ɨ́jna jɨ́me'en ti'ixa ɨ́ niuucari tɨ jɨ́me'en tiraataxájtaca'a ɨ́ Dios tɨjɨ́n: Camu nu'u ja'anáj me'uun a'uteáruti mej mi neetzi jamuan e'ehuaújse'upe'en. 6A'ɨ́j pu jɨ́n, camuché'e mú miyen seijre'e seica ɨ́ mej xaa me'uun a'uteárute mej mi jamuan ɨ́ Dios e'ehuaújse'upe'en. Mɨ́ majta a'ɨ́ɨme, ɨ́ tɨ amuacaí huá'a jemi raateájtuaa ɨ́ niuucari tɨ jɨ́n Dios hua'irátuaaníiche'en, camu me'uun a'uteájrupi me'ɨ́jna jɨme'e mej caí ra'ará'astijre. 7A'ɨ́j pu jɨ́n, pu'uri jeíhua a'ateevi'i tɨ́'ɨj a'ɨ́ɨn Dios raatá'a a'ɨ́jna ɨ́ David teecan tɨ ayén tiu'utaxáj tɨ Dios ayén raaxɨ́'epɨ'ɨntare ja'anáj tɨ ayén teja'uré'enejsin a'ájna xɨcáara'an tɨ ayén raatamuá'a tɨjɨ́n “íjii.” Ayee pu a'ɨ́jna jɨ́n tiu'utaxájtaca'a tɨjɨ́n: Tɨ́ pua'a íjii seráanamua a'ij tɨ ti'ixa ɨ́ Dios, caxu ra'antánaamuan ɨ́ á'amuatzajta'a. 8Ajta, tɨ pua'a a'ɨ́ɨn Josué teecan ayén hua'uta'aníiche'en mej huaúuse'upe'enche'e, capu ayén raataxájtanche'e ɨ́ Dios a'ɨ́jna jɨme'e ɨ́ seɨ́j jetze ɨ́ xɨcaj. 9- 10A'ɨ́j pu jɨ́n, aúche'e pu tura huá'a jemi ɨ́ mej teɨtestemua'ame'en pú'een ɨ́ Dios mej mi jamuan huaújse'upe'en, a'iné ja'atɨ́ tɨ na'a tɨ ayén a'uun a'uteárute tɨ ij e'ehuaújse'upe'en ɨ́ Dios jamuan, a'ɨ́ɨ pu ayén che'atá na'a raatapuá'ajta ɨ́ tɨ jɨ́n tí'imuarɨ'e tɨ́j ajta Dios tiraatapuá'ajtaca'a ɨ́ tɨ jɨ́n tiu'umuárɨej. 11A'ɨ́j pu jɨ́n, tiché'e tiyen ahuátaca'anen nain jɨme'e taca'aníjra'a tej ti te'uun a'uteárute, tɨ ij caí ja'atɨ́ ayén che'atá na'a huárɨni a'ij mej mejmí'i huarɨ́j a'ɨ́ɨme, ɨ́ mej caí te'ará'aste me'ɨ́jna jɨme'e mej caí té'antzaahua. 12Ajta a'ɨ́ɨn ɨ́ niuucari tɨ Dios jetze airáninei, a'ɨ́ɨ pu e'ihuarújte'en, ajta tí'imɨjhuaca huápɨ'ɨ. Temua'a pu te'urú'ipi ɨ́ tatzajta'a. Jaítze'e pu tí'ivaɨre'e caí ɨ́ chun tɨ hua'apua jɨ́n ajcámɨɨmɨ, tɨ ajta huápɨ'ɨ antámɨɨmɨ, ɨ́ mej majta jɨ́n rasi'icheca ɨ́ carij tɨ ruví'i, majta jɨ́n ra'utasí'iche ɨ́ tu'utanaj. A'uu pu xaa urú'ipi a'ɨ́jna ɨ́ niuucari ɨ́ xɨéjniu'ucare'ara'an jetze ɨ́ tevi, ajta ɨ́ mua'atzíire'ara'an jetze. Temua'a pu raayɨ́'ɨtɨ tɨ ayén raatámitɨejte'en a'ij tɨ seɨ́j tí'imua'atze, ajta a'ij tɨ seɨ́j tí'ijxe'eve'e tɨ ayén huárɨni. 13Ti'itɨ́j tɨ na'a tɨ ayén tí'iseijre'e, tɨ ajta a'ɨ́jna jetze ajtéme'ecan a'ɨ́jna tɨ Dios ayén tiú'utaahuaca'a, tɨ́j na'a ti'ipua'amé, ayée pu jéjre'e seijre'e ɨ́ jemin. Ajta ayén ruxe'eve'e tej naími'i tiyen tiu'utaseíjrata ɨ́ jemin. Ajta, capu ti'itɨ́j rú'avaa ɨ́ jemin. 14Ayee nu tejá'amua'ixaate'e. Pu'uri seijre'e ɨ́ ta jemi seɨ́j tɨ ve'ecán jɨ́n tí'ivaɨre'e ta jetze me'ecan ɨ́ Dios jemi. Ajta a'ɨ́ɨ pu ari a'uun a'ujnéj u ta japua. A'ɨ́j pu jɨ́n, tiché'e tiyen taca'aníjra'a jɨ́n teuj rá'astijre'e te'ɨ́jna ɨ́ tej té'atzaahuate'e. 15A'iné a'ɨ́ɨ pu ve'ecán jɨ́n tí'ivaɨre'e ta jetze me'ecan ɨ́ Dios jemi, a'ɨ́ɨ pu raayɨ́'ɨtɨ tɨ ayén tá'ancu'uvajxɨ'ɨn a'ɨ́jna jɨme'e tej caí tácaca'anej ɨ́ ta tzajta'a. A'ɨ́ɨ pu che'atá na'a nain jɨ́n tirajpuaíjtzica'a tetɨ́j iteen tirajpuaíjtzi. Ajta, a'ɨ́ɨ pu caí ti'itɨ́j jɨ́n até'ɨtzeaara. 16A'ɨ́j pu jɨ́n, tiché'e tiyen taxɨ́'evi'ira'a jɨ́n ajteáxɨɨre te'ájna vejli'i a'u tɨ a'utéjvee ɨ́ ɨpuari a'u tɨ a'ɨ́ɨn e'ecájca ɨ́ Dios tɨ ij a'ɨ́ɨn ayén tá'ancu'uvajxɨ'ɨn, tɨ́'ij ajta rɨ́'ɨ titaatá'an, tɨ ij ajta taatévaɨre'en ja'anáj tɨ na'a tɨ ruxe'eve'e.

will be added

X\