Hebreos 3

1A'ɨ́j pu jɨ́n, ayée xu huárɨni, ne'ihuaamua'a, mɨ tɨ Dios amua'itévi'itɨcɨ, a'iné mú'ejmi pu huatá'inee a'ɨ́ɨn tɨ júte'e é'eseijre'e sej si naími'i siyen huateáturan ɨ́ jemin. Setá'aj siyen se'ɨ́jna jetze tiú'umua'ati se'ɨ́jna jetze ɨ́ Jesús tɨ Dios ayén a'ɨ́jna jɨ́n tira'íjca tɨ titaatá'ixaate'en a'ɨ́jna jɨme'e ɨ́ niuucari ɨ́ tej rá'astijre'e. A'ɨ́ɨ pu Jesús ajta nain jɨ́n tí'ivaɨre'e ɨ́ Dios jemi tɨ ij taatévaɨre'en itejmi. 2Ayee pu che'atá na'a Jesús pu nain jɨ́n araúraste a'ɨ́jna jemi tɨ ayén ra'antíhua'u tɨ́j ajta a'ɨ́ɨn Moisés ayén nain jɨ́n araúraste tɨ́'ɨj ajmí'i tí'ivaɨre'eca'a ɨ́ chi'ira'an jetze ɨ́ Dios. 3Mɨ́ ajta, Dios pu ayén tiraaxɨ́'epɨ'ɨntari'iri'i tɨ ayén tiraavíjte'e tɨ jaítze'e rɨ́'ɨ tiraateájtuaani a'ɨ́jna ɨ́ Jesús caí a'ɨ́jna ɨ́ Moisés. Jee xaa ne'u, jaítze'e tu rɨ́'ɨ tiratá'aca te'ɨ́jna tɨ chi'i ta'ahuaca tecaí te'ɨ́jna ɨ́ chi'i. 4Ayee pu ti'ayajna a'iné tɨ́j na'a tɨ tí'iseijre'e ɨ́ chi'i, ja'atɨ́ pu rá'ajtaahuaca'a. Mɨ́ ajta Dios, a'ɨ́ɨ pu nain tiú'utaahuaca'a tɨ́j na'a tɨ tí'iseijre'e. 5Ajta a'ɨ́ɨn Moisés, nain pu jɨ́n araúraste tɨ́'ɨj auj tí'ivaɨre'eca'a ɨ́ chi'ira'an jetze ɨ́ Dios. Ayee pu 'een jɨ́n huarɨ́j, a'ɨ́ɨ pu ajta ayén te'anxájtaca'a a'ij mej méjca'i huáyee tiu'utaxájtache'e. 6Mɨ́ ajta a'ɨ́ɨn Cɨríistu'u, a'ɨ́ɨ pu ayén nain jɨ́n araúraste tɨ́'ɨj tí'ivaɨre'eca'a ɨ́ ruche. Jee xaa, a'ɨ́ɨ pu yaujra'an pú'eene'e a'ɨ́jna tɨ huatéechi'i. Teajta iteen, teen tu teɨtestemua'ame'en pú'een, teen tu teajta te'uun a'ujteí ɨ́ chi'ira'an jetze, tɨ pua'a tiyen te'utáviicua'i tej taxɨéehua tejá'uxajtane'en te'ɨ́jna ɨ́ tej jɨ́n tátemua'ave'e te'ɨ́jna jɨme'e ɨ́ tej rachú'eve'e. 7A'ɨ́j xu jɨ́n, setá'aj ráanamua temua'a naa a'ij tɨ ti'ixa a'ɨ́jna ɨ́ xɨéjniu'ucare'ara'an ɨ́ Dios, ayén tɨjɨ́n: Tɨ́ pua'a íjii seráanamua tɨ ayén tejá'amua'ixaate'e ɨ́ xɨéjniu'ucare'ara'an ɨ́ Dios. 8Caxu siyen che'atá sena'a ra'antánaamuan ɨ́ a'amua tzajta'a matɨ́j a'ɨ́ɨme ɨ́ mej ajca'ihuá'ɨmua huataújtze'ire ineetzi. A'ájna xɨcáara'an mej jetzen a'ij tiráataahuaca'a mej mi neja'upuá'ajte'en a'ájna a'u tɨ caí é'eti'itɨjca'a. 9A'uu mú miyen a'ij tiráataahuaca'a mej mi naamuá'itɨn, majta miyen me'uun é'etee a'achú cumu hua'apuate nine'ira'a mej tí'iseij netɨ́j nena'a rɨjcaa. 10A'ɨ́j nu jɨ́n hua'utájaaxɨejvi'iri'i ne'ɨ́mej ɨ́ teɨtejra'a. Neajta niyen tiu'utáneixaa yee ja'anáj tɨ na'a a'ɨ́ɨ mú a'ij pua'a tí'imua'atze ɨ́ ru tzajta'a. Majta, camu a'atzu ramua'aree a'ij nej tí'ijxe'eve'e. 11A'ɨ́j nu jɨ́n, neniú'ucara'a nu jɨ́n niyen te'atánratziiri'i mej caí ja'anáj me'uun a'uteáruti a'u mej e'ehuaújse'upe'en ineetzi jamuan. Ayee pu xaa tiu'utaxájtaca'a a'ɨ́jna ɨ́ Dios. 12Rɨ́'ɨ xu'u, ne'ihuaamua'a, tɨ ij caí ayén huataseíjre'en mú'ejmi jemi seɨ́j tɨ a'ij pua'a ti'itiújcha'ɨɨ ɨ́ ru tzajta'a, tɨ ajta caí té'atzaahuate'e. Caxu raatá'acare'en seɨ́j tɨ ayén 'een tɨ a'ɨ́ɨn ayén á'ujca'ane tɨ mé rúurɨeni a'ɨ́jna ɨ́ Dios tɨ i'irúuri. 13Seajta mú'een, setá'aj ca'aníjra'a huataúra'an seɨj seajta seɨj tɨ́j na'a nain xɨcáara'an tzajta'a sej seuj ruuri tɨ ij caí seɨ́j mú'een ayén ra'antánaamuan ɨ́ ru tzajta'a a'ɨ́jna jɨme'e tɨ ayén ráacuanamua a'ɨ́jna tɨ a'ij pua'a 'een. 14Jee xaa ne'u, ayée pu ruxe'eve'e sej siyen huárɨni, a'iné ayée pu ti'itɨ́j tí'itacɨ'ɨti jamuan ɨ́ Cɨríistu'u tɨ pua'a tiyen teuj te'utáviicua'i tɨ́j na'a rusén jɨme'e ɨ́ tej jɨ́n tátemua'ave'e te'ɨ́jna jɨme'e ɨ́ tej rachú'eve'e tetɨ́'ɨj tite'utéjhuii. 15Ayee pu xaa a'ij tɨ té'uyu'usi'ihuaca'a ɨ́ yu'uxari jetze tɨjɨ́n: Tɨ́ pua'a íjii seráanamua tɨ ayén tejá'amua'ixaate'e ɨ́ xɨéjniu'ucare'ara'an ɨ́ Dios. Caxu siyen che'atá sena'a ra'antánaamuan ɨ́ a'amua tzajta'a matɨ́j a'ɨ́ɨme ɨ́ mej ajca'ihuá'ɨmua huataújtze'ire ineetzi jemi. 16Majta a'ɨ́ɨme, ɨ́ mej ráanamuajri'i, majta ra'utéxɨeehuari'iri'i, a'ii mú a'ɨ́ɨn pú'een ɨ́ tɨ Moisés teecan hua'iráavi'itɨ a'ujna u Egipto. 17Ajta a'ɨ́ɨme, ɨ́ tɨ Dios ayén á'atee hua'apuate nine'ira'a tɨ huá'ajaaxɨejvi'i a'ɨ́mej, a'ii mú a'ɨ́ɨn pú'een ɨ́ mej auteájturaa ɨ́ Dios jemi, majta á'upua'areca'a me'újna já'ahua'a a'u tɨ caí é'eti'itɨjca'a. 18A'ɨ́ɨ mú majta me'ɨ́n pú'een ɨ́ tɨ huá'a jɨ́me'en Dios ayén te'ataújratziiri'i mej nu'u caí ja'anáj me'uun a'uteáruti a'u mej e'ehuaújse'upe'en a'ɨ́jna jɨme'e mej caí ra'ará'astijre. 19Jee xaa ne'u, ayée pu ti'ayajna tɨ ayén titá'amitɨejte'e tɨ caí ayén hua'ucɨ́'ɨ mej me'uun a'uteárute a'u mej e'ehuaújse'upe'en a'ɨ́jna jɨme'e mej caí té'antzaahua.

will be added

X\