Hebreos 2

1A'ɨ́j pu jɨ́n ayén ruxe'eve'e tej jaítze'e temua'a naa ra'ará'astijre'en te'ɨ́jna ɨ́ tej ráanamuajri'i, tej ti caí yá'uhua'axɨn. 2- 3Jee xaa ne'u, a'ɨ́jna ɨ́ niuucari ɨ́ mej mejmí'i raataxájtaca'a a'ɨ́ɨme ɨ́ mej ta japua tí'ivaɨre'e, a'ɨ́ɨ pu xaa tí'ivaɨre'eca'a. Ajta ja'atɨ́ tɨ na'a tɨ caí ti'itɨ́j jɨ́n ra'ará'astijre, ayée pu puaíjtzi ancuré'a a'ij tɨ tiraavíjte'eca'a. Tɨ́ pua'a ajmí'i ayén tihuá'uruu: ¿A'iné auj tí'irɨ'ɨri tɨ caí puaíjtzi taatá'an tɨ pua'a tiyen tiraatéxɨeehua te'ɨ́jna ɨ́ niuucari tɨ jɨ́n Dios tu'irátuaasin, tɨ ajta jeíhua huápɨ'ɨ ruxe'eve'e? Amuacaícan, tavástara'a pu ayén raataxájtaca'a. Ajta á'iyen, seica mú taata'ixaa a'ɨ́ɨme ɨ́ mej ráanamuajri'i. 4Dios pu ajta te'anxájtaca'a a'ɨ́jna jɨme'e tɨ ayén huarɨ́j ti'itɨ́j jɨme'e tɨ huápɨ'ɨ ruxe'eve'e, ajta ti'itɨ́j ɨ́ tej jɨ́n rɨ́'ɨ te'utaseíj. A'ɨ́ɨ pu ajta raateájtuaa ɨ́ ruxɨ́ejniu'uca huá'a jemi a'ij tɨ tira'aránajcheca'a tɨ ij a'ɨ́ɨn xɨéjniu'ucare'ara'an ayén hua'utá'an a'ij mej ye'í tiraayɨ́'ɨtɨhua'an. 5Ajta, capu Dios ayén a'ɨ́jna jɨ́n tihuau'íjca a'ɨ́mej ɨ́ mej ta japua tí'ivaɨre'e mej mi me'ɨ́jna jɨ́n antiújmua'areere muá'ara'ani ɨ́ chaanaca mej japuan huachéjme'e muá'aju'u, a'ɨ́jna ɨ́ chaanaca ɨ́ tej jɨ́me'en ti'ixa. 6Ayee pu ja'atɨ́ ja'anáj ayén tí'ixajtaca'a tɨjɨ́n: Mú'ee Dios, mú'eetzi jemi tɨ caí a'atzu ti'itɨ́j jɨ́n ruxe'eve'e ɨ́ teteca, matɨ́j mena'a pua'amé. ¿A'iné 'een jɨ́n piyen ra'utámua'areeri'i? Ajta, a'ɨ́ɨn tɨ jetzen airaújneijte ɨ́ teáata'a, ¿a'iné 'een jɨ́n piyen rɨ́'ɨ tiraatá'aca pej piyen rɨ́'ɨ tirájcha'ɨɨ? 7Ayee pej ráaruu tɨ ij a'atzu á'ateevi'in tɨ jaítze'e cɨliéene'e jɨ́n ti'itevée á'ara'ani caí a'ɨ́mej ɨ́ mej ta japua tí'ivaɨre'e. Mɨ́ pajta mú'ee, rɨ́'ɨ pej tiraatá'a pe'ɨ́jna jɨme'e pej ra'antíhua'u tɨ jeíhua huápɨ'ɨ tiráacɨ'ɨti mej mi naími'i naa rɨ́'ɨ tira'utaseíj. 8Pajta piyen ti'itɨ́j jɨ́n tira'íjca tɨ́'ij a'ɨ́ɨn ayén tihua'a'aíte'e a'ame ɨ́ teɨte mej mi naími'i ca'anéeri jɨ́n ra'ará'astijre'en. Tɨ́ pua'a ayén a'ɨ́jna jɨ́n tira'íjcatache'e mej mi naími'i ra'ará'astijre'en, capu mé'e jé'e ti'itɨjtaca'a tɨ caí ra'ará'astijre'eca'a. Mɨ́ ajta íjii, ayée pu jépɨ'ɨn seijre'e mej caí xɨ naími'i miyen rá'astijre'e. 9Mɨ́ ajta itejmi, ayée pu jépɨ'ɨn seijre'e jɨ́me'en a'ɨ́jna ɨ́ Jesús. Dios pu ayén ráaruu tɨ ij a'atzu á'ateevi'in jaítze'e cɨliéene'e jɨ́n ti'itevée á'ara'ani mecaí a'ɨ́ɨme ɨ́ mej ta japua tí'ivaɨre'e. Ajta íjii, Dios pu ayén rɨ́'ɨ raateájtuaa, ajta ve'ecán jɨ́n tira'íjca, a'ɨ́jna jɨme'e tɨ a'ɨ́ɨn Jesús ayén rajpuaíitzi já'araa a'ɨ́jna jɨme'e tɨ huamɨ́'ɨ. Dios pu ayén rɨ́'ɨ tihua'utá'a ɨ́ teɨte a'ɨ́jna jɨme'e tɨ a'ɨ́ɨn Jesús ayén naíjmi'ica jetze me'ecan huamɨ́'ɨ. 10Nain pu tiraacɨ́'ɨ a'ɨ́jna, ajta nain pu ayén jemin tí'iseijre'e a'ɨ́jna jɨme'e tɨ ayén nain tiú'utaahuaca'a. Ayee pu'u xaa ruxe'eve'eca'a tɨ a'ɨ́ɨn hua'irájtuaani mu'iicáca ɨ́ ruyaujmua'a mej mi jemin huateáturan tɨ́j na'a rusén jɨme'e. A'ɨ́j pu jɨ́n ayén tiraavíjte'e tɨ ayén raanaíjmire'en a'ɨ́jna tɨ já'ita'a vé'ejvee a'ɨ́jna jɨme'e tɨ ayén rajpuaíitzi já'araa, a'ɨ́jna tɨ hua'irátuaasin ɨ́ ruyaujmua'a. 11Ajta a'ɨ́ɨn tɨ huateúra'ate a'ɨ́mej, ajta a'ɨ́mej tɨ a'ɨ́ɨn ari hua'itévi'itɨcɨ, naími'i mú seɨ́j mena'a jetze ajtéme'ecan. A'ɨ́j pu jɨ́n, capu ratévi'iraste'e tɨ a'ɨ́ɨn ayén hua'atamuá'amuate'en tɨjɨ́n: “Ne'ihuaamua'a mú pú'een.” 12Ajta ayén tɨjɨ́n: Nee nu hua'utánamuajriste'esin a'ij pej ántehuaa huá'a jemi ɨ́ ne'ihuaamua'a. Nee nu rɨ́'ɨ timuaatá'asin huá'a tzajta'a a'ɨ́mej ɨ́ mej e'etiújse'ɨri. 13Ajtahua'a ayén tɨjɨ́n: Nee nu á'anca'ane ɨ́ jemin. Ajtahua'a rujéjcuatze'e, ayén tɨjɨ́n: Yee nu huatéjvee huá'a jamuan ɨ́ yaújmua'ame'en tɨ Dios naatávi'itɨste. 14- 15Majta a'ɨ́ɨme ɨ́ yaújmua'ame'en, ayée mú miyen che'atá mena'a éene'en téhua'ira'a, majta miyen éene'en téxuure'e, a'ɨ́j pu jɨ́n Jesús ayén huaújruu tɨ́'ij ayén che'atá na'a éene'en tehuá'ira'aca'a, ajta ayén éene'en téxuure'eca'a matɨ́j a'ɨ́mej. Ayee pu 'een jɨ́n huarɨ́j tɨ́'ij ayén ra'antipuá'ajte'en a'ɨ́jna ɨ́ tɨ a'ɨ́jna jɨ́n antiújmua'aree ɨ́ mej jɨ́n huácui'ini ɨ́ teɨte. A'ii pu a'ɨ́ɨn pú'een ɨ́ tiyaaru'u. A'ɨ́j pu jɨ́n Jesús huá'a jetze me'ecan huamɨ́'ɨ, tɨ ij ajta hua'irájtuaani a'ɨ́mej ɨ́ mej ca'anéeri jɨ́n seijre'eca'a tɨ́j na'a mej auj ruuri mej miyen tí'itziɨɨne'eca'a mej huácui'ini. 16Jee xaa ne'u ayén ti'ayajna, capu ayén huaújruu matɨ́j a'ɨ́mej ɨ́ mej ta japua tí'ivaɨre'e tɨ́'ij hua'utévaɨre'en sino ayée pu huaújruu matɨ́j a'ɨ́mej ɨ́ mej Abraham jetze airaújneijte. 17A'ɨ́j pu jɨ́n, ayén ruxe'eve'eca'a tɨ a'ɨ́ɨn ayén seɨcɨé huaújruuren tɨ ij ayén éene'en seijre'e matɨ́j a'ɨ́ɨme ɨ́ ihuáamua'ame'en nain jɨme'e tɨ ij ayén a'ɨ́jna jɨ́n te'enteárute ɨ́ Dios jemi, tɨ ij ayén nain jɨ́n tiu'utévaɨre'en ɨ́ Dios jemi, tɨ ij ajta ayén huá'ancu'uvajxɨ'ɨn ɨ́ teɨte tɨ ij ajta caí ja'anáj ti'itɨ́j jɨ́n até'ɨtze'ara'an, tɨ ij ajta huá'ari'i ɨ́ mej jɨ́n auteájturaa ɨ́ Dios jemi. 18Pu'uri xaa ne'u rɨ'ɨrí tɨ a'ɨ́ɨn ayén hua'utévaɨre'en a'ɨ́mej ɨ́ mej á'aviicua'ire'e ti'itɨ́j jɨme'e, a'iné a'ɨ́ɨ pu ari rajpuaíitzi já'araa, ajta rá'uviicua'iri'i.

will be added

X\