Hebreos 10

1Ajta a'ɨ́ɨn ɨ́ niuucari ɨ́ mej jɨ́n tí'aijta, ayée pu'u na'a 'een tɨ́j cɨéenime'ara'an tɨ́j na'a tɨ í'ixɨ'epɨ'ɨn tɨ ayén teja'uré'enejsin. Capu a'ɨ́ɨn pú'een a'ɨ́jna tɨ tzáahuati'ira'a jɨ́n seijre'e ɨ́ Dios jemi. Ajta, a'iné ayée pu ruxe'eve'e mej miyen che'atá mena'a tiu'utámuaɨ'ɨvejta tɨ́j na'a seɨ́j nine'ira'a jɨme'e, a'ɨ́j pu jɨ́n capu a'atzu a'ij tí'irɨ'ɨri tɨ a'ɨ́ɨn niuucari ayén hua'unaíjmire'en a'ɨ́mej ɨ́ mej jemin ajteáxɨɨri ɨ́ Dios jemi. 2Na'ari caí, tɨ pua'a pɨ́ na'a, ¿ni qui mecaí raatapuá'ajtanche'e mej miyen tiu'utámuaɨ'ɨvejta? Jee xaa ne'u, a'iné tɨ pua'a miyen tihua'utá'uuni'irache'en ɨ́ mej jɨ́n auteájturaa ɨ́ Dios jemi, camu ché'e miyen ra'utámua'aréerejche'e mej ti'itɨ́j jɨ́n auteáturan. 3Mɨ́ ajta, ayée mú me'ɨ́jna jɨ́n ra'utámua'aree tɨ́j na'a seɨ́j nine'ira'a ɨ́ mej jɨ́n Dios jemi auteájturaa me'ɨ́jna jɨme'e mej miyen tí'imuaɨ'ɨvejtaca. 4Ayee pu'u na'a, a'iné capu rɨ'ɨrí tɨ ayén a'ɨ́jna jɨ́n tihua'utá'uuni'i ɨ́ mej jɨ́n auteájturaa ɨ́ Dios jemi a'ɨ́jna jɨme'e ɨ́ hua'axuure'e a'ɨ́mej ɨ́ tuuru'use, majta a'ɨ́mej ɨ́ caurasi. 5A'ɨ́j pu jɨ́n, tɨ́'ɨj a'ɨ́ɨn Cɨríistu'u yen huataseíjre íiyen chaanaca japua, ayée pu tiu'utaxájtaca'a tɨjɨ́n: Capej piyen raataxɨ́'eve nej ti'itɨ́j tiu'utámuaɨ'ɨvejta na'ari nej ti'itɨ́j tiu'utátuiire'en mú'eetzi jemi, sino ayée pej rɨ́'ɨ náaruu ɨ́ nej ratéhua'ira'a. 6Capu a'atzu mua'aránajcheca'a mej miyen tiu'utámuaɨ'ɨvejta mú'eetzi jemi ɨ́ mej hua'uteátaij na'ari ɨ́ mej miyen tiu'utátuiri'i mú'eetzi jemi a'ɨ́jna jɨme'e ɨ́ mej jɨ́n auteájturaa mú'eetzi jemi. 7Netɨ́'ɨj ni niyen tiu'utáneixaa yee: “Me'ecui xaa, ayée nu 'een jɨ́n mú a'uvé'emej nej ni niyen te'ará'asten a'ij pej tí'ijxe'eve'e, mú'ee, mɨ pej Dios pú'een, a'ij tɨ neetzi jɨme'e té'eyu'usi'i ɨ́ yu'uxari jetze tɨ jíri'i.” 8Amuacaí pu ayén tiu'utaxájtaca'a yee tɨ Dios caí ra'aránajcheca'a mej miyen tiu'utámuaɨ'ɨvejta na'ari mej ti'itɨ́j tiu'utátuiire'en ɨ́ jemin. Ajta yee tɨ caí raataxɨ́'eve mej miyen tiu'utámuaɨ'ɨvejtaca'a ɨ́ mej hua'uteátaij nusu mej me'ɨ́jna jɨ́n tiu'utámuaɨ'ɨvejtaca'a me'ɨ́jna jɨme'e ɨ́ mej jɨ́n auteájturaa ɨ́ Dios jemi. Naími'i tɨ́j na'a mej miyen tí'imuaɨ'ɨvejta, ayée pu tíhua'uta'aíj mej miyen huárɨni a'ɨ́jna ɨ́ niuucari ɨ́ mej jɨ́n tí'aijta. 9Ajta á'iyen ayén tiu'utaxájtaca'a tɨjɨ́n: “Me'ecui xaa, ayée nu 'een jɨ́n mú a'uvé'emej nej ni niyen te'ará'asten a'ij pej tí'ijxe'eve'e mú'ee, mɨ pej Dios pú'een.” Ayee pu huataújmua'a a'ɨ́jna tɨ raataxájtaca'a tɨ a'ɨ́ɨn ari ra'uré'uu a'ɨ́jna ɨ́ niuucari tɨ amuacaí huatétuiihuaca'a tɨ ij raateájtuaani ɨ́ tu'uvé'eteajtɨ. 10Ajta, a'iné ayén ruxɨ́'evi'ira'a jɨ́n mú a'uvé'emej, a'ɨ́ɨ pu ajta ayén tu'iráavi'itɨ tɨ́j na'a rusén jɨme'e a'ɨ́jna jɨme'e tɨ ayén huataújmuaɨ'ɨvejtaca'a ɨ́ rutevij jɨme'e a'ɨ́jna ɨ́ Jesús tɨ ajta Cɨríistu'u pú'een. 11Ajta ja'atɨ́ tɨ na'a tɨ ve'ecán jɨ́n ti'itéjvee ɨ́ Dios jemi, ayée pu nain tújca'ari tzajta'a tí'ivaɨre'e a'ɨ́jna jɨme'e ɨ́ tɨ jɨ́n tira'íjca. Ja'anáj tɨ na'a ayén che'atá na'a tí'imuaɨ'ɨvejtaca, a'ɨ́jna tɨ caí ti'itɨ́j vaɨre'e tɨ ij tihua'utá'uuni'i ɨ́ mej jɨ́n auteájturaa ɨ́ Dios jemi. 12Mɨ́ ajta a'ɨ́ɨn Cɨríistu'u, tɨ́'ɨj ayén seɨ́j na'a tiu'utámuaɨ'ɨvejtaca'a tɨ ij ayén tihua'utá'uuni'i tɨ́j na'a rusén jɨme'e ɨ́ mej jɨ́n auteájturaa ɨ́ Dios jemi, a'ɨ́ɨ pu a'uun a'ujyeíjxɨ rɨ'ɨríinta'a ɨ́ Dios. 13- 14Aj pu'i a'utéjche tɨ raachú'eve'en asta na'a caí temua'a naa tihua'utémua'itɨn naíjmi'ica ɨ́ mej rájcha'ɨɨre'e, a'iné seɨ́j pu jɨ́n ɨ́ muaɨ'ɨvéjri, ayén hua'unaíjmire tɨ́j na'a rusén jɨme'e a'ɨ́mej ɨ́ tɨ hua'iráavi'itɨ. 15Ajta a'ɨ́ɨn xɨéjniu'ucare'ara'an ɨ́ Dios, ayée pu che'atá na'a ti'ixa itejmi jemi. Amuacaí pu ayén tiu'utaxájtaca'a tɨjɨ́n: 16Ayee pu ti'ixa ɨ́ tavástara'a tɨ jɨ́me'en yee: A'ii pu a'ɨ́ɨn pú'een ɨ́ niuucari ɨ́ nej jɨ́n te'atánratziiri'i huá'a jemi tɨ́'ɨj te'entipuá'are a'ájna xɨcáara'an jetze. Nee nu niyen hua'utá'asin mej mi miyen ra'utámua'aree ɨ́ ru tzajta'a ɨ́ niuucari ɨ́ nej jɨ́n tí'aijta. Neajta nu niyen raateátuaasin ne'ɨ́jna ɨ́ niuucari ɨ́ huá'amua'atziira'a jetze. 17Ajta ayén ti'ixa tɨjɨ́n: Canu ché'e ra'utámua'areeri'i ɨ́ mej jɨ́n neetzi jemi auteájturaa na'ari ɨ́ mej jɨ́n a'ij pua'a ti'itiújcha'ɨɨca'a. 18A'ɨ́j pu jɨ́n, camu ché'e miyen tí'imuaɨ'ɨvejtaca me'ɨ́jna jɨme'e ɨ́ mej jɨ́n auteájturaa ɨ́ Dios jemi, a'iné Dios pu ari tihua'utá'uuni'iri'i. 19Ajta íjii, ne'ihuaamua'a, ayée pu ti'itá'aca tej ti taxɨéehua te'uun a'uteárute teyujta'a a'u tɨ Dios e'irájca a'ɨ́jna jɨme'e tɨ a'ɨ́ɨn Jesús ra'iráaxɨre ɨ́ ruxuure'e ta jetze me'ecan. 20A'ɨ́j pu jɨ́n ayén jéjcuacan jɨ́n taatájuyete ɨ́ tej japuan huajú'un tej ti teajta já'ita'a a'uteárute a'u tɨ e'ecáaviɨj a'ɨ́jna ɨ́ cɨ́ɨxuri tej ti te'uun tzajta'an ruurican jɨ́n huateáturan te'ɨ́jna jemi a'ɨ́jna jɨme'e tɨ rujɨ́me'en huataújmuaɨ'ɨvejtaca'a. Ajta a'ɨ́ɨn ɨ́ cɨ́ɨxuri, yee pu huataújmua'a ɨ́ tévira'an a'ɨ́jna ɨ́ Jesús. 21Ajta, íjii pu ayén ve'ecán jɨ́n tí'ivaɨre'e ɨ́ jemin ta jetze me'ecan ɨ́ tej teɨtestemua'ame'en pú'een ɨ́ Dios. 22A'ɨ́j pu jɨ́n, tiché'e tiyen vejli'i ajteáxɨɨre ɨ́ jemin tetɨ́j teɨte ɨ́ tej tzáahuati'ira'a jɨ́n urarɨ́'en seijre'e ɨ́ ta tzajta'a. Tiché'e taxɨéehua jemin ajteáxɨɨre te'ɨ́jna jɨme'e tej tiyen rá'atzaahuate'e tɨ ayén ti'ayajna tɨ a'ɨ́ɨn Dios rɨ́'ɨ titaatá'asin a'ɨ́jna jɨme'e tɨ a'ɨ́ɨn Cɨríistu'u ari taaté'ɨiraxɨ ɨ́ taxɨejniu'uca jetze tej ti caí ché'e ra'utámua'aree ɨ́ tamua'atzíira'a jetze a'ɨ́jna tɨ a'ij pua'a 'een. Nain pu jɨ́n icu, taaté'ɨiraxɨ ɨ́ ta jetze. 23Tiché'e tiyen te'ɨ́jna jɨ́n te'utáviicua'i tej teuj tiyen té'atzaahuate'e a'ij tej teri tihua'utá'ixaa ɨ́ teɨte a'ɨ́jna jɨme'e ɨ́ tej rachú'eve'e. Ché'e caí ti'itɨ́j ayén ca'aníjra'a tatá'acare'en tej ti caí ché'e té'atzaahuate'e ɨ́ Cɨríistu'u, a'iné a'ɨ́ɨ pu caí ja'anáj ti'itɨ́j jɨ́n até'ɨtzeaara tɨ runiuuca jɨ́n te'ataújratziiri'i itejmi jemi. 24Tiché'e tiyen huárɨni tej ti ca'aníjra'a huatáta'an seɨj teajta seɨj tej ti huátaxe'eve'en, teajta tiyen huárɨni tɨ xɨ́'epɨ'ɨn jɨme'e. 25Tiché'e caí raxɨéehuata tej tiyen caí ché'e e'etítase'ɨrihua'an a'ij mej tí'ijrɨ'ɨre ɨ́ seica, sino tiché'e jaítze'e ca'aníjra'a huatáta'an tej ti tiyen rɨ́'ɨ ti'ihuátaxe'eve'en tetɨ́j ta'ihuaamua'a te'ɨ́jna jɨme'e tɨ ayén titá'amitɨejte'e tɨ a'ájna xɨcáara'an jetze ari teja'uré'enejsin. 26- 27Mɨ́ ajta, tɨ pua'a tiyen taxɨ́'evi'ira'a jɨ́n teuj tiyen a'ij pua'a ti'itítacha'ɨɨ tetɨ́'ɨj teri ráamua'areeri'i a'ij tɨ tirá'axa a'ɨ́jna jetze ɨ́ yu'uxari tɨ tzáahuati'ira'a jɨ́n té'axa, capu ché'e tí'itacɨ'ɨti seɨ́j ɨ́ muaɨ'ɨvéjri ɨ́ tɨ jɨ́n Dios titaatá'uuni'i, sino a'ɨ́ɨ pu'u xaa ayén tí'itacɨ'ɨti a'ɨ́jna tɨ tziɨ́ɨni'ire'e, tɨ a'ɨ́ɨn Dios puaíjtzi jɨ́n taatá'asin. Huápɨ'ɨ pu puaíjtzi jɨ́n hua'utá'asin a'ɨ́mej ɨ́ mej rájcha'ɨɨre'e. Ayee pu a'ɨ́jna jɨ́n huá'aruuren tɨ́j taij tɨ nain jɨ́n tí'ita'iraca a'ɨ́jna jɨme'e tɨ huápɨ'ɨ niu'ucamɨ'ɨ. 28Jɨ́me'en a'ɨ́jna ɨ́ niuucari tɨ ra'utéyu'uxaca'a a'ɨ́jna ɨ́ Moisés teecan, tɨ pua'a hua'apua, na'ari huaíca meti'iseíiraca'a tɨ ja'atɨ́ ayén ti'itɨ́j jɨ́n auteájturaa a'ɨ́jna jemi ɨ́ niuucari ɨ́ mej jɨ́n tí'aijta, tɨ pua'a miyen raataxáj yee a'ɨ́ɨ pu ti'itɨ́j jɨ́n auteájturaa, camu ché'e rá'ancu'uvajxɨ'ɨsin, sino méjje'icatan. 29Ajta jaítze'e pu a'ij pua'a tí'iracɨ'ɨti a'ɨ́jna ɨ́ ja'atɨ tɨ pua'a mé rúurɨeni a'ɨ́jna tɨ yaujra'an pú'een ɨ́ Dios. Jéihua pu huápɨ'ɨ jaítze'e puaíjtzi jɨ́n tiraatá'asin a'ɨ́jna jɨme'e tɨ a'ɨ́jna ɨ́ ja'atɨ ayén raatéxɨeehuataca'a a'ɨ́jna ɨ́ xúure'e tɨ jɨ́n raaxɨ́'epɨ'ɨntare a'ɨ́jna ɨ́ niuucari tɨ jɨ́n Dios te'ataújratziiri'i, tɨ ajta jɨ́n Dios ru'iráavi'itɨ. A'ɨ́j pu ajta jɨ́n raataniú'ucaste a'ɨ́jna ɨ́ xɨéjniu'ucare'ara'an ɨ́ Dios. 30Ayee pu té'eme, a'iné tu'uri ramua'ate a'ɨ́jna tɨ ayén raataxájtaca'a tɨjɨ́n: “Ayee pu tí'inecɨ'ɨcɨpua ineetzi nej ni puaíjtzi raatá'an ne'ɨ́jna ɨ́ ja'atɨ.” Ajta ayén tiu'utaxájtaca'a tɨjɨ́n: “Tavastara'a pu huá'axɨjte'en ɨ́ ruteɨ́testemua'a.” 31Jee xaa ne'u, jeíhua pu huápɨ'ɨ tziɨ́ɨni'ire'e tɨ Dios tɨ i'irúuri ayén ra'uxɨ́jte'en seɨ́j tɨ a'ij pua'a ti'itiújcha'ɨɨ ɨ́ jemin. 32Setá'aj ra'utámua'aree a'ij tɨ éeni'icɨ'e seijre'eca'a a'ájná'ɨmua, setɨ́'ɨj amuacaí ra'ancuré'a se'ɨ́jna ɨ́ tavástara'a. Aj xu si te'utáviicua'iri'i se'ɨ́jna ɨ́ sej jɨ́n huáviicua'ire. Jéihua xu rajpuaíjtzica'a. 33A'ajná'ɨmua ne'u mú miyen amá'uxɨeehuari'iri'i, meti'iseíiraca'a ɨ́ teɨte. Majta, a'ij mú pua'a amuáaruu. A'ajná'ɨmua ne'u, mú'een xu seajta ca'aníjra'a hua'utá'a a'ɨ́mej ɨ́ seica, ɨ́ mej miyen che'atá mena'a rajpuaíjtzica'a, a'iné naími'i xu ru'ihuaamua'a pú'een. 34Mú'een xu huá'ancu'uvajxɨ a'ɨ́mej ɨ́ mej aiteánami'ihuaca'a. Seajta siyen se'ɨ́jna jɨ́n huataújtemua'ave temua'a naa matɨ́'ɨj miyen tejamuá'ari'iri'i ɨ́ sej tí'ijcha'ɨɨca'a. Ayee xu 'een jɨ́n siyen huataújtemua'ave, a'iné xu'uri ramua'areereca'a rujɨ́ɨmua'a sej siyen tí'ijcha'ɨɨ ɨ́ Dios jemi se'ɨ́jna tɨ tejá'amua'a tɨ jaítze'e rɨ́'en, tɨ ajta ayén seíire'e a'ame tɨ́j na'a rusén jɨme'e. 35A'ɨ́j pu jɨ́n, caxu yá'ujɨpuan ɨ́ sej a'ujca'anéecan jɨ́n rachú'eve'e, a'iné jeíhua pu huápɨ'ɨ tejá'amuacɨ'ɨti a'ɨ́jna jɨme'e sej siyen te'utáviicua'iri'i. 36Jee xaa ne'u, ayée pu ruxe'eve'e sej siyen te'utáviicua'i, sej si seajta siyen huárɨni a'ij tɨ a'ɨ́ɨn tí'ijxe'eve'e tɨ i ayén tejamuáacɨ'ɨti a'ɨ́jna ɨ́ tɨ jɨ́n Dios te'ataújratziiri'i mú'ejmi jemi. 37Ayee pu'u na'a, a'iné capu a'atzu á'ateeri a'ij tɨ té'eyu'usi'i tɨjɨ́n: A'ɨ́jna tɨ yé uvé'enejsin, a'ɨ́ɨ pu xaa huataseíjre'esin. Capu ché'e á'ateeri. 38Ajta a'ɨ́ɨn tɨ rɨ'éene'ecán jɨ́n huateájturaa ineetzi jemi, a'ɨ́ɨ pu a'ɨ́jna jɨ́n ruuri a'ame a'ɨ́jna jɨme'e tɨ té'atzaahuate'e. Mɨ́ ajta, tɨ pua'a a'ɨ́ɨn caújxɨeehuata, capu a'atzu na'aranáache a'ame yú ne tzajta'a. 39Mɨ́ teajta iteen, catu huá'a jetze ajtéme'ecan ɨ́ mej miyen caújxɨeehuataca, a'ɨ́ɨme ɨ́ tɨ Dios hua'antipuá'ajte'esin. Catu xaa ne'u, sino teen tu huá'a jetze ajtéme'ecan ɨ́ mej té'atzaahuate'e, a'ɨ́ɨme ɨ́ tɨ Dios hua'irátuaasin tɨ́j na'a rusén jɨme'e.

will be added

X\