Hebreos 1

1Ayee pu jéjcua ɨmuá, Dios mu'iitɨ́ tihua'utá'ixaa ɨ́ tavaújsimua'acɨ'ɨ, mu'iicáca jɨme'e ɨ́ niuucari. A'ajná'ɨmua Dios pu ayén seica huata'íteca'a mej mi tiu'utaxáj Dios jetze me'ecan. 2Mɨ́ ajta íjii, tej huáteɨte, tɨ́j na'a tɨ nain araúrastejsin, a'ɨ́ɨn Dios ayén tira'íjca ɨ́ ruyauj tɨ ij a'ɨ́ɨn titaatá'ixaate'en ɨ́ Dios jetze me'ecan. A'ɨ́ɨ pu ajta ayén tíra'antíhua'u tɨ́'ij nain tí'ijcɨ'ɨti a'ɨ́jna ɨ́ yaujra'an. Dios pu ajta jamuan tiú'utaahuaca'a ɨ́ chaanaca ɨ́ tej japuan yen seijre'e. 3Ajta a'ɨ́ɨn ɨ́ yaujra'an, ayée pu nain jɨ́n che'atá na'a rɨ́'ɨ huápɨ'ɨ naa seijre'e tɨ́j ajta ɨ́ Dios. Ajta ɨ́ tévira'an, ayée pu che'atá na'a seijre'e tɨ́j ajta ɨ́ Dios. A'ɨ́ɨ pu ajta raví'i tɨ́j na'a tɨ íiyen tí'iseijre'e ɨ́ chaanaca japua, ajta u ta japua. Runiuuca pu jɨ́n huápɨ'ɨ antiújmua'aree, a'ɨ́ɨ pu ayén rɨcɨ tɨ́'ij á'ateevi'in. Tɨ́'ɨj a'ɨ́ɨn yaujra'an tihua'acá'ari'iri'i ɨ́ mej jɨ́n auteájturaa ɨ́ Dios jemi, aj pu'i a'uun a'ujyeíjxɨ ɨpuari japua rurɨ'ɨríinta'a a'ɨ́jna tɨ nain jɨ́n antiújmua'aree, tɨ júte'e é'eseijre'e. 4Ayee pu 'een jɨ́n huarɨ́j, ajta ayén te'irájraa tɨ a'ɨ́ɨn ayén huápɨ'ɨ jaítze'e rɨ'éene'e já'araa mecaí a'ɨ́mej ɨ́ xɨéjniu'ucari ɨ́ mej ta japua tí'ivaɨre'e. Ajta jeíhua pu jaítze'e tí'ivaɨre'e ɨ́ Dios jemi a'ɨ́jna ɨ́ niuucari tɨ jɨ́n Dios ari raatamuá'a ɨ́ ruyauj caí a'ɨ́jna ɨ́ niuucari tɨ ajta jɨ́n hua'utamuá'a a'ɨ́ɨme ɨ́ mej ta japua tí'ivaɨre'e. 5Ayee pu'u xaa, Dios capu ja'anáj ayén tiraata'ixaa seɨ́j tɨ huá'a jetze ajtéme'ecan tɨ́j ayén tiraata'ixaa ɨ́ ruyauj tɨjɨ́n: Mú'ee pej niyauj pú'een. Neajta inee, íjii nu mua'antíhuau. Ajta ayén tɨjɨ́n: Nee nu ya'upuáara'an pu'éene'e na'ame. Ajta amɨ́n, amɨ́ pu niyauj pu'éene'e a'ame. 6Ajta, tɨ́'ɨj ayén ye'eráavi'itɨ íiyen chaanaca japua a'ɨ́jna tɨ jéjcua ɨmuá seijre'eca'a, ayée pu tiu'utaxájtaca'a tɨjɨ́n: Miché'e me'ɨ́n raateánajche matɨ́j mena'a pua'amé ɨ́ mej tí'ivaɨre'e ɨ́ Dios jemi. 7Ajta, ayée pu huá'a jɨme'e ti'ixa a'ɨ́mej ɨ́ mej ta japua tí'ivaɨre'e tɨjɨ́n: Ayee pu huá'aruure a'ɨ́mej ɨ́ mej tí'ivaɨre'e u ta japua mej mi miyen seijre'e tɨ́j eeca, majta mej mi miyen seijre'e tɨ́j taij tɨ á'ataa a'ɨ́ɨme ɨ́ tɨ tihuá'aijte'e. 8Mɨ́ ajta, jɨ́me'en ɨ́ ruyauj, ayée pu ti'ixa tɨjɨ́n: Mú'ee, mɨ pej Dios pú'een, mú'ee pej antí'amua'aréere pua'amé tɨ́j na'a rusén jɨme'e. Pepu'uri icu ru'itéechui ɨ́ 'itzɨ́ ɨ́ mej jɨ́n ráamua'aree pej urarɨ́'en jɨ́n seijre'e, pej pajta xɨ́'epɨ'ɨn tí'aijta a'ij tɨ tiraavíjte'e. 9Mú'ee pej raataxɨ́'eve mej rɨ́'ɨ ti'itiújcha'ɨɨ tzáahuati'ira'a jɨme'e. Ajta, capu a'atzu mua'aránajcheca'a mej a'ij pua'a ti'itiújcha'ɨɨca'a. A'ɨ́j pu jɨ́n, a'ɨ́ɨn Dios ɨ́ pej jemin seijre'e, a'ɨ́ɨ pu ayén rɨ́'ɨ timuaateájtuaa patá'aj jaítze'e huatá'atemua'ave'en mecaí a'ɨ́ɨme ɨ́ mej mú'eetzi jamuan seijre'e. 10Ajta ayén tɨjɨ́n: Mú'ee, nevástara'a, jéjcua ɨmuá pej raatétaahuaca'a ɨ́ chaanaca. Ajta, tɨ́j na'a tɨ íiye seijre'e u ta japua, amuájca'a pej jɨ́n raatétaahuaca'a. 11A'ɨ́ɨ pu te'entipuá'ajte tɨ́j na'a pua'amé tɨ tí'iseijre'e. Mɨ́ pajta mú'ee, paúche'e pej huatevée pua'amé. Ajta tɨ́j na'a tɨ tiú'utaavijhuaca'a, ayée pu tiu'utémí'ime'ecantari tɨ́j cɨ́ɨxuri tɨ caí ché'e ti'itɨ́j vaɨre'e. 12Ayee pej raatéxu'uta'inaxɨ'ɨsin tɨ́j cɨ́ɨxuri tɨ mí'ime'ecan, ɨ́ mej raateájtutzi. Naími'i pu seɨcɨé ruruuren. Mɨ́ pajta mú'ee, paúche'e piyen che'atá pena'a seijre'e tɨ́j na'a rusén jɨme'e. Capej ja'anáj á'apua'aren. 13Dios capu ja'anáj ayén tiraata'ixaa seɨ́j tɨ ta japua tí'ivaɨre'e sino ruyauj pu xaa ayén tiu'utá'ixaa tɨjɨ́n: Patá'aj yé a'ujyeíjxɨ'ɨn nejrɨ'ɨrínta'a. Patá'aj piyen huácatii ajta nena'a caí hua'antimuá'itɨn a'ɨ́mej ɨ́ mej muájcha'ɨɨre'e mej mi miyen timua'ará'astijre'en mú'eetzi. 14Capu xaa ne'u ayén tihua'utá'ixaa a'ɨ́mej ɨ́ mej ta japua tí'ivaɨre'e a'iné a'ɨ́ɨ mú a'ɨ́ɨn pú'een ɨ́ xɨéjniu'ucari tɨ Dios ayén tihuá'aijte'e mej mi miyen tí'ivaɨre'e mé'ujujhua'ane'en, mej mi hua'utévaɨre'en a'ɨ́mej ɨ́ tɨ huá'acɨ'ɨti tɨ Dios hua'irájtuaani.

will be added

X\