Gálatas 6

1Ne'ihuaamua'a, tɨ pua'a seɨ́j mú'een auteáturan ti'itɨ́j jɨme'e, setá'aj siyen huárɨni. Ché'e seɨ́j mú'een rɨ́'ɨ ráaruuren. Ajta a'ɨ́ɨn tɨ rɨ́'ɨ ráaruurejsin, ché'e a'ɨ́ɨn pu'éene'e ɨ́ tɨ jaítze'e araujca'anée a'ɨ́jna jetze ɨ́ xɨéjniu'ucare'ara'an ɨ́ Dios. Ché'e ajta rɨ́'ɨ tí'itiújcha'ɨɨ́can jɨ́n ayén rɨ́'ɨ ráaruuren, ajta caí yá'uhua'anan tɨ í'irɨ'ɨri tɨ ti'itɨ́ ca'aníjra'a raatá'an tɨ ij ayén che'atá na'a auteáturan tɨ́j ajta ɨ́ seɨ́j. 2Sej si ra'ará'astijre'en ɨ́ niuucari tɨ Cɨríistu'u jetze me'ecan. Ruxe'eve'e sej siyen huateújvaɨre'en seɨ́j ajta seɨj se'ɨ́jna jɨme'e tɨ ja'atɨ́ te'utáviicua'i a'ɨ́jna tɨ raatamuárɨ'eriste'e. 3Ayee pu'u, a'iné tɨ pua'a ja'atɨ́ ayén tiraatámitɨejte'e tɨ a'ɨ́ɨ na'a ruseɨ́j jeíhua ruxe'eve'e, tɨ pua'a caí ti'itɨ́, a'ɨ́ɨ pu rucuanamuan ruseɨ́j ɨ́ ru tzajta'a. 4Mɨ́ ajta, ché'e ayén éene'en tɨ ja'atɨ́ tɨ na'a ayén tiráamua'ati a'ij tɨ tí'imɨjhuaca ruseɨ́j. Tɨ́'ɨjta ayén huarɨ́n, aj pu xaa rɨ'ɨríista a'ame tɨ ahuaújtzaahuate'en, aru a'ɨ́ɨ pu'u na'a a'ɨ́jna jɨme'e tɨ ari tiú'uruu ruseɨ́j. Capu ché'e ruxe'eve'e a'ame tɨ a'ɨ́ɨn ayén ahuaújtzaahuate'en a'ɨ́jna jɨme'e tɨ ayén nu'u jaítze'e ruxe'eve'e caí ɨ́ ruxɨ́'ej tevi. 5Ché'e ayén éene'en a'iné ayée pu ruxe'eve'e tɨ ja'atɨ́ tɨ na'a ayén rá'aviicua'iran a'ɨ́jna jɨme'e tɨ raatamuárɨ'eriste'e. 6Ajta a'ɨ́ɨme tɨ ja'atɨ́ ayén tihuá'amua'ate a'ij tɨ té'eyu'usi'i ɨ́ yu'uxari jetze, miché'e me'ɨ́n cɨ́j tiraatá'an ɨ́ tɨ jɨ́n huateújvaɨre'en a'ɨ́jna tɨ tihuá'amua'ate. 7Caxu siyen rucuanamua. Capu rɨ'ɨrí sej raatéxɨeehuata ɨ́ Dios, a'iné a'ɨ́ɨ pu tiu'utanájchita a'ij tɨ tiraavíjte'e. A'achú sej caj tiu'utá'an, ayée pu che'atá na'a tejá'amuacɨ'ɨti. 8A'ɨ́jna ɨ́ ja'atɨ tɨ ayén ti'itiújcha'ɨɨ tɨ ij ayén rɨ́'ɨ tiraatá'an ɨ́ ruxɨ́'evi'ira'a tɨ a'ij pua'a een tɨ huiiráninei ɨ́ tzajta'an, ayée pu tí'iracɨ'ɨti tɨ tejá'urɨeeni a'ɨ́jna jɨme'e ɨ́ ruxɨ́'evi'ira'a tɨ a'ij pua'a een. Ajta a'ɨ́ɨn ɨ́ ja'atɨ tɨ ayén rɨ́'ɨ ti'itiújcha'ɨɨ tɨ ayén rɨ́'ɨ tiraatá'an a'ɨ́jna ɨ́ xɨéjniu'ucare'ara'an ɨ́ Dios, ayée pu tí'iracɨ'ɨti tɨ ayén ruurican huateáturan ɨ́ Dios jemi tɨ́j na'a rusén jɨme'e. 9Tiché'e caí taxɨeemɨjte'e te'ɨ́jna jɨme'e tej tiyen raruure ɨ́ tɨ i'i xɨ́'epɨ'ɨn, a'iné tɨ́'ɨj a'ájna teja'uré'enen ja'anáj tɨ huaújxɨ'epɨ'ɨntare, tɨ pua'a tecaí amuacaícan raatéxɨeehuata, a'ájna xɨcájra'a jetze pu xaa tí'itacɨ'ɨti nain a'ij tɨ tiraavíjte'e. 10A'ɨ́j pu jɨ́n, tɨ́j na'a tɨ ayén tí'itacɨ'ɨti tej tiyen huárɨni, tiché'e tiyen rɨ́'ɨ tihuá'ucha'ɨn ɨ́ taxɨ́'ej teɨte. Teta'aj jaítze'e rɨ́'ɨ tihuá'ucha'ɨn a'ɨ́mej ɨ́ mej majta ta jamuan té'atzaahuate'e. 11Rɨ́'ɨ xu'u mú'een tiraaseíj a'ij nej ve'ecán jɨ́n tira'uyú'uxaca'a ɨ́ nemuajca'a jɨme'e. 12Mɨ́ majta, a'ɨ́ɨme ɨ́ mej á'amua'ɨtziite'e, ayée mu'u een jɨ́n tí'itese'e sej si ca'anéjri jɨ́n ra'ajtásiichixɨ'ɨn ɨ́ runavij mej mi rujɨ́ɨmua'a mena'a huateújvaɨre'en. Camu raxɨ́'eve'e tɨ puaíjtzi hua'utá'an a'ɨ́jna jɨme'e mej nu'u majta ra'ará'astijre'en me'ɨ́jna ɨ́ Cɨríistu'u ɨ́ tɨ á'utataihuaca'a ɨ́ cúruu jetze. 13A'ɨ́ɨ mú huataúra'a mej mi ra'ajtasíjche ɨ́ runavij, mɨ majta caí camu ra'ará'astijre'e ɨ́ niuucari ɨ́ mej jɨ́n tí'aijta. Ayee mu'u raxɨ́'eve'e mej mi amuaataséijrate'en a'ɨ́ɨme ɨ́ mej Israél jetze ajtéme'ecan mej mi me'ɨ́jna jɨ́n ahuaújtzaahuate'en a'ɨ́me jemi ɨ́ sej nu'u ra'ajtasíjcheca'a ɨ́ runavij. 14Mɨ́ neajta inee, ché'e nu'u caí ja'anáj ahuántzaahuate'en ti'itɨ́j jɨme'e sino ché'e a'ɨ́ɨ pu'u na'a tɨ Cɨríistu'u nej jetze me'ecan rajpuaíjtzi já'araa ɨ́ cúruu jetze. A'ɨ́j nu jɨ́n caí ché'e ra'ará'astijre'en ɨ́ tihuá'aye'ira a'ɨ́mej ɨ́ mej yen chaanaca japua huachéjme. A'ɨ́j mú majta jɨ́n néjcha'ɨɨre'e ineetzi. 15Ayee nu tejá'amua'ixaate'e a'iné capu ché'e ti'itɨ́j ne jetze ruxe'eve'e tɨ pua'a ja'atɨ́ ra'ajtasíjcheca'a ɨ́ runavij nusu caí. A'ii pu'u xaa Dios jetze ruxe'eve'e tɨ a'ɨ́ɨn ja'atɨ́ seɨcɨé tiú'umua'ati tɨ ij rujéjcuatze'en huateáturan jemin ɨ́ Dios. 16Ché'e Dios hua'utéjpua'ajte'en, ajta huá'ancu'uvajxɨ'ɨn a'achú mej mena'a pua'amé ra'ará'astijre'e a'ɨ́jna ɨ́ niuucari, a'iné a'ii mú a'ɨ́ɨn pú'een ɨ́ mej Israél jetze ajtéme'ecan, ɨ́ teɨtejra'a ɨ́ tɨ Dios hua'antíhuau. 17A'ɨ́j pu jɨ́n íjii tɨ yú auca'itɨ́ a'ame, ché'e caí ché'e ja'atɨ́ né'ɨtziite'e, a'iné temua'a nu neri nicu ti'icápita'inara'a ne'ɨ́jna jɨme'e ɨ́ nej rajpuaíjtzi ɨ́ Jesús jetze me'ecan. 18Ché'e a'ɨ́ɨn tavástara'a, a'ɨ́jna ɨ́ Jesús tɨ ajta i'i Cɨríistu'u, ché'e a'ɨ́ɨn rɨ́'ɨ tejamuaatá'an ɨ́ a'amua tzajta'a, mɨ sej ne'ihuaamua'a pú'een. Ayee pu'u, ché'e ayén té'ara'ani.

will be added

X\