Gálatas 5

1Cɨríistu'u pu tu'irájtuaa tej ti taxɨéehua á'ujujhua'ane'en. A'ɨ́j xu jɨ́n, caxu ché'e taúra'acare'en sej siyen ca'anéeri jɨ́n tí'imuarɨ'e. A'ɨ́ɨ pu xaa á'amuamuárɨ'eristée a'ame. 2Neajta inee, i nej i'i Pablo, ayée nu tejá'amua'ixaate'e. Tɨ́ pua'a siyen huataúra'an mej ra'antisíjchixɨ'ɨn ɨ́ a'amua navij jetze, capu ché'e a'atzu jamuaatévaɨre'esin ɨ́ Cɨríistu'u. 3Neajta nu niyen tiraatá'ixaate'esin tzáahuati'ira'a jɨme'e ja'atɨ́ tɨ na'a tɨ ayén huataúra'an mej ra'antisíjche ɨ́ naviira'an jetze, ayée pu ajta ruxe'eve'e tɨ a'ɨ́ɨn nain jɨ́n ra'ará'astijre'en tɨ́j na'a a'ij tɨ té'eyu'usi'i jetzen ɨ́ niuucari ɨ́ mej jɨ́n tí'aijta. 4Mú'een, mɨ sej nu'u siyen rahuauhuau sej si rɨ'éene'ecán jɨ́n huateáturan ɨ́ Dios jemi, mú'een xu seri mé rúurɨe se'ɨ́jna ɨ́ Cɨríistu'u. Mú'een xu ajtacɨ́j jemin a'ɨ́jna ɨ́ tɨ rɨ́'ɨ tejamuaatá'a. 5Mɨ́ teajta iteen, teen tú te'ɨ́jna jetze arátaca'ane ɨ́ xɨéjniu'ucare'ara'an ɨ́ Dios te'ɨ́jna jɨme'e tej té'atzaahuate'e. Ayee tu een jɨ́n arátaca'anéecan jɨ́n rachú'eve'en tɨ ayén titáacɨ'ɨti tej ti tiyen rɨ'éene'ecán jɨ́n huateáturan ɨ́ Dios jemi a'ij tej tí'ijxe'eve'e. 6Ayee pu'u tí'een, a'iné ɨ́ Cɨríistu'u jemi, capu a'atzu jetzen ruxe'eve'e tɨ pua'a ja'atɨ́ ari ra'antisíjcheca'a ɨ́ runavij nusu caí. Mɨ́ ajta, a'ɨ́ɨ pu xaa jetzen ruxe'eve'e tɨ ja'atɨ́ ayén hua'utaxɨ́'eve'en ɨ́ teɨte a'ɨ́jna jɨme'e tɨ té'atzaahuate'e tzáahuati'ira'a jɨme'e. 7Temua'a xu sejmí'i siyen tí'ijrɨ'ɨrejca'a. ¿A'ataani tejamua'antiú'uuni'iri'i sej si caí ché'e siyen rá'astijre'e se'ɨ́jna ɨ́ niuucari tɨ ayén ti'ayajna? 8Capu xaa ne'u ayén ca'aníjra'a amuaatá'aca a'ɨ́jna tɨ á'amuajee, sino seɨj pu ja'atɨ́ jetze me'ecan. 9Ayej ne'ase tɨ ayén che'atá na'a á'amuaruure tɨ́j ajta ayén raruure ɨ́ pan ɨ́ mej rana'achite me'ɨ́jna ɨ́ levadura ti'itɨ́. Aj pu'i rárutixɨ'ɨn nain japua ɨ́ pan tzajta'a. 10Ayee pu tiná'amitɨejte'e tɨ tavástara'a caí amuaatá'a sej seɨcɨé tiú'umua'ati. Ajta a'ɨ́ɨn ɨ́ ja'atɨ tɨ tejamua'antiú'uuni'i, tavástara'a pu puaíjtzi raatá'asin, ja'atɨ́ tɨ na'a tɨ ayén rɨcɨ. 11Ayee nu tejá'amua'ihua'u, ne'ihuaamua'a, tɨ pua'a niyen nena'a tejá'amua'ixaate'e tɨ ayén nu'u tiú'ujxe'eve'e mej ra'antisíjche ɨ́ runavij, ¿a'iné een jɨ́n miyen mauj a'ij pua'a neruure? Tɨ́ pua'a niyen tejá'amua'ixaate'e, capu ché'e ja'atɨ́ nejaaxɨéete'e a'ame a'ɨ́jna jɨme'e nej niyen tejá'amua'ixaate'e tɨ Cɨríistu'u huamɨ́'ɨ ɨ́ cúruu jetze. 12Ajta jɨ́me'en a'ɨ́mej ɨ́ mej tejamua'antiú'uuni'i, ayée pu tina'aráanajche ineetzi, tɨ ru'uráxuaahua ɨ́ nahuaa tɨ ij nain jɨ́n hua'atésijchixɨ'ɨn. 13Mɨ́ seajta mú'een, ne'ihuaamua'a, Dios pu ayén amuaatajé sej si'i ruxɨéehua á'ujujhua'ane'en, sicu. Ayee pu i éene'e, caxu huataúra'an sej si siyen ché'e sena'a tí'ijrɨ'ɨrée a'ij tɨ tejamuá'amitɨejte'e ɨ́ tɨ a'ij pua'a een jɨme'e, sino setá'aj huateújvaɨre'en rujɨ́ɨmua'a se'ɨ́jna jɨme'e sej huaújxe'eve'en. 14Setá'aj siyen rɨ́'ɨ titetiújcha'ɨɨ a'iné tɨ́j na'a tɨ té'axa jetzen ɨ́ niuucari ɨ́ mej jɨ́n tí'aijta, nain pu araúrastejsin seɨj jɨme'e ɨ́ niuucari tɨ ayén yee: “Patá'aj yee raxɨ́'eve'e pe'ɨ́jna ɨ́ axɨ́'ej tevi patɨ́j aseɨ́j tí'axe'eve'e.” 15Tɨ́ pua'a seuj siyen a'ij pua'a tiú'uxajta, na'ari seuj siyen titetiújcha'ɨɨre'e se'ɨ́jna jɨme'e sej chueere'e, rɨ́'ɨ xu'u mú'een sej si caí ahuáujpua'ajte'en rujɨ́ɨmua'a. 16A'ɨ́j nu jɨ́n, ayée nu tejá'amua'ixaate'e, setá'aj siyen tí'ijrɨ'ɨrée sej se'ɨ́jna jetze aráujca'ane'e ɨ́ xɨéjniu'ucare'ara'an ɨ́ Dios sej si caí siyen ra'ará'astijre'en se'ɨ́jna ɨ́ tɨ a'ij pua'a een tɨ huiiráninei ɨ́ a'amua tzajta'a. 17Ayee pu'u, a'iné ɨ́ xɨ́'evi'ire'ara'an tɨ a'ij pua'a een tɨ huiiráninei ɨ́ tzajta'an ɨ́ ja'atɨ, a'ɨ́ɨ pu rájcha'ɨ́ɨre'e ɨ́ xɨ́'evi'ire'ara'an ɨ́ xɨéjniu'ucare'ara'an ɨ́ Dios. A'ɨ́ɨ mú miyen tiújcha'ɨɨre'e. A'ɨ́j xu jɨ́n caí ja'anáj á'aturaaven ti'itɨ́j jɨme'e sej si caí siyen huárɨni a'ij sej rɨníiche'en. 18Mɨ́ ajta, tɨ pua'a a'ɨ́ɨn xɨéjniu'ucare'ara'an ɨ́ Dios ayén ca'aníjra'a amuaatá'an sej si siyen ra'ará'astijre'en a'ij tɨ a'ɨ́ɨn tí'ijxe'eve'e, capu ché'e mú'ejmi jetze te'upuá'ajte'en ti'itɨ́j jɨme'e a'ɨ́jna ɨ́ niuucari ɨ́ mej jɨ́n tí'aijta. 19Temua'a pu tirá'amitɨejte'e a'ij tɨ rɨcɨ tɨ pua'a ja'atɨ́ ayén ra'ará'astijre'en ɨ́ ruxɨ́'evi'ira'a tɨ a'ij pua'a een tɨ huiiráninei ɨ́ tzajta'an. Ayee mú rɨcɨ ɨ́ teɨte, metí'ixana'acɨre'e, majta a'ij pua'a titejá'ujujhua'ane'en. Cha'a na'a mú taúra'aca seica jamuan ɨ́ teɨte. 20A'ɨ́ɨ mú majta huá'anajche a'ɨ́mej ɨ́ mej caí dioosi pú'een, majta mú huá'achahua'iraca ɨ́ ruxɨ́'ej teɨte. Jé'ecan mú tiújcha'ɨɨre'e muá'aye'i seica jamuan. Camu majta rɨ́'ɨ tí'iru'ixaate'e. Majta mú á'ujchuéere muá'aye'i. Jé'ecan mú majta runé'usi'ite'e muá'aye'i me'ɨ́jna jɨme'e mej tiú'uteúra'ate'en nain. Já'ita'a mú a'utacɨ́'ɨca muá'aye'i. Majta téhuiicare'e muá'aye'i seica jemi me'ɨ́jna jɨme'e mej seɨcɨé tí'imua'atze. 21Jé'ecan mú majta tí'inecua'atze ɨ́ tihua'áa ɨ́ seica, majta rutá'aruaijve'e. Meta'aruáj mú ruxɨéehua á'ujujhua'ane'e muá'aye'i jamuan ɨ́ mej tí'iyeste ti'itɨ́j jɨme'e. Tɨ́j na'a tɨ ayén a'ij pua'a een, ayée mú rɨcɨ a'ɨ́ɨme ɨ́ mej ra'ará'astijre'en ɨ́ ruxɨ́'evi'ira'a tɨ a'ij pua'a een tɨ huiiráninei ɨ́ huá'a tzajta'a. Ayee nu tejá'amua'ixaate'e tzáahuati'ira'a jɨme'e, a'ɨ́ɨme ɨ́ mej miyen a'ij pua'a titetiújcha'ɨɨ, capu xaa ne'u ayén tihuá'acɨ'ɨti mej me'uun a'uteárute a'u tɨ Dios é'eseijre'e. 22Mɨ́ majta a'ɨ́ɨme ɨ́ mej jetzen araújca'ane me'ɨ́jna jetze ɨ́ xɨéjniu'ucare'ara'an ɨ́ Dios, ayée mú rɨ́'ɨ titetiújcha'ɨɨ. Mehuá'axe'eve'e mú muá'aye'i ɨ́ seica ɨ́ teɨte. Maújtemua'ave'e mú muá'aye'i. Temua'a pu naa rɨ́'ɨ huateápua'areca'a ɨ́ huá'a tzajta'a. Majta raayɨ́'ɨtɨ mej te'utáviicua'i me'ɨ́jna jɨme'e tɨ huá'amuarɨ'eriste'e. Rɨ́'ɨ mú majta tihuá'acha'ɨɨ muá'aye'i ɨ́ ruxɨ́'ej teɨte. Rɨ́'ɨ mú tí'iteteɨte a'ɨ́ɨme. Camu ti'itɨ́j jɨ́n auté'ɨtzeaara ɨ́ seica jemi. 23Rɨ́'ɨ mú tí'itiújcha'ɨɨ́can jɨ́n mé á'ujujhua'an. Camu majta rɨ́'ɨ a'ij rɨj muá'aye'i. Ajta a'ɨ́mej jɨme'en ɨ́ teɨte mej miyen 'een, capu mé'e já'ahua'a seɨj ɨ́ niuucari tɨ ayén huá'a jetze ti'itɨ́j jɨ́n te'upuá'ajte'en. 24Majta a'ɨ́ɨme, ɨ́ mej jetzen ajtéme'ecan ɨ́ Cɨríistu'u, mu'uri nain tí'iteca'a me'ɨ́jna jɨme'e ɨ́ ruxɨ́'evi'ira'a tɨ a'ij pua'a een tɨ huiiráninei ɨ́ huá'a tzajta'a mej mi caí ché'e a'ij pua'a titetiújcha'ɨɨ. 25Tɨ́ pua'a tiyen ruurican huateáturan ɨ́ Dios jemi te'ɨ́jna jɨme'e tej jetzen arátaca'anen te'ɨ́jna jetze ɨ́ xɨéjniu'ucare'ara'an ɨ́ Dios, tiché'e teajta tiyen rɨ́'ɨ ti'itítacha'ɨ́ɨ te'ɨ́jna jɨme'e tej teajta jetzen arátaca'anen te'ɨ́jna ɨ́ xɨéjniu'ucare'ara'an jetze. 26Tiché'e caí á'atatzaahuate'e ti'itɨ́j jɨme'e. Tiché'e teajta caí ca'aníjra'a tatá'acare'en tej ti huatétane'usi'ite'en tajɨ́ɨmua'a. Tiché'e teajta caí tihuá'anecua'atzi'ira ɨ́ tihua'áa ɨ́ taxɨ́'ej teɨte.

will be added

X\