Gálatas 3

1Mú'een, mɨ sej Galacia a'uchéjme, caxu a'atzu mé úumua'aree mú'een. ¿A'ataani á'amuaaxɨéenereca'a sej si siyen a'ij pua'a mé titeumuá'aren? Mú'ejmi jemi tu temua'a naa tejámuaatá'ixaa mej rá'utatai me'ɨ́jna ɨ́ Jesús tɨ ajta i'i Cɨríistu'u. 2Niché'e seɨj tejámuaata'íhua'u. ¿A'iné sej si éeni'icɨ'e ra'ancuré'a ɨ́ xɨéjniu'ucare'ara'an ɨ́ Dios? ¿Ni qui se'ɨ́jna jɨ́n sej rá'astijre'eca'a ɨ́ niuucari ɨ́ mej jɨ́n tí'aijta na'ari se'ɨ́jna jɨ́n sej rá'atzaahuate'eca'a ɨ́ sej ráanamuajri'i itejmi jemi? 3¿Ni tzaa siyen rɨ́'ɨ huápɨ'ɨ caí mé teuúmua'aree? Ayee xu ra'utéjhuii sej si siyen araújca'ane se'ɨ́jna jetze ɨ́ xɨéjniu'ucare'ara'an ɨ́ Dios. ¿Ni tzaa ayén tejamuá'amitɨejte'e sej si siyen raanaíjmire'en sej ra'ará'astijre'en ɨ́ tavástara'a se'ɨ́jna jɨme'e sej ru jetze a'ij tirájteu rujɨ́ɨmua'a sena'a? Capu xaa ne'u a'ij tí'irɨ'ɨri. 4Naíjmi'i tɨ́j na'a ɨ́ tɨ Dios jɨ́n rɨ́'ɨ tejamuaatá'a, ¿ni qui ayén tejamuáaruu tɨ ij ayén éene'e á'ara'ani tɨ nain tejá'uveti? Mɨ́ ajta, capu xaa ne'u a'ij ámitɨeere'e tɨ pua'a nain tejá'uveti nusu caí. 5¿A'iné een jɨme'e Dios raata'íteca'a ɨ́ ruxɨ́ejniu'uca tɨ a'ɨ́ɨn mú'ejmi jemi huateáturan? Ajta, ¿a'iné een jɨme'e Dios ayén tiu'umuárɨej mú'ejmi jemi a'ɨ́jna jɨme'e tɨ raaré'an ɨ́ tí'imuari'ihua tɨ huápɨ'ɨ ruxe'eve'e? ¿Ni qui ayén huarɨ́j a'ɨ́jna jɨme'e sej ra'ará'astijre se'ɨ́jna ɨ́ niuucari ɨ́ mej jɨ́n tí'aijta? Capu a'atzu xaa ne'u, sino ayée pu'u huarɨ́j a'ɨ́jna jɨme'e sej rá'atzaahuate'eca'a ɨ́ tej teri tejamuá'ixaa. 6Ayee pu che'atá na'a té'atzaahuate'eca'a a'ɨ́jna ɨ́ Abraham teecan a'ij tɨ Dios tiraata'ixaa. A'ɨ́j pu jɨ́n, Abraham rɨ'éene'ecán jɨ́n huateájturaa ɨ́ Dios jemi. 7Setá'aj siyen ráamua'aree se'ɨ́jna tɨ jɨ́me'en yee matɨ́j mena'a pua'amé ɨ́ mej té'atzaahuate'e, a'ii mú nu'u a'ɨ́ɨn pú'een ɨ́ mej jetzen airáane a'ɨ́jna ɨ́ Abraham teecan. 8Ajta, jéjcua ɨmuá, a'ɨ́ɨ pu ayén té'eyu'usi'ihuaca'a ɨ́ yu'uxari jetze tɨ Dios ayén tihua'atá'acare'en a'ɨ́mej ɨ́ mej caí Israél jetze ajtéme'ecan mej mi rɨ'éene'ecán jɨ́n huateáturan ɨ́ jemin a'ɨ́jna jɨme'e ɨ́ mej té'atzaahuate'e, micu. Ajta a'ɨ́ɨn ɨ́ Dios, amuacaícan pu ayén tiraata'ixaa a'ɨ́jna ɨ́ Abraham teecan a'ɨ́jna ɨ́ niuucari tɨ jɨ́me'en Dios hua'irájtuaani, ayén tɨjɨ́n: “Naíjmi'ica ɨ́ teɨte ɨ́ mej huachéjme íiyen chaanaca japua, nee nu yee rɨ́'ɨ tihua'utá'asin mú'eetzi jɨme'e.” 9A'ɨ́j pu jɨ́n, naíjmi'ica ɨ́ mej té'atzaahuate'e, Dios pu rɨ́'ɨ tihua'utá'asin jamuan a'ɨ́jna ɨ́ Abraham teecan tɨ ajta rá'atzaahuate'eca'a ɨ́ Dios. 10Mɨ́ ajta a'ɨ́ɨme ɨ́ mej ra'ará'astijre me'ɨ́jna ɨ́ niuucari ɨ́ mej jɨ́n tí'aijta, naíjmi'ica pu puaíjtzi huatá'asin ɨ́ Dios, a'iné ayée pu té'eyu'usi'i tɨjɨ́n: “Puaíjtzi pu yee tiraatá'asin ja'atɨ́ tɨ na'a tɨ caí nain jɨ́n ra'ará'astijre'en a'ij tɨ ye'í té'axa jetzen ɨ́ niuucari ɨ́ mej jɨ́n tí'aijta.” 11Ajta a'ɨ́jna ɨ́ niuucari ɨ́ mej jɨ́n tí'aijta, capu rɨ'ɨrí tɨ a'ɨ́ɨn ayén ráaruuren ɨ́ ja'atɨ tɨ́'ij ayén urarɨ́'ene'acan jɨ́n huateáturan ɨ́ Dios jemi. Ayee pu'u éene'e já'araa a'iné ayée pu ajta té'eyu'usi'i tɨjɨ́n: “A'ɨ́ɨ pu hui tɨ rɨ'éene'e jɨ́n huateájturaa ɨ́ Dios jemi, a'ɨ́ɨ pu yee ruuri a'ame a'ɨ́jna jɨme'e, icu, tɨ a'ɨ́ɨn ayén té'atzaahuate'e.” 12Tɨ́ pua'a ja'atɨ́ ayén ra'ará'astijre'en ɨ́ niuucari ɨ́ mej jɨ́n tí'aijta, capu ayén ruxe'eve'e tɨ a'ɨ́jna ja'atɨ́ té'antzaahuate'en, sino ché'e ra'ará'astijre'en pu'u a'ɨ́jna ɨ́ niuucari a'iné ayée pu té'eyu'usi'i tɨjɨ́n: “A'ɨ́jna tɨ yee ayén ra'ará'astijre'en a'ij tɨ té'eyu'usi'i ɨ́ niuucari jetze, a'ɨ́ɨ pu yee a'ɨ́jna jɨ́n rɨ́'ɨ ti'itiújcha'ɨɨ a'ame.” Single Line Composer 13Ajta a'ɨ́jna ɨ́ Cɨríistu'u, a'ɨ́ɨ pu tu'irájtuaa tɨ ij caí puaíjtzi táacɨ'ɨti a'ɨ́jna jɨme'e tej caí rá'astijre'e ɨ́ niuucari ɨ́ mej jɨ́n tí'aijta. Puaíjtzi pu xaa raacɨ́'ɨ ta jetze me'ecan a'iné ayée pu té'eyu'usi'i tɨjɨ́n: “Puaíjtzi pu yee raatá'asin ja'atɨ́ tɨ na'a mej rá'atatan ɨ́ cɨyej jetze.” 14Ayee pu a'ɨ́jna jɨ́n tiráaruu tɨ ij ayén tihuá'ucɨ'ɨti a'ɨ́mej ɨ́ mej caí Israél jetze ajtéme'ecan a'ɨ́jna ɨ́ tɨ jɨ́n Dios rɨ́'ɨ tiraatá'a a'ɨ́jna ɨ́ Abraham teecan, tɨ ij ajta tej te'ɨ́jna jɨ́n té'atzaahuate'e tej tij ra'ancuré'an te'ɨ́jna ɨ́ xɨéjniu'ucare'ara'an ɨ́ Dios a'ij tɨ a'ɨ́ɨn ari te'ataújratziiri'i. 15Casi'i, ne'ihuaamua'a, tiché'e te'ɨ́jna jɨ́n tiu'utaxáj a'ij tɨ tí'irɨneca tej ti teuj yen huachéjme íiyen chaanaca japua. Tɨ́ pua'a ja'atɨ́ ari ra'uyú'uxaca'a ɨ́ cuapée jetze ɨ́ mej jɨ́n ra'ancuré'an ɨ́ ti'á'ara'an ɨ́ ja'atɨ́ tɨ huamɨ́'ɨ, tɨ pua'a ari ayén té'eyu'usi'ihua a'ij tɨ tiraavíjte'e, capu rɨ'ɨrí tɨ ja'atɨ́ ti'itɨ́ máàj jetzen ra'uyú'uxa. Ruxe'eve'e mej ra'ará'astijre'en a'ij tɨ té'eyu'usi'ihua. 16Me'ecui xaa, Dios pu ayén ajmí'i te'ataújratziiri'i ti'itɨ́j jɨme'e a'ɨ́jna jemi ɨ́ Abraham teecan, ajta a'ɨ́mej jemi ɨ́ mej jetzen a'iránejsin. Aru, capu ayén té'eyu'usi'i ɨ́ yu'uxari jetze tɨ ayén tihuá'ucɨ'ɨtíiche'e ɨ́ mej mu'iitɨ́ a'iránejsin a'ɨ́jna ɨ́ Abraham teecan jetze, sino tɨ ayén tiráacɨ'ɨtiiche'e ɨ́ tɨ seɨ́j na'a a'iránejsin. Ajta a'ɨ́ɨn tɨ seɨ́j na'a, a'ii pu a'ɨ́ɨn pú'een ɨ́ Cɨríistu'u. 17Ayee pu huataújmua'a a'ɨ́jna. Amuacaícan, Dios pu ayén raatá'a ɨ́ runiuuca ɨ́ Abraham jemi a'ij tɨ teja'uré'enejsin. Tɨ́'ɨjta ari teuumé'eca a'achú cumu muáacuacientos nine'ira'a japuan seité japuan tamuáamuata'a, aj pu'i Dios hua'utá'a a'ɨ́jna ɨ́ niuucari ɨ́ mej jɨ́n tí'aijta. A'ɨ́j pu jɨ́n, capu rɨ'ɨrí tɨ a'ɨ́ɨn niuucari ra'uré'uuna a'ɨ́jna tɨ jɨ́n Dios amuacaícan tihuau'íjca ɨ́ Abraham teecan jemi. A'ɨ́j pu jɨ́n aúche'e tí'ivaɨre'e a'ɨ́jna ɨ́ tɨ jɨ́n tihuau'íjca. 18Ayee pu'u tí'een, a'iné tɨ pua'a ti'itɨ́ ayén tiráacɨ'ɨti seɨ́j ɨ́ ja'atɨ a'ɨ́jna jɨme'e tɨ a'ɨ́ɨn niuucari ɨ́ mej jɨ́n tí'aijta ayén tiraatá'aca, capu ché'e ayée na'a éene'e a'ame tɨ ayén tiráacɨ'ɨti a'ɨ́jna jɨme'e tɨ ja'atɨ́ ayén te'ataújratziiri'i tɨ ayén nu'u teja'uré'enejsin. Ajta a'ɨ́ɨn Dios, a'ɨ́ɨ pu ruxɨ́'evi'ira'a jɨ́n ayén rɨ́'ɨ tiraatá'a a'ɨ́jna ɨ́ Abraham teecan a'iné ayée pu te'ataújratziiri'i. 19Tɨ́ pua'a ayén een, ¿a'iné tɨ i Dios hua'utá'a a'ɨ́jna ɨ́ niuucari ɨ́ mej jɨ́n tí'aijta? Ayej xaa ne'u, ayée pu een jɨ́n raateájtuaa huá'a jemi mej mi ráamua'aree nain jɨme'e ɨ́ mej jɨ́n auteájturaa ɨ́ Dios jemi. Ayee pu éene'e á'ame'enche'e ajta na'a caí huataseíjre'enche'e a'ɨ́jna tɨ jetzen huanéj a'ɨ́jna ɨ́ Abraham teecan a'ij tɨ ayén Dios tihuau'íjca tɨ ayén té'eme'enche'e. Ajta a'ɨ́ɨn ɨ́ niuucari ɨ́ mej jɨ́n tí'aijta, capu Dios ruseɨ́j raateájtuaa huá'a jemi, sino a'ɨ́ɨme ɨ́ mej tí'ivaɨre'e ɨ́ ta japua, a'ɨ́ɨ mú majta raaxɨ́'epɨ'ɨntare mej mi huá'a jemi raateájtuaani me'ɨ́jna ɨ́ niuucari. 20Ayee pu'u na'a, tɨ pua'a ayén seijre'e seɨ́j tɨ í'ixɨ'epɨ'ɨn, a'ɨ́ɨ pu tihua'utévaɨre'esin naíjmi'ica ɨ́ mej tí'irixaate'e, mej mi ra'antipuá'ajte'en. Mɨ́ ajta, seɨj pu'u pú'een ɨ́ Dios. Ruseɨ́j pu ayén tihuau'íjca, ajta ruseɨ́j pu raanaíjmire. 21¿A'iné na'a ji? ¿Ni qui ayén huataújmua'a tɨ seɨcɨé té'axa a'ɨ́jna jetze ɨ́ niuucari ɨ́ mej jɨ́n tí'aijta, ajta seɨcɨé té'axa a'ɨ́jna tɨ jɨ́n Dios te'ataújratziiri'i? Capu xaa ne'u, a'iné tɨ pua'a ayén tí'irɨ'ɨriistache'e tɨ taatá'acare'en tej rúurijche'e ɨ́ Dios jemi a'ɨ́jna ɨ́ niuucari tɨ huateájturaa a'ɨ́mej jemi, aj pu xaa, icu, rɨ'ɨríistaca'a tej rɨ'éene'ecán jɨ́n huateáturan ɨ́ Dios jemi a'ɨ́jna jɨme'e tej rá'astijre'e te'ɨ́jna ɨ́ niuucari ɨ́ mej jɨ́n tí'aijta. 22Mɨ́ ajta, a'ɨ́jna ɨ́ niuucari jetze, ayée pu té'axa mej nu'u naími'i miyen auteájturaa ɨ́ Dios jemi, a'achú mej mena'a pua'amé yen huachéjme íiyen chaanaca japua. Ayee pu een jɨ́n té'axa tɨ ij a'ɨ́jna jɨ́n rɨ'ɨriistan tɨ a'ɨ́ɨn Dios te'ataújratziiri'i tɨ tihuá'ucɨ'ɨti a'ɨ́jna jɨme'e mej ra'ará'astijre'en me'ɨ́jna ɨ́ Jesús tɨ ajta i'i Cɨríistu'u. Jee xaa ne'u, ayée pu'u na'a tɨ a'ɨ́jna tɨ jɨ́n Dios te'ataújratziiri'i, a'ɨ́mej pu tí'icɨ'ɨti a'ɨ́mej ɨ́ mej miyen té'atzaahuate'e. 23Tɨ́'ɨj caí xɨ huataseíjre ɨ́ Cɨríistu'u tej ti tiyen ra'ará'astijre'en, ayée pu éeni'icɨ'e seijre'eca'a cumu tej aiteánami'ihuaca'a a'ɨ́jna jɨme'e tɨ ca'anín jɨ́n tacha'ɨ a'ɨ́jna ɨ́ niuucari ɨ́ mej jɨ́n tí'aijta. Ayee tu éene'e huateájturaa a'ájná'ɨmua tɨ́j na'a tɨ yú e'iré'ene tɨ́j íjii ayén huataseíjre a'ɨ́jna ɨ́ tej teri ticu rá'atzaahuate'e. 24A'ɨ́j pu jɨ́n, ayén pu tacha'ɨ a'ɨ́jna ɨ́ niuucari ajta na'a caí huataseíjre'en ɨ́ Cɨríistu'u tej ti tiyen rɨ'éene'ecán jɨ́n huateáturan a'ɨ́jna jɨme'e tej ra'ará'astijre te'ɨ́jna ɨ́ Cɨríistu'u. 25Me'ecui xaa ne'u, a'iné ari huataseíjre ɨ́ tej jemin rá'astijre'e, capu ché'e tacha'ɨ a'ɨ́jna ɨ́ niuucari ɨ́ mej jɨ́n tí'aijta. 26- 27Naími'i xu yaújmua'ame'en pú'een ɨ́ Dios se'ɨ́jna jɨme'e sej rá'astijre'e se'ɨ́jna ɨ́ Cɨríistu'u tɨ ajta i'i Jesús, a'iné Cɨríistu'u pu á'amuaneere'e sej si'i siyen éene'e xá'ara'ani tɨ́j a'ɨ́jna, setɨ́j sena'a pua'amé huámuaɨ'ɨvijhuaca'a ɨ́ jemin. 28A'ɨ́j pu jɨ́n, caí ché'e mé'e já'ahua'a ɨ́ tɨ Israél jetze ajtéme'ecan, na'ari tɨ jí'i Griego. Capu ajta mé já'ahua'a ɨ́ Cɨríistu'u jemi ɨ́ tɨ jí'i seɨ́j tɨ ca'anéeri jɨ́n tí'imuarɨ'e nusu ɨ́ tɨ ruxɨéehua jɨ́n tí'imuarɨ'e. Capu ajta jetzen ruxe'eve'e ɨ́ Cɨríistu'u tɨ pua'a ja'atɨ́ teáata'a pú'eene'en nusu 'ɨ́ita'a na'a, a'iné naíjmi'i xu Cɨríistu'u jetze ajtéme'ecan. Mú'een xu xaa seɨj teɨtejra'a pú'een ɨ́ jemin. 29Ajta, tɨ pua'a siyen Cɨríistu'u jetze ajtéme'ecan, a'ɨ́j xu jɨ́n seajta yaújmua'ame'en pú'een a'ɨ́jna ɨ́ Abraham teecan, ajta a'ɨ́ɨ pu tejá'amuacɨ'ɨti a'ɨ́jna tɨ jɨ́n Dios te'ataújratziiri'i.

will be added

X\