Gálatas 2

1Tɨ́'ɨj ari ayén teuumé'eca a'achú cumu tamuáamuata'a japuan muáacua nine'ira'a, neajtahua'a nu ne'uun a'ujnéj ánti Jerusalén ne'ɨ́jna jamuan ɨ́ Bernabé. Neajta nu ne'ɨ́n a'uví'itɨ́ ɨ́ Tito. 2A'uu nu a'ujnéj ne'ɨ́jna jɨme'e tɨ Dios ayén ca'aníjra'a naatá'a. A'uu nu tihua'utá'ixaa nain jɨme'e ɨ́ niuucari a'ij nej ye'í tíhua'ihuá'ixaate'esin ne'ɨ́mej ɨ́ mej caí Israél jetze ajtéme'ecan. Aru avíitzi nu jɨ́n niyen huarɨ́j huá'a jemi ɨ́ mej nu'u tihuá'aijte'e. Ayee nu een jɨ́n huarɨ́j tɨ ij caí ja'atɨ́ tina'antiú'uuni'i a'ɨ́jna jɨme'e a'ij nej rɨcɨ. Tɨ́ pua'a ayén tina'antiú'uuni'i, capu ché'e ti'itɨ́ huatévaɨre'esin a'ij nej rɨcɨ. 3Mɨ́ ajta caí, capu ayén te'irájraa a'ij mej ɨ́ seica, tí'ijxe'eve'eca'a a'iné a'ɨ́ɨme ɨ́ mej tihuá'ajte'eca'a, camu miyen raata'íteca'a a'ɨ́jna jɨme'e ɨ́ mej ra'antisíjchixɨ'ɨn ɨ́ runavij, a'iné huá'a jetze pu ajtéme'ecan ɨ́ griego a'ɨ́jna ɨ́ Tito. 4Ayee pu een jɨ́n huataseíjre itejmi jemi a'iné seica mú avíitzi jɨ́n uteájrupi itejmi tzajta'a mej mi tájeeve a'ij tej ti'itítacha'ɨ́ɨ iteen ɨ́ Cɨríistu'u jemi tɨ a'ɨ́ɨn ari tu'irájtuaa. A'ɨ́ɨ mú miyen ruseíjrataca'a mej nu'u téjmi jetze ajtéme'ecan. Mɨ́ majta caí, camu. Metí'ihua'itaca mu'u. Ayee mu'u raxɨ́'eve'eca'a micu mej mi titaata'aíjte'en ca'anéjri jɨme'e. 5Catu a'atzu hua'utá'a mej mi miyen titaatémua'itɨn, a'iné ayée tu tí'ijxe'eve'eca'a tɨ auj rɨ'ɨríista á'ara'ani sej ráanamua tzáahuati'ira'a jɨme'e ɨ́ niuucari tɨ jɨ́n Dios amua'irátuaasin. 6Majta a'ɨ́ɨme, ɨ́ mej nú'u huápɨ'ɨ mú ruxe'eve'e, camu máàj a'ij tirájteu mej mi majta me'ɨ́n raanaíjmire'en a'ij nej tíhua'ihuá'ixaa ɨ́ teɨte ɨ́ mej caí Israél jetze ajtéme'ecan. Ajta, capu ne jetze ruxe'eve'e tɨ pua'a mej miyen huápɨ'ɨ ruxe'eve'e nusu mecaí, a'iné Dios pu ruxɨ́'ej na'a hua'ancuré'evi'itɨcɨ ɨ́ teɨte, matɨ́j mena'a pua'amé. 7Mɨ́ majta me'ɨ́n, matɨ́'ɨjtá'ij ayén tihuá'amitɨejte'eca'a tɨ a'ɨ́ɨn Dios ayén che'atá na'a tinaata'aíjte'eca'a ineetzi tɨ́j ajta ayén a'ɨ́j tiu'uta'aíjte'eca'a a'ɨ́jna ɨ́ Pedro. Tihuá'amitɨejte'eca'a tɨ Dios ayén tinaata'aíjte'eca'a nej ni tihua'utá'ixaate'en a'ɨ́mej ɨ́ mej caí Israél jetze ajtéme'ecan ne'ɨ́jna ɨ́ niuucari tɨ jɨ́n Dios hua'irájtuaani. Mɨ́ ajta a'ɨ́ɨn, ɨ́ Pedro, Dios pu ayén tiraata'aíjte'eca'a tɨ ayén tihua'utá'ixaate'en a'ɨ́mej ɨ́ mej Israél jetze ajtéme'ecan. 8Ayee pu'u na'a, a'iné a'ɨ́ɨn tɨ tí'imuarɨ'eca'a ɨ́ Pedro jamuan tɨ ij tiraata'aíjte'en tɨ a'ɨ́ɨn huá'a jamuan u á'ume'en ɨ́ mej Israél jetze ajtéme'ecan, a'ɨ́ɨ pu ayén che'atá na'a tí'imuarɨ'eca'a ineetzi jamuan nej ni huá'a jamuan u á'ume'en ɨ́ mej caí Israél jetze ajtéme'ecan. 9Majta me'ɨ́n ɨ́ mej huaíca, a'ɨ́jna ɨ́ Jacobo, ajta a'ɨ́jna ɨ́ Pedro, ajta a'ɨ́jna ɨ́ Juan, a'ii mú a'ɨ́ɨn pu'éene'e ɨ́ mej jee antiújmua'aree a'ɨ́mej jemi ɨ́ seica ɨ́ mej Dios jemi seijre'e. Tɨ́'ɨj ari ayén tihuá'amitɨejte'eca'a tɨ Dios ayén rɨ́'ɨ tinaatá'a, aj mú mi temua'a naa tína'ancuré'evi'itɨ, majta me'ɨ́n temua'a naa te'encuré'evi'itɨ me'ɨ́jna ɨ́ Bernabé. A'ɨ́ɨ mú xaa miyen tiraaxɨ́'epɨ'ɨntare itejmi jɨme'e tej nu'u huá'a jamuan u á'uju'un a'ɨ́mej ɨ́ mej caí Israél jetze ajtéme'ecan tej ti tiyen tihua'utá'ixaate'en, majta miyen ru jetze mej nu'u a'ɨ́mej jemi u á'uju'un ɨ́ mej Israél jetze ajtéme'ecan. 10A'ɨ́ɨ mu'u tájhuaviiri'i tej nu'u a'ɨ́mej autámua'aree teuche'e ɨ́ mej caí a'ij té'eviicua'i tej nu'u hua'utévaɨre'en. Neajta inee, nee nu xaa ahuánca'ane nej ni nexɨ́'evi'ira'a jɨ́n niyen huárɨni. 11Ajta a'ɨ́ɨn ɨ́ Pedro, tɨ́'ɨj a'uun a'atanéj u Antioquía, nee nu ra'ajté'axɨ ɨ́ jemin, a'iné a'ɨ́ɨ pu a'uté'ɨtzee ti'itɨ́j jɨme'e. 12Matɨ́'ɨj caí xɨ á a'atanéj seica ɨ́ teteca jamuan a'ɨ́jna ɨ́ Jacobo, ayée pu rɨjcaa a'ɨ́jna ɨ́ Pedro. Huá'a jamuan pu tí'icua'acare'e a'ɨ́mej ɨ́ mej caí Israél jetze ajtéme'ecan. Mɨ́ ajta a'ɨ́ɨn, matɨ́'ɨj e'iré'ene a'ɨ́ɨme ɨ́ seica, Pedro pu ayén a'utéjche tɨ ajtára'ani huá'a jemi ɨ́ mej caí Israél jetze ajtéme'ecan. Capu ché'e huá'ajaahuate'eca'a a'iné huá'atziɨɨne'eca'a a'ɨ́mej ɨ́ mej huá'a jetze ajtéme'ecan a'ɨ́ɨme ɨ́ mej miyen ra'antisí'iche ɨ́ runavij. 13Majta ɨ́ seica ɨ́ mej Israél jetze ajtéme'ecan, camu majta miyen huarɨ́j jé'iyecan jɨme'e sino miyen hua'itzi jɨ́n ruseíjrataca'a a'ij tɨ ajta huarɨ́j a'ɨ́jna ɨ́ Pedro. A'ɨ́j pu jɨ́n te'uteujhua'itze ajta a'ɨ́jna ɨ́ Bernabé. 14Tɨ́'ɨj ayén tiná'amitɨejte'eca'a mej caí miyen rɨ́'ɨ titetiújcha'ɨɨca'a tzáahuati'ira'a jɨme'e a'ij tɨ tí'itamua'ate ɨ́ niuucari, matɨ́'ɨj neseíiraca'a ɨ́ teɨte niyen tiraata'ixaa ne'ɨ́jna ɨ́ Pedro tɨjɨ́n: “Mú'ee pej huá'a jetze ajtéme'ecan ɨ́ mej Israél jetze huanéj. Mɨ́ pajta mú'ee, ayée pepu'u ti'iti'á'acha'ɨɨ matɨ́j a'ɨ́ɨme ɨ́ mej caí Israél jetze ajtéme'ecan. Pecaj xaa ne'u piyen ti'iti'á'acha'ɨɨ. ¿A'iné een jɨme'e piyen huá'aruure pe'ɨ́mej ɨ́ mej caí Israél jetze ajtéme'ecan mej mi miyen te'araúrasten tihuá'aye'ira a'ɨ́ɨme ɨ́ mej Israél jetze ajtéme'ecan?” 15Teen tu huá'a jetze ajtéme'ecan te'ɨ́jna jɨme'e tej Israél jetze huanéj. Catu huá'a jetze ajtéme'ecan a'ɨ́mej ɨ́ mej auté'ɨtzea'ara ɨ́ Dios jemi. 16Teen tu tiyen ramua'aree a'ij tɨ een ɨ́ Dios jemi tɨ ja'atɨ́ rɨ'éene'ecán jɨ́n huateáturan ɨ́ jemin. Capu xaa ne'u ti'itɨ́ a'ij tiraatévaɨre'en a'ɨ́jna ɨ́ ja'atɨ tɨ pua'a nain jɨ́n araúrasten a'ɨ́jna ɨ́ niuucari ɨ́ mej jɨ́n tí'aijta, sino a'ɨ́ɨ pu xaa rɨ'éene'ecán jɨ́n huateáturan ɨ́ Dios jemi tɨ pua'a a'ɨ́ɨn ra'ará'astijre'en ɨ́ Jesús tɨ ajta i'i Cɨríistu'u. Teajta iteen, ayée tu teajta iteen teri rá'atzaahuate'e te'ɨ́jna ɨ́ Cɨríistu'u tɨ ajta i'i Jesús tej ti tiyen rɨ'éene'ecán jɨ́n huateáturan ɨ́ Dios jemi a'ɨ́jna jɨme'e tej ra'ará'astijre'en te'ɨ́jna ɨ́ Cɨríistu'u. Catu xaa ne'u ra'ará'astijre'e te'ɨ́jna ɨ́ niuucari ɨ́ mej jɨ́n tí'aijta a'iné capu ja'atɨ́ rɨ'éene'ecán jɨ́n huateáturaasin ɨ́ Dios jemi tɨ pua'a ra'ará'astijre'en a'ɨ́jna ɨ́ niuucari ɨ́ mej jɨ́n tí'aijta. 17Ari tɨ pua'a ayén te'irájra'ani tej tiyen a'ij pua'a éene'ecan jɨ́n huateáturan matɨ́j a'ɨ́ɨme ɨ́ mej caí Israél jetze ajtéme'ecan te'ɨ́jna jɨme'e tej tiyen ráahuausin tej ti tiyen rɨ'éene'ecán jɨ́n huateáturan jemin ɨ́ Cɨríistu'u, ¿a'iné na'aqui huataújmua'a? ¿Ni qui ayén huataújmua'a tɨ Cɨríistu'u ca'aníjra'a tatá'a tej ti tiyen a'ij pua'a ti'itítacha'ɨɨ? Capu xaa ne'u, capu a'atzu. 18Mɨ́ neajta inee, tɨ pua'a neajtahua'a nena'a ra'utéjcheni nej ra'ará'astijre'en ɨ́ nej nejmí'i raatapuá'ajtaca'a nej niyen rá'astijre'eca'a, tɨ pua'a niyen huárɨni neajtahua'a, ayée pu huataújmua'a tɨjɨ́n yee na'uté'ɨtze ti'itɨ́j jɨme'e netɨ́'ɨj amuacaícan raatapuá'ajtaca'a. 19A'ɨ́j pu jɨ́n, netɨ́'ɨj rá'astijre'eca'a ɨ́ niuucari ɨ́ mej jɨ́n tí'aijta, ayée pu teja'uré'ene tɨ caí huatárɨ'ɨristareca'a nej nain jɨ́n aráne'astijre'en. A'ɨ́j pu jɨ́n ayén pu huataújmua'a, cu xɨee nej huamɨ́'ɨ jemin a'ɨ́jna ɨ́ niuucari ɨ́ mej jɨ́n tí'aijta nej ni ruurican huateáturan ɨ́ Dios jemi. 20Naacɨ́'ɨ ajta ineetzi mej mi miyen náaruuren matɨ́'ɨj rá'utatai ɨ́ Cɨríistu'u ɨ́ cúruu jetze. A'ɨ́j nu jɨ́n caí ché'e nena'a ruurican huateájturaa sino ruurican nu huateájturaa a'iné Cɨríistu'u pu ruurican seijre'e neetzi jetze. Ajta a'ij nej rɨ́'ɨ ti'itíncha'ɨɨ íjii nej nauj ratéhua'ira'a, ayée nu aránca'ane ne'ɨ́jna jɨme'e nej ra'ará'astijre'en ne'ɨ́jna tɨ i'i yaujra'an pú'een ɨ́ Dios. A'ɨ́ɨ pu icu naataxɨ́'eve, ajta huataúra'a tɨ huámɨ'ɨni neetzi jetze me'ecan. 21A'ɨ́j nu jɨ́n caí mé rúujɨsin ne'ɨ́jna ɨ́ tɨ Dios jɨ́n rɨ́'ɨ tinaatá'a ruxɨ́'evi'ira'a jɨme'e. Ayej xaa ne'u, tɨ pua'a rɨ'ɨríistanche'e tɨ ja'atɨ́ ayén rɨ'éene'ecán jɨ́n huateáturan ɨ́ Dios jemi a'ɨ́jna jɨme'e tɨ nain jɨ́n ra'ará'asten a'ɨ́jna jɨme'e ɨ́ niuucari ɨ́ mej jɨ́n tí'aijta, capu ché'e ti'itɨ́ huatevaɨ́ɨre'enche'e tɨ huamɨ́'ɨ ɨ́ Cɨríistu'u.

will be added

X\