Gálatas 1

1- 2Inee, inee i'i Pablo, naíjmi'ica jamuan ɨ́ ne'ihuaamua'a ɨ́ mej nee jamuan yé huateí, teen tu yé tejá'amuayu'use'e mú'ejmi mɨ sej e'etiújse'ɨre mu'iicacié u Galacia. Nee nu ne'ɨ́n pú'een seɨ́j ɨ́ tɨ Dios neja'uta'íteca'a. Capu tevi na'a neja'uta'íteca'a, capu ja'atɨ́ ajta na'antíhuau sino a'ɨ́ɨ pu'u ɨ́ Jesús tɨ i'i Cɨríistu'u, ajta ɨ́ táàtajra'an tɨ a'ɨ́ɨn pú'een ɨ́ Dios tɨ ra'ajjáj huá'a tzajta'a ɨ́ mɨ'ɨchite. 3Ché'e a'ɨ́ɨn ɨ́ Dios ɨ́ tej rájya'upua, ajta a'ɨ́ɨn ɨ́ tavástara'a a'ɨ́jna ɨ́ Jesús tɨ ajta i'i Cɨríistu'u, miché'e me'ɨ́n rɨ́'ɨ tejamuaatá'an ruxɨ́'evi'ira'a jɨme'e, miché'e majta rɨ́'ɨ tejamuhuatépua'ajte'en ɨ́ á'amuatzajta'a. 4Ché'e ayén éene'en, a'iné a'ɨ́ɨ púu ɨ́ tavástara'a huataúra'a tɨ huámɨ'ɨni ta jetze me'ecan tɨ ij a'ɨ́ɨn tu'irájtuaani a'ɨ́mej tzajta'a ɨ́ mej a'ij pua'a titetiújcha'ɨɨ ɨ́ mej yen japuan huachéjme íiyen chaanaca japua. Ayee pu tí'ijxe'eve'e ɨ́ Dios ɨ́ tej rájya'upua tɨ a'ɨ́ɨn Jesús ayén huárɨni. 5A'ɨ́j pu jɨ́n tiché'e tiyen rɨ́'ɨ tiraatá'an tɨ́j na'a rusén jɨme'e. Ayee pu'u, ché'e ayén teja'uré'enen. 6Jé'ecan nu a'ij pua'a te'utánmua'a ne'ɨ́jna jɨme'e sej siyen ca'anacan mé rúuhua'ana se'ɨ́jna tɨ amuaatajé sej si ra'ará'astijre'en seɨj a'iné Cɨríistu'u pu a'amua japua huaniú ruxɨ́'evi'ira'a jɨme'e. Mú'een xu mé rúuhua'ana sej si seɨcɨé tira'ancuré'an seica ɨ́ niuucari ɨ́ sej nu'u jɨ́n huataújtemua'ave'en. 7Mɨ́ ajta caí, capu a'atzu a'ɨ́ɨn pú'een seɨj ɨ́ niuucari ɨ́ tɨ jɨ́n Dios amua'irátuaasin. Ayej ne'ase seica mú á'amua'ɨtziite'e sej si caí ché'e rɨ́'ɨ tité'ujmua'ate. Tij mecaí miyen tí'itese'e mej seɨcɨé ráaruuren ɨ́ niuucari tɨ xaa a'ij ti'itɨ́j jɨ́me'en tí'iraxa ɨ́ Cɨríistu'u. 8Aru tɨ pua'a ja'atɨ́ ayén seɨcɨé tejá'amua'ixaate'e ɨ́ niuucari tɨ caí ayén namuajre'e a'ij tej teri tejamuá'ixaa, ché'e Dios puaíjtzi raatá'an. Capu amɨ́n a'ij ja'atɨ́ tɨ pú'een tɨ ayén seɨcɨé tejá'amua'ixaate'e, tɨ pua'a inee na'ari seɨj tɨ tí'ivaɨre'e u ta japua. 9Tu'uri tiyen tejá'amua'ixa. Teajtáhua'a tu tiyen tejá'amua'ixaate'e yee tɨ pua'a ja'atɨ́ ayén seɨcɨé tejá'amua'ixaate'e seica ɨ́ niuucari tɨ caí ayén namuajre'e a'ij tej teri tejamuá'ixaa, ché'e Dios puaíjtzi raatá'an. 10¿A'iné setí'imua'atze mú'een neetzi jɨme'e? ¿Ni qui yee nej niyen ráahuausin ɨ́ teɨte tzajta'a mej mi rɨ́'ɨ tinaaseíj nusu nej niyen ráahuausin ɨ́ Dios jemi tɨ a'ɨ́ɨn xaa rɨ́'ɨ tinaaseíj? ¿Ni qui ayén tejamuá'amitɨejte'e nej ne'ɨ́jna jɨ́n niyen tí'itese'e nej ni rɨ́'ɨ tihua'utá'an ɨ́ teɨte? Tɨ́ pua'a ayén té'eme'enche'e nej ne'ɨ́jna jɨ́n tí'itese'e, capu ché'e rɨ'ɨríista á'ame'enche'e nej niyen nicu tí'ijvaɨre'e ɨ́ Cɨríistu'u. 11Ayee nu tí'ijxe'eve'e, ne'ihuaamua'a, sej si ráamua'ati tɨ caí ja'atɨ́ ruseɨ́j a'ij tirájteu ɨ́ niuucari ɨ́ nej jɨ́n tejamuá'ixaa. 12Canu ra'ancuré'a teɨte jemi. Capu ja'atɨ́ ayén tineemuá'ate, sino ɨ́ Cɨríistu'u, a'ɨ́ɨ pu tinaataseíjrate a'ɨ́jna tɨ avítzi'ihuaca'a ɨ́ Dios jemi. 13Seajta mú'een, xu'uri ráamua'areeri'i a'ij nej tí'ijrɨ'ɨrejca'a ɨ́ jéjcua'ɨmua netɨ́'ɨj nauj rá'astijre'eca'a ɨ́ hua'aye'ira a'ɨ́ɨme ɨ́ mej Israél jetze ajtéme'ecan. Na'aranca'anéecan nu jɨ́n a'ij pua'a huá'aruurejca'a a'ɨ́mej ɨ́ mej Cɨríistu'u jemi seijre'eca'a. Nee nu tí'itese'eca'a nej hua'antipuá'ajte'en naíjmi'ica. 14Jaítze'e nu rá'astijre'eca'a ɨ́ nevaújsimua'a teecan tihuá'aye'ira caí a'ɨ́ɨme ɨ́ nexɨ́'ej teɨte, ɨ́ mej Israél jetze ajtéme'ecan, ɨ́ mej majta miyen tí'itetei netɨ́j inee. Naíjmi'ica nu huatéemua'itɨ ne'ɨ́jna jɨme'e ɨ́ nej raayɨ́'ɨtɨhua'a ɨ́ taye'irá. 15- 16Mɨ́ ajta Dios, a'ɨ́ɨ pu na'antíhuau netɨ́'ɨj caí xɨ huanú'ihua. A'ɨ́ɨ pu ajta naatajé a'ɨ́jna jɨme'e tɨ ná'ancu'uvajxɨ ruxɨ́'evi'ira'a jɨme'e. Tɨ́'ɨj i ra'aránajcheca'a nej ráamua'ati a'ɨ́jna tɨ i'i yaujra'an nej ni niyen tihua'utá'ixaate'en huá'a tzajta'a a'ɨ́mej ɨ́ mej caí Israél jetze ajtéme'ecan. Tɨ́'ɨj Dios ayén náaruu, canu ja'atɨ́ jemi a'atanéj tɨ ij a'ɨ́ɨn tinaamuá'aten a'ij nej ti'itɨ́ jɨ́n niyen huárɨni. 17Canu neajta ne'uun a'ujnéj ánti Jerusalén nej ni huá'umuaare a'ɨ́mej ɨ́ mej amuacaí antíhuaviihuaca'a netɨ́'ɨj caí xɨ inee, sino á'iyen nu ne'uun a'atanéj u Arabia. Aj nu ni'ijtá ne'uun á'ume u Damasco. 18Huaíca nine'ira'a nu ne'uun é'etee. Aj nu ni ne'uun a'ujnéj ánti Jerusalén nej ni ráamua'ati ne'ɨ́jna ɨ́ Pedro. Neajta nu jamuan á'ucatii a'achú cumu hua'apua itɨeeri. 19Seɨj nu neajta ne'uun a'uséij ne'ɨ́jna ɨ́ Jacobo tɨ i'i juutzeájra'an ɨ́ tavástara'a. Canu máàj ja'atɨ́ a'uséij tɨ huá'a jetze ajtéme'ecantaca'a a'ɨ́ɨme ɨ́ mej antíhuaviihuaca'a. 20Ayee nu tejá'amua'ixaate'e tzáahuati'ira'a jɨme'e tɨ a'ɨ́ɨn Dios ajta ramua'aree nej caí hua'itzi jɨ́n tejá'amuayu'use'e. 21Neajta á'iyen, ne'uun u a'ará'a ne'újna ɨ́ seɨj chuéjra'a japua u Siria, neajta ne'újna u Cilicia. 22Majta a'ɨ́ɨme ɨ́ mej me'uun a'uchéjme ɨ́ mej majta Cɨríistu'u jemi seijre'e, capu ja'atɨ́ nemua'ajcaa. 23A'ɨ́ɨ mu'u niuucari namuajraca'a tɨjɨ́n: “A'ɨ́ɨ pu yeehui a'ɨ́ɨn pú'een ɨ́ tɨ ajmí'i a'ij pua'a taruurejca'a. Mɨ́ ajta íjii pu yeehui ayén tihuá'a'ixaate'e á'aye'i ɨ́ teɨte mej mi miyen tira'ará'astijre'en ɨ́ ye'irá tɨ ajmí'i ra'antipuá'ajte'emɨ'ɨcaa.” 24Majta a'ɨ́ɨme, rɨ́'ɨ mú tiraatá'aca ɨ́ Dios ineetzi jɨme'e.

will be added

X\