Efesios 2

1Seajta mú'een, ayée xu 'eene'e sej mɨ́'ɨchica'a ɨ́ Dios jemi a'ɨ́jna jɨme'e ɨ́ sej jɨ́n auteájturaa ɨ́ jemin, ajta a'ɨ́jna ɨ́ sej a'ij pua'a rɨjcaa. 2Ayee xu a'ij pua'a titetiújcha'ɨɨca'a setɨ́'ɨj seuj siyen rɨjcaa a'ij mej rɨcɨ íjii a'ɨ́ɨme ɨ́ mej yen japuan seijre'e ɨ́ chaanaca japua. A'ájná'ɨmua a'ɨ́j xu siyen á'astijre'eca'a se'ɨ́jna tɨ a'ij pua'a een tɨ ajta a'ɨ́jna jɨ́n antiújmua'aree tɨ ayén tíhua'uta'aíjte'en a'ɨ́mej ɨ́ mej xɨéjniu'ucari pú'een ɨ́ mej seijre'e eeca tzajta'a. A'ii pu a'ɨ́ɨn pú'een ɨ́ xɨéjniu'ucari tɨ ari tí'imuarɨ'e huá'a tzajta'a a'ɨ́mej ɨ́ mej huá'a jetze ajtéme'ecan a'ɨ́mej ɨ́ mej caí ja'atɨ́ á'astijre'e. 3Teajta iteen, amuacaícan tu naími'i tiyen huá'a jetze ajtéme'ecantaca'a a'ɨ́mej. Ayee tu che'atá tena'a rá'astijre'eca'a a'ij tɨ titá'amitɨejte'eca'a a'ɨ́jna jɨme'e ti'itɨ́ tɨ huanéj ɨ́ ta jetze nusu ti'itɨ́ tɨ huataseíjre ɨ́ tamua'atzíira'a jɨme'e. Tɨ́j na'a tɨ seijre'eca'a ɨ́ ta jetze, teen tu raatá'acare'e tɨ a'ɨ́ɨn titaata'aíjte'en. Ayee tu éene'eca'a matɨ́j ɨ́ seica ɨ́ tɨ Dios puaíjtzi hua'utá'asin. 4Mɨ́ ajta Dios, a'ɨ́ɨ pu jeíhua huápɨ'ɨ taataxɨ́'eve. A'ɨ́j pu jɨ́n, naa pu tá'ancu'uvajxɨ ruxɨ́'evi'ira'a jɨme'e. 5Tetɨ́'ɨj teuj tiyen éene'e tej mɨ'ɨchica'a a'ɨ́jna jɨme'e ɨ́ tej jɨ́n auteájturaa ɨ́ jemin, a'ɨ́ɨ pu taatarújte jamuan ɨ́ Cɨríistu'u. A'ɨ́ɨ pu amua'irájtua a'ɨ́jna jɨme'e tɨ huápɨ'ɨ rɨ́'ɨ tejamuájcha'ɨɨ ruxɨ́'evi'ira'a jɨme'e. 6Ajta, Dios pu taajɨ́ste jamuan ɨ́ Cɨríistu'u. A'ɨ́ɨ pu ajta a'ɨ́jna jamuan án taja'urá'atzaca'a a'ujna u júte'e a'u tɨ tí'aijta a'ɨ́jna ɨ́ Cɨríistu'u tɨ ajta i'i Jesús. 7Ayee pu een jɨ́n huarɨ́j tɨ ij ayén éene'e á'ara'ani tɨ́j na'a tɨ yú auca'itɨ́ a'ame tɨ́j na'a rusén jɨme'e. A'ɨ́ɨ pu taataseíjrate'esin tɨ rɨ́'ɨ huápɨ'ɨ titájcha'ɨɨ a'ɨ́jna jɨme'e tɨ a'ɨ́ɨn ta japua huaniú a'ɨ́jna ɨ́ Cɨríistu'u tɨ ajta i'i Jesús. 8A'ɨ́ɨ pu amua'irájtua a'ɨ́jna jɨme'e tɨ a'ɨ́ɨn rɨ́'ɨ tejamuájcha'ɨɨ a'ɨ́jna jɨme'e sej rá'antzaahua. Dios pu ayén amuaatá'a ruxɨ́'evi'ira'a jɨme'e. Caxu rujɨ́ɨmua'a sena'a a'ij tirájteu. 9Tɨ́'ij caí ja'atɨ́ á'ujtzaahuate'e, a'ɨ́j pu jɨ́n caí rɨ'ɨrí tɨ ja'atɨ́ ruseɨ́j raamuá'itɨn a'ɨ́jna jɨme'e a'ij tɨ xɨ́'epɨ'ɨn jɨ́n rɨcɨ. 10Ayee pu'u na'a, a'iné teen tu te'ɨ́ɨn pú'een ɨ́ Dios ayén ruseɨ́j táaruurejsin a'ij tɨ tirá'amitɨejte'e. Jéjcuacan pu ayén táaruu ɨ́ tatzajta'a jamuan a'ɨ́jna ɨ́ Cɨríistu'u tɨ ajta i'i Jesús tej ti tiyen huárɨni a'ɨ́jna jɨme'e tɨ i'i xɨ́'epɨ'ɨn a'ij tɨ a'ɨ́ɨn amuacaícan rɨ́'ɨ tiráaruu téjmi jɨme'e. 11- 12A'ɨ́j pu jɨ́n caxu siyen yá'uhua'anan tɨ a'ájná'ɨmua ayée xu 'eene'e sej caí Cɨríistu'u jemi huaté'uuca. Ajta mú'een xu caí huá'a jetze ajtéme'ecantaca'a a'ɨ́mej ɨ́ mej Israél jetze ajtéme'ecan. Ayej xaa ne'u ti'ayajna, a'ɨ́ɨme ɨ́ mej miyen huataújmua'a tɨjɨ́n: “I tej ra'antisí'iche ɨ́ tanavij”; ayée mú amuaatamuá'a mú'ejmi tɨjɨ́n “Mɨ́ sej caí siyen ra'antisí'iche ɨ́ runavij.” Ayee mú tejá'amuaxa me'ɨ́jna jɨme'e sej seɨj chuéjra'a japua é'eme'ecan. Caxu seajta yá'uhua'anan tɨ a'ájná'ɨmua, ayée xu caí ajtéme'ecantaca'a a'ɨ́mej jetze ɨ́ tɨ Dios huá'a jemi raateájtuaa ɨ́ niuucari ɨ́ tɨ jɨ́n te'ataújratziiri'i tɨ ayén rɨ́'ɨ tihua'utá'an. Capu ajta mé'e já'ahua'aca'a ɨ́ sej jɨ́n rachú'eve'en. Ajta, capu huataseíjre mú'ejmi jemi ɨ́ Dios íiyen chaanaca japua. 13Mɨ́ ajta íjii, mɨ sej a'ɨmuá a'uté'uuca'a a'u tej teajta iteen jé'eseijre'eca'a, xu'uri vejli'i huaté'uu téjmi jemi a'ɨ́jna jɨme'e tɨ a'ɨ́ɨn Cɨríistu'u ayén a'amua japua huaniú a'ɨ́jna jɨme'e tɨ ruxuure'e airáaxɨre. 14A'ii pu a'ɨ́ɨn pú'een ɨ́ tɨ ta'anpuá'ajte yú tatzajta'a naíjmi'ica mú'ejmi, ajta itejmi. A'ɨ́ɨ pu ayén táaruu tej ti tiyen seɨj tena'a teɨtestemua'ame'en pu'éene'e tá'ara'ani. A'ɨ́ɨ pu raaté'uu a'ɨ́jna tɨ te'entanámi'ihuaca'a, a'ɨ́jna ɨ́ tej jɨ́me'en tané'usi'ite'eca'a. 15A'ɨ́ɨ pu ra'antipuá'ajte ɨ́ rutevij jɨme'e a'ɨ́jna ɨ́ niuucari ɨ́ mej jɨ́n tí'aijta, nain jɨme'e ɨ́ mej jɨ́n tihuá'a'ijmɨira. Ayee pu een jɨ́n huarɨ́j tɨ ij ayén huá'uruuren ɨ́ ru jetze a'ɨ́mej ɨ́ mej hua'apua mej mi seɨ́j mana'a teɨtestemua'ame'en pu'éene'e muá'ara'ani. Ayee pu a'ɨ́jna jɨ́n huarɨ́j, a'ɨ́ɨ pu hua'utéepua'ajte ɨ́ mej hua'apua. 16A'ɨ́j pu ajta jɨ́n ayén huarɨ́j tej ti teajtáhua'a a'uté'uu tá'ara'ani ɨ́ Dios jemi ɨ́ tej hua'apua a'ɨ́jna jɨme'e ɨ́ rutevij ɨ́ mej rá'utatai ɨ́ cúruu jetze. Ayee pu een jɨ́n huarɨ́j, a'ɨ́ɨ pu ra'antipuá'ajte ɨ́ tej jɨ́n tané'usi'ite'eca'a. 17A'ɨ́ɨ pu mú pa'uvé'emej tɨ i ayén tejámuaatá'ixaate'en a'ɨ́jna jɨme'e ɨ́ niuucari ɨ́ tɨ jɨ́n amua'anpuá'ajte'en mɨ sej a'ɨmuá a'uté'uuca'a. Ayee pu che'atá na'a tihua'utá'ixaa a'ɨ́mej ɨ́ mej vejli'i seijre'eca'a a'ɨ́jna jɨme'e ɨ́ niuucari ɨ́ tɨ jɨ́n ajta hua'utéepua'ajte a'ɨ́mej. 18Ayee pu'u, Cɨríistu'u ta japua huaniú, tej ti, i tej hua'apua, seɨ́j tena'a jɨ́n ɨ́ xɨéjniu'ucari tiyen jamuan tiu'utaxáj te'ɨ́jna jamuan ɨ́ tej rájya'upua. 19A'ɨ́j xu jɨ́n caí ché'e se'ɨ́ɨn pú'een ɨ́ mej seɨj chuéjra'a japua é'eme'ecan na'ari a'ɨ́ɨme ɨ́ mej caí a'ij rumuari, sino xu'uri huá'a jetze ajtéme'ecan a'ɨ́mej jemi ɨ́ mej a'uté'uu ɨ́ Dios jemi. Jee xaa ne'u, xu'uri huá'a jetze ajtéme'ecan a'ɨ́mej ɨ́ mej teɨtestemua'ame'en pú'een ɨ́ Dios. 20Naíjmi'i tu tí'ivaɨre'e tá'aju'un tɨ́j seɨ́j ɨ́ chi'ij tɨ tzajta'an é'eseijre'e ɨ́ Dios. A'ɨ́ɨme ɨ́ tɨ hua'utajé ɨ́ Jesús, majta a'ɨ́ɨme ɨ́ mej mejmí'i tí'ixaxa'ata'a ɨ́ Dios jetze me'ecan, ayée mú tí'ivaɨre'e muá'aju'un tɨ́j tetej tɨ japuan ájtaavijhua ɨ́ jaxu'u. Ajta a'ɨ́ɨn ɨ́ Cɨríistu'u tɨ ajta i'i Jesús, a'ii pu a'ɨ́ɨn pú'een ɨ́ tetej tɨ esquineero jɨ́n tí'ivaɨre'e. 21Naími'i tu títavi'iraxɨ'ɨsin jetzen te'ɨ́jna ɨ́ Cɨríistu'u, teajta naími'i tu huatéeju'u tá'aju'un tej ti tiyen tí'ivaɨre'e tá'ara'ani tɨ́j teyuu tɨ jetzen Dios huiirájcati. 22Seajta mú'een, jetzen a'ɨ́jna ɨ́ Cɨríistu'u, mú'een xu seajta tiújvi'iraxɨ'ɨsin sej si siyen tí'ivaɨre'e xá'ara'ani tɨ́j chi'ij tɨ jetzen huiirájcati ɨ́ ruxɨ́ejniu'uca jɨme'e a'ɨ́jna ɨ́ Dios.

will be added

X\