Efesios 1

1Inee, i nej i'i Pablo, nee nu seɨ́j pɨ́rɨcɨ tɨ Dios na'antíhuau ruxɨ́'evi'ira'a jɨme'e nej ni ti'itɨ́j jɨ́n tiraatévaɨre'en a'ɨ́jna ɨ́ Cɨríistu'u tɨ ajta i'i Jesús. Ayee nu tejá'amuayu'use'e mú'ejmi, mɨ sej teɨtestemua'ame'en pú'een ɨ́ Dios, mɨ sej Éfeso é'eche. Nain xu jɨ́n araúraste a'ij tɨ ari tejámua'íjca a'ɨ́jna ɨ́ Cɨríistu'u tɨ ajta i'i Jesús. 2Ajta a'ɨ́ɨn ɨ́ Dios, ɨ́ tej rájya'upua jamuan, ajta a'ɨ́ɨn ɨ́ tavástara'a, a'ɨ́jna ɨ́ Jesús tɨ ajta i'i Cɨríistu'u, miché'e me'ɨ́n rɨ́'ɨ tejamuáacha'ɨɨn, majta amua'anpuá'ajte'en ɨ́ a'amua tzajta'a. 3Tiché'e rɨ́'ɨ tiraatá'an te'ɨ́jna ɨ́ Dios ɨ́ tɨ ya'upuáara'an pú'een ɨ́ tavástara'a, a'ɨ́jna ɨ́ Jesús tɨ ajta i'i Cɨríistu'u, a'iné a'ɨ́ɨn Dios, a'ɨ́ɨ pu ayén taatapuaíjve nain tɨ́j na'a tɨ é'eseijre'e u ta japua tɨ ij titáacɨ'ɨti jamuan ɨ́ Cɨríistu'u. 4Ayee pu ti'ayajna, a'iné jéjcua ɨmuá, tɨ́'ɨj caj xɨ raatétaahuaca'a ɨ́ chaanaca ɨ́ tej yen japuan seijre'e, a'ájná'ɨmua Dios pu ta'antíhuau jamuan ɨ́ Cɨríistu'u tej ti tiyen urarɨ́'ene'e tá'ara'ani ɨ́ tatzajta'a, tej ti caí ti'itɨ́j jɨ́n auteáturan ɨ́ jemin. 5- 6A'iné jeíhua pu huápɨ'ɨ taxe'eve'eca'a, ayée pu titaaxɨ́'epɨ'ɨntari'iri'i tɨ a'ɨ́ɨn ruseɨ́j tayá'upua á'ara'ani a'ɨ́jna jɨme'e tɨ Cɨríistu'u ayén huárɨni tɨ ta jetze me'ecan huámɨ'ɨni. Dios pu ayén titaaxɨ́'epɨ'ɨntari'iri'i ɨ́ ruxɨ́'evi'ira'a jɨme'e. Ayee éene'e á'ara'ani, tej ti tiyen rɨ́'ɨ tiraatá'an a'ɨ́jna jɨme'e tɨ jeíhua huápɨ'ɨ naa seijre'e tɨ a'ɨ́ɨn Dios ayén rɨ́'ɨ titáacha'ɨɨn. Ajta ruxɨ́'evi'ira'a jɨ́n ayén rɨ́'ɨ titáacha'ɨɨn jamuan a'ɨ́jna ɨ́ tɨ raxɨ́'eve'e, a'ɨ́jna ɨ́ Cɨríistu'u. 7A'ɨ́ɨ xaa tiu'utanájchitaca'a a'ɨ́jna ɨ́ tej jɨ́n té'echa'ɨca'a ɨ́ Dios jemi. Ayee pu a'ɨ́jna jɨ́n tiu'utanájchitaca'a a'ɨ́jna jɨme'e tɨ ruxuure'e airáaxɨre ta jetze me'ecan tɨ ij Dios ayén titaatá'uuni'i ɨ́ tej jɨ́n jemin auteájturaa. Ayee tu een jɨ́n ramua'aree tɨ Dios rɨ́'ɨ titáacha'ɨɨ ruxɨ́'evi'ira'a jɨme'e, nain jɨme'e tɨ tejé'eseijre'e u ta japua. 8Nain pu ayén taatapuaíjve a'ɨ́jna jɨme'e tɨ a'ɨ́ɨn nain jɨ́n rɨ́'ɨ mé teuúmua'aree, ajta nain jɨ́n yaú'itɨe a'ɨ́jna ɨ́ Dios. 9Ajta, ayée pu taatá'a tej ráamua'ati ti'itɨ́ tɨ pɨ́rɨcɨ tɨ rú'avaa a'ɨ́jna jɨme'e a'ij tɨ tí'ijxe'eve'e, a'iné ayée pu ra'aránajcheca'a tɨ ayén huárɨni tɨ́'ɨj a'ɨ́ɨn ayén tiraaxɨ́'epɨ'ɨntare ti'itɨ́ tɨ jɨ́n ti'itevée a'ame ɨ́ Cɨríistu'u. 10Ayee pu raaxɨ́'epɨ'ɨntare tɨ ayén éene'e a'ame tɨ́'ɨj teja'uré'enen a'ájna xɨcájra'a tɨ jetzen nain araúrastejsin, tɨ ij Cɨríistu'u hua'amu'úu pu'eene'e a'ame naíjmi'i matɨ́j mana'a pua'amé é'eseijre'e u ta japua, ajta matɨ́j mana'a pua'amé yen seijre'e íiyen chaanaca japua. 11- 12Teajta iteen, i tej amuacaí rá'antzaahua te'ɨ́jna ɨ́ Cɨríistu'u, Dios pu ajta ta'antíhuau tɨ ij ti'itɨ́ táacɨ'ɨti jamuan ɨ́ Cɨríistu'u. A'ɨ́ɨ pu jéjcua ɨmuá taaxɨ́'epɨ'ɨntari'iri'i a'ij tɨ ayén tira'aránajcheca'a. A'ii pu a'ɨ́ɨn pú'een ɨ́ tɨ Dios nain jɨ́n rɨ́'ɨ tiú'uruuren a'ij tɨ ari ti'ihuaújxɨ'epɨ'ɨntari'iri'i tej ti tiyen rɨ́'ɨ tiraatá'an te'ɨ́jna jɨme'e tɨ jeíhua huápɨ'ɨ naa tí'iseijre'e ɨ́ jemin. 13Seajta mú'een, mɨ sej siyen ráanamuajri'i ɨ́ niuucari tɨ ayén ti'ayajna, ɨ́ tɨ Dios jɨ́n amua'irátuaasin, mú'een xu seajta rá'antzaahua. Ajta, ayée pu che'atá na'a tejamuaacɨ́'ɨ jamuan ɨ́ Cɨríistu'u tɨ́j ari Dios ayén te'ataújratziiri'i tɨ a'ɨ́ɨn xɨéjniu'ucare'ara'an ɨ́ Dios ayén huateáturan mú'ejmi jemi. 14Ajta a'ɨ́ɨn xɨéjniu'ucare'ara'an ɨ́ Dios, a'ii pu a'ɨ́ɨn pú'een ɨ́ tɨ téjmi jemi huateájturaa, ɨ́ tej teajta jɨ́n ramua'aree tɨ ayén ti'ayajna tɨ ti'itɨ́ táacɨ'ɨti a'ájna xɨcájra'an tɨ jetzen Dios titaatátuiire'esin a'ɨ́jna jɨme'e ɨ́ Cɨríistu'u tɨ ta jetze me'ecan tiu'utanájchitaca'a tej ti rɨ́'ɨ tiraatá'an te'ɨ́jna jɨme'e tɨ jeíhua huápɨ'ɨ naa tí'iseijre'e ɨ́ jemin. 15- 16A'ɨ́j nu jɨ́n, tɨ́j na'a nej amuacaí ráanamuajri'i sej siyen rɨ́'ɨ rá'astijre'e ɨ́ tavástara'a, a'ɨ́jna ɨ́ Jesús, seajta siyen rɨ́'ɨ tihuá'ajcha'ɨɨ naíjmi'ica a'ɨ́mej ɨ́ teɨtestemua'ame'en ɨ́ Dios, tɨ́j na'a tɨ yú e'iré'ene, canu ja'anáj raatapuá'ajtaca'a nej niyen tí'ijteujtzi'ire'e ɨ́ Dios mú'ejmi jɨme'e, neajta nu rahuauhuau mú'ejmi jɨme'e. 17Ayee nu nauj niyen rahuauhuau jemin a'ɨ́jna tɨ ya'upuáara'an pú'een ɨ́ tavástara'a, a'ɨ́jna ɨ́ Jesús tɨ ajta i'i Cɨríistu'u. Ayee nu rahuauhuau ne'ɨ́jna ɨ́ ya'upuáara'an tɨ huápɨ'ɨ naa seijre'e tɨ ij a'ɨ́ɨn xɨéjniu'ucare'ara'an ayén amuaatá'an sej si rɨ́'ɨ mé titeumuámua'aree, sej si seajta rɨ́'ɨ tiyaú'itɨée xá'ara'ani a'ɨ́jna tɨ ari huataseíjre mú'ejmi jemi sej si siyen tiráamua'ati temua'a naa ɨ́ Dios. 18Ayee nu neajta rahuauhuau sej si seajta yaú'itɨée xá'ara'ani tzáahuati'ira'a jɨme'e ɨ́ a'amua tzajta'a sej si siyen ráamua'aree ti'itɨ́ tɨ pɨ́rɨcɨ ɨ́ sej rachú'eve'e, ɨ́ tɨ jɨ́n amuaatajé ɨ́ Dios, sej si seajta siyen ráamua'aree a'ij tɨ een tɨ́j na'a pua'amé tɨ rɨ́'ɨ huápɨ'ɨ naa seijra a'ame a'ɨ́jna tɨ huá'acɨ'ɨti a'ɨ́mej ɨ́ teɨtestemua'ame'en ɨ́ Dios. 19- 20Neajta nu niyen rahuauhuau sej si siyen ráamua'aree tɨ caí ámitɨeere'e, tɨ huápɨ'ɨ jeíhua raayɨ́'ɨtɨ ɨ́ Dios tɨ ti'itɨ́j jɨ́n ayén huáruuren ɨ́ téjmi tzajta'a a'ɨ́jna ɨ́ rumuárɨ'eri'ire'ara'an jɨme'e. Teen tu tiyen rá'atzaahuate'e a'ɨ́jna jɨme'e tɨ ari jeíhua huápɨ'ɨ rɨ́'ɨ tiú'uruu ɨ́ rumuárɨ'eri'ire'ara'an jɨme'e a'ɨ́jna jɨme'e a'ij tɨ huarɨ́j ɨ́ Cɨríistu'u jɨme'e tɨ́'ɨj ayén raatarújte huá'a tzajta'a ɨ́ mɨ'ɨchite, ajta ya'uví'itɨ u ta japua. Tɨ́'ɨj i án yá'ujra ɨ́ ɨpuari japua rurɨ'ɨríinta'a pújme'en. 21Cɨríistu'u pu a'ɨ́jna jɨ́n te'enteájrupi ɨ́ tɨ jaítze'e ve'ée caí máàj ti'itɨ́ tɨ u júte'e é'eseijre'e. A'ɨ́ɨ pu jaítze'e ve'ecán jɨ́n ti'itéjvee caí máàj ja'atɨ́ tɨ tí'aijta na'ari ja'atɨ́ tɨ ti'itɨ́ jɨ́n antiújmua'aree nusu tevi tɨ ca'anéeri jɨ́n tiu'utéemua'itɨ o ja'atɨ́ tɨ a'ɨ́jna jɨ́n ti'itéjvee tɨ amuájca jɨme'e. Jaítze'e pu ajta ayén tiú'ujxe'eve'e ɨ́ niuucari ɨ́ tej jɨ́n tiyen ratamuá'amua te'ɨ́jna ɨ́ Cɨríistu'u caí máàj seɨj ɨ́ niuucari ɨ́ tej jɨ́n ja'atɨ́ huatamuá'a. Ayee pu xaa ne'u che'atá een íjii tɨ me'ecan, ajta tɨ yú auca'itɨ́ a'ame tɨ́j na'a rusén jɨme'e. 22Ajta a'ɨ́ɨn Dios, a'ɨ́ɨ pu raatá'a tɨ Cɨríistu'u nain jɨ́n antiújmua'areere, ajta a'ɨ́ɨ pu ra'antíhua'u tɨ tiu'utévaɨre'en a'ɨ́jna jɨme'e tɨ a'ɨ́ɨn pu'éene'e á'ara'ani ɨ́ hua'amu'úu nain jɨme'e ɨ́ huá'a jemi ɨ́ mej e'etiújse'ɨri mej mi raateánajche ɨ́ Dios. 23Majta a'ɨ́ɨme ɨ́ mej e'etiújse'ɨri, ayée mú che'atá mana'a ajtéme'ecan a'ɨ́jna jetze ɨ́ hua'amu'úu tɨ́j ja'atɨ́ ratéhua'ira'a ɨ́ ru jetze, a'iné a'ɨ́jna ɨ́ Cɨríistu'u tɨ ajta hua'amu'úu pú'een, a'ɨ́ɨ pu huá'anaijmire'en nain jɨme'e. A'iné a'ii pu a'ɨ́ɨn pú'een ɨ́ tɨ raanaíjmire'en tɨ́j na'a tɨ é'eseijre'e tɨ Dios raatétaahuaca'a.

will be added

X\